Tanganing magibo an sugo sainda, kaipuhan kan mga Estudyante sa Bibliya na magin daing takot. Kaipuhan nindang ibalangibog an “maugmang bareta” sa mga mahuyo pati man “an aldaw nin pamamalos” sa mga maraot.

Si Brother J. H. Hoskin, na nakaistar sa Canada, daing takot na naghulit sa ibong nin pagkontra. Kan tigsuli kan 1921, may nabisto siyang ministrong Metodista. Pinunan ni Brother Hoskin an pakikipag-ulay saiya sa pagsabing: “Dapat na magkaigwa kita nin marahay na pag-uulay manungod sa Kasuratan, asin dawa kun magkalain kita sa nagkapirang bagay, puwede kitang mag-uyon na dai magkauyon asin magsuwayan na mag-amigo.” Pero bako iyan an nangyari. Nagigirumduman ni Brother Hoskin: “Pirang minuto pa lang kaming nag-uulay kan hampakon nin makusugon [kan ministro] an pinto kaya paghuna ko magkakaparasa an dakulang salming kaiyan.”

“Ano ta dai ka na lang magduman sa mga bakong Kristiyano asin makipag-ulay sainda?” an kurahaw kan ministro. Dai nagsimbag si Brother Hoskin, pero kan pahali siya, naisip niya, ‘Garo siya na baga idtong pigsasabi niya!’

Kan sunod na aldaw mantang nagsesermon an ministro, nagpadagos an pag-atake niya. “Pinatanidan niya an mga miyembro niya, na ako daa an pinakamaraot na paradaya na nag-abot sa banwang idto asin na dapat akong badilon,” an nagirumduman ni Brother Hoskin. Dai lamang siya nagpaapektar, imbes padagos siyang naghulit asin nagin mapanggana diyan. Sinabi niya: “Naugma talaga akong marhay sa paghulit duman. May mga tawo pa nganing nagsasabi nin makusog, ‘Aram kong lingkod ka nin Diyos!’ asin hinahapot ninda ako kun may maitatabang sinda sako para dai ako magkulang nin ano man.”

Para matabangan na umuswag an mga interesado, nagpublikar an mga Estudyante sa Bibliya nin mga programa sa pag-adal sa The Golden Age. * An programang Juvenile Bible Study kompuwesto nin mga hapot na puwedeng ipakipag-ulay kan mga magurang sa saindang mga aki. “Ipapakipag-ulay [kan mga magurang] an mga hapot na ini sa saindang mga aki asin tatabangan an mga ini na hanapon sa Bibliya an simbag.” May mga hapot, arog kan “Pira an libro na yaon sa Bibliya?,” na nagtutukdo nin  simpleng mga bagay manungod sa Bibliya. An iba, arog kan “Dapat daw na asahan kan lambang tunay na Kristiyano na mapapaatubang sinda sa persekusyon?,” nag-aandam sa mga aki na magin daing takot na parahulit.

An programang Advanced Studies in the Divine Plan of the Ages nagtao sa maygurang na mga Estudyante sa Bibliya nin nakakapaisip na mga hapot na basado sa inot na volume kan Studies in the Scriptures. Ribo-ribong parabasa an nakinabang sa mga programang ini, pero ipinaisi kan The Golden Age na Disyembre 21, 1921, na ipupundo na an duwang programang ini. Taano ta biglang ipinundo iyan?

Narealisar kan mga nanginginot na kaipuhan kan bagong mga tinutukduan sa Bibliya na makanuod nin panginot na mga katotoohan sa sistematikong paagi. Para magibo iyan, pig-release kan Nobyembre 1921 an librong The Harp of God. An mga interesado na nag-ako kan libro ipinaenrol man sa The Harp Bible Study Course. An self-study course na ini nakatabang sa mga parabasa na masabutan an “plano nin Diyos na bendisyunan an katawuhan nin daing katapusan na buhay.” Paano isinagibo an self-study course na iyan?

Pag an sarong tawo mag-ako kan libro, tatawan siya nin asignasyon na babasahon na nakaimprenta sa sadit na kard. Sa sunod na semana, tatawan siya nin kard na may nagkapirang hapot na basado sa asignasyon na iyan. Sa bandang hurihan kan kard nakasurat an asignasyon na babasahon para sa sunod na semana.

Kada semana sa laog nin 12 semana, tatawan an tinutukduan nin bagong kard na ipinapadara kan haraning klase, o kongregasyon. Sa parati an nagpapadara kan mga kard iyo an mga tugang sa kongregasyon na may edad na o limitado na an nagigibo dahil sa kamugtakan. Halimbawa, nagirumduman ni Anna K. Gardner na taga Millvale, Pennsylvania, U.S.A.: “Kan i-release an The Harp of God, natawan kaiyan an ate kong si Thayle, na dai na gayong makalakaw, nin mas dakul na trabahong kaya niyang gibuhon. Nagpapadara siya surusemana nin mga kard na may mga hapot.” Pag tapos na an kurso, personal na bibisitahon an tinutukduan para tabangan ining lalo pang makanuod manungod sa Bibliya.

Sa pagtatapos kan taon, nagpadara si Brother J. F. Rutherford nin surat sa gabos na klase. Sinabi niya na “an ginibong pagpatotoo para sa Kahadian sa taon na ini mas mahiwas saka mas epektibo kisa sa ginibong pagpatotoo sa arin man na taon kan panahon nin pag-ani.” Dangan sinabi niya: “Dakul pa an kaipuhan na gibuhon. Dagkahon an iba na umiba sa marahayon na paglilingkod na ini.” Malinaw na ginibo kan mga Estudyante sa Bibliya an sadol na ini. Durante kan taon 1922, daing takot nindang ipinaisi an Kahadian sa pambihirang paagi.