Udinmwẹ ẹre ọ ru iyobọ ne etẹn na ya sẹtin kporhu, rhunmwuda, ẹi re iyẹn nọ maan ọkpa ẹre iran ghaa kporhu ẹre, iran vbe gha kporhu vbekpa ‘ẹdẹ ne Jehova khian khọn eghian rẹn muotọ.’

Ọ mwẹ ọtẹn nokpia ọkpa na tie ẹre J. H. Hoskin, ne ọ ghaa rre Canada; te ọ wa gha kporhu vbene ohan ma na muẹn, agharhemiẹn wẹẹ, emwa ghaa gbe ẹre odan. Vbe omuhẹn ọghe ukpo 1921, ọ keghi dekun ohẹn esọsi e Methodist ọkpa vbe ikporhu. Ọtẹn Nokpia Hoskin keghi tama rẹn wẹẹ: “I rẹnrẹn wẹẹ, emwi ughughan ẹre ima yayi, sokpan ma gha sẹtin ziro yan emwi nọ rre Baibol, vbene ima i na muan ẹmwẹ.” Sokpan, ọ ma de ye vbene ọtẹn ima te ya aro yi. Ọtẹn Nokpia Hoskin khare wẹẹ: “Ọ ma he kẹ mwẹ ya guan fo, vbe [ohẹn esọsi] nii bi ẹkhu gbe; vbene ọ ya bi ẹkhu nii gbe vbe ẹdẹrriọ, ekherhe ọ ma gi glasi nọ rre ekhu nii wagha.”

Nene ohẹn esọsi keghi van muẹn ọtẹn ima, ọ tama rẹn wẹẹ: “U ma miẹn avbe ikeferi kporhu ma, ne u na do gha kporhu ma mwẹ?” Ọtẹn Nokpia Hoskin ma ghi zẹ ẹmwẹ wanniẹn ọnrẹn, ọ na gha tae vbe uwu ekhọe wẹẹ, ‘Vbene uwẹ ya yin ban, avbe ikeferi ma maan sẹ ruẹ?’

Ohẹn esọsi nii ghi kporhu vbe esọsi ọghẹe vbe ẹdẹ nọ lelẹe, ọ na gha ya unu rhia Ọtẹn Nokpia Hoskin. Ọtẹn na khare wẹẹ, “Ọ na gha tama ivbi esọsi ọghẹe wẹẹ, ne iran gha begbe vbe egbe mwẹ, ọ na wẹẹ ọhọnhoghe ẹre I khin, ọ na vbe tama iran wẹẹ, iran gha miẹn mwẹ, ne iran ya osisi fi mwẹ.” Sokpan ọna ma da ọtẹn ima obọ yi, nẹ ghẹ ghi kporhu; te ọ wa ye gha kporhu, erriọ ikporhu ọghẹe vbe gha biẹ ọmọ esi. Ọ khare wẹẹ: “Te iwinna ikporhu ne I ghaa ru vbe ẹvbo nii wa gha yẹẹ mwẹ. Emwa eso ghi kue gha tama mwẹ wẹẹ, ‘Ma rẹnrẹn wẹẹ Osanobua ẹre ọ gie ruẹ rre!’ Iran ghi vbe gha kha wẹẹ, iran mu egbe ne iran ya ru iyobọ ne I rhirhi gha gualọ mẹ.”

Etẹn ni ghaa rrọọ vbe ẹghẹ nii keghi suẹn gha gbẹn ebe ọghomwa na tie ẹre The Golden Age ladian, ne iran ya ru iyobọ ne emwa ni hoo ne iran ya rẹn e Baibol sayọ. * Inọta eso ghaa ladian vbe ebe na, vbe abọ na tie ẹre Juvenile Bible Study program, ne evbibiẹ emọ gha sẹtin loo ya gu ivbi iran ziro. Evbibiẹ emọ gha ghi nọ ivbi iran avbe ọta na nẹ, iran ghi ru iyobọ ne iran ya rẹn ewanniẹn ne Baibol rhie yọ. Inọta eso ni rre ebe nii kegha ru iyobọ ne emwa, ya rẹn emwi eso ni ma lọgho gbe, nọ khẹke na rẹn vbekpa e Baibol; ọkpa vbe usun  inọta na ọre, “Inu ebe ẹre ọ rre uwu e Baibol?” Vbene inọta eso ni rre ebe nii na ru iyobọ ne igbama, ne iran sẹtin gha kporhu, vbene ohan i na mu iran; ọkpa vbe usun avbe inọta na ọre, “Ọ khẹke ne Ivbiotu e Kristi hia gha mwẹ ọnrẹn vbe ekhọe wẹẹ, iran gha miẹn ukpokpo ra?”

Inọta eso vbe gha ladian vbe ebe na, vbe abọ na tie ẹre Advanced Studies in the Divine Plan. Te a gbẹnnẹ avbe inọta na ladian, na mieke na yae ru iyobọ ne etẹn ni rre iko ya gha mwẹ irẹnmwi sayọ. Ewanniẹn ọghe avbe inọta na, kegha rre abọ nọ ka gha ladian vbe ebe ọghomwa na ghaa tie ẹre Studies in the Scriptures. Avbe inọta ni ghaa ladian vbe abọ eva na vbe The Golden Age, wa ru iyobọ ne emwa arriaisẹn nibun. Sokpan The Golden Age ọghe December 21, 1921, keghi kha wẹẹ, ai khian ghi gha miẹn abọ eva na. Vbọzẹ ne a na ru afiwerriẹ na?

Etẹn ni ghaa mu asanikaro vbe ẹghẹ nii keghi bẹghe ẹre wẹẹ, ọ khẹke ne iran fẹko gha maa etẹn re, avbe ẹmwata ni rre Baibol. Rhunmwuda ọni, vbọ ghi rre November 1921, iran keghi rhie ebe ọgbọn ladian, na tie ẹre The Harp of God. A gha rhie ebe na ne ọmwa vbe ikporhu, ọ na vbe gha hoo ne ọ rẹn sayọ, etẹn ghi ru emwamwa eso nẹẹn, ne ọ mieke na sẹtin gha tobọ re ruẹ emwi vbe Baibol; emwamwa na ẹre iran ghaa tie ẹre The Harp Bible Study Course. Emwamwa na kegha ru iyobọ ne emwa vbenian ya rẹn vbekpa arrọọ etẹbitẹ, ne Osanobua khian ya fiangbe emwa nagbọn. De vbene etẹn ya gha ru emwamwa na hẹ?

Iran gha ghi rhie ebe na ne ọmwa nẹ, iran ghi vbe rhie ekadi nekherhe ba ẹre; emwi na gbẹn ye ekadi nii ọre ako eso ne iran hoo ne ọmwa nii tie vbe ebe nii. Vbe uzọla nọ lelẹe, iran ghi sẹnd ekadi ọvbehe gie ẹre; iran ghi gbẹn inọta eso yọ, nọ dekaan ako ne ọ ka tie. Iran ghi vbe gbẹn ako ọvbehe ne iran hoo ne ọ tie ye nene ekadi.

Vbe ọwara uzọla 12, etẹn ni rre iko ni sikẹ ọ yan owa na, ghi gha sẹnd ekadi ughughan gie ẹre. Etẹn ni khian ọmaẹn nẹ, ra nẹi ghi sẹtin kporhu ke owa ya sẹ owa, ẹre ọ mobọ gha sẹnd avbe ekadi na. Vbe igiemwi, ọ mwẹ ọtẹn nokhuo ọkpa na tie ẹre Anna K. Gardner vbe U.S.A.; ọtẹn na khare wẹẹ: “Vbe ẹghẹ ne The Harp of God ya ladian, ẹkpotọ keghi kie ne ọtẹn mwẹ nokhuo ighẹ Thayle ne egbe ma gba na, ne ọ ya sẹtin rhie egbe ye iwinna ikporhu sayọ. Vbe uzọla uzọla, ọ ghi gha sẹnd ekadi ne inọta ye, gie ọmwa nọ miẹn ima ebe vbe ikporhu.” A gha ghi sẹnd ekadi hia gie ọmwa vbenian na, a ghi gie ọtẹn vbe iko bu ẹre, ne ọ ya suẹn gha gu ẹre ruẹ e Baibol.

Vbọ ghi bu ufomwẹ ọghe ukpo 1921, Ọtẹn Nokpia J. F. Rutherford keghi gbẹn elẹta gie iko hia. Ọ na tama iran wẹẹ, “ukpo na, ẹre iwinna ikporhu ọghe ima ghi mu otọ sẹ. Iwinna nibun ye rre otọ khẹ ima. Nọnaghiyerriọ, uwa gha rhie igiọdu ne emwa ọvbehe, ne iran do deba ima vbe iwinna ne kpataki na.” Ọ dewarorua wẹẹ, te etẹn wa gele lele ibude na. Ikporhu ne iran ghi kpee vbe ukpo 1922, ẹre ọ ghi mu otọ sẹ ọghe 1921.