Mera vakayacora na nodra ilesilesi na Gonevuli ni iVolatabu ena vinakati mera yaloqaqa. Era na vunautaka na “irogorogo vinaka” vei ira na yalomalumalumu, era vunautaka tale ga “na siga [ni] veisausaumi” vei ira na tamata ca.

O Brother J. H. Hoskin, e tiko mai Kenada, e yaloqaqa me vunau ni tusaqati mada ga. Ena 1921 rau sota kei na dua na italatala ni Wesele. E tekivuna o Brother Hoskin na veivosaki ni kaya: “Me daru duavata ena ka e kaya na iVolatabu, kevaka mada ga daru duidui ena so na ka se dodonu tiko ga me daru veitalanoataka vakavinaka ena veiyaloni.” A sega ni yaco qori. E kaya o Brother Hoskin: “E vica ga na miniti neirau veivosaki ni sa tukia vakaukaua o italatala na katuba, au nanuma sara ga ni na lutu i ra na kena iloilo levu.”

E kailavaka o talatala: “Vacava mo lai vosa ga vei ira na sega tu ni lotu?” E sega ni sauma o Brother Hoskin, ni sa biubiu, e kaya lo ga, “Vaka sara ga au vosa tiko vua e dua e sega ni lotu!”

Ni vunau o italatala ena siga tarava e vakaucacataki au tale. E tukuna o Brother Hoskin: “E vakasalataki ira nona lewe ni lotu mera qarauni au, niu tamata lasulasu duadua meu bau butuka na tauni ya, meu vakamatei.” E sega sara ga ni yalolailai o Brother Hoskin, e vunau tiko ga qai vuavuaivinaka nona cakacaka. E kaya: “Au marautaka vakalevu noqu vunau e kea. Era tukuna mada ga eso, ‘Keimami kila ni o tamata ni Kalou!’ ra qai tukuna nira tu vakarau mera veivuke keu vinakata e dua na ka.”

Me rawa nira toso na tataleitaki, era tabaka kina na Gonevuli ni iVolatabu eso na porokaramu ni vuli ena Golden Age. * E vakarautaki na taro me baleti ira na gone mera veivosakitaka kei na nodra itubutubu. Era na “taroga na taro qori na itubutubu mera qai raica na gone na kena isau ena iVolatabu.” Eso na taro me vaka na “E vica na ivola e lewe ni iVolatabu?,” e vakavulica eso na ka rawarawa mai na iVolatabu. Eso tale me vaka  “Vakacava mera namaka na lotu vaKarisito nira na vakacacani?,” e vakarautaki ira na gone mera yaloqaqa ni vunau.

E vakarautaki tale ga na taro kei na kedra isau vei ira na Gonevuli ni iVolatabu era kila toka e levu na ka mai na iVolatabu. E rawa ni laurai na kena isau ena imatai ni ivola mai na Studies in the Scriptures. Levu sara na dauwiliwili e yaga vei ira na porokaramu qo, ia e kacivaka na Golden Age ena Tiseba 21, 1921, ni sa na sega tale ni tabaki na taro qori. Na vuna?

Era liaca na tacida era liutaka tiko na cakacaka ni vinakati me tuvanaki na nodra vulica na yavu ni ka dina o ira na gonevuli vou ni iVolatabu. Oya na vuna e sevutaki kina na ivola The Harp of God (Na Api ni Kalou) ena Noveba 1921. O ira na tataleitaki era taura na ivola e rawa tale ga nira vuli kina. Nira vulica vakataki ira era kila kina na “ituvatuva ni Kalou me vakalougatataka na kawatamata mera bula tawamudu.” E caka vakacava na vuli qo?

Ni dua e taura na ivola qori, sa na toka tale ga e loma e dua na tikinipepa e toka kina na levu ni draunipepa me wilika ena ivola. Ena macawa tarava ena vakau tale yani e dua na tikinipepa e toka kina eso na taro e yavutaki ena ka sa wilika oti, ena volai tale ga kina na ka me wilika ena macawa tarava.

E veimacawa ena taura kina o gonevuli na nona tikinipepa e vakau yani ena ivavakoso, e caka tiko qori me 12 na macawa. Era dau vakauta na tikinipepa qori na itabaqase ena ivavakoso se o ira e dredre mera lako e veivale. Kena ivakaraitaki, e kaya o Anna K. Gardner, mai Millvale, e Pennsylvania, Merika: “Ni sa sevutaki na Harp of God, sa rawa ni levu na nona cakacaka o tuakaqu, o Thayle, sa dredre na nona veitosoyaki, oya me vakauta e veimacawa na tikinipepa e tu kina na taro.” Ni vakaotia na nona vuli o gonevuli ena qai sikovi koya yani e dua me vulica e levu tale na ka mai na iVolatabu.

Ni cava na yabaki e qai vakauta o Brother J. F. Rutherford e dua na ivola vei ira kece na lewe ni kalasi. E vola ni “sa rabailevu sara na kena kacivaki na itukutuku vinaka ni Matanitu ni Kalou ena yabaki qo, e vuavuaivinaka tale ga ni vakatauvatani kei na veiyabaki sa sivi.” E qai kuria: “Se levu tale na cakacaka e tu me qaravi. Uqeta eso tale mera vakaitavi ena cakacaka marautaki qo.” Era muria na Gonevuli ni iVolatabu na ivakasala qori. Ena 1922 era gumatua ni vunautaka na Matanitu ni Kalou.