A beè dú bíi kọọ̀ Gbò Nvín Nò Kpá Káíá á ié agẹló kọbé bà láá kọ́ kpẹ̀a. Bàé vee “lé kpẹ̀a” nè gbò sàn, bii nágé ló gè vee nú ea kil ló “deé e Bàrì é béélá bel” ló gbò pọ́lọ́.

Vígà J. H. Hoskin, ea beè di Canada tṍóá, beè mòn bé e ba beè tú agẹló kọọmá kpẹ̀a kèbá nàà uú boo naa. Dààmà togó mm̀ gbáá 1921, a beè zọ̀ ene kà gbálà ea ólò sí tọ Bàrì Methodist nyòònà. Vígà Hoskin beè dààmà togó gè zọ̀ẹ loá sọ́l tení dú ló gè kọ́ nèe kọọ̀: “Èé lóá sọ́l boo Kpá Káí, vaá be à íe nú e bè náa kũunàí gbàà, èé aaló mm̀ fẹ́ẹ́-fẹẹ̀ ló vaá kilsĩ́ gè dúá bàà kóò.” Sõò náa beè naaá naa vó. Vígà Hoskin beè kpáá kọọ̀: “Gbálàa beè tú a nùtọ́ sá dẽe tṍó e ni tú pọ́ì ńkem̀ mínìt loomá bel, naaní e em beè dòòmà kọọ̀ ẹ̀à sĩ́ ea di deè a nùtọ é ú.”

Gbálàa bee vulí kpã́ kọọ̀: “Éé ní ea náa vaá nóò síì ló gbò e bà náa ólò sí tọ Bàrì gé kọ́ kpẹ̀a nèva ẹ́?” Vígà Hoskin náa beè ló tọ́ọ̀ bel tẹlẹ dẽe, sõò tṍó ea gé aà, a beè kọ́ nè a bá kọọ̀, ‘Nda beè dòòmà kọ m̀ géè ló bel nè nen ea gé fã Bàrì!’

Tṍó e gbálàa gé ló bel Bàrì gbẹá ba tọ Bàrì deé ea bẽene, a beè kpọ́ gã́bug kyáá bel ea kil ló Vígà Hoskin. Hoskin kọ́ọ̀, “A beè kọ́ nè pá ba tọ Bàrì kọọ̀ nda ní em dúù kùmà pọ́lọ́ nen ea tõo lọ̀l vaá à lee ea di boní ẽ́, vaá à bọ́ló kọ bàá tãám fẹ̀.” Lóó vígàí náa beè ọọ, a beè kilsĩ́ gè kọ́ kpẹ̀a, vaá a beè kọ́ kpẹ̀a nè gã́bug nen. À kọ́ọ̀: “A beè palàge leemám gè kọ́ kpẹ̀a kĩá. Sìgà nen em kọ́ọ̀ kpẹ̀a nè beè kọọ̀, ‘M̀ nyímà kọ ò gé sí tóm nè Bàrì!’ vaá bĩiná be bàé láá nèe m gbò nú em íè bíi ló.”

Gbò Nvín Nò Kpá Káí beè emí nú e nen é láá noomá Kpá Káí nvee mm̀ kpá ea kọlà The Golden Age, * kọbé à nveè bá nè gbò e bà íe lèèma kọ bàá sìm kilsĩ́. Kpá e gbò nvín ãa é nóómá Kpá Káíí fáálá bíb e gbò tẹ̀ nè kà é zọ ba gbò nvín loá sọ́l boo. Ba beè ẹ̀b dẽesĩ́ lọl bá gbò tẹ̀ nè kà “kọ bàá zọ̀ ba gbò nvín loá sọ́l boo gbò bíbví vaá nvèè bá nèva kọ bàá láá gbĩ́ gbò a ààla lọl mm̀ Kpá Káí.” Dì belí nu dòòmà bá, bíb ea kọ́ọ̀ “Kuù kà kpá ní ea di mm̀ Kpá Káí é?,” beè noòmà gbò kà kà bel ea  kil ló Kpá Káí. Vaá ní ea kọ́ọ̀ “É kọọ̀ dénè gbò nyòòne nvéè Kráìst é ẹbmà dẽe kọ bàé bíìgèè va ló?,” beè nvèè bá nè gbò nvín ãa kọ bàá tú agẹló kọọmá kpẹ̀a.

À íe nagé gbò bíb nè ààla ea beè dì nè gbò e bà nyímá gã́bug nú ea kil ló Kpá Káí. Gbò ààlaá beè di mm̀ túá kpoò kpá ea kọlà Studies in the Scriptures. Gã́bug gbò e bà bugi gbò kpáí beè ié bélè lọl ló, sõò ba beè kọ́ mm̀ The Golden Age níí December 21, 1921 kọọ̀ bà náa é émí ná gbò bíb nè ààlaá. Ló éé?

Gbò e bà géè tulè tóm beè gbóó dã́tẽ́ ló kọ à dú bíi kọọ̀ Gbò Nvín Nò Kpá Káí á nó nu mm̀ sĩ́deè ea kyãa boo kúu. Boo béè vó, ba beè gbóó emí kpá ea kọlà The Harp of God tẹlẹ bàlà kẽ ló November 1921. Gbò e bà íe lèèma e ba beè tú kpáá beè nvèè nàgé bée ló gè tú kpáá noomá Kpá Káí boo ba lóó. Nakà kpá gè noomá nuí beè naa kọọ̀ gbò e bà bugi á nyimá “bé e Bàrì noo gè naa kọọ̀ gbò nen á ié dùm e bè náa tá naa.” Mósĩ́ deè ní e ba beè naamáé?

Tṍó e nen tú enè kpoò kpáí, bà ólò tú ńpẹ́l kpá e bà emí kiẽ́e ea é bugi dẽe nèe. Sè ea bẽene, bà ólò gbóó emí kele-kele bíb ea dẹẹ̀a boo gbò nú ea beè bugiá dẽè ńpẹ́l kpá nèe. Bà ólò emí nágé dẽè kpáá kiẽ́e ea é kpáá bugí sè ea bẽene.

Buù sè, gbò e bà gé nó kpáí ólò ié kpá e bàé nó mm̀ 12 sè lọl bá bõ̀ònatõ̀ò ea dì vá kuló. Gã́bug tṍó, gbò e bà ólò tú kpáí má gbò nen dú gbò e ba ni dú kànen mm̀ dee, àbèè gbò e bà náa ólò láá bọọgẹ̀ kọná kpẹ̀a aa tọ dọ tọ. Dì belí nu dòòmà bá, Anna K. Gardner, ea ólò tõó Millvale, ea di Pennsylvania, U.S.A., beè kọọ̀: “Tṍó e bà tú kpá ea kọlà The Harp of God tẹlẹ bàlà kẽ, a beè naa kọọ̀ ńdáà vígà pábia ea kọlà Thayle, ea ólò tàvàlàẹ́ ló gè kyã̀à á ié tóm ge sì, ea dú gè dõo gbò ńpẹ́l kpá e bíb nè ààla di dẽeá nè gbò e bà íe lèèma.” Tṍó e nen ni nó kpáá lọ̀l, bõ̀ònatõ̀ò ólò gbóó lẹ̀ẹ̀là nen siimáé ló gé nvèèmà bá nèe kọ á kpáá nó gã́bug nú ea kil ló Kpá Káí.

Tṍó e gbááá íná kùbmà, Vígà J.F. Rutherford beè lẹ̀ẹ̀là kpá má dénè gbò e bà géè nó kpáá. A beè kọọ̀ “bà kọ́ kpẹ̀a ea kil ló Boǹ Ménéá nvee gã́bug ketõ̀ò gbááí èlmà gbò gbáá ea kil nvéeá.” A beè kpáá kọọ̀: “Gã́bug tóm ge sì dìí sĩ́. Siei kpóó ló dõòna gbò kọ bàá zọ̀i sí tómí.” Gbò Nvín Nò Kpá Káíá beè naa nú ea kọ́. Mm̀ gbáá 1922, ba beè tú agẹló vèèmà kpẹ̀a ea kil ló Boǹ Ménéá èlmà gbò gbáá ea kil nvéeá.