O ya ɛɛ ku Ācɛ Oklɔcɛ Ku Ubáyíbu a kéē lɔfu yuklɔ ku ɔna ō ta a, é cika ō yuufi ŋ. Ó wɛ ‘ɔ̄kā olɔhi’ néē gáā tɔɔna lɛ aolɛhɔɔcɛ foofunu a ŋ, amáŋ é géē cɛgbá ō tɔɔna lɛyikwu “eko” nɛ Ɔwɔico géē “gwō” acobɔbiipu “ɔ́ci” a duu.

Ɔyinɛ alɔ nɔnyilɔ J. H. Hoskin nōo lā u Canada a, tɔɔna mla ɔtu ō lɛ naana nɛ ó yɔ i má ojama a. Ipu ihayi ku 1921, ó má ɔcɛ éyi nōo wɛ ɔcɛ ō kɛla Ɔwɔico ipu icɔɔci. Ɔyinɛ alɔ Hoskin gbɔɔ ɔka ō ka mla ɔ mla ō da ɔ kahinii: “Alɔ kɔka olɔnyɛ tɔha lɛyikwu Ubáyíbu, ɔdaŋ nɛ alɔ i kóō lɛ ocɛtɔha ipu ɛlā ōhī ŋ naana, alɔ lɔfu lɛ ɔka ō ka ku alɔ a ŋmɛyi ɔwɛ ku ɛbɔ, ɔwɛ nɛ alɔ géē lɔfu kɛla mla iyi alɔ ɛ̄cī ɔhá gla.” Amáŋ ɛlā a i yɛ ɔwɛ ɛgɔɔma ŋ. Ɔyinɛ alɔ Hoskin ka kahinii: “Alɔ i kóō kɛla ligbo ɛ nóó, gbɔbu ɛɛ ku um jé a, adā a lɛ ɔwɛ a ta gwu bɔbi bɔbi, ɔwɛ nɛ um kóō gbɛla ku uwindo ku ɔwɛ a géē je ca kla ajɛ.”

Ɔcɛ ō kɛla Ɔwɔico ipu icɔɔci a dɛgba kahinii: “Ɔdiya nɛ a gáā nyɔ i kɛla lɛ ācɛ nōó wɛ Ācɛ O Yɛce Ukraist ŋ ma?” Ɔyinɛ alɔ Hoskin nyɛɛ, ó ta ɔ ohi duuma ŋ, ɔyinɛ alɔ a da iyi nu kahinii: ‘A kē i ya ɛlā bɛɛka ɔcɛ nōo wɛ Ɔcɛ O Yɛce Ukraist ŋ!’

Eko nɛ adā a le ta icɔɔci ɛ̄cī nōo gboce ɔ a, abɔ ó yɔ i kɛla a, ó gbɔɔ ō ka ɔdobɔbi alɛwa lɛyikwu ɔyinɛ alɔ ɔɔma. Ɔyinɛ alɔ Hoskin ka kahinii: “Ó da ācɛ icɔɔci ɔlɛ nu ka ami ɔ wɛ ɔcɛ ō kɛmgbɛ fiyɛ duu nōo wa ipu igeli ku uwa jejee ɛ ma, ka é cika ō lɛ um ŋmo.” Amáŋ ɛnyā i kē ya ku ɔyinɛ alɔ a kóō lɛ abɔ ci uklɔ ku ɔna ō ta a ŋ, ó gɔbu yɔ i tɔɔna, ó kóō kɛla lɛ ācɛ alɛwa. Ɔyinɛ alɔ kɛla gɔbu kpɔ kahinii: “N jɔɔnyɛ uklɔ ku ɔna ō ta ipu igeli ɔɔma nɛɛnɛhi.” Ācɛ ōhī abɔɔ kóō kahinii: ‘N jé ku a yɔ i yuklɔ ku Ɔwɔico,’ é kóō da um ku ɔdaŋ ku um cɛgbá ɔdā duuma, n lɔfu da uwa gla, ka é géē ta um abɔ mla ɔdā ɔɔma.

O ya ɛɛ ku Ācɛ Oklɔcɛ Ku Ubáyíbu a kéē lɔfu yɔ i ta ācɛ nɛ ɛlā ku Ɔwɔico he uwa ɔtu a abɔ kéē yɔ i jɛ gɔbu a, é gbɔɔ ō ya aɔka ku Ubáyíbu mla ohi ku uwa wɛɛcɛ ipu umagajin nɛ alɔ i hi ka Awake! babanya a. Aɔka nyā lɛ ō ya mla ɔka ku aɛdrɔ, nɛ adā mla ɛ́nɛ́ lɔfu bi le kɔka tɔha mla ayipɛ ɔlɛ uwa a. Adā mla ɛ́nɛ́ lɔfu da ayipɛ ɔlɛ uwa ɔka nyā, klla mafu ohi a lɛ uwa ŋma ipu Ubáyíbu. Ɔka ōhī bɛɛka u “Ɔkpá ɛmula yɔ ipu Ubáyíbu a?,” gē nwu ayi a ɛlā okpɔcii ŋma ipu Ubáyíbu. Aɔka ɔhá bɛɛka u “Ɛjɛɛji Ācɛ O Yɛce Ukraist cika ō leyice ō ya ŋmo  amāŋ owe a?, gē lɛ aɛdrɔ a tutu kéē lɔfu tɔɔna mla ɔtu ō lɛ.

Ɔkpá a klla lɛ aɔka ō da mla ohi ku nu lɛ ācɛ nōo lɛ ɔdā alɛwa jé lɛyikwu Ubáyíbu ɛ. Ohi a kē yɔ ipu ɔkpá aflɛyi ŋma ipu ɔkpá ku Studies in the Scriptures a. Ācɛ alɛwa nōo jé ɔkpá nyā lɛ itene ŋma anu nɛɛnɛhi, amáŋ igbihaajɛ a, é gáā le ka tɛɛcɛ ka é gáā bēē ya aɔka nyā wɛɛcɛ gɛ ŋ. Ɔdiya a?

Ayinɛ nōo gē gbɔbu eko ɔɔma a gáā le má, ku ācɛ cɛgbá ō nwu ɛlā lɛyikwu Ubáyíbu, ŋma lɛ ō nwu ŋma ikpɛyi ɛlā éyi gā ikpɛyi ɛlā ɔhá. Ohigbu ɛnyā, ipu Ɔya Ɔmigwoleyi ku 1921, é gáā lɛ ɔkpá ɛpɛpɛ ya wɛɛcɛ nɛ iye ku nu wɛ u The Harp of God. Ācɛ nɛ ɔkpá nyā he uwa ɔtu a, miyɛ ɔkpá a klla gáā wɛ ipu ōmiya ku oklɔcɛ néē lɔfu ya abɔyi uwa. Ɔwɛ ō nwu ɛla nyā ta ācɛ abɔ kéē gáā nwu ɛlā lɛyikwu ɔdā nɛ Ɔwɔico bi ɔtu lɛyikwu alɛɛcɛ ō je oyeeyi opiyoo lɛ uwa a. Ɛgɛnyá néē gē bi ɔkpá nyā le yuklɔ a?

Ɔdaŋ ku ɔcɛ lɛ ɔkpá a miyɛ, ó lɛ ukardi ligii éyi nōó géē miyɛ ba ɔ duu, nōo géē mafu ɛga nɛ ó cika ō jé ŋma ipu ɔkpá a. Alaadi nōo gboce ɔ a, é géē ta ukardi ɔhá ɛhɔ fu ɔ, ipu ukardi ɔmpa nyā, é géē ta ɔka ɛyɛɛyɛyi ipu nu lɛyikwu ɔdā nɛ ó jé ɛ ma. Cɛɛ oŋmɛyi ku ukardi a géē mafu ɛga nɛ ɔcɛ ɔɔma cika ō jé alaadi nōo gboce ɔ a.

Ipu alaadi doodu jaa gáā tu alaadi igwɛɛpa (12), ācɛ oklɔcɛ a gē miyɛ ukardi nyā ŋma ujɔ nōo yɔ kwu uwa ajaajɛ a. Igbalɛwa ācɛ nōo gē ta ukardi nyā ɛhɔ a wɛ ācɛ ipu ujɔ a nōo le hila okplicii, amāŋ aɛ̄nɛ̄ ó nyɔ ŋma ɔlɛ gā ɔlɛ gla gɛ ŋ ma. Ocabɔ mafu, Anna K. Gardner nōo ŋma U.S.A. a kahinii: “Eko néē ya ɔkpá ku The Harp of God a wɛɛcɛ a, ó ya ku ɔyinɛ um u Thayle nōó gē yɛ iyawu gla ŋ ma, kóō lɛ uklɔ alɛwa ō ya. Uklɔ ō bēē ta ukardi ku ɔka ō ka a ɛhɔ fu ācɛ ipu alaadi doodu.” Eko duuma nɛ ɔcɛ ɔɔma lɛ ɔkpá a jé mɛ ɔwɛ ɛgɛnyā, cɛɛ ɔcɛ éyi ŋma ipu ujɔ a géē nyɔ ɔlɛ nu, o ya ɛɛ kóō ta ɔ abɔ jé ɛlā gɔbu ŋma ipu Ubáyíbu.

Oŋmɛyi ku ihayi a, Ɔyinɛ alɔ nɔnyilɔ J. F. Rutherford lɛ ɔkpá éyi ta klla kwu u tɛhɔ fu ɛjɛɛji ujɔ. Ó ka ipu nu kahinii: “Ɔna ō ta lɛyikwu Ajɔɔcɛ a nɛ alɔ ya ipu ihayi nyā, nyila klla ta ācɛ alɛwa abɔ fiyɛ ɛgɛ nōó lɛ ipu aihayi nōo gáā yɛ ɛ ma.” Oŋma ɔɔma ó gáā ka kahinii: “Uklɔ alɛwa ta iyɔbu kpɔ. Ta ācɛ ɔhá ɔtu kwu ɔtu kéē wa gáā ba alɔ iyē ku alɔ ya ɛnɛɛnɛ uklɔ nyā tɔha.” Ó teyi peee ka Ācɛ Oklɔcɛ ku Ubáyíbu a ya ɔdā nɛ ó ka nyā. Ohigbu ka ipu ihayi ku 1922 a, é tɔɔna lɛyikwu Ajɔɔcɛ a mla ɔtu ō lɛ, ɔwɛ néē ya gbɔbu jejee ɛ ŋ.