Masapul a natured dagiti Estudiante ti Biblia tapno maitungpalda ti trabahoda. Saanda laeng ngamin nga ipakaammo kadagiti naemma ti “naimbag a damag” no di ket masapul nga ipakaammoda met kadagiti managdakdakes ti “aldaw a panagibales.”

Ni Brother J. H. Hoskin, a taga-Canada, ket situtured a nangasaba iti laksid ti ibubusor. Idi rugrugi ti 1921, adda naam-ammona a maysa a ministro dagiti Methodist. Rinugian ni Brother Hoskin ti makisarita babaen ti panangibagana: “Masapul koma a nasayaat ti tungtonganta maipapan iti Biblia, ken no adda man ti saanta a pagtunosan, saanta koma a pagdebatean dayta ken agpinnakadata kas aggayyem.” Ngem saan a kasta ti napasamak. Malagip ni Brother Hoskin: “Mano pay la a minuto nga agtungtungtongkami [iti ministro] idi bigla a dinanogna iti napigsa ti ridaw nga uray la impagarupko a mabuong ti dakkel a sarming ti ridaw.”

“Ti kasaritam ket dagidiay awan relihionna!” impukkaw ti ministro. Saan a nagun-uni ni Brother Hoskin, ngem bayat a pumampanaw, imbagana iti un-unegna, ‘Kasla isuna met ‘diay ibagbagana!’

Kabigatanna, idi nangmisa ti ministro, agkakadakes ti imbagana maipapan ken Brother Hoskin. “Pinadpadakesnak kadagiti miembroda. Imbagana a siak kano ti kauulbodan nga immay iti ilida, isu a masapul a paltogandak,” malagip ni Brother Hoskin. Ngem saan a pulos a nagsanud. Intultuloyna ti nangasaba ket adu ti naginteres. Imbagana: “Dayta pay laeng ti kararagsakan a panangasabak. Kinuna pay ketdi ti dadduma, ‘Ammok a maysaka nga adipen ti Dios!’ ken uray la imbagada a kayatda nga ited ti aniaman a kasapulak.”

Tapno matulongan dagiti interesado a rumang-ay, nangipablaak dagiti Estudiante ti Biblia kadagiti programa a panagadal iti Biblia iti The Golden Age. * Iti programa a Juvenile Bible Study, adda dagiti saludsod nga usaren dagiti nagannak a makisarita kadagiti annakda. “Usaren [dagiti nagannak] dagita a saludsod kadagiti annakda ken tulonganda ida a mangbirok kadagiti sungbat iti Biblia.” Ti dadduma a saludsod kas iti, “Mano ti libro ti Biblia?,” ti nangisuro kadagiti simple a kinapudno maipapan iti Biblia. Ti met dadduma kas iti,  “Rumbeng kadi nga ekspektaren ti tunggal pudno a Kristiano ti pannakaidadanes?,” ti nangisagana kadagiti ubbing ken agtutubo nga agbalin a natutured a manangaskasaba.

Iti programa nga Advanced Studies in the Divine Plan of the Ages, adda dagiti mamagpanunot a saludsod para kadagiti Estudiante ti Biblia a nataenganen iti naespirituan. Makita dagiti sungbat iti umuna a tomo ti Studies in the Scriptures. Dakkel ti naitulong dagita a programa iti rinibu nga agbasbasa, ngem impakaammo ti Disiembre 21, 1921 a The Golden Age a maisardengen dagita a programa. Apay?

Nabigbig dagiti mangidadaulo a dagiti kangrunaan a kinapudno ket masapul a maammuan dagiti kabbaro a mayad-adalan iti Biblia iti sistematiko a pamay-an. Dayta ti rason a nairuar ti libro a The Harp of God idi Nobiembre 1921. Dagiti interesado nga immawat iti libro ket nayenrol met iti The Harp Bible Study Course. Nakatulong dayta tapno maammuan dagiti tattao ti “panggep ti Dios nga ipaayanna dagiti tattao iti biag nga agnanayon.” Kasano?

No adda immawat iti kopia ti libro, makaawat met iti bassit a kard a mangibaga no ania a panid ti basaenna iti libro. Iti sumaruno a lawas, makaawat iti sabali pay a kard nga addaan iti salsaludsod maipapan iti nabasana. Makita met iti dayta a kard dagiti basaenna iti sumaruno a lawas.

Kada lawas iti 12 a lawas, makaawat ti mayad-adalan iti baro a kard nga ikoreo ti klase wenno kongregasion nga asideg iti lugarna. Kaaduanna a ti mangipatulod kadagita a kard ket dagiti nataengan iti kongregasion wenno dagidiay saandan a kabaelan ti agbalaybalay. Kas pagarigan, malagip ni Anna K. Gardner, a taga-Millvale, Pennsylvania, U.S.A.: “Idi nairuar ti The Harp of God, immadu ti mabalin nga aramiden ni manangko a Thayle, nga adda depekto ti pannagnana. Linawas nga ipatpatulodna dagiti kard nga addaan iti salsaludsod.” No nakompleton ti 12 a lawas, adda mangsarungkar iti mayad-adalan tapno tulonganna a mangammo iti ad-adu pay maipapan iti Biblia.

Iti ngudo ti tawen, sinuratan ni Brother J. F. Rutherford ti amin a klase wenno kongregasion. Imbagana a “ti pannakaikasaba ti Pagarian ita a tawen ket nasaksaknap ken mas epektibo ngem iti aniaman a napalabas a tawen ti panagani.” Sa innayonna: “Nagadu pay ti masapul nga aramidentayo. Paregtaenyo ti dadduma a makiraman iti daytoy naisangsangayan a serbisio.” Nalawag nga impangag dagiti Estudiante ti Biblia dayta nga imbagana. Idi 1922, situtured nga inwaragawagda ti Pagarian iti ekstraordinario a pamay-an.