Yaĩ no nginya Amanyĩw’a ma Mbivilia methĩwe mate na wia nĩ kana meanĩsye wĩa wa kũtavany’a. Nĩkĩ? Nũndũ o na kau nĩmaaĩle kũtavya ala auu “ũvoo mũseo,” yaĩ no nginya matavany’e “mũthenya wa ũĩvanĩsyo” kwa ala athũku.

Mwana-a-asa J. H. Hoskin, ũla wekalaa Canada, nĩ ũmwe wa ana-a-asa asu matavanasya mate na wia o na mavĩngwa. Kwa ngelekany’o, mwambĩĩonĩ wa mwaka wa 1921, nĩwakomanie na mũtavany’a wa kanisa wa Methodist. Mwana-a-asa Hoskin ambĩĩie kwa kũmwĩa atĩĩ: “Tũtate vyũ tũkwa- tĩanĩe ĩũlũ wa kĩla Maandĩko mawetete. Ĩndĩ o na ethĩwa ve maũndũ amwe tũteũkwatĩanĩa, tũtate tũtiane nesa na tũyĩkala ta anyanya.” Ĩndĩ vayaathi ũu. Mwana-a-asa Hoskin aisye ũũ, “Twaneenangie o ndatĩka mbũthũ na ĩndĩ [mũtavany’a ũsu] akũna mũomo na vinya mũno, nginya nambĩĩa kwona kĩoo kĩnene kya mũomo ũsu ta kĩũva- lũka.”

Mũtavany’a ũsu asyokie amũkũthũkĩa amwĩa, “Wĩema kũthi kũtavya alĩlĩki nĩkĩ?” Mwana-a-asa Hoskin ndaamũsũngĩa, ĩndĩ aumaalĩte eetavasya ũũ ngoonĩ, ‘Aĩ noona eekany’a o ta ũmwe woo!’

Ũnĩ wake, mũtavany’a ũsu aitavany’a kanisanĩ wake no wamumanisye. Mwana-a-asa Hoskin aisye, “Mũtavany’a ũsu eeie malondu make kana ninyie naĩ mũkengani ũla mũnene vyũ taoninĩ ĩsu, na naaĩlĩte kũathangwa.” Ĩndĩ kĩu kĩyaamũtelemya o na vanini. Nĩwaendeeie kũtavany’a, na akwata mosyao maseo. Aĩtye atĩĩ: “Vai kĩsio kĩngĩ naatanĩa kũtavany’a ta kĩu. O na amwe ala natavisye mambĩaa, ‘Nĩnĩsĩ wĩ mũndũ wa Ngai!’ na nĩmangũlasya kana no mandetheesye ndikakose kĩndũ.”

Amanyĩw’a ma Mbivilia nĩmambĩĩie kwĩkĩa ilungu sya kwĩmanyĩsya Mbivilia ĩkasetinĩ ya The Golden Age, * nĩ kana matetheesye ala mekwendeew’a meke maendeeo. Ĩkaseti yĩu yaĩ na kĩlungu kyeetawa “Ĩmanyĩsyo ya Mbivilia Kwondũ wa Andũ ma Mũika,” na kyaĩ na makũlyo ma kũthetheesya asyai kũmanyĩsya syana syoo. Asyai maaĩle “kũkũlya syana syoo makũlyo asu na maiitetheesya ikwate mosũngĩo Mbivilianĩ.” Makũlyo ta, “Mbivilia yĩ mavuku meana?,” nĩmatetheeasya syana imanye maũndũ ma mũsingi ĩũlũ wa  Mbivilia. Namo makũlyo angĩ ta, “Yo no nginya kĩla Mũklĩsto wa w’o athĩnw’e?,” nĩmaitetheeasya syĩthĩwe atavany’a mate wia.

O na ĩngĩ, vaĩ na makũlyo kuma Mbivilianĩ kwondũ wa ala maĩ na ũmanyi mwingangĩ wa Mbivilia (Advanced Studies in the Divine Plan of the Ages). Mosũngĩo mamo maĩ matonya kũkwatĩkana ĩvukunĩ ya mbee ya Studies in the Scriptures. Asomi ngili mbingĩ nĩmatethekie nĩ ilungu isu, ĩndĩ ĩkaseti ya The Golden Age ya Matukũ 21, Mwei wa 12, 1921, nĩyatangaasie kana ilungu isu ilĩ nikũũngamw’a. Nĩkĩ syaũngamiw’e?

Ala matongoetye nĩmamanyie kana amanyĩw’a eũ ma Mbivilia nĩmaaĩle kwĩmanyĩsya ũw’o wa mũsingi maatĩĩe mũvango mũseo. Nũndũ wa ũu, kwĩ Mwei wa 11, 1921, ĩvuku The Harp of God nĩyaumĩthiw’e. Andũ ala mendeeaw’a na meetĩkĩlile ĩvuku yĩu, nĩmaandĩkĩthiw’e koosinĩ yeetawa The Harp Bible Study Course. Koosinĩ ĩsu kĩla mũndũ eemanyĩasya e weka, na nĩyatetheeisye asomi aingĩ mamanye “mũvango ũla Ngai waĩ naw’o wa kũnenga andũ thayũ wa tene na tene.” Yo yeethĩawa ĩilye ata?

Yĩla mũndũ weetĩkĩla ĩvuku yĩu, ayĩnenganĩaw’a na kakaati koonanĩtye mathangũ ala waĩlĩte kũsoma. Ĩtina wa kyumwa kĩmwe, ĩsandũkũnĩ yake ya valũa nĩwatũmĩawa kaati ĩngĩ yaĩ na makũlyo maumĩte mathangũnĩ ala wasomete. Mũthyanĩ wa kaati ĩsu, eethĩawa aandĩkĩwe mathangũ ala ũkasoma kyumwa kĩla kĩatĩĩe.

Kĩla kyumwa vandũ va syumwa 12, mũmanyĩw’a nĩwatũmĩawa kaati nzaũ ĩsandũkũnĩ yake ya valũa nĩ kĩlasi kĩla kyaĩ vakuvĩ nake, o tondũ ikundi syeetawa ĩvinda yĩu. Kaingĩ, kaati isu syatũmawa nĩ ala akũũ kĩkundinĩ kana ala mataĩ matonya kumaalũka makatavany’e nyũmba kwa nyũmba. Kwa ngelekany’o, Anna K. Gardner, kuma Millvale, Pennsylvania, Amelika, aisye: “Yĩla ĩvuku The Harp of God yaumĩthiw’e, nĩyanengie mwĩĩtu tũsyaanĩw’e weetawa Thayle, ũla ũtaĩ atonya kũtembea, wĩa mwingĩ wa kũtethya, na wĩa ũsu waĩ wa kũtũma kaati syĩ na makũlyo kĩla kyumwa.” Koosi ĩsu yathela, mũmanyĩw’a nĩwathokeawa nĩ mũndũ amũtetheesye kwĩmanyĩsya maũndũ maingangĩ Mbivilianĩ.

Mũthyanĩ wa mwaka, Mwana-a-asa J. F. Rutherford nĩwatũmĩie ikundi syonthe valũa. Valũanĩ ũsu aisye: “Ĩvindanĩ yĩĩ ya ngetha ũkũsĩ ĩũlũ wa Ũsumbĩ nũnaumiw’e mũno mwaka ũũ, na ũnaĩ na mosyao maseo kwĩ mwaka ũngĩ o na wĩva.” Na ĩndĩ ongela kwasya: “Ve wĩa ũngĩ mwingĩ wĩ mbee. Ĩkĩai angĩ vinya mambĩĩe kũthũkũma vamwe naitũ wĩanĩ ũũ wa mwanya.” Amanyĩw’a ma Mbivilia nĩmaatĩĩie ũtao ũsu. Mwakanĩ wa 1922 nĩmatavanisye ũvoo wa Ũsumbĩ mate na wia kwĩ ĩvinda yĩngĩ o na yĩva!