Pa es fazeba ses trabadju di pregason, kes Studanti di Bíblia meste tinha koraji. Es tinha ki pregaba ‘notísias sábi’ pa kes algen mansu, má tanbê ‘dia di vingansa’ pa kes algen mau.

Irmon Juan Roskin, ki ta moraba na Kanadá da tistimunhu ku koraji, sikrê ku pirsigison. Na anu di 1921, el nkontra ku un pastor di otu igreja. Antis di es kumesa pâpia, Juan fla: “Nu debe pâpia sobri Bíblia sima amigu i sikrê ten alguns kuza ki nu ka ta konkorda ku kunpanheru, nu pode tirmina konbérsu na pas, sima dôs amigu.” Má é ka kel-li ki kontise. Irmon Juan fla: “Dipôs di alguns minutu ta pâpia, [kel pastor] bate ku forsa na pórta ki N pensa ma vidru ki tinha na el ta kebraba.”

Kel pastor grita ku el i el fla: “Pamodi ki bu ka ta bai prega pa kes algen ki é ka kriston?” Irmon Juan ka fla nada, má timenti el staba ta bai, el fla se kabésa: ‘N pensa ma dja N staba ta pâpia ku un di es!’

Na kel otu dia kel pastor faze un diskursu i el kontinua ta pâpia kóntra Juan. Irmon Juan fla: “El pâpia ku gentis di se igreja sobri mi i el fla-s ma ami éra kel piór mintirozu ki dja parse na kel sidadi i ma N merese pa es daba mi un tiru.” Má kel-li ka poi irmon Juan ta para di prega. El kontinua ta faze se trabadju i el tevi bons rezultadu. Juan fla: “Kel-li foi midjór ténpu di pregason ki dja N tevi. Alguns algen ti ta flaba: ‘N sabe ma abo é un ómi di Deus!’ I es ta perguntaba si es podia daba mi alguns kuza ki N ta mesteba.”

Pa djuda pesoas ntende Bíblia midjór, kes Studanti di Bíblia kumesa ta publika perguntas i respóstas na kel revista ki gósi nu ta txoma di Nhos korda!. Un di es éra Studu di Bíblia pa jóvens. Na kel grupu di artigu li, tinha perguntas pa pai ku mai fazeba ses fidjus. Pai ku mai devia “fazeba kes pergunta pa ses fidju i djudaba es atxa respósta na Bíblia.” Alguns pergunta sima, “Kantu livru ki Bíblia ten?”, ta inxinaba es kes verdadi prinsipal. Otus sima, “Tudu kriston verdaderu debe spéra algun tipu di pirsigison?”, ta priparaba kes jóven pa pregaba ku koraji.

 Tanbê tinha perguntas i respóstas pa kes algen ki dja tinha más konhisimentu di Bíblia. Es podia atxaba respóstas na kel primeru livru, ki éra Studu di Skrituras. Milharis di algen prende txeu kuza ku kes prugrama. Má revista Idadi di Oru di 21 di dizenbru di 1921, aviza ma es ta dexaba di faze kes prugrama. Pamodi ki fazedu kel mudansa li dirapenti?

Kes irmon ki ta tomaba kónta di óbra na kel ténpu, odja ma midjór manera di inxinaba Bíblia, éra pâpia ku kes algen un asuntu di kada bês. Pur isu, na novenbru di 1921, lansadu kel livru Arpa di Deus. Óras ki un algen ki tinha interesi ta setaba kel livru, es ta matrikulaba el na Kursu di Bíblia na Arpa di Deus. Na kel kursu, kel algen ta studaba el sô i el ta prendeba sobri “Kel planu di Deus pa abênsua tudu algen ku vida pa tudu ténpu”. Modi ki éra kel kursu?

Un algen ki setaba un livru tanbê ta resebeba un karton pikinoti. Kel karton ta flaba na ki pájina di kel livru ki el devia leba duránti kel simana. Dipôs, na kel otu simana, kel algen ta resebeba un karton ku txeu pergunta ku bazi na kel pájina ki el devia leba. Na fin, kel karton ta mostraba na ki pájina kel algen devia leba ti kel otu simana.

Tudu simana duránti 12 simana, un algen ta resebeba un karton novu pa koreiu, ki un di kes kongregason ta mandaba. Ken ki más ta mandaba kes karton, éra kes algen di idadi ki ka ta konsigi pregaba di kaza en kaza. Pur izénplu, Ana Gardner, di Milval, na stadu di Pensilvánia na Mérka, fla: “Nha irman Taile éra difisienti, má kantu lansadu kel livru Arpa di Deus, el fika txeu okupadu na trabadju di pregason, ta manda kes karton di pergunta tudu simana.” Óras ki un studanti tirminaba kel kursu, un algen di kongregason ta ba vizitaba el, pa djudaba el prende más sobri Bíblia.

Na fin di kel anu, irmon Joseph Rutherford, manda un karta pa tudu kongregason. Kel karta ta flaba: “Kel anu li, algen ki obi tistimunhu di Reinu i ki djudadu é mutu más txeu di ki kalker tistimunhu di Reinu ki dadu na kes otu anu, duránti ténpu di kodjéta.” Tanbê, irmon Rutherford fla: “I inda ten txeu trabadju pa faze. Insentiva otus pa partisipa na es sirvisu ki ta traze txeu benson.” Di sertéza kes Studanti di Bíblia sigi kel konsedju li. I na anu 1922, ku koraji, es prega sobri Reinu mutu más di ki antis.