Muna toma lungisa e mbebe au ya samuna e nsangu zambote, alongoki a Bibila unkabu bavuanga o mfunu. Basamuna e “nsangu zambote” kwa alembami ye “lumbu kia nlandu a kunda” kwa wantu ambi.

Mpangi John Henry Hoskin, ona wazingilanga kuna Canadá, wasila umbangi kuna unkabu wawonso kana una vo lubangamu. Muna mvu wa 1921, wawanana ye mfumu mosi a dibundu dia metodista. Mpangi Hoskin wayantika mokena yandi muna vova vo: “Tulenda kweto mokena mu kuma kia Bibila nze akundi, kana una vo ngindu zaswaswana tuna zau mu kuma kia maka mambu, tulenda wizana muna mambu mankaka yo fokola e moko kieto nze akundi.” Kansi ke diau ko diavangama. Mpangi Hoskin osungamenanga vo: “Miniti miakete kaka twamokena yo [mfumu ndioyo], i bosi wawanda e nkomi kuna makasi mawonso vana kielo. Yayindula nkutu vo e vidro yakala vana kielo wudika iwudika.”

O mfumu ndioyo wakaza vo: “Ekuma olembi kwendela kwa mindembi kwikila yo mokena yau?” Mpangi Hoskin kavova diambu ko, kansi vava kakatuka vo, wayindula: ‘Mbenze vo nsolwele muntu mosi.’

Muna lumbu kialanda, vava mfumu ndioyo kayenda longa kuna dibundu diandi, wavunina mpangi eto mambu. Mpangi Hoskin osungamenanga vo: “Wavovesa minkwikizi miandi mu kuma kiame vo omono i muntu yasunda luvunu yamoneka muna mbanza ye lufwa lwamfwanukina.” Kansi, e diambu diadi ke diasima mpangi eto ko, wakwamanana samuna e nsangu zambote yo vua e nluta. Mpangi Hoskin wavova vo: “Ekiaki i kolo yatoma yangalela e salu kiame kia umbangi. O wantu ankaka nkutu bampovesanga vo: ‘Nzeye wo vo o ngeye u muntu a Nzambi!’ Bansadisanga muna konso diambu yavuanga o mfunu.”

Muna sadisa awana basonganga luzolo lwambote banungunuka, Alongoki a Bibila bavaikisanga programa ya longokela e Bibila muna zulunalu yayikilwanga vo A Idade de Ouro. * Imosi muna programa yayi i Malongi ma Aleke. Muna longi diadi mwakala ye yuvu ina mase bafwana fimpa yo wan’au. Diavavanga vo mase bavanganga e yuvu yayi kwa wan’au yo kubasadisa basolola e mvutu muna Bibila. E kiuvu nze: “Nkanda kwa mina muna Bibila?” kialonganga mambu malubantiku ma Bibila kwa wana. E kiuvu kiankaka: “Nga Akristu awonso aludi  bangikwa bebangikwa?” kiakumikanga aleke muna kala ateleki a unkabu.

Programa yankaka yakala ye yuvu ye mvutu za Bibila mu kuma kia awana bakala yo zayi wayingi wa Bibila. E mvutu zazi zasololwanga muna nkanda Estudos das Escrituras, volume 1. Mafunda ye mafunda ma atangi balongokanga mambu mayingi muna programa zazi. Kansi, zulunalu A Idade de Ouro, ya 21 Desemba, 1921 yavana luzayisu vo e programa zazi ke zivaikiswa diaka ko. Ekuma bavangila e nsobani yayi?

Ampangi ana bavitanga o ntu muna kolo kiakina, babakula vo e mpila yambote ya longela Bibila kwa wantu i longoka diambu dimosi-dimosi. Muna kuma kiaki, muna ngonde ya Novemba a mvu wa 1921, bavaikisa o nkanda A Harpa de Deus. Vava muntu wasonganga luzolo lwambote katambulanga o nkanda wau, vana vau wasonekeswanga muna buka kia awana balongokanga yau mosi. Muna buka kiaki, konso muntu walongokanga yandi mosi mu kuma kia kani dia Nzambi dia vana moyo a mvu ya mvu kwa wantu. Aweyi e longi diadi diavangamenanga?

O muntu watambulanga nkanda wau, wavewanga mpe kalati kimosi. E kalati kiaki kiayikanga lutangu lwa makaya o muntu kafwete tanga muna lumingu lwaluna. Muna lumingu lwalandanga, wavewanga diaka kalati kiankaka kina kiakalanga ye yuvu yayingi mu kuma kia mana katangidi kala. Kuna mfoko a kalati, mwakala ye lutangu lwa makaya o muntu kafwete tanga muna lumingu lulanda.

Konso lumingu, muna tumingu 12, o nlongoki watambulanga kalati kiampa kiafilwanga kwa buka kimosi kiakala lukufi ye nzo andi, o unu kiyikilwanga vo nkutakani. Nkumbu miayingi, anunu ye awana ke balendanga sila umbangi mu nzo ye nzo ko, yau batwikanga e kalati yayi. Kasikil’owu, mpangi Anna Katherine Gardner de Millvale, wazingilanga kuna Pensilvânia, Estados Unidos, wavova vo: “O mbuta ame Thayle mvanguki kakala, kansi vava o nkanda A Harpa de Deus wavaikiswa, salu kiayingi kakala kiau kadi konso lumingu watwikanga kalati yayingi ya yuvu kwa wantu.” Vava nlongoki kafokolanga longoka o nkand’andi, mpangi mosi muna nkutakani wankingulanga muna kunsadisa kimana kalongoka diaka mayingi mu kuma kia Bibila.

Kuna mfoko a mvu, mpangi Joseph Franklin Rutherford watwika nkanda muna nkutakani zawonso. Nkanda wau wavova vo: “Mvu wau, ampangi salu kiayingi basadidi kia samuna e nsangu za Kintinu ke mu mvu miavioka ko.” I bosi wakudikila vo: “Kansi, salu kiayingi diaka kikutuvingilanga. Nukasakesa akaka kimana basala mpe e salu kiaki kiasambulwa.” Kieleka, Alongoki a Bibila balemvokela luludiku lwalu. Muna mvu wa 1922, kuna unkabu wawonso, basamuna e nsangu za Kintinu mu mpila ina ke basidi vanga ko.