1921—yaka 100 mundduli

ORUMIHE

“MABASA baani avayekiwa nnafunihu waaparaga yaka yela?” Nna naali nikoho Torre de Vigia (peeno Namasugwera) a 1.º a Janeiro a 1921, aakohiliye anamahudhera ooviheya a Bibliya. Yowakulaya avahile Namasugwera ole yafwanyeya va Isaías 61:1, 2, ahawubusedha mabasa ewa ooleleya. ‘Yehova ohugithoma wihina gaalaleye muthenga dhapama athu owoma murima. . . . Wihina gilaleye yaka ya murenddele ya Yehova, wihina gilaleye nlabo Mulugu anafuniye watoriha athu.’

ANAMALALEYA OOLIBA MURIMA

Wihina yawakwanihe mabasiwa anamahudhera a Bibliya yohowela oliba murima. Aliwa yere wawaddela ‘muthenga dhapama athu oowoma murima,’ ni yere wawaddela ‘nlabo Mulugu anafuniye watoriha athu’ abure.

Ddibila J. H. Hoskin, akala oKanada, ahilaleya nuuliba murima naari aharahariwaga. Yaka ya 1921, oliye onfwanya ministuru metodista. Ddibila John abanjhe othapanya waye awogaga wi: “Kabe nthapanyedhe ni makalelo apama madhu a mBibliyani, naari kadda muthu ahimurumedhaga mukwaye mwa dhatedhene, iyo podi omariha othapanya wehu ninga muthu ni mukwaye.” Mbwenye yapadduwe kahi yeyo. Ddibila John anosoriha egi: “Iyo kanathapanye mudhidhi wowinjhivene, mbwenye metodista ole onyanyuwa, ofiyera ovada musiwo. Miyo gubuwela wihina viduru na musiwo ole nahipweseya.”

Oliye owoga nuuwali egi: “Mwahaya bwaddi kunadhowa wavedaga athu ehinna gereja?” Ddibila John newene kaakule ethu. Mbwenye adhowaga mudila oliye wubuwelaga, ‘miyo gubuwela wi ginawoga ni muthu ahimunonne Mulugu!’

Vano ministuru ole metodista nuwoga mwahaye wa vathaddo goni-seliwo, ddibila John kaselele oharahariwa. Oliye anowubuwela: “Metodista ole wawaddela athu aye amugereja wodhela miyo. Ni wera giri muthu abure gaddemulele sidade yele, gofwanelela wihina gobeliwe.” Mbwenye eyo kiyamugurumelihe ddibila John. Oliye odhowagave aaparaga mabasa oolaleya ni ahikanna mareeliho owinjhiva. Ddibila John anosoriha egi: “Ole waali mudhidhi wohagalasa gaaparilimi mabasa oolaleya. Athu amodha yowoga yegi: ‘We oli muthu a Mulugu!’ ni yahiivelela wihina egivahege dhithu gahowelimi.”

OHUDHERA WAVAYEKA NI OHUDHERA WEEMUDHI

Wihina yakavihera ale yafuna omuhudhera Bibliya wunnuwelavo, anamahudhera a Bibliya yowagawela revista peeno nnithaniwa Despertai! * ni makalelo amodha oomuhudhera Bibliya, ninga ala yithaniwa Estudo Bíblico Juvenil. Livuru nna nahikanna muselu ababi yahoweliwa wahudhiha aniwa. Ababi yohowela “waakoha makoho ala aniwa ni wakavihera ofwanya yowakulaya mBibliyani.” Makoho mamodha ninga ala: “Bibliya anna malivuru mangasi?” Dhowahudhiha dhithu dhokweya. Makoho mamodha ninga: “Niwogege wi mukiristawu atene eebaribari anere oharahariwa?” Makoho ala yowawegeredha azombwe okala anamalaleya ooliba murima.

Livuru nimodha niithaniwa Estudos Avançados no Plano Divino das Eras. Livuru nna yaalebeliwe anamahudhera a Bibliya yanna enonelo yowinjhiva. Nowadhana makoho oorusa yakumihiwa mu livuruni Perspicaz volume 1. Anamileri owinjhiva yohudhera dhithu dhowinjhiva ni porogarama ola. Vano numero 21 a Dezembro a 1921 na revista Idade de Ouro, nahiwoga wi aporogarama ala abili kiyalaleyiwege. Mwahaya bwaddi edhe epadduwege masadduwo ala?

LIVURU NIXA!

Livuru A Harpa de Deus

Mutonyo wawoga dhipaddi baani dhahoweleya wileri

Mwana-makartawu yadhana makoho

Addibila yasogolela addibila mudhidhi yole woona wi makalelo omuhudhiha muthu Bibliya, fumuhudhiha muselu mmodha kadda olenddo. Bumwahaya Novembro a 1921 okumihiwa livuru nanna musolo A Harpa de Deus. Muthu anna efunelo arumedha livuru nna, oliye oolebeliwa Curso de Estudo Bíblico da Harpa. Kurso ela muthuya ahudhera yeka. Muthuya oohudhera wodhela “efunelo ya Mulugu yowaareeliha athu ni egumi yohimala.” Muthuya ahudhera avi?

Muthu arumedha waakela livuru nna ovahiwa mwana-kartawu. Mwana-kartawu nna nowoga epaddi baani ya livuru, muthu ole ahoweliye wileri sumana yele. Vano sumana emodha muthuya, oowaakelave mwana-kartawu nimodha nanna makoho yakumela epaddi dhendhe ileriliye. Omagomiherowa kartawu nne nowoga dhipaddi baani muthu ole anafuniye wileri sumana yoharela.

Kadda sumana, muwari mwa sumana 12, muthuya owakela kartawu nixa, kalasi yamandariwa ni kureyu. Kalasi ela peeno buule nnithahihu mulogo. Malabo owinjhivene yamandari makartawu ala yaali addibila yaali anakalaba vamodha naale yahiwedha olaleya nyumba-ni-nyumba. Motajhiha, Anna K. Gardner, eelabo yo Millvale, Pensilvaniya, Estadu Unidu, ohusoriha egi: “Ddibilaga Thayle ahiragala mbwenye nuukumihiwa livuru A Harpa de Deus, oliye opinyaminyeya ni mabasa oOmwene. Aamandarigi kadda sumana makartawu yanna makoho.” Namahudhera amariha ohudhera muthu ammulogoni omwaredhela, wihina amukavihere ohudhera dhithu dhimodha wodhela Bibliya.

Thayle Gardner agakiratile vakarinyani

MABASA YADHA OSOGOLO

Omagomihedho wa yaka, ddibila J. F. Rutherford, olebela karta kalasi dhatedhene. Karta nne nawoga negi: “Yaka yela nihithabwa olaleya muthenga Omwene opitha yaka dhimodha dhohadda.” Ubuwelaga osogolo ddibila Rutherford, wenjhedhedha egi: “Mbwenye ehihala mabasa owinjhiva wihina epariwe. Mwakongomedhe athu amodha wapara mabasa ala ereelihiwe.” Mohanganyedha anamahudhera a Bibliya ohara yolaga ela mowaguva. Yaka ya 1922 nuwi thwanyu, aliwa yere owedha olaleya Omwene wa Mulugu mwamakalelo ehinapadduwege.

Athu owandana ni ooliba murima

Anamahudhera a Bibliya ehoniha odhivela mmodha ni mukwaye mwaha wokaviherana. Aliwa yaali athu owandana ni ooliba murima ninga ‘ddibilo afwanyiwa makathamiho.’ Yopadduwa enaharela enowoniha wi eyo ebaribari. —Pro. 17:17.

Txipili 31 a Maio a 1921 athu obajha owana Sidadi yo Tulsa Oklahoma Wistado Unidos, nuuvira mudhidhi okangana wule ononiwa ninga masakere di Tulsa, owana wule wambele mwaha kaafiri mmodha amagiwe, nkedhiwe wi ohumugoniha mwihiyana muzugu. Voharela alobwana owakwana 1000 azuguve oroma owana ni alobwana ang’no-ng’nove akaafiri, mowaguva mwana koddo ele omwadheyela murudda yole wo Greenwood, murudda yole athu owinjhiva yaali akaafiri, maloja owakwana 1400 ni nyumbadha opahiwa teto dhithudha wiyiwamo. Aliba ohelela konta enawoga wi yahikwa athu owakwana 36, mbwenye podi wera numero neebaribarina nahifiya 300.

Ddibila Richard Josephf Hill namahudhera a Bibliya aali kaafiri akala murudda yole wo Greenwoo onosoriha yapadduwile: “Omahiyu yole wawaniwaga iyo naaligi vamutugumanoni. Nuweruwa iyo wiwa oruma wa futhi muSidadi. Nigadhowile ogona nowiiwa oruma wa futhi.” Mambesi a txithathu a 1 a Junho owana wule weraga othabwa. Ddibila Richard onosorihave egi: “Athu amodha odha owoga wi nafunaga obareleya yakale yapama othawela oCentro de Convenções.” Vano ddibila Richard ni mwariye vamodha ni anaaye atanu othawela oCentro de Convenções yo Tulsa. Nufiya wule yahafwanya alobwana ni ahiyana owakwana 3000 akaafiri yaali obareleyene ni gwarda aasugwera ithaniwe wihina adhenawo murenddele.

Mudhidhi yole ddibila Arthur Claus aali muzugu oliye werana ethu yahoweleya oliba murima. “Miyo nuwiwa wihina ehikalawo athu yedda waddamela murudda wo Greenwood yiyaga ni epahaga nyumbadha, miyo wubuwela wihina gamoone mukwaga Richard makalelo aaliye.”

Alabihedhaga A Harpa de Deus, Arthur Claus ahudhihaga kalasi yaanamwani 14

Afiyagawene vade va ddibila Richard, Arthur onfwanya mwanddamani a Richard aali muzugu agahiddele futhi yaye. Mwanddamani ole a Richard ubuwela wi Arthur nuliyene aali munikuruni mwa athu ale yawana, vano oliye ogikoha onyanyuwene egihina “Onahiddavo ddi vaade va mulobwana oyo?”

“Miyo omwakula wi gili mukwaye Richard ni ginodhesa vevala dila dhowinjhivadhene. Arthur wera mulobwana ole ahere ahirumedha ele gawogilimi podi wera ere ogobela.” Arthur ni mwanddamani a Richard yahiwedha obarela nyumba ya Richard.

Nuuvira mudhidhi Arthur woona wi ddibila Richard ni amudhaye yaali oCentro de Convenções. Mbwenye Arthur onona wihina athu yaali akaafiri yawedhe okumawo oCentro de Convenções ni jhangala nasinariwe ni jenerale ithaniwa Barrett, aali munlubale asogolela agwarda. Arthur onosoriha egi: “Kiyari yokweya owoga ni jenerale. Nuumwaddela jenerale ele gafunimi oliye ogikoha: “We onere owedha obarela emudhi ela ni onerege wavaha dhinaahale? Miyo wera hee.”

Agahiddele njhangala nne Arthur othamagela oCentro de Convenções. Vano nuumoniha gwarda oliye otikina ni owoga egi: “Asaa we ohukanna jhangala nasinariwe ni jenerale, wahinona wi we oli muthu obajha orumedhiwa wi amukumihemo muthu anafuniye?” Vohilegela gwarda ole odhowa omwaja ddibila Richard ni emudhaye. Atene opinyedhana mukaroni mwimodhave mwarThuri odhowaga vade.

Arthur aherana dhatedhene awedhiye wihina abarele emudhi ya ddibila Richard. Oliba waye murima ni odhivela waye wekiristawu wahaddiginya murima athu amodha. Arthur onosoriha egi: “Mwanddamani agikavihere obarela nyumba ya ddibila Richard oroma oriha nlogo na Mulugu.” Teto athu owinjhiva ofunaga ohudhera wodhela Omwene mwaha yahona wi nlogo nsakuliwe ni Mulugu kaninna nsakulo, atene enoligana.”

^ paragarafu 9 Yaka ya 1937 The Golden Age osadduliwa ndinana withaniwaga Consolation nizugu Consolação. Vano yaka ya 1946 osadduliwa withaniwaga Awake! nizugu Despertai!

NAMASUGWERA—YOHUDHERA