Kuti vakwanirise basa ravo, vajiji vo Bhaibheri vaidikana kuva no cicunge. Ivona vaidikana kuzivisa “soko rakanaka” ku vandhu vakanaka no kuzivisa “njiku yo kuti” Tenji wedu waizovisijira vavengi.

Hama Joni Heri Hoskini, vaigara ku Kanadhaa vakapa ucapupu ngo cicunge pikija vainga veciteverehwa. Mu gore ra 1921, ivona vakasongana no umwe mundhu wo gerejha Metodhista. Hama Joni vakatanga mabhuyo avo veciti: “Tinodikana kuva no mabhuyo anodakajisa ngo pamusoro po Bhaibheri. Pikija tikava no mavonero akasiyana ngo pamusoro po shwiro jimweni, itusu tingatenderana kana kutama kutenderana asi topeja mabhuyo edu munjira yo ushamwari.” Asi andizvopi zvakazoitika! Hama Joni vakati: “Itusu takabhuya ko museswa mushoma basi, asi mwanarume wiya wakatanga kutaka musuvo ngo simba ndogumira pakurangarira kuti vhidhru yainga pamusuvopo yaizophwanyika.”

Mwanarume wiya wakakhuwa eciti: “Ngenyi auyendi kobhuya no vandhu vacikaripi Makristu?” Hama Joni avazivi kudavira ciri cese. Asi pavainga vecipinda, ivona vakatanga kurangarira kudari: ‘Ndairangarira kuti ndainga ndatotanga kubhuya no mundhu umwe.’

Mwanarume uu wo gerejha Metodhista paakabhuya no vandhu vo kugerejha rake dhiya yakatevera, iyena wakawavhunja zviro zvakashata ngo pamusoro pa hama Joni. Hama Joni vanoceukija kuti “iyena wakavhunja vandhu vo gerejha rake kuti inini ndainga mundhu anonyepa maningi wakambogara mu dhorobha iri, zvokuti ndaidikana kuuraiwa.” Asi izvi azvizivi kuita kuti hama Joni varembe, ivona vakaenderera mberi vecicumaera, pakupejisira vakava no muviyo jaushoni. Hama Joni vakati: “Ndakadakarira maningi kucumaera ku dhorobha iri. Vandhu vamweni vakatondivhunja kudari: ‘Inini ndinoziva kuti iwewe uri mundhu wa Mwari!’ Ivona vakatondipekeja zviro zvimweni zvandaida.”

Kuti vabesere vandhu vaidakarira kuti vaenderere mberi, Vajiji vo Bhaibheri, vakabudisa urongwa wo kujija Bhaibheri mu revhista A Idade de Ouro. * Umwe wo urongwa wondhowo wainga wo Estudo Bíblico Juvenil, (Jijo yo Bhaibheri Kuitira Majaha) wainga no muvhunjo kuitira kuti vabari vabhuye no vana vavo. Vabari vaidikana “kuita muvhunjo iji kuno vana vavo no kuvabesera kuti vawane mupinguro jakona mu Bhaibheri.” Muvhunjo jimweni jaidari inga “Bhaibheri rino mabhuku mangana?” waijijisa zviro zvakareruka zvinowanika um Bhaibheri. Jimweni jakadari inga, “Kunanga kuti  Mukristu wese wo cokwadi anodikana kuvetera kuteverehwa ngo njira iri yese?” wainasirira majaha kuti ave vacumaeri vano cicunge.

Urongwa umweni waidanijwa Estudos Avançados no Plano Divino das Eras, (Jijo Yakakhwirira yo Urongwa Hwo Umwari Panguva Yondhoyo). Iwona wakaitihwa Vajiji vo Bhaibheri vainga no uzivi hwakakura, wainga no muvhunjo jakacijikira mu bhuku rokutanga ro Estudos das Escrituras. Vandhu vazinji vakabesereka maningi ngo urongwa uu, asi revhista A Idade de Ouro numero 21 ya Dezembro yo 1921, yakazivisa kuti urongwa uhu aucaizobudiswazve. Ngenyi pakaitwa cinjo iyi ngo kukasika?

Hama jaitungamirira pa nguva iyi jakazwisisa kuti njira imwe yakanakisisa yo kujijisa Bhaibheri mundhu, ngo yo kujija shwiro imwe nga imwe. Ngo kudaro, muna Novembro mu gore ra 1921 kwakabudiswa bhuku rimweni raiti: A Harpa de Deus. Mundhu paiitendera kuashira bhuku iri, iyena waitaririsa pa kursu yaidanijwa kuti, Estudo Bíblico da Harpa. Pa kursu iyi, mundhu waijija ega woziva ngo pamusoro po “urongwa hwa Mwari wo kukomborera vandhu ngo upenyu hucingaperi.” Kursu iyi yaiitiswa kudini?

Mundhu paaitendera kuashira bhuku iri waiashiravo khadhi dokowane. Khadhi iri rainanga mapheji aidikana kuverengwa ngo mundhu pa sumana yondhoyo. Pa sumana yaitevera, mundhu waiashira khadhi rimweni rainga no muvhunjo jakasiyana-siyana jaicijikira pa mapheji aainga apera kuverenga. Kumbhiri ko khadhi iri, kwaikhombija mapheji amweni aidikana kuverengwa ngo mundhu pa sumana yaizotevera.

Pa sumana imwe nga imwe pa gumi na mbiri jo sumana, mundhu waiashira khadhi rimweni raitumihwa ngo imwe yo karasi kana ungano. Kazinji makhadhi aya aitumihwa nga vayani vainga vaavasharuka kana kuti vainga vacikakwanisi kucumaera muzi ngo muzi. Inga muezaniso Hambzaji Ana Katarina Gadheni vaigara ku Mirivhare, Pensirvhania Estadhus Unidhus vakananga kuti: “Yaya wangu Thaire vainga vano cineso co uhomi, asi bhuku A Harpa de Deus parakabudiswa, ivona vakabatikana maningi pa basa ro kucumaera. Sumana jese vaitumira makhadhi o muvhunjo.” Mujiji paaipeja kursu, umwe wo mu ungano waienda komubesera kuti ajije zvakawanda ngo pamusoro po Bhaibheri.

Pakupera ko gore, Hama Joseph Franklin Rutherford vakatumira karata ku ungano jese. Karata iyi yainanga kudari: “Gore rino kwakaitwa ucapupu wakakura maningi wo Umambo i hwakabudirira maningi kupinda gore riri rese haro pa nguva ino yo kukotora.” Vecirangarira ngo zvo kumbeji Hama Rutherford vakaengejera veciti: “Pacino basa rakakura maningi ricada kuitwa. Vangisanyi vamweni kuti vaitevo basa iri rinoshamaisa.” Pacina kukana-kana, Vajiji vo Bhaibheri vakazwira ngwajo iyi. Mu gore ra 1922 ngo kucunga kwese ivona vaizozivisa Umambo ngo njira inoshamaisa.