Pian nagawaan na saray Estudyante na Biblia so kimey ya panagpulong, kaukolan ya makpel ira. Iyabawag da so “maong a balita” ed saray mauyamo pero kaukolan da met ya ipulong so “agew na panangibales” ed saray mauges.

Si Brother John H. Hoskin ya taga Canada et agtinmakot ya nampulong anggano wala ray kinmontra ed sikato. Nen 1921, walay apulongan ton pastor na Methodist. Diad gapo ni labat, onia lay imbaga nen Brother Hoskin ed samay pastor: “Marakep no maong so pansumpalan to yay tongtongan ta, tan anggano wala ray bangat na Biblia ya mandumaan so pakatalos ta, agta komon manaalaan na salita.” Pero aliwan ontan so agawa. Oniay nanonotan nen Brother Hoskin: “Pigaran minuto kami ni labat ya mantotongtong, nagunoyan et bigla to labat ya binasigan may puerta. Say amtak namisimisi ta gawad salming.”

“Say pulongan mo iramay aliwan Kristiano!” so inyeyag na samay pastor. Agla inmesel si Brother Hoskin tan linma la. Pero kuan tod sarili to, ‘Duga labat sirin ya pinulongan ko ta singa aliwan Kristiano so ugali to!’

Diad sermon to may pastor ed tinmumbok ya agew, dineralan toy Brother Hoskin. Oniay inistorya nen Brother Hoskin: “Imbaga tod saray membro da ya siak lay sankatilaan ya too ya linma ed lugar da tan balibali ak kunon paltogen.” Pero agtinmundan nampulong si Brother Hoskin tan mas dakel laingen so dinmengel ed sikato. Oniay imbaga to: “Mas aganaan ak ya nampulong. Imbaga ingen na arum ya, ‘Amtak ya kimey na Dios itay gagawaen mo!’ tan tinepetan da ak no anto ray kaukolan ko pian natulongan da ak.”

Pian natulongan iray interesado ya onaligwas, walay ginawa na Saray Estudyante na Biblia ya programa na panag-aral na Biblia ya im-publish da ed The Golden Age. * Diad samay programan Juvenile Bible Study et wala ray tepet ya itepet na atateng ed ananak da tan tulongan da ran anapen so ebat diad Biblia. Wala ray simplin tepet, ya singa say: “Pigaran amin so libro ed Biblia?” Wala met iray tepet ya akatulong ed saray kabataan pian ag-ira ontakot ya manpulong, singa  say tepet ya: “Kasin napairap so amin ya tuan Kristiano?”

Say programan Advanced Studies in the Divine Plan of the Ages et parad saramay dakel lay amta ra ed Biblia. Ditan et wala ray tepet ya say ebat et naromog ed unonan volume na Studies in the Scriptures. Baleg so nitulong na sarayan programa ed saray manbabasa na The Golden Age. Pero diad samay isyu na Disyembre 21, 1921, walay pakabat ya ontunda la itan ya duaran programa. Akin ey?

Anengneng na saray brother ya mangidadaulo ed organisasyon ya kaukolan ya mas sistematiko so panag-aral na Biblia. Kanian in-release so libron The Harp of God nen Nobyembre 1921. No say sakey et interesado tan labay ton aralen iyan libro, kaukolan toy manpalista met ed The Harp Bible Study Course. Akatulong itan pian natalosan na saray interesado so “plano na Dios ya bendisyonan iray totoo na andi-anggaan ya bilay.” Panon itan ya gagawaen?

Kapangawat na too ed samay libro, walay akalaktip ditan ya melag a card. Nanengneng to ditan no anto ran pahina so kaukolan ton basaen. Diad ontumbok ya simba, pawitan da lamet na card ya wala ray tepet to nipaakar ed samay binasa to. Nanengneng met ditan no anto ray kaukolan ton basaen parad ontumbok ya simba.

Diad loob na 12 simba, samay interesado et sinimban makaawat na card ya ipawit na sankaasinggeran ya kongregasyon. Maslak ya card et ipapawit na saray maedad lan agagi odino saray agagi ya nanairapan lan manpulong ed kaabungan. Oniay nanonotan nen Sister Anna K. Gardner ya taga Millvale, Pennsylvania, U.S.A: “Nen in-release so The Harp of God, mas dakel lay nagagawaan nen Atsik Thayle anggano irap toy onakar. Sikato so sinimban mangipapawit na saray card.” No say sakey ya interesado et asumpal to la so 12 simba, wala lay ompasyar ya agi ya mangiyaral ed sikato na Biblia.

Nen manampot lay taon 1921, angipawit na sulat si Brother Joseph F. Rutherford ed amin ya kongregasyon. Imbaga tod satan ya sulat ya “mas dakel so apasabian na mensahe na Panarian ed sayan taon kompara nen imbebeneg iran taon.” Insan inyarum to: “Dakel ni so kaukolan tayon gawaen. Kanian paseseg yoy arum ya mibiang ed sayan makapalikliket ya kimey.” Mapatpatnag ya inunor itan na saray Estudyante na Biblia, ta nen 1922 et makmakpel tan amasya ra ed pangipulong na Panarian.