1921—Wan Handred Year Go Finis

PLAY

WATCH TOWER blo January 1, 1921, garem disfala kwestin for Olketa Bible Student: “Wanem important waka nao bae iumi duim lo disfala year 1921?” For ansarem kwestin hia datfala Watch Tower quotem Aesaea 61:1, 2, wea storyim hao hem important for olketa busy lo preaching waka lo 1921. Scripture sei: ‘Jehovah siusim mi fo talemaot gudnius long pipol. Hem sendem mi fo talemaot hem kasem taem nao fo Jehovah blesim pipol blong hem, an bae hem winim olketa enemi blong olketa.’

OLKETA NO FRAET FOR PREACH

Lo 1921, for duim disfala preaching waka, Olketa Bible Student mas no fraet. Bae olketa storyim “gudnius” lo pipol, bat olketa bae storyim tu taem wea Jehovah bae finisim nogud pipol.

Brata John Hoskin, wea stap lo Canada no fraet for preach, nomata pipol les for herem gud nius. Wanday lo 1921, John preach lo wanfala pastor blo Methodist church. Hem sei lo pastor hia: “Hem gud for iumi story tugeta abaotem Bible and nomata iumi no agree lo samfala samting, datwan olraet nomoa. Mi laekem iumi for hapi lo each other.” Bat pastor no laek herem story blo hem. John sei: “Mi startim story nomoa and pastor hitim strong door blo hem. Mi tingse door bae brek nao.”

Then pastor shout big and sei “Iu go story lo olketa lo heathen!” John luksavve hem shud go, bat hem ting olsem, ‘Luk olsem mi story lo wanfala heathen nao ia!’

John storyim hao lo next day, taem pastor duim sermon lo church blo hem, “hem warnim pipol lo church for stap klia lo mi and sei mi man for laea and for no lisin lo mi.” Nomata olsem John gohed preach and story lo staka pipol. John sei: “Mi barava enjoyim chance for preach lo olketa hia. Samfala mi meetim sei lo mi, ‘Mi savve iu duim waka blo God!’ and olketa sei olketa laek givim mi samfala samting for helpem mi.”

OLKETA DUIM STUDY SELEVA AND FAMILI STUDY

Lo datfala taem, for helpem olketa wea interest lo Bible, Olketa Bible Student putim samfala Bible kwestin and ansa lo The Golden Age magasin. * Samfala kwestin hia hem for parents storyim witim olketa pikinini blo olketa. Parents bae “askem olketa pikinini olketa kwestin and helpem olketa for faendem ansa lo Bible.” Samfala kwestin, olsem “Bible garem haomas buk?,” helpem pikinini for lanem olketa samting abaotem Bible. Olketa nara kwestin helpem olketa young wan for no sapraes sapos pipol againstim preaching waka olsem, “Waswe, olketa Christian expectim persecution?”

Samfala nara kwestin hem for olketa wea garem lelebet savve abaotem Bible. Olketa savve faendem ansa for olketa kwestin hia lo datfala buk Studies in the Scriptures. Pipol lanem staka samting from olketa kwestin and ansa wea stap insaed lo The Golden Age magasin, bat lo December 21, 1921 olketa disaed for no gohed putim olketa kwestin and ansa lo magasin hia. Why nao olsem?

OLKETA RELEASEM NIU BUK!

Datfala buk The Harp of God

Card wea storyim olketa page for readim

Thrifala card wea garem olketa kwestin

Olketa brata wea lead lo organization luksavve bae hem gud for pipol wea interest lo Bible for studyim Bible followim subject. Dastawe olketa wakem datfala buk The Harp of God, and then olketa releasem lo November 1921. Olketa wea interest for iusim disfala buk duim 12 week Bible study course seleva lo buk. Disfala course helpem olketa for minim “plan blo God for olketa man kasem laef olowe.” Hao nao olketa duim disfala course?

Taem olketa kasem datfala buk, bae olketa kasem wanfala card wea storyim olketa page for readim lo buk for firstfala week. Then bihaen datwan, olketa kasem nara card wea garem olketa kwestin abaotem wanem olketa readim finis. Lo botom lo card hem storyim olketa nara page for readim lo next week.

Evri week insaed lo 12-fala week samwan lo kongregeson bae sendem nara card lo man wea duim datfala course. Samfala wea olo or garem sik duim disfala waka. Olsem example Anna Gardner from Millvale, Pennsylvania, U.S.A. sei: “Taem pipol start for studyim datfala buk The Harp of God, datwan givim Thayle, sista blo mi waka for duim. Thayle no savve wakabaot, bat hem savve duim waka evri week for redyim olketa card wea garem olketa kwestin.” Taem man hem finisim datfala course, brata or sista lo kongregeson bae go visitim hem for helpem hem lanem moa samting from Bible.

Thayle Gardner sidaon lo wheelchair

OLKETA TINGIM WAKA FOR 1922

Lo end blo 1921, Brata Rutherford sendem leta lo evri kongregeson. Hem sei “lo 1921 olketa preach lo staka pipol, and staka pipol interest winim olketa nara year bifor.” Bat hem sei tu: “Staka waka stap yet for duim, so encouragem olketa narawan for joinim iumi lo preaching waka.” Iumi savve Olketa Bible Student followim wanem hem talem bikos lo 1922 olketa duim staka samting lo preaching waka.

Olketa Fren wea Protectim Each Other

Olketa Bible Student barava lovem and “helpem [each other] long hadtaem.”—Provebs 17:17.

Lo Tuesday, May 31, 1921, olketa accusim wanfala blakman and sei hem attakim wanfala white woman. Bihaen olketa putim hem lo cell for weitim olketa kotem hem, wanfala big faet kamap wea olketa kolem Tulsa Race Massacre. Winim 1,000 whiteman go attakim samfala blak man. Gogo faet kamap big lo Greenwood, wanfala ples wea staka blakman stap, and olketa steal from winim 1,400 haos and stoa blo olketa, and then bonem. Olketa sei samting olsem 36 go kasem 300 pipol dae lo datfala faet.

Richard Hill, wanfala blak brata wea stap lo Greenwood, storyim wanem hem happen: “Lo naet blo datfala faet meeting blo mifala gohed. Bihaen lo meeting mifala kam bak lo haos and mifala savve herem olketa lo taon gohed sutsut lo gun go kasem leit naet.” Lo Wednesday morning blo June 1, datfala faet kamap worse. Hem sei tu: “Samfala kam talem mifala for go hipap lo wanfala gavman building lo taon for kasem protection.” So Richard tekem waef and faevfala pikinini for go haed lo datfala building. Samting olsem 3,000 blak man and woman go stap haed lo datfala building, and army kam for protectim olketa and trae stopem datfala big faet.

Lo Wednesday, Arthur Claus, wanfala white brata, disaed for go chek sapos Richard and famili blo hem olraet. Hem sei: “From mi herem samfala attakim olketa blakman lo Greenwood and bonem haos blo olketa, mi laek go mek sure fren blo mi Richard hem sef.”

Arthur Claus iusim datfala buk The Harp of God, for teachim 14-fala pikinini

Taem Arthur kasem haos blo Richard olketa go finis, bat wanfala fren and neiba blo Richard wea hem whiteman lo there, and hem holem gun. Datfala neiba tingse Arthur hem kam for attakim Richard and singaot olsem: “Why nao iu kam lo area blo man hia?”

Arthur sei: “Mi talem hem mi fren blo Richard and mi kam lo haos blo hem staka taem. Sapos hem no bilivim datwan, mi savve bae hem sutim mi dae.” Bihaen, tufala evriwan stap lo there for protectim haos blo Richard from olketa wea laek kam steal.

Gogo Arthur faendemaot Richard and famili blo hem stap lo datfala gavman building. Olketa talem Arthur for eni blakman savve lusim datfala building, wanfala army officer mas saenem pepa for appruvim datwan. Arthur sei: “Nomata datfala army officer barava busy, mi garem chance for lukim hem. Mi talem hem mi laek for helpem famili blo Richard, and hem sei: ‘Waswe, bae iu lukaftarem olketa?’ Mi sei mi barava willing.”

Arthur kwiktaem go lo datfala gavman building and showim lo soldia lo there datfala pepa wea army officer saenem. Soldia sapraes and sei: “Iu nao first wan wea army officer letem for tekem eniwan aot from ples hia!” Then datfala soldia and Arthur go lukaotem famili blo Richard. Richard witim waef blo hem and faevfala pikinini, olketa evriwan squeeze insaed lo car blo Arthur for go bak lo haos blo olketa.

Arthur barava lukaftarem Richard and famili blo hem. Example blo hem for showimaot love and no fraet for protectim fren blo hem mekem olketa narawan tinghae lo pipol blo Jehovah. Arthur sei: “Neiba wea protectim haos blo Richard start for tinghae lo Olketa Jehovah’s Witness bihaen datwan. And samfala narawan start for interest lo truth bikos olketa lukim pipol blo God stap gud tugeta nomata olketa blak or white.”

^ par. 9 The Golden Age changem nem for Consolation lo 1937 and then Awake! lo 1946.

WASTAOA—STUDY MAGASIN