1921—اَج توں 100 سال پہلاں
1 جنوری 1921 دے ”دی واچٹاور“ چ بائبل سٹوڈنٹس کولوں ایہہ سوال پچھیا گیا: ”ایس سال اَسی کیہڑا کم پورے جوش نال کراں گے؟“ ایس سوال دے جواب چ یسعیاہ 61:1، 2 دا حوالہ دِتا گیا سی، جدے توں بائبل سٹوڈنٹس نُوں ایہہ یاد دَوایا گیا کہ اوہناں نُوں خوشخبری دی مُنادی دا کم دِتا گیا اے۔ ایہناں ایتاں چ لکھیا اے: یہوواہ نے مینوں چُنیا اے تاکہ میں حلیم لوکاں نُوں خوشخبری سُناواں تے یہوواہ دی خوشنودی پان دے دن دا تے اپنے خدا دے بدلہ لین دے دن دا اعلان کراں۔
بہادر بائبل سٹوڈنٹس
مُنادی دا کم کرن لئی بائبل سٹوڈنٹس نُوں دلیر بنن دی ضرورت سی۔ پر کیوں؟ کیونکہ اوہناں نے حلیم لوکاں نُوں خوشخبری سُنان دے نال نال بھیڑے لوکاں نُوں خدا دے بدلہ لین دے دن بارے وی دَسنا سی۔
بھرا جان ہینری ہاسکن جیہڑا کینیڈا چ رہندا سی، مخالفت دے باوجود دلیری نال مُنادی کردا رہیا۔ 1921 دے بہار دے موسم چ اوہدی ملاقات اِک میتھوڈسٹ چرچ دے پادری نال ہوئی۔ بھرا ہاسکن نے گل بات دے شروع چ اوہنوں کہیا: ”جدوں اَسی بائبل چوں گل بات کراں گے تے اَسی غصے چ نئیں آواں گے۔ جے سانوں اِک دُوجے دِیاں گلاں ٹھیک نہ لگیاں تے فیر اَسی دوستاں وانگوں گل بات ختم کر دَواں گے۔“ پر اِنج ہویا نئیں۔ بھرا ہاسکن نے دَسیا: ”اَسی بس تھوڑی دیر گل بات کیتی سی کہ اوس پادری نے اینی زور نال دروازہ بند کیتا کہ مینوں لگیا کہ دروازے دا شیشہ ٹُٹ کے فرش تے ڈِگ جائے گا۔“
اوس پادری نے چیخ کے اوہنوں کہیا: ”جاؤ جا کے اوہناں لوکاں نال گل کرو جیہڑے مسیحی نئیں نیں۔“ بھرا ہاسکن نے اوہنوں کوئی جواب نہ دِتا۔ پر جاندے ویلے اوہنے سوچیا کہ ”میں اِنج دے بندے نال ای تے گل کر رہیا ساں۔“
اگلے دن اوہ پادری جدوں اپنے چرچ چ تقریر دے رہیا سی تے اوہنے بھرا ہاسکن بارے بڑیاں غلط گلاں کیتیاں۔ بھرا ہاسکن نے دَسیا: ”اوہنے اپنے چرچ دے لوکاں نُوں میرے بارے کہیا کہ اوس بندے توں بچ کے رہوو کیونکہ اوہ بوہت وڈا دھوکھےباز اے۔ اوہنوں تے گولی مار دینی چاہی دی اے۔“ فیر بھرا ہاسکن نے کیہہ کیتا؟ اوہنے ڈر کے مُنادی کرنا بند نئیں کیتا سگوں بوہت سارے لوکاں نُوں گواہی دِتی۔ اوہنے دَسیا: ”مینوں اوتھے مُنادی کرن دا بڑا مزہ آیا۔ کجھ لوکاں نے تے ایہہ وی کہیا کہ سانوں پتہ اے کہ تُسی خدا دے خادم او، تے اوہناں نے میری بڑی مدد وی کیتی۔“
ذاتی تے خاندان نال مل کے مطالعہ
بائبل سٹوڈنٹس لوکاں دی مدد کرنا چاہندے سن تاکہ اوہ بائبل چ لکھیاں گلاں نُوں چنگی طرحاں سمجھن۔ ایس لئی اوہ اپنے اِک رسالے چ جنہوں ہُن ”جاگو!“ کہیا جاندا اے، باقاعدگی نال بائبل بارے سوال جواب چھاپدے سن۔ ایس رسالے چ ایہو جہے سوال وی ہوندے سن جنہاں تے ماں پیو بچیاں نال مِل کے گل بات کر سکدے سن۔ اوہ اپنے بچیاں کولوں رسالے چ دِتے گئے سوال پچھدے تے فیر بائبل چوں اوہناں دے جواب لبھن چ اوہناں دی مدد کردے۔ ایہدے چ کجھ اِنج دے سوال دِتے جاندے سن جیویں کہ ”بائبل چ کِنّیاں کتاباں نیں؟“ اِنج بچے بائبل بارے چھوٹیاں چھوٹیاں گلاں سکھ پائے۔ ایہدے چ کجھ ایہو جہے سوال وی سن: ”کیہہ ہر سچے مسیحی نُوں اذیت دِتی جائے گی؟“ اِنج بچیاں نُوں دلیری نال گواہی دین لئی تیار کیتا گیا۔
رسالے چ ایہو جہے بائبل سٹوڈنٹس لئی وی سوال سن جیہڑے پہلاں توں ای بائبل بارے بوہت کجھ جان دے سن۔ اوہ ایہناں سوالاں دے جواب ”سٹڈیز اِن دی سکرپچرز“ دی پہلی کتاب چ لبھ سکدے سن۔ ہزاراں لوکاں نے رسالے دے ایس حصے توں بوہت اہم گلاں سکھیاں۔ فیر 21 دسمبر 1921 دے رسالے چ دَسیا گیا کہ ہُن توں ایہہ حصہ نئیں چھاپیا جائے گا۔ ایس تبدیلی دی وجہ کیہہ سی؟
اِک نوِیں کتاب
کتاب ”دی ہارپ آف گاڈ“
کتاب نُوں پڑھن لئی شیڈول
سوالاں والے کارڈ
جیہڑے بھرا مُنادی دے کم چ بائبل سٹوڈنٹس دی رہنمائی کر رہے سن، اوہ سمجھ گئے سن کہ لوکاں نُوں بائبل دِیاں بنیادی سچائیاں ترتیب نال سکھن دی ضرورت اے۔ ایس لئی اوہناں نے نومبر 1921 چ کتاب ”دی ہارپ آف گاڈ“ شائع کیتی۔ ایس کتاب توں اِک بندہ آپ بائبل کورس کر سکدا سی۔ ایس کتاب دی مدد نال لوک ایہہ جان پائے کہ خدا انساناں نُوں ہمیشاں دی زندگی دین لئی کیہہ کرے گا۔ ایہہ کورس کیویں کیتا جاندا سی؟
جدوں اِک بندہ ایس کتاب نُوں لیندا سی تے نال اوہنوں اِک چھوٹا کارڈ وی دِتا جاندا سی جدے چ لکھیا ہوندا سی کہ اوس بندے نے ایس کتاب نُوں کیہڑے صفحے توں لے کے کیہڑے صفحے تک پڑھنا اے۔ فیر ایہدے اگلے ہفتے اوہنوں ڈاک دے ذریعے اِک ہور کارڈ بھیجیا جاندا سی۔ اوس کارڈ چ اوہناں صفحیاں بارے سوال لکھے ہوندے سن جیہڑے اوہنے پڑھے ہوندے سن۔ تے ایس کارڈ دے آخر چ لکھیا ہوندا سی کہ اگلے ہفتے اوہنے کتاب دے کیہڑے صفحے پڑھنے نیں۔
ایس کتاب توں بائبل کورس کرن والے بندے نُوں 12 ہفتیاں تک ڈاک دے ذریعے ایہہ کارڈ مِلدے رہندے سن۔ ایہہ اوتھوں دی کلیسیا اوہنوں بھیج دی سی۔ زیادہتر ایہہ کارڈ کلیسیا دے ایہو جہے بھین بھرا بھیج دے سن جیہڑے وڈیرے سن یاں جنہاں لئی گھر گھر مُنادی کرنا مشکل ہوندا سی۔ مثال لئی، امریکہ دی ریاست پینسلوانیا چ رہن والی اِک بھین اینا گارڈنر نے دَسیا: ”جدوں کتاب ”دی ہارپ آف گاڈ“ آئی تے میری معذور بھین تھائل پہلے توں وی زیادہ مُنادی کرن لگ پئی۔ اوہ ہر ہفتے سوالاں والے کارڈ لوکاں نُوں بھیج دی سی۔“ جدوں کوئی بندہ اوس کتاب توں بائبل کورس ختم کر لیندا سی تے کلیسیا دا کوئی بھین یاں بھرا اوہنوں مِلن جاندا سی تاکہ اوہنوں بائبل چوں ہور سکھا سکے۔
بھین تھائل گارڈنر اپنی ویلچیئر تے
حالے وی بوہت سارا کم باقی اے
ایس سال دے آخر چ بھرا رتھرفورڈ نے ساریاں کلیسیاواں نُوں اِک خط بھیجیا جدے چ اوہناں نے کہیا: ”پچھلے سال نالوں ایس سال اَسی زیادہ لوکاں نُوں بادشاہت دا پیغام سُنایا اے تے زیادہ لوکاں نُوں پاک کلام دی تلیم دِتی اے۔“ فیر اوہناں نے کہیا: ”حالے وی بوہت سارا کم باقی اے۔ دُوجیاں نُوں ہلاشیری دَوو کہ اوہ وی ایس اہم کم چ حصہ لین۔“ بائبل سٹوڈنٹس نے ایس ہدیت تے پورے دل نال عمل کیتا کیونکہ 1922 چ اوہناں نے بڑی دلیری نال پہلے توں وی زیادہ لوکاں نُوں خدا دی بادشاہی بارے دَسیا۔
