Valurcharcurmi Bibliata estudiajcunaga Diospita wilacärergan. Manami wacchacunalatachu ali wilacuyninta apapanman cargan, sinoga “jutsata rurashqanman tupu castigananpaq” cashgantapis.

Canadá naciuncho yachaj John Hoskin hermanunchega runacuna chiquiptinpis valurwanshi Diospita wilacurgan. 1921 watachoshi juc religioso runawan parlar galaycurgan, caynoshi nergan: “Bibliapitaga cushi cushila parlapacushwan, ichanga jucno jucno yarparpis jaucala y juc amigunomi parlashganchita ushashwan”. Cayno wauguinchi nishgannolaga manash pasarganchu. Waugui Hoskin cayno nin: “Ratula parlaycaptinchimi chay runaga rabiar puncuntapis wicapaypa wichgarcamurgan y nogaga manchacur ‘capazchi chay puncupa lunanpis pashtar janaman ishquircamunman’ nergä”.

Y chay religioso runaga piñashgalaraj caycar caytapis nirganshi: “Mana yaracoj runacunata parlapaj ayway”. Chay horaga wauguinchi Hoskin upälalashi cacurgan, y aywacuycashganchoshi yarpachacur nergan: “¡Pero Diosman mana yaracojtami parlapaycargä!” nir.

Waraynin junajchopis iglesianchoshi chay religioso runaga cayno nergan: “Cuidacärinqui paypita, payga sellama lulacoj runa, y chayraycur pistolawanpis wanuchishwan”. Chayno captinpis hermanunchega manash manchacurganchu, jinala achca runacunata Diospita yachachicurgan. Jina cayno nin: “Manami imaypis cushishgaga taricurgächu runacunata Diospita yachachir”. Y waquin runacunaga caytapis nirganshi: “Gamga Diospa sirvejninmi canqui, imalayquipis faltashuptiquega wilacamunqui” nir.

Bibliata yachacuycajcunami The Golden Age revistacho jorgapäcurgan Bibliapita imano yachacunapaj programacunata, chayga yanapash ali shongu runacunata. * Wamracunapaj yachacunapaj juc programapa jutin cargan “Estudio bíblico para los jóvenes” nishgan. Taytacunaga chay programacho yurimoj tapucuycunata rurapaj y Bibliacho ashinanpaj yanapaj. Waquin tapucuycuna  cargan “¿Bibliapa aycaj librunta caycan?”, y cayga facil-la yachacunapaj cargan. Juc tapucuypis cargan “¿Cristianucunaga chiquishgarächu canman cargan?”, cayga jovincunata yanapaj predicaciuncho valurcharcunanpaj.

“Estudios avanzados sobre el Plan Divino de las Edades” nishgan programapis alapa yanapaj Bibliata estudiaj tantiaj hermanucuna masraj yarpachacunanpaj, caypis jorgacämushga cargan Estudios de las Escrituras nishgan librucunapita. Cay ishcay programacunaga alapami yanapacoj Bibliata liejcunata. Pero diciembre quillapita, 1921 wata The Golden Age revista wilacurgan chay programacuna manana cananpaj. ¿Imanirtaj chayno wilacärergan?

Chay wichan pushacoj hermanucuna cuentata gocurgan Diospa marcanman chaylaraj chayaycamojcuna Bibliapita más shumaj yachacunanpaj. Chaymi 1921 wata, noviembre quillacho, El Arpa de Dios nishgan libro inglés idiumacho jorgacämurgan (1925 watachona españolcho). Chay libruta chasquejcunataga yanaparcärejmi Bibliapita yachacur galaycunanpaj. Yachacuyta munajcunaga quiquincunami acracärej, y tantiapäcojmi Dios ima aunicushganta y runacunaraycur imata ruramunanpaj. ¿Imanotaj estudiuta chasquipäcoj?

Runacuna librunta chasquiptenga juc notatapis chasquirejmi musyananpaj ima paginacunata leinanpaj. Juc caj semananchopis juc notata chasquirej, chaycho tapucuycuna caj leishganta yarpänanpaj, nircurpis chaycho wilapaj juc caj semanancho ima paginacunatana leinanpaj.

Chaylaraj estudiaycajcunaga congregaciunpitami ishcay quillapitapis más semanacunapa chay notata chasquipäcoj. Cay notacunataga apachicoj edayashga hermanucunami o puncun puncun aywayta mana puedej cajcuna. Estados Unidos naciunpita Anna Gardner paninchi cayno wilacun: “Cay jorgacämushgan libruga alimi cargan, gueshyaycaj Thayle nanäta yanapaj Diosta sirvir maslata rurananpaj, paymi chay notacunatapis apachicoj”. Estudianticuna yachacushganta usharirpis waquin hermanucunaga yapaymi watucaj Bibliapita maslata yachachinanpaj.

Wata ushariptenga Joseph Rutherford wauguilanchimi cartata apachicurgan lapan yachachicojcunapa. Chaycho nergan: “Diospa Gobiernunpita cay wata yachachicushganchega juc watacunapitapis mastaraj rurashcanchi”. Jina shamoj watacunapaj yarparmi nergan: “Ruranapäga achcarämi caycan, waquincunatapis wilashun noganchiwan arunanpaj” nir. Bibliata estudiaycajcunaga chaynolami rurapäcurgan. 1922 watachoga valurcharcurmi mastaraj Diospa Gobiernunpita yachachicärergan.