Toera kucita basa yakumwaza mphangwa, anyakupfundza Bhibhlya akhafunika kukhala acipapo. Iwo akhafunika kumwaza ‘mphangwa zadidi’ kuna anthu akucepeseka na kudziwisa ‘ndzidzi wa Mulungu toera kubwezera anyamalwa ace.’

M’bale J. H. Hoskin wakuti akhakhala ku Kanadha, amwaza mphangwa mwacipapo mwakukhonda tsalakana kutcingwa. Mu caka ca 1921, iye agumanikana na m’mwazi mphangwa wa Metodhista. M’bale Hoskin atoma kucedza naye mbalonga: “Ife tikhafunika kucedza mwauxamwali thangwi ya Bhibhlya, maseze tikhali na maonero akusiyana mu pinthu pinango. Pontho tikhafunika kumalisa makani anewa mwantendere na mwauxamwali.” Mbwenye pyenepi nee pyakwanisika. M’bale Hoskin athimiza: “Ife tacedza mu mphindi zingasi, buluka penepo metodhista unoyu amenya nsuwo mwamphambvu kakamwe mbandinyerezera kuti vidhru ya nsuwo unoyu mbidasweka.”

Metodhista unoyu alonga mwaukali kuti: “Thangwi yanji nee usaenda kalonga mphangwa zenezi kuna anthu akuti nkhabe phembera? M’bale Hoskin nee antawira, mbwenye mu ndzidzi ukhabuluka iye, iye alonga ekhene ‘ndikhanyerezera kuti mbadanditawira munjira yadidi!’

Mangwana mwace, pidaenda iye kapfundzisa mu gereja yace, iye alonga pinthu pyakuipa thangwi ya m’bale Hoskin. M’bale Hoskin asakumbuka: “Iye acenjeza anthu a mu gereja mwace thangwi ya ine, mbaapanga kuti ine ndikhali nyauthambi kakamwe mu nzinda unoyu, pontho ndikhafunika kuphiwa.” Mbwenye pyenepi nee pyacitisa m’bale Hoskin kubwerera nduli, iye apitiriza kumwaza mphangwa zadidi kuna anthu azinji. Iye alonga: “Ine ndakomerwa kakamwe na kumwaza mphangwa mu nzinda unoyu. Ngakhale m’bodzi wa anthu anewa akhamwazira ine mphangwa alonga: ‘Ine ndisadziwa kuti iwe usacita basa ya Mulungu,’ pontho iwo akhaperekeka toera kundipasa pinthu pyakufunika kuna ine.”

Toera kuphedza anthu kuti abvesese mwadidi Bhibhlya, kazinji kene anyakupfundza Bhibhlya akhabulusa misolo yakuti ikhabwera na mibvundzo na matawiro mu revista yakuti cincino isacemerwa Lamukani! Mu revista ineyi mukhali na mibvundzo ya anapiana yakuti anyakubala mbadakwanisa kucedza na anawo. Anyakubala mbadakwanisa kucita mibvundzo ineyi kuna anawo, pontho mbadaaphedza toera kugumana matawiro m’Bhibhlya. Mibvundzo inango yakukhonda nentsa ikhagumanika mu revista ineyi yakuti mbidaphedza anapiana kudziwa mwadidi Bhibhlya na  kumwaza mphangwa mwacipapo ndi ninga iyi: “Ndi mabukhu mangasi anagumanika m’Bhibhlya? Kodi Akristu onsene andimomwene asadikhira kutcingwa?”

Mu revista ineyi mukhagumanikambo mibvundzo na matawiro kuna anthu akuti akhali kale na cidziwiso ca Bhibhlya. Matawiro akhagumanika mu volume yakutoma ya Estudos Das Escrituras. Anyakuleri apfundza pinthu pizinji kakamwe na mibvundzo ineyi, mbwenye mukupita kwa ndzidzi pacitwa cidziwiso cakuti mibvundzo ineyi nee mbidabuluswabve. Thangwi yanji mibvundzo ineyi nee mbidabuluswabve?

Abale akhatsogolera adzindikira kuti anthu akhafunika kupfundza Bhibhlya munjira yakukhonda nentsa. Na thangwi ineyi, mwezi wa Novembro wa caka ca 1921 iwo abulusa bukhu ya nsolo wakuti A Harpa de Deus. Munthu onsene akhapangiza cifuno mbatambira bukhu ineyi, akhafunika kulembeswa toera agumanike pa kursu yakuti ikhacemerwa Curso do Estudo Bíblico da Harpa. Kursu ineyi yaphedza anthu toera kupfundza pya cifuniro ca Mulungu cakupasa anthu umaso wakukhonda mala. Kodi kursu ineyi ikhacitwa tani?

Munthu angatambira bukhu ineyi, iye akhapaswa kartau ikhapangiza matsamba akhafunika iye kuleri m’bukhu ineyi. Sumana inatowera, iye akhapaswa kartau inango ya mibvundzo yakuti yabuluswa m’matsamba adaleri iye. Kunkhomo kwa kartau ineyi kukhalembwa matsamba anango akhafunika iye kuleri sumana inatowera.

Sumana ibodzi na ibodzi nkati mwa masumana 12, nyakupfundza akhatambira kartau ipswa yakuti ikhatumizwa na mpingo wa cifupi na kunakhala iye. Kazini kene, makartau anewa akhatumizwa m’mipingo kuna ale akuti ndi akukalamba na ale akuti ungumi wawo nee uli mwadidi. Mwacitsandzo, Anna K. Gardner wa ku Estados Unidos alonga: “M’bale wanga anacemerwa Thayle akhali wakulamala, mbwenye pidabuluswa bukhu yakuti A Harpa de Deus iye adzakhala wakuphatika kakamwe thangwi akhatumiza makartau a mibvundzo masumana onsene.” Nyakupfundza angamalisa kursu, m’bale peno mulongo akhaenda kancedzera toera kumphedza kuti apfundze pinthu pinango pya m’Bhibhlya.

Kunkhomo kwa caka ca 1921, M’bale J. F. Rutherford atumiza tsamba ku mipingo yonsene. Tsamba ineyi ikhalonga: “Caka cino abale na alongo amwaza mphangwa za Umambo kupiringana pyaka pyonsene pya nduli.” Buluka penepo, m’bale Rutherford athimiza: “Ticiri na basa izinji toera kucita. Wangisani anango toera acitembo basa ineyi yakutsandzayisa kakamwe.” Mwakukhonda penula, anyakupfundza Bhibhlya acita pidalonga m’bale Rutherford. Mu caka ca 1922, iwo amwaza mphangwa za Umambo mwacipapo kupiringana pyaka pyonsene.