Djɛ nkotshɛ odjito wɔwɔ, ambeki wa Bible wayalaki ladjɛ ndjala l’eloko wolo. Iwɔ wayalaka ladjɛ mpoposanyɛ ‘losango lɔ wɔlɔ’ le anto w’okitshakitshɛ edjinge ‘lofu lɔ nsɔmbola’ le anto wa pɔlɔ.

Wɔnanyɔ J. H. Hoskin, kanga l’intasɛki lá Canada, ápoposanyɛki l’oloko wolo onkfumɔ kaanga anto iyonanyɛka. Lá eleko kɛ akishi ɔmɔnghakawɔ, lá 1921, nde apomanaka l’osambisha ɔmɔtshi w’ose Musɔnyi. Wɔnanyɔ Hoskin awangaka djamba nyande l’etepela wɛnɛ ante: “Iso ladjɛ nsawola la wɔlɔ onkfumɔ akambo w’imá Afunelo, edjinge kaanga sopokana l’akambo amɔtshi, iso nkoka nshiyɛ djamba djɛso la vu la ntshikala tolongo.” Koko atayala nghɔsɔ. Wɔnanyɔ Hoskin akɔndɔla ante: “Ngo tosawola minitɛ imangha toko, pastɛrɛ kɛso ávutáka lɔwɔ la wolo lá lokfuke ko nkanelaka etengo vitrɛ dj’ekekete djemá lokfuke ndeke lombɔkfɔ.”

“Ko mpame kɛkɔ apangɔka ante lamo ngopatshu te anto wapalekɔ Akristo djɛ ntopoposanyɛ lewɔ?” Wɔnanyɔ Hoskin atokadjimola, koko winá wɔ ndotatshɔka, nde atepelaka l’oloko nyɔmɛlɛ ante, ‘ape edjinge wɛ ndeke lopalekɔ Okristo!’

Lofu lɔwɔlamisa winá wɔ pastɛrɛ kɛsɔ ndɔtɔpɛyɛ djamba l’etolo kɛnde, nde atepelaka wayi w’engolo lá nkambo djɛ wɔnanyɔ Hoskin. Wɔnanyɔ Hoskin atepelaka ante, “nde ewolaka ase etolo kɛnde má ndashimela ante lemi ndekɔ onto woleka ongolo lá ngando kɛnɛ edjinge ante lemi ladjɛ ndjakema,” koko nkambo djɛsɔ djetoshimba kaanga ndambo, nde akindjɛka mpoposanyɛ ko awaka eposelo wɛ wɔlɔ efula. Nde atepela ante: “Lakɔpaki mpoposanyɛ efula l’eteyi. Anto amɔtshi w’oshimelaka kaanga ambɔ: ‘Iso ndjewaka ente wɛ olekɔ onkambi wɔ Ndjambe!’ la wa ndjopolaka djɛ mpɛyɛ lemi kenkfumɔ k’oyɛmi la djonyi.”

Djɛ nkotshɛ anto dj’iwɔ nsipisoyɛ Bible wɔlɔ, Ambeki wa Bible waposɛki mbala la mbala weepó la nsakiso yemá Bible lá periodikɛ kɛ Âge d’or. * Nonghanyi kɛ wekelo wɔ Bible kelendana la dangala ayalaki la weepó wɛ ambotshi yakokaka nsawola la wana wawɔ. Ambotshi wayalaki ladjɛ “ndjopola wana wawɔ weepó wɛsɔ la ndakotshɛ djɛ ndjisola etena ketanema nsakiso yɛ weepó wɛsɔ lá Bible.” Weepó ɛmɔtshi, ndjɔmbɔmba wɔnɛ: “Bible deko la tonkankanda tomangha?,” walakanyɛki akambo amɔtshi wa wɔdju walendana la Bible. Weepo enkina, ndjɔmbɔmba “Okristo onkfumɔ wɔ nsɔsɔlɔ nkoka nkongela ante ayale lá yopo  yɛkɔnge angopomana ngo l’ekakasano?,” walɔngɔsɔlaki dangala djɛ ndjala ansakodji y’eloko wolo.

Ayalaki lonkina la weepó edjinge nsakiso yɛ Bible lá nkambo djɛ wanɛ wamboshiyɛka ndjala l’ewo k’efula kɛ Bible, nsakiso yɛsɔ yakokaki ntanema lá vɔlimɛ djɛ ntondo dj’onkanda Études des Écritures. Nunu dj’antangi wawaki wapɔ má nonghanyi yɛsɔ, koko Réveillez-vous! wɛ Ngɔndɔ kɛ djomi l’ape 21, 1921, ewoyɛka ante nonghanyi ipe yɛsɔ ipangokindjɛ lonkina. Lamo otshikitano wɔ l’isashimoyɛ wɔsɔ?

Wananyɔ walɔndjɛki olemo wɛnaka ambɔ Ambeki wa Bible wa bango ladjɛ ndjeka akambo wa nsɔsɔlɔ wa djonyi lá yopo yetshikitanyi, djɛkondeke yaposɛ onkanda La Harpe de Dieu lá Ngɔndɔ kɛ djomi l’ɔmɔ 1921. Wanɛ wayapɛyɛki l’akambo wa nsɔsɔlɔ wawolaki ndɔsa onkanda wɔsɔ wanangháki wekelo wɔ Bible wɔsɔ iyɔmɛlɛ. Wekelo w’onto nyɔmɛlɛ wɔsɔ, wakotshɛki antangi djɛ nsipisoyɛ “ikanyi yɛ Ndjambe yɛ mpɛyɛ anto ɛtshɔkɔ wɛ lowiko l’etshinda.” Wekelo wɔsɔ ndananghemaka ngete mo?

Winá w’onto ndaawolaka kɔpi k’onkanda wɔsɔ, wɔpɛyɛki kartɛ kɛ daambi k’ɔwɛnyɛki akishi w’indakokaka mbala l’onkanda wɔkɔ. Lobengo lɔ wɔlama wayɛki ndɔpɛyɛ kartɛ kelekɔ la weepó efula welendana la kɛnɛ k’indawale. L’ekomo kɛ kartɛ kɛsɔ, wafunaki akishi w’oyɛnde ladjɛ mbala lobengo lɔwɔlama.

Lobengo tshɛ l’ilá kɛ mbengo 12, ombeki onkfumɔ awaki kartɛ kɛ bango lá mesajɛ me oloyi ɔmɔtshi w’ansakodji wayalaki l’edjena kɛ nditansɛka kana má otshumano wolekɔ entshupa lande. Mbala efula wanɛ watomaki wa kartɛ yɛsɔnde wananyɔ l’ankaana yɛ nkokolo kana wanɛ watayalaki l’akoka wa mposa t’olemo w’ipoposanyɛ wɔ mvulu la mvulu. Ndjɔmbɔmba, Anna K. Gardner, kanga l’intansɛ lá Millvale, Pennsylvanie, lá États-Unis atepela ante: “Winá wɔ onkanda La Harpe de Dieu yapose, wɔpɛyɛka Thayle, nkaana kɛmi keyalaki l’okakasano efula wɔ nkɛnda, olemo efula wɔ ntomanelana wa kartɛ yɛ weepó lobengo lonkfumɔ.” Winá wɔ onto ndashiyɛka wekelo wɔ nyɔmɛlɛ wɔsɔ, onto ɔmɔtshi m’otshumano atshɔki ntokotshɛ djɛ ndjewa akambo ankina efula w’imá Bible.

L’ekomo k’ɔnɔnyi, Wɔnanyɔ J.F. Rutherford atomelaka wananyɔ ankfumɔ welá eloyi onkanda. Nde afunaka ante: “Olemo w’ipoposanyɛ w’Onkfumi wonanghemisa ɔnɔnyi wɔnɛ wokomaka la wokotshɛka anto efula ndeka ɛnɔnyi enkfumɔ wemboheta wɛ eleko kɛ vukelo.” Masɔ, nde akotshɛka ante: “Olemo wombotshikala djɛ nangha wolekɔ efula. Nyokembɛ anto ankina djɛ ntotana l’olemo wɔ wɔlɔ efula wɔnɛ.” Nyɛnamaka papoo ente Ambeki wa Bible wakambaka la nkambo djɛsɔ. L’ɔnɔnyi wɔ 1922 iwɔ wa poposanyɛka losango l’Onkfumi l’oloko wolo onkfumɔ lá yopo yeleka wɔlɔ.