1. Бис неге санааркап турган болорыс?

 УДАБАС ЛА бӱдетен судурларды сананзаар, слер бир эмеш коркый бередеер бе? Темдектезе, тӧгӱн кудай јаҥдарды јоголторын, Магог јериниҥ Гогы табару эдерин ле Армагеддон деп јуу-согушты сананзаар? Ол эмезе бу болотон кӱч ӧйлӧрдӧ мениҥ Кудайга бӱдерим бек болор бо деп санааркайдаар ба? Эйе болзо, бу јӧрмӧл слерге. Мында бис Иисустыҥ сӧстӧрин тереҥжиде кӧрӱп ийерис. Ол айткан: «Јӱректеригер тӱймебезин. Кудайга бӱдигер, Меге де бӱдигер» (Иоанн 14:1). Бек бӱдӱмји келер ӧйдӧҥ коркыбаска болужар.

2. Бӱткенисти тыҥыдарга нени эдер керек, бу јӧрмӧлдӧ нени шӱӱп кӧрӧрис?

² Бӱткенисти тыҥыдарга ла келер ӧйдӧ болотон кӱчтерди ӧдӧргӧ, бӱгӱнги кӱнде болуп турган кӱчтерди канайып ӧдӱп турганысты шӱӱп кӧрӧр керек. Анайып бис бойыстыҥ уйан јанысты билип аларыс. Бу биске келер ӧйдӧ болотон кӱчтерди ӧдӱп чыгарга белен болорго болужар. Алдында ӧйдӧ Иисустыҥ ӱренчиктеринде бойлорыныҥ бӱдӱмјизиниҥ уйан јанын кӧрӱп ийген учуралдар база болгон. Бу јӧрмӧлдӧҥ бӱткенистиҥ уйан јандарын кӧрӱп ийерге болужатан тӧрт учурал кӧрӱп ийерис. Анайда ок бу учуралдардаҥ келер ӧйгӧ белен болорго нени эдер керек деп билип аларыс.

3. Матфей 6:30, 33-теги Иисустыҥ сӧстӧриле болзо, бистиҥ бӱдерис недеҥ кӧрӱнет?

³ Билелӱ акалар бойыныҥ билезин ӱзе јанынаҥ јеткилдеерге кӱӱнзеп турган эмей: курсак-тамакла, кийим-тудумла, турала. Је бу јеҥил эмес. Кем де иш јок артып, узак ӧйгӧ чек иш таппай турган болор. А кем де христиандарга  келишпей турган ишке кирбей јат. Бу учуралдардыҥ ончозында Иегова Кудай бистиҥ билелерди кичееп турган деп бӱдер керек. Бого тӱҥей шӱӱлтени Иисус Кырдагы куучынында айткан. (Матфей 6:30, 33-ти кычырыгар.) Иегова бисти качан да артыргыспас деп, бир де алаҥзыбай турган болзоос, бис эҥ керектӱ немени — Каандыктыҥ ижин, баштапкы јерге тургузарыс. А Иегова биске керектӱ немени ӱзе берип турган деп кӧрӱп турган болзоос, оныла колбуларыс тыҥып, бӱдӱмјис бек болор.

4, 5. Бир билеге акча-манат јанынаҥ кӱчтерди ӧдӧргӧ не болушкан?

⁴ Иегова Венесуэлада јадып турган бир билени болуш јок артыргыспаган. Олордо фирма болгон. Олор оныла азыранган. Је бир катап мылтык тудунган банданыҥ улузы бу билени бойыныҥ туразынаҥ чыгара сӱрӱп ийеле, јерин албан кӱчле айрып алган. Бу билениҥ бажы, бистиҥ ака Мигель Кастро *, куучындайт: «Эмди бис бир кичинек јерди арендага алып, оныҥ маала-ажыла азыранып јадыс. Мен кӱнӱҥ ле Иеговага мӱргӱп јадым, бисти курсак јок артыргыспазын деп». Бу билениҥ јӱрӱми кандый да кӱч болзо, олор Иегова Адазына иженип јат. Олор тыҥ бӱдӱп јат, эҥ керектӱзин Ол тӱҥей ле берер деп. Анайып бу биле јуунныҥ туштажуларын бир де божотпой јат, јарлаар ишке јаантайын туружат. Олор Кудайдыҥ Каандыгын баштапкы јерге тургузып турарда, Иегова бойыныҥ јанынаҥ бу билени эҥ керектӱзиле јаантайын јеткилдеген.

⁵ Бу кӱч ӧйлӧрдӧ Мигель ака ла оныҥ ӱйи Юрай Иегованыҥ болужын кӧрӧргӧ албадангылап јат. Иегованыҥ болужын олор ака-эјелер ажыра кӧрӧт. Темдектезе, ака-эјелер олорго кандый бир керектӱ неме берип јат, ол эмезе Мигель акага иш табып аларга болужып берген. Анайда ок олор Иегованыҥ болужын филиалдаҥ келген гуманитарный болуштаҥ кӧргӱлеген. Мынайып Иегованыҥ болужын кӧрӱп, олордыҥ бӱдӱмјизи тыҥыйт. Бу билениҥ јаан кызы Йоселин, олорло кандый учурал болгонын куучындап ийеле, мындый сӧстӧр айткан: «Иегова биске јаантайын болужып јат. Оныҥ болужын кӧрӧргӧ андый јакшы! Ол мениҥ најым, мен кандый ла айалгада ого иженер аргалу. Бистиҥ биле бу кӱчтерди ӧдӧргӧ албаданып ла јат. Анайып, удабас оноҥ до кӱч болотон ӧйлӧрди ӧдӱп чыгарга ӱренип јадыс».

6. Акча-манат јанынаҥ кӱчтер болуп турза, слер бӱдӱмјигерди канайып тыҥыдараар?

⁶ Слердиҥ биледе акча-манат јанынаҥ кӱчтер болуп турган болзо, санааркап турган болороор. Мындый ӧйдӧ Иегованаҥ Матфей 6:25—34-тӧги Иисустыҥ сӧстӧрин шӱӱп сананарга болуш сурагар. Анайда ок Каандыктыҥ ижине эрчимдӱ туружып турган ака-эјелерди Иегова канайып кичееп турганын шӱӱп сананыгар (1 Кор. 15:58). Иегова олорго до кӱч айалгада болужып турган болордо, слерге  де болужар. Иегова Адагар слерге не керек болуп турганын, слерге канайып болужатанын билер. Иегова слерге болужып турганын кӧрӱп турзаар, бӱткенеер оноҥ тыҥ болор, анайда ок келер ӧйдӧ болотон оноҥ кӱч айалгаларга белетенип алараар (Авв. 3:17, 18).

7. Јоткон тушта Иисустыҥ ӱренчиктериниҥ бӱткени ас болгоны недеҥ кӧрӱнди? (Матфей 8:23—26).

⁷ Бир катап Иисус ӱренчиктериле кожо талайда тыҥ јотконго табарткан. (Матфей 8:23—26-ны кычырыгар.) Талайдыҥ суузы јотконноҥ улам тыҥ јайканып, кемеге кирип турарда, ӱренчиктер тыҥ коркый берген. Олор амыр уйуктап јаткан Иисусты ойгозып, болуш сурадылар. Иисус ойгонып келеле, ӱренчиктерине айтты: «Не андый коркынчак болдыгар, ас бӱдеечи улус?» Иисустыҥ ӱренчиктерине бир де ундыбас керек болгон: Кудай Иисусты ла оныла кожо болгон улусты тӱҥей ле аргадап алар деп. Бу болгон учуралдаҥ бис неге ӱренип јадыс? Бистиҥ бӱдӱмјис бек болзо, јӱрӱмде болуп турган ла ар-бӱткенде болуп турган кандый ла јоткондорды ӧдӱп чыгарыс.

8, 9. Анель эједе кандый учурал болгон, бу тӱбекти ӧдӧргӧ ого не болушкан?

⁸ Пуэрто-Рико деп јерде јадып турган бистиҥ эјениҥ учуралын кӧрӱп ийектер. Бу эје 2017 јылда «Мария» деп коркышту тыҥ јотконго табарткан, мынаҥ улам оныҥ туразы јемирилип калган. Оныҥ кийнинде иш те јок арткан. Анель мынайып куучындайт: «Јоткон болгон ӧйдӧ меге коркышту кӱч болгон. Бу учуралдаҥ мен Иеговага оноҥ тыҥ иженерге ле бойымныҥ санааркаштарымды Иеговага ӱзе куучындап турарга ӱренип алгам. Иеговага иженбеген болзом, бойымныҥ ийде-кӱчим јетпес эди».

⁹ Анельдиҥ куучындаганыла болзо, кӱч ӧйлӧрдӧ ого сӧсуккур болгоны болушкан. Ол айткан: «Организацияныҥ башкартуларына сӧсуккур болгонымнаҥ улам јӱрегимде амыр болгон. Анайда ок мен Иегованыҥ болужын ака-эјелер ажыра кӧргӧм. Олор меге кӧгӱс те, акча-манат та јанынаҥ болушкан. Иегова меге артыгынча болушкан. Оныҥ мындый болужын кӧрӧлӧ, мениҥ бӱткеним оноҥ тыҥ тыҥыган».

10. «Тыҥ јотконды» ӧдӱп чыгарга биске не болужар?

¹⁰ Бистиҥ кажыбыста ла јӱрӱмисте «јаан јоткон» болордоҥ айабас. Слер ар-бӱткенниҥ јотконына туштаган болороор эмезе су-кадык уйадаганынаҥ улам санааркап турганаар. Кезикте санааркаштар кижиниҥ бажынаҥ чек чыкпай јат. Је мындый санааркаштар бисти Кудайдаҥ тура апарбазын деп, Кудайга јаантайын мӱргӱп, ого јуук болорго албаданар керек. Анайда ок Иегова слерге алдында канайып болушканын эске алып туругар (Сар. 77:11, 12). Мынайып эдип јӱрзеес, бистиҥ бӱдӱмјибис бек болор. Иегова  бисти качан да артыргыспас деп бир де алаҥзыбазыс!

11. Биске кӧстӧлгӧн акаларга нениҥ учун сӧсуккур болор керек?

¹¹ Кӱчтерди ӧдӧргӧ база не болужар? Анель эјениҥ учуралын кӧрзӧӧс, сӧсуккур болоры болужар. Иегова ла Иисус кемдерге бӱдӱп турган, биске де олорго бӱдӱп турарга ӱренер керек. Кӧстӧлгӧн акалардыҥ айтканы кезикте саҥ-башка деп билдирердеҥ айабас. Је Иегова сӧсуккур улуска алкыжын берип јат. Сӧсуккурынаҥ улам аргадалган Агару Бичиктеги улустыҥ темдерин ле бӱгӱнги ака-эјелердиҥ темдерин шӱӱп сананыгар (Чыг. 14:1—4; 2 Лет. 20:17). Мынайып шӱӱп сананзаар, Иегованыҥ организациязына ла кӧстӧлгӧн акаларга сӧсуккур болор кӱӱнеер тыҥыыр (Евр. 13:17). А бу дезе келер ӧйдӧ бастыра јерди табаратан јотконды ӧдӧргӧ болужар (Укаа 3:25).

12. Несправедливостько туштазаас, бӱдӱмји бисти нени эдерге кӱӱнзедер? (Лука 18:1—8).

¹² Иисус оныҥ ӱренчиктери несправедливостько туштаар, мынаҥ улам олордыҥ бӱдери ченелер деп билер болгон. Оныҥ учун олорго ӧбӧӧни божоп калган бир ӱй кижи керегинде укаа сӧс куучындаган. Бу ӱй кижи Кудайдаҥ да коркыбас, улустаҥ да уйалбас јаргычыга баштанып, коркышту тыҥ јайнап, болуш сураган. Нениҥ учун дезе ол бӱдӱп турган болгон, кӧп јайнап сураза, јаргычы ого тӱҥей ле справедливый јаргы чыгарар деп. Оноҥ чын ла, байагы јаргычы бу ӱй кижиниҥ сурагын бӱдӱрип берген. Бис мынаҥ неге ӱренедис? Иегова база јаргычы, је ол бу јаргычы ошкош эмес. Иисустыҥ айтканыла: «Кудай Ого тӱн-тӱш јайнап турган Бойы талдап алгандарын корулабас беди?» (Лука 18:1—8-ти кычырыгар.) Анайда ок Иисус мынайып айткан: «Је Кижи Уулы келеле, Ого бӱдӱп турганды јердеҥ табар ба?» Айдарда, бистиҥ бӱдерис байагы ӱй кижиниҥ бӱдери чылап бек болзо, бис несправедливостько туштазаас, чыдамкай болуп, Иегованаҥ чӧкӧбӧй лӧ болуш сураарыс. Иегова бӱгӱн бе, эртен бе тӱҥей ле болужар деп сакыырыс. Мӱргӱӱл — јаан ийде-кӱчтӱ деп ундыбас керек. Мӱргӱӱлдеристиҥ каруузын Иегова биске кезикте сакыбаган јанынаҥ берет.

13. Мӱргӱӱл бир билеге канайып болушкан?

¹³ Конго деп Демократический Республикада јадып турган Вероника деп эједе мындый учурал болгон. Олордыҥ ороонында гражданский јуу-согуш башталарда, эјеге Керечи эмес ӧбӧӧниле, 15 јашту кызыла јадып турган деремнезинеҥ качарга келишкен. Анайып олор блокпостты ӧдӱп јадарда, автоматтарлу улус олорды ӧлтӱрерге сананган. Мынаҥ улам Вероника эје тыҥ ыйлай берерде, кызы энезин токунадарга, Иеговага мӱргӱп баштаган. Ол мӱргӱӱлинде Иегованыҥ адын канча катап айдып мӱргӱп турарда, командир ого айдып јат: «Сени мынай  мӱргӱӱрге кем ӱреткен?» А ол: «Энем» — деген. Оноҥ ол Матфей 6:9—13-те айдылганыла, мынайып Иисус мӱргӱген деп јартап берген. Командир мыны угала: «Је барлагар. Иегова Кудайыҥ сени корулазын!» — деп айткан.

14. Бистиҥ бӱдӱмји канайып ченелердеҥ айабас, је чыдажып сакыырга биске не болужар?

¹⁴ Бу учуралдардаҥ јарт кӧрӱнип јат, мӱргӱӱлдиҥ ийде-кӱчи сӱреен јаан деп. Је Иегова слердиҥ мӱргӱӱлигерге узак каруу бербейт деп билдирип турза нени эдер керек? Чӧкӧбӧй оноҥ ло ары мӱргӱгер. Иегова слердиҥ јанаарда, ол слерге качан, канай болужатанын јакшы билер деп, бир де алаҥзыбагар. Анайда ок агару тын сурагар (Флп. 4:13). Келер ӧйдӧ Иегова биске сӱреен кӧп алкыштар берер. Бу алкыштардаҥ улам бӱгӱнги кӱнде ӧткӧн кӱчтереер санаагарга да кирбес. Эмдиги болуп турган кӱчтерде Иеговага иженерге ӱренип алзаар, келер ӧйдӧ болотон кӱчтерди ӧдӧргӧ белен болороор (1 Пётр 1:6, 7).

15. Матфей 17:19, 20-ле болзо, Иисустыҥ ӱренчиктери нени эдип болбогон?

¹⁵ Иисус ӱренчиктерин бек бӱдӱмји кандый ла кӱчтерди ӧдӧргӧ болужып турган деп ӱреткен. (Матфей 17:19, 20-ни кычырыгар.) Бир катап ӱренчиктер Иисуска базып келеле, кӧрмӧстӧрди сӱрӱп болбогонын куучындагылады. Је мынаҥ озо олор кӧрмӧстӧрди чыгара сӱргилеп туратан, а эмди нениҥ учун сӱрӱп болбогон? Иисустыҥ јартаганыла болзо, олордыҥ бӱдери ас болгон. Иисустыҥ айтканыла, кижиниҥ бӱдӱмјизи бек болзо, ол кырларды да јылдырып ийер аргалу. Ӧскӧртӧ айтса, бӱдӱмјизи бек кижи кандый ла кӱчтерди ӧдӱп чыгар. Кезикте бистерде де кырлардый кӱчтер болордоҥ айабас.

16. Хейди эјеге бӱдӱмјизи ченелтени ӧдӧргӧ канайып болушкан?

¹⁶ Эмди Гватемалада јадып турган Хейди эјениҥ учуралын кӧрӱп ийектер. Бистиҥ эје ӧбӧӧниле кожо, Эддиле, јуунныҥ туштажузыныҥ кийнинеҥ јанып барадарда, оныҥ ӧбӧӧнин ӧлтӱрип салган. Мындый ачу-коронды ӧдӧргӧ, эјеге бӱдӱмјизи канайып болушкан? Эје куучындайт: «Мен Иеговага мӱргӱп, бастыра кӱчтеримди ле санааркаштарымды ого берип салгам, анайып јӱрегиме амыр боло берген. Иегованыҥ болужын тӧрӧӧндӧрим ажыра ла јуундагы најыларым ажыра кӧргӧм. Анайда ок јарлаар ишке кӧптӧдӧ туружарга албаданатам. Бу меге ӧбӧӧнимди тыҥ јоктобоско ло эртенги кӱнге санааркабаска болужып јат. Болгон учуралдаҥ мындый немеге ӱренип алдым: келер ӧйдӧ менде кандый да кӱчтер болотон болзо, је мен Иеговага, оныҥ организациязына, Иисуска ижензем, ӱзе кӱчтерди ӧдӱп ийерим».

17. Ажып болбос кырлардый кӱчтерге туштазаас, нени эдер керек?

¹⁷ Кӧп ака-эјелер бойыныҥ јуук кижизин јылыйткан. Слер де јуук кижигерди јылыйткан болзоор, Агару Бичикти кычырып,  Иегова божогон улусты канайып тирилтип ийгенин шӱӱп сананыгар. Мынайып, тирилиш болор деп, слердиҥ бӱдӱмјигер тыҥыыр. Ол эмезе слердиҥ јуук кижигерди јууннаҥ чыгарып салган болор. Мындый айалгада Иегова јастырган кижини ого ло тузалу болзын деп, кату каруузына тургузып јатканына бир де алаҥзыбаска шиҥжӱ ӧткӱригер. Кандый да кӱчтер болотон болзо, олорды бӱдӱмјини тыҥыдатан арга деп кӧрӱгер. Иеговага ачу сезимдеригерди ӱзе куучындап туругар. Ака-эјелердеҥ бир де тууралабагар, олорло јолугып, куучындажып туругар (Укаа 18:1). Јуук кижигер санаагарга кирип, кӧзигердиҥ јажын тудуп болбой до турган болзоор, оноҥ ло ары јуунныҥ туштажуларына јӱригер, јарлаар ишке туружыгар, Агару Бичикти кычырып туругар (Сар. 126:5, 6). Бу слердиҥ кунукчылду санаалараарды ла сезимдереерди јеҥилтип турар. Бого ло коштой Иегованыҥ слерге белетеп салган алкыштарын ундыбай туругар. Иегованыҥ болужын кӧрӱп турзаар, слердиҥ бӱдӱмјигер там ла тыҥыыр.

18. Кандый бир ченелтеде слердиҥ бӱдӱмјигер уйан деп кӧрӱп ийген болзоор, нени эдер керек?

¹⁸ Кандый бир ченелтеде слердиҥ бӱдӱмјигер уйан деп кӧрӱп ийген болзоор, санааркабагар. Карын кажы јанынаҥ тыҥыдынатанын билип алдаар. Иисустыҥ апостолдорынаҥ тем алыгар, олор Иисустаҥ: «Кудайга бӱдер кӱӱнибисти тыҥыдарга болуш» — деп сурагандар (Лука 17:5). Анайда ок бу јӧрмӧлдӧ бичилген ака-эјелердиҥ теминеҥ ӱренигер. Темдектезе, Мигель ле Юрай чылап Иегова слерге алдындагы ӧйдӧ канайып болушканын сананып туругар. Верониканыҥ кызы ла Анель эје чилеп, анчада ла кӱч ӧйлӧрдӧ, Иеговага тыҥ мӱргӱп туругар. Бого ло коштой Иегова слерге Хейди эјеге чилеп, тӧрӧӧндӧрӧӧр лӧ најылараар ажыра болужар аргалу деп бир де ундыбагар. Слер эмди Иеговага иженерге ӱренип алзаар, келер ӧйдӧ болотон кандый ла кӱчтерди ӧдӧргӧ ол слерге болужып ийер деп бир де алаҥзыбазаар.

19. Иисус неде алаҥзыбаган, бис неде алаҥзыбай јадыс?

¹⁹ Иисус ӱренчиктерине олордыҥ бӱдӱмјизи неде уйан болгонын кӧргӱзип берген. Је олор Иегованыҥ болужыла ӱзе кӱчтерди ӧдӱп ийер деп, Иисус бир де алаҥзыбаган (Иоанн 14:1; 16:33). Ол билген, кара-бајырт албаты бойыныҥ бӱдӱмјизин тыҥыдып, улу тӱбекти ӧдӱп чыгар деп (Ачыл. 7:9, 14). Бис бу улустыҥ ортозында болорыс па? Иегованыҥ болужыла болорыс, је бастыра ийде-кӱчистеҥ бӱдӱмјибисти тыҥыдып турзаас! (Евр. 10:39).