1. Imbe mbadga di yé le di badba?

BAA u yé u nkon woñi ngim mangéda i ngeñ u nhoñol i mam ma ga bôña i dilo di nlo, kiki bo tjiba i kwéha base, gwét Gôg nu Magôg a ga leñ bés, ni gwét bi Armagédôn? Baa u yé u mbadba le, ‘Baa me ga la pei i mam ma momasôna ibabé i tjôô Yéhôva? Ibale u ma badba i mbadga i, bibuk bi Yésu bi bi yé mu pes kaat i ñéga i yigil ini bi ga hôla we ngandak. Yésu a bi kal banigil bé le: “Miñem minan mi siida bañ. Ni unda le ni nhémle.” (Yôhanes 14:1) Ibale di gwé hémle i ngui, di ga kon bé woñi inyu mam ma ga bôña dilo di nlo.

2. Lelaa di nla lédés hémle yés, kii di ga tehe munu yigil ini?

² Inyu lédés hémle yés inyu manoodana di ga boma dilo di nlo, di nlama ndugi wan lelaa di yé di mboñ munu mangéda mana ngeñ di mboma manoodana. Ibale di ntibil wan i jam li, hala a nla hôla bés i yi hee homa hémle yés i mbomb. Hiki ndutu di mboma, i nhôla bés i lédés hémle yés. Hala a ga hôla bés i hônba manoodana dilo di nlo. Munu yigil ini, di ga tehe manoodana ma-na banigil ba Yésu ba bi boma, ma ma bi unda le ba bééna ngôñ i kônde lédés hémle yap. Di ga tehe lelaa yak bés di nla boma i nya manoodana i i len ini, ni lelaa ma nla hôla bés i kôôba inyu dilo di nlo.

3. Inoñnaga ni kaat Matéô 6:30, 33, kii Yésu a bi niiga inyu jam li hémle?

³ Isañ mbai a kôli tôñ lihaa jé le li bana bijek, mbot ni ndap. Hala a ta bé jam li ntomb munu minledek mi mangéda mini. Ngim lôk kéé i bi nimis bôlô yap, ba njo sañ inyu léba bôlô ipe, ndi ba nlébga bé. Bape ba bi tjél ngim bibôlô inyule bi ta bé loñge inyu bikristen. Ngéda di mboma i nya mandutu i, i mbéda bés hémle i ngui inyu kwo nkaa le Yéhôva a ga ti bés i mam momasôna ma mbéda inyu lihaa jés. Yésu a bi unda i jam li mu Nkwel wé i ngii hikôa. (Añ Matéô 6:30, 33.) Ngéda di yé nkwoog nkaa le Yéhôva a yé mbén i tjôô bés, di ga boñ ndigi i mam ma yé toi nseñ, hala wee minson mi Ane. Kiki di ntehe Yéhôva a nti bés mam momasôna ma mbéda bés, di nkônde kôôge nye bebee, hémle yés i nkônde ki let.

4-5. Kii i bi hôla lihaa jada li li bé yep?

⁴ Di béñge lelaa Yéhôva a bi hôla lihaa jada i Vénésuéla li li bé yep. Mankéé Castro ni lihaa jé ba bééna wom wap u u bé niñis bo. Kel yada mintonba mi bi lo i mbai yap ni ngaa, mi buñga bo mu hisi hiap. Mankéé Miguel a nkal le: “Nano di gwé ndik man hisi ba bi pôôs bés, mu nyen mapida més momasôna ma yéne. Hiki kel, me nsoohe Yéhôva le a ti bés i mam momasôna ma mbéda bés.” Niñ i nlédél i lôk kéé ini ngandak, ndi mankéé Castro ni bôt bé ba nyi le Yéhôva a ngwés bo ni le a ga ti bo kii yosôna i mbéda bo, inyu hala nyen ba nke likalô ni makoda hiki ngéda. Ba mbii Ane i Yéhôva i bisu, Yéhôva a nti ki bo i mam ma mbéda bo.

⁵ Mu mandutu ma momasôna, Miguel bo nwaa Yurai ba mbéñge ndigi i mam Yéhôva a ma bôñôl bo. Ngim mangéda, lôk kéé i nti bo ndék gwom i mbéda bo, lôk kéé ipe i nhôla ki Miguel i léba bôlô. Mangéda mape, Yéhôva a bé gwélél lôk kéé i Bétel inyu hôla bo. Yéhôva a mah tjôô bé bo. Hala a bi boñ le hémle yap i kônde let. Ngond yap i bisu le Yoselin a nhoñol lisañ jada Yéhôva a bi hôla bo, a nkal le: “Ngéda me ntehe lelaa Yéhôva a yé bés bebee, hala a nlôôha tihba me. Me ntehe nye kiki bañga yem liwanda, me nyi ki le a yé ha inyu hôla me.” A nkônde le: “Manoodana di mboma munu ngéda ini, ma nhôla bés i kôôba inyu dilo di nlo.”

6. Lelaa u nla lédés hémle yoñ ngéda u nyep?

⁶ Baa liyep li ntééñga we? Ibale u nyep, hala a ta bé jam li ntomb. Ndi  to u nyep lelaa, gwélél i ngéda ini inyu lédés hémle yoñ. Soohe, u añ bibañga bi Yésu bi yé hana kaat Matéô 6:25-34, u ôt ki pék mu. Ôt biniigana mu ndémbél i bagwélél ba Yéhôva ba ngéda yés ba ba nti ngéda yap yosôna i nson Yéhôva, ba kôhôk mahôla mé. (1 Korintô 15:58) Ibale u ñôt pék mu, hala a ga kwés we nkaa le kiki Yéhôva a bi hôla i lôk kéé i, yak we a ga hôla we. A nyi i mam ma mbéda we, a nyi ki lelaa a ti we mo. Kiki u ntehe Yéhôva a nhôla we mu niñ yoñ, hémle yoñ y’a kônde let, w’a hônba ki manoodana w’a boma dilo di nlo.—Habakuk 3:17, 18

7. Inoñnaga ni kaat Matéô 8:23-26, lelaa “mbuk mbebi” a bi hôla banigil i yi le hémle yap i bé titigi?

⁷ I ngéda mbuk mbebi a bi pôgôs môñgô u Yésu ni banigil bé i ñem tuye, Yésu a bi gwélél i jam li inyu unda banigil bé hee homa hémle yap i bé bomb. (Añ Matéô 8:23-26.) Kiki mbuk mbebi a bé hôñ makeñi, malép ma bi jôp i môñgô, Yésu a bé ke yé ’ilo. Ngéda banigil ba bi tôdôl nye ba konok woñi, ba kal nye le a tohol bo, Yésu a bi kal bo le: “Inyuki ni nkon woñi hala, a bé bôt ba hémle titigi?” Banigil ba bé lama yi le Yéhôva a nla tat Yésu ni i bôt ba yé ni nye. Bimbe biniigana di nla ôt mu? Ibale di gwé hémle ikeñi di nla yémbél manoodana momasôna, too “mbuk mbebi” nyemede, too manoodana mape.

8-9. Mambe manoodana Anel a bi boma, kii i bi hôla nye?

⁸ Di béñge lelaa hémle i bi hôla mankéé wés nu muda wada i Porto Rico le Anel nu a yé ngibiiba i ngéda a bi boma manoodana. “Mbuk mbebi” nyemede nyen a bi lona nye manoodana. I nwii 2017, i mbuk mbebi nunu le Maria a bi ôbôs ndap yé. Hala a bi boñ le a nimis bôlô yé. Anel a nkal le: “Me bé tôñ mu mangéda ma, ndi me bi nok le me nlama bôdôl Yéhôva ñem me soohe nye, me waa tôñ.”

⁹ Anel a nkal le manôgla mon ma bi hôla nye i hônba manoodana ma. A nkal le: “Kiki me bé nôgôl maéba ma ntôñ u Yéhôva, jon me bé nwee. Yéhôva a bi gwélél lôk kéé inyu lédés me ni i ti me mam momasôna ma bé béda me.” A nkônde le: “Yéhôva a bi ti me iloo i mam ma bé béda me, hala a bi kônde lédés hémle yem.”

10. Kii u nla boñ ngéda u mboma manoodana?

¹⁰ Baa u mboma manoodana? Bebek bikuu gwon bi nkwél we. Tole kon u nlôôha tééñga we i nya i yé le u nyi bé  kii u nla boñ. U yé le u tôñ ngim mangéda, ndi u nwas bañ le njelel i sôña we i bôdôl Yéhôva ñem. Soohe nye ni ñem wonsôna. Ibale u nhoñol lelaa Yéhôva a bi hôla we kôba, hala a ga lédés hémle yoñ. (Tjémbi 77:12, 13) Yi le Yéhôva a’ tjôô bé we kekikel.

11. Inyuki di nlama nôgôl lôk kéé i i ñéga bés?

¹¹ Kii ipe i nla hôla bés i hônba manoodana? Kiki Anel a nkal, manôgla ma nla hôla bés. I bôt Yéhôva bo Yésu ba ntéé inyu éga bés, di bôdôl bo ñem. Ngim mangéda, ba yé le ba yoñ makidik ma ma téé bé. Ndi di hôya bañ le Yéhôva a nsayap manôgla. Ngandak miñañ i Bibel ni ndémbél i bañga bagwélél ba Djob i ñéba le ngéda di yé manôgla, hala a yé inyu loñge yés. (Manyodi 14:1-4; 2 Miñañ 20:17) Di ôt pék mu miñañ mi. Ibale di mboñ hala, hala a ga hôla bés i noñ biniigana bi ntôñ nano ni dilo di nlo. (Lôk Héber 13:17) To njiiha ikeñi i i nlo, d’a kon bé yo woñi.—Bingéngén 3:25

12. Inoñnaga ni kaat Lukas 18:1-8, lelaa hémle i nla hôla bés i hônba ngitelepsép?

¹² Yésu a bé yi le banigil bé ba ga boma ngitelepsép inyu hémle yap. Inyu hôla bo i hônba ngitelepsép, a bi ti hihéga hi yé i kaat Lukas. A bi pôdôl yik muda i i bi ke tehe nkéés wada inyu soohe nye le a pémhene nye mbagi sép. A bé yi le ibale a ntéñbe i yemhe nye, a ga pémhene nye mbagi sép. Sôk i nsôk, nkéés nu a bi pémhene nye mbagi sép. Kii hala a niiga bés? Yéhôva a ta bé mut a téé bé sép. Jon Yésu a bi kal le: “Ibabé pééna, baa Nyambe a’ pémés bé mbagi sép inyu mimpohlak nwé mi bôt mi mi nlôndôl nye juu ni njamuha?” (Añ Lukas 18:1-8.) Yésu a bi kal ki le: “Ngéda Man mut a nlo, baa a’ koba yaga ntén hémle unu hana ’isi?” I ngéda di mboma ngitelepsép ndi di hônbaga, hala a ñunda le di gwé hémle ikeñi kiki i yik muda ini. I ngéda di gwé i nya hémle i, di nyi le to kii i leñek, Yéhôva a ga pémhene bés mbagi sép. Di nlama ki yi le masoohe ma gwé ngui ngandak. Ngim mangéda, Yéhôva a nla timbhe masoohe més i nya di bemek bé.

13. Lelaa masoohe ma bi hôla lihaa jada li li bi boma ngitelepsép?

¹³ Di yoñ hihéga hi mankéé Vero nu a yé i Kôñgô (Kinshasa). Vero bo nlôm nu a ta bé Mbôgi Yéhôva, ni ngond yap i i bééna 15 nwii ba bi nyodi i mbai yap i ngéda bisônda bi bi leñ bo gwét. Kiki ba bé mu njel, ba bi boma bisônda bi, bi gwel bo, bi kahal kal le bi nol bo. Ngéda Vero a bi kahal ee, ngond yé i bé noode mômôs  nye, a soohege makeñi a sim-ga jôl li Yéhôva. Ngéda a bi mal soohe, ñane bisônda a bi bat nye le: “A ngonda, njee a bi niiga we masoohe?” A timbhe le: “Mama yem nu, a bi gwélél masoohe ma yé hana kaat Matéô 6:9-13 inyu niiga me.” Ñane bisônda a kal le: “A ngonda, we ni bagwal boñ kena ni nsañ, Yéhôva Nyambe nan a tat bé!”

14. Mambe manoodana di yé le di boma, kii y’a hôla bés i hônba?

¹⁴ I nya miñañ ini i ñéba bés le masoohe ma gwé ngui ngandak. Ndi kii u nlama boñ ibale Yéhôva a nhoo bé timbhe masoohe moñ tole a boñ bé hélha jam? Kee ni bisu i soohe Yéhôva kiki yik muda Yésu a bi pôdôl mu hihéga hié, ni botñem le Yéhôva a ga tjôô bé we, ni le a ga timbhe masoohe moñ i loñge ngéda. Kee ni bisu i bat Yéhôva mbuu mpubi. (Filipi 4:13) Yi le Yéhôva a’ kôp we bisai, u hôya ki mandutu moñ momasôna. Kiki Yéhôva a nhôla we i hônba mandutu, hémle yoñ i nkônde let, w’a la ki hônba mandutu w’a boma dilo di nlo.—1 Pétrô 1:6, 7.

15. Inoñnaga ni kaat Matéô 17:19, 20, imbe ndutu banigil ba Yésu ba bi boma?

¹⁵ Yésu a bi kal banigil bé le hémle i nla hôla bo i yémbél mandutu. (Añ Matéô 17:19, 20.) Lisañ jada, ba bi la bé luhul mbuu mbe, ki le mangéda mape ba bé luhul mimbuu mimbe. Inyuki ba bi la bé luhul wo? Yésu a bi kal le hémle yap i bé titigi. A bi kal bo le ibale ba gwé hémle, ba nla yémbél mandutu ma ma yé kiki dikôa! I len ini, yak bés di nla boma mandutu ma di nhoñol le di ta bé le di yémbél.

16. Lelaa hémle i bi hôla Geydi i ngéda ba bi nol nlôm?

¹⁶ Di yoñ hihéga hi sita yada i Gwatémala le Geydi. Ba bi nol nlô wé Edi i ngéda ba bé lôl likoda. Lelaa hémle i Geydi i bi hôla nye i hônba? A nkal le: “Me bi soohe Yéhôva, me bééga nye mbegee yem, hala a bi boñ le me ba nwee. Yéhôva a bi gwélél lihaa jem ni lôk kéé i likoda inyu lédés me. Kiki me bé me pégi i nson u Yéhôva, hala a bi hôyôs njôghe yem, me bé lôôha bé tôñ inyu yani. I ndutu ini i bi hôla me i nok le to imbe ndutu me ga boma dilo di nlo, me ga yémbél yo ni mahôla ma Yéhôva, Yésu, ni ntôñ u Yéhôva.”

17. Kii di nla boñ ngéda di mboma mandutu makeñi?

¹⁷ Baa mut u gwéhék ngandak a nwo? Añ Bibel, u ôt pék mu miñañ mi bôt ba bi tuge. Baa u gwé nduña inyule ba mpémés mut woñ lihaa i ntôñ? Nigil inyu kwo nkaa le Yéhôva a  nkodol ndik bés inyu loñge yés. To imbe ndutu u mboma, gwélél yo inyu lédés hémle yoñ. Yible Yéhôva ñem woñ. U yén bañ wetema, tégbaha ngéda ni lôk kéé i bôda ni i bôlôm. (Bingéngén 18:1) To ibale i mpam we i héya bitamb, boñ mam ma nla hôla we i hônba ndutu yoñ. (Tjémbi 126:5, 6) U waa bañ añ Bibel, u kenek likalô ni makoda. Hoñol mam malam momasôna Yéhôva a mbôn we. Kiki u ntehe Yéhôva a nhôla we, hala nyen hémle yoñ i nkônde let.

18. Ibale u nyimbe le hémle yoñ i mbomb, kii u yé le u boñ?

¹⁸ Ibale u mboma mandutu, ndi u yimbe le hémle yoñ i mbomb, u tomb bañ. Gwélél i ngéda i inyu lédés hémle yoñ. Soohe kiki baôma ba Yésu ba ba bi kal le: “Kônde bés hémle.” (Lukas 17:5) Hoñol ki ndémbél i lôk kéé di mpôdôl munu yigil ini. Kiki Miguel bo Yurai, hoñol mangéda momasôna Yéhôva a bi hôla we. Kiki ngond i Vero bo sita Anel, soohe ni ñem wonsôna ngéda u gwé ndutu. Kiki Geydi, yi le Yéhôva a nla gwélél bôt boñ ba lihaa tole lôk kéé inyu hôla we. Ibale u mbôdôl Yéhôva ñem i ngéda u mboma mandutu nano, w’a kônde bôdôl nye ñem ngéda w’a boma mandutu dilo di nlo.

19. Yésu a bé yi le kii, kii di nlama yi?

¹⁹ Yésu a bi yimbe le hémle i banigil bé i bé titigi, ndi a bé yi le ni mahôla ma Yéhôva, ba ga yémbél manoodana ba ga boma dilo di nlo. (Yôhanes 14:1; 16:33) A bé yi le hémle i ngui i ga hôla limut likeñi i pei njiiha ikeñi. (Masoola 7:9, 14) Baa yak we w’a ba mu? Ni konangoo i Yéhôva, w’a ba nyoo ibale u njo sañ inyu lédés hémle yoñ nano!—Lôk Héber 10:39.