1. ?Kosan benin yɛ e kwla fa usa e wun-ɔn?

SA WIE’M bé wá jú e ɲrun lɔ. I wie yɛle kɛ bé núnnún Ɲanmiɛn sulɛ wafawafa nga be timan su’n. Asa’n, Gɔgu m’ɔ fin Magɔgu wá fá alɛ wlá e sin. Kpɛkun Aamagedɔn alɛ’n wá tɛ́. Atrɛkpa’n, kɛ a bu sa sɔ’m be akunndan’n, srɛ kun wɔ. Yɛ a usa ɔ wun kɛ: ‘?Kɛ sa sroesroe sɔ’m bé wá jú’n, ń kwlá nánti seiin titi?’ Sɛ ɔ wun yo ɔ sɔ’n, like suanlɛ nga wá úka wɔ kpa. Afin ɔ́ wá yíyí ndɛ kun mɔ Zezi kannin’n i nun. Zezi seli i sɔnnzɔnfuɛ’m be kɛ: “Nán amun wla bo amun wun. Amun kle kɛ amun lafi Ɲanmiɛn su.” (Zan 14:1) Ndɛ sɔ’n kle kɛ sɛ e lafi Ɲanmiɛn su kpa’n, é kwlá jrán sa nga bé wá jú e ɲrun lɔ’n be ɲrun kekle.

2. (1) ?Sɛ e waan é láfi Ɲanmiɛn su kpa’n, ngue yɛ ɔ fata kɛ e yo-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

² Sɛ e waan é láfi Ɲanmiɛn su kpa’n, ɔ fata kɛ e fa e ɲin e sie i wafa nga e jran sa nga be tɔ e su dɔ nga su’n be ɲrun kekle’n i su. Sɛ e yo sɔ’n, é wún i wlɛ sɛ ɔ fata kɛ e lafi Ɲanmiɛn su kpa ekun-o. Kɛ sa’m be tɔ e su mɔ e jran kekle’n, e lafi Ɲanmiɛn su kpa tra laa’n. I sɔ’n kusu yó maan é jrán e ɲrun lɔ sa’m be ɲrun kekle wie. Like suanlɛ nga nun’n, é wá kán sa nnan mɔ be nun’n ɔ fata kɛ Zezi i sɔnnzɔnfuɛ’m be lafi Ɲanmiɛn su kpa ekun’n be ndɛ. Sɛ sa sɔ’m be tɔ e su’n, like nga e kwla yo naan y’a jran kekle’n, é wá kɛ́n i ndɛ. Asa’n, é wá wún i kɛ sɛ e jran sa sɔ’m be ɲrun kekle’n, é kwlá jrán e ɲrun lɔ sa’m be ɲrun kekle wie.

3. ?Ngue yɛ ndɛ nga Zezi kɛnnin i Matie 6:30, 33 nun’n kle e-ɔ?

³ Awlobo kpɛn kwlakwla kunndɛ kɛ ɔ́ fá like ng’ɔ miɛn i awlobofuɛ’m be sa’n mán be. I wie yɛle aliɛ, nin tralɛ nin lawlɛ. Sanngɛ blɛ kekle nga nun’n, i sɔ yolɛ’n timan pɔpɔ  be sa nun. Afin be nun wie’m be junman’n fili be sa. Yɛ kannzɛ bɔbɔ be mian be ɲin be kunndɛ junman uflɛ’n, sanngɛ be ɲanman wie. Wie’m be liɛ’n, be ɲan wie, sanngɛ sɛ be di junman sɔ’n, bé fɔ́n Ɲanmiɛn i mmla’n. I sɔ’n ti’n, be sɔman nun. Aniaan sɔ’m be lafi su kpa kɛ Zoova kwla nian be nin be awlobofuɛ’m be lika. Kɛ Zezi kán Ɲanmiɛn ndɛ Oka’n su lɔ’n, ɔ kɛnnin i sɔ liɛ’n i ndɛ. (An kanngan Matie 6:30, 33 nun.) Sɛ e lafi su kpa kɛ Zoova su yiman e ase le’n, é kwlá fá e ɲin é síe i i klun sa’n i yolɛ’n su kpa. Kpɛkun kɛ é wá síe i nzɔliɛ kɛ ɔ nian e lika sakpa’n, i sɔ’n yó maan é fá e wun é mɛ́ntɛ́n i kpa ekun, yɛ é láfi i su kpa trá laa’n.

4-5. ?Ngue yɛ ɔ ukali awlobo kun nunfuɛ mun naan b’a jran be su sa’n i ɲrun kekle-ɔ?

⁴ Maan e fa e ɲin e sie i wafa nga Zoova niannin awlobo kun nunfuɛ’m be lika’n i su. Be tran Venezuela lɔ, yɛ be di fie be fa nian be wun lika. Sanngɛ cɛn kun’n, sran wie mun nin be sa nun tui’n be wa seli be kɛ be jaso be asiɛ’n su kekle nun. Awlobo kpɛn m’ɔ suan Migɛli’n seli kɛ: “Kɛ ɔ yoli sɔ’n, e ko srɛli asiɛ kan wie sran kun sa nun. Ɔ maan i su yɛ e di fie kan e fa nian e wun lika-ɔ. Cɛn kwlakwla kɛ n jaso nglɛmun’n, n srɛ Zoova kɛ ɔ man e like ng’ɔ ju e cɛn sɔ’n nun’n.” Lika’n ti kekle kpa aniaan sɔ’n nin i awlobofuɛ’m be su. Sanngɛ kɛ mɔ be lafi su kpa kɛ Zoova nían be lika’n ti’n, be tran aɲia’m be kwlaa be bo yɛ be bo jasin fɛ’n titi. Kɛ mɔ be fa Zoova i sulɛ’n be sie i like kwlaa ɲrun’n ti’n, i kusu nian be lika kpa.

⁵ Blɛ kekle sɔ’n nun’n, Migɛli nin i yi Yura be fali be ɲin be sieli i wafa nga Zoova niannin be lika’n i su. I wie yɛle kɛ Zoova fanngan nun’n, aniaan’m be fali ninnge nga be sa mian be wun’n mannin be. Kpɛkun be ukali Migɛli naan w’a ɲan junman kpa kun. Asa ekun’n, Zoova maan aniaan nga be o Betɛli lɔ’n be suannin be bo wie. Nanwlɛ, Zoova w’a yiman Migɛli nin i awlobofuɛ’m be ase le. I sɔ’n ti’n, be lafili i su kpa trali laa’n. Be wa bla kpɛnngbɛn’n suan Yoselinin. Ɔ boli sa kun mɔ i nun’n Zoova ukali be kpa’n i su. I sin’n, ɔ seli kɛ: “Kɛ a wun i jrɛiin kɛ Zoova suan ɔ bo’n, i sɔ’n wla fanngan dan. I sɔ’n ti’n, Zoova kacili kɛ min janvuɛ kpa kun mɔ n kwla lafi i su titi’n sa.” Ɔ kan guali su kɛ: “Sa ng’ɔ tɔli e su’n ti’n, sɛ e ɲrun lɔ’n sa kekle wie tɔ e su’n, e lafi su kɛ é kwlá jrɛ́n i ɲrun kekle.”

6. ?Sɛ sika ndɛ’n ti kekle ɔ su’n, ngue yɛ a kwla yo naan w’a lafi Ɲanmiɛn su kpa ekun-ɔn?

⁶ ?Dɔ nga su’n sika ndɛ’n ti kekle ɔ su? Sɛ ɔ ti sɔ’n, e si kɛ ɔ timan pɔpɔ manman wɔ. Sanngɛ blɛ sɔ’n nun bɔbɔ’n, a kwla lafi Ɲanmiɛn su kpa. I lɛ nun’n, srɛ Zoova tankaan kpa yɛ bu ndɛ nga Zezi kannin m’ɔ o Matie 6:25-34 nun’n i akunndan. Asa ekun’n, bu aniaan nga be su ndɛ’n kle kɛ Zoova nian be nga blɛ kekle nun’n be tu be klun be su i’n be lika’n be akunndan. (1 Kor. 15:58) Sɛ a yo sɔ’n, á láfi su kɛ Zoova úka wɔ wie. Zoova si like ng’ɔ mian ɔ sa’n yɛ ɔ si like ng’ɔ́ yó naan w’a fa like sɔ’n w’a man wɔ’n. Sɛ a fa ɔ ɲin sie i wafa nga Zoova uka wɔ’n i su’n,  á láfi i su kpa ekun. Ɔ maan á kwlá jrán ɔ ɲrun lɔ sa’m be ɲrun kekle.—Aba. 3:17, 18.

7. ?Kɛ nga Matie 8:23-26 fa kan’n sa’n, sa benin yɛ ɔ tɔli Zezi i sɔnnzɔnfuɛ’m be su-ɔ?

⁷ Cɛn kun’n, Zezi fali sa kun fa kleli i sɔnnzɔnfuɛ’m be kɛ ɔ fata kɛ be lafi Ɲanmiɛn su kpa ekun. Le kun’n ɔ nin be fuli alie kun nun naan bé kɔ́ lika. Kpɛkun aunmuan dan kpa kun wa fitali jenvie’n su. (An kanngan Matie 8:23-26 nun.) Kɛ aunmuan’n fíta mɔ nzue’n mɛ́n i wun su gúa alie’n nun’n, nn Zezi su lafi kpa sa pɔɔ. Sanngɛ i sɔnnzɔnfuɛ’m be liɛ’n, srɛ’n w’a kun be kpo. I sɔ’n ti’n, be ko tinngeli i yɛ be seli i kɛ ɔ de be. Be Min’n seli be kɛ: “?Ngue ti yɛ srɛ kun amun sɔ-ɔ? ?Ɔ yo sɛ ti yɛ amun lafiman Ɲanmiɛn su kpa sɔ-ɔ?” Ɔ fata kɛ Zezi i sɔnnzɔnfuɛ sɔ’m be lafi su kɛ Zoova kwla sɛsɛ i Wa Zezi ɔ nin be bɔbɔ. ?Ngue yɛ ndɛ sɔ’n kle e-ɔ? Sɛ aunmuan kpakpa fita naan ɔ saci e ninnge mun annzɛ sɛ sa nga be tɔ e su’n be ti kɛ aunmuan wie yɛ ɔ su fita’n sa bɔbɔ’n, sanngɛ sɛ e lafi Ɲanmiɛn su tankaan kpa’n, é kwlá jrán be kwlaa be ɲrun kekle.

8-9. (1) ?Sa benin yɛ ɔ tɔli Anɛli su-ɔ? (2) ?Ngue yɛ ɔ ukɛli i naan w’a jran kekle-ɔ?

⁸ Maan e kan aniaan bla kun m’ɔ suan Anɛli’n i ndɛ kan. Aniaan bla’n nin-a jaman bian yɛ ɔ tran Pɔɔto Riko lɔ. Afuɛ 2017 nun’n, aunmuan dan kpa kun fitali be asa’n su lɔ. Ɔ maan i sua’n sacili, yɛ i junman’n fili i sa. Anɛli seli kɛ: “Blɛ kekle sɔ’n nun’n, min wla boli min wun. Sanngɛ kɛ mɔ n srɛli Zoova tankaan kpa’n ti’n, n lafili i su. I sɔ’n ti’n, min wla w’a boman min wun w’a tratraman su.”

⁹ Anɛli kannin like kun ekun m’ɔ ukɛli i blɛ kekle sɔ’n nun’n i ndɛ. Like sɔ’n yɛle aɲinyiɛ’n. Ɔ seli kɛ: “N nantili ajalɛ kwlaa nga anuannzɛ’n kleli e’n su. I sɔ’n ti’n, min wla guali ase. Asa’n, aniaan’m be wlali min fanngan kpa yɛ be fali ninnge nga be mian min sa’n mannin min. I ti’n, n wunnin i wlɛ kɛ Zoova suan min bo.” Ɔ kan guali su kɛ: “Like nga n srɛli Zoova’n, ɔ mannin min lele tratrali su. I sɔ’n ti’n, n ma lafili i su kpa trali laa’n.”

10. ?Sɛ sa kekle wie o ɔ su’n, ngue yɛ a kwla yo-ɔ?

¹⁰ Atrɛkpa’n, sa kekle wie m’ɔ ti kɛ “aunmuan dan” wie sa’n, ɔ o ɔ su. Sa kekle sɔ’n kwla yo sanvuɛsa wie annzɛ tukpacɛ kekle wie. Ɔ maan ɔ wla bo ɔ wun yɛ a wunman wafa nga á yó ɔ wun-ɔn. Sanngɛ nán maan awlabɔɛ’n ti’n, ɔ Zoova sulafilɛ’n kpɔnzɔ. Srɛ Zoova tankaan kpa naan kan ɔ su sa’n i ndɛ kle i. Asa’n, bu wafa nga Zoova ukali wɔ laa’n i akunndan. Sɛ a yo sɔ’n, á láfi i su kpa ekun. (Jue. 77:12, 13) Ɔ maan á wún i wlɛ kɛ ɔ su yiman wɔ ase le.

11. ?Ngue ti yɛ ɔ fata kɛ e nanti ajalɛ kwlaa nga be nga be dun e ɲrun mmua’n be fa’n i su-ɔ?

¹¹ ?Like uflɛ benin yɛ ɔ kwla uka wɔ naan w’a jran ɔ su sa’m be ɲrun kekle-ɔ? Kɛ nga Anɛli fa kannin’n sa’n, like sɔ’n yɛle  aɲinyiɛ’n. Lafi be nga Zoova nin Zezi be lafi be su’n be su. Ɔ ju wie’n, be nga be dun e ɲrun mmua’n be fa ajalɛ wie mɔ be timan e liɛ su-ɔ. Sanngɛ maan e mian e ɲin e nanti be su. Afin Zoova klo aɲinyiɛfuɛ mun. Be nga Biblu’n kan be ndɛ’n nin aniaan wie’m be su ndɛ’n kle kɛ be nga be ti aɲinyiɛfuɛ’n be ɲan be ti sa kekle’m be nun. (Tul. 14:1-4; 2 Nyo. 20:17) Ɔ maan bu sran sɔ’m be su ndɛ’n i akunndan. Sɛ a yo sɔ’n, á nánti ajalɛ kwlaa nga anuannzɛ’n fɛ i dɔ nga su’n ɔ nin ajalɛ ng’ɔ́ wá fá be e ɲrun lɔ’n be su. (Ebr. 13:17) Ɔ maan ɲrɛnnɛn dan’n nun’n, srɛ su kunman wɔ.—Nya. 3:25.

12. ?Wafa sɛ yɛ Liki 18:1-8 kle kɛ sɛ e lafi Ɲanmiɛn su’n é kwlá jrán lufle bulɛ’n i ɲrun kekle-ɔ?

¹² Zezi si kɛ sɛ be bu i sɔnnzɔnfuɛ’m be lufle’n, Ɲanmiɛn su lafilɛ’n yó kekle mán be. Kɛ ɔ ko yo naan b’a jran lufle bulɛ’n i ɲrun kekle’n, ɔ fali sunnzun ase kun. Sunnzun ase sɔ’n wo Liki fluwa’n nun. Sunnzun ase sɔ’n nun’n, angbeti bla kun fɛli i ndɛ’n ɔli jɔlɛ difuɛ kun m’ɔ timan sran kpa’n i ja su. Kɛ ɔ toli i lɔ’n, i waan ɔ dimɛn i ndɛ’n. Ɔ nin i sɔ’n ngba’n, angbeti bla’n jin i wun kɛ ɔ di i ndɛ’n mɛn i. Ɔ si kɛ sɛ ɔ yo sɔ’n, i agualiɛ su’n ɔ́ dí i ndɛ’n klanman mɛ́n i. Sakpasakpa, kɛ ɔ yoli sɔ’n jɔlɛ difuɛ’n dili i ndɛ’n i kpa. ?Ngue yɛ ndɛ sɔ’n kle e-ɔ? Zoova liɛ’n ɔ yo sa’n i nuan su titi. Kɛ mɔ Zezi si sɔ’n ti’n, ɔ usali kɛ: ‘?Ɲanmiɛn su diman be ng’ɔ fali be’n mɔ be kpan flɛ i nglɛmun nin nnɔsua’n, be jɔlɛ klanman?’ (An kanngan Liki 18:1-8 nun.) Sanngɛ ɔ seli ekun kɛ: “?Sɛ Sran wa’n ba’n, ɔ́ wún kɛ sran’m be lafi Ɲanmiɛn su kpa kɛ ngalɛ’n sa asiɛ’n su?” Kɛ be bu e lufle’n, maan e tra e awlɛn e minndɛ Zoova. I liɛ’n, é klé kɛ e lafi Ɲanmiɛn su tankaan kpa kɛ nga angbeti bla’n fa lafili jɔlɛ difuɛ su’n sa. Sɛ e lafi Ɲanmiɛn su tankaan kpa’n, e lafi su kɛ ɔ́ cɛ́-ɔ ɔ́ cɛ́ ngbɛn Zoova síesíe sa sɔ’n mán e. Asa ekun’n, nán e ɲin kpa Ɲanmiɛn srɛlɛ’n su. Sɛ e yo sɔ’n, wafa ng’ɔ́ tɛ́ e su’n ɔ́ bó e nuan.

13. ?Wafa sɛ yɛ Ɲanmiɛn srɛlɛ’n ukali awlobo kun nunfuɛ mun-ɔn?

¹³ Maan e fa e ɲin e sie i sa kun m’ɔ tɔli aniaan bla kun su’n i su. Be flɛ i kɛ Vero yɛ ɔ tran Kɔngo lɔ. I wun’n suman Zoova. Be le ba bla kan kun, ɔ le afuɛ 15. Cɛn kun’n, sonja wie’m be wa fali be klɔ’n. Ɔ maan Vero nin i wun’n nin i wa’n be wanndili. Sanngɛ kɛ bé kɔ́’n, be ko fiteli sonja wie mɔ b’a tannin atin’n be su. Sonja sɔ’m be trali be yɛ be seli be kɛ bé kún be. I ti’n Vero boli sunlɛ bo. I wa bla’n kunndɛli kɛ ɔ́ yó naan ɔ yaci sunlɛ. I ti’n, ɔ mɛnnin i nɛn’n su srɛli Zoova, yɛ kɛ ɔ́ srɛ́’n ɔ boli Zoova i dunman kpɛ sunman. Kɛ ɔ wieli srɛ’n, sonja’m be su kpɛn’n usɛli i kɛ: “?Bakan, wan yɛ ɔ kleli wɔ Ɲanmiɛn srɛlɛ’n niɔn?” Ɔ tɛli i su kɛ: “Min manmin-ɔn. Ɔ niannin ndɛ ng’ɔ o Matie 6:9-13 nun’n su yɛ ɔ kleli min-ɔn.” Yɛ sonja’m be  su kpɛn’n seli i kɛ: “Yoo n tili. A nin ɔ si nin ɔ nin, amun wɔ. Maan amun Ɲanmiɛn Zoova bɔbɔ ko sunman amun.”

14. (1) ?Sa benin wie mun yɛ be kwla tɔ e su-ɔ? (2) ?Ngue yɛ ɔ kwla uka e naan y’a jran kekle-ɔ?

¹⁴ Sa kɛ ngalɛ sa’m be kle kɛ Ɲanmiɛn srɛlɛ’n ti cinnjin kpa. I ti’n, ɔ fataman kɛ e ɲin kpa su mlɔnmlɔn. Sanngɛ nán blɛ kwlaa nun yɛ Zoova yó abonuan sa fá tɛ́ e su annzɛ ɔ́ tɛ́ e su ndɛndɛ-ɔ. ?I lɛ nun’n, ngue yɛ ɔ fata kɛ e yo-ɔ? Kɛ angbeti bla nga Zezi kɛnnin i ndɛ’n sa’n, maan e srɛ Ɲanmiɛn titi. Yɛ maan e lafi su kpa kɛ e Ɲanmiɛn’n su yiman e ase le naan ɔ́ tɛ́ e su blɛ ng’ɔ ti su’n i nun. Kpɛkun maan e srɛ i titi kɛ ɔ fɛ i wawɛ’n man e. (Fp. 4:13) Asa ekun’n, nán e wla fi su kɛ ɔ ka kan’n Zoova wá yó ninnge kpakpa kpanngban mán e. Ɔ maan e wla fí sa nga be tɔli e su’n be su bɔbɔ. Sɛ e lafi Zoova su kpa’n, é kwlá jrán sa nga be tɔ e su dɔ nga su’n ɔ nin e ɲrun lɔ liɛ’m be kwlaa be ɲrun kekle.—1 Piɛ. 1:6, 7

15. ?Kɛ nga Matie 17:19, 20 fa kan’n sa’n, ngue yɛ Zezi i sɔnnzɔnfuɛ’m b’a kwlá yoman-ɔn?

¹⁵ Zezi seli i sɔnnzɔnfuɛ’m be kɛ sɛ be lafi Ɲanmiɛn su’n, bé kwlá jran sa kwlaa nga be tɔ be su’n be ɲrun kekle. (An kanngan Matie 17:19, 20 nun.) Cɛn kun’n, b’a kwlá fuanman mmusu kun sran kun nun. Kusu nn be yo i sɔ titi. ?Yɛ nn ngue ti yɛ b’a kwlá fuanman mmusu sɔ’n niɔn? Zezi seli be kɛ be lafiman Ɲanmiɛn su kpa ti-ɔ. Ɔ seli be ekun kɛ sɛ be lafi Ɲanmiɛn su kpa’n, bé kwlá jrán sa nga be tɔ be su mɔ be ti kɛ oka sa’n be ɲrun kekle. Andɛ kusu’n, sa sɔ’m be wunsu tɔ e su.

16. ?Kɛ Gedi i wun’n wuli’n, ngue yɛ ɔ ukɛli i naan w’a jran kekle-ɔ?

¹⁶ Siɛn’n, maan e kan aniaan bla kun m’ɔ suan Gedi’n i ndɛ kan. Aniaan bla’n tran Guatemala lɔ. Cɛn kun m’ɔ nin i wun’n be fin aɲia’n bé bá’n, sran wie’m be kunnin bian’n. ?Ngue yɛ ɔ ukɛli i naan w’a jran sa sɔ’n i ɲrun kekle-ɔ? Ɔ seli kɛ: “N srɛli Zoova yɛ n fali min su sa’n kwlaa n wlɛli i sa nun. Ɔ maan min wla guali ase. Zoova maan min osufuɛ nin min janvuɛ nga be o asɔnun’n nun’n be suannin min bo wie. Asa’n, n tuli min klun n suli Zoova kpa. I sɔ’n ti’n, min wla fili min wun kan yɛ ɔ ukali min maan m’an kokoman ainman ndɛ ti. Sa sɔ’n ti’n, n wunnin i wlɛ kɛ sɛ sa kekle wie tɔ min su ainman’n, Zoova nin Zezi nin aniaan’m be fanngan nun’n, ń kwlá jrán kekle.”

17. ?Sɛ sa kekle wie o e su’n, ngue yɛ e kwla yo-ɔ?

¹⁷ ?Kɛ é sé yɛ’n, ɔ awlɛn su sran wie w’a wu? Sɛ ɔ ti sɔ’n, fa blɛ kanngan be nga Ɲanmiɛn cɛnnin be mɔ Biblu’n kan be ndɛ’n be su ndɛ’n nun. I liɛ’n, á láfi su kpa kɛ Ɲanmiɛn cɛ́n ɔ sran ng’ɔ wuli’n wie. ?Annzɛ be tuli ɔ osufuɛ wie asɔnun’n nun? Sɛ ɔ ti sɔ’n, suan Biblu’n nun like kpa naan w’a lafi su kɛ ajalɛ nga Ɲanmiɛn fɛli i kɛ be tu sa tɛ yofuɛ’n asɔnun’n nun’n, ɔ ti ajalɛ kpa dan. Sa kwlaa nga be  tɔ ɔ su’n be nun’n, mian ɔ ɲin naan w’a lafi Ɲanmiɛn su kpa w’a tra laa’n. I lɛ nun’n, srɛ Zoova tankaan kpa naan kan wafa nga ɔ wun yo wɔ’n i ndɛ kle i. Nán tran ɔ liɛ ngunmin, fa ɔ wun mantan aniaan mun. (Nya. 18:1) Yo ninnge nga be kwla uka wɔ naan w’a jran kekle’n. Kannzɛ bɔbɔ kɛ á yó ninnge sɔ mun’n, ɔ wla kpɛn ɔ sa yalɛ’n su’n sanngɛ mian ɔ ɲin yo. (Jue. 126:5, 6) Kɔ aɲia’m be kwlaa be bo, bo jasin fɛ’n titi yɛ kanngan Biblu’n nun cɛn kwlakwla. Kpɛkun fa ɔ ɲin sie i ninnge kpakpa nga Zoova wá fá mán e’n be su. Asa’n, fa ɔ ɲin sie i wafa nga Zoova uka wɔ dɔ nga su’n i su wie. Sɛ a yo sɔ’n, á láfi i su kpa trá laa’n.

18. ?Sɛ e sie i nzɔliɛ kɛ e lafiman Ɲanmiɛn su kpa’n, ngue yɛ ɔ fata kɛ e yo-ɔ?

¹⁸ Sɛ sa nga be o ɔ su dɔ nga su’n nin laa liɛ’m be ti’n, a sie i nzɔliɛ kɛ a lafiman Ɲanmiɛn su kpa kun’n, nán ɔ sa sin bubu wɔ. Yo like kwlaa nga a kwla yo naan w’a lafi Ɲanmiɛn su kpa’n. A kwla yo kɛ Zezi i akoto’m be sa. Cɛn kun’n, be seli Zezi kɛ: “Uka e maan e lafi Ɲanmiɛn su kpa.” (Lik. 17:5) Asa’n, bu aniaan nga e kannin be ndɛ like suanlɛ nga nun’n be akunndan. Kɛ Migɛli nin i yi Yura be sa’n, bu wafa nga Zoova ukali wɔ’n i akunndan titi. Kɛ Vero i wa bla’n nin Anɛli be sa’n, kɛ sa kekle tɔ ɔ su’n, srɛ Zoova tankaan kpa. Yɛ kɛ Gedi sa’n, nán ɔ wla fi su kɛ Zoova kwla sin ɔ osufuɛ mun nin aniaan’m be lika suan ɔ bo. Sɛ a fa ɔ ɲin sie i wafa nga Zoova uka wɔ dɔ nga su’n i su’n, á láfi su kɛ ɔ́ úka wɔ sa kwlaa nga bé tɔ́ ɔ su e ɲrun lɔ’n be nun.

19. (1) ?Ngue yɛ Zezi lafili su-ɔ? (2) ?Ngue yɛ e lafi su-ɔ?

¹⁹ Zezi ukɛli i sɔnnzɔnfuɛ mun naan b’a wun i wlɛ kɛ ɔ fata kɛ be lafi Ɲanmiɛn su kpa ekun. Sanngɛ ɔ si kɛ Zoova fanngan nun’n, bé kwlá jrán sa kwlaa nga bé tɔ́ be su’n be ɲrun kekle. (Zan 14:1; 16:33) Asa ekun’n, ɔ kleli kɛ Ɲanmiɛn su lafilɛ’n yɛ ɔ́ kwlá úkɛ i sɔnnzɔnfuɛ mun naan b’a fin ɲrɛnnɛn dan’n nun b’a fite-ɔ. (Ngl. 7:9, 14) ?Á kúnndɛ kɛ á trán sran sɔ’m be nun wie? Sɛ ɔ ti sɔ’n, yo like kwlaa nga a kwla yo naan w’a lafi Ɲanmiɛn su kpa’n. I liɛ’n, Zoova fanngan nun’n, á ɲán ɔ ti.—Ebr. 10:39.