1. Weh kweschan wi mait aks wiself?

YOO eva wanda bowt weh wahn hapm eena di fyoocha laik di dischrokshan a faals rilijan, di atak a Gag a Maygag, ahn di waar a Armagedon, ahn den yu kech yuself di staat tu wori? Yu eva aks yuself, ‘Ah wanda if mai fayt wahn schrang inof fi help mi bayr op wen dehnya tingz staat tu hapm?ʼ If dehnya ting don kraas yu main, weh Jeezas mi tel ih disaiplz eena di teem skripcha fi dis aatikl wahn help yu. Hihn mi tel dehn: “Noh wori unuself. Ga fayt.” (Jan 14:1) Schrang fayt wahn help wi fi stay kaam ahn bayr op noh mata weh hapm eena di fyoocha.

2. How wi ku schrentn wi fayt, ahn weh wi wahn diskos eena dis aatikl?

² If wi tink bowt weh wi du wen wi goh chroo sohnting weh tes wi fayt, den dat wahn help wi fi noa eena weh ayryaz wi mait need fi schrentn wi fayt. Eech taim wi bayr op anda wahn chraiyal, wi fayt geh schranga. Dis wahn help wi fi bayr op anda eni chraiyal wi mait fays eena di fyoocha. Eena dis aatikl, wi wahn kansida foa difrent taimz wen Jeezas disaiplz mi need fi ga moa fayt. Den wi wahn diskos how wee ku bayr op anda difrent prablemz jos laik dehn, ahn how dehnya chalenjiz ku pripyaa wi fi di fyoocha.

3. Weh di werdz a Jeezas da Machyu 6:30, 33 help wi fi andastan?

³ Ih naamal fi mek di hed a wahn famili waahn provaid fi ih famili ahn mek shoar dehn ga weh dehn need fi liv. Bot dis noh eezi fi du, espeshali joorin dehnya haad taimz. Wahn lata wi bradaz ahn sistaz don looz dehn jab, ahn fi som, dehn kyaahn fain wahn nada jab noh mata how haad dehn chrai. Fi adaz, dehn rifyooz wahn jab bikaaz dehn mait di aks dehn fi du sohnting weh goh gens Jehoava standadz. Wen tingz laik dis hapm, wi need fi ga schrang fayt  dat Jehoava wahn mek shoar dat wee ahn wi famili ga weh wi need. Jeezas mi mek shoar dat ih disaiplz mi noa dis bikaaz dat da weh ih teech dehn eena di Sermon Pahn di Mongtin. (Reed Machyu 6:30, 33.) Wen wee kanvins dat Jehoava wahn neva abandan wi, wi wahn ku foakos eena wi servis tu hihn. Ahn wen wi si dat Jehoava di provaid fi wi, ih wahn jraa wi kloas tu hihn ahn dis wahn mek wi fayt geh schranga.

4-5. Weh mi help wahn famili weh mi-di wori bikaaz ih mi haad fi mek dehn geh di tingz weh dehn need fi liv?

⁴ Noatis weh mi help wahn famili weh liv da Venezuela wen dehn mi-di wori bikaaz ih mi haad fi mek dehn geh di tingz weh dehn need fi liv. Di Castro famili mi ga dehn oan pees a lan weh dehn mi yooz fi werk ahn mek wahn livin. Bot den, sohn man kohn wid sohn gon ahn tek oava dehn lan ahn chays dehn weh. Miguel, hoo da di pa, seh: “Now wi chrai werk ahn mek wahn livin pahn wahn smaal pees a lan weh wi baro. Ah staat eech day di bayg Jehoava fi provaid wi wid weh wi need fi da day.” Laif noh eezi fi di Castro famili, bot dehn ga fayt eena Jehoava ahn dehn noa dat hihn wahn provaid fi dehn evri day. Dehn aalwayz deh da di meetin dehn ahn dehn aalso tek paat eena di preechin werk. Di moas impoatant ting fi dehn da dehn servis tu Jehoava, ahn Jehoava mek shoar dat dehn ga weh dehn need fi liv.

⁵ Chroo aala dis, Miguel an ih waif, Yurai, foakos pahn how Jehoava mi tek kayr a dehn. Sohntaim, Jehoava mi yooz di bradaz ahn sistaz fi provaid som a di tingz weh dehn need er fi help Miguel fain wahn jab. Sohn ada taimz, Jehoava mi provaid fi dehn chroo di branch aafis. Jehoava neva abandan dehn. Bikaaz a aala dis, dehn si how evribadi eena di famili geh schranga fayt. Afta dehn oalda daata, Yoselin, mi menshan bowt wahn taim wen Jehoava mi help dehn, shee seh: “Ih toch mi haat fi si how Jehoava tek kayr a wee, hihn da mai fren an Ah kanfident dat ih wahn aalwayz help mi. Di prablemz weh wi gaahn chroo az wahn famili pripyaa wi fi ada prablemz weh mi kohn wi way aftawodz.”

6. How yu ku schrentn fi yoo fayt eevn doa yu mait noh ga inof moni fi geh weh yu need fi liv?

⁶ Yoo di fain it haad rait now fi geh weh yu need fi liv? Den dis da noh wahn eezi ting fi yu. Bot noh mata how haad tingz ku get, yoo ku luk pahn yu sichuwayshan ahn seeʼt az wahn apachooniti fi schrentn yu fayt. Pray tu Jehoava ahn den reed weh Jeezas seh da Machyu 6:25-34 ahn tink bowt weh yu reed. Aalso tink bowt sohn ekspeeryens a adaz weh liv eena fi wee taim weh proov dat Jehoava provaid fi dehn wan hoo stay bizi eena dehn servis tu hihn. (1 Kor. 15:58) Wen yu du dis, ih wahn schrentn yu fayt an ih wahn aalso help yu fi bee shoar dat Jehoava wahn tek kayr a yoo jos laik how hihn mi tek kayr a  adaz hoo mi fays prablemz laik weh yoo di goh chroo. Hihn noa egzakli weh yu need an ih wahn mek shoar yu get it. Yu fayt wahn geh schranga az yu si how Jehoava help yu eena yu laif, den dis wahn help yu fi bayr op anda eni ada chraiyal weh yu mait fays eena di fyoocha.—Hab. 3:17, 18.

7. Akaadn tu Machyu 8:23-26, how “wahn big staam” mi tes di disaipl dehn fayt?

⁷ Wen Jeezas an ih disaiplz mi-di chravl eena wahn boat, dehn geh kech eena wahn staam. Jeezas mi yooz dis ivent fi help ih disaiplz andastan dat dehn need fi schrentn dehn fayt. (Reed Machyu 8:23-26.) Dis staam mi soh schrang dat di wayvz mi mek waata kom eena di boat. Chroo aala dis, Jeezas mi-di injai wahn gud sleep. Di disaiplz dehn mi soh fraitn dat dehn wayk op Jeezas an aks ahn fi sayv dehn. Di Laad aks dehn: “Wai unu soh frayd, da weh unu fayt deh?” Di disaiplz shuda mi noa dat Jehoava ku wel ahn protek ih Son ahn dehn wan hoo deh wid ahn fahn eni kaina haam. Weh da di lesn fi wee? If wi ga schrang fayt, den wi wahn ku bayr op anda eni kaina “big staam” er eni kaina prablem weh feel laik “wahn big staam.”

8-9. How Anel fayt mi geh tes, ahn weh mi help ahn?

⁸ Tink bowt Anel ekspeeryens, wahn singl sista fahn Puerto Rico. Ih fayt mi geh schranga afta shee mi fays wahn haad tes. Fi shee “big staam” da-mi wahn reel staam. Eena 2017, Harikayn Maria mi dischrai Anel hows. Bikaaz a da harikayn, shee mi aalso looz ih jab. Dis da-mi wahn reel tes fi Anel. Shee mi seh: “Joorin dehndeh dayz, Ah mi feel schres owt, bot Ah mi laan fi chros eena Jehoava ahn noh mek eniting weh di kaaz mi fi wori stap mi fahn du weh Ah need fi du.”

⁹ Anel mi aalso seh dat obeedyans mi help ahn fi bayr op chroo ih chraiyalz. Shee seh: “Wen Ah mi fala di dairekshan fahn Jehoava aaganaizayshan, ih help mi fi stay kaam. Jehoava provaid help fi mi chroo di bradaz ahn sistaz. Dehn inkorij mi ahn gi mi di tingz weh Ah mi need. Jehoava gi mi way moa dahn weh Ah ku aks fa, ahn mi fayt mi geh schranga.”

10. Weh yoo ku du if yoo di fays “wahn big staam”?

¹⁰ Yoo di fays “wahn big staam” eena yu laif? Yu mait di sofa bikaaz a wahn nachral dizaasta. Er da sohnting weh feel laik “wahn big staam,” laik wahn seeryos siknis weh mek yu feel diskorij ahn yu noh noa weh fi du bowt it. Yu mait di wori wahn lat, bot noh mek dat stap yu fahn chros eena Jehoava. Pray tu ahn. Dis wahn help yu jraa kloasa tu hihn. Tink bowt wen Jehoava help yu eena di paas, dis wahn schrentn yu fayt. (Ps. 77:11, 12) Yoo ku bee shoar dat Jehoava wahn neva abandan yu—noh now, noh eva!

11. Wai wi need fi mek op wi main fi obay di bradaz weh di tek di leed?

 ¹¹ Wat els ku help wi fi bayr op anda eni chraiyal? Laik weh Anel mi seh erliya, wi need fi bee obeedyant. Laan fi chros dehn wan hoo Jehoava ahn Jeezas chros. Sohntaim di bradaz weh di tek di leed mait gi inschrokshanz weh noh mek no sens tu wee. Bot memba Jehoava bles wi wen wi obeedyant. Egzamplz fahn di Baibl ahn wi faytful bradaz ahn sistaz ekspeeryens help wi fi si dat wen sohnbadi obeedyant, ih ku sayv dehn laif. (Ex. 14:1-4; 2 Chron. 20:17) Meditayt pahn dehndeh egzampl. Dis wahn inkorij yu fi fala eni dairekshan weh kohn fahn Jehoava aaganaizayshan eena di fyoocha. (Heeb. 13:17) Eena da way deh yu noh wahn ga reezn fi frayd fi di biga staam—di grayt chribyulayshan—weh wahn soon kohn.—Prov. 3:25.

12. How Look 18:1-8 help wi fi si dat wi need fi ga fayt soh dat wi ku bayr op anda injostis?

¹² Jeezas mi noa dat injostis wuda tes di fayt a ih disaipl dehn. Fi help dehn bayr op, hihn gi dehn wahn iloschrayshan weh geh rait dong eena di buk a Look. Jeezas mi tel dehn bowt wahn wido weh mi stay di goh da wahn joj fi chrai geh jostis gens ih enimi. Da joj neva ga no rispek fi Gaad. Shee mi noa dat if ih kip aan di aks di joj fi help, hihn mi wahn ivenchwali giv ahn weh ih aks fa. Wel, dat da egzakli weh mi hapm. Wat da di lesn fi wee? Jehoava da wahn Gaad a jostis, soh Jeezas seh: “Fi shoar hihn [Gaad] wahn gi jostis tu di wan dehn weh hihn chooz, di wan dehn weh krai owt tu hihn day ahn nait.” (Reed Look 18:1-8.) Den Jeezas kantinyu fi seh: “Wen di Son a man kom, yu tink hihn reeli wahn fain dis kaina fayt pahn di ert?” Wen wi di sofa bikaaz a injostis, wi need fi bee laik di wido eena Jeezas iloschrayshan ahn shoa dat wi ga fayt wen wi payshent ahn noh giv op. Wid da kaina fayt, wi ku bee shoar dat soona er layta Jehoava wahn help wi. Wi aalso need fi bileev eena di powa a pryaa. Sohntaim wi pryaaz mait geh ansa eena wayz weh wi neva ekspek.

13. How pryaa mi help wahn famili weh mi-di fays injostis?

¹³ Tink bowt di egzampl a Sista Vero fahn di Democratic Republic of the Congo. Shee, ih hozban hoo noh di serv Jehoava, ahn dehn 15-yaa-oal daata mi haftu ron weh fahn dehn vilij bikaaz ih mi deh anda atak bai wahn groop a soalja. Lang di way, di famili bok op tu di soalja dehn ahn dehn mi-di plan fi kil dehn. Vero staat tu krai an ih daata staat tu pray owt lowd fi chrai kaam dong ih ma. Ih daata mi kip aan di yooz Jehoava naym eena ih pryaa. Wen di lee gyal mi finish pray, di komanda a di soalja dehn aks di lee gyal: “Lee gyal, da hoo teech yu fi pray?” Shee ansa ahn seh: “Mai ma, ahn shee yooz di egzampl  weh deh da Machyu 6:9-13.” Di komanda seh: “Lee gyal, noh wori, goh lang wid yu payrents, an Ah hoap Jehoava unu Gaad protek unu!”

14. Weh ku tes wi fayt ahn weh ku help wi fi bayr op?

¹⁴ Dehndeh kaina ekspeeryens help wi fi si how pryaa soh impoatant. Bot wat if wi noh geh wahn kwik ansa tu wi pryaaz er ih noh geh ansa eena wahn big way? Wi waahn bee jos laik di wido eena Jeezas iloschrayshan an kip aan di pray. Wi ku bee shoar dat Jehoava noh wahn abandan wi ahn soona er layta hihn wahn ansa wi pryaaz. Kantinyu fi bayg Jehoava fi ih hoali spirit. (Fil. 4:13) Memba dat soon Jehoava wahn bles yu soh moch dat yu noh eevn wahn memba aal di sofarin weh yu mi gaahn chroo. Az Jehoava help yu fi bayr op anda chraiyalz, yu wahn geh schranga ahn yu wahn ku bayr op anda eni chraiyal eena di fyoocha.—1 Peet. 1:6, 7.

15. Da Machyu 17:19, 20, weh chalenj Jeezas disaipl dehn mi fays?

¹⁵ Jeezas mi teech ih disaiplz dat dehn need fi ga fayt fi mek dehn ku bayr op anda eni chalenj weh dehn wuda fays. (Reed Machyu 17:19, 20.) Wahn taim, di disaiplz kudn jraiv owt wahn deemon fahn wahn bwai eevn doa dehn kuda mi du it eena di paas. Wat da-mi di prablem? Jeezas mi tel dehn dat dehn mi need moa fayt. Hihn mi tel dehn dat if dehn mi ga inof fayt, dehn kuda bayr op eevn if weh dehn goh chroo mait luk az big az wahn mongtin! Tudeh, wee mait fays lata chalenjiz ahn wi mait feel laik ih impasabl fi bayr op.

16. How fayt mi help Geydi afta dehn mi merda ih hozban?

¹⁶ Tink bowt weh mi hapm tu Sista Geydi fahn Guatemala. Dehn mi merda ih hozban, Edi, az dehn mi-di goh bak hoam afta wahn meetin. Da weh mi help Geydi fi bayr op anda aala ih sadnis? Shee seh: “Pryaa help mi fi chroa aala mi woriz pahn Gaad ahn dis mek Ah feel pees. Ah si how Jehoava reeli kay bowt mi chroo mi famili ahn mi frenz eena di kangrigayshan. Wen Ah kip bizi eena mi servis tu Jehoava ih help mi fi noh bee tu sad, ih help mi fi tek wan day at a taim, an Ah aalso fain miself noh di wori tu moch bowt weh tumaaro wahn bring. Afta dis ekspeeryens, Ah laan dat noh mata weh chraiyal Ah fays, wid di help a Jehoava, Jeezas, ahn di aaganaizayshan Ah wahn ku bayr op.”

17. Weh wi ku du wen wi di fays wahn prablem weh mait luk laik wahn mongtin tu wee?

¹⁷ Yoo sad bikaaz wahn famili memba er fren ded? Tek di taim fi schrentn yu fayt eena di hoap a di rezorekshan. Yu ku du dis wen yu tek di taim fi reed bowt di difrent rezorekshan dehn weh mi hapm eena Baibl taimz. Yoo feel sad bikaaz sohnbadi weh yu lov geh disfeloship? Stodi moa fi proov tu yuself dat disiplin weh kohn fahn Jehoava da di bes. Noh mata weh prablem yu di  fays, yooz it az wahn apachooniti fi bil op fi yoo fayt. Tel Jehoava egzakli how yu di feel. Noh put yuself eena wahn kaana, insteda dat, stay kloas tu yu bradaz ahn sistaz. (Prov. 18:1) Du tingz weh wahn help yu fi bayr op, eevn if yu fain yuself di krai wen yu memba weh yu di goh chroo. (Ps. 126:5, 6) Kantinyu fi goh da di meetin dehn, kip bizi eena di preechin werk, ahn du yu Baibl reedin. Noh ferget bowt aala di wandaful tingz weh Gaad don pramis yu fi di fyoocha. Wen yu si how Jehoava di help yu rait now, yu fayt eena hihn wahn geh schranga ahn schranga!

18. If yoo noatis dat yu fayt noh schrang inof, weh yu ku du?

¹⁸ If wahn chraiyal weh yu don gaahn chroo er weh yu di goh chroo rait now di shoa yu dat yu fayt noh schrang inof, noh mek dat diskorij yu. Seeʼt az wahn apachooniti fi schrentn yu fayt. Aks fi di sayhn ting weh Jeezas disaipl dehn mi aks fa; dehn mi seh: “Help wi fi ga moa fayt.” (Look 17:5) Aalso, tink bowt di egzampl dehn weh wi taak bowt eena dis aatikl. Laik Miguel ahn Yurai, memba how Jehoava mi aalwayz provaid di help weh dehn mi need. Laik Vero daata an Anel, pray haad tu Jehoava, espeshali wen yu di goh chroo wahn chraiyal. Ahn laik Geydi, si dat Jehoava ku yooz di bradaz ahn sistaz ahn yu famili membaz fi provaid weh yu need. If yu alow Jehoava fi help yu fi bayr op chroo yu chraiyalz rait now, yu wahn bee shoar dat hihn wahn aalso help yu fi bayr op anda eni chraiyal weh yu wahn fays eena di fyoocha.

19. Weh Jeezas mi shoar bowt, ahn weh wee ku bee shoar bowt tu?

¹⁹ Jeezas mi help ih disaipl dehn fi si eena weh ayryaz dehn mi need fi ga moa fayt. Bot hihn neva dowt dat wid Jehoava help ih disaipl dehn mi wahn bayr op anda eni chraiyal eena di fyoocha. (Jan 14:1; 16:33) Hihn mi shoar dat wahn grayt krowd wahn servaiv di grayt chribyulayshan bikaaz a dehn schrang fayt. (Rev. 7:9, 14) Yoo wahn bee paat a da grayt krowd? Wid Jehoava help yoo kud bee wan a dehn wan weh servaiv, if yu du evriting weh yu kud rait now fi schrentn fi yoo fayt!—Heeb. 10:39.