1. Cosa kita posible pregunta na diaton mismo cuerpo?

TAN lingasa ba tu tiene vez si ta pensa tu con el maga cosas que cerca ya sucede—el destrozo del falso religion, el ataque del Gog de Magog y el guerra de Armagedon? Ya puede ya ba tu pregunta na de tuyu mismo cuerpo, ‘Hay puede ba yo esta fiel si llega este maga maka-miedo suceso?’ Si ya puede tu pensa con este maga cosas, el cosa ya discuti si Jesus na texto donde base el diaton tema hay puede gayot ayuda contigo. Si Jesus ya habla con el de suyu maga dicipulo: “No ustedes man lingasa de nada, sino tene fe.” (Juan 14:1, El Nuevo Testamento) El fuerte fe hay ayuda kanaton para enfrenta con el futuro con confianza.

2. Paquemodo kita puede hace fuerte con el diaton fe y cosa kita considera na este articulo?

² Puede kita hace fuerte con el diaton fe para aguanta na maga probanza na futuro si considera kita si paquemodo kita ta enfrenta con el diaton maga probanza na fe ahora. Si ta pensa kita si cosa el diaton reaccion na diaton maga probanza ahora, puede kita mira maga aspeto donde necesita kita hace fuerte con el diaton fe. Cada vez ta puede kita aguanta na probanza, mas ta queda fuerte el diaton fe. Hay ayuda este kanaton para puede aguanta na maga probanza na futuro. Na este articulo, hay man repaso kita con el cuatro situacion que ya enfrenta el maga dicipulo de Jesus donde ya revela que necesita sila tene mas fe. Despues, hay considera kita si paquemodo kita posible enfrenta maga semejante dificultad ahora y paquemodo este puede prepara kanaton para na futuro.

3. Asegun na Mateo 6:30, 33, cosa punto acerca na fe el ya hace claro si Jesus?

³ Natural lang para na un cabeza de familia que quierre dale bastante comida, camisa y lugar onde queda el de suyu mujer y maga anak. Pero, gendeh este pirmi facil hace na este dificil tiempo. Na cuanto situacion, el diaton maga hermano y hermana ya perde trabajo y maskin pa na diila grande esfuerzo, nuay siempre sila puede incuntra nuevo trabajo. El otro nuay acepta trabajo que gendeh justo para na maga Cristiano. Na este maga situacion, necesita kita tene fuerte fe con Jehova que hay hace le manera para dale si cosa kita necesita para na diaton familia. Ya hace este claro si Jesus na de suyu maga dicipulo na Sermon na Monte. (Le con el Mateo 6:30, 33.) Si bien convincido kita que gendeh kanaton abandona si Jehova, hay puede kita hace focus con el diaton atencion na servicio con ele. Y si ta mira kita si paquemodo si Jehova ta ayuda kanaton na diaton material necesidad, hay queda le mas real kanaton y queda fuerte el diaton fe.

4-5. Cosa ya ayuda con el un familia cuando yan lingasa sila acerca na diila material necesidad?

⁴ Considera si paquemodo el un familia na Venezuela ya experiencia con el ayuda de Jehova cuando yan lingasa sila acerca na diila maga material necesidad. De antes, el familia Castro tiene bastante incuntrada por causa na diila simentera. Despues, el maga armao hombre ya anda saca con el diila tierra y ya arria kanila. El tata, si Miguel, ya habla: “Ahora, ta depende ya lang kame na diutay tierra que ya presta kame con otro. Cada dia, ta pidi yo con Jehova que ayuda kanamon na cosa kame necesita para na este dia.” Dificil el vida para na este familia pero cay tiene sila fe que el diila amable Tata hay dale con el diila necesidad cada dia, el familia Castro regular ta atende na maga miting na congregacion y ta participa na ministerio. Ya hace sila una con el interes del Reino na diila vida y ya dale si Jehova si cosa sila necesita.

⁵ Na ese dificil tiempo, si Miguel y el de suyu mujer, si Yurai, yan focus si paquemodo si Jehova ya cuida kanila. Tiene vez, ya usa si Jehova con el maga hermano y hermana para dale kanila el diila cuanto material necesidad o para ayuda con Miguel que incuntra trabajo. Na otro tiempo, ya usa si Jehova con el branch office para dale kanila ayuda. Nuay gayot kanila abandona si Jehova. Como resulta, ya puede sila mira que mas ya queda fuerte el fe del diila familia. Despues relata un especifico ejemplo si paquemodo kanila ya ayuda si Jehova, el diila de con todo mayor anak, si Yoselin, ya habla: “Ya puede gayot anima conmigo si paquemodo si Jehova ya ayuda kanamon. Ta mira yo con ele como de mio amigo quien pirmi ta ayuda conmigo.” Ya omenta le: “El maga probanza que ya enfrenta kame como un familia ya prepara kanamon para na mas dificil probanza na futuro.”

6. Paquemodo tu hace fuerte con el de tuyu fe si ta enfrenta tu problema na financial?

⁶ Ta enfrenta ba tu problema na financial? Si ansina, dificil se para contigo. Maskin pa  gendeh facil el de tuyu circumstancia ahora, puede siempre tu usa con ese tiempo para hace fuerte con el de tuyu fe. Reza con Jehova y le con el maga palabra de Jesus na Mateo 6:25-34 y medita con ese. Considera con el maga experiencia na diaton tiempo ahora que ta dale mira que ta dale si Jehova el maga necesidad de aquellos quien ta esta ocupao na maga teocratico actividad. (1 Cor. 15:58) Si hace tu se, hay hace este fuerte con el de tuyu confianza que si Jehova hay ayuda contigo igual si paquemodo le ya ayuda con otro quien tiene semejante circumstancia contigo. Sabe le si cosa tu necesita y si paquemodo le se dale contigo. Mientras ta experiencia tu con el ayuda de Jehova na de tuyu vida, hay queda mas fuerte el de tuyu fe para puede tu aguanta maga mas dificil probanza na futuro.—Hab. 3:17, 18.

7. Asegun na Mateo 8:23-26, paquemodo el un fuerte tifun ya pone na probanza con el fe del maga dicipulo?

⁷ Cuando ya tene fuerte tifun mientras na mar kanda Jesus y de suyu maga dicipulo, ya usa si Jesus con ese suceso para ayuda kanila entende si onde sila necesita hace fuerte el diila fe. (Le con el Mateo 8:23-26.) Bien fuerte el tifun y gane, ta entra ya el agua na bangca pero si Jesus bien durmido. Ya tiene gayot miedo el maga dicipulo, ya hace con ele dispierta y ya habla con ele que salva kanila. El Señor ya pregunta kanila: “Por que man ustedes tiene miedo? Que bien diutay el de ustedes fe!” Era ya puede realiza el maga dicipulo que si Jehova puede gayot protege con Jesus y con aquellos junto con ele. Ta mira ba tu si paquemodo kita puede aplica con este leccion? El fuerte fe puede ayuda kanaton para aguanta na maga fuerte tifun, literal man o figurativo.

8-9. Paquemodo ya pruba con el fe de Anel y cosa ya ayuda con ele?

⁸ Considera si paquemodo si Anel, un single hermana de Puerto Rico, ya tene fuerte fe despues enfrenta un dificil probanza. El de suyu probanza amo un literal tifun. Ya sucede este del 2017 cuando el Hurricane Maria ya destroza con el casa de Anel. Por causa na ese tifun, ya queda le nuay trabajo. “Durante na aquel maga dificil tiempo, ya queda yo malingasa,” ya admiti si Anel, “pero ya aprende yo que confia con Jehova por medio na rezo y gendeh permiti con el lingasa que sangga conmigo para hace si cosa yo necesita hace.”

⁹ Tiene pa cosa ya menciona si Anel que ya ayuda con ele para enfrenta con el de suyu probanza—obediencia. Ele ya habla: “Cay ya sigui yo con el direccion del organizacion, ya ayuda este conmigo para esta calma. Ya ayuda conmigo si Jehova por medio na maga hermano y hermana. Ya anima sila conmigo y ya dale conmigo el de mio maga material necesidad.” Ele ya omenta: “Ya dale conmigo si Jehova mas pa na cosa yo ya pidi y mas ya queda fuerte el de mio fe.”

10. Cosa tu puede hace si ta enfrenta tu dificil problema?

¹⁰ Ta enfrenta ba tu un dificil problema na de tuyu vida? Posible por causa este na un natural  calamidad. O baka tiene tu un grabe enfermedad que ya causa contigo para sinti luya y no sabe si cosa hace. Posible, tan lingasa tu tiene vez pero no permiti con el de tuyu lingasa que sangga contigo para confia con Jehova. Atraca con ele por medio na sincero rezo. Hay queda fuerte el de tuyu fe si medita tu con el maga tiempo que ya ayuda contigo si Jehova de antes. (Sal. 77:11, 12) Puede tu asigura que gendeh le abandona contigo.

11. Porque tu debe queda determinao que queda obediente con aquellos quien ta guia?

¹¹ Cosa pa puede ayuda contigo para aguanta na maga probanza? Como cosa ya habla si Anel, obediencia. Aprende confia con aquellos con quien ta confia si Jehova y si Jesus. Tiene vez, aquellos quien ta guia posible hay dale kanaton maga direccion que gendeh kita ta entende. Pero, hay bendici kanaton si Jehova si obediente kita. Ya aprende kita na de suyu Palabra y na maga experiencia del maga fiel siervo que el obediencia ta salva vida. (Ex. 14:1-4; 2 Cron. 20:17) Medita con ese maga ejemplo. Si hace tu se, hay queda tu mas determinao que coopera na maga arreglamiento del organizacion ahora y na futuro. (Heb. 13:17) Como resulta, nuay tu razon para tiene miedo con el grande tribulacion que cerca ya sucede.—Prov. 3:25.

12. Uyun na Lucas 18:1-8, na cosa manera el fe puede ayuda kanaton para aguanta injusticia?

¹² Sabe si Jesus que el injusticia puede pone na probanza con el fe del de suyu maga dicipulo. Para ayuda kanila enfrenta con ese, ya dale le un ilustracion que puede le na libro de Lucas. Ya relata si Jesus un istoria acerca del un viuda quien ya continua pidi con el mal juez que dale con ele justicia. Tiene le confianza que hay ricibi le ayuda si continua le pidi. Ya llega el tiempo, ya ayuda el juez con el viuda. Cosa el leccion? Gendeh malo si Jehova. Poreso, ya habla si Jesus: “Gendeh ba el Dios ay dale justicia con el disuyo maga escujido quien ta suplica con Ele de dia y de noche?” (Le con el Lucas 18:1-8.) Despues, ya omenta si Jesus: “Cuando ay vene el Anak del Gente, ay encontra ba Le fe na mundo?” Si ta experiencia kita injusticia, puede kita dale prueba que tiene kita fuerte fe igual con ese viuda si tiene kita paciencia y continua espera. Si tiene kita igual ansina clase de fe, puede kita tene confianza que hay ayuda kanaton si Jehova. Necesita tambien kita creé na poder del rezo. Tiene vez, posible contesta con el diaton maga rezo na manera que gendeh kita ta expecta.

13. Paquemodo el rezo ya ayuda con el un familia quien ya experiencia injusticia?

¹³ Considera con el experiencia del un hermana que si Vero, quien ta queda na Democratic Republic of the Congo. Si Vero, el de suyu marido que gendeh Testigo y el diila anak mujer que 15 año necesita sale na diila barrio cuando ya ataca con este el un grupo de maga soldao. Mientras ta viaja sila, ya hace kanila para el maga soldao y ya amenaza que mata kanila. Cuando ya principia llura si Vero, el de suyu anak ya pricura hace calma con ele, ya reza  suena y ya repiti con el nombre de Jehova na rezo. Cuando ya acaba le reza, el comandante del maga soldao ya pregunta, “Neng, quien contigo ya enseña reza?” Ya contesta le, “El de mio nana, usando el ejemplo na Mateo 6:9-13.” El comandante ya habla, “Neng, anda ya tu pati el de tuyu mayores y ojala protege con ustedes si Jehova, el de ustedes Dios!”

14. Cosa posible pruba con el diaton fe y cosa puede ayuda kanaton para aguanta?

¹⁴ El maga experiencia igual ansina ta enseña kanaton que no ulvida si paquemodo de importante el rezo. Pero, paquemodo si nuay dayun contesta con el diaton maga rezo o na especial manera? Igual con el viuda na ilustracion de Jesus, continua reza y confia que gendeh contigo abandona el Dios y hay contesta le con el de tuyu rezo na justo tiempo. Continua pidi sagrao espiritu con Jehova. (Fil. 4:13, NWT) Acorda que gendeh mas tarda, hay bendici gayot contigo si Jehova que hay ulvida ya tu el de tuyu sufrimiento de antes. Mientras ta aguanta tu maga probanza na ayuda de Jehova, hay queda tu mas fuerte y puede aguanta con el maga probanza na futuro.—1 Ped. 1:6, 7.

15. Como cosa ya habla na Mateo 17:19, 20, cosa dificultad el ya enfrenta el maga dicipulo de Jesus?

¹⁵ Ya enseña si Jesus con el de suyu maga dicipulo que el fe puede ayuda kanila continua maskin pa na dificultad. (Le con el Mateo 17:19, 20.) Na un ocasion, nuay sila puede hace sale con el un demonio, maskin pa ya puede se sila hace de antes. Cosa el problema? Ya explica si Jesus que necesita sila mas fe. Ya habla le kanila que si tiene sila bastante fe, puede sila continua maskin pa tiene sila maga dificultad que dol igual de grande na monte. Ahora, posible ta enfrenta tambien kita maga dificultad que dol imposible ya para kanaton que continua.

16. Paquemodo el fe ya ayuda con Geydi para enfrenta con el tragedia y grabe tristeza?

¹⁶ Nota con el ejemplo de Geydi, un hermana de Guatemala. Ya mata con el de suyu marido, si Edi, cuando pabolbida sila estaba na un miting na congregacion. Paquemodo el fe de Geydi ya puede ayuda con ele para enfrenta con este grabe tristeza? Ele ya habla: “El rezo ya ayuda conmigo para buta yo con el de mio pesades con Jehova y ya dale este conmigo paz na pensamiento. Ta mira yo que ta cuida conmigo si Jehova por medio na de mio familia y maga amigo y amiga na congregacion. Cay ocupao yo na servicio con Jehova, ya menora este con el de mio dolor y ya ayuda conmigo para continua cada dia que gendeh tan lingasa acerca na mañana. Despues experiencia con este, ya puede yo aprende que maskin cosa clase probanza que posible conmigo llega na futuro, puede yo con este enfrenta na ayuda de Jehova, de Jesus y del organizacion.”

17. Cosa kita hace si ta enfrenta kita maga dificultad que dol igual de grande na monte?

¹⁷ Dolorido ba tu cay ya muri el un persona que importante contigo? Dale tiempo para hace fuerte con el de tuyu fe na esperanza de resureccion. Puede tu con este hace si le tu maga istoria  na Biblia de aquellos con quien ya resucita. Triste ba tu cay yan disfellow el un miembro de familia? Estudia para queda tu convincido que el manera de disciplina del Dios amo el de con todo bueno. Maskin cosa problema tu ta enfrenta, usa con este como un oportunidad para hace fuerte con el de tuyu fe. Habla con Jehova si cosa gayot tu ta sinti. No separta con el de tuyu mismo cuerpo sino esta cerca con el de tuyu maga hermano y hermana. (Prov. 18:1) Participa na maga actividad que hay ayuda contigo para aguanta, maskin pa puede tu llura si ta acorda tu con el maga cosas que ya sucede contigo. (Sal. 126:5, 6) Continua con el de tuyu rutina de atendida na maga miting, ministerio y lehida de Biblia. Y continua pensa con el maga bonito bendicion que dale contigo si Jehova na futuro. Mientras ta mira tu si paquemodo contigo ta ayuda si Jehova, hay queda mas fuerte el de tuyu fe con ele.

18. Si ya nota tu que gendeh pa bien fuerte el de tuyu fe, cosa tu puede hace?

¹⁸ Si el de tuyu maga probanza de antes o na presente ya revela que gendeh pa gayot fuerte el de tuyu fe, no man luya. Mira con este como un oportunidad para hace fuerte con el de tuyu fe. Pidi igual con el cosa ya pidi el maga apostoles de Jesus, quien ya habla: “Omenta el diamon fe.” (Luc. 17:5) Pensa con el maga ejemplo que ya discuti kita na este articulo. Igual con Miguel y Yurai, acorda con el todo maga tiempo que ya ayuda contigo si Jehova. Igual con el anak de Vero y con Anel, sincero reza con Jehova especialmente si tiene tu grande problema. Y igual con Geydi, realiza que posible contigo ayuda si Jehova por medio con el de tuyu familia o maga amigo. Si permiti tu con Jehova que ayuda contigo para enfrenta con el de tuyu maga presente probanza, hay tene tu mas confianza que hay ayuda le contigo para aguanta maskin cosa probanza que posible tu enfrenta na futuro.

19. Na cosa asigurao si Jesus y cosa tambien tu puede asigura?

¹⁹ Ya ayuda si Jesus con el de suyu maga dicipulo para mira si onde sila necesita mas tene fe. Pero, asigurao le que puede sila enfrenta con el diila maga probanza na futuro na ayuda de Jehova. (Juan 14:1; 16:33) Tiene le confianza que por medio na fuerte fe, el grande grupo hay sobrevivi na venedero grande tribulacion. (Rev. 7:9, 14) Hay queda ba tu uno kanila? Por medio na incomparable pagka-bueno de Jehova, hay queda tu si hace tu el todo ahora para cultiva y hace fuerte con el de tuyu fe!—Heb. 10:39.