1. Ni kiha kibuzo eki turi kubasa kwebuza?

MBEHI hine obu ori kutina watecereza ahari ebi bintu ebiri hihi kubaho, harimu okucwekerezibwa kw’edini ey’ekishuba, okutahirirwa kwa Gogi wa Magogi, n’orutaro rwa Haramagedoni? Mbehi wareburize yaba orije kuraba omuri ebyo bintu buhoro? Yaba warabyeburize, ebigambo bya Yesu ebiri omu cahandikirwe kikuru nibyija kukukwasa. Yesu akagambira abegi beye ngu: ‘Emitima yanyu etarishoberwa; mwikirize Ruhanga, nanye munyikirize.’ (Yoh 14:1) Okwikiriza kugumire nikwija kutukwasa kuraba omu bintu ebiri kwenda kubaho juba aha.

2. Ni bata oku turi kubasa kugumya okwikiriza kwitu, kandi shi ni enki twaza kushwijuma omuri eki kicweka?

² Nitubasa kureba yaba okwikiriza kwitu kugumire birabire omu ku turi kwehanganira ebigezo omuri obu bwire. Twatekateka aha ku turi kuraba omu bigezo omuri obu bwire, nikitukwasa kumanya ahu tushemerire kutamu amani. Ekigezo cona eki turi kusingura, nikigumya okwikiriza kwitu. Kandi oko kwikiriza ni ko okurije kutukwasa kusingura ebigezo ebi turije kubugana. Omuri eki kicweka, twaza kushwijuma ahantu hana ahu abegi ba Yesu babire bashemerire kugumya okwikiriza kwabo. Bwanyima, nitwija kushwijuma oku turi kubasa kwehanganira ebizibu nk’ebyo omuri obu bwire, n’oku birije kutukwasa kwehanganira ebirije kukurataho omu biro by’omu misho.

3. Ebigambo bya Yesu ebiri omuri Matayo 6:30, 33, nibitukwasa kwesiga ki?

³ Ni ebishangirwe kushanga omwebembezi w’eka ari kurondera abana n’omukazi ebyokurya, ebijwaro n’ah’okutura. Konka omuri obu bwire obugumire, eco ticorobi. Hariho  benetata na banyanyazi abari kuferwa emirimo yabo, bataho amani ngu baronde endijo, konka bayibura. Abandi bo bakanga kukora emirimo etashemerire Abakristo. Omuri ezo mbera zona, nituba tushemerire kwesiga ku Yehova arije kutuha ebi turi kwetenga. Yesu akakigambira abegi beye omuri toku yeye y’aha rushozi. (Shoma omuri Matayo 6:30, 33.) Twayesiga tutari kubanganisa ku Yehova atarije kutusigaho, nitwija kuta omutima aha kumuhereza. Twareba oku Yehova ari kutukwasa kubona ebi turi kwetenga by’omubiri, nitwija kumuhika hihi kandi okwikiriza kwitu nikwija kuhama.

4-5. Ni enki ecakwasize eka emwe eyabire eyemerize omutima, kubona ebi yabire eri kwetenga?

⁴ Reba oku ab’omu ka emwe y’omuri Venezuwela, barebire oku Yehova yabakwasize kubona ebi babire bari kwetenga by’omubiri, obu babire bemerize omutima. Izoba rimwe, eka ya Castro ekaba eyine esente eziri kumara, ezi babire nibiha omu bi bayeza omu musiri gwabo. Konka, abashija bine embunda bakija babaka itaka ryabo, kandi na bo babakwata. Nyineka ori kweta Miguel akagamba ati: “Hati tusigire nituhinga omu kacweka k’itaka kace aku twapangisize. Burijo tukaba nitushaba Yehova ngu atuhe eby’okutubisaho eryo zoba.” N’obu embera zabire zibagumire bakagumizamu kwesiga ku Yehova yabire arabahe ebi bari kwetenga burizoba, kandi eco kikatuma ab’omu ka ya Castro bagumizamu kuza omu nterane burijo n’omu murimo g’okuburira. Bakaba nibata eby’Obukama omu mwanya g’okubanza, kandi Yehova akagumizamu kubaha ebi babire bari kwetenga.

⁵ N’obu Miguel n’omukazi weye Yurai, babire bari omu mbera zigumire, bakagumizamu kuta omutima aha ku Yehova ari kubafaho. Omuri obwo bwire, Yehova akagumizamu kukoresa benetata na banyanyazi omu kubaha eby’omubiri ebi babire bari kwetenga, kandi Miguel akija kutunga omurimo g’okubabisaho. Obundi bwire, Yehova akakoresa ofisi kugira ngu babase kutunga ebi babire bari kwetenga. Yehova tarabasigireho. Eco kikakizaho kugumya okwikiriza kwabo. Bwanyima y’okureba oburyo obu Yehova yakoresize ari kubabisaho, omuhara wabo ori kwetwa Yoselin akagamba ati: “Kwerebera oku Yehova yatukwasize, kikatugaruramu amani. Ni munywani wange, kandi ninyesiga ku arije kugumizamu kunkwasa.” Akongeraho ati: “Ebizibu ebi eka yitu yabugine, bikakatutegurira ebi turije kubugana omu biro by’omu misho.”

6. Ni bata oku ori kubasa kugumya okwikiriza kwawe waba oyine ekizibu c’eby’akasente?

⁶ Mbehi oyine ekizibu c’eby’akaste? Yaba ori omuri ezo mbera, nomanya oku ziri kuba zigumire. Konka ebizibu ebi oyine oku byakuba biri kona, nobasa kukoresa obwo bwire ori kugumya okwikiriza kwawe. Shaba Yehova, oshome ebigambo bya Yesu ebiri omuri Matayo 6:25-34, kandi obitekatekeho. Nambwenu, shwijuma ebyokureberaho by’omuri obu bwire ebiri kwereka oku Yehova ari kuha abari kugumizamu kuta eby’Obukama omu mwanya g’okubanza ebi  bari kwetenga. (1 Kor 15:58) Ku orakikore basyoya noyija kwesiga ku Yehova arije kukukwasa nk’oku yakwasize ababire bari omu mbera nk’ezawe. Kandi naba ayetegwire kubikuha. Wareba oku Yehova yakukwasize omu kubaho kwawe, nikija kugumya okwikriza kwawe, kandi kikukwase kwehanganira ebigezo by’omu biro by’omu misho.—Hab 3:17, 18.

7. Tukuratize ebiri omuri Matayo 8:23-26, ni bata oku ‘ihunga ry’amani’ ryagerize okwikiriza kwa Yesu?

⁷ Obu Yesu n’abegi beye babugine ihunga ry’amani, akakoresa obwo bwire yabagambira aho babire bashemerire kongera okwikiriza. (Shoma omuri Matayo 8:23-26.) Obu ihunga ryakirizeho kweyongera amizi gakaza omu bwato, Yesu akaba ayegwajegerire. Abegi beye ku bagizire obwoba bakamwimusya ngu abakize, Yesu akababuza ngu: ‘Nimutina ki imwe, abine okwikiriza kuce?’ Abo begi ababire batinire bakamanya ku Yehova yabire ayine obushoborozi bw’okurinda Yesu n’abo babire bari hamwe. Ni enki eki eyi nkuru eri kubasa kutwegesa? Okwikiriza kugumire nikubasa kutukwasa kwehanganira ‘ihunga ry’amani,’ ryakuba erishangirwe ninga ery’ekigeraniso.

8-9. Ni enki ecagerize okwikiriza kwa Anel, kandi ni enki ecamukwasize?

⁸ Reka tushwijume ecokureberaho ca Anel, omunyanyazi ori kuba wenka w’omuri Porutoriko, owabugine ekigezo kikageza okwikiriza kweye. Ihunga ry’amani eryamuhikireho ni erishangirwe. Eco kigezo kikatandika omu 2017 obu omuyaga oguri kwetwa Maria gwashenyire enju yeye. Nambwenu, eco kikatuma yaferwa omurimo gweye. Anel akagamba ati: “Omuri ebyo biro ebyabire bigumire, nkahurira nyemerize omutima, konka bikatuma nayega Yehova birabire omu kushaba kandi tibiratumire nareka kukora ebi nabire nshemerire kukora.”

⁹ Nambwenu Anel akagamaba ku korobera obuhabuzi camukwasize kwehanganira ebizibu. Akagamba ati: “Korobera obuhabuzi bw’ekitongore kikankwasa kwehanganira ebizibu. Nkareba ku Yehova ari kubasa kutukwasa kwehanganira ebizibu ebi turi kubugana akoresize benetata na banyanyazi b’omu nsi yona, bakatuha ebi turi kwetenga.” Akongeraho ati: “Yehova akampa ebiri kukira ebi nabire mushabire, kandi okwikiriza kwange kukakizaho kuhama.”

10. Ni enki eki ori kubasa kukora wabugana ‘ihunga ry’amani’?

¹⁰ Mbehi warabugineho ‘ihunga ry’amani’ omu kubaho kwawe? Nobasa kuba ori kubonabona ahabw’ebihikirizi. Ninga shi niribasa kuba riri ihunga ry’ekigeraniso, harimu nk’okurwara endwara eshambire, ekatuma wayemereza omutima munonga otari kumanya eco kukora. Nobasa kucweka entege, konka otariyikiriza ngu bitume wareka kwesiga Yehova. Hika hihi ya Yehova omu kushaba. Gumya okwikiriza kwawe ori kutekateka aha ku Yehova yakuyambire omu bwire bwa kare. (Zab 77:11, 12) Yesige otari kubanganisa ku  atarije kukusigaho hati, n’omu biro by’omu misho.

11. Ahabw’enki tushemerire kumarira korobera abazehe?

¹¹ Ni enki ekindi ekiri kubasa kukukwasa kwehanganira ebizibu? Nk’oku Anel yakikozire, yorobera obuhabuzi. Yega kwesiga abu Yehova na Yesu bari kwesiga. Hariho obu abazehe bari kutuha obuhabuzi obu turi kureba nk’obutine omugasho omuri obwo bwire. Konka, ogume oyijuke ku Yehova ari kuha emigisha abari korobera obuhabuzi. Ebi turi kushoma omuri Bibuli n’ebyokureberaho by’abahereza ba Yehova b’abesigwa byona nibitwegesa ku okoroba kiri kukiza amagara. (Kur 14:1-4; 2 Bus 20:17) Tekateka ahari ebyo byokureberaho. Ku orakikore basyoya nikija kugumya ecetengo cawe c’okorobera obuhabuzi bw’ekitongore hati, n’omu biro eby’omu misho. (Heb 13:17) Eco nikija kutuma otatina okubonabona kwingi okuri hihi kubaho.—Enf 3:25.

12. Tukuratize ebiri omuri Luka 18:1-8 ni kaha kakwate akari ahagati y’okwikiriza n’okwehanganira obutariburinganiza?

¹² Yesu akaba namanya ku obutariburinganiza buri kubasa kugeza okwikiriza kw’abegi beye. Kugira ngu abakwase kubwehanganira akabaha ecokureberaho ekiri omu kitabo ca Luka. Yesu akabagambira enkuru y’omufakazi owabire norira ahabw’omucwamanja owabire ayangire kuhurira orubanja rweye. Akaba ari kwesiga atari kubanganisa ku yabire arije kumuhurira yagumizamu kumweshenereza. Ku hahwireho obwire, ogo mucwamanja akamuhurira. Eki biri kutwegesa? Yehova ayine oburinganiza. Yesu akagamba ati: ‘Nimugira ngu Ruhanga tarishoborora entore zeye, ezimutakira nyomushana na nyekiro?’ (Shoma omuri Luka 18:1-8.) Bwanyima Yesu akongerahu ngu: ‘Bitu Omwana w’omuntu ku arija, ebyo aryashanga okwikiriza omu nsi?’ Ku turi kubugana obutariburinganiza nituba tushemerire kwehangana, kugira ngu twereke ku twine okwikiriza kugumire nk’ogo mufakazi. Ku turagire okwikiriza nk’okwe, nitwija kwesiga tutari kubanganisa ku Yehova arije kutukwasa. Nambwenu tushemerire kwesiga ku eshara eyine amani. Obumwe eshara zitu, nizibasa kugarukwamu omu buryo obu twaba tutegwire.

13. Ni bata oku eshara yakwasize ab’omu ka emwe ababire babugana okutwarizibwa kubi?

¹³ Tekateka aha byahikire ahari munyanyazi ori kwetwa Vero, otwire omuri Kongo Kinshasa. Vero n’omushija weye otari Omuhamya wa Yehova hamwe na muhara wabo w’emyaka 15, bakafuruka baruga omu kacweka kabo ahabw’okutahirirwa n’abasirikare. Obu babire bari omu muhanda bari kugenda bakabugana abo basirikare bari omu muhanda, rero babatinisa ngu baza kubita. Vero ku yatandikire kurira, muhara weye akagezaho kumuhumuriza ari kushaba omu iraka eriri kuhurirwa akoresize izina rya Yehova. Ku yaherize kushaba omukuru w’abasirikare akamubuza ngu: “Ni  oha owakwegesize kushaba?” Akamugarukamu ngu: “Mama ni we owabinyegesize akoresize ecokureberaho ekiri omuri Matayo 6:9-13.” Ogo musirikare akamugambira ngu: “Yegendere obusinge iwe n’abazire bawe Yehova Ruhanga abarinde!”

14. Ni enki ekiri kubasa kugeza okwikiriza kwitu, kandi shi ni enki ekirije kutukwasa kukwehanganira?

¹⁴ Ebyo byokureberaho nibitwegesa ku tushemerire kureba eshara nk’ey’omugasho munonga. Konka shi okakora ki yaba eshara yawe etagarukwamu ahonaho? Nk’omufakazi ori kugambwa omu cokureberaho ca Yesu, gumizamu oshabe kandi oyesige ku Yehova arije kugarukamu eshara yawe omu bwire obuhikire. Guma oshabe Yehova akuhe omwika oguri kwera. (Fil 4:13) Yijuka ku juba aha Yehova arije kukuha emigisha, okebwa okubonabona kona okwakuhikireho. Oku Yehova ari kukwasa kwehanganira ebizibu by’omuri obu bwire nikituma okwikiriza kwawe kwahama, kandi nikija kukukwasa kwehanganira eby’orije kubugana omu biro by’omu misho.—1 Pet 1:6, 7.

15. Nk’oku biri kugambwa omuri Matayo 17:19, 20, ni kiha kizibu eki abegi ba Yesu babugine?

¹⁵ Yesu akegesa abegi beye ku okwikiriza kwabire kurabakwase kwehanganira ebizibu. (Shoma omuri Matayo 17:19, 20.) Izoba rimwe bakaremwa kubinga omudayimoni n’obu babikozireho emirundi myingi. Ni enki ecabire kibireho? Yesu akabagambira ku babire bashemerire kugira okwikiriza okuri kukiraho. Yesu akabagambira ku babire bine okwikiriza okuri kukiraho, bari kubasa kusingura ekizibu ekiri nk’omushozi! N’itwe omuri obu bwire, nitubasa kubugana ebizibu ebi turi kubasa kugeranisa n’omushozi.

16. Ni bata oku okwikiriza kwakwasize Geydi kwehanganira akagwe aku yabugine?

¹⁶ Reka turebe ebyahikire ahari munyanyazi w’omuri Gwatemala ori kwetwa Geydi. Ku babire bari kuruga omu nterane omushija weye ori kwetwa Edi bakamwita. Mbwenu shi ni bata oku okwikiriza kwatumire Geydi yayehanganira eco kizibu? Akagamba ati: “Eshara nenkwasa kweguza Yehova omutwaro gwange, rero kituma nagira obusinge. Nkerebera omukono gwa Yehova birabire omu banyabuzare n’abanywani b’omu kibina. Okuguma mpugire omu murimo gwa Yehova nikinkwasa kwehanganira ebizibu byange, kandi nguma ntire omutima aha by’izoba rimwe, ndeka kwemereza omutima aha bya nyensakare. Ebyambireho bikanyereka ku hatine ekizibu na kimwe eki ntari kubasa kwehanganira ahabw’obuyambi bwa Yehova, Yesu, n’ekitongore ceye.”

17. Tukakora ki kugira ngu tusingure ekizibu ekiri kwingana n’omushozi?

¹⁷ Mbehi n’iwe oyine obusaasi bw’okufisa omuntu wawe? Kwata obwire ogumye okwikiriza kwawe aha bikwatirine n’amasiko g’abafire, ori kushoma enkuru z’omuri Bibuli z’abantu abazokire. Mbehi oyine obusaasi bwingi ahabw’omunyabuzare wawe owabingirwe omu kibina? Gumizamu  oyeyegese kugira ngu ohamize kimwe ku obwo buri oburyo burungi obu Yehova ari kutuhanamu. Ekibuzo cona eki wakubugana ogume obone ku ni oburyo burungi obu wabona bw’okugumya okwikiriza kwawe. Guma oshuke ebiri omu mutima gwawe omu misho ga Yehova. Guma oyerinde kwetarura abandi, ahobwe ogume obe hihi ya benetata na banyanyazi. (Enf 18:1) Guma oyekwatanise omu bikorwa by’omwika ebiri kukukwasa kwehangana n’obu wakuba ori kwijuka ebyakuhikireho. (Zab 126:5, 6) Gumizamu entebekanisa yawe ya burijo y’okuza omu nterane, omu murimo g’okuburira n’okushoma Bibuli. Ekiri kukira byona, guma ohangire amisho aha migisha y’omu biro by’omu misho eyi Yehova ari kuturaganisa. Ku orayerebere oku Yehova ari kukukwasa, okwikiriza kwawe nikukizaho kuhama.

18. Wahurira okwikiriza kwawe kwatandika kucendera, ni enki eki ori kubasa kukora?

¹⁸ Yaba ebizibu ebyakuhikireho omu bwire bwa kare ninga obwa hati byatumire okwikiriza kwawe kwacendera, otahwamu amani. Ogume obone ku ni oburyo obu wabona bw’okugumya okwikiriza kwawe. Guma oshabe nk’oku entumwa za Yesu zashabire ziri kugira ngu: ‘Twongerere okwikiriza.’ (Luk 17:5) Nambwenu, guma otekateka aha byokureberaho ebi twayega omuri eki kikweka. Nka Miguel na Yurai, ogume oyijuke obwire bwona obu Yehova yagenzire ari kukurinda. Nk’oku muhara wa Verona Anel bakikozire, guma oshabe Yehova ori kumweshengereza na munonga waba oyine ekizibu c’amani. Kandi nka Geydi, nguma oyijuke ku Yehova arije kukukwasa akoresize abanyabuzare ninga abanywani bawe. Ku orayikirize otari kubanganisa ngu Yehova akukwase omu bizibu ebi ori kubugana hati, nikituma wayikiriza ku arije n’okukukwasa kwehanganira ebi orije kubugana omu biro by’omu misho.

19. Ni buha bwesige obu Yesu yabire ayinire abegi beye kandi shi iwe ni enki eki ori kubasa kwesiga otari kubanganisa?

¹⁹ Yesu akakwasa abegi beye kumanya ahu babire bashemerire kongera okwikiriza, konka akaba ari kwesiga atari kubanganisa ku Yehova yabire arabakwase kusingura ekizibu eki ari co cona. (Yoh 14:1; 16:33) Akaba ari kwesiga atari kubanganisa ku okwikiriza kugumire kwabire kurije kukwasa abantu b’omu mutwe muhangu, bakabasa kusingura ebi babire barije kubugana omu kubonabona kwingi. (Kush 7:9, 14) Mbehi n’iwe noyija kuba ori omuri abo? Ahabw’embabazi za Yehova noyija kuba orimu ku orakore cona eki ori kubasa hati ngu ogumye okwikiriza kwawe!—Heb 10:39.