1. Ki kestyon nou kapab demann nou lekor?

ESKI parfwa ou enkyet konsernan bann keksoz ki pou arive? Par egzanp, destriksyon fo larelizyon, latak Gog ki sorti Magog ek lager Armagedon? Eski ou’n deza demann ou lekor, ‘Eski mon pou kapab reste fidel ler sa bann keksoz ki fer per i arive?’ Si ou mazin sa bann kestyon, sa ki Zezi ti dir dan sa verse tenm pour sa lartik, pou ed ou. Zezi ti dir son bann disip: “Pa bezwen enkyet. Demontre lafwa.” (Zan 14:1) Ler nou annan en lafwa ki for, sa pou ed nou andir nenport kwa ki arive dan lavenir.

2. Ki mannyer nou kapab ranforsi nou lafwa e ki nou pou vwar dan sa lartik?

² Si nou reflesir lo lafason ki nou fer fas avek difikilte la konmela, nou pou konnen ki nou bezwen fer pour ranforsi nou lafwa, pour nou kapab fer fas avek bann difikilte ki pou vini dan lavenir. Si nou fer sa, nou pou vwar kote ki nou bezwen plis lafwa. Sak fwa ki nou andir en difikilte, nou lafwa i vin pli for. Dan sa lartik, nou pou vwar kat sityasyon ki montre ki bann disip Zezi ti bezwen plis lafwa. Apre, nou pou vwar ki mannyer nou kapab andir bann menm difikilte ozordi e ki mannyer sa i kapab prepar nou pour sa ki pou arive dan lavenir.

3. Ki bann parol ki Zezi ti dir dan Matye 6:30, 33 i ed nou konpran?

³ I normal pour en msye anvi donn son madanm ek son bann zanfan manze, lenz ek en landrwa reste. Dan sa bann letan difisil, sa i pa toultan fasil pour fer. Serten nou bann frer ek ser in perdi zot travay e menm si zot  fer zot mye pour trouv en lot travay, zot pa reisi gannyen. Lezot in bezwen refiz bann travay ki bann Kretyen pa kapab fer. Ler bann keksoz koumsa i arive, nou bezwen annan en lafwa for ki Zeova pou fer sir ki nou ganny bann keksoz ki nou bezwen pour nou fanmir. Zezi ti fer sa kler avek son bann disip dan Sermon lo Montanny. (Lir Matye 6:30, 33.) Ler nou asire ki Zeova pa pou abandonn nou, nou pou kapab konsantre lo servi Zeova. Anmezir ki nou vwar lafason ki Zeova pe ed nou pour ganny sa ki nou bezwen pour viv, nou pou vin pli pros avek Zeova e nou lafwa pou vin pli for.

4-5. Kwa ki ti ed en fanmir ler zot ti enkyet konsernan ki mannyer zot pou ganny bann keksoz ki zot bezwen pour viv?

⁴ Annou vwar ki mannyer en fanmir ki reste Venezwela ti ganny led Zeova. Sa fanmir ti enkyet konsernan ki mannyer zot pou ganny bann keksoz ki zot bezwen pour viv. Lafanmir Castro ti annan en pti laferm ki zot ti travay lo la e sa ti fer zot ganny ase larzan pour viv. En zour, bann zonm avek fizi ti vini. Zot ti pran later fanmir Castro e fer fanmir Castro ale. Sa papa ki apel Miguel i dir: “Aprezan nou travay lo en pti bout later ki nou’n ganny permisyon pour plant lo la. Toulezour mon konmans lazournen par demann Zeova pour donn nou sa ki nou bezwen pour sa zour.” Lavi i difisil pour sa fanmir me lafanmir Castro i annan lafwa ki nou Papa ki kontan nou, i kapab donn zot sa ki zot bezwen toulezour. Sa i fer ki zot asiste renyon regilyerman e zot fer predikasyon. Zot servis pour Zeova i sa keksoz pli enportan dan zot lavi e Zeova i donn zot sa ki zot bezwen.

⁵ Pandan sa moman difisil Miguel ek son madanm Yurai in konsantre lo lafason ki Zeova in pran swen avek zot. Parfwa Zeova ti servi bann frer ek ser pour donn zot serten keksoz ki zot ti bezwen ouswa pour ed Miguel ganny en travay. Lezot fwa, Zeova ti servi Biro brans Temwen Zeova pour donn zot serten keksoz ki zot ti bezwen. Zeova pa’n zanmen abandonn zot. Sa ti fer ki lafwa lafanmir Castro in vin pli for. Apre ki zot pli gran fiy, Yoselin, ti’n koz lo en moman spesifik kot Zeova ti’n ed zot, i ti dir: “I ankourazan pour vwar lafason ki Zeova in ed nou. I mon zanmi e mon asire ki i pou toultan ed mwan. Problenm ki nou fanmir in andire, in prepar nou pour bann problenm ki pou arive dan lavenir ki pou pli difisil.”

6. Ki mannyer ou kapab ranforsi ou lafwa ler ou annan problenm larzan?

⁶ Eski ou annan problenm larzan? Si wi, sa i en moman difisil pour ou. Me ou kapab servi sa letan pour ranforsi ou  lafwa. Priy Zeova, lir bann parol ki Zezi ti dir dan Matye 6:25-34 e medit lo la. Mazin bann legzanp dan nou letan ki montre ki Zeova i pran swen avek sa bann ki reste okipe dan son servis. (1 Kor. 15:58) Si ou fer sa, ou pou annan lafwa ki ou Papa ki dan lesyel pou ed ou zis parey in ed lezot ki ti annan bann menm problenm ki ou ou annan. I konnen ki ou bezwen e i konnen ki mannyer i pou donn ou sa ki ou bezwen. Ler ou vwar ki Zeova pe ed ou, ou lafwa pou vin pli for pour ki ou kapab andir bann pli gro difikilte dan lavenir.​—Aba. 3:17, 18, NWT.

7. Dapre Matye 8:23-26, ki mannyer “en gro tanpet” ti teste lafwa bann disip?

⁷ Ler Zezi ek son bann disip ti pe vwayaze dan en bato, en sel kou en tanpet ti deklare. Zezi ti servi sa levennman pour ed zot konpran ki zot ti bezwen ranforsi zot lafwa. (Lir Matye 8:23-26.) Sa tanpet ti sitan for ki delo ti antre dan bato. Me Zezi ti pe dormi trankil. Bann disip ti per e zot ti lev li. Zot ti demann li pour sov zot me Zezi ti dir zot: “Akoz zot sitan per koumsa? Akoz zot lafwa i ptigin?” Sa bann disip ti’n devret realize ki Zeova ti pou kapab protez Zezi ek tou sa bann ki ti avek li. Ki nou kapab aprann? En lafwa ki for, i kapab ed nou pour andir bann “gro tanpet” oubyen okenn difikilte ki kapab parey en tanpet.

8-9. Ki mannyer lafwa Anel ti ganny teste e kwa ki ti ed li?

⁸ Mazin ki mannyer lafwa en ser selibater ti vin pli for ler i ti andir en problenm. Sa ser i apel Anel e i sorti Puerto Rico. An 2017, tanpet Maria ti detri lakaz Anel e Anel ti osi perdi son travay. Anel i dir: “Pandan sa letan difisil, mon ti enkyet me mon ti aprann pour met mon konfyans dan Zeova atraver lapriyer e pa les sa lenkyetid anpes mwan fer sa ki mon bezwen fer.”

⁹ Anel i osi dir ki son lobeisans ti ed li pour andir son bann problenm. I dir: “Ler mon ti swiv gidans ki lorganizasyon Zeova ti donn mwan, sa ti ed mwan pour reste kalm. Zeova ti servi bann frer ek ser pour ed mwan. Zot ti ankouraz mwan e donn mwan bann keksoz ki mon ti bezwen pour viv. Zeova in donn mwan plis ki sa ki mon ti bezwen e mon lafwa in vin pli for.”

10. Ki ou kapab fer si ou pe fer fas avek “en gro tanpet”?

¹⁰ Eski ou pe fer fas avek “en gro tanpet”? Petet ou pe soufer akoz en dezas natirel oubyen ou vreman dekouraze e ou pa konnen ki pour fer akoz ou annan en maladi grav. Petet parfwa ou enkyet me pa les ou lenkyetid anpes ou met ou konfyans dan Zeova. Vin pros avek li dan  lapriyer. Medit lo bann moman dan lepase kot Zeova in ed ou pour ranforsi ou lafwa. (Ps. 77:11, 12) Ou kapab asire ki i pa pou zanmen abandonn ou.

11. Akoz nou devret determinen pour obei bann ki pe dirize dan kongregasyon?

¹¹ Kwa ankor ki kapab ed ou pour andir bann problenm? Anel ti dir ki lobeisans i kapab ed nou pour andir bann problenm. Aprann pour met nou konfyans dan bann ki Zeova ek Zezi i annan konfyans ladan. Parfwa bann ki ganny apwente pour diriz kongregasyon, i donn bann lenstriksyon ki paret drol pour nou. Me ler nou obei sa bann lenstriksyon, Zeova i beni nou. Atraver Labib ek leksperyans bann serviter fidel Zeova, nou aprann ki lobeisans i sov lavi. (Egz. 14:1-4; 2 Kron. 20:17) Medit lo sa bann legzanp. Ler ou fer sa, sa pou fer ou pli determinen pour swiv bann lenstriksyon sorti kot lorganizasyon Zeova la konmela e dan lavenir. (Ebr. 13:17) Koumsa, ou pou napa okenn rezon pour per sa gran ladetres ki pe vini byento.​—Prov. 3:25, NWT.

12. Dapre Lik 18:1-8, ki mannyer lafwa i kapab ed nou andire ler nou fer fas avek lenzistis?

¹² Zezi ti konnen ki lenzistis ti pou teste lafwa son bann disip. Zezi ti donn zot en legzanp ki ganny ekrir dan Levanzil Lik pour ed zot andire. Zezi ti koz lo en vev ki ti kontinyen sipliy en move ziz pour li ganny lazistis. Sa vev ti asire ki sa ziz ti pou ed li si i ti kontinyen persiste. Avek letan, sa ziz ti ekout sa madanm. Ki nou kapab aprann? Zeova pa enzis. Zezi ti dir: “Sirman, pa Bondye pou rann lazistis bann ki i’n swazir ki kriy li lizour konman aswar?” (Lir Lik 18:1-8.) Apre Zezi ti osi dir: “Ler Garson zonm i arive, eski i pou trouv sa kalite lafwa lo later?” Ler nou soufer akoz lenzistis, nou bezwen annan pasyans e persevere parski sa pou montre ki nou annan en lafwa for parey sa vev. Ler nou annan en lafwa for, nou asire ki Zeova pou ed nou. Nou osi bezwen krwar ki lapriyer i vreman pwisan. Parfwa nou lapriyer i kapab ganny reponn dan bann fason ki nou pa pe ekspekte.

13. Ki mannyer lapriyer ti ed en fanmir ki ti ganny trete dan en fason enzis?

¹³ Annou vwar legzanp en ser ki apel Vero, ki reste Repiblik Demokratik Kongo. Vero ansanm avek son msye ki pa servi Zeova ek zot fiy 15 an, ti bezwen sove e kit zot vilaz ler en group solda ti vin atak zot vilaz. Pandan ki zot ti pe sove, sa fanmir ti ariv en landrwa kot bann solda ti’n blok semen e sa bann solda ti menase pour touy zot. Ler Vero ti konmans plere, son fiy ti esey rekonfort li par priy aotvwa e par kontinyen servi non Zeova  dan son lapriyer. Ler i ti fini fer lapriyer, komandan sa group larme ti dir: “Sa fiy, lekel ki’n ansenny ou pour priye?” Sa fiy ti dir: “Mon manman ki’n montre mwan, par servi sa legzanp dan Matye 6:9-13.” Sa komandan ti dir: “Fiy al anpe avek ou paran e ki Zeova ou Bondye i protez ou!”

14. Kwa ki kapab teste nou lafwa e kwa ki kapab ed nou pour andire?

¹⁴ Bann leksperyans koumsa i ansenny nou pour pa zanmen oubliye ki lapriyer i vreman enportan. Me ki ou pou fer si ou bann lapriyer pa ganny reponn deswit oubyen dan en fason remarkab? Parey sa vev dan legzanp Zezi, kontinyen priye avek konfyans ki nou Bondye pa pou abandonn ou e ki avek letan, i pou reponn ou lapriyer. Kontinyen sipliy Zeova pour son lespri sen. (Fili. 4:13) Rapel ki byento Zeova pou beni ou en kantite ki ou pou oubliy tou bann soufrans ki ou’n pas ladan. Anmezir Zeova i ed ou andir ou bann problenm, ou pou vin pli for e ou pou kapab andir bann problenm ki ou pou gannyen dan lavenir.​—1 Pyer 1:6, 7.

15. Dapre Matye 17:19, 20, ki problenm bann disip Zezi ti fer fas avek?

¹⁵ Zezi ti ansenny son bann disip ki lafwa ti pou ed zot sirmont bann problenm. (Lir Matye 17:19, 20.) En fwa, zot pa ti kapab sas en demon menm si zot ti’n kapab fer sa oparavan. Ki ti zot problenm? Zezi ti dir ki zot ti bezwen plis lafwa. I ti dir zot ki si zot annan ase lafwa, zot ti pou kapab kontinyen andire menm si bann problenm ti paret sitan gro parey en montanny. Ozordi, nou osi nou kapab annan bann difikilte ki fer li paret enposib pour kontinyen andire.

16. Ki mannyer lafwa ti ed Geydi pour andire apre ki son msye ti’n ganny touye?

¹⁶ Annou vwar legzanp Geydi, en ser ki reste Gwatemala. Son msye, Edi ti ganny touye ler zot ti pe retourn kot zot apre renyon. Ki mannyer lafwa Geydi ti ed li pour andire menm si i ti sagren? I dir: “Lapriyer ti ed mwan pour larg mon fardo lo Zeova e sa ti donn mwan lape lespri. Atraver mon fanmir ek mon bann zanmi dan kongregasyon, mon ti vwar ki Zeova i pran swen avek mwan. Ler mon ti reste okipe dan servis Zeova, sa ti ed mwan pour pa tro sagren e pour kontinyen andire sak zour, san ki mon bezwen tro trakas lo sa ki pou arive demen. Sa ki’n arive avek mwan in montre mwan ki nenport tes ki mon kapab gannyen dan lavenir, avek led Zeova, Zezi ek lorganizasyon Zeova, mon pou kapab andire.”

17. Ki nou kapab fer ler nou fer fas avek en problenm ki parey en montanny?

¹⁷ Eski ou dan dey akoz en dimoun ki ou kontan in mor? Pran letan pour lir bann resi dan Labib konsernan bann dimoun  ki ti ganny resisite, sa pou ranforsi ou lafwa dan rezireksyon. Eski ou sagren akoz en manm ou fanmir in ganny ekskli dan kongregasyon? Etidye Parol Bondye pour konvenk ou lekor ki lafason ki Bondye i disiplin nou, i toultan sa ki pli bon. Nenport problenm ki ou pe fer fas avek, servi sa konman en loportinite pour ranforsi ou lafwa. Devid ou leker avek Zeova. Pa izol ou lekor me reste pros avek bann frer ek ser. (Prov. 18:1, NWT) Fer bann keksoz ki pou ed ou andire, menm si ou plere ler ou mazin konsernan sa ki’n arive avek ou. (Ps. 126:5, 6, NWT) Kontinyen asiste bann renyon, anons sa bon nouvel e lir Labib. Kontinyen mazin konsernan bann bon keksoz ki Zeova in promet pour donn ou dan lavenir. Anmezir ki ou vwar lafason ki Zeova i ed ou, ou lafwa dan li pour vin pli for.

18. Ki ou kapab fer si ou realize ki ou lafwa pa ase for?

¹⁸ Si bann problenm ki ou’n pas ladan ouswa ki ou pe fer fas avek in fer ou realize ki ou lafwa pa ase for, pa dekouraze. O kontrer, vwar sa konman en loportinite pour ranforsi ou lafwa. Ou kapab demann menm keksoz ki bann disip Zezi ti demande. Zot ti dir: “Donn nou plis lafwa.” (Lik 17:5) Ou kapab osi reflesir lo bann legzanp ki nou’n diskite dan sa lartik. Parey Miguel ek Yurai, rapel tou bann moman kot Zeova in ed ou. Parey fiy Vero ek Anel, priy Zeova en kantite, sirtou ler ou annan en gro problenm. Parey Geydi, rekonnet ki Zeova i kapab ed ou atraver ou fanmir oubyen zanmi. Ler ou les Zeova ed ou andir bann problenm ki ou pe fer fas avek, sa pou fer ou pli asire ki i pou ed ou andir okenn problenm ki ou kapab annan dan lavenir.

19. Ki Zezi ti asire e ki ou ou kapab asire?

¹⁹ Zezi ti ed son bann disip pour vwar ki zot ti bezwen plis lafwa. Me i ti asire ki avek led Zeova, zot ti pou reste fidel e andir bann problenm ki zot ti pou gannyen dan lavenir. (Zan 14:1; 16:33) I ti osi asire ki i ti pou annan en gran lafoul ki ti pou pas atraver gran ladetres akoz zot ti pou annan en lafwa for. (Rev. 7:9, 14) Eski ou pou form parti sa gran lafoul? Avek led Zeova, ou pou form parti sa gran lafoul si ou fer tou sa ki ou kapab la konmela pour ranforsi ou lafwa.​—Ebr. 10:39.