1. ¿Dayikʉzaʉba kʼãrẽta widiseapanʉ?

¿EDAɄDE perabarika krĩchabʉrʉde nekʼãrẽ ʉ̃ra zei ʉ̃rʉ, religion zeri ẽã makenabʉdade, Gog de Magog Daizeze pʉwʉrʉ ʉ̃rʉ zebʉrʉde, Armagedon yõ zebʉrʉde? Bʉa krĩchabaribaibara, maʉ̃ ewari zebʉrʉdera bʉra daucha baseabʉ kʼawuaita Jeowaʉ̃me. Bʉa maʉ̃ ʉ̃rʉ krĩchabʉbʉrʉ kʼarebayi Jesuba bedʼea jaradaba, testo naʉ̃ artikulode nããra jarabʉba, Jesubara iyi kʼaidupanʉra jarasi: «Sopuarãũdua. Ĩjãũdua Daizezedʼebemata» (Juan 14:1). Soiduba zarea ĩjãbʉba kʼarebayi pera ẽã jʉ̃ãita ʉ̃ra zeita.

2. ¿Sãwũã audre zarea ĩjãseapanʉ dayirãbara akʉza kʼãrẽta akʉdai dayirãbara naʉ̃ artikulodera?

² Idi dayirãba sãwũã opanʉba bedʼea zroma zebʉrʉde, maʉ̃ba ũdubiyi kʼãrẽne audre zarea oibarata audre soiduba ĩjãita, mawũã ʉ̃ra zebʉrʉde awuantaita. Bedʼea zroma berabaribʉrʉza audre soiduba zarea ĩjãpanʉ maʉ̃ba kʼarebayi bedʼea zroma ʉ̃rabʉrʉ zebʉrʉde. Naʉ̃ artikulodera akʉdayi, Jesu kʼaidupanʉra ne kimare berabaridaba ũdubibʉta ãyira wabida waebasita soiduba zarea ĩjãita. Akʉza akʉdayi dayirãba sãwũã awuantaseabʉta ãyi berabarida kĩrãkʼa adewara maʉ̃ba sãwũã kʼarebaita ʉ̃ra zebʉrʉde.

3. Mateo 6:30, 33ba jarabʉdebara, ¿kʼãrẽta jarasi Jesubara ĩjãi ʉ̃rʉra?

³ Yi mebẽrã burubara diakĩrãbʉ iyi mebẽãba nesidabʉta, wuata, yikota, mamina maʉ̃ra edaʉde zare. Naʉ̃ ewari jõbodoarera edaʉde ʉ̃kʉrʉ mebẽrãra ãyi trajo aduapanʉ akʉza zarea mejãcha opanʉmina awuruta ũduita, zare ũduita. Ʉ̃kʉrʉbara trajo ũdusidamina ĩjãna ẽ basi, kristianoraitara biga ẽ baera. Maʉ̃ mawũã berabaribʉrʉdera dayirãbara nesidapanʉ soiduba ĩjãnaita,  Jeowaba nekʼãrẽ oita dayirã diaita dayi mebẽrãba nesidabʉta. Jesuba maʉ̃ bedʼea jara amaesi iyi kʼaidupanʉra katuma bedʼea bia jaradamae (akʉra Mateo 6:30, 33). Bia kʼawuapanʉbʉrʉ Jeowaba amae ẽ baita, mawũãra audre odayi Daizeze Nokʼodeta. Dayirãba akʉ wãna Jeowaba sãwũã kʼarebabʉta, maʉ̃ba ũdu wãnañi iyira wãrĩnubʉta dayirã bebʉde akʉza kʼarebayi audre zarea ĩjãita.

4, 5. ¿Kʼãrẽba kʼarebasi mebẽrãra krĩcha opanaside ãya nesidapanʉ kʼarea?

⁴ Akʉdayi sãwũã mebẽrã Castro Venezueladebemarata Jeowaba kʼarebasita ãyi krĩcha obaside, ãya nesidabʉ kʼarea. Mebẽrã Castrobara erpanasi ãya nesidabʉra ãyi trajapanaside ãyi drʉade. Maʉ̃ne põga yibariraba ãyi drʉara jãrĩsida, mõbe wãbisida mamaʉ̃bara. Ãyi zeze Miguelba jarasi: «Idira trajapanʉ drʉa zake daiʼa prestadade, mawũã ũduita diaba nesidabʉta. Ewari jʉ̃drʉbʉrʉza mʉ̃a widibʉ Jeowaʼa diamarẽã diaba nesidabʉta maʉ̃ ewaride». Maʉ̃ra zare naʉ̃ra mebẽrãitara. Naʉ̃ra mebẽrãbara soiduba ĩjãpanʉ baera ãyi Zeze ʉ̃tʉbemaba diaita ãya nesidabʉta, maʉ̃ba idubʉda ẽ ãba yi jʉrebari eda wãita akʉza jaradia wãita. Ãyara nãã bʉepanʉ Daizeze Nokʼodeta oita akʉza Jeowabara diabʉ aya nesidabʉra.

⁵ Miguel akʉza yi kima Yuraiʉ̃me, bedʼea zroma ũdu zebʉrʉde akʉ zebʉda Jeowaba sãwũã kʼarebabʉrʉta. Edaʉde Jeowabara mebẽrãneba kʼareba zebʉrʉ ãya nesidabʉta diaita akʉza trajo ũdu diaita mebẽã Miguelʼa. Edaʉde kʼareba ũdupanʉ Jeowaba zokʼabʉde Mebẽrã ãbabʉ kʼarebabarirata. Ãyira Jeowabara amae ẽ basi, maʉ̃ba audre soiduba zarea ĩjãpanʉ. Yoselin ãyi kau nabemaba ãyi Jeowaba sãwũã kʼarebasita, maʉ̃ne jarasi: «Jeowaba sãwũã kʼarebabʉ ũdubʉrʉde dayi so tõbaribʉ, mʉ̃a akʉbʉ Jeowara mʉ̃ neũdukʼawua kĩrãkʼa. Mʉ̃ra iyaʼabʉrʉ abʉta ewari jõmaʉ̃nẽ». Akʉza jarasi: «Bedʼea zroma ũdudaba, naʉ̃ba kʼarebayi bedʼea zroma ʉ̃ra zebʉrʉde awuantaita».

6. ¿Bʉa sãwũã audre soiduba ĩjãseabʉ, bʉ plata neẽãbʉde bʉa nesidabʉ erbaita?

⁶ ¿Bʉitara zareka plata ũduita bʉa nesidabʉ erbaita? Mawũã berabaribʉbʉrʉ, maʉ̃ra zare bʉitara. Bedʼea zromane berabarinʉmʉnera zarea ora audre soiduba ĩjãita. Yiwidʼira Jeowa, akʉseabʉ Jesuba bedʼea jaradata Mateo 6:25-34eda akʉza krĩchara maʉ̃ ʉ̃rʉ. Akʉra mebẽrã idibemarãra sãwũã Jeowaba kʼarebabʉta iyi ode trajapanʉ baera (1 Cor. 15:58). Maʉ̃ ʉ̃rʉ akʉiba kʼarebayi audre ĩjãita akʉza Jeowaba bʉsida abarika kʼarebaita. Iya kʼawuabʉ bʉa kʼareta  nesidabʉta akʉza dia kʼawuabʉ maʉ̃ra. Bʉa bedʼea zroma ũdubʉde Jeowaba kʼarebabʉta, maʉ̃ba kʼarebayi audre zarea ĩjã wãita akʉza mawũãtrʉ awuantayi bedʼea zroma ʉ̃ra zebʉrʉdera (Hab. 3:17, 18).

7. Mateo 8:23-26ba jarabʉdebara, «nanguta kʼãbãẽã» zesidera, ¿sãwũã maʉ̃ne ũdubisi Jesu kʼaidupanʉrabara audre ĩjãnaibarata?

⁷ Ewari aba Jesu iyi kʼaidupanʉrabawara ãba wãne nãgʉ zromaba jidasida puzade, maʉ̃ne Jesuba ãyaʼa jaradiasi kʼãrẽne waebʉta audre soiduba ĩjãnaita (akʉra Mateo 8:23-26). Nãgʉ audre baeside akʉza doba jãbara edeside, Jesura aduʼa kʼãĩbasi. Iyi kʼaidupanʉrãra mejãcha perasida, mõbe urumasida Jesura akʉza widisida kʼarebamarẽã, Jesubara ãyira ibiade kʼẽãsi maʉ̃ kʼarea: «¿Kʼãrẽã pera kʼobʼe? Marã soidʼu kʼobʼaita wãẽã bʼea». Jesu kʼaidupanʉrabara biʼia kʼawuapanasibaibara Jeowabara Jesura kʼarebaseabʉta nãgʉdebara akʉza ãyisida. ¿Dayirãbara kʼãrẽta kʼawuaseapanʉ maʉ̃neba? Soiduba ĩjãbʉba kʼarebayi bedʼea zroma ũdupanʉne akʉza nãgʉ zromanebida.

8, 9. ¿Kʼãrẽba ũdubisi Anelbara soiduba zarea ĩjãbʉ kʼawuaita akʉza kʼãrẽba kʼarebasi?

⁸ Akʉdayi mebẽã wẽrã dobakiru Anel ʉ̃rʉ Puerto Ricodebema, bedʼea zroma berabariside iya audre soiduba ĩjãsita. Iyi dera nãgʉ María abadaba ãrĩsi poaga 2017baside akʉza iyi trajosida aduasi. Anelbara jarasi: «Maʉ̃ ewari mawũã berabarisidera mʉ̃ra krĩcha obasi». Akʉza jarasi: «Mʉ̃ara Jeowa ʉ̃rʉ ĩjã kʼawuasi mʉ̃ yiwidʼbʉdeba akʉza kʼawuasi aukʼara bedʼea zromaba mʉ̃ra krĩcha obi ẽ baita».

⁹ Anelbara jarasi akʉza kʼãrẽba kʼarebasita iyi krĩcha zroma obasidera, iyaʼa jarabʉdata oiba. Iya jarabʉ: «Jeowa organizasionba jarabʉta oiba kʼarebasi mʉra aduʼa bʼaita. Mʉ̃ara ũdusi mʉ̃ra Jeowabara sãwũã kʼarebabʉta, mʉ̃a diasidade nekʼãrẽ Jeowadebemata akʉza mʉ̃a nekʼãrẽ nesidabʉta mebẽrã bioʉba». Akʉza jarasi: «Jeowabara mʉ̃a diasi mʉ̃a widibʉde ʉ̃ta, maʉ̃ba mʉ̃a ĩjãbʉra audre wari wãsi iyi ʉ̃rʉra».

10. ¿Bʉa kʼãrẽta oseabʉ bʉ bedʼea zromara nãgʉ zroma kĩrãkʼabʉbʉrʉ?

¹⁰ ¿Bʉa bedʼea zroma erbʉra nãgʉ zroma kĩrãkʼabʉka? Zʉbʉriade berabaribʉbaibara nekʼãrẽ mitia drʉade berabaribʉba mawũã ẽ bʉrʉ kaya zromaba. Maʉ̃ba krĩcha zroma obʉbaibara akʉza kʼawua ẽ baibara kʼãrẽta oita. Krĩcha zroma obʉmina, iduaribirãra maʉ̃ba Jeowa ʉ̃rʉ ĩjã ẽ baita. Soiduba yiwidʼira iyi kʼawa bʼaita, audre soiduba zarea ĩjãra jẽda krĩchabʉde bʉ Jeowaba  sãwũã kʼareba zebʉrʉta (Sal. 77:11, 12). Bʉa biʼia kʼawua baseabʉ Jeowabara bʉra idubʉka bʼaita.

11. ¿Kʼãrẽa ũrĩnaibara yi nãã edepanʉraba jarabʉra?

¹¹ ¿Akʉza kʼãrẽba kʼarebayi bedʼea zroma awuantaita? Anelba jarada kĩrãkʼa, dayaʼa jarabʉdata ũrĩba. Ĩjã kʼawuara Jeowaba akʉza Jesuba jʉrʉkʉadarata. Edaʉde yi nãã edepanʉrabara jarapanʉ bedʼea daya zareachuta oita, mamina daya ũrĩbʉbʉrʉ Jeowabara nebiata diayi. Dayirãba kʼawuapanʉ Daizeze Bedʼeade jarabʉba akʉza mebẽrã sãwũã berabaribʉdeba daya jaradata ũrĩbʉbara kʼarebaita ẽdrʉita (Éx. 14:1-4; 2 Crón. 20:17). Maʉ̃ra yiza ʉ̃rʉ pikãga krĩchara, mawũã oiba kʼarebayi bʉabida daucha oita, yi nãã edepanʉraba opanʉta idi akʉza ʉ̃ra zeidebida (Heb. 13:17). Mawũẽra pera ẽ baibara bedʼea zroma nãgʉ audre yi zroma kĩrãkʼa uru kʼareara (Prov. 3:25).

12. Lucas 18:1-8 bayeda jarabʉbara, ¿kʼãrẽne abarikabʉta soiduba ĩjãita akʉza awuantaita nekʼãrẽ aripe oda ẽãde?

¹² Jesubara kʼawuabasi ãyi aripe edada ẽãba ũdubita soiduba ĩjãpanʉ kʼawuaita. Ãyi maʉ̃ne kʼarebaita Jesubara nebʉrasi nebʉra jarabʉta Lucas librode. Jesubara nebʉrasi pẽdra abaʉba juez nekʼãrẽ aripe oẽãde widibasita, aripe omarẽã. Iyara kʼawuabasi maʉ̃ badua widibʉra ũrĩbasita iyi bedʼeara. Mawũẽra maʉ̃ juezbara ũrĩsi maʉ̃ bedʼeara. ¿Kʼãrẽta kʼawuapanʉ maʉ̃neba? Jeowabara aripe obʉ. Jesubara jarasi: «¿Kʼõbe Daizezebara kʼareba ẽka izha jʉrʉkuadʼata izhaa bʼia bʼebʉrʉ ewaridʼe, diamase?» (akʉra Lucas 18:1-8). Mawũẽ Jesubara jarasi: «Mawũãmina mʉ Beubari Bape bʼadʼata zebʉrʉdʼera, ¿mawũã soidʼu bʼera ũduika naʉ̃ druadʼera?». Dayirã zʉbʉriabʉde ne aripe oda ẽ kʼarea, kʼarebayi jʉ̃ã kʼawuaiba akʉza pae ẽ baiba, pẽdraba soiduba ĩjãna kĩrãkʼa. Maʉ̃ba kʼarebayi ĩjãita Jeowabara badu ewaride kʼarebaita dayirãra. Akʉza nesidapanʉ ĩjãita dayi yiwidʼibʉdebida kʼarebaita. Edaʉde dayi yiwidʼibʉdera nekʼãrẽ berabaribʉ daya jʉ̃ã ẽã badata.

13. ¿Sãwũã kʼarebasi yiwidʼiba mebẽrãra ãyi mitia edasidade?

¹³ Akʉdayi mebẽã Vero ʉ̃rʉ, iyira República Democrática del Congodebema. Verora iyi kima Jeowa odebʉ ẽ ʉ̃me akʉza iyi kau 15 poagabʉme, wãibarabasi ãyi pʉwʉrʉdeba gorogororaba neida oda ẽ bamarẽã maʉ̃ drʉade. Ãyi ode wãne gorogororaba jidasida ãyira beaita. Vero jẽga totoside, yi kaura aramaʉ̃ta yiwidʼisi nemi jĩgʉa Jeowa trʉ̃ jara. Yiwidʼi berabaridogode gorogorora  nokʼoba widisi: «Wẽrã zake bʉara, ¿kʼaiba yiwidʼi jaradiasi?». Iya panʉsi: «Mʉ papaba jaradiabasi Mateo 6:9-13eda jarabʉdeba». Gorogoro nokʼoraba jarasi: «Kau zake wãra bʉra bʉ yibarirabawara aduʼa, Jeowa juwade wãra».

14. ¿Kʼãrẽba ũdubiseabʉ dayirãba ĩjãbʉta mawũã ẽ bʉrʉ ĩjãbʉ ẽãta akʉza kʼãrẽba kʼarebaseabʉ awuantaita?

¹⁴ Mãwũã berabaribʉba ũdubibʉ yiwidʼira kʼãrẽ ẽ kĩrãkʼa akʉ ẽ baibarata. Mamina, ¿kãrẽta berabaribʉ bʉ yiwidʼibʉde Daizezeba mesera panʉ ẽ bʉrʉ, mawũã ẽ bʉrʉ bʉa akʉbʉde? Pẽdra Jesuba nebʉrada kĩrãkʼa idubʉrãra yiwidʼibʉra, ĩjãbara Jeowabara bʉra idubu ẽ baita akʉza bʉ yiwidʼibʉra iya panʉita. Jeowaʼa badua yiwidʼibara jaure zarea kʼarea (Filip. 4:13). Kĩrãbera Jeowabara aranʉ bʼai nebiata ũdubita akʉza bʉra kĩrãduayi bʉ zʉbʉria berabaridaba. Bʉa bedʼea zroma awuanatabʉba Jeowa kʼarebadeba maʉ̃ba zarea diayi bedʼea zroma ʉ̃ra zeide (1 Ped. 1:6, 7).

15. Mateo 17:19, 20ba jarabʉ kĩrãkʼa, ¿kʼãrẽ bedʼea zromata ũdusida Jesu kʼaidupanʉrabara?

¹⁵ Jesubara iyi kʼaidupanʉrãra jaradiasi ĩjãbʉba kʼarebaita bedʼea zromaneba (akʉra Mateo 17:19, 20). Ãya ewari aba jaure kayiruata ãĩ bʉeda ẽ basi ẽbẽraneba, nããrãra ãĩ bʉesidamina. ¿Saʉ̃basi yi bedʼeara? Jesubara jarasi audre nesidakʉta ĩjãita. Jesubara jaradiasi audre ĩjãbʉba kʼarebaita bedʼea zroma katuma zroma kĩrãkʼabʉdeba ẽdrʉita. Idibida dayirãbara ũduseabʉ bedʼea zroma daya krĩchaseabʉta maʉ̃neba ẽdrʉ ẽ baita.

16. ¿Sãwũa kʼarebabʉrʉ ĩjãiba Geydira, iya awuantaita bedʼea zroma berabaridata akʉza iyi sopʉabʉta?

¹⁶ Akʉra mebẽã Geydi yizata, iyira Guatemaladebema. Iyi kima Edira beasida jẽda uru baside kongregasione ãba yi jʉreba kʼãrãpe. ¿Geydira sãwũã kʼarebabʉ ĩjãiba iya awuantaita maʉ̃ bedʼea zroma berabaridata? Iya jarabʉ: «Mʉ̃ yiwidʼiba kʼarebabʉ mʉ̃ bedʼea zroma Jeowaʼa diaita, maʉ̃ba krĩcha aduʼa babibʉ. Mʉ̃a akʉbʉ Jeowara mʉ̃ ʉ̃rʉ krĩchabʉta mʉ̃ mebẽrãneba akʉza mebẽrã kongregasionebemaraneba. Jeowaita nekʼãrẽ mejãcha obʉba kʼarebabʉ mejãcha sopʉa ẽ baita akʉza kʼarebabʉ bedʼea zroma ewariza zebʉtrʉ ara oita, adewara mejãcha krĩcha oẽ baita nʉ kʼãrẽ berabari kʼarea. Maʉ̃ bedʼea zroma berabaridadeba mʉ̃a ũdubibʉ mʉ̃ra ẽdrʉseabʉta bedʼea zromanebara Jeowa kʼarebadeba, Jesu kʼarebadeba akʉza iyi organizasioneba».

17. ¿Kʼãrẽta oseabʉ bedʼea zroma katuma zroma kĩrãkʼabʉta erpanʉne?

¹⁷ ¿Bʉra mejãcha zʉbʉriabʉka bʉ mebẽrãnebemata beisi baera? Ewari  jʉrʉda audre soiduba ĩjãita beidarãra jẽda piradrʉita. Daizeze Bedʼeade akʉra ẽbẽrarã jẽda piradrʉkʉadara ʉ̃rʉ. ¿Mejãcha krĩcha obʉka bʉ mebẽrãnebemata aba wua Jeowa ʉ̃rʉ Kʼawuabibari ẽ baera? Estudiara akʉita Daizezeba kʼẽãbʉra audre yibiata. Badu bedʼea zroma ũdubʉba maʉ̃ne zarea ora audre soiduba ĩjãita. Bʉ sodebʉta jõma jarada Jeowaʼa akʉza abapai barãra, awuarabʉrʉ mebẽrã kongregasionebemara kʼawa bara (Prov. 18:1). Nekʼãrẽ ora wuabemarabawara, daʉbade oibaramina (Sal. 126:5, 6). Ewariza ãba yi jʉrebara, jaradia wãbara akʉza Daizeze Bedʼeasi akʉra. Akʉza akʉbara Jeowaba ʉ̃ra zeide bʉa nebia diakĩrãbʉta. Bʉa akʉbʉde Jeowaba sãwũã kʼareba wãta, maʉ̃ba audre ĩjã wãñi.

18. Bʉa akʉbʉbʉrʉ audre ĩjãibarata, ¿kʼãrẽta oseabʉ?

¹⁸ Bʉ nãã bedʼea zroma berabaridaba mawũã ẽ bʉrʉ idibemaba ũdubibʉbʉrʉ, kʼãrẽne audre waebʉta audre ĩjãita, maʉ̃ kʼarea paerãra awuarabʉrʉ akʉra maʉ̃ra bedʼea zromaneba bʉara audre ĩjãseabʉta. Jesu kʼaidubemaraba widida kĩrãkʼa widira bʉabida: «Daira kʼarebara audre ĩjãita» (Lucas 17:5). Akʉza pikãga krĩchara yizara bʉa naʉ̃ artikulode akʉda ʉ̃rʉ. Miguel Yuraiʉ̃me oda kĩrãkʼa jẽda krĩchara Jeowaba kʼãrẽaba kʼareba zebʉrʉta. Vero kau yiwidʼida kĩrãkʼa akʉza Anel yiwidʼida kĩrãkʼa bʉsida soiduba yiwidʼira, mamina audre bedʼea zroma berabaribʉde. Adewara kĩrãbera Geydi kʼarebada kĩrãkʼa, Jeowaba kʼarebaseabʉta mebẽrãneba akʉza mebẽrã kongregasioneberaneba. Bʉa idu Jeowaʼa kʼarebabibʉde bedʼea zroma bʉa idi ũdubʉdeba, maʉ̃ba kʼarebayi ĩjãita badu bedʼea zroma ʉ̃ra zebʉrʉde, maʉ̃nebida ẽdrʉita.

19. ¿Kãrẽta kʼawuabasi Jesubara, bʉabida kʼãrẽta ĩjãseabʉ?

¹⁹ Jesubara jarasi iyi kʼaidupanʉrãra kʼãrẽne waebʉta audre ĩjãita, mamina biʼia kʼawuabasi Jeowa kʼarebadeba ẽdrʉdaibasita bedʼea zroma ʉ̃ra zeidebida (Juan 14:1; 16:33). Jesubara biʼia kʼawuabasi ẽbẽrarã mejãchaʉta, ãya ĩjãbʉdeba ẽdrʉdaibasita zʉbʉria zroma urudebara (Apoc. 7:9, 14). ¿Bʉra maʉ̃rane eda bʼaika? Jeowa biadeba mawũãbayi bʉa zarea obʉbʉrʉ audre zarea ĩjãita idi wedaʉba (Heb. 10:39).