1. Ami amkanch kitem vicharunk puro?

FUDDARAK beginuch zauncheo asat teo vostu, zoxem khottea dhormacho nas, Magogachea Gogachem akromonn, ani Armageddonachem zhuz, hea vixim tumi chintʼtat tednam tumkam usko zata kai? Tumi tumkanch vicharunk puro, ‘Heo bhirankull ghoddnneo ghoddttat tednam hanv visvaxi ravtolo kai?’ Osle vichar tumchea monant aileat zalear, hea lekhantlea mukhel versantlean tumkam modot zatoli. Karonn thoim Jezu aplea xisank sangta: ‘Tumchim kallzam ucham boll zaunk dium nakat. . . . Visvas vo bhavarth dovrat.’ (Juanv 14:1) Tor ghott bhavarth dhirvont zaun amcher ietat tea oddchonneancho fuddo korunk amkam modot kortolo mhunn amkam kollon ieta.

2. Ami amcho bhavarth kednam ghott korunk pavtolim, ani hea lekhant ami kitem polloitolim?

² Aiz amcher oddchonneo ietat tednam ami tancho koso fuddo kortat tem ami chintlem zalear, fuddarak ietat tea oddchonneancho fuddo korunk ami kitem korunk zai vo amcho bhavarth ami khoim ghott korunk zai tem amkam kollon ietolem. Karonn dor ek pavtti amchi porikxa zata tednam amcho bhavarth ghott zaunk pavta. Ani hea vorvim, amcher ietat tea oddchonneancho fuddo korunk amkam modot zata. Tor hea lekhant, Jezuchea xisamnim khoinchea char poristhitinim anik bhavarth dakhounk zai aslo tem ami polloitolim. Toxench, amcher aiz kosleo oddchonneo ieunk xoktat ani fuddara pasot teo amkam koxeo toiar korunk xoktat tem-ui ami polloitolim.

3. Matev 6:30, 33-ant, Jezun bhavartha vixim kitem sanglem?

³ Ek familicho vhoddil aplea familik gorjecheo vostu, zoxem jevonn, kopdde, ani ravpak ek suvat diunk axeta. Punn hea  kotthin vellar, oxem korop sompem na. Karonn zaitea amchea bhav-bhoinnanchim kamam geleant. Ani zaito proitn korun pasun tankam dusrem kam mellona. Toxench, thoddea bhav-bhoinnamnim, Kristanvamnim korunk zainant toslim kamam nakarleant. Tor hea soglea poristhitincho fuddo korunk, Jehova aplea familik goroz tem soglem ditolo mhunn bhavarth asop gorjecho. Ani hea vixim Jezun aplea xisank Dongra Voilo Updes ditana sanglem. (Matev 6:30, 33 vachat.) Tor, Jehova amkam kednanch sanddchona mhunn amkam purnn khatri asa zalear Devachea Rajeak ami amchea jivitant poilo zago diunk pavtolim. Ani Jehova amcheo gorjecheo vostu mellonk amkam modot korta tem ami polloitat tednam tachea lagim asloli amchi ixttagot ani amcho bhavarth ghott zatolo.

4-5. Ek familik tancheo gorjecheo vostu mellchea vixim usko zalo tednam tankam koxi modot zali?

⁴ Hea vixim ami Venezuela-ant ravpi bhav Miguel Castro-chea familichem udharonn polloum-ia. Tancho ek lhan zago aslo zoim tim ravtalim ani xet roitalim. Punn ek dis thodde dadle hotʼtear gheun aile ani tannim tanchea sangata dadagiri korun tankam thoinchim dhanvddailim. Atam tim aplem pott bhorunk kitem kortat tea vixim bhav Miguel sangta: “Atam ami ek zago bhaddeak ghetla zoim ami ravtat ani thoinch ami xet roitat. Ani dor disak amcheo gorzo purnn kor mhunn hanv Jehova lagim magtam.” Hea familik khub uske ani oddchonneo asat. Tori astana, Jehova tancheo gorzo purnn kortolo mhunn tacher bhavarth dovrun tim sodanch mittingek hajir zatat ani porgottnnent bhag ghetat. Hea toren tim Jehovachi seva poilea zagear dovortat ani Jehova tankam goroz tem soglem dita.

⁵ Hea kotthin vellar pasun, Jehovan tankam koxi modot kelea tacher bhav Miguel ani tachi bail, Yurai-an dhean dilem. Jehovan bhav-bhoinnank uzar korun tancheo gorjecheo vostu tankam dileo vo bhav Miguel-ak kam sodhunk modot keli. Toxench, kotthin poristhitint gorjecheo vostu mellonk xakha ofisan pasun tankam modot keli. Tor Jehovan tankam kednanch sanddunk nant, hem tannim polloilem tednam tanchea familicho bhavarth anikui ghott zalo. Jehovan tankam umkech toren koxi modot keli hea vixim sangtana, tachi vhoddli dhuv, Yoselin-an mhunnttlem: “Jehova amkam koxe toren modot korta tem ami polloitat tednam amchem kalliz bhoron ieta. To mhozo ek ixtt zaunk asa, ani to sodanch mhaka modot kortolo mhunn mhaka khatri asa.” Toxench, tem fuddem mhunntta: “Amchea familin fuddo kela tea trasamnim, fuddarak ieunche asat tea trasam pasot amkam toiar keleant.”

6. Tumkam poixeanchem unnemponn asta tednam tumi tumcho bhavarth koso ghott korunk zata?

⁶ Poixeanchea unnemponnak lagon tumkam tumcheo gorjecheo vostu mellonk kotthin zata zalear ho vell Jehovacher tumcho bhavarth ghott korunk uzar korat. Hem korunk Jehova Deva lagim magnnem korat. Matev 6:25-34-ant, Jezun sanglolim utram vachat ani tancher niall korat. Toxench, Jehovachi seva aplea jivitant poilea zagear dovortat, tancheo gorzo Jehova koso purnn korta tea bhav-bhoinnam vixim chintat. (1 Kor. 15:58) Oxem kelolean, tankam modot keli toxi Jehova tumkam-i modot kortolo  mhunn tumchi khatri vaddttoli. Karonn tumkam kiteachi goroz asa ani tem tumkam koxem diunchem tem Jehova ekdom bore bhaxen zannam. Ani Jehova tumkam koso modot korta tem tumi polloitolim tednam, tumcho bhavarth ghott zatolo ani fuddarak anikui vhoddlea trasancho tumi fuddo korunk pavtolim.​—Hab. 3:17, 18.

7. Matev 8:23-26-ant sanglolea pormonnem, ek vhodd vadoll ailem tednam Jezuchea xisanchea bhavarthachi porikxa koxi zali?

⁷ Ek dis Jezu ani tache xis vhoddeant asle tednam doriant ek vhoddlem vadoll zalem. (Matev 8:23-26 vachat.) Udok tanchea vhoddeant bhitor soron tanchem vhoddem buddonk laglem. Jezu tea vellar nhidlolo aslo. Jezuche xis tem vadoll polloun samke bhiele ani Jezu lagim vochon tachi modot magli. Tednam Jezun utton mhunnttlem: “Tumi itle bhezudd kiteak? Itlo holko tumcho bhavarth?” Jezun oxem kiteak mhunnttlem? Karonn tachea xisank ghott bhavarth aslo zalear tankam hi khatri asonk zai asli ki Jehova, Jezuk ani tachea sangata asloleank rakhunk xokta. Tor hea ghoddnne thaun ami kitem xiktat? Odruxttak lagon amkam eka vadollacho vo tufanacho fuddo korunk poddtta tednam vo vadolla sarkeo oddchonneo amchea jivitant ietat tednam, ghott bhavarth asa zalear ami tancho fuddo korunk pavtolim.

8-9. Anel-achea bhavarthachi porikxa koxi zali, ani te porikxecho fuddo korunk taka koxi modot zali?

⁸ Osloch bhavarth, Puerto Rico desant ravtolea Anel nanvache eke ankvar bhoinnin dakhoilo. 2017-nt, Hurricane Maria-k lagon tichem ghor moddon gelem. Ani tinnem aplem kamui hogddailem. “Hea kotthin vellar, mhaka khub usko zatalo. Punn magnnem korun hanv Jehovacher visvas dovrunk xiklem. Ani uskeank lagon, Jehovachea sevent hanvem korunk zai tem korunk hanv fatti soronk na.”

⁹ Tea bhair, Jehovachea utrak pallo dilolean aplea oddchonneancho fuddo korunk apleak modot zali mhunn Anel sangta. Tem mhunntta, “Songotton dita tem margdorxon pallʼllolean mhaka monachi xanti mellʼlli. Toxench, Jehova bhav-bhoinnam udexim mhaka urba dita ani gorjecheo vostu mhaka pavoita mhunn mhaka kollon ailem.” Tem fuddem mhunntta, “Hanvem maglolem tachea poros chodd Jehovan mhaka dilem. Ani hea vorvim mhozo bhavarth anikui ghott zaunk pavlo.”

10. Tumkam tumchea jivitant ek vhodd oddchonnecho fuddo korunk poddtta tednam tumi kitem korunk zata?

¹⁰ Tumi tumchea jivitant ek vhodd oddchonnecho fuddo kortat zait. Tem ghoddie ek odruxtt, ek duens, vo anik kosli-i oddchonn zaunk xokta. Tea vellar, uskeun Jehovacher tumchi patienni unni zaunk diunchea bodlek, kallzantlean Jehova lagim magnnem korat, tacher visvas dovrat ani tannem tumkam adim koxi modot kelea tacher niall korat. (St. 77:11, 12) Oxem kelolean tumcho bhavarth ghott zatolo ani Jehova tumkam kednanch sanddchona mhunn tumchi khatri vaddttoli.

11. Fuddakar ghetoleam thaun ieta tem margdorxon pallunk ami amcho nichov kiteak ghott korunk zai?

 ¹¹ Amcher ietat tea oddchonneacho fuddo korunk ami anik kitem korunk zai? Anel-a bhaxen, ami Jehovachea Utrak pallo divop gorjechem. Punn oxem korunk amkam thodde pavtti kotthin zaunk puro, karonn fuddakar ghetoleam thaun amkam margdorxon melltta tednam tem ghoddie sarkem na, oxem amkam disot. Tor hea vellar, ami Jehova ani Jezu visvas dovortat tancher visvas dovrunk xikonk zai. Ani Jehova aplem Utor pallttoleank besanv dita, toxench, tachem Utor pallʼllolean amcho jiv salvar zata hem amkam tachea Utrantlean ani tachea visvaxi sevokanchea onubhovantlean pasun kollon ieta. (Sutt. 14:1-4; 2 It. 20:17) Tor tancher niall korat. Oxem tumi kortat tednam, atam toxench fuddarak Jehovachea songottnne thaun ieta tem margdorxon pallunk tumcho nichov tumi ghott korunk pavtolim. (Heb. 13:17) Ani hea vorvim, beginuch ieuncho asa tea vhodd sontapak tumkam bhieunchi kainch goroz aschina.​—Mho. 3:25.

12. Bhavarth asop ani onʼneai sosop, hanchea modem kitem sombond asa mhunn Lukas 18:1-8 amkam dakhoun dita?

¹² Aplea xisank onʼneai sosunk poddttolo ani tea vellar tanchea bhavarthachi porikxa zatoli mhunn Jezu zannam aslo. Ani hea pasot, tankam modot korunk Jezun ek vidvechi vopar sangli ji amkam Lukas pustokant vachunk melltta. Hi vidva ek dev-bhirant naslolea nitidara kodden neai magot ravli, karonn ek-na-ek dis to apleak modot kortoloch mhunn tika khatri asli. Ani toxench zalem. Tor hantuntlean ami kitem xiktat? Jehova tea nitidara bhaxen nhoi. Punn to ek neai korpi Dev zaun asa. Ani heach pasot Jezun mhunnttlem: “Tor Dev Apnnak dis-rat ulo martolea Aplea vinchloleank sonsnnikaien kan diuncho na ani tancho neai korun tankam nivarcho na?” (Lukas 18:1-8 vachat.) Jezun fuddem oxem-i mhunnttlem: “Toripunn Monxacho Put ietolo tednam, Taka sonvsarant bhavarth melltolo kai?” Jezu hanga tea vidve sarkea bhavartha vixim uloitalo. Tor amcher onʼneai zata tednam ami pasiensan soslem zalear, tea vidve bhaxen amkam ghott bhavarth asa mhunn ami dakhoun ditat. Ani oslo bhavarth amkam asa zalear, aiz na faleam, ami chintunk na tea ritin Jehova amchea magnneancho zobab ditolo mhunn ami khatri dovortolim. Karonn magnneak khub xokti asa mhunn ami ugddas dovortat.

13. Ek familik onʼneai zalo tednam magnnem kelolean tankam koxi modot zali?

¹³ Magnneak kitli xokti asa tem amkam hea ghoddnne thaun kollon ieta. Vero ani tachi famil Democratic Republic of Congo-nt ravtat. Ek pavtti tim ravtalim tea ganvacher, soinikamnim holʼlo kelo. Hea pasot tika, apli 15 vorsanchi dhuv ani sotant naslolea ghova sangata pollon voichem poddlem. Punn pollon voitana, vatter soinikamnim tankam addailim ani jivexim marchi dhomki dili. Tem aikon Vero roddonk lagli. Tednam tika xant korunk tichi dhuv zaitea pavtti Jehovachem nanv gheun vhoddlean magnnem korunk lagli. Magnnea uprant soinikanchea  mukhelean tea dhuvek mhunnttlem, “Cheddva, tuka magnnem korunk konnem xikoilem?” Tannem mhunntlem, “Mhojea mummy-n. Matev 6:9-13-ant Jezun xikoilem toxem tinnem mhaka xikoilam.” Tednam tea mukhelean mhunnttlem, “Cheddva, tujea avoi-bapai sangata ghora voch, ani tuzo Dev Jehova tuka rakhum!”

14. Amchea bhavarthachi porikxa kednam zaunk xokta, ani tednam ami kitem korunk zai?

¹⁴ Khorench, magnnem korop kitlem gorjechem zaun asa. Punn thoddea pavtti amchea magnneak rokddoch vo ojapachea ritin zobab mellona. Tednam tumi kitem korunk zata? Jezun aplea voparint sanglolea vidvechi dekh gheun Jehova lagim magnnem korit ravat. Ani aiz na faleam, to tumkam khoinchea-na-khoinchea toren zobab ditoloch mhunn khatri dovrat. Tor Jehovachea povitr xokte pasot magop kednanch soddun dium nakat. (Filp. 4:13) Beginuch, Jehova amkam itlea besanvamnim bhortolo ki amcher zala tea onʼneai-acho amkam ugddas pasun ascho na, hem monant dovrat. Hea toren, Jehovachi modot gheun tumcher ietat tea oddchonneancho tumi fuddo kortat tednam fuddarak ieuncheo asat tea oddchonneank pasun tumi tondd diunk pavtolim.​—1 Ped. 1:6, 7.

15. Matev 17:19, 20-ant sanglolea pormonnem, Jezuchea xisank kosle oddchonnecho fuddo korcho poddlo?

¹⁵ Jezuchea xisamnim zaite pavtti devchar kaddlole. Punn ek pavtt, tanchea lagim koxech bhaxen devchar kaddunk zaina zalem. Oxem zaunk kitem karonn aslem? Jezun tankam sanglem ki to devchar kaddunk tankam anik chodd bhavarthachi goroz asli. Tannem fuddem sanglem ki tancho bhavarth ghott asa zalear te dongra itleo vhodd oddchonneo pasun kuxin kaddunk xoktole. (Matev 17:19, 20 vachat.) Hoi, aiz amcher ietat teo oddchonneo pasun amkam dongra bhaxen vhodd disonk puro. Punn amcho bhavarth ghott asa zalear ami hea oddchonneancho fuddo korunk pavtolim.

16. Geydi-chea ghovacho khun zalo tednam tem dukh sosunk, tichea bhavarthak lagon tika koxi modot zali?

¹⁶ Hea vixim, Guatemala-nt ravtolea bhoinn Geydi-chem udharonn polloum-ia. Ti ani ticho ghov, Edi, sobhechea mittinge thaun porot ghora ietalim tednam tichea ghovacho khun zalo. Hem itlem vhodd dukh sosunk bhavarth aslolean Geydi-k koxi modot zali? Ti mhunntta: “Magnnem kelolean mhozo soglo bhar Jehovacher ghalunk ani xanti mellonk mhaka modot zali. Toxench, mhoji famil ani sobhentlea ixttam udexim Jehova mhoji kallji koxi gheta tem mhaka dison ailem. Jehovachea sevent mhozo chodd vell ghatlolean mhojem dukh sosunk ani faleanchea disa vixim chodd usko korina zaunk mhaka modot zali. Tor fuddarak mhaka kosli-i porikxa ieum, Jehova, Jezu, ani tachea songottnnechea modotin hanv thir ravonk xoktoli mhunn hea ghoddnnentlean hanv xikli.”

17. Kitli-i vhoddli oddchonn ailear pasun ami kitem korunk zata?

¹⁷ Tumkam kosli-i oddchonn aslear pasun, Jehovacher tumcho bhavarth ghott korunk ti ek sondhi mhunn polloiat. Udharonnak,  tumcho mogacho konnui mornnant sanddla zalear, punorjivontponnachea bhorvonxeacher tumcho bhavarth ghott korunk vell kaddat. Melʼleantlim punorjivont zalʼlim, toslea Bible-achea udharonnancher niall korat. Toxench, tumchea familintlea konnakui sobhentlean bhair kaddla zalear, Jehovachi xist sodanch sarki asta mhunn obheas korun khatri korun gheiat. Tea bhair, tumi anik kitem korunk zata? Jehova lagim kallzantlean magnnem korat. Eksurim ravchea bodlek, bhav-bhoinnam sangata vell sarat. (Mho. 18:1) Tumkam roddonk ieta zalear pasun, tumkam sosunk modot korta toslea kamamnim bhag gheiat. (St. 126:5, 6) Chukonastana mittingek hajir zaiat, porgottnnent bhag gheiat, ani sodanch Bible vachat. Fuddarak Jehovan dovorlolea besanvancher niall korat. Hea toren, Jehova tumkam modot korta mhunn tumi polloitat tednam tacher tumcho bhavarth anikui ghott zaunk pavtolo.

18. Tumcho bhavarth titlo ghott na oxem tumkam dista zalear tumi kitem korunk zata?

¹⁸ Tumi eke oddchonnecho fuddo kela vo kortat astolim. Ani tednam tumcho bhavarth unno zala mhunn tumkam kollʼllem astolem. Tednam tumi kitem kortolim? Nirax zaunchea bodlek, tumcho bhavarth vaddounk hi ek sondhi mhunn ugddas dovrat. Jezuchea xisam bhaxen oxem magat: “Amcho bhavarth vaddoi.” (Lukas 17:5) Toxench, ami hea lekhant polloilʼlea udharonnancher tumi niall korunk zata. Zoxem, Miguel ani Yurai-a bhaxen Jehovan tumkam koxi modot kelea tacher niall korat. Vero-chi dhuv ani Anel-a bhaxen, tumkam vhodd oddchonneancho fuddo korunk poddtta tednam Jehovak magnnem korit ravat. Ani ami Geydi thaun xiklim toxem, Jehova amchi famil ani ixttank uzar korun amkam modot korunk xokta mhunn ugddas dovrat. Hea toren, tumi tumchea oddchonneancho fuddo kortat tednam, fuddarak ieuncheo asat tea oddchonneancho pasun tumi fuddo korunk xoktat mhunn tumkam asloli khatri anik ghott zatoli.

19. Jezuk kosli khatri asli, ani ami kitem khatri dovrunk zata?

¹⁹ Jezuchea xisamnim tancho bhavarth khoim ghott korunk zai aslo tem somzonk Jezun tankam modot keli. Punn fuddarak ieuncheo asat tea oddchonneancho te fuddo korun zoit vhortole mhunn Jezuk khatri asli. (Juanv 14:1; 16:33) Zoxem, vhodd sontapa vellar ek vhodd urponz salvar zatoli mhunn Jezuk khatri asli. (Prok. 7:9, 14) Tor hea urponjecho vo zomeacho bhag zaunk, amkam melltta ti sondhi uzar korun ami amcho bhavarth vaddoum-ia ani ghott korum-ia!​—Heb. 10:39.