1. ¿Mbaʼépa ikatu ñandepyʼapy?

KOʼẼRÕITÉMA ningo oñehundíta umi rrelihión japu, oñemoĩta ñanderehe Gog de Magog ha oñepyrũta pe gérra de Armagedón. ¿Ejepyʼapýpa repensávo koʼã mbaʼére? Ikatu oime eñeporandu: “Oiko vove koʼã mbaʼe, ¿ikatútapa aaguanta ha chefiél Jehovápe?”. Oiméramo epensa koʼã mbaʼére tuichaiterei nepytyvõta la Jesús heʼi vaʼekue Juan 14:1-pe. Péva voi hína pe téxto omopyendáva ko artíkulo. Jesús heʼi vaʼekue: “Ani pejepyʼapyeterei, pehechauka pejeroviaha”. Jajerovia mbaretéramo, ñandepyʼaguasúta ñambohovái hag̃ua umi mbaʼe oikótava hína.

2. a) ¿Mbaʼéichapa ikatu ñamombarete ñande jerovia? b) ¿Mbaʼépa jahecháta ko artíkulope?

² ¿Mbaʼéichapa ikatu ñamombarete ñande jerovia? Ñapensakuaa mbaʼe mbaʼépa jajapo raʼe oñepresentárõ guare ñandéve peteĩ pruéva. Péicha jajapóramo jahechakuaáta mbaʼépepa ñanekangy ha mbaʼépepa ikatu ñamehorave. Káda pruéva jahasáva ningo ñanemombareteve, ha upéva ñanepytyvõta hína ñaaguanta hag̃ua umi mbaʼe oútava. Ko artíkulope jahecháta 4 mbaʼe ohasa vaʼekue Jesús disipulokuéra ohechaukáva haʼekuéra tekotevẽ hague ojeroviave. Jahecháta avei mbaʼéichapa ñande ikatu jahasa hína koʼág̃a umi mbaʼe ohasa vaʼekue hikuái. Koʼã mbaʼe ñandepreparátama amo gotyove g̃uarã.

3. ¿Mbaʼéichapa Mateo 6:30, 33 heʼíva ohechauka tekotevẽha jajerovia?

³ Peteĩ túa ningo omeʼẽsétante voi hembireko ha ifamiliakuérape umi mbaʼe oikotevẽva. Péro koʼã tiémpope ijetuʼu jajapo hag̃ua upéva. Sapyʼánte oĩ voi ermáno operdéva itraváho ha ni oñehaʼãvéramo nokonsegíri ótro. Oĩ avei umi oheja vaʼekue peteĩ  traváho peteĩ kristiáno ndaikatúiva oreko. Tahaʼe haʼeháicha, tekotevẽ jajerovia mbarete Jehová ñanepytyvõtaha ñamantene hag̃ua ñane famíliape. Jesús heʼi vaʼekue upéva pe Sermón del Móntepe (elee Mateo 6:30, 33). Ñaĩramo segúro Jehová nañanderejamoʼãiha, ikatúta ñamotenonde Irréino. Jahechávo mbaʼéichapa Jehová ñanepytyvõ ñaikotevẽ jave, jagueroviavétantema haʼe oexistiha ha jajerovia mbaretevéta hese.

4, 5. ¿Mbaʼépa oipytyvõ raʼe peteĩ famíliape ani hag̃ua ojepyʼapyeterei hemikotevẽre?

⁴ Jahechamína koʼág̃a peteĩ família Venezuelagua káso. Haʼekuéra ohechakuaa kuri mbaʼéichapa Jehová oipytyvõ chupekuéra oikotevẽtereírõ guare. Ko família oreko kuri peteĩ granhaʼi ha upéva oipytyvõ chupekuéra oñemantene hag̃ua. Péro peteĩ día unos kuánto kuimbaʼe árma ipópe ou omosẽmba chupekuéra ha ojagarra chuguikuéra la ijyvy. Pe ermáno hérava Miguel heʼi: “Koʼág̃a ningo roreko peteĩ terrenoʼi ojepuruka vaʼekue oréve ha rodependete upévare roreko hag̃ua la roʼu vaʼerã. Káda día che ajerure Jehovápe omeʼẽ hag̃ua oréve la roikotevẽtava upe díape”. Ijetuʼu la situasión ko famíliandi péro haʼekuéra ojerovia mbarete Jehová omeʼẽtaha chupekuéra la oikotevẽva. Upévare haʼekuéra ndofaltái rreunionhápe ni predikasiónpe. Haʼekuéra omotenonde pe Rréino ha Jehová nombofaltái chupekuéra mbaʼevete.

⁵ Ko situasión ijetuʼuetévape Miguel ha hembireko Yurai oñehaʼã opilla mbaʼéichapa Jehová okuida hesekuéra. Sapyʼánte Jehová ojevale vaʼekue ermanokuérare omeʼẽ hag̃ua chupekuéra la oikotevẽva ha avei Miguel otopa hag̃ua itravahorã. Ha sapyʼánte Jehová ojevale pe Komite de Sokórrore omeʼẽ hag̃ua chupekuéra la oikotevẽmíva. Jehová núnka ndohejareíri ko famíliape, upéicha rupi haʼekuéra ojerovia mbareteve koʼág̃a Jehováre. Peteĩ vuéltape Miguel rajy tuichavéva hérava Yoselin, omombeʼu hína kuri mbaʼéichapa Jehová oipytyvõ chupekuéra ha upéi heʼi: “Opokoiterei ningo cherehe ahechávo mbaʼeichaitépa Jehová orepytyvõ, che apensa voi Jehová haʼeha peteĩ amígo siémpre oĩtava chepytyvõ hag̃ua”. Ha heʼi avei: “Umi mbaʼe rohasa vaʼekue che famíliandi orepreparáma hína amo gotyove g̃uarã”.

6. ¿Mbaʼéichapa ikatu emombarete nde jerovia hendy jave nendive?

⁶ ¿Ha mbaʼetekópa hína nendive la situasión? ¿Hendýpa hína? Oimérõ upéicha, reaprovecha vaʼerã upe situasión emombarete hag̃ua nde jerovia. Eñemboʼékena ha ejepyʼamongeta la Jesús heʼi vaʼekuére Mateo 6:25-34-pe. Ejepyʼamongetákena avei ótro ermáno experiénsiare, ohechaukáva Jehová nombofaltaiha mbaʼevete umi ombaʼapo jejopývape chupe g̃uarã (1 Cor. 15:58). Péicha rejapóramo reĩta segúro Jehová nepytyvõtaha, oipytyvõ haguéicha avei umi ótro ermánope. Jehová ningo oikuaa porã mbaʼépa reikotevẽ ha oikuaa avei mbaʼéichapa omog̃uahẽta ndéve. Rehechávo mbaʼéichapa Jehová  nepytyvõ, tuicha rejeroviavéta hese, ha upéva nepytyvõta reaguanta hag̃ua umi situasión ijetuʼuvéva oútava hína (Hab. 3:17, 18).

7. Según Mateo 8:23-26, ¿mbaʼéichapa pe torménta vai ohechauka raʼe Jesús disipulokuéra ojeroviaʼiha?

⁷ Peteĩ jey Jesús ha idisipulokuéra oviaha peteĩ varkoʼípe, ha upéi derrepentete ojagarra chupekuéra peteĩ torménta vai pe márpe. Upérõ Jesús oaprovecha la oikóva omboʼe hag̃ua idisipulokuérape tekotevẽha ojeroviave (elee Mateo 8:23-26). Pe torménta ivaieterei kuri ha la y oikepa pe varkoʼípe, péro Jesús trankiloite oke hína kuri. Upéi idisipulokuéra okyhyje vaipáma ha omombáy Jesúspe osalvami hag̃ua chupekuéra. Péro haʼe heʼi: “¿Mbaʼére piko pekyhyje ha pejeroviaʼiete?”. Umi disípulongo ojerovia vaʼerã kuri Jehová oprotehetaha Jesúspe ha umi oĩvape hendive, upévare natekotevẽi kuri okyhyje hikuái. ¿Ha mbaʼépa ñande ikatu ñaaprende? Jajerovia mbaretéramo, ikatúta ñaaguanta oimehaichagua provléma ñandeahoʼipáramo jepe peteĩ “torménta vaícha”.

8, 9. ¿Mbaʼe ijetuʼúvapa ohasa raʼe Anel, ha mbaʼépa oipytyvõ chupe?

⁸ Jahechamína koʼág̃a mbaʼépa ohasa raʼe peteĩ ermána soltéra Puerto Ricogua hérava Anel. Haʼe oaguanta kuri peteĩ situasión ijetuʼúva ojerovia mbarete rupi. Chupe ojagarra avei kuri peteĩ torménta ivaietereíva. Áño 2017-pe, pe urakán María desástre ojapo Puerto Rícope ha upérõ Anel operde hóga ha itraváho. Haʼe heʼi: “Upérõ guare ajepyʼapyeterei kuri, péro ndahejái upéva chereityete, upéva rangue ajerovia mbarete Jehováre ha añemboʼe meme chupe”.

⁹ Anel heʼi avei oaguanta hague umi provléma ijetuʼúva pórke iñeʼẽrendu. Haʼe heʼi: “Che ajapopaite la heʼíva Jehová organisasión ha upéva chepytyvõ aĩ hag̃ua trankíla. Che ahechakuaa Jehová ojevale hague umi ermánore chemokyreʼỹ hag̃ua ha omeʼẽ hag̃ua chéve la aikotevẽva”. Ha upéi heʼi avei: “Jehovángo ipojeraiterei chendive. Omeʼẽ rasapa voi chéve ha upéva tuicha omombarete che jerovia”.

10. ¿Mbaʼépa ikatu rejapo ndejagarráramo peteĩ torménta vai?

¹⁰ ¿Ha mbaʼetekópa nde? ¿Ndejagarrámapa raʼe avei peteĩ torménta vai? Upéicha jave ikatu hína ijetuʼu. Ha oimérõ nandejagarrái peteĩ torménta, ikatu oime la ne provléma la ojoguáva la torméntape, pórke ndeahoʼipa ha ndereikuaái mbaʼépa rejapóta esẽ hag̃ua chugui. Por ehémplo, ikatu oime nderasy vai, ha upévare a vése ikatu ejepyʼapyeterei ha nderesaráima Jehovágui. Péro aníkena eheja upéva oiko nderehe, lomímontekena ejerovia Jehováre. Eñemboʼékena avei chupe ha emombarete nde jerovia. Upearã ikatu epensa mbaʼéichapa Jehová nepytyvõma vaʼekue voi anteve (Sal. 77:11, 12). Nde ikatu reĩ segúro Jehová núnka nanderejamoʼãiha, ni koʼág̃a ni amo gotyove.

11. ¿Mbaʼérepa iporã ñaneñeʼẽrendu umi ñandegiávape?

 ¹¹ ¿Mbaʼépa ikatu avei nepytyvõ rembohovái hag̃ua umi provléma? Anel heʼi haguéicha, ñaneñeʼẽrendu vaʼerã. Sapyʼánteko nañantendeporãi mbaʼérepa Jehová organisasión heʼi ñandéve jajapo hag̃ua peteĩ mbaʼe. Péro ñande ñaneñeʼẽrendúnte vaʼerã umi ñandegiávape, pórke Jehová ha Jesús ojerovia hesekuéra, ha ñande upéicha vaʼerã avei. Jehová ovendesi umi iñeʼẽrendúvape, ha Ñandejára Ñeʼẽ ohechauka voi umi isiervokuéra yma guare ojesalva hague pórke iñeʼẽrendu chupe (Éx. 14:1-4; 2 Crón. 20:17). Ejepyʼamongetákena koʼã rrelátore, péicha nekyreʼỹvéta neñeʼẽrendu hag̃ua Jehová organisasiónpe koʼág̃ama voi ha avei amo gotyove (Heb. 13:17). Péicha ejapóramo ndaipóri ekyhyje hag̃ua, ni umi torménta ivaivéva oútavagui hína (Prov. 3:25).

12. Según Lucas 18:1-8, ¿mbaʼéichapa jajeroviáramo ñaaguantáta umi inhustísia?

¹² Jesús oikuaa vaʼekue idisipulokuérape ikatuha ijetuʼu ombohovái hag̃ua umi inhustísia. Ha oipytyvõ hag̃ua chupekuéra omombeʼu kuri peteĩ ehémplo, ha upéva jatopa lívro de Lúcaspe. Upe ehémplope Jesús oñeʼẽ peteĩ viúda ojerure asývare peteĩ huéspe ojapo hag̃ua chupe hustísia. Pe viúda manterei oho pe hués rógape, upévare haʼe oĩ kuri segúra algún día oñemeʼẽtaha chupe la oipotáva, ha upeichaite oiko kuri. ¿Mbaʼépa ñaaprende? Jehovángo naiñinhústoi, upévare Jesús heʼi: “¿Ha mbaʼégui piko upéicharõ Ñandejára noipytyvõmoʼãi umi haʼe oiporavo vaʼekuépe, ojerure asýva chupe hustísia ára ha pyhare?” (elee Lucas 18:1-8). Upéi Jesús heʼive: “Og̃uahẽ vove pe Yvypóra Raʼy, ¿otopáta ko yvy ape ári hénte peichaite peve ojeroviáva?”. Jahasáramo peteĩ inhustísia, jahechauka vaʼerã jajoguaha pe viúdape. Haʼe ipasiénsia vaʼekue ha noñentregái. Péicha jajeroviáramo, ñaĩta segúro Jehová ñanepytyvõtaha ha ojapotaha upéva itiempoitépe. Ha siémpre jareko vaʼerã enkuénta pe ñemboʼe iñimportantetereiha. Jehová ikatu voi orresponde hína ñandéve ñahaʼarõʼỹveháicha.

13. ¿Mbaʼéichapa pe ñemboʼe oipytyvõ peteĩ família ohasa vaʼekuépe inhustísia?

¹³ Jahechamína koʼág̃a mbaʼépa ohasa vaʼekue peteĩ ermána hérava Vero. Haʼe oiko República Democrática del Cóngope. Peteĩ día unos kuánto militár ou oataka pe lugár haʼe oikoha. Upévare Vero, iména ndahaʼéiva Testígo, ha imembykuña de 15 áño osẽmante la hógagui. Ohokuévo hikuái, otopa umi militár ombotypaha la tape. Umi militár ojoko chupekuéra, ha oamenasa voi ojukataha chupekuéra. Upépe Vero oñepyrũ hasẽ, ha imemby otrankilisa hag̃ua chupe oñepyrũ oñemboʼe en vos álta. Ha pe oñemboʼekuévo oipuru heta vése Jehová réra. Upéi oñemboʼepávo, peteĩva umi militár oporandu chupe: “Nde mitãkuña, ¿mávaiko nemboʼe eñemboʼe hag̃ua?”. Ha haʼe heʼi chupe: “Che sy chemboʼe, ha oipuru la heʼíva Mateo  6:9-13”. Upépe pe militár heʼi chupe: “Nde ha nde tuakuéra pehokuaántema, ¡ha Jehová pende Jára tapendeprotehe!”.

14. ¿Mbaʼe ijetuʼúvapa ikatu hína jahasa, ha mbaʼépa ñanepytyvõta ñaaguanta hag̃ua?

¹⁴ Pe ñemboʼe ningo tuichaiterei mbaʼe, ha ko experiénsia ohechauka porã upéva. Péro Jehová ndahaʼéi siémpre pyaʼe porã orrespondétava ñane ñemboʼe, ni ojapótava peteĩ mbaʼe ñanesorprendéva. ¿Mbaʼépa ikatu rejapo péicha jave? Ejogua vaʼerã pe viúdape, ha ani nekaneʼõ ejerure hag̃ua Jehovápe la reipotáva. Haʼéngo nanderejareimoʼãi, ani reduda. Haʼe itiempoitépe orrespondéta ndéve ne ñemboʼe. Esegíkena ejerure chupe ijespíritu sánto (Filip. 4:13). Koʼẽrõite ningo Jehová tuichaiterei nevendesíta, ha ni nanemanduʼamoʼãvéima umi mbaʼe vaiete rehasa vaʼekuére. Koʼág̃ama voi reaguantárõ umi mbaʼe ijetuʼúva Jehová nepytyvõ rupi, péva tuicha nemombaretéta reaguanta hag̃ua umi mbaʼe oútava (1 Ped. 1:6, 7).

15. Según Mateo 17:19, 20, ¿mbaʼépa ndaikatúi raʼe ojapo Jesús disipulokuéra?

¹⁵ Jesús heʼi vaʼekue idisipulokuérape ojeroviáramo hikuái, oaguantataha oimehaichagua provléma (elee Mateo 17:19, 20). Peteĩ jey Jesús disipulokuéra ndaikatúi omosẽ peteĩ demónio, hiʼarive haʼekuéra ojapóma vaʼekue upéva heta vése. ¿Mbaʼépa raʼe la provléma? Jesús heʼi chupekuéra ojeroviaʼieterei hague hikuái. Ha upéi heʼi chupekuéra ojeroviavéramo ikatutaha ogueropuʼaka umi provléma tuichaicháva, ojoguáva voi montáñape. Ha koʼág̃arupi, oñepresentánte jepi avei ñandéve umi provléma tuichaitereíva.

16. ¿Mbaʼéichapa Geydi ogueropuʼaka iprovléma ojerovia rupi?

¹⁶ Jahechamína koʼág̃a mbaʼépa ohasa peteĩ ermána hérava Geydi, oikóva Guatemálape. Iménape ningo ojejuka vaʼekue oukuévo hína hikuái rreunionhágui. ¿Mbaʼépa oipytyvõ Géydipe oaguanta hag̃ua imbaʼembyasy? Haʼe heʼi: “Pe ñemboʼe rupive, amoĩmbaite Jehová pópe umi mbaʼe chepyʼapýva, ha upéva tuicha chembopyʼaguapy. Ahechakuaa Jehová oñangareko hague cherehe, ojevalévo che famíliare ha che amigokuérare oĩva kongregasiónpe. Tuicha avei chemoñeñandu porãve ajapóvo heta mbaʼe Jehovápe g̃uarã. Upéva chepytyvõ avei ani hag̃ua ajepyʼapyeterei la koʼẽrõ g̃uarãre. Káda día aha hese péicha. Ko ahasáva rupive ahechakuaa ikatutaha agueropuʼaka oimeraẽ mbaʼe oñepresentáva chéve amo gotyove. Péro ndahaʼéi chejehegui reínte, síno chepytyvõgui Jesús, Jehová ha iñorganisasión”.

17. ¿Mbaʼe mbaʼépa ikatu jajapo jarekóramo umi provléma ijetuʼuetereíva?

¹⁷ ¿Ha nde? ¿Omanómapa avei ndehegui peteĩ rehayhúva? Upéicharõ emombaretékena nde jerovia eleévo umi rreláto oĩva la Bíbliape oñeʼẽva umi rresurreksiónre. ¿Reñembyasýpa hína pórke peteĩ ne hénte oñemosẽ kongregasióngui?  Upéicharõ estudiákena la Biblia ndete reĩ hag̃ua konvensído Jehová ñandekorrehiha ñane vienrãnte. Tahaʼe haʼéva la provléma oñepresentáva ndéve, eaprovechákena upéva emombarete hag̃ua nde jerovia. Emombeʼupaitékena Jehovápe mbaʼéichapa reñeñandu. Ha ani eñemomombyry, síno ejeheʼa meme umi ermáno ha ermanakuérare (Prov. 18:1). Ejapókena umi mbaʼe nepytyvõtava reaguanta hag̃ua, nerasẽtaramo jepe rejapóvo koʼã mbaʼe, lomímontekena ejapo (Sal. 126:5, 6). Aníkena efalta rreunionhápe, esẽ meme epredika, ha estudia káda día la Biblia. Epensa memékena umi mbaʼe porãita Jehová omeʼẽtavare ndéve amo gotyove. Ha káda ke rehecha Jehová nepytyvõha, nde jerovia imbareteve reíta ohóvo.

18. Oimérõ ehechakuaa ofaltaha ejeroviave, ¿mbaʼépa ikatu rejapo?

¹⁸ Jahasa jave umi mbaʼe ijetuʼúva, jahechakuaáta imbaretépa ñande jerovia térã nahániri. Oimérõ ehechakuaa ofaltaha ndéve ejeroviave, tahaʼe umi mbaʼe rehasa vaʼekuére yma térã rehasáva hína koʼág̃a, aníkena eñedesanima. Eaprovechákena umi mbaʼe rehasáva emombarete hag̃ua nde jerovia. Ejapókena ojapo haguéicha Jesús apostolkuéra, ha ejerure Jehovápe ‘tanepytyvõ ejeroviave hag̃ua’ (Lucas 17:5). Ejepyʼamongetákena avei umi ermáno rembiasakuére, por ehémplo umi jahecha vaʼekue ko artíkulope. Miguel ha Yuráicha, siémprekena nemanduʼa mbaʼeichahápepa Jehová nepytyvõma raʼe. Ojapo haguéicha Vero membykuña ha Anel, eñemboʼe memékena Jehovápe, koʼýte ijetuʼu jave nendive. Ha oiko haguéicha Geydi kásope, nemanduʼákena Jehová ikatuha ojevale ne hentekuérare ha ne amigokuérare nepytyvõ hag̃ua. Ehejáramo Jehová tanepytyvõ koʼág̃ama voi, katuete ejeroviavéta hese ha nderedudamoʼãi haʼe nepytyvõtaha avei amo gotyove.

19. ¿Mbaʼépa oikuaa porã vaʼekue Jesús ha mbaʼépa jaikuaa porã avei ñande?

¹⁹ Jesús oipytyvõ vaʼekue idisipulokuérape ohechakuaa hag̃ua tekotevẽha ojeroviave. Péro haʼe oikuaa vaʼekue avei, Jehová rupive idisipulokuéra oaguantataha umi mbaʼe ijetuʼuvéva oñepresentátava chupekuéra (Juan 14:1; 16:33). Haʼe oikuaa vaʼekue avei pe aty guasu oaguantataha pe jehasa asy guasu ojerovia mbarete rupi Jehováre (Apoc. 7:9, 14). ¿Reimétapa nde ijapytepekuéra? Jehová imbaʼeporã rupi nendive, ikatúta. Péro upearã eaprovecha vaʼerã opa oportunida erekóva koʼág̃a emombarete hag̃ua nde jerovia (Heb. 10:39).