1. Edena henanadai ita lalodia?

KAHIRAKAHIRA do idia vara gaudia, hegeregere tomadiho koikoi do idia hadikaia, Magoga tano tauna Goga ena tuari, bona Aramagedono tuarina oi laloa neganai, oi lalohekwarahi, a? Nega haida oi laloa, ‘Unai gari gaudia idia vara neganai, Dirava do lau abidadama henia noho, a?’ Bema unai bamona gaudia oi laloa, inai atikol ena siri badana, Iesu ese ia gwauraia herevana unai, ese oi do ia durua. Ia ese ena hahediba taudia ia hamaoroa: “Namo lasi umui lalohekwarahi. . . . Umui abidadama.”(Ioa. 14:1) Bema iseda abidadama ia goada momokani, do idia vara gaudia dekenai ita gari lasi.

2. Edena dala ai iseda abidadama ita hagoadaia diba, bona inai atikol ai dahaka do ita herevalaia?

² Iseda abidadama ia tohoa gaudia hanaia daladia ita diba neganai, unai ese ita do ia durua abidadama ita hagoadaia noho bona vaira negai idia vara gaudia ita haheaukalaia diba. Bona do ita gaukara goada iseda manoka gaudia ita hanamoa totona. Hahetoho ta ta ita hanaia neganai, iseda abidadama ia goada ia lao. Unai ese ita ia durua nega vairai do idia vara hahetoho ita haheaukalaia totona. Inai atikol ai do ita itaia, Iesu ena hahediba taudia ese dala idauidau 4 dekenai hahetoho idia davaria, bona unai ese ia hahedinaraia edia abidadama idia hagoadaia noho be namo. Bena unai bamona hahetoho ita haheaukalaia dalana bona unai ese ita ia hegaegaelaia vaira nega ena hahetoho ita hanaia daladia do ita herevalaia.

3. Mataio 6:30, 33 ai Iesu be abidadama karana dekenai dahaka ia hahedinaraia?

³ Ruma bese kwarana ia ura ena adavana bona natudia totona aniani, dabua, bona ruma ia henia. Hari inai negai, unai be mai ena hekwarahi. Iseda tadikaka bona taihu haida edia  moni gaukara idia haboioa, bona idia hekwarahi gaukara ma ta idia tahua, to idia davaria lasi. Haida be edia gaukara idia dadaraia, badina unai gaukara be Keristani tauna ese do ia karaia lasi. Unai ia vara neganai, namona be ita abidadama momokani Iehova be iseda famili edia dabu gaudia do ia henia. Iesu be Ororo Harorona ai ena hahediba taudia dekenai unai ia hahedinaraia. (Mataio 6:30, 33 duahia.) Bema ita abia dae momokani Iehova ese ita do ia rakatania lasi, do ita ura Ia ita hesiai henia noho. Bona Iehova ese iseda dabu gaudia ia henia daladia ita itaia neganai, Ia kahirakahira do ita lao, bona iseda abidadama do ia goada.

4-5. Famili ta be edia dabu gaudia dainai idia lalohekwarahi momo neganai, dahaka ese idia ia durua?

⁴ Venezuela ai famili ta be edia dabu gaudia dainai idia lalohekwarahi momo neganai, Iehova ese idia ia durua dalana mani ita itaia. Guna, Castro famili be sibona edia tano idia birulaia bona idia abia moni ia hegeregere edia famili durua totona. To, tatau haida be mai edia ipidi ida unai famili idia lulua bona edia tano idia abia. Castro famili edia tamana, Migel, ia gwau: “Hari ai abia tano kahana sisina ai birulaia, emai mauri durua gaudia ai abia totona. Dina ta ta ai Iehova lau noia, unai dina dekenai emai dabu gaudia ia henia totona.” Castro famili edia mauri be auka, to idia abidadama momokani iseda lalokau Tamana ese dina ta ta ena dabu gaudia do ia henia, unai dainai hanaihanai kongrigeisen hebou bona haroro gaukara idia karaia. Edia mauri ai Basileia gaudia idia atoa guna, bona Iehova ese edia dabu gaudia ia henia.

⁵ Unai nega aukana ai, Migel bona ena adavana, Yurai, be Iehova ese ia naridia dalana idia laloa bada. Nega haida, Iehova ese tadikaka taihu ia gaukaralaia edia dabu gaudia ia henia totona, eiava Migel idia durua moni gaukara ta ia davaria totona. Nega ma haida, Iehova ese brens ofesi ia gaukaralaia edia dabu gaudia haida ia henia totona. Iehova ese idia ia rakatania lasi. Unai dainai, idia itaia edia abidadama be ia goada ia lao. Edia natuna kekeni, Yoselin, be Iehova ese idia ia durua negana ta ia herevalaia murinai, ia gwau: “Iehova ese ai ia durua dalana lau itaia neganai lau ia hagoadaia bada. Ia be egu turana, bona lau diba nega ibounai lau do ia durua.” Ma ia gwau: “Hekwakwanai idauidau ai haheaukalaia karana ese nega vairai do idia vara hahetoho badadia totona ai ia hegaegaelaia.”

6. Moni ena hekwakwanai oi davaria neganai, edena dala ai emu abidadama oi hagoadaia diba?

⁶ Moni ena hekwakwanai oi davaria, a? Bema oibe, oi dekenai unai be nega aukana. To unai nega oi gaukaralaia diba emu abidadama oi hagoadaia totona. Iehova dekenai oi guriguri bona Iesu ena hereva Mataio 6:25-34 oi duahia bona laloa dobu. Tadikaka taihu edia ekspiriens ese idia hamomokania, Iehova be ena hesiai gaukara lalonai idia bisi taudia edia dabu gaudia ia henia. (1 Kor. 15:58) Oi danu, bema unai gaukara dekenai  oi bisi, do oi abia dae hekwakwanai negadiai Iehova ese oi do ia durua. Ia be emu dabu gaudia ia diba, bona oi do ia durua dalana ia diba danu. Emu mauri lalonai Iehova ena heduru oi itaia neganai, emu abidadama do ia goada ia lao, unai amo nega vairai do idia vara hahetoho badadia oi haheaukalaia diba.​—Hab. 3:17, 18.

7. Mataio 8:23-26 hegeregerena, edena dala ai “lai bada” ese hahediba taudia edia abidadama ia tohoa?

⁷ Iesu bona ena hahediba taudia be davara dekenai lai bada ese ia koudia neganai, Iesu be unai nega ia gaukaralaia idia ia durua, edia abidadama idia hagoadaia noho be namo. (Mataio 8:23-26 duahia.) Lai bada ia toa bona hurehure bada herea dainai bouti be kahirakahira ia mutu, to Iesu be ia mahuta noho. Hahediba taudia idia gari dikadika bona Iesu idia noia idia ia hamauria totona. To idia dekenai, ia gwau: “Umui abidadama maragimaragi taudia, dahaka dainai umui gari dikadika?” Namona be hahediba taudia idia laloparara, Iehova be mai ena siahu Iesu bona ia ida idia noho taudia ia hamauria diba. Unai sivarai amo dahaka ita dibaia? Abidadama goadana ese ita do ia durua, “lai bada” bamona hekwakwanai badadia ita haheaukalaia totona.

8-9. Dahaka ese Anel ena abidadama ia tohoa, bona dahaka heduru ia abia?

⁸ Puerto Rico ai singul taihu ladana Anel ita laloa. Ia ese hahetoho badana ta ia haheaukalaia dainai ena abidadama ia goada. Lagani 2017 ai, Hurricane Maria ese ena ruma ia hadikaia. Unai ia vara dainai ena moni gaukara ia haboioa. Anel ia gwau: “Unai nega aukana ai, lau lalometau bada, to guriguri amo Iehova dekenai lau tabekau bona unai hekwakwanai lau laloa momo lasi.”

⁹ Anel be badinaia karana ese ia durua ena hekwakwanai ia haheaukalaia totona. Ia gwau: “Iehova ena orea ena hakaua daladia lau badinaia karana ese lalogoada ia henia. Tadikaka taihu ese lau idia hagoadaia bona egu dabu gaudia idia henia karana amo Iehova ena heduru lau mamia.” Ma ia gwau: “Iehova ese lau dekenai gau momo ia henia, lau noia lasi gaudia danu, unai ese egu abidadama ia hagoadaia momokani.”

10. ”Lai bada” bamona hekwakwanai oi davaria neganai, dahaka do oi karaia?

¹⁰ Emu mauri ai “lai bada” bamona hekwakwanai oi davaria, a? Reana disasta badana ta ia vara dainai oi lalohisihisi. Eiava gorere badana ta dainai oi lalomanoka bona oi diba lasi dahaka do oi karaia. Ena be nega haida do oi lalometau bada, to unai ese oi ia koua lasi Iehova oi abidadama henia noho totona. Guriguri amo ia kahirakahira oi lao. Iehova ese guna oi ia durua negadia oi laloa dobu, unai amo emu abidadama ia hagoadaia diba. (Sal. 77:11, 12) Namona be oi abia dae Iehova ese oi do ia rakatania lasi ela bona hanaihanai.

11. Dahaka dainai ita idia gunalaia taudia dekenai badinaia karana ita hahedinaraia be namo?

 ¹¹ Dahaka ese ita ia durua diba hekwakwanai idauidau ita hanaia totona? Anel bamona, badinaia karana be mai anina bada. Iehova bona Iesu idia abidadama henia taudia ita abidadama henia danu. Nega haida, ita idia gunalaia taudia ese idia henia hakaua herevadia ita lalopararalaia lasi. To, Iehova ese hereva idia badinaia taudia ia hanamoa. Iena hereva, Baibel, bona iseda abidadama hesiai taudia edia ekspiriens amo ita diba, badinaia karana ese ta ia hamauria diba. (Eso. 14:1-4; 2 Siv. 20:17) Unai bamona haheitalai idauidau ita laloa dobu. Unai ese iseda ura do ia habadaia, Iehova ena orea amo idia mai hakaua daladia ita badinaia noho totona. (Heb. 13:17) Unai amo, ia mai noho lai bada eiava hisihisi badana dekenai do ita gari lasi.​—Aon. 3:25.

12. Luka 18:1-8 ese abidadama bona kara gageva haheaukalaia karana be edena bamona ia hahegeregerea?

¹² Iesu ia diba kara gageva ese ena hahediba taudia edia abidadama do ia tohoa. Idia haheauka totona, haheitalai ta ia gwauraia bona unai be Luka bukana ai ia noho. Iesu ese vabu ta ena sivarai ia gwauraia, ia be kara maoromaoro lasi diadi tauna dekenai ia noinoi noho kota maorona ia karaia totona. Ia diba bema ia noinoi noho, unai diadi tauna ese do ia durua. Dokonai ena noinoi ia haerelaia. Unai sivarai amo dahaka ita dibaia? Iehova be ia kara gageva lasi. Unai dainai Iesu ia gwau: “Oibe, Dirava ese ena abia hidi taudia, dina bona hanuaboi ai ia idia taitai henia taudia totona, hahemaoro maorona do ia karaia, ani?” (Luka 18:1-8 duahia.) Iesu ma ia gwau: “Taunimanima ena Natuna ia ginidae neganai, tanobada ai inai bamona abidadama karana do ia davaria, a?” Kara gageva dainai ita lalohisihisi neganai, namona be iseda abidadama ia goada, unai amo vabu hegeregerena do ita haheauka noho. Unai abidadama dainai, ita diba momokani Iehova be nega ta ita totona kara ta do ia karaia. Danu, ita abia dae momokani guriguri be mai ena siahu. Nega haida, ita laloa lasi dalanai Iehova ese iseda guriguri ia haerelaia diba.

13. Edena dala ai kara gageva lalonai famili ta be guriguri karana ese durua?

¹³ Democratic Republic of the Congo ai, taihu ladana Vero ena ekspiriens ita laloa. Ia bona ena Witnes lasi adavana bona edia mauri lagani 15 natuna kekeni, be soldia orea ta ese edia hanua idia hadikaia dainai idia heau. To dala huanai, soldia taudia ese idia koudia bona idia ura hamasea. Vero ia tai matamaia neganai, ena natuna ia ura ena sinana ena lalona ia hanamoa dainai, ia guriguri badabada bona Iehova ena ladana ia gwauraia loulou. Unai murinai, soldia edia biaguna ia gwau: “Kekeni e, daika ese oi dekenai guriguri ia hadibaia?” Ia gwau: “Egu sinana ese Mataio 6:9-13 ai ia noho guriguri  dalana ia hadibaia.” Bena soldia edia biaguna ia gwau: “Kekeni e, emu tama sina ida maino ai umui lao, bona emui Dirava Iehova ese umui ia naria be namo!”

14. Dahaka ese iseda abidadama ia tohoa diba, bona dahaka ese ita do ia durua ita haheauka totona?

¹⁴ Unai bamona ekspiriens amo ita diba guriguri karana be mai ena siahu. To bema emu guriguri ena haere oi abia haraga lasi, eiava hoa gauna ta ia vara lasi be edena bamona? Iesu ese ia gwauraia vabu ena haheitalai bamona, oi guriguri noho, bona oi abia dae iseda Dirava ese oi do ia rakatania lasi bona nega maorona bona dala ta ai emu guriguri do ia haerelaia. Iehova ena lauma helaga totona oi noinoi noho. (Fili. 4:13) Namona be oi laloatao, kahirakahira Iehova ese oi dekenai hahenamo momo do ia henia bona guna oi mamia hisihisi ibounai do oi laloaboio. Iehova ena heduru amo hahetoho idauidau oi haheaukalaia neganai, unai ese emu abidadama do ia hagoadaia, nega vaira ena hahetoho badadia oi hanaia totona.​—1 Pet. 1:6, 7.

15. Mataio 17:19, 20 hegeregerena, Iesu ena hahediba taudia be dahaka hekwakwanai idia davaria?

¹⁵ Iesu ese ena hahediba taudia ia hadibaia, abidadama karana ese idia do ia durua hekwakwanai idauidau idia hanaia totona. (Mataio 17:19, 20 duahia.) Ena be idia ese nega haida demoni idia lulua, to nega ta idia hegeregere lasi unai idia karaia totona. Dahaka dainai? Iesu ia gwau edia abidadama be maragi. Idia ia hamaoroa bema edia abidadama ia goada, do idia hegeregere ororo bamona hekwakwanai badadia idia hanaia diba! Hari, ita danu be hekwakwanai badadia ita davaria dainai ita hegeregere lasi ita hanaia totona.

16. Edena dala ai Gedi ena abidadama ese ia durua, hekwakwanai badana ia haheaukalaia totona?

¹⁶ Guatemala ai, taihu ta ladana Gedi ena haheitalai mani ita laloa. Kongrigeisen hebou amo idia giroa lou lalonai, ena adavana, Edi, be henaohenao taudia ese idia hamasea. Edena dala ai Gedi be ena abidadama ese ia durua, unai hekwakwanai badana ia haheaukalaia totona? Ia gwau: “Guriguri ese lau ia durua egu metau be Iehova dekenai lau negea lao, unai amo maino lau abia. Egu famili bona kongrigeisen turadia amo lau itaia Iehova be lau ia laloa bada. Iehova ena hesiai gaukara lalonai lau bisi dainai, egu lalohisihisi ia hamaragia bona lau ia durua dina ta ena metau sibona lau laloa, to kerukeru ena lau laloa momo lasi. Unai hekwakwanai lau haheaukalaia karana amo lau diba, ena be nega vairai hahetoho idauidau do idia vara, to Iehova, Iesu bona orea amo idia mai heduru amo do lau haheauka diba.”

17. Ororo bamona hekwakwanai ita davaria neganai, dahaka ita karaia diba?

¹⁷ Emu lalokau tauna ta ia mase dainai oi taitai noho, a? Toreisi lou helarona dekenai emu abidadama oi hagoadaia totona, Baibel ai idia noho toreisi lou sivarai idauidau oi  duahia. Emu famili ta be orea amo idia atoa siri dainai oi lalohisihisi, a? Baibel oi stadilaia unai amo oi diba momokani, Dirava ese ia henia matahakani be dala namo hereana. Hekwakwanai oi davaria neganai, unai ese dala ia kehoa emu abidadama oi hagoadaia totona. Iehova dekenai emu hemami ibounai oi gwauraia. Sibona oi noho lasi be namo, to nega ibounai emu tadikaka taihu kahirakahira oi noho. (Aon. 18:1) Ena be oi davaria hekwakwanai dainai oi taitai noho, to emu abidadama hagoadaia gaudia oi karaia noho, unai ese oi do ia durua oi haheauka noho totona. (Sal. 126:5, 6) Emu kongrigeisen heboudia, haroro gaukara bona Baibel duahiduahi oi hadokoa lasi. Bona Iehova ena gwauhamata namodia vaira nega totona oi lalodia loulou. Iehova ese oi ia durua dalana oi itaia neganai, emu abidadama do ia goada ia lao.

18. Bema oi itaia emu abidadama ia manoka sisina, dahaka oi karaia diba?

¹⁸ Bema guna o hari oi davaria hahetoho dekenai oi itaia emu abidadama ia manoka sisina, oi lalomanoka lasi. To unai ese dala ia kehoa emu abidadama oi hagoadaia noho totona. Iesu ena aposetolo taudia edia noinoi hegeregerena ita karaia danu. Idia gwau: “Emai abidadama oi habadaia.” (Luka 17:5) Danu, inai atikol ai ita herevalaia taudia edia haheitalai ita laloa. Migel bona Yurai bamona, Iehova ese oi ia durua negadia oi laloatao. Vero ena natuna kekeni bona Anel bamona, hekwakwanai badana ta oi davaria neganai, Iehova oi guriguri henia goadagoada. Bona Gedi bamona, namona be oi diba Iehova ese emu famili bona tadikaka taihu amo oi do ia durua. Bema hari idia vara hekwakwanai idauidau lalonai Iehova ena heduru oi tahua, do oi diba momokani, nega vairai hekwakwanai badadia lalonai Iehova be oi do ia durua oi haheauka totona.

19. Iesu be dahaka ia diba momokani, bona dahaka oi karaia noho be namo?

¹⁹ Iesu ese ena hahediba taudia ia durua edia abidadama idia hagoadaia noho totona, bona ia daradara lasi Iehova ena heduru amo idia ese vaira negai hahetoho do idia hanaia diba. (Ioa. 14:1; 16:33) Iesu ia diba momokani abidadama goadana ese hutuma bada taudia do ia durua hisihisi badana amo idia roho mauri totona. (Apok. 7:9, 14) Oi be idia huanai do oi noho, a? Bema hari emu abidadama ia hagoadaia gaudia oi karaia noho, Iehova ese oi do ia durua oi roho mauri totona!​—Heb. 10:39.