1. Ania ti mabalintayo nga isaludsod iti bagitayo?

ADDA kadi dagiti tiempo a madanaganka no pampanunotem dagiti paspasungadentayo a pasamak​—ti pannakadadael ti ulbod a relihion, ti iraraut ni Gog iti Magog, ken ti gubat ti Armagedon? Insaludsodmo kadin iti bagim, ‘Kayak kadin ti agtalinaed a matalek ken awan pagkuranganna bayat dagita a nakabutbuteng a pasamak?’ No napanunotmon dagita, ti pannakailawlawag ti imbaga ni Jesus iti pannakatema a teksto ti makatulong unay kenka. Imbaga ni Jesus kadagiti adalanna: “Saankayo a mariribukan. Ipakitayo ti pammatiyo.” (Juan 14:1) Ti natibker a pammati ti makatulong kadatayo nga agtalinaed a kalmado aniaman ti mapasamak.

2. Kasanotayo a mapatibker ti pammatitayo, ken ania ti usigentayo iti daytoy nga artikulo?

² Mapatibkertayo ti pammatitayo a mangibtur kadagiti pakasuotan iti masanguanan no panunotentayo no kasanotayo a sangsanguen dagiti pannubok iti pammatitayo ita. No utobentayo ti reaksiontayo kadagiti agdama a pannubok, makitatayo no kasanotay pay a mapatibker ti pammatitayo. Kada pannubok a mapagballigiantayo, tumibker ti pammatitayo. Makatulong dayta tapno maibturantayo dagiti suot iti masanguanan. Iti daytoy nga artikulo, repasuentayo ti uppat a situasion a nakaipasanguan dagiti adalan ni Jesus a nangipakita a kasapulanda pay ti ad-adu a pammati. Usigentayo no kasano a mabalin a maipasangotayo kadagiti isu met laeng a karit ita ken no kasano a dagita ti mangisagana kadatayo para iti masanguanan.

3. Sigun iti Mateo 6:30, 33, ania a punto ti pinagminar ni Jesus maipapan iti pammati?

³ Natural laeng a kayat ti maysa nga ulo ti pamilia nga ipaay ti umdas a makan, bado, ken pagyanan ni baketna ken dagiti annakda.  Saan a kanayon a nalaka nga aramiden dayta bayat dagiti narigat a tiempo. Adda dagiti kapammatiantayo a napukawan iti trabaho, ken uray no aramidenda ti amin a kabaelanda, saanda latta a makabirok iti sabali a trabaho. Adda met dagidiay saan a nangawat iti maysa a trabaho gapu ta saan a maitutop kadagiti Kristiano. Kadagita amin a situasion, kasapulantayo ti natibker a pammati a siguraduen ni Jehova a maipaay dagiti kasapulan ti pamiliatayo. Pinagminar dayta ni Jesus kadagiti adalanna iti Sermonna iti Bantay. (Basaen ti Mateo 6:30, 33.) No talaga a kombinsidotayo a dinatayto baybay-an ni Jehova, maipokustayo ti atensiontayo iti kapatgan​—dagiti interes ti Pagarian. Bayat a makitkitatayo no kasano nga ipapaay ni Jehova dagiti material a kasapulantayo, agbalin a napaypayso isuna kadatayo ken tumibker ti pammatitayo.

4-5. Ania ti nakatulong iti maysa a pamilia idi madandanaganda kadagiti material a kasapulanda?

⁴ Kitaentayo ti napasamak iti maysa a pamilia idiay Venezuela. Nariknada ti tulong ni Jehova idi madandanaganda no pangalaanda kadagiti material a kasapulanda. Adda idi umdas a pagbiag ti pamilia Castro gapu ta adda bukodda a daga a taltalonenda. Ngem ginamgam ti maysa nga armado a grupo ti dagada ket pinapanawda ida. Kinuna ti ama a ni Miguel: “Agdepdependekami itan iti maapitmi iti bassit a lote a binulodmi. Kada agsapa, ipakpakaasik ken Jehova nga ipaayna ti kasapulanmi iti dayta nga aldaw.” Narigat ti biag para iti daytoy a pamilia, ngem gapu ta naan-anay ti pammatida a kabaelan ti naayat nga Amatayo nga ipaay dagiti inaldaw a kasapulanda, regular latta a makigimgimong ti pamilia Castro ken makiramramanda iti ministerio. Iyun-unada dagiti interes ti Pagarian isu nga ipapaay ni Jehova dagiti kasapulanda.

⁵ Uray narigat ti panagbiagda, nagpokus ni Miguel ken ni baketna a Yurai iti panangaywan kadakuada ni Jehova. No dadduma, us-usaren ni Jehova dagiti kapammatianda a mangipaay iti dadduma a kasapulanda wenno tulonganda ni Miguel nga agbirok iti trabaho. Adda dagiti gundaway nga ipapaay ni Jehova dagiti kangrunaan a kasapulanda babaen ti ayuda nga aggapu iti sanga nga opisina. Pulos a saan ida a binaybay-an ni Jehova. Gapu iti dayta, tumibtibker ti pammatida a sangapamiliaan. Kalpasan nga inyestoriada no kasano a tinulongan ida ni Jehova, imbaga ti inauna a balasangda a ni Yoselin: “Makaparagsak unay a makita no kasano a tultulongannakami ni Jehova. Ibilangko isuna a gayyemko a kanayon a mapangnamnamaak.” Innayonna: “Dagiti pannubok a nalasatanmi a sangapamiliaan ti nangisagana kadakami kadagiti narigrigat a pannubok iti masanguanan.”

6. Kasanom a mapatibker ti pammatim no agproblemaka iti pinansial?

⁶ Agprobproblemaka kadi iti pinansial? No wen, narigat la ketdi dayta. Ngem uray no narigat ti situasionmo, mabalinmo nga usaren dayta a tiempo a mangpabileg iti pammatim.  Agkararagka ken Jehova ken basaem ti imbaga ni Jesus iti Mateo 6:25-34 sa utobem dagita. Panunotem dagiti kapadasan iti tiempotayo a mangpaneknek nga ipapaay ni Jehova ti kasapulan dagidiay kanayon nga adu ti ar-aramidenda para kenkuana. (1 Cor. 15:58) No aramidem dayta, agbalinka a mas kombinsido a tulongannaka ti nailangitan nga Amam no kasano a tultulonganna dagidiay kapadam ti situasionda. Ammona dagiti kasapulam, ken ammona no kasanona nga ipaay dagita. Bayat a makitkitam a tultulongannaka ni Jehova, lallalo a tumibker ti pammatim tapno maibturam dagiti daddadakkel a pakasuotan iti masanguanan.​—Hab. 3:17, 18.

7. Sigun iti Mateo 8:23-26, kasano a nasubok ti pammati dagiti adalan idi adda “napigsa a bagyo”?

⁷ Bayat a ni Jesus ken dagiti adalanna ket aglaylayag iti baybay, nagbagyo. Inusar ni Jesus dayta a pasamak tapno ipaawatna kadakuada no apay a kasapulanda ti dakdakkel a pammati. (Basaen ti Mateo 8:23-26.) Bayat nga agbagbagyo ken masabsabuagan ti bangkada kadagiti dalluyon, naimas idi ti turog ni Jesus. Idi riniing dagiti mabutbuteng nga adalanna ken kiniddawda nga isalakanna ida, binagbagaan ida ti Apo: “Apay a kasta unay ti butengyo? Nagbassit ketdin ti pammatiyo.” Nabigbig koma dagiti madandanagan nga adalanna a nalaka laeng para ken Jehova a protektaran ni Jesus ken dagiti kakaduana. Ania ti masursurotayo? No natibker ti pammatitayo, malasatantayo ti aniaman a “napigsa a bagyo,” literal man wenno simbolikal.

8-9. Kasano a nasubok ti pammati ni Anel, ken ania ti nakatulong kenkuana?

⁸ Kitaentayo ti kapadasan ni Anel, a maysa a balasang a taga-Puerto Rico. Timmibker ti pammatina gapu iti napasaranna a narigat a pannubok. Nadidigra iti literal a “napigsa a bagyo.” Idi 2017, dinadael ti Bagyo a Maria ti balay ni Anel. Gapu iti dayta a bagyo, napukawna ti trabahona. “Madandanaganak idi,” inamin ni Anel, “ngem nasursurok ti agtalek ken Jehova babaen ti panagkararag ken saanak a nagpaabak kadagiti pakadanagak.”

⁹ Imbaga ni Anel ti maysa pay a nakatulong kenkuana tapno malasatanna ti pannubok​—ti panagtulnog. Kinunana: “Nakatulong kaniak nga agbalin a kalmado ti panangsurotko kadagiti instruksion ti organisasion. Nakitak ti ima ni Jehova kadagiti naawatko a naespirituan a pammaregta ken material a tulong nga impaay dagiti kakabsat.” Innayonna: “Ad-adu nga amang ti inted ni Jehova ngem iti kiniddawko, ken ad-adda a timmibker ti pammatik.”

10. Ania ti mabalinmo nga aramiden no adda ti “napigsa a bagyo” iti biagmo?

¹⁰ Adda kadi “napigsa a bagyo” iti biagmo ita? Baka agrigrigatka ita gapu iti natural a didigra. Wenno baka gapu iti kasla bagyo a problema kas iti nakaro a sakit, malidlidayanka la unay ken dimo ammo ti aramidem. Mabalin a madandanaganka no dadduma, ngem dimo  ipalubos a ti panagdanag ti mangpasardeng kenka nga agtalek ken Jehova. Umasidegka kenkuana ken sipapasnek nga agkararagka. Tapno tumibker ti pammatim, panunotem ti namin-adun a panangtultulong kenka ni Jehova iti napalabas. (Sal. 77:11, 12) Masiguradom a dinaka pulos baybay-an ni Jehova​—ita ken nikaanoman.

11. Apay a masapul a determinadotayo nga agtulnog kadagiti mangidadaulo kadatayo?

¹¹ Ania pay ti makatulong kenka a mangibtur kadagiti suot? Kas iti dinakamat ni Anel, ti panagtulnog. Sursuruem ti agtalek kadagiti pagtaltalkan ni Jehova ken ni Jesus. No dadduma, mabalin a mangted dagiti naapointaran a mangidaulo kadatayo kadagiti instruksion a ditay unay maawatan. Ngem bendisionan ni Jehova dagiti natulnog. Mabasatayo iti Saona ken makitatayo kadagiti kapadasan dagiti matalek nga agserserbi kenkuana a ti panagtulnog ket makaisalakan iti biag. (Ex. 14:1-4; 2 Cron. 20:17) Utobem dagita a pagarigan. Iti kasta, tumibker ti determinasionmo a makikooperar kadagiti urnos ti organisasion ita ken iti masanguanan. (Heb. 13:17) Saanmonto ngarud a kabuteng ti napigpigsa a bagyo a dandanin dumteng.​—Prov. 3:25.

12. Iti Lucas 18:1-8, ania ti koneksion ti pammati ken ti panangibtur iti kinaawan hustisia?

¹² Ammo ni Jesus a ti kinaawan hustisia ti mangsubok iti pammati dagiti adalanna. Tapno matulonganna ida, nangted iti ilustrasion a mabasa iti libro a Lucas. Inyestoria ni Jesus ti maysa a balo a kanayon a nagpakpakaasi iti dakes a hues tapno magun-odanna ti hustisia. Kombinsido a maipangag ti panangirengrengna iti kiddawna. Idi agangay, pinatgan ti hues ti panagpakpakaasina. Ania ti masursurotayo? Saan a nakillo ni Jehova. Imbaga ni Jesus: “Saan kadi a sigurado nga ited met ti Dios ti hustisia kadagidiay pinilina, nga agpakpakaasi kenkuana iti aldaw ken rabii?” (Basaen ti Lucas 18:1-8.) Innayon pay ni Jesus: “Inton dumteng ti Anak ti tao, talaga ngata a masarakannanto daytoy a pammati ditoy daga?” No makapaspasartayo iti kinaawan hustisia, masapul nga agbalintayo a naanus ken porsegido tapno mapaneknekantayo a natibker ti pammatitayo a kas iti dayta a balo. No kasta ti pammatitayo, makapagtalektayo a tulongannatayto ni Jehova. Masapul met a mamatitayo iti bileg ti kararag. No dadduma, masungbatan dagiti kararagtayo kadagiti pamay-an a ditay ekspektaren.

13. Kasano a nakatulong ti kararag iti maysa a pamilia a nakapasar iti kinaawan hustisia?

¹³ Usigentayo ti kapadasan ti sister a ni Vero a taga-Democratic Republic of the Congo. Napilitan da Vero, ti saan a Saksi a lakayna, ken ti 15-ti-tawenna a balasangda a mangpanaw iti barioda idi rimmaut ti maysa a grupo dagiti soldado. Bayat nga agliblibasda, nakadanonda iti nabarikadaan a kalsada, ket pinasardeng ida dagiti soldado ken impangtada a papatayenda  ida. Nagsangit ni Vero. Pinadas ti balasangna a pagkalmaen babaen ti panagkararagna iti napigsa ken namin-adu a panangdakamatna iti nagan ni Jehova. Idi nalpas a nagkararag, insaludsod ti komander dagiti soldado, “Basang, nangisuro kaniam nga agkararag?” Insungbatna, “Ni Nanang, Sir. Insurona ‘diay mabasa iti Mateo 6:9-13.” Imbaga ti komander, “Basang, inkayo ngaruden a tallo, ket aluadannakayo koma ni Jehova a Diosyo!”

14. Ania ti mabalin a mangsubok iti pammatitayo, ket ania ti makatulong kadatayo a mangibtur?

¹⁴ Isuro dagiti kasta a kapadasan a ditay koma pulos tagtagibassiten ti pateg ti kararag. Ngem kasanon no dagiti kararagmo ket saan a masungbatan a dagus wenno saan a masungbatan iti nakaskasdaaw a pamay-an? Kas iti balo iti ilustrasion ni Jesus, itultuloymo ti agkararag. Agtalekka a saannaka a baybay-an ti Diostayo, ken addanto tiempo ken pamay-an a sungbatanna ti kararagmo. Itultuloymo nga ipakaasi ken Jehova ti nasantuan nga espirituna. (Fil. 4:13) Laglagipem nga asidegen nga ipaay kenka ni Jehova ti aglaplapusanan a bendision nga uray la malipatamton ti aniaman a rigat a napasaram. Bayat nga agpatpatulongka ken Jehova tapno simamatalek a maibturam dagiti suot, natibtibkerkanto a mangsango kadagiti pakarigatan iti masanguanan.​—1 Ped. 1:6, 7.

15. Kas mabasa iti Mateo 17:19, 20, ania a karit ti nakaipasanguan dagiti adalan ni Jesus?

¹⁵ Insuro ni Jesus kadagiti adalanna a makatulong ti pammati tapno mapagballigianda dagiti lapped. (Basaen ti Mateo 17:19, 20.) Naminsan, saanda a naparuar ti maysa a demonio, uray no adda idin dagiti tiempo a naaramidda dayta. Ania ti problema? Inlawlawag ni Jesus a kasapulanda ti ad-adu pay a pammati. Imbagana kadakuada a no umdas ti pammatida, kabaelanda nga iyalis dagiti kasla bantay a lapped! Mabalin a maipasangotayo met ita kadagiti karit a kasla imposible a mapagballigian.

16. Kasano a nakatulong ken Geydi ti pammati tapno maibturanna ti maysa a trahedia ken nakaro a ladingit?

¹⁶ Panunotentayo ti ulidan ni Geydi, a maysa a sister a taga-Guatemala. Ti asawana a ni Edi ket pinatay dagiti kriminal bayat nga agaw-awidda manipud iti gimong. Kasano a nakatulong ti pammati ni Geydi tapno mailiwliwagna ti nakaro a ladingitna? Imbagana: “Nakatulong ti kararag tapno maipalladawko ti dadagsenko ken Jehova. Dayta ti mangpakpakalma iti riknak. Makitkitak ti panangaywan ni Jehova kaniak babaen ti pamiliak ken dagiti gagayyemko iti kongregasion. Gapu ta kanayonak a busy iti panagserbik ken Jehova, maep-ep-ep ti saem a marikriknak. Dayta met laeng ti tumultulong kaniak tapno ti pay laeng agdama nga aldaw ti panunotek ken diak unay pakadanagan ti sumaruno nga aldaw. Nasursurok iti dayta a kapadasak nga aniaman a suot ti dumteng iti masanguanan, kayak dayta iti tulong ni Jehova, ni Jesus, ken ti organisasion.”

17. Ania ti mabalintayo nga aramiden no maipasangotayo iti kasla bantay a lapped?

¹⁷ Agsensennaayka kadi gapu iti ipapatay ti  maysa nga ipatpategmo? Tapno mapatibkermo ti pammatim iti namnama a panagungar, iwayaam a basaen dagiti salaysay ti Biblia maipapan kadagidiay napagungar. Agladladingitka kadi gapu ta nailaksid ti maysa a kapamiliam? Agadalka tapno agbalinka a kombinsido a ti pamay-an ti Dios a mangdisiplina ti kanayon a kasayaatan. Aniaman ti problemam, usarem dayta a gundaway a mangpatibker iti pammatim. Ibukbokmo ti pusom ken Jehova. Dimo isinsina ti bagim. Agtalinaedka ketdi a nadekket kadagiti kapammatiam. (Prov. 18:1) Makiramanka kadagiti aktibidad a makatulong kenka nga agibtur, uray no makaluaka a mangaramid kadagita. (Sal. 126:5, 6) Regularka a makigimong, mangasaba, ken agbasa iti Biblia. Kanayonka nga agpokus kadagiti nagsayaat a bendision nga isagsagana ni Jehova para kenka. Bayat a makitkitam a tultulongannaka ni Jehova, tumibker a tumibker ti pammatim kenkuana.

18. No nadlawmo a medio kimmapuy ti pammatim, ania ti mabalinmo nga aramiden?

¹⁸ No makitam kadagiti napalabas wenno agdama a pakasuotam a medio kimmapuy ti pammatim, saanka a maupay. Ibilangmo dayta kas oportunidad tapno mapatibkermo ti pammatim. Kiddawem ti kiniddaw idi dagiti apostol ni Jesus: “Patibkerem ti pammatimi.” (Luc. 17:5) Panunotem met dagiti kapadasan a napagsasaritaantayo iti daytoy nga artikulo. Kas kada Miguel ken Yurai, lagipem ti amin a tiempo a tinulongannaka ni Jehova. Kas iti balasang ni Vero ken ni Anel, sipapasnek nga agkararagka ken Jehova, nangruna no maipasangoka iti nakaro a problema. Ken kas ken Geydi, bigbigem a mabalin nga usaren ni Jehova ti pamiliam wenno ti gagayyemmo a mangipaay iti kasapulam a tulong. No ipalubosmo a tulongannaka ni Jehova a mangibtur kadagiti agdama a pakasuotam, agbalinka a mas kombinsido a tulongannaka a mangibtur iti aniaman a pakasuotam iti masanguanan.

19. Ania ti nasigurado ni Jesus, ket ania met ti masiguradom?

¹⁹ Pinagminar ni Jesus a kurang ti pammati dagiti adalanna, ngem dina pulos pinagduaduaan nga iti tulong ni Jehova, mapagballigianda dagiti pannubok iti masanguanan. (Juan 14:1; 16:33) Nasigurado ni Jesus a gapu iti natibker a pammati, malasatan ti dakkel a bunggoy ti um-umay a dakkel a rigat. (Apoc. 7:9, 14) Maysakanto kadi kadakuada? Gapu iti nagpaiduma a kinaimbag ni Jehova, makalasatkanto no aramidem ti amin a kabaelam ita a mangpabileg ken mangpatibker iti pammatim!​—Heb. 10:39.