1. Inki ngiufula beto lenda kudiyula?

KETI bantangu ya nkaka nge ke kudiyangisaka sambu na mambu yina ta salama ntama mingi ve, mu mbandu ntangu bo ta fwa mabundu yonso ya luvunu, ntangu Gogi ya Magogi ta nwanisa bansadi ya Nzambi mpi ntangu bitumba ya Armagedoni ta salama? Nge lenda kudiyula nde: ‘Keti mono ta kuka kubikala ya kwikama ntangu mambu yina ya ke pesa boma ta salama?’ Kana nge ke kudiyulaka bangiufula yina, mambu yina Yezu tubaka na verse ya me simba disolo yai yina beto ke tadila, ta sadisa nge. Yezu songaka balongoki na yandi nde: “Beno bika ve nde bantima na beno kukuma kisaka-saka. Beno kwikila.” (Yoa. 14:1) Kana lukwikilu na beto kele ngolo, yo ta sadisa beto na kukanga ntima na konso diambu yina beto lenda kutana ti yo na bilumbu ke kwisa.

2. Inki mutindu beto lenda kumisa lukwikilu na beto ngolo mpi nki beto ta tadila na disolo yai?

² Kana beto ke yindula mambu yina beto lenda sala bubu yai ntangu beto me kutana ti mambu yina ke meka lukwikilu na beto, beto ta zaba mambu yina beto ta sala sambu na kukumisa lukwikilu na beto ngolo. Kana beto yindula mambu yina beto ta sala, yo ta sadisa beto na kuzaba kisika yina beto fwete yidika sambu na kukumisa lukwikilu na beto ngolo. Konso ntangu yina beto ke kanga ntima na diambu mosi ya mpasi, lukwikilu na beto mpi ta kuma ngolo. Yo ta sadisa beto na kukanga ntima na bampasi yina beto ta kutana ti yo na bilumbu ke kwisa. Na disolo yai, beto ta tadila mambu iya yina balongoki ya Yezu kutanaka ti yo, yina monisaka nde bo vandaka ti mfunu ya lukwikilu mingi. Beto ta tala mutindu beto lenda kanga ntima kana beto me kutana mpi ti bampasi ya mutindu mosi ti bo bubu yai mpi mutindu yo lenda sadisa beto na kukanga ntima na bampasi yina beto lenda kutana ti yo na bilumbu ke kwisa.

3. Mutindu Matayo 6:30, 33 ke monisa yo, nki dilongi ya mfunu ya me tala lukwikilu Yezu tubilaka?

³ Mfumu ya dibuta ke zolaka kupesa nkento na yandi ti bana na yandi madia ya me fwana, bilele mpi nzo. Yo ke vandaka ve pete ntangu yonso na kusala yo na bantangu yai ya mpasi. Bampangi ya nkaka ke vandaka diaka ve ti kisalu. Ata bo ke salaka bikesa ya kuzwa kisalu ya nkaka, bo ke zwaka yo ve. Bankaka nkutu ke buyaka kusala kisalu yina Bakristu fwete sala ve. Na mambu yai yonso, beto fwete ndima kibeni nde Yehowa ta lungisa bampusa ya dibuta na beto. Yezu monisaka yo pwelele na balongoki na yandi na Disolo yina yandi salaka na Zulu ya Ngumba. (Tanga Matayo 6:30, 33.) Kana beto ke ndima kibeni nde Yehowa ta yambula beto ve, yo ta sadisa beto na kutula mambote ya Kimfumu na kisika ya ntete. Kana beto ke mona mutindu Yehowa ke sadisa beto na kulungisa bampusa na beto ya kinsuni, yo ta sadisa beto na kukangama kaka na yandi mpi lukwikilu na beto ta kuma ngolo.

4-5. Inki sadisaka dibuta mosi ntangu bo vandaka kudiyangisa sambu na bima yina bo vandaka ti yo mfunu?

⁴ Beto tala mutindu Yehowa sadisaka dibuta mosi na Vénézuéla yina vandaka kudiyangisa sambu na bima yina bo vandaka ti yo mfunu. Ntete, dibuta ya mpangi Castro vandaka kusala bilanga na ferme na bo sambu na kuzwa mbongo. Na nima, babandi yina vandaka ti minduki botulaka bo ferme mpi bo kulaka bo. Mpangi Miguel, papa ya dibuta yango ke tuba nde: “Beto kumaka kusala bilanga na kisika mosi ya fioti ya muntu mosi. Konso kilumbu, mono yantikaka kulomba Yehowa bima yina beto vandaka ti yo mfunu.” Dibuta yina ke zingaka kibeni na mpasi kansi bo ke ndimaka nde Tata na beto ya zola ta lungisa bampusa na bo ya konso kilumbu. Bo ke kwendaka na balukutakanu mbala na mbala mpi bo ke longaka nsangu ya mbote mbala na mbala. Bo ke tulaka mambote ya Kimfumu na kisika ya ntete mpi Yehowa ke lungisaka bampusa na bo.

⁵ Mpangi Miguel ti nkento na yandi Yurai ke tulaka dikebi na mutindu Yehowa ke lungisaka bampusa na bo na bantangu ya mpasi. Yehowa sadilaka bampangi sambu na kupesa bo bima yina bo vandaka ti yo mfunu mpi yandi sadisaka mpangi Miguel na kuzwa kisalu ya mbote. Bantangu ya nkaka, Yehowa sadilaka Betele sambu na kupesa bo bima yina bo vandaka ti yo mfunu. Yehowa yambulaka bo ve ata fioti. Yo kumisaka lukwikilu na bo ngolo. Yoselin mwana na bo ya ntete tubilaka mbandu mosi yina monisaka mutindu Yehowa sadisaka bo. Yandi ke tuba nde: “Yo ke pesa kikesa na kumona mutindu Yehowa sadisaka beto. Yandi kele nduku na mono mpi mono ke ndima kibeni nde yandi ta sadisa mono ntangu yonso.” Yandi ke tuba diaka nde: “Bampasi yina dibuta na beto me kutana ti yo me sadisa beto na kuyilama sambu na bampasi ya ngolo yina beto lenda kutana ti yo na bilumbu ke kwisa.”

6. Inki mutindu nge lenda kumisa lukwikilu na nge ngolo kana nge kele ve ti mbongo?

⁶ Keti nge kele ve ti mbongo? Kana mpidina, yo kele ntangu ya mpasi sambu na nge. Kansi yo kele ntangu ya mbote sambu na kukumisa lukwikilu na nge ngolo. Samba Yehowa mpi tanga mambu  yina Yezu tubaka na Matayo 6:25-34 mpi yindula yo mingi. Yindula bambandu ya bilumbu na beto yina ke monisa nde Yehowa ke lungisaka bampusa ya bantu yina ke tulaka yandi na kisika ya ntete. (1 Bak. 15:58) Yo ta sadisa nge na kundima kibeni nde Tata na nge ya zulu ta sadisa nge mutindu yandi sadisaka bampangi yina kutanaka ti mambu ya mutindu mosi ti nge. Yandi ke zaba bima yina nge kele ti yo mfunu mpi yandi ke zaba mutindu ya kupesa nge yo. Kana nge ke mona mutindu Yehowa ke sadisa nge, lukwikilu na nge ta kuma ngolo mpi yo ta sadisa nge na kukanga ntima na bampasi ya ngolo na bilumbu ke kwisa.—Hab. 3:17, 18.

7. Mutindu Matayo 8:23-26 ke monisa yo, nki mutindu “mupepe mosi ya ngolo” mekaka lukwikilu ya balongoki?

⁷ Ntangu Yezu ti balongoki na yandi vandaka kusala voyage na maswa, mupepe ya ngolo bulaka na nzadi. Na dibaku yina, Yezu sadisaka bo na kubakisa nde bo vandaka ti mfunu ya kukumisa lukwikilu na bo ngolo. (Tanga Matayo 8:23-26.) Mupepe vandaka kubula ngolo kibeni mpi masa fulukaka na maswa kansi Yezu vandaka ya kulala. Balongoki waka boma mpi bo telemisaka Yezu sambu na kugulusa bo. Kansi Yezu yulaka bo nde: “Sambu na nki beno ke wa boma, beno bantu ya kele na lukwikilu ya fioti?” Yo lombaka nde bo bakisa nde Yehowa ta tanina Yezu kukonda mpasi ti bantu yina vandaka ti Yezu. Yo ke longa beto nki? Lukwikilu ya ngolo lenda sadisa beto na kukanga ntima na konso mpasi ya ngolo yina kele bonso ‘mupepe ya ngolo.’

8-9. Inki mekaka lukwikilu ya mpangi Anel mpi nki sadisaka yandi?

⁸ Mpangi-nkento Anel ke zingaka na Porto Rico mpi yandi me kwelaka ntete ve. Lukwikilu na yandi kumaka ngolo ntangu yandi kutanaka ti mpasi mosi ya ngolo. Mupepe ya ngolo bulaka kisika yina yandi ke zingaka. Mupepe ya ngolo Maria bulaka na 2017 mpi yo bebisaka nzo na yandi. Mupepe yina ya ngolo salaka mpi nde yandi vanda diaka ve ti kisalu. Yandi ke tuba nde: “Na bantangu yina ya mpasi, mono vandaka ti basusi ya ngolo. Kansi mono bakisaka nde mono fwete tudila Yehowa ntima na nzila ya kisambu mpi kubika ve nde basusi yina kukanga mono nzila ya kusala mambu yina yo lombaka nde mono sala.”

⁹ Mpangi Anel ke tuba nde bulemfu sadisaka yandi mpi na kukanga ntima na mpasi yina ya ngolo. Yandi ke tuba nde: “Kuzitisa mambu ya organizasio ya Yehowa sadisaka mono na kuwa ve boma. Yehowa sadisaka mono na nzila ya bampangi. Bo pesaka mono kikesa mpi bo pesaka mono bima yina mono vandaka na yo mfunu.” Yandi ke tuba diaka nde: “Yehowa pesaka mono diaka bima mingi kibeni kuluta yina mono vandaka na yo mfunu mpi yo kumisaka lukwikilu na mono ngolo kibeni.”

10. Inki nge lenda sala kana nge ke kutana ti mpasi ya ngolo?

¹⁰ Keti nge ke kutana ti mpasi ya ngolo na luzingu na nge? Mbala ya nkaka nge ke kutana ti bampasi ya kisumbula ya lugangu. To mbala ya nkaka nge ke bela maladi ya ngolo yina ke lembisa nge kibeni nitu mpi nge ke zaba ve mambu yina nge lenda sala. Bantangu ya nkaka nge lenda vanda ti basusi kansi kubika ve nde basusi yina kukanga  nge nzila ya kutudila Yehowa ntima. Samba yandi na masonga yonso sambu na kukwenda pene-pene na yandi. Yindula mingi bantangu yina Yehowa sadisaka nge sambu na kukumisa lukwikilu na nge ngolo. (Nk. 77:11, 12) Ndima nde yandi ta yambula nge ve ata fioti.

11. Sambu na nki beto fwete lemfukila bampangi yina ke twadisaka?

¹¹ Inki diaka lenda sadisa nge na kukanga ntima na bampasi ya ngolo? Bulemfu ta sadisa nge mutindu yo sadisaka mpangi Anel. Tula ntima na bantu yina Yehowa ti Yezu ke tudilaka ntima. Bantangu ya nkaka, bampangi yina ke twadisaka lenda songa beto na kusala mambu yina ke yitukisa beto. Yehowa ke sakumunaka bantu ya bulemfu. Ndinga na yandi mpi bambandu ya bansadi na yandi yina ke kangamaka na yandi ke monisa nde bulemfu ke gulusaka. (Kub. 14:1-4; 2 Bans. 20:17) Yindula mingi bambandu yina. Yo ta kumisa ngolo mpusa na nge ya kulemfuka na mambu yina organizasio ya Yehowa ke tubaka bubu yai mpi na bilumbu ke kwisa. (Baeb. 13:17) Yo ta sadisa nge na kuwa ve boma ya mpasi ya nene yina me kuma pene.—Bing. 3:25.

12. Inki mutindu mambu yina Luka 18:1-8 ke tuba ke monisa kuwakana yina kele na kati ya lukwikilu mpi kukanga ntima na mambu ya kukonda lunungu?

¹² Yezu zabaka nde mambu ya kukonda lunungu ta meka lukwikilu ya balongoki na yandi. Yandi pesaka mbandu mosi yina kele na mukanda ya Luka sambu na kusadisa bo na kukanga ntima na mambu ya kukonda lunungu. Yezu telaka bo disolo ya mufwidi mosi yina vandaka kudidila zuzi mosi ya kukonda lunungu sambu zuzi yango kusadila yandi mambu na lunungu yonso. Yandi ndimaka nde nsuka-nsuka, zuzi yina ta sadisa yandi kana yandi landa kudidila yandi. Nsuka-nsuka, zuzi yina sadilaka mufwidi yina mambu na lunungu mutindu yandi zolaka. Yo ke longa beto nki? Yo ke longa beto nde Yehowa kele Nzambi ya lunungu. Yo yina Yezu tubaka nde: “Ebuna, keti Nzambi ta zenga ve mambu na lunungu sambu na bantu yina yandi me solaka, bayina ke didilaka yandi mpimpa ti mwini?” (Tanga Luka 18:1-8.) Yezu tubaka diaka nde: “Ntangu Mwana ya muntu ta kwisa, keti yandi ta kuta kibeni lukwikilu yai na ntoto?” Kana bo ke sadila beto mambu ya kukonda lunungu, beto fwete vanda ntima-nda mpi kulanda kudidila Yehowa sambu yandi sadisa beto sambu beto vanda ti lukwikilu ya ngolo bonso ya mufwidi yina. Lukwikilu yina ta sadisa beto na kundima kibeni nde Yehowa ta sadisa beto. Beto fwete ndima mpi nde kisambu kele ngolo mingi. Bantangu ya nkaka, Yehowa lenda pesa mvutu na bisambu na beto na mutindu yina beto yindulaka ve.

13. Inki mutindu kisambu sadisaka dibuta mosi yina bo sadilaka mambu ya kukonda lunungu?

¹³ Beto tadila mambu yina kuminaka mpangi Vero yina ke zingaka na République démocratique du Congo. Mpangi Vero ti bakala na yandi yina ke sambilaka ve Yehowa mpi mwana na bo ya nkento ya bamvula 15 tinaka bwala na bo sambu kimvuka mosi ya basoda kotaka na bwala na bo sambu na kunwanisa yo. Ntangu bo vandaka kutina, kimvuka mosi ya basoda telemisaka bo na  nzila mpi bo tubaka nde bo ke fwa bo. Ntangu mpangi Vero yantikaka kudila, mwana na yandi sosaka kuvandisa yandi pima ntangu yandi sambaka Yehowa na ndinga ya ngolo mpi yandi vandaka kuvutukila zina ya Yehowa mbala na mbala na kisambu na yandi. Ntangu yandi manisaka kusamba, mfumu ya basoda yulaka yandi nde: “Mwana, nani longaka nge kusamba?” Yandi vutulaka nde: “Mama muntu me longaka mono kusamba mpi yandi sadilaka mbandu ya kisambu yina kele na Matayo 6:9-13.” Mfumu yina ya basoda tubaka nde: “Mwana, kwenda na ngemba ti bibuti na nge mpi bika nde Yehowa Nzambi na nge kutanina beno!”

14. Inki lenda meka lukwikilu na beto mpi nki ta sadisa beto na kukanga ntima?

¹⁴ Bambandu ya mutindu yina ke longa beto nde beto fwete vila ve ata fioti nde kisambu kele mfunu mingi. Ebuna nki nge ta sala kana Yehowa ke pesa ve mvutu nswalu na bisambu na nge to yandi ke pesa ve mvutu na mutindu ya kuyituka? Bonso mufwidi yina Yezu tubilaka na mbandu yina yandi pesaka, landa kusamba, ndima nde Nzambi ta yambula nge ve mpi nde yandi ta pesa mvutu na kisambu na nge na ntangu ya mbote mpi na mutindu ya mbote. Landa kulomba Yehowa mpeve santu na yandi. (Bafil. 4:13) Kuvila ve nde kubika fioti Yehowa ta sakumuna nge mingi kibeni mpi nge ta vila bampasi yonso yina nge kutanaka ti yo. Mutindu Yehowa ke sadisa nge na kukanga ntima na bampasi ya ngolo yina nge ke kutana ti yo, lukwikilu na nge ke kuma ngolo mpi yo ta sadisa nge na kukanga ntima na bampasi yina nge ta kutana ti yo na bilumbu ke kwisa.—1 Pie. 1:6, 7.

15. Mutindu Matayo 17:19, 20 ke monisa yo, nki bampasi balongoki ya Yezu kutanaka ti yo?

¹⁵ Yezu songaka balongoki na yandi nde lukwikilu ta sadisa bo na kulanda kusadila Yehowa ata bo ke kutana ti bampasi. (Tanga Matayo 17:19, 20.) Na dibaku mosi, bo kukaka ve kukula demo mosi ata bantangu ya nkaka bo salaka yo. Sambu na nki bo kukaka ve? Yezu songaka bo nde bo vandaka ti mfunu ya lukwikilu mingi. Yandi songaka bo nde, kana bo kele ti lukwikilu mingi, bo ta landa kusadila Yehowa ata bo ke kutana ti bampasi ya ngolo kibeni. Bubu yai, beto ke kutana mpi ti bampasi ya ngolo yina ke monana bonso nde beto ta kuka ve kukangila yo ntima.

16. Inki mutindu lukwikilu sadisaka mpangi Geydi na kukanga ntima na mpasi ya ngolo yina yandi kutanaka ti yo?

¹⁶ Beto tadila mbandu ya mpangi-nkento Geydi na Guatémala. Babandi fwaka bakala na yandi Edi ntangu bo katukaka na lukutakanu mpi bo vandaka kuvutuka na nzo. Inki mutindu lukwikilu ya mpangi Geydi sadisaka yandi na kukanga ntima na mpasi yina ya ngolo? Yandi ke tuba nde: “Kisambu ke sadisaka mono na kulosila Yehowa kizitu na mono mpi yo ke sadisaka mono na kukuma na ngemba. Mono ke monaka mutindu Yehowa ke sadisaka mono na nzila ya dibuta mpi ya banduku na dibundu. Mono ke kudipesaka na kisalu ya Yehowa, yo ke sadisaka mono na kuwa ve mpasi mingi mpi mono ke sadilaka Yehowa konso kilumbu mpi mono ke kudiyangisaka ve mingi sambu na mbasi. Mpasi ya ngolo yina mono kutanaka ti yo sadisaka mono na kubakisa nde mono ta  kuka kukanga ntima na konso mpasi yina mono lenda kutana ti yo na bilumbu ke kwisa ti lusadisu ya Yehowa, ya Yezu mpi ya dibundu ya Yehowa.”

17. Inki beto lenda sala kana beto ke kutana ti mpasi ya ngolo?

¹⁷ Keti muntu yina nge ke zolaka me fwa? Tanga masolo ya Biblia ya ke tubila bantu yina futumukaka sambu na kukumisa lukwikilu na nge ngolo na yina me tala kivuvu ya lufutumuku. Keti nge kele na mawa sambu bo me basisa muntu mosi ya dibuta na beno na dibundu? Longuka Biblia sambu nge ndima kibeni nde ndola yina Yehowa ke pesaka ke vandaka mbote ntangu yonso. Tadila konso mpasi yina nge ke kutana ti yo bonso dibaku ya mbote ya kukumisa lukwikilu na nge ngolo. Songa Yehowa mbote-mbote mambu yonso yina ke yangisa nge. Kudivandila ve, kangama ti bampangi. (Bing. 18:1) Sala mambu yina ta sadisa nge na kukanga ntima na mpasi yina nge ke kutana ti yo ata nge ke dila ntangu nge ke yibuka mambu yina nge ke kutana ti yo. (Nk. 126:5, 6) Landa kukwenda mbala na mbala na balukutakanu, longa nsangu ya mbote mbala na mbala mpi tanga Biblia konso kilumbu. Tula dikebi na mambu ya kitoko yina Yehowa ke tuba nde yandi ta pesa nge na bilumbu ke kwisa. Kana nge ke mona mutindu Yehowa ke sadisa nge bubu yai, lukwikilu na nge ta kuma ngolo kibeni.

18. Kana nge me bakisa nde lukwikilu na nge me lemba, nki nge lenda sala?

¹⁸ Kana bampasi ya ngolo yina nge kutanaka ti yo to yina nge ke kutana ti yo ke lembisa lukwikilu na nge, kulemba ve nitu. Mona yo dibaku ya mbote ya kukumisa lukwikilu na nge ngolo. Lomba kima yina Bantumwa ya Yezu lombaka. Bo tubaka nde: “Pesa beto lukwikilu mingi.” (Luka 17:5) Yindula mpi bambandu ya beto me tubila na disolo yai. Sala bonso mpangi Miguel ti nkento na yandi Yurai. Yibuka bantangu yonso yina Yehowa sadisaka nge. Kana nge ke kutana ti mpasi ya ngolo, samba Yehowa mingi bonso mwana ya mpangi Vero mpi mpangi Anel. Bonso mpangi Geydi, ndima nde Yehowa lenda sadisa nge na nzila ya dibuta mpi ya banduku. Kana nge ke bika nde Yehowa kusadisa nge na bampasi ya ngolo yina nge ke kutana na yo bubu yai, yo ta sadisa nge na kundima kibeni nde yandi ta sadisa nge na kukanga ntima na konso mpasi ya ngolo yina nge lenda kutana ti yo na bilumbu ke kwisa.

19. Inki Yezu ndimaka mpi nki nge ke ndima?

¹⁹ Yezu sadisaka balongoki na yandi na kuzaba kisika yina bo vandaka ti mfunu ya lukwikilu mingi. Kansi yandi ndimaka kibeni nde Yehowa ta sadisa bo na kukanga ntima na bampasi ya ngolo yina bo lenda kutana ti yo na bilumbu ke kwisa. (Yoa. 14:1; 16:33) Yandi ndimaka nde lukwikilu ya ngolo ta sadisa kimvuka ya nene na kuguluka na mpasi ya nene. (Kus. 7:9, 14) Keti nge ta vanda na kati ya kimvuka ya nene yina ta guluka? Nge ta vanda kana Yehowa kusadisa nge mpi kana nge ke sala yonso yina nge lenda sala bubu yai sambu na kukumisa lukwikilu na nge ngolo.—Baeb. 10:39.