1. Nĩ kĩũria kĩrĩkũ tũngĩĩyũria?

 HIHI rĩmwe na rĩmwe nĩ ũiguaga watangĩka hĩndĩ ĩrĩa weciria maũndũ marĩa marĩ mbere, ta kwanangwo kwa ndini cia maheeni, tharĩkĩro ya Gogu wa Magogu, na mbaara ya Hari–Magedoni? Hihi rĩmwe nĩ wĩyũragia atĩrĩrĩ, ‘Rĩrĩa ihinda rĩu rĩgaakinya-rĩ, hihi nĩ ngaahota gũkirĩrĩria maũndũ macio ma kũguoyohia na ndũũrie wĩkindĩru wakwa?’ Angĩkorũo rĩmwe nĩ wĩciragia maũndũ ta macio, kwarĩrĩria ciugo cia Jesu iria irĩ rĩandĩko-inĩ ritũ rĩa mũthingi nĩ gũgũkorũo kũrĩ na ũguni mũnene harĩ wee. Jesu eerire arutwo ake ũũ: “Mũtikareke ngoro cianyu itangĩke. Onaniai wĩtĩkio.” (Joh. 14:1) Wĩtĩkio ũrĩ na hinya nĩ ũgaatũteithia kũng’ethanĩra na maũndũ marĩa mokĩte tũrĩ na ũmĩrĩru.

2. Tũngĩkĩra wĩtĩkio witũ hinya atĩa? Nĩ maũndũ marĩkũ tũkwarĩrĩria gĩcunjĩ-inĩ gĩkĩ?

² No twĩkĩre hinya wĩtĩkio witũ nĩguo tũkaahota gwĩtiiria magerio marĩa mokĩte, na njĩra ya gũthuthuria ũrĩa tũhiũranagia na magerio marĩa tũracemania namo ũmũthĩ. Rĩrĩa twathuthuria ũrĩa tũhiũranagia na magerio marĩa tũcemanagia namo, no tuone harĩa tũrabatara kũrutĩra wĩra nĩguo twĩkĩre wĩtĩkio witũ hinya. Hingo ciothe rĩrĩa twakirĩrĩria igerio rĩna, wĩtĩkio witũ nĩ ũgĩaga na hinya makĩria. Ũndũ ũcio nĩ ũgaatũteithia gwĩtiiria magerio marĩa magooka. Gĩcunjĩ-inĩ gĩkĩ nĩ tũgũthuthuria maũndũ mana arutwo a Jesu maacemanirie namo, marĩa maaguũririe atĩ nĩ maabataraga kuongerera wĩtĩkio wao hinya. Nĩ tũgũcoka twarĩrĩrie ũrĩa tũngĩkirĩrĩria magerio ta macio ũmũthĩ, na ũrĩa magerio macio mangĩtũhaarĩrĩria nĩ ũndũ wa mahinda marĩa maroka.

3. Ciugo cia Jesu thĩinĩ wa Mathayo 6:30, 33 itũteithagia gũtaũkĩrũo nĩ ũndũ ũrĩkũ?

³ Nĩ ũndũ wa ndũire harĩ kĩongo gĩa famĩlĩ kũgĩa na wendi wa kũhe famĩlĩ yake irio, nguo, na handũ ha gũikara. Ti hĩndĩ ciothe ũndũ ũcio ũkoragwo ũrĩ mũhũthũ, makĩria mahinda-inĩ maya maritũ. O na kũrĩ aarĩ na ariũ a Ithe witũ amwe morĩtwo nĩ mawĩra mao, na o na merutanĩria atĩa gũcaria mawĩra mangĩ mationaga. Amwe nao maheagwo mawĩra mangĩ no makamarega, tondũ nĩ mawĩra matagĩrĩire Mũkristiano. Maũndũ-inĩ ta macio, no tũbatare gũkorũo na wĩtĩkio mũrũmu, nĩguo tũkahota gũkorũo na ma atĩ Jehova nĩ arĩhingagia mabataro ma famĩlĩ citũ. Jesu nĩ aateithirie arutwo ake gũtaũkĩrũo wega nĩ ũndũ ũcio hĩndĩ ya Mahunjio make ma Kĩrĩma-inĩ. (Thoma Mathayo 6:30, 33.) Rĩrĩa twakorũo na ma biũ atĩ Jehova ndangĩtũtiganĩria, nĩ tũhotaga kũiga mbere maũndũ marĩa magĩrĩire, maũndũ ma Ũthamaki. Rĩrĩa tuona ũrĩa Jehova aratũhingĩria mabataro maitũ, nĩ tũhotaga kũmũkuhĩrĩria makĩria, naguo wĩtĩkio witũ ũkagĩa hinya makĩria.

4-5. Nĩ ũndũ ũrĩkũ ũteithĩtie famĩlĩ ĩmwe kũhiũrania na mĩtangĩko ĩgiĩ kuona mabataro mao ma o mũhaka?

⁴ Rekei tuone ũrĩa famĩlĩ ĩmwe kuuma Venezuela yeyoneire ũteithio wa Jehova hĩndĩ ĩrĩa maarĩ na mĩtangĩko ĩgiĩ ũrĩa mekũhingia mabataro mao. Kũrĩ hĩndĩ ĩmwe famĩlĩ ĩyo moonaga mabataro ma mũthingi kuumana na mũgũnda wao. No thutha ũcio andũ marĩ na mĩcinga nĩ mookire na makĩmaingata, na makĩĩyoera mũgũnda wao. Miguel, kĩongo kĩa famĩlĩ ĩyo aaugire ũũ: “Rĩu twĩhokaga mũno indo iria tũrĩmaga kuuma kamũgũnda kanini ga gũkombora. Nyambagĩrĩria mũthenya wakwa hingo ciothe na kũhoya Jehova atũhe kĩrĩa tũrabatara nĩ ũndũ wa mũthenya ũcio.” Ũtũũro nĩ mũritũ harĩ famĩlĩ ĩyo, no tondũ nĩ mehokaga atĩ Ithe witũ wa igũrũ nĩ ekũmahingĩria mabataro ma o mũthenya, nĩ mathiaga mĩcemanio mategũtĩrĩria na makanyitanĩra ũtungata-inĩ. Nĩ maigaga maũndũ ma Ũthamaki mbere ũtũũro-inĩ wao, na Jehova nĩ amaheaga kĩrĩa marabatara.

⁵ Moritũ-inĩ macio mothe, ũndũ ũrĩa Miguel na mũtumia wake Yurai maigaga meciria-inĩ mao nĩ ũrĩa Jehova amarũmbũyagia. Rĩmwe na rĩmwe Jehova nĩ ahũthagĩra aarĩ na ariũ a Ithe witũ kũhe famĩlĩ ĩyo ũteithio ũrĩa marabatara, kana gũteithia Miguel kuona wĩra angĩruta. Mahinda-inĩ mangĩ namo Jehova nĩ amateithagia kuona mabataro ma o mũhaka kũgerera ũteithio ũrĩa wabici ya rũhonge ĩheanaga. Jehova ndarĩ amatiganĩria. Ũndũ ũcio nĩ ũtũmĩte wĩtĩkio wa famĩlĩ ĩyo ũgĩe na hinya. Mũirĩtu wao ũrĩa mũkũrũ wĩtagwo Yoselin aaugire ũũ thutha wa gũtaarĩria ũrĩa Jehova aamateithirie hĩndĩ ĩmwe: “Nĩ ũndũ wa gwĩkĩra ngoro kuona ũrĩa Jehova aatũteithirie. Ndĩmuonaga arĩ mũrata ingĩhoka hĩndĩ ciothe.” Aacokire akiuga ũũ: “Magerio marĩa tũcemanĩtie namo twĩ famĩlĩ nĩ matũhaarĩirie nĩ ũndũ wa magerio maritũ o na makĩria mahinda marĩa maroka.”

6. Ũngĩkĩra wĩtĩkio waku hinya atĩa rĩrĩa ũrĩ na moritũ ma kĩĩmbeca?

 ⁶ Hihi ũrĩ na moritũ ma kĩĩmbeca? Angĩkorũo nĩguo, no mũhaka ũkorũo nĩ ũtangĩkaga mũno. No o na ũkĩhĩtũkagĩra moritũ, no ũhũthĩre ihinda rĩrĩ gwaka wĩtĩkio waku. Hoyaga Jehova na ũgathoma ciugo cia Jesu thĩinĩ wa Mathayo 6:25-34, na ũgaciĩcũrania. Ningĩ wĩcũranagie maũndũ monetwo matukũ-inĩ maya, marĩa maronania atĩ Jehova nĩ arũmbũyagia andũ arĩa maigaga Ũthamaki wake mbere. (1 Kor. 15:58) Gwĩka ũguo nĩ kũrĩgũteithagia gũkorũo na ma biũ atĩ Ithe witũ wa igũrũ nĩ arĩgũteithagia, o ta ũrĩa ateithĩtie andũ angĩ maragerera moritũ o ta maku. Nĩ oĩ kĩrĩa ũrabatara, na nĩ oĩ ũrĩa angĩgũteithia. Kuona Jehova agĩgũteithia ũtũũro-inĩ nĩ kũrĩkĩraga wĩtĩkio waku hinya, na ũndũ ũcio nĩ ũgaagũteithia gwĩtiiria magerio manene o na makĩria mahinda marĩa maroka.—Hab. 3:17, 18.

7. Kũringana na Mathayo 8:23-26, wĩtĩkio wa arutwo a Jesu wageririo atĩa nĩ “kĩhuhũkanio kĩnene”?

⁷ Rĩrĩa Jesu na arutwo ake maacemanirie na kĩhuhũkanio kĩnene marĩ iria-inĩ, Jesu nĩ aahũthĩrire mweke ũcio kũmateithia mone atĩ nĩ maabataraga gwĩkĩra wĩtĩkio wao hinya. (Thoma Mathayo 8:23-26.) Kĩhuhũkanio kĩu kĩarĩ kĩnene ũndũ gatarũ kaahumbĩragwo nĩ maĩ, no Jesu aarĩ toro. Arutwo ake marĩ na guoya maamũkĩririe na makĩmwĩra amahonokie, nake akĩmarũnga na njĩra ya wendo akĩmeera: “Nĩ kĩĩ kĩratũma mwĩtigĩre ũguo, inyuĩ mũrĩ na wĩtĩkio mũnini?” Arutwo acio nĩ maabatiĩ kũmenya atĩ Jehova aarĩ na ũhoti wa kũgitĩra Jesu na andũ arĩa maarĩ hamwe nake. Nĩ ũndũ ũrĩkũ tũreruta? Wĩtĩkio mũrũmu no ũtũteithie gwĩtiiria “kĩhuhũkanio kĩnene” kana ũndũ ũngĩ o wothe mũritũ ũngĩhaananio na kĩhuhũkanio.

8-9. Wĩtĩkio wa Anel wageririo atĩa, na nĩ kĩĩ kĩamũteithirie?

⁸ Wĩtĩkio wa mwarĩ wa Ithe witũ ũmwe ũtarĩ kĩhiko-inĩ wĩtagwo Anel kuuma Puerto Rico nĩ wekĩrirũo hinya thutha wake gũcemania na igerio inene. Mwaka-inĩ wa 2017, nĩ kwagĩire na kĩhuhũkanio kĩnene kĩrĩa gĩetagwo Maria, na gĩkĩananga mũciĩ wake. Ningĩ nĩ oorirũo nĩ wĩra wake nĩ ũndũ wa kĩhuhũkanio kĩu. Anel aaugire ũũ: “Ihinda-inĩ rĩu iritũ nĩ ndaarĩ na mĩtangĩko mĩingĩ, no nĩ ndeerutire kwĩhokaga Jehova na njĩra ya kũmũhoya na kwaga kũreka mĩtangĩko ĩndorie.”

⁹ Anel ningĩ aaugire atĩ wathĩki nĩ wamũteithirie kũhiũrania na igerio rĩu. Aaugire ũũ: “Kũrũmĩrĩra ũtaaro ũrĩa twaheirũo nĩ ithondeka nĩ kwandeithirie gũikara hooreire. Jehova nĩ aandeithirie kũgerera aarĩ na ariũ a Ithe witũ. Nĩ maanjĩkagĩra ngoro na makahe indo cia o mũhaka iria ndabataraga.” Aacokire akiuga ũũ: “Jehova aaheaga makĩria ma indo iria ndamũhoyaga, na ũndũ ũcio nĩ watũmire wĩtĩkio wakwa ũgĩe na hinya o na makĩria.”

10. Ũngĩka atĩa angĩkorũo harĩ na ũndũ mũritũ mũno ũragerera?

 ¹⁰ Hihi harĩ ũndũ mũritũ mũno ũracemania naguo ũtũũro-inĩ? Ũndũ ũcio no ũkorũo ũrĩ gĩcanjama kĩa ndũire. Kana no ũkorũo ũrĩ kĩhuhũkanio kĩa mũhaano, ta hihi mũrimũ mũũru ũratũma ũigue ũritũhĩirũo na ũtarĩ na wa gwĩka. Rĩmwe na rĩmwe no ũigue ũgĩtangĩka mũno, no ndũkarekage mĩtangĩko ĩtũme wage kwĩhoka Jehova. Mũkuhĩrĩrie na njĩra ya kũmũhoyaga kaingĩ. Ĩkĩra wĩtĩkio waku hinya na njĩra ya gwĩcũrania igũrũ rĩgiĩ mahinda marĩa Jehova anagũteithia ihinda ihĩtũku. (Thab. 77:11, 12) Gwĩka ũguo no gũgũteithie gũkorũo na ma atĩ gũtirĩ hĩndĩ agaagũtiganĩria.

11. Nĩkĩ nĩ wagĩrĩirũo gũtua itua rĩa gwathĩkagĩra andũ arĩa Jehova amũrĩte gũtongoragia maũndũ?

¹¹ Nĩ ũndũ ũrĩkũ ũngĩ ũngĩgũteithia gwĩtiiria magerio? O ta ũrĩa Anel aaugire, nĩ wathĩki. Wĩrute kwĩhokaga andũ arĩa Jehova na Jesu mehokete. Rĩmwe na rĩmwe, andũ arĩa mamũrĩtwo matongorie no matũhe ũtongoria tũrona ta ũtagĩrĩire. O na kũrĩ ũguo, Jehova nĩ atũrathimaga rĩrĩa twathĩka. Nĩ tuonaga wega atĩ wathĩki nĩ ũhonokagia mĩoyo rĩrĩa twathoma Kiugo gĩake na maũndũ marĩa ndungata ciake njĩhokeku ciĩyoneire. (Tham. 14:1-4; 2 Maũ. 20:17) Wĩcũranagie igũrũ rĩgiĩ ngerekano ta icio. Gwĩka ũguo nĩ kũrĩkĩraga hinya itua rĩaku rĩa kũnyitanĩra na mĩbango ya ithondeka ihinda-inĩ rĩrĩ na ihinda rĩrĩa rĩroka. (Ahib. 13:17) Makĩria ma ũguo, ndũrĩiguaga guoya nĩ ũndũ wa thĩna mũnene ũrĩa ũgũka ica ikuhĩ.—Thim. 3:25.

12. O ta ũrĩa Luka 18:1-8 yonanĩtie-rĩ, gũkorũo na wĩtĩkio kũngĩtũteithia atĩa gwĩtiiria wagi wa kĩhooto?

¹² Jesu nĩ aamenyaga atĩ wĩtĩkio wa arutwo ake nĩ ũngĩageririo nĩ maũndũ ma wagi wa kĩhooto. Nĩguo amateithie kũhiũrania na ũndũ ũcio, nĩ aaheanire ngerekano ĩrĩ thĩinĩ wa ibuku rĩa Luka. Aataarĩirie ũhoro wĩgiĩ mũtumia wa ndigwa waikaraga agĩthaithaga mũcirithania ũtaarĩ mũthingu atigĩrĩre atĩ nĩ ona kĩhooto. Aarĩ na ma atĩ angĩathiire na mbere kũmũthaitha nĩ angĩamũteithirie. Mũthia-inĩ mũciirithania ũcio nĩ aamũteithirie. Tũreruta atĩa? Jehova nĩ arĩ kĩhooto. Nĩ ũndũ ũcio, Jesu aaugire ũũ: “Kwoguo-rĩ, githĩ Ngai ndarĩtigagĩrĩra atĩ andũ ake arĩa athuure, arĩa mamũkayagĩra mũthenya na ũtukũ nĩ mona kĩhooto?” (Thoma Luka 18:1-8.) Aacokire akiuga ũũ: “Hĩndĩ ĩrĩa Mũrũ wa mũndũ agaakinya-rĩ, hihi kũna nĩ agaakora wĩtĩkio ta ũcio gũkũ thĩ?” Rĩrĩa twekwo maũndũ matarĩ ma kĩhooto, no tuonanie atĩ tũrĩ na wĩtĩkio mũrũmu ta wa mũtumia ũcio wa ndigwa na njĩra ya gũkorũo na wetereri na ũkirĩrĩria. Wĩtĩkio ta ũcio no ũtũteithie gũkorũo na ma atĩ Jehova nĩ egũtũteithia. Ningĩ nĩ tũrabatara gwĩtĩkia atĩ mahoya nĩ marĩ ũhoti mũnene. Rĩmwe na rĩmwe mahoya maitũ no macokio na njĩra tũterĩgĩrĩire.

13. Mahoya maateithirie atĩa famĩlĩ ĩmwe yacemanirie na ũndũ ũtarĩ wa kĩhooto?

¹³ Ta wĩcirie ũhoro wa mwarĩ wa Ithe witũ wĩtagwo Vero, ũrĩa ũikaraga bũrũri-inĩ wa Democratic Republic of the Congo. Kũrĩ hĩndĩ  we, mũthuri wake ũtarĩ mwĩtĩkia, na kairĩtu kao ka mĩaka 15 maabatarire kũũra kuuma itũũra-inĩ rĩao, thutha wa itũũra rĩu gũtharĩkĩrũo nĩ thigari. Marĩ njĩra-inĩ nĩ maacemanirie na thigari icio na ikĩmarũgamia, na ikĩmeera atĩ nĩ ikũmoraga. Rĩrĩa Vero aambĩrĩirie kũrĩra, kairĩtu kau gake nĩ kaageririe kũmũhooreria na njĩra ya kũhoya kanĩrĩire na kũhũthĩra rĩĩtwa rĩa Jehova maita maingĩ gakĩhoya. Rĩrĩa kaarĩkirie kũhoya, mũnene wa gĩkundi kĩu gĩa thigari aakoririe: “Kairĩtu, nũũ ũkũrutĩte kũhoya?” Nako gakĩmwĩra: “Nĩ mami ũndutĩte, akĩhũthĩra ihoya rĩa kĩonereria rĩrĩa rĩrĩ thĩinĩ wa Mathayo 6:9-13.” Mũnene ũcio wa thigari akiuga, “Kairĩtu, thiĩi na thayũ kũrĩa mũgũthiaga na aciari aku, na Jehova Ngai wanyu aromũgitĩra!”

14. Nĩ ũndũ ũrĩkũ ũngĩgeria wĩtĩkio witũ, na nĩ kĩĩ kĩngĩtũteithia gwĩtiiria?

¹⁴ Maũndũ ta macio monetwo nĩ matũteithagia kũmenya atĩ mahoya nĩ ma bata mũno. No hihi wagĩrĩirũo gwĩka atĩa mahoya maku mangĩaga gũcokio na ihenya kana na njĩra ya mwanya? O ta ngerekano ya Jesu ĩgiĩ mũtumia wa ndigwa, thiĩ na mbere kũhoya ũrĩ na ma atĩ Ngai witũ ndarĩ hĩndĩ agaagũtiganĩria, na atĩ mũthia-inĩ nĩ arĩcokia mahoya maku. Thiĩ na mbere gũthaitha Jehova akũhe roho wake mũtheru. (Afil. 4:13) Ririkanaga atĩ ica ikuhĩ Jehova nĩ egũkũrathima na njĩra nene, nginya ũriganĩrũo nĩ mathĩna marĩa wanagerera. Rĩrĩa wetiiria magerio ũgĩteithio nĩ Jehova nĩ ũrĩgĩaga na hinya, na nĩ ũkaahota gwĩtiiria magerio ihinda rĩrĩa rĩroka.—1 Pet. 1:6, 7.

15. O ta ũrĩa Mathayo 17:19, 20 yonanĩtie-rĩ, nĩ ũndũ ũrĩkũ mũritũ arutwo a Jesu maacemanirie naguo?

¹⁵ Jesu aarutire arutwo ake atĩ wĩtĩkio nĩ ũngĩamateithirie gũtooria mĩhĩnga. (Thoma Mathayo 17:19, 20.) Kũrĩ hĩndĩ ĩmwe maaremirũo kũingata ndaimono, o na gũtuĩka mbere ĩyo nĩ maahotete gwĩka ũguo. Thĩna warĩ ũrĩkũ? Jesu aaugire atĩ nĩ maabataraga wĩtĩkio makĩria. Aamerire atĩ mangĩarĩ na wĩtĩkio mũrũmu, nĩ mangĩahotire gũtooria mĩhĩnga ĩigana ta kĩrĩma. O na ithuĩ ũmũthĩ, no tũcemanie na moritũ mangĩoneka ta makĩrĩte ũhoti witũ.

16. Wĩtĩkio ũteithĩtie Geydi atĩa kũhiũrania na ruo rũnene rwa gũkuĩrũo?

¹⁶ Ta wĩcirie ũhoro wa mwarĩ wa Ithe witũ wĩtagwo Geydi kuuma Guatemala. Mũthuri wake wetagwo Edi, ooragirũo mũthenya ũmwe makĩinũka kuuma mĩcemanio-inĩ. Wĩtĩkio wa Geydi ũmũteithĩtie atĩa kũhiũrania na kĩeha kĩnene gĩa gũkuĩrũo? Aaugire ũũ: “Mahoya nĩ mandeithagia gũikĩria Jehova mũrigo wakwa, na ũndũ ũcio nĩ ũtũmaga ngĩe na thayũ. Nĩ nyonaga Jehova akĩnũmbũiya kũgerera harĩ famĩlĩ yakwa na arata thĩinĩ wa kĩũngano. Gũkorũo na maũndũ maingĩ ma gwĩka ũtungata-inĩ wa Jehova nĩ gũtũmaga ruo rwakwa rũnyihanyihe, na gũkandeithia kũhiũrania na o mũthenya na mathĩna maguo itegũtangĩka mũno nĩ ũndũ wa rũciũ. Ũndũ ũcio nĩ ũndutĩte atĩ o na ingĩcemania na igerio rĩrĩkũ mahinda marĩa maroka, nĩ ngaahota kũrĩtooria kũgerera ũteithio wa Jehova, Jesu, na ithondeka rĩake.”

17. Ũngĩka atĩa ũngĩcemania na ũndũ mũritũ ũngĩhaananio na kĩrĩma?

 ¹⁷ Hihi nĩ ũracakaya nĩ ũndũ wa gũkuĩrũo nĩ mũndũ wendete? Caragia mahinda ma gwĩkĩra hinya wĩtĩkio waku ũhoro-inĩ wĩgiĩ kĩĩrĩgĩrĩro gĩa kũriũka, na njĩra ya gũthoma ũhoro wa andũ magwetetwo Bibilia-inĩ arĩa maariũkirio. Hihi nĩ ũracakaya nĩ ũndũ wa mũndũ wa famĩlĩ yanyu weheretio thĩinĩ wa kĩũngano? Ĩka ũthuthuria nĩguo ũkorũo na ma atĩ njĩra ya Jehova ya kũrũnga andũ nĩyo njega biũ. Rĩrĩa rĩothe wacemania na thĩna, onaga ũcio ũrĩ mweke wa gwaka wĩtĩkio waku. Itũrũragĩra Jehova ngoro yaku. Ndũkeyamũranagie na andũ arĩa angĩ, no handũ ha ũguo ikaraga hakuhĩ na aarĩ na ariũ a Ithe witũ. (Thim. 18:1) Ĩkaga maũndũ marĩa mangĩgũteithia gũkirĩrĩria, o na angĩkorũo nĩ ũrĩraga waririkana ũndũ mũritũ ũrĩa ũragerera. (Thab. 126:5, 6) Thiĩ na mbere gũthiaga mĩcemanio, kũhunjia, na gũthoma Bibilia. Ningĩ igaga meciria maku harĩ irathimo njega iria Jehova atwĩrĩire. Wĩtĩkio waku nĩ ũrĩgĩaga hinya o na makĩria wona ũrĩa Jehova aragũteithia.

18. Ũngĩka atĩa ũngĩmenya atĩ nĩ ũrabatara wĩtĩkio makĩria?

¹⁸ Angĩkorũo magerio marĩa wanagerera tene kana ihinda-inĩ rĩrĩ nĩ matũmĩte wone atĩ nĩ ũrabatara wĩtĩkio makĩria, ndũgakue ngoro. Onaga ũcio arĩ mweke wa gwĩkĩra hinya wĩtĩkio waku. Hoya Jehova ũmwĩre ciugo o ta iria atũmwo a Jesu maaugire makĩmwĩra: “Tuongerere wĩtĩkio.” (Luk. 17:5) Ningĩ wĩcũranagie ngerekano iria twarĩrĩria gĩcunjĩ-inĩ gĩkĩ. O ta Miguel na Yurai, ririkanaga mahinda marĩa mothe Jehova anagũteithia. O ta Anel na kairĩtu ka Vero, hoyaga Jehova na kĩyo, makĩria rĩrĩa wacemania na ũndũ mũritũ. O ta Geydi, wĩrĩgagĩrĩre atĩ Jehova no agũteithie kũgerera harĩ andũ a famĩlĩ kana arata. Ũngĩrekaga Jehova agũteithie magerio-inĩ marĩa ũragerera ihinda-inĩ rĩrĩ, no ũkorũo na ma atĩ nĩ agaagũteithia gũkirĩrĩria magerio o mothe ũngĩcemania namo mahinda marĩa maroka.

19. Nĩ ũndũ ũrĩkũ Jesu aarĩ na ma naguo, na nĩ ũndũ ũrĩkũ ũngĩkorũo na ma naguo?

¹⁹ Jesu nĩ oonanirie atĩ arutwo ake nĩ maabataraga wĩtĩkio makĩria, no ndaarĩ na nganja atĩ magĩteithio nĩ Jehova, nĩ mangĩahotire gwĩtiiria magerio marĩa mangĩacemanirie namo thutha ũcio. (Joh. 14:1; 16:33) Aarĩ na ma atĩ wĩtĩkio mũrũmu nĩ ũngĩgaateithia andũ kĩrĩndĩ kĩnene kũhonoka thĩna mũnene ũrĩa ũroka. (Kũg. 7:9, 14) Hihi nĩ ũgaakorũo ũrĩ ũmwe wao? Kũgerera ũtugi mũnene wa Jehova no ũkorũo ũrĩ ũmwe wao, angĩkorũo nĩ ũkũhũthĩra mweke o wothe ũrĩ naguo ihinda-inĩ rĩrĩ gũkũria na gwaka wĩtĩkio waku.—Ahib. 10:39.