1. Us kwɛstyɔn wi go aks wisɛf?

 YU KIN wɔri sɔntɛnde bɔt di tin dɛn we go apin jisnɔ, lɛk we dɛn go dɔnawe wit ɔl lay lay rilijɔn, we Gɔg we de na Megɔg go atak, ɛn Amagɛdɔn? Yu dɔn ɛva aks yusɛf se, ‘A go ebul fɔ kɔntinyu fɔ fetful we dɛn fiaful tin dɛn ya go apin?’ If yu dɔn tink bɔt dɛn kwɛstyɔn dɛn ya, di tin dɛn we wi de kam tɔk bɔt wetin Jizɔs bin se na wi tim skripchɔ go ɛp yu. Jizɔs bin tɛl in disaypul dɛn se: “Una nɔ wɔri. Una sho se una gɛt fet.” (Jɔn 14:​1) Strɔng fet go ɛp wi fɔ gɛt kɔnfidɛns ilɛk wetin go apin tumara bambay.

2. Wetin go ɛp wi fɔ gɛt strɔng fet, ɛn wetin wi go tɔk bɔt insay dis atikul?

² If wi tink bɔt wetin wi de du naw we wi gɛt prɔblɛm dɛn we de tɛst wi fet, dat go ɛp wi fɔ no wetin fɔ du fɔ mek wi fet strɔng mɔ ɛn mɔ. If wi tink bɔt dat, wi go no usay wi nid mɔ fet. Ɛnitɛm we wi pas ɛni tɛst, wi fet de strɔng mɔ ɛn mɔ. Dis go ɛp wi fɔ bia di prɔblɛm dɛn we go mit wi tumara bambay. Insay dis atikul, wi go tɔk bɔt 4 eria dɛn we sho se Jizɔs in disaypul dɛn bin nid fɔ gɛt mɔ fet. Wi go tɔk bɔt aw wi go bia dɛn sem prɔblɛm dɛn de tide ɛn aw dɛn go pripia wi fɔ wetin gɛt fɔ apin tumara bambay.

3. Wetin di wɔd dɛn we Jizɔs tɔk na Matyu 6:​30, 33 ɛp wi fɔ ɔndastand bɔt fet?

³ I nɔmal fɔ mek pɔsin we de oba in famili want fɔ gi  dɛn tin fɔ it, klos fɔ wɛr, ɛn say fɔ de. Dis nɔto tin we izi ɔltɛm fɔ du insay dis tɛm we tin rili tranga. Sɔm pan wi brɔda ɛn sista dɛn dɔn lɔs dɛn wok, ɛn pan ɔl we dɛn de tray tranga wan, dɛn nɔ ebul fɔ fɛn ɔda wan. Ɔda wan dɛn nɔ gri fɔ tek wok we Kristian dɛn nɔ fɔ du. We tin lɛk dis kin apin, wi nid fɔ gɛt strɔng fet se Jiova go gi wi di tin dɛn we wi famili nid. Jizɔs bin tɔk dis klia wan to in disaypul dɛn we i bin de prich ɔp wan mawntin. (Rid Matyu 6:​30, 33.) We wi rili biliv se Jiova nɔ go ɛva lɛf wi, wi go ebul fɔ kɔntinyu fɔ pe atɛnshɔn pan wi savis to Jiova. We wi de si aw Jiova de ɛp wi wit di tin dɛn we wi nid, dat go mek wi kam nia am ɛn wi fet go strɔng mɔ ɛn mɔ.

4-5. Wetin bin ɛp wan famili we bin de wɔri bikɔs i nɔ bin izi fɔ mek dɛn gɛt di tin dɛn we dɛn nid?

⁴ Lɛ wi tɔk bɔt wan famili na Vɛnizwela, we bin ɛkspiriɛns Jiova in ɛp we dɛn bin de wɔri bɔt aw dɛn go gɛt wetin dɛn nid fɔ liv. Trade, di Kastro famili bin de gɛt mɔni fɔ di tin dɛn we dɛn nid bay we dɛn bin de wok na dɛn fam. Bɔt sɔm man dɛn we bin gɛt gɔn bin tek dɛn land ɛn drɛb dɛn. Di papa we nem Migɛl, bin se: “Naw, wi de wok na wan smɔl land we dɛn lɛnt wi. A de bigin ɛvri de bay we a de pre to Jiova fɔ gi wi wetin wi nid fɔ da de de.” Layf nɔ izi fɔ di Kastro famili, bɔt bikɔs dɛn gɛt strɔng fet pan wi Papa we ebul fɔ kia fɔ di tin dɛn we dɛn nid ɛvride, dɛn de atɛnd di mitin dɛn ɔltɛm ɛn tek pat pan di prichin wok. Dɛn de put di Kiŋdɔm fɔs na dɛn layf, ɛn Jiova de gi dɛn wetin dɛn nid.

⁵ Insay dis tɛm we tin nɔ izi fɔ dɛn famili, Migɛl ɛn in wɛf, Yuray, de pe atɛnshɔn pan wetin Jiova de du fɔ kia fɔ dɛn. Sɔntɛnde, Jiova bin yuz brɔda ɛn sista dɛn fɔ gi dɛn sɔm pan di tin dɛn we dɛn nid ɔ fɔ ɛp Migɛl fɔ fɛn wok. Ɔda tɛm dɛn, Jiova bin yuz di branch ɔfis fɔ gi dɛn sɔm pan di tin dɛn we dɛn nid. Jiova nɔ ɛva lɛf dɛn, ɛn dis dɔn ɛp dɛn famili fɔ kɔntinyu fɔ gɛt strɔng fet. Afta dɛn big galpikin we nem, Osalin, bin tɔk bɔt wan patikyula tɛm we Jiova bin ɛp dɛn, i se: “I rili ɛnkɔrejin fɔ si aw Jiova dɔn ɛp wi. In na mi padi, ɛn a gɛt kɔnfidɛns se i go ɛp mi ɔltɛm.” I tɔk bak se: “Di prɔblɛm dɛn we wi dɔn bia as famili dɔn mek wi rɛdi fɔ mɔ prɔblɛm dɛn we go kam tumara bambay.”

6. Aw yu go gɛt mɔ fet we yu gɛt mɔni prɔblɛm?

⁶ Yu gɛt mɔni prɔblɛm? If na so i bi, dis na tɛm we nɔ izi fɔ yu. Bɔt yu kin stil yuz dis tɛm fɔ gɛt mɔ fet. Pre to Jiova ɛn rid di wɔd dɛn we Jizɔs tɔk na Matyu 6:​25-34, ɛn tink gud gud wan bɔt dɛn. Tink bɔt sɔm ɛgzampul dɛn insay wi yon tɛm we pruv se Jiova de gi di wan dɛn we pe  atɛnshɔn fɔ du in wok, wetin dɛn nid. (1 Kɔr. 15:​58) If yu du dat, i go gi yu strɔng fet fɔ biliv se Jiova go ɛp yu jɔs lɛk aw i dɔn ɛp ɔda pipul dɛn we bin gɛt prɔblɛm dɛn lɛk yu. I no wetin yu nid, ɛn i no aw fɔ gi yu di tin dɛn we yu nid. We yu de si di we aw Jiova de ɛp yu, yu fet go gro mɔ ɛn mɔ so dat yu go bia mɔ prɔblɛm dɛn we go kam tumara bambay.—Aba. 3:​17, 18.

7. Akɔdin to Matyu 8:​23-26, aw “big big briz” bin tɛst di disaypul dɛn fet?

⁷ We Jizɔs ɛn in disaypul dɛn bin de travul na wan bot, big big briz bigin blo. Jizɔs bin yuz dis tin we apin fɔ mek dɛn ɔndastand se dɛn nid fɔ gɛt mɔ fet. (Rid Matyu 8:​23-26.) Di briz bin so big dat di bot bin ful-ɔp wit wata, bɔt Jizɔs bin de slip pisful wan. We in disaypul dɛn wek am ɛn aks am fɔ sev dɛn, Jizɔs bin aks dɛn se: “Wetin mek una de fred so? Una nɔ gɛt bɛtɛ fet.” Di disaypul dɛn bin fɔ dɔn no se Jiova go protɛkt Jizɔs ɛn di wan dɛn we de wit am izi wan. Wetin na di lɛsin fɔ wi? Strɔng fet go ɛp wi fɔ bia “big big briz” ɔ ɛni prɔblɛm we tan lɛk big big briz.

8-9. Wetin bin tɛst Anɛl in fet, ɛn wetin bin ɛp am?

⁸ Tink bɔt aw di fet we wan sista we nɔ mared yet, frɔm Pɔto Riko, we nem Anɛl, bin strɔng mɔ ɛn mɔ bikɔs i bia wan prɔblɛm we bin tɛst in fet. Na “big big briz” bin tɛst in fet. Di tɛst bin bigin insay 2017 we Hurricane Maria bin pwɛl Anɛl in os. Dɔn bak, bikɔs ɔf di big big briz, i bin lɔs in wok. Anɛl se, “Insay dɛn tɛm dɛn de we tin nɔ bin izi, a bin rili wɔri. Bɔt a lan fɔ abop pan Jiova bay we a bin de pre to am ɛn nɔ alaw di wɔri we a bin de wɔri fɔ stɔp mi fɔ mek a nɔ du wetin a nid fɔ du.”

⁹ Anɛl bin se we i de obe, dat bak bin ɛp am fɔ bia in prɔblɛm dɛn. I se: “We a de fala di dayrɛkshɔn we di ɔganayzeshɔn de gi, dat bin ɛp mi fɔ mek a nɔ wɔri. Jiova bin ɛp mi bay we i yuz di brɔda ɛn sista dɛn. Dɛn bin ɛnkɔrej mi ɛn gi mi di tin dɛn we a nid fɔ liv.” I tɔk bak se: “Jiova bin gi mi pas wetin a ivin aks fɔ, ɛn mi fet bin strɔng mɔ ɛn mɔ.”

10. Wetin yu go du if yu gɛt big big prɔblɛm?

¹⁰ Yu gɛt big big prɔblɛm na yu layf? Sɔntɛm yu de sɔfa bikɔs ɔf nachɔral dizasta. Ɔ sɔntɛm yu gɛt bad sik we de mek yu at pwɛl ɛn yu nɔ no wetin fɔ du. I go bi se yu kin wɔri, bɔt nɔ alaw yusɛf fɔ tink tumɔs bɔt wetin yu nid ɛn stɔp fɔ abop pan Jiova. Kam nia am bay we yu de pre wit ɔl yu at. Tray fɔ gɛt mɔ fet bay we yu de tink gud wan bɔt di tɛm dɛn trade we Jiova bin ɛp yu. (Sam 77:​11, 12) Yu fɔ biliv se Jiova nɔ go ɛva lɛf yu.

11. Wetin mek wi fɔ mekɔp wi maynd fɔ obe di wan dɛn we de bifo wi?

 ¹¹ Wetin bak go ɛp yu fɔ mek yu bia we yu gɛt prɔblɛm dɛn? Anɛl bin tɔk se na we wi de obe. Lan fɔ trɔst di wan dɛn we Jiova ɛn Jizɔs trɔst. Sɔntɛm, di wan dɛn we dɛn pik fɔ de bifo wi go gi wi dayrɛkshɔn we nɔ mek sɛns to wi. Bɔt Jiova de blɛs di wan dɛn we de obe. Wi no frɔm in Wɔd ɛn frɔm in fetful savant dɛn ɛkspiriɛns dɛn se fɔ obe de sev wi layf. (Ɛks. 14:​1-4; 2 Kro. 20:​17) Tink gud gud wan bɔt dɛn ɛgzampul dɛn de. We wi du dat, i go ɛp wi fɔ mek wi want fɔ fala di dayrɛkshɔn we Jiova in ɔganayzeshɔn de gi wi naw ɛn tumara bambay. (Ibru. 13:​17) So yu nɔ go gɛt ɛni rizin fɔ fred di big big trɔbul we go kam jisnɔ.—Prɔv. 3:​25.

12. Aw Lyuk 18:​1-8 kɔnɛkt fɔ gɛt fet ɛn fɔ bia we dɛn nɔ trit wi fayn?

¹² Jizɔs bin no se we dɛn nɔ go trit in disaypul dɛn fayn, dat go tɛst dɛn fet. Fɔ ɛp dɛn fɔ mek dɛn bia, i bin gi dɛn wan ɛgzampul we dɛn rayt na di Baybul buk we nem Lyuk. Jizɔs bin tɔk bɔt aw wan uman we in man bin dɔn day, bin de kray to wan jɔj we nɔ de du wetin rayt fɔ gi am in rayt. Di uman bin shɔ se if i kɔntinyu fɔ aks di jɔj, i go ɛp am. Leta, di jɔj bin du wetin i aks fɔ. Wetin na di lɛsin we wi lan? Jiova na Gɔd we de du wetin rayt. So Jizɔs bin se: “So una nɔ tink se Gɔd go mek di wan dɛn we i dɔn pik we de kray to am de ɛn nɛt gɛt dɛn rayt?” (Rid Lyuk 18:​1-8.) Jizɔs bin tɔk bak se: “We mɔtalman Pikin kam, una tink se i go si dis kayn fet na di wɔl?” If wi de sɔfa bikɔs dɛn nɔ trit wi fayn, wi nid fɔ sho se wi gɛt strɔng fet lɛk da uman we in man bin dɔn day, bay we wi de peshɛnt ɛn nɔ giv-ɔp. We wi gɛt dis kayn fet, wi go gɛt kɔnfidɛns se Jiova go ɛp wi naw ɛn tumara bambay. Wi nid fɔ biliv bak se prea rili gɛt pawa. Sɔntɛnde, Jiova kin ansa wi prea dɛn di we aw wi nɔ go ɛkspɛkt am.

13. Aw prea bin ɛp wan famili we dɛn nɔ bin trit fayn?

¹³ Lɛ wi tɔk bɔt wetin bin apin to wan sista we nem Vɛro, we de na Kongo. Vɛro, wit in man we nɔ de sav Jiova, ɛn dɛn 15 ia ol galpikin bin rɔnawe kɔmɔt na dɛn vilej we sojaman dɛn bin atak dɛn. We dɛn bin de rɔnawe, dɛn bin rich na wan chɛkpɔynt usay di sojaman dɛn bin stɔp dɛn ɛn trɛtin fɔ kil dɛn. We Vɛro bigin fɔ kray, in galpikin tray fɔ kɔrej am bay we i bin de pre lawd wan ɛn yuz Jiova in nem bɔku tɛm insay in prea. We i dɔn fɔ pre, di kɔmanda fɔ di sojaman dɛn aks am se, “Udat tich yu fɔ pre?” Di  pikin ansa se, “Na mi mama tich mi bay we i yuz di ɛgzampul we de na Matyu 6:​9-13.” Di kɔmanda tɛl di titi se, “Go saful wan wit yu mama ɛn papa, ɛn mek Jiova una Gɔd protɛkt una.”

14. Wetin go tɛst wi fet, ɛn wetin go ɛp wi fɔ bia?

¹⁴ Dɛn kayn ɛkspiriɛns dɛn ya de tich wi mek wi nɔ ɛva fɔgɛt aw prea rili impɔtant to wi. Bɔt wetin wi go du if Gɔd nɔ ansa wi prea dɛn kwik kwik wan ɔ we we go mek wi kɔle? Lɛk di uman we in man bin dɔn day na Jizɔs in ɛgzampul, kɔntinyu fɔ de pre, biliv se Gɔd nɔ go ɛva lɛf yu, ɛn as tɛm de go, i go mɔs ansa yu prea. Kɔntinyu fɔ beg Jiova fɔ in oli spirit. (Fil. 4:​13) Mɛmba se i nɔ go te igen, Jiova go blɛs yu mɔ ɛn mɔ, we go mek yu fɔgɛt bɔt di sɔfa we yu bin de sɔfa trade. We yu bia prɔblɛm dɛn wit Jiova in ɛp, yu go ebul tinap tranga wan ɛn yu go ebul fɔ bia ɛni tɛst we go kam tumara bambay.—1 Pit. 1:​6, 7.

15. Akɔdin to Matyu 17:​19, 20, us prɔblɛm Jizɔs in disaypul dɛn bin gɛt?

¹⁵ Jizɔs bin tich in disaypul dɛn se fet go ɛp dɛn fɔ bia prɔblɛm dɛn. (Rid Matyu 17:​19, 20.) Wan tɛm, dɛn nɔ bin ebul fɔ drɛb wan dimɔn, pan ɔl we dɛn bin dɔn du dat ɔda tɛm dɛn. Wetin na bin di prɔblɛm? Jizɔs bin ɛksplen se dɛn nid mɔ fet. I bin tɛl dɛn se if dɛn gɛt mɔ fet, dɛn go ebul fɔ bia prɔblɛm dɛn we ay lɛk mawntin. Tide, wisɛf go gɛt prɔblɛm dɛn we go mek i tan lɛk se i nɔ go pɔsibul fɔ lɛ wi kɔntinyu fɔ sav Jiova.

16. Aw fet bin ɛp Gedi fɔ bia afta dɛn kil in man?

¹⁶ Tink bɔt wan sista frɔm Gwatemɛla, we nem Gedi, in ɛgzampul. Dɛn bin kil in man we nem Ɛdi, we dɛn bin de kɔmɔt na mitin. Aw Gedi in fet bin ɛp am fɔ bia dis tin we mek in at rili pwɛl? I se: “Prea de ɛp mi fɔ lɛf mi prɔblɛm na Jiova in an, ɛn dat de mek a gɛt pis. A de si aw Jiova de yuz mi famili ɛn mi padi dɛn na di kɔngrigeshɔn fɔ kia fɔ mi. We a bizi de du Jiova in wok, dat de ɛp fɔ mek mi at nɔ pwɛl pasmak ɛn fɔ mek a nɔ wɔri tumɔs bɔt tumara. Frɔm dis ɛkspiriɛns, a dɔn lan se ilɛk uskayn tɛst go mit mi tumara bambay, a go ebul fɔ bia am wit Jiova in ɛp, Jizɔs, ɛn di ɔganayzeshɔn.”

17. Wetin wi go du we wi gɛt prɔblɛm we ay lɛk mawntin?

¹⁷ Yu at pwɛl bikɔs pɔsin we yu lɛk dɔn day? Kɔntinyu fɔ mek yu fet strɔng mɔ ɛn mɔ pan di op fɔ se di wan dɛn we dɔn day go gɛt layf bak, bay we yu de rid Baybul stori dɛn bɔt pipul dɛn we bin gɛt layf bak. Yu at pwɛl bikɔs pɔsin na yu famili disfɛloship? Stɔdi so dat yu go pruv to yusɛf se Gɔd de kɔrɛkt wi di bɛst  we ɔltɛm. Ilɛk uskayn prɔblɛm yu gɛt, yuz dat as chans fɔ mek yu fet strɔng mɔ ɛn mɔ. Tɛl Jiova ɔl wetin de na yu at. Nɔ tray fɔ kip to yusɛf, bɔt kɔntinyu fɔ de nia di brɔda ɛn sista dɛn. (Prɔv. 18:​1) Du tin dɛn we go ɛp yu fɔ kɔntinyu fɔ bia, ivin if yu de kray we yu de tink bɔt wetin dɔn apin to yu. (Sam 126:​5, 6) Kɔntinyu fɔ go ɔl di mitin dɛn, fɔ prich, ɛn fɔ rid di Baybul. Ɛn pe atɛnshɔn to di wɔndaful blɛsin dɛn we Jiova dɔn prɔmis fɔ gi yu tumara bambay. We yu de si aw Jiova de ɛp yu, dat go mek di fet we yu gɛt pan am strɔng mɔ ɛn mɔ.

18. Wetin yu go du if yu notis se yu fet nɔ strɔng igen?

¹⁸ If di prɔblɛm dɛn we yu bin gɛt trade ɔ we yu gɛt naw dɔn sho se yu nɔ gɛt strɔng fet, mek yu at nɔ pwɛl. Si am as chans fɔ mek yu fet strɔng mɔ ɛn mɔ. Na fɔ pre jɔs lɛk Jizɔs in apɔsul dɛn we bin se: “Mek lɛ wi gɛt mɔ fet.” (Lyuk 17:​5) Dɔn bak, na fɔ tink bɔt di ɛgzampul dɛn we wi dɔn tɔk bɔt na dis atikul. Lɛk Migɛl ɛn Yuray, mɛmba ɔl di tɛm dɛn we Jiova dɔn ɛp yu. Lɛk Vɛro in galpikin ɛn Anɛl, pre wit ɔl yu at to Jiova, mɔ di tɛm we yu gɛt big big prɔblɛm. Ɛn lɛk Gedi, si se sɔntɛm Jiova go yuz yu famili ɔ padi dɛn fɔ gi yu di ɛp we yu nid. We yu alaw Jiova fɔ ɛp yu fɔ bia yu prɔblɛm dɛn naw, yu go gɛt mɔ kɔnfidɛns se i go ɛp yu fɔ bia ɛni prɔblɛm we yu go gɛt tumara bambay.

19. Wetin Jizɔs bin shɔ bɔt, ɛn wetin yu shɔ bɔt?

¹⁹ Jizɔs bin ɛp in disaypul dɛn fɔ si usay dɛn bin nid fɔ gɛt mɔ fet, bɔt i nɔ ɛva dawt se Jiova go ɛp dɛn fɔ bia we dɛn go gɛt prɔblɛm dɛn leta. (Jɔn 14:​1; 16:​33) I bin shɔ se strɔng fet go mek bɔku bɔku pipul dɛn nɔ day we di big big trɔbul go kam. (Rɛv. 7:​9, 14) Yu go bi wan pan dɛn? Wit Jiova in ɛp, yu go bi wan pan dɛn if yu du ɔl wetin yu ebul du naw fɔ gɛt mɔ fet.—Ibru. 10:​39.