1. ¿Ti mbäät näˈäty nnayajtëˈëwëm?

KO XYNYIJAWË tim tsojk kyutëgoyaˈany tëgokyë relijyonk diˈib kyaj tyëyˈäjtënëty, wiˈix xynyibëdëˈëgäˈänëmë Gog diˈib tsoˈomp Magog ets ko myinäˈänyë Armajedon, ¿mduktëjkëp wanatyë tsëˈëgë? Waˈan näˈäganäˈäty mnayajtëyëty, ¿nëjkxëbëtsëdaa nˈokmëmadaˈaky tëgokyë tijaty tunan jatanëp? Pën duˈun, mbudëkëyanëp extëm jyënaˈanyë tekstë diˈib tyuktsondakypyë tyäˈädë artikulo ko Jesus tˈanmääy ja yˈëxpëjkpëty: ‘Këdii mjotmayˈooktëty, mëbëktë ja Dios Teety’ (Juan 14:1, TY). Mbäät kyaj ntsëˈk njäˈäwëm tijaty miin këdakp pën nmëdäjtëm mëk ja mëbëjkën.

2. ¿Wiˈix mbäät niˈigyë nyajkëktëjkëm ja mëbëjkën, ets ti yajnimaytyäˈägäämp mä tyäˈädë artikulo?

² Ko nˈijxëm wiˈixën tyam nmëmadakëm ja amay jotmay diˈib nwinguwäˈkëm, duˈunën ja tuk pëky nyajkëktëjkëm ja mëbëjkën parë nëjkx nwinguwäˈkëm tijaty miin këdakp. Ets mbäädë net nnijäˈäwëm tijaty mbäät nˈaktuˈunëm parë niˈigyë ja mëbëjkën nyajkëktëjkëm. Tëgok tëgok nduknäjxëm tuˈugë jotmay, ta mas niˈigyë ja mëbëjkënë kyëktëkë. Ets yëˈë diˈib xypyudëkëyäˈänëm parë nëjkx nmëmadakëm tijaty miin këdakp. Mä tyäˈädë artikulo nˈixäˈänëm taxk pëkyë jotmay mä dyajnigëxëˈktë ja Jesusë yˈëxpëjkpëty ko tsojkëbë nety niˈigyë dyajkëktëkëdët ja myëbëjkën. Nenduˈun nˈixäˈänëm wiˈix mbäät nwinguwäˈkëm pën nbatëmë duˈumbë amay jotmay ets wiˈixë net nnayjyëjpˈijxëm mä tijaty miin këdakp.

3. Extëm jyënaˈanyë Mateo 6:30, 33, ¿wiˈixë Jesus tnimaytyakyë mëbëjkën?

³ Pënaty nyigëbäjkˈäjtypyë fyamilyë, jyamoˈoyaampy ja yˈuˈunk yˈënäˈk etsë kyujëën kyudëjk, ja kyaˈay yˈukënë, ja wyit xyox ets ja jyëën tyëjk, per näˈäty tsip duˈun ttundët. Taa nmëguˈukˈäjtëm diˈib të dyajtëgoytyë tyuunk ets oy nuˈun tjaˈëxtäˈäytyë kyaj tnekypyäättë. Ta netë wiinkpë diˈib jyapattëbë tyuunk, per  yëˈë diˈib kyaj mbäät ttuny tuˈugë Dios mëduumbë. Ko duˈumbë jotmay nbatëm, tsojkëp ndukˈijxpajtëmë Jyobaa amumduˈukjot ko yëˈë xymyoˈoyäˈänëm tijaty nyajtëgoyˈäjtëm. Duˈunënë Jesus tˈanmääy ja yˈëxpëjkpëty mä ja diskursë diˈib xyëwˈäjtypy Sermón del Monte (käjpxë Mateo 6:30, 33, TNM). * Pën ijtëm seguurë ko Jyobaa ninäˈä xymyastuˈudäˈänëm, mbäädë net jamyë jot winmäˈäny nbëjtakëm mä diˈib mas jëjpˈam: nˈëwäˈkx ngäjpxwäˈkxëm ja Diosë yˈAnaˈam Kyutujkën. Ets ko nˈijxëm wiˈixë Jyobaa xymyoˈoyëm tijaty nyajtëgoyˈäjtëm, ta niˈigyë nmëwingonäˈänëm ets nyajkëktëkëyäˈänëm ja mëbëjkën.

4, 5. ¿Ti të pyudëkëty tuˈugë familyë parë kyaj nëgoo tmëmay tmëdäjët wiˈix tˈokˈix tˈokpäättët tijatyë nety yajtëgoyˈäjttëp?

⁴ Min nˈokˈijxëm wiˈix jyäjt kyëbajttë Miguel mëdë fyamilyë diˈib tsënääytyëp Venezuela. Yëˈëjëty yˈijxtë wiˈixë Jyobaa pyudëjkëdë ko tpattë amay jotmay. Pes myëdäjttëbë nety tuˈugë nyax mä tpäättë myeeny syentääbë. Per tëgok, ta näägë axëkjäˈäytyëjk nyijäjtëdë ak tujn mëët ets ttuktëjkëdë ja it lugäär ets yˈëxkajxëdë. Miguel tnimaytyaˈaky: “Tyam jamyëts jeˈeyë ngojy nniˈipy mä tuk pedasë nax diˈibëts yajtukˈanuˈkxtë. Diˈibëts tim jawyiin nduumpy kots nguxëënytyaˈaky ngujäjtaˈaky, yëˈëts nˈanmaabyë Jyobaa parëts xymyoˈoyët tijatyëts nyajtëgoyˈajtypy mä taabë xëëw”. Tyäˈädë nmëguˈukˈäjtëm tsip nimëjääw xyëëw tiempë dyajnaxtë mëdë fyamilyë. Per myëbëjktëp amumduˈukjot ko Jyobaa yëˈë moˈoyanëdëp tijaty yajtëgoyˈäjttëp tuˈuk tuˈugë xëëw. Pääty xëmë nyëjkxtë reunyonk ets ëwäˈkx käjpxwäˈkxpë. Pes yëˈë jëjpˈam pyëjtaktëbë Diosë tyuunk mä jyukyˈäjtënëty etsë Jyobaa xëmë yˈijxˈit kyuentëˈatëdë.

⁵ Ko duˈun të tpäättë amay jotmayë Miguel mëdë kyudëjk Yurai, yëˈë tyukjotkujkˈäjttëbë Jyobaa ets yˈijxtëp wiˈix yˈijxˈit kyuentëˈatëdë. Jyobaa yëˈë näˈäty yajtuumbyë nmëguˈukˈäjtëm parë Miguel mëdë fyamilyë yajmoˈoytyë tijaty yajtëgoyˈäjttëp o parë nenduˈun tpäätyë tyuunk. Ets näˈäty, yëˈë yajtuumbyë Betel parë yajmoˈoytyë tijaty yajtëgoyˈäjttëp. Jyobaa ninäˈä kyamastuˈudëdë, päätyë tyäˈädë familyë niˈigyë myëbëjkënë dyajkëktëkëdë. Ko tëgok yaˈˈanmääytyë parë tnimaytyäˈäktët wiˈixën të tˈixtë Jyobaa pyudëkëdë, ta ja nyëëxë mëjpë Yoselin jyënaˈany: “Kots ndimˈixy wiˈixëtsënë Jyobaa xypyudëkëdë, mëjwiin kajaats xymyëjääwmoˈoy, duˈunëts nˈixyë Jyobaa extëmëts tuˈugë nmëtnaymyaayëbë, diˈibëts ndukjotkujkˈäjtypy ko xëmëts xypyudëkëyaˈany”. Ets yˈakjënäˈäny: “Ja amay jotmay diˈibëts të nbäättë mëdëtsë nfamilyë tëts xypyudëkë parë nwinguwäˈägët ja amay jotmayë mëjwiin kajaabë diˈib miin këdakp”.

6. Pën tyam myaˈˈamääytyakypyë meeny sentääbë, ¿ti mbudëkëyanëp parë niˈigyë xyajkëktëkët ja mëbëjkën?

⁶ ¿Myajtëgoyˈajtypy tyamë meeny sentääbë? Pën duˈun, seguurë ko tsip xyajnaxyë mxëëw mdiempë. Per oy yˈokduˈunëty, mbäät xyajtuny ja mxëëw mdiempë parë xyajkëktëkëdë  mëbëjkën. Mmënuˈkxtäˈägë Jyobaa, käjpx extëm jyënanyë Jesus mä Matewʉ 6:25-34 ets pawinmay. Oy ko nenduˈun xypyawinmayët wiˈix tyamë Jyobaa tˈijxˈity tkuentëˈaty pënaty mëduunëdëp (1 Kor. 15:58). Ko duˈun xytyunët, ta niˈigyë xytyukjotkujkˈatäˈänyë Jyobaa ko nan yëˈë mbudëkëyanëp ko nety xywyinguwäˈägë amay jotmay. Jyobaa nyijäˈäwëp ti myajtëgoyˈajtypy ets nan nyijäˈäwëp wiˈix mbäät mbudëkëty. Ko xyˈixët wiˈixë Jyobaa mbudëkëty, ta niˈigyë mëbëjkënë kyëktëkëyaˈany ets nëjkxëp xymyëmadaˈaky ja jotmayë mëjwiin kajaabë diˈib miin këdakp (Hab. 3:17, 18).

7. Extëm jyënaˈanyë Matewʉ 8:23-26, ¿wiˈixë Jesusë yˈëxpëjkpëty dyajnigëxëˈktë nuˈunë nety tmëdattë ja mëbëjkën ko myiiny ja mëk poˈo tuu?

⁷ Tëgok, barkotyë netyë Jesus nyijkxy mët ja yˈëxpëjkpëty ko ja mëk poj tuu jyantsy myiiny. Ets jaa mä Jesus ttukˈijxy ja yˈëxpëjkpëty ko tsojkëbë nety niˈigyë dyajkëktëkëdët ja myëbëjkën (käjpxë Matewʉ 8:23-26). Mëk jyantsy myiiny ja poˈo tuu ets ja nëë jyantsy myëjjaˈtspety mä ja barkë axtë yajnitujktaapy. Perë Jesus määp poˈkxpë nety, kyaj tii tjawë. Ta ja yˈëxpëjkpëty jyantsy nyayˈatsëˈkëdë ets ojts tninëjkxtë Jesus parë dyuxäˈändë ets yajtsoˈogëdët. Ta tsuj yajxon yˈanmääyëdë: “Tiko nëgoo mˈoktsëˈkëndë? Miits mmëdäjttëp jeˈeyë waanë ja mmëbëjkënëty”. Ja Jesusë yˈëxpëjkpëty, tsojkëbë nety tnijawëdët ko Jyobaa mbäät tkuwäˈäny ja yˈUˈunk ets pënatyë nety mëët yajpäättë barkoty. ¿Ti xytyukniˈˈijxëmë tyäˈädë ijxpajtën?

8, 9. ¿Wiˈixë Anel dyajnigëxëˈkyë myëbëjkën ko tpatyë ayoˈon jotmay, ets ti diˈib pudëjkë?

⁸ Min nˈokˈijxëm wiˈixë Anel tuˈugë nmëguˈukˈäjtëm diˈib Puerto Rico, niˈigyë dyajkëktëjkë myëbëjkën ko tpatyë amay jotmay. Yëˈë jantsy tukjäjtën ja mëk poj tuu, pes mä jëmëjt 2017 jap Puerto Rico nyajxy tuˈugë urakan diˈib xyëwˈäjtypy María. Anel yajtëgooyë jyëën tyëjk ets ja tyuunk. Yëˈë jyënaˈany: “Nëgooyëts ojts ntsëˈkënë ko nyajxyë urakan, per yëˈëts ndukˈijxpajtë Jyobaa parëts xypyudëjkë ets kyajts nëgoo ojts ndimmëmay ndimmëdäjy.

⁹ Anel jyënaˈany ko diˈib nenduˈun pudëjkë, yëˈë ko myëdooy. Duˈun jyënaˈany: “Kots ojts nbanëjkxy wiˈixëts xynyëˈëmoˈoy xytyuˈumoˈoyë Diosë kyäjpn, yëˈëts xypyudëjkë parëts kyaj nëgoo nmay ndäjët. Jyobaa nan yëˈë yajtuunë nmëguˈukˈäjtëm parëts xypyudëjkëdë, yëˈëts diˈib xyjyotkujkmooytyë etsëts xymyooytyë tijatyëtsë nety nyajtëgoyˈäjttëp”. Anel yˈakjënäˈäny: “Jyobaa mas niˈigyëts tijaty xymyooy extëmtsë nety kyaj ndimwinmay ets yëˈë diˈibëts niˈigyë ja nmëbëjkën të dyajkëktëkë”.

10. ¿Ti mbäät xytyuny pën jam xymyënaxy xyajnaxyë amay jotmay?

¹⁰ ¿Jam tyam xymyënaxy xyajnaxyë amay jotmay? ¿Waˈan ti të yˈayoˈonbëjtaˈaky mä mˈit mlugäär? ¿O waˈan xymyëdaty tuˈugë mëk päˈäm diˈibë net mon tuk myajnayjyäˈäwëp ets kyaj xynyijawë ti mdunët? Waˈan näˈäty xymyëmay xymyëdäjy, per duˈunyëm tukˈijxpatë Jyobaa. Yaˈˈawäˈätsë mjot mgorasoon ets tukmëtmaytyäˈäk wiˈix mnayjyawëty. Nan mbäät niˈigyë mëbëjkën xyajkëktëkë ko xywyinmayët wiˈixë Jyobaa  të mˈokpudëjkëbë (Sal. 77:11, 12). Mbäät mˈity seguurë ko Jyobaa ninäˈä mgamastuˈudäˈänyëty, xëmë mbudëkëyaˈanyëty.

11. ¿Tiko mbäät nˈëygyupëjk ngajpxykyupëjkëm pënaty xynyëˈëmoˈoy xytyuˈumoˈoyëm?

¹¹ ¿Tijaty mˈakpudëkëyanëp parë xymyëmadäˈägët ja amay jotmay diˈib mbatypy? Extëmë Anel jyënany, yëˈë ko nmëdoˈowëm. Tukjotkujkˈat pënatyë Jyobaa mëdë Jesus tyukjotkujkˈäjtypy. Pënaty xynyëˈëmoˈoy xytyuˈumoˈoyëm, mbäät näˈäty ti xytyukˈanaˈamëm diˈib winmäˈäyëm ko kyaj duˈun yˈoybyëtsëmäˈäny, per jamyats ko Jyobaa kyunuˈkxypy pënaty ëygyupëjk kajpxykyupëjkëp. Mä Biiblyë yajmaytyakp nimayë Dios mëduumbëty diˈib ojts nyitsoˈoktë ko tmëmëdoowdë Jyobaa ets nan të nˈijxëm tuˈuk majtskë yˈijxpajtënë nmëguˈukˈäjtëm diˈib tyam duˈun tyuundëp (Éx. 14:1-4; 2 Crón. 20:17). Pawinmayë tyäˈädë ijxpajtën diˈib yajmaytyakp mä Biiblyë, duˈun niˈigyë mjot mwinmäˈäny xypyëjtäˈägët parë xymyëmëdowët extëm tyamë Jyobaa xynyëˈëmoˈoy xytyuˈumoˈoyëm ets nenduˈun mä tiempë myiny kyëdaˈaky (Eb. 13:17). Ko duˈun xytyunët, ta kyaj tiko xyjëjptsëˈëk xyjëjpjawët ja amay jotmay diˈib miin këdakp (Prov. 3:25).

12. Extëm jyënaˈanyë Lukʉs 18:1-8, ¿wiˈix xypyudëjkëm ko nmëdäjtëmë mëbëjkën ko kyayajtuny ja ndëyˈäjtënˈäjtëm?

¹² Jesus nyijäˈäwëbë nety ko ja yˈëxpëjkpëty mbäät yaˈijxmatstë nuˈunën tmëdattë ja mëbëjkën ko kyayajtundët ja tyëyˈäjtënëty. Pääty ojts tmaytyaˈaky tuˈugë ijxpajtën diˈib yajpatp mä Biiblyë parë tpudëjkëdë. Ojts tmaytyaˈaky tuˈugë kuˈookytyoxytyëjk diˈib janääm jatsojk nyinëjkx ja fes diˈib kyaj oy tijaty ttuny parë tyuˈunxëdët ja tyëyˈäjtën. Tyäˈädë kuˈookytyoxytyëjk ijtpë nety seguurë ko pën mëktaˈaky tˈanëëmë ja fes, mbäät ok pyudëkëty. Ets duˈunën tyuun jyäjtë. ¿Ti diˈib xytyukniˈˈijxëm? Ko Jyobaa xëmë tijaty ttuny tëyˈäjtën myëët. Päätyë Jesus jyënany: “¿Ti kyaj ttunët ja Diosë tëyˈäjtën pënëty wyinˈijxëdë es tmënuˈxtäˈägëdë xëëny koots es yajpudëkëdët?” (käjpxë Lukʉs 18:1-8). Ta Jesus yˈakjënany: “Kots ëj, ja Naxwinyëdë Jäˈäyëtyë Kyudënaabyë, nminët jatëgok yä naxwiiny, ¿tii nbäädëpts ja jäˈäy pën myëbëjktëp ja Dios?”. Ko kyayajtunëdë ndëyˈäjtënˈäjtëm, tsojkëp nmaˈkxtujkëm ets nmëdäjtëmë duˈumbë mëbëjkën extëm ja kuˈookytyoxytyëjk. Ko duˈun nduˈunëm, ta nˈitäˈänëm seguurë ko Jyobaa xëmë xypyudëkëyäˈänëm. Nan oy ko nmëbëjkëm ko ja nnuˈkxtakën, myëdäjtypyë mëkˈäjtën, pes näˈäty, mbäät yaˈˈatsoowëmbity extëmë kyaj ndimˈawijx ndimjëjpˈijxëm.

13. ¿Wiˈix pyudëjkëdë tuˈugë familyë ko tmënuˈkxtaktë Jyobaa mä nety axëëk yajtundë?

¹³ Min nˈokˈijxëm wiˈix jyajty kyëbejtyë Vero diˈibë myëmëjjäˈäy kyaj Tyestiigëty mët ja nyëëxuˈunk diˈibë jyëmëjt 15. Yëˈëjëty jap tsyëënëdë mä República Democrática del Congo. Nidëgëëk ojts kyaˈaktë mä ja nyax kyäjpn mët ko nyijäjtëdë ja soldäädëtëjk. Per tuˈääy, ta yajtuˈuˈadujkëdë ets yˈanmääyëdë ko yaˈoogäˈänëdë, ta Vero jyantsy tyëjkë jëëy yaxpë: per ja nyëëx ta tyëjkë nuˈkxtakpë mëk parë ja tyääk tjajotkujkmoˈoyany ets kanäkˈok ojts tnikäjpxëmbijtë Diosë xyëëw, Jyobaa. Ko nyuˈkxtaktääy, ta ja soldäädë wintsën  yajtëëwë: “Kixyuˈunk, ¿ets pën të mdukniˈˈixëty mnuˈkxtäˈägët?”. Ta tˈatsooy: “Yëˈëtsë ndääk, duˈun ttuny extëm jyënaˈanyë Matewʉ 6:9-13”. Ta ja soldäädë wintsën yˈanmääyë: “Nëjkx agujk jotkujk mëdë mdääk mdeety ets waˈanë Jyobaa diˈib mDiosˈäjttëp mguwäˈänëdë”.

14. ¿Ti xypyudëkëyäˈänëm parë duˈunyëm nyaˈijtëm mëk ja mëbëjkën ko näˈäty kyaj netyë yaˈˈatsoowëmbityë nuˈkxtakën?

¹⁴ Extëmë tyäˈädë nmëguˈukˈäjtëm jyäjt kyëbajttë, yëˈë xytyukˈijxëm nuˈunën jyëjpˈamëty ko nnuˈkxtakëm. Per ¿pën kyaj netyë yaˈˈatsoowëmbity ja mnuˈkxtakën o kyaj xytyimˈixy? Duˈun extëm ja kuˈookytyoxytyëjk diˈibë Jesus myaytyak. Nnuˈktakˈadëˈëts, it seguurë ko Jyobaa ninäˈä mgamastuˈudäˈänyëty ets yˈatsoowëmbitaambyë mnuˈkxtakënë näˈä yëˈë tˈixy ko myajtëgoyˈajtypy. Amdow pëjktsowë Jyobaa parë mmoˈoyëdët ja yˈespiritë santë (Filip. 4:13, TNM). Jamyats ko tim tsojkë Jyobaa mgunuˈkxäˈänyëty mëjwiin kajaa, mä kyaj xynyekyjamyatsäˈäny wiˈix tyam mjaty mgëbety ets yëˈë mbudëkëyanëp parë xymyëmadäˈägët ja amay jotmay. Ko duˈun xymyëmadäˈägët, ta niˈigyë ja mëbëjkënë kyëktëkëyaˈany ets nëjkxëp xymyëmadaˈaky ja amay jotmay diˈib miin këdakp (1 Peed. 1:6, 7).

15. Extëm jyënaˈanyë Matewʉ 17:19, 20, ¿ti nety aktëgoyˈäjtxëdëp ja Jesusë yˈëxpëjkpëty?

¹⁵ Jesus tyukniˈˈijxë ja yˈëxpëjkpëty ko pën myëdäjttëp ja mëbëjkën, yëˈë diˈib pudëkëyanëdëp parë tmëmadäˈäktët ja amay jotmay diˈib wyinguwäˈkëdëp (käjpxë Matewʉ 17:19, 20). Yëˈëjëty të nety kanäkˈok tjaˈëxkaxtë ja kaˈoybyë. Per tëgok kyaj tmëmadaktë. ¿Tiko kyaj? Jesus yˈanmääyëdë ko tsojkëbë nety niˈigyë dyajkëktëkëdët ja mëbëjkën. Pes pën myëdäjttëp mëk ja mëbëjkën, mbäädë nety tmëmadäˈäktë ja amay jotmayë mëjwiin kajaabë, axtë diˈibë këxëˈkp extëm ja tun kopk. Tyam, nan mbäät nmëmadakëm ja amay jotmay diˈib këxëˈkp ko kyaj jyawë mbäät nmëmadakëm.

16. ¿Wiˈixë Geydi pyudëjkë ja myëbëjkën parë tmëmadakyë jäj jëmuˈumën diˈib yajnäjx?

¹⁶ Min nˈokˈijxëm ti jotmay pyatë Geydi, tuˈugë nmëguˈukˈäjtëm diˈib Guatemala. Të nety ojts ryeunyonkˈattë ets jëmbijnëdëbë nety mä tyëjk. Ko ja myëmëjjäˈäy, Edi, yaˈoˈkë ja axëkjäˈäyëty. Geydi tnimaytyaˈaky ko diˈib pudëjkë parë tmëmadakyë jäj jëmuˈumën, yëˈë ko tmëdatyë mëbëjkën. Yëˈë jyënaˈany: “Nduknijëduubyëtsë ntsëmy ngëˈëyë Jyobaa kots nmënuˈkxtaˈaky ets yëˈëts diˈib xyajnayjyäˈäwëp agujk jotkujk. Nˈijxypyëts wiˈixëtsë Jyobaa xyˈijxˈity xykyuentëˈaty mët yëˈëgyëjxmëtsë nfamilyë ets ja nmëguˈukˈäjtëm diˈib mä kongregasionk. Kots nˈëwaˈkxy ngäjpxwaˈkxy, xypyudëjkëbëts parëts kyaj mon tuk nnayjyawëdët ets parëts kyaj nëgoo tijaty nmëmay nmëdäjët. Extëmëts të njaty të ngëbety, yëˈëts xytyukniˈˈijxëp ko ti amay jotmay nwinguwäˈkëm mä tiempë myiny kyëdaˈaky, mbäädëts nmëmadaˈaky mët kots xypyudëkë Jyobaa, Jesus ets ja nyax kyäjpn”.

17. ¿Ti mbäät nduˈunëm parë nmëmadakëm ja amay jotmayë mëjwiin kajaabë diˈib këxëˈkp extëmë tun kopk?

¹⁷ ¿Të yˈooky tyëgoy tuˈugë mjiiky mëguˈuk? Yajkëktëkë mëbëjkën ko xykyäjpxët mä Biiblyë  mä yajnimaytyäˈäktë wiˈixë jäˈäy jyukypyëjktë. ¿Mon tuk myajpääty mët ko të yaˈëxkexy tuˈugë mjiiky mmëguˈuk mä Diosë kyäjpn? Ëxpëk mä Biiblyë parë mˈitët seguurë ko oy ko Dios tjëjwijtsëmbity tuˈugë jäˈäy. Oy ti amay jotmay xypyäädët, mbäät mbudëkëty parë niˈigyë xyajkëktëkët ja mëbëjkën. Tukmëtmaytyäˈägë Jyobaa wiˈixën meerë mnayjyawëty, yajpäät mët ja mëguˈuktëjkëty, këdii jagam ëxkëˈëm mnaybyëjtaˈagyëty (Prov. 18:1). Tun tijaty mbäät mbudëkëty parë madäˈägët, oy näˈäty xymyëjëˈëy xymyëyäˈäxët (Sal. 126:5, 6). Nëjkx xëmë reunyonk, ëwäˈkx käjpxwäˈkxpë ets käjpxë Biiblyë. Pawinmay tëgokyë ja kunuˈkxën diˈibë Jyobaa të mdukwandaˈagyëty. Ko xyˈixët wiˈixë Jyobaa mbudëkëty, ta mas niˈigyë ja mëbëjkën kyëktëkëyaˈany.

18. Pën mbëjkypyë kuentë ko kyaj mëk xymyëdatyë mëbëjkën, ¿ti tsojkëp xytyunët?

¹⁸ Pën tyam mbatypyë amay jotmay o të xytyuknaxy, këdii mˈëxtëkëwaˈaky pën mˈijxypy ko kyaj myëkëty ja mëbëjkën. Ix ko mbäät yëˈë mbudëkëty parë niˈigyë xyajkëktëkët. Mmënuˈkxtäˈägë Jyobaa duˈun extëm ojts ttundë ja Jesusë yˈapostëlëty ko nyuˈkxtaktë: “Tukmëbëjkëts waanë niˈigyë” (Luk. 17:5). Pawinmay nenduˈun extëm të yajnimaytyäˈäktë nmëguˈukˈäjtëm mä tyäˈädë artikulo. Duˈun extëmë Miguel mëdë Yurai, jamyats wixatyë Jyobaa të mbudëkëty. Mmënuˈkxtäˈägë Jyobaa amumduˈukjot extëmë Anel ets ja nyëëxë Vero, ets niˈigyë ko nety xypyaatyë amay jotmayë mëjwiin kajaabë. Ets duˈun extëmë Geydi, kupëk extëmë Jyobaa mbudëkëty, pes mbäät yëˈë dyajtunyë mfamilyë o nmëguˈukˈäjtëm. Pën tyam mnasˈijxëp etsë Jyobaa mbudëkëdët mä xypyaatyë amay jotmay, mbäädë net mˈity seguurë ko mä tiempë myiny kyëdaˈaky nan mbudëkëyanëp, oy ti amay jotmay xypyäädët.

19. ¿Mä ti nety yˈity seguurë Jesus, ets ti tyam mbäät xytyuny?

¹⁹ Jesus pyudëjkë yˈëxpëjkpëty parë niˈigyë dyajkëktëkëdët ja myëbëjkën, per nan ijtpë nety seguurë ko Jyobaa pudëkëyanëdëp parë tmëmadäˈäktët ja amay jotmay diˈib pyäädandëp (Fwank 14:1; 16:33). Ets nan ijtpë nety seguurë ko ja tëgoy myayjyaˈay, nan tsokwëˈëmandëp pën myëdäjttëp ja mëbëjkën (Diˈibʉ Jat. 7:9, 14). ¿Myajpatp mä tyäˈädë tëgoy myayjyaˈay diˈibë Jesus myaytyak? Mët ko Jyobaa yˈoyjyaˈayëty, nëjkxëp myajpääty pën myajkëktëjkëp niˈigyë tyam ja mëbëjkën (Eb. 10:39).