1. ¿Toni xa timotajtaniaj?

¿TEPITSIN tionmoui keman itech tiontanemilia tein amo uejkaua panoti? Amo uejkaua, Dios kiixpolos taneltokalis tein amo melauak, Gog akin ualeua Magog kinixnamikis itekitikauan Jiova uan mochiuas Armagedón. ¿Kemansa tionmotajtania ox tiontaxikos keman mochiuas nochi nejin? Komo kemaj, semi mitsonpaleuis tein kijtoj Jesús itech tajkuilol kampa kisa nejin tamachtilis. Jesús kiniluij imomachtijkauan: “Amo ximoyolkuejmolokan. Ta [...] xikyektakuautamatikan” (Juan 14:1). Komo chikauak totakuaujtamatilis, amo timouiskej.

2. ¿Keniuj uelis tikchikauaskej totakuaujtamatilis, uan toni tikitaskej itech nejin tamachtilis?

² Uelis tikchikauaskej totakuaujtamatilis komo tiknemiliaj toni tikchiuaj axkan keman tikpanouaj ouijkayomej. Ijkon uelis tikmatiskej kemanian ouij techkisa titakuaujtamatiskej. Nochipa ke titaxikouaj keman tikpanouaj se ouijkayot, totakuaujtamatilis okachi mochikaua, uan nejin techpaleuis maj tikxikokan ouijkayomej tein tikpiaskej satepan. Itech nejin tamachtilis tikitaskej naui taman tein kinextij ke imomachtijkauan Jesús monekia okachi takuaujtamatiskej. No tikitaskej keniuj uelis tikxikoskej ouijkayomej kemej tein yejuan kipiakej uan keniuj nejon techpaleuia maj tikmatikan toni tikchiuaskej keman tikpiaskej ouijkayomej satepan.

3. ¿Toni tikajsikamatij ika tein kijtoj Jesús itech Mateo 6:30, 33?

³ Se tepopaj kineki maj ichankauan kipiakan toni kikuaskej, toni motaliliskej uan kani nemiskej. Sayoj ke itech nejin tonalmej ouij kinkisa kichiuaskej nejin. Seki tokniuan takamej amo kipiajok tekit uan maski semi kitemouaj, amo kiajsij okse. Oksekin  amo kiselianij se tekit kampa mochiua tein kitapanauilia itanauatiluan Jiova. Itech nochi nejin moneki semi titakuaujtamatiskej ke Jiova techpaleuis maj ueli timoixpanoltikan. Yejua nejon tein Jesús kiniluij imomachtijkauan itech tanojnots tein kitemakak itech se tepet (xikonixtajtolti Mateo 6:30, 33). Komo senkis titakuaujtamatij ke Jiova amo techkauas, uelis tiksentokaskej tiktayekanaltiskej tiktekitiliskej. Uan keman tikitaskej keniuj techpaleuia maj ueli timoixpanoltikan, okachi timotokiskej iuan, uan totakuaujtamatilis okachi mochikauas.

4, 5. ¿Toni kinpaleuiani seki kalyetouanij maj amo semi kintekipacho keniuj moixpanoltiskej?

⁴ Maj tikitakan tein kinpanok tokniuan Castro, akin kayomej Venezuela. Yejuan kiitanij ke Jiova kinpaleuiani maj amo semi kintekipacho keniuj moixpanoltiskej. Kipiayaj se tal kampa tekitiaj tein kinpaleuiaya maj uelini moixpanoltianij. Sayoj ke se tonal, seki takamej akin kiuikayaj teposmej tein ika tetatoponiliaj ajsikej inintalpan uan kintokakej. Tepopaj, akin monotsa Miguel, kijtoua: “Axkan tinemij itech se tsikitsin tal tein techtaneujtijkej, kampa timotatokiaj uan ijkon ueli timoixpanoltijtiuij. Mojmostaj yekinika niktajtania Jiova maj techpaleui maj tikpiakan tein ika timoixpanoltiskej nejon tonal”. Tokniuan Castro kipanouaj miak ouijkayomej, sayoj ke senkis takuaujtamatij ke toTajtsin Jiova kinpaleuis maj ueli moixpanoltikan mojmostaj. Yejua ika kisentokaj youij nechikolmej uan kisentokaj kiteixmatiltiaj iTajtol Dios. Yejuan kitayekanaltiaj kitekitiliskej Jiova, uan yejuatsin kinyekpia.

⁵ Itech nochi ouijkayomej tein kipanouanij, Miguel uan inamik, Yurai, itech tanemilianij keniuj Jiova kinyekpiani. Kemansa, Jiova kichiuani maj tokniuan kintayokolikan seki taman tein moneki oso maj kipaleuikan Miguel maj kiajsi tekit. No kichiuani maj tokniuan akin tapaleuiaj keman mochiua se tetsauit kinmakakan tein ika moixpanoltiskej. Jiova amo keman kinkauani, uan yejua ika inintakuaujtamatilis okachi mochikauani. Satepan ke Yoselin, ininsiuapil akin tayekana, ika tajtoj se taman kemej Jiova kinpaleuij, kijtoj: “Semi nechyolchikaua nikitas keniuj Jiova techpaleuia. Semi kuali iuan nimouika uan nitakuaujtamati ke nochipa nechpaleuis”. Uan no kijtoj: “Ouijkayomej tein tikpanouanij techpaleuiaj, porin satepan tikpiaskej okachi uejueyi ouijkayomej uan uelis titaxikoskej”.

6. ¿Keniuj uelis tikonchikauas motakuaujtamatilis komo amo mitsonajsi tomin tein ika tionmoixpanoltis?

⁶ Maski xa amo mitsonajsi tomin tein uelis ika tionmoixpanoltis, itech nejon ouijkayot uelis tikonchiuas tein mitsonpaleuis maj mochikaua motakuaujtamatilis. Xikontataujti Jiova, xikonixtajtolti uan itech xiontanemili tein Jesús kijtoj itech Mateo 6:25-34. No itech xiontanemili keniuj itech nejin tonalmej Jiova kinyekpiani tokniuan akin kisentokaj kitekitiliaj maski kipanouaj ouijkayomej (1 Cor. 15:58). Nejon kichiuas okachi xiontakuaujtamati ke Jiova mitsonpaleuis, ijkon kemej  kinpaleuiani oksekin akin kipanouanij ouijkayomej kemej tein tejuatsin tikonpanotok. Kimati toni ouijkayot tikonpia uan kimati keniuj mitsonpaleuis. Keman tikonitas keniuj mitsonpaleuia Jiova, okachi tiontakuaujtamatis uan uelis tiontaxikos keman tikonpanos okachi uejueyi ouijkayomej (Hab. 3:17, 18).

7. Kemej kijtoua Mateo 8:23-26, ¿keniuj se chikauak kiouaejekat kinextij ke imomachtijkauan Jesús monekia okachi takuaujtamatiskej?

⁷ Se tonal keman Jesús uan imomachtijkauan yajtoyaj itech se barco, peuak chikauak kiouaejeka. Ika nejon tein panok Jesús kinpaleuij maj kiajsikamatinij ke monekia okachi takuaujtamatiskej (xikonixtajtolti Mateo 8:23-26). Kemej semi chikauak kiouia, at kalakik itech barco, sayoj ke Jesús kuali kochtoya. Imomachtijkauan semi momoujtijkej, yejua ika kijxititoj uan kitajtanijkej maj kinmakixtiani. Ika yolseuilis Jesús kiniluij: “¿Keye semi nanmomoutiaj? Namejuan amo yek majsitok de namotakuautamatilis”. Imomachtijkauan monekiaya kimatiskej ke Jiova ueliskia kimatampauis Jesús uan yejuan. ¿Toni techmachtia nejon? Ke komo chikauak totakuaujtamatilis, uelis tikxikoskej uejueyi ouijkayomej tein kemej yeskia kiouaejekat oso uelis titaxikoskej keman panos se yekmelauj kiouaejekat.

8, 9. ¿Toni ouijkayot kipanok Anel, uan toni kipaleuij?

⁸ Anel, se tokniuj siuat kayot Puerto Rico, akin amo kipia inamik, kipanok se ueyi ouijkayot. Maj tikitakan keniuj nejon kichiuak maj mochikaua itakuaujtamatilis. Itech xiuit 2017, kiouaejekat tein kitokaytijkej María semi tauejueloj ompa Puerto Rico. Anel uejueliuik ichan uan no amo kipiakok tekit. Anel kijtoua: “Itech nejon tonalmej tein semi ouijkej katkaj, semi nimouia. Sayoj ke nikitak ke monekia niktemos inepaleuil Jiova ika netataujtil uan amo nikauas maj netekipacholis nechtsakuiliani”.

⁹ Anel kijtoua ke tatakamatilis no kipaleuij maj taxiko. Yejua kijtoua: “Kemej nikchiuak tein inechikol Jiova tanauatij, nechpaleuij maj niyolseujtoni. Jiova kichiuak maj tokniuan nechpaleuianij. Yejuan nechyolchikaujkej uan nechmakakej tein ika nimoixpanoltiskia”. Uan no kijtoua: “Jiova nechmakak okachi ke tein niknemiliaya uan nejon nechpaleuij maj okachi nitakuaujtamati”.

10. ¿Toni uelis tikonchiuas komo tikonpanotok se ueyi ouijkayot?

¹⁰ ¿Tikonpanotok se ueyi ouijkayot, xa kampa tionnemi mochiuak se ueyi tetsauit oso xa semi tionmokokoua uan amo tikonmati toni tikonchiuas? Maski kemansa xa tionmotekipachos, amo xikonkaua maj nejon kichiua amo xiontakuaujtamatiok iuan Jiova. Xikonchiuili netataujtil uan xikonilui keniuj tionmomachilia. Itech xiontanemili keniuj Jiova mitsonpaleuiani achto, nejon kichiuas maj motakuaujtamatilis mochikaua (Sal. 77:11, 12). Uelis senkis tiontakuaujtamatis ke yejuatsin amo keman mitsonkauas.

11. ¿Keyej moneki tikixtaliskej tikintakamatiskej tokniuan akin techixyekanaj?

 ¹¹ ¿Toni no mitsonpaleuis keman tikonpanotos se ouijkayot? Kemej kijtoj Anel, komo tiontatakamati. Iniuan xiontakuaujtamati akin Jiova uan Jesús kinixpejpenkej maj techixyekanakan. Kemansa, nejin tokniuan xa techiluiskej maj tikchiuakan seki taman tein tejuan tiknemiliskej ke amo tapaleuis. Sayoj ke xikonelnamiki ke Jiova kintatiochiuia akin tatakamatij. ITajtol uan tein kinpanouani seki itekitikauan techmachtia ke tatakamatilis temakixtia (Éx. 14:1-4; 2 Crón. 20:17). Itech xiontanemili nejon neskayomej. Nejin mitsonpaleuis okachi xikonneki tikontakamatis tein inechikol Jiova tanauatis axkan uan satepan (Heb. 13:17). Ijkon amo tikonmouilis tein amo uejkaua mochiuas (Prov. 3:25).

12. Kemej kijtoua Lucas 18:1-8, ¿keniuj techpaleuia totakuaujtamatilis keman techchiuiliaj tein amo kuali?

¹² Jesús kimatia ke itatojtokakauan kinextiskiaj ox chikauak inintakuaujtamatilis keman kinchiuiliskiaj tein amo kuali. Kemej kinekia kinpaleuis maj taxikokan, kintapouij se neskayot tein moajsi itech amatajkuilol Lucas kampa ika tajtoj se siuat akin amo nemiaok inamik. Nejin siuat miakpa kitataujtij se tamelaujkej akin kichiuaya tein amo kuali maj kipaleuiani. Kimatia ke komo kisentokaya kitataujtiaya, satepan kipaleuiskia. Uan ijkon panok. ¿Toni techmachtia nejin? Jiova amo keman kichiua tein amo kuali, yejua ika Jesús kijtoj: “Totajtsin Dios [...] techpaleuis uan techmakixtis porin tejuan tiitaijitaluan uan tejuan timotatatautiliaj youal itonal ke Yejuatsin ma techpaleui” (xikonixtajtolti Lucas 18:1-8). Jesús no kijtoj: “Kuak Nejuatsin ni Yektagatsin de Dios nimoualuikas ya nikan taltikpak, [...] ¿xe nikinajsis ok nekes ten melau nouan takuautamatinemij nikan taltikpak?”. Keman techchiuiliaj tein amo kuali, moneki amo tiyolijsiuiskej uan amo timosenkauaskej. Ijkon tiknextiskej ke totakuaujtamatilis semi chikauak kemej itakuaujtamatilis siuat akin amo nemiaok inamik. Totakuaujtamatilis kichiuas maj tikneltokakan ke Jiova techpaleuis. No moneki tikneltokaskej ke netataujtil semi tapaleuia. Kemansa, Jiova uelis technankilis tonetataujtiluan kemej amo tikchiayaj.

13. ¿Keniuj kinpaleuij netataujtil seki kalyetouanij keman kinchiuilijkej tein amo kuali?

¹³ Maj tikitakan tein kipanok Vero, se tokniuj siuat akin nemi República Democrática del Congo. Vero, inamik akin amo itaixpantijkauj Jiova, uan isiuapil akin kipia 15 xiujmej monekik choloskej keman seki tateuianij ajsikej ininxolal. Keman cholojtoyaj, ajsikej kampa yetoyaj seki tateuianij akin amo kinkaujkej maj panokan uan kiniluijkej ke kinmiktiskiaj. Vero peuak choka. Kemej isiuapil kinekia kiyolseuis, peuak kichiua netataujtil uan miakpa kijtoj itokay Jiova. Keman kitamichiuak netataujtil, akin kinixyekanaya tateuianij kitajtanij:  “Siuapil, ¿akoni mitsmachtij xikchiua netataujtil?”. Yejua tanankilij: “Nomomaj, ika tein kijtoua Mateo 6:9-13”. Takat kiluij: “Kualtsin xiouj iniuan motatuan uan maj Jiova moDios namechyekpia”.

14. ¿Toni uelis kichiuas maj monexti ox titakuaujtamatij, uan toni techpaleuis maj titaxikokan?

¹⁴ Nejin neskayomej techmachtiaj maj amo keman tikelkauakan ke netataujtil semi tapaleuia. ¿Uan komo Jiova amo niman mitsonnankilia keman tikontataujtia oso amo kichiua teisa tein se kimoujkaita? Ijkon kemej siuat akin amo nemiaok inamik akin Jesús ika tajtoj, xikonsentoka xikontataujti Jiova, xiontakuaujtamati ke yejuatsin amo mitsonkauas, uan ke keman kiitas ke kinamiki mitsonnankilis. Xikonsentoka xikontajtani Jiova maj mitsonmaka iyektikatsin espíritu (Filip. 4:13). Xikonelnamiki ke amo uejkaua, Jiova mitsonmakas miak tatiochiualismej uan amo tikonelnamikisok nochi tein tiontajyouij. Komo axkan tiontaxikoua keman tikonpanoua ouijkayomej ika inepaleuil Jiova, satepan uelis okachi tiontaxikos (1 Ped. 1:6, 7).

15. Kemej kijtoua Mateo 17:19, 20, ¿toni ouijkayot kipiakej itatojtokakauan Jesús?

¹⁵ Jesús kinmachtij itatojtokakauan ke takuaujtamatilis kinpaleuiskia maj taxikokan keman kipiaskiaj ouijkayomej (xikonixtajtolti Mateo 17:19, 20). Maski yejuan miakpaya kinkixtilijkaj amokuali ejekamej seki taltikpakneminij, se tonal amo uelik kichiujkej. ¿Keyej? Jesús kiniluij ke monekia okachi takuaujtamatiskej. Kiniluij ke komo okachi takuaujtamatiskiaj, ueliskia taxikoskej keman kipiaskiaj uejueyi ouijkayomej tein kemej yeskiaj tepemej. Axkan, tejuan no uelis tikxikoskej uejueyi ouijkayomej tein xa tiknemiliaj ke amo ueliskia.

16. ¿Keniuj Geydi kipaleuiani itakuaujtamatilis maj kixiko se ueyi ouijkayot?

¹⁶ Maj tikitakan tein kipanok Geydi, se tokniuj siuat kayot Guatemala. Inamik, Edi, kimiktijkej keman mokepayaj ininchan satepan ke yajkaj se nechikol. ¿Keniuj kipaleuiani itakuaujtamatilis maj kixiko nejon ueyi tayokol? Geydi kijtoua: “Netataujtil nechpaleuia maj nikauili Jiova tein nechtekipachoua uan nejon kichiua maj niyolseui. Nikita keniuj nechyekpia, porin kichiua maj nochankauan uan tokniuan itech nechikol nechpaleuikan. Kemej niksentoka niktekitilia Jiova nechpaleuia maj amo semi nimotayokolti uan maj amo semi nimotekipacho. Tein nikpanouani nechmachtiani ke ika inepaleuil Jiova, Jesús uan inechikol uelis nikxikos tein yeski ouijkayot tein nikpanos satepan”.

17. ¿Toni uelis tikchiuaskej keman tikpanotoskej se ouijkayot tein kemej yeskia se tepet?

¹⁷ Komo tiontayokoxtok porin momikilij se mochankauj oso se akin kuali iuan tionmouikaya, xikonixtajtolti itech Biblia kampa ininka tajtoua sekin akin momikilijkej uan oksepa nenkej. Nejon mitsonpaleuis okachi xiontakuaujtamati ke mikemej oksepa nemiskej. Oso komo tiontayokoxtok porin semej mochankauan  kikalankixtijkej itech nechikol, xionmomachti tein mitsonpaleuis xikonajsikamati ke keman Jiova tamelaua nochipa tapaleuia. Keman tikonpanos ouijkayomej, xikonita kemej se taman tein uelis mitsonpaleuis xikonchikaua motakuaujtamatilis. Xikontapoui Jiova keniuj tionmomachilia uan xikontemo tionyetos iniuan tokniuan, amo xionyeto moselti (Prov. 18:1). Xikonchiua seki taman tein mitsonpaleuis xiontaxiko, maski semi mitsontayokoltis (Sal. 126:5, 6). Xikonsentoka xionyoui nechikolmej, xiontanojnotsa uan xikonixtajtolti Biblia. Uan xikonsentoka xiontanemili itech tatiochiualismej tein Jiova kijtoua ke mitsonmakas. Keman tikonitas keniuj Jiova mitsonpaleuia, motakuaujtamatilis okachi mochikauas.

18. Komo tikonita ke moneki okachi tiontakuaujtamatis, ¿toni uelis tikonchiuas?

¹⁸ Amo xionmosenkaua komo se ouijkayot tein tikonpanok oso tein tikonpanotok kinextia ke moneki okachi tiontakuaujtamatis. Xikonita kemej se taman tein uelis mitsonpaleuis xikonchikaua motakuaujtamatilis. No xiontajtani tein tajtankej imomachtijkauan Jesús: “Xitechonmajxitili totakuautamatilis kachi ok” (Luc. 17:5). No itech xiontanemili neskayomej tein tikitakej itech nejin tamachtilis. Ijkon kemej Miguel uan Yurai, xikonelnamiki keniuj Jiova mitsonpaleuiani. Ijkon kemej kichiuak isiuapil Vero uan kemej kichiuak Anel, xikontataujti Jiova uan xikonilui keniuj tionmomachilia, okachiok keman tikonpanotos se ueyi ouijkayot. Uan ijkon kemej Geydi, xikonseli inepaleuil Jiova keman kichiuas maj mochankauan oso okseki tokniuan mitsonpaleuikan. Komo axkan tikonkaua maj Jiova mitsonpaleui xiontaxiko keman tikonpanos ouijkayomej, okachi tiontakuaujtamatis ke satepan no mitsonpaleuis keman tikonpanos tein yeski ouijkayot.

19. ¿Toni kimatia Jesús, uan toni uelis tikneltokaskej tejuan?

¹⁹ Jesús kinpaleuij itatojtokakauan maj kiitanij kemanian monekia okachi takuaujtamatiskej, sayoj ke kimatia ke ika inepaleuil Jiova ueliskia taxikoskej keman kipanoskiaj ouijkayomej satepan (Juan 14:1; 16:33). Uan no, kimatia ke miakej taltikpakneminij momakixtiskej itech okachi ueyi tajyouilis porin semi takuaujtamatiskej (Apoc. 7:9, 14). ¿Tionmoajsis iniuan nejon miakej taltikpakneminij? Komo axkan tikonchiua nochi tein mitsonpaleuis maj mochikaua motakuaujtamatilis, uelis iniuan tionmoajsis ika inepaleuil Jiova (Heb. 10:39).