1. ¿Xamo tlen timotlajtlaniaj?

AYAKMO miak poliui uan kinpojpoloskej nochi religiones tlen san tlakajkayauaj, Gog de Magog kixnamikis ialtepe toTajtsin Dios uan peuas Armagedón. ¿Timomojtia ijkuak timokuayejyekoua nochi temomojti tlen panos? ¿Ualeua timotlajtlania kox tiktlakamatis toTajtsin Dios ijkuak ijkon panos? Tla ijkon mitspanoua, mitspaleuis tlen okijto Jesús itech texto tlen axkan timomachtiskej. Jesús okinmilui imachtijkauan: “Amo ximotekipachojtinemikah. Xikneltokakah Dios” (Juan 14:1). Tla tikpiaj chikauak totlaneltokilis, amo timomojtiskej uan tikxikoskej nochi tlen panos satepan.

2. ¿Ken uelis tikpiaskej okachi chikauak totlaneltokilis uan tlen timomachtiskej?

² Tla tiknekij tikpiaskej chikauak totlaneltokilis para tikxikoskej tlen panos satepan, ma tikitakan tlen tikchiuaj ijkuak techpanoua tlen amo kuali. Ijkon tikitaskej tlen uelis tikchiuaskej para okachi titlaneltokaskej. Ijkuak itlaj tikixnamikij, okachi titlaneltokaj uan ijkon uelis tikxikoskej tlen panos satepan. Itech nin tlamachtil tikitaskej naui tlamantli tlen kiteititia imachtijkauan Jesús omonekiaya okachi tlaneltokaskej. Noijki tikitaskej ken uelis tikxikoskej itlaj oui uan ken techpaleuis tikxikoskej tlen panos satepan.

3. Ijkon ken kijtoua Mateo 6:30, 33, ¿tlen okijto Jesús?

³ Nochtin tlakamej kinekij kinmakaskej insiua uan inkoneuan tlen kikuaskej, tlen kimokentiskej uan kanin chantiskej. Pero axkan oui ijkon kichiuaskej. Sekimej  tokniuan ayakmo kipiaj tekitl uan amo kajsij okse maski mochijchikauaj kitemoskej. Oksekimej amo kiseliaj se tekitl porque kinmiluiaj ma kichiuakan itlaj amo kuali. Tla ijkon techpanoua, moneki tikneltokaskej Jehová techmakas tlen ika timopanoltiskej. Jesús ijkon okinmilui imachtijkauan ijkuak otlamachti itech tepetl (xiktlajtolti Mateo 6:30, 33). Tla tikneltokaj ika nochi toyolo Jehová amo keman techkauas, timochijchikauaskej tiktekichiuiliskej Jehová. Ijkuak tikitaj Jehová techmaka tlen ika timopanoltiskej, okachi iuan timouikaj uan okachi titlaneltokaj.

4, 5. ¿Tlen yokinpaleui tokniuan Castro amo ma kintekipacho kipiaskej tlen ika mopanoltiskej?

⁴ Ma tikitakan tlen okipanok familia Castro ompa Venezuela. Yejuan yokitakej ken Jehová kinpaleuia amo ma kintekipacho kipiaskej tlen ika mopanoltiskej. Yejuan okipiayaj intlal kanin otlatokayaj uan ijkon okipiayaj tlen ika mopanoltiskej. Pero se tonal, sekimej tlakamej tlen okiuikayaj intepos oajsitoj intlal uan okinmiluijkej ma yakan. Tokni Miguel okijto: “Axkan san tikpiaj tlen tlaki itech se tlaltsintli tlen otechtlanetijkej. Ijkuak tlanesi san niman nikiluia Jehová ma techmaka tlen ika timopanoltiskej non tonal”. Tokniuan Castro tlajyouiaj pero kineltokaj ika nochi inyolo Jehová nochipa kinmakas tlen moneki. Ik non, nochipa monechikouaj uan tetlapouiaj. Yejuan okachi kipatioitaj kitekichiuiliskej toTajtsin Dios uan ye kinmaluia.

⁵ Tokni Miguel uan isiua tlen itoka Yurai, nochipa kilnamikij ken Jehová yokinpaleui. Ualeua Jehová kinyolinia sekimej tokniuan ma kinmakakan tlen kinpoloua noso ma kipaleuikan tokni Miguel ma kajsi tekitl. Ualeua noijki Jehová kinyolinia tokniuan tlen tlapaleuiaj Betel ma kinmakakan tlen kinpoloua. Jehová amo keman kinkaua tokniuan Castro, ik non, yejuan okachi tlaneltokaj. Ijkuak tokniuan okijtojkej ken Jehová yokinpaleui, inmichpoch tlen okachi ueyi uan itoka Yoselin okijto: “Nechyolchikaua ijkuak nikita ken techpaleuia Jehová. Nikita ken se noyolikni uan nikmati nochipa nechpaleuis”. Noijki okijto: “Tlen yotechpanok ne iuan nofamilia, techpaleuis para uelis tikxikoskej tlen panos satepan”.

6. Tla titlajyouijtok porque amo tikpia tomin, ¿tlen uelis tikchiuas para okachi titlaneltokas?

⁶ Xamo titlajyouijtok porque amo tikpia tomin. Pero tlen mitspanotok mitspaleuis okachi xitlaneltoka. Xiktlatlaujti Jehová, xiktlajtolti tlen Jesús okijto itech Mateo 6:25-34 uan xikita tlen mitsmachtia. Ximomachti tlen yokinpanok sekimej tokniuan tlen kiteititiaj Jehová nochipa kinmaluia akinmej kitekichiuiliaj (1 Cor. 15:58). Non kichiuas okachi  xikneltoka toTajtsin Dios mitspaleuis ijkon ken okinpaleui oksekimej. Ye kimati tlen mitspoloua uan kimati ken mitsmakas. Ijkuak tikitas ken mitspaleuis Jehová, okachi titlaneltokas uan ijkon uelis tikxikos tlen panos satepan (Hab. 3:17, 18).

7. Ijkon ken kijtoua Mateo 8:23-26, ¿tleka omonekiaya tlaneltokaskej imachtijkauan Jesús ijkuak chikauak oejekakiauik?

⁷ Se tonal Jesús iuan imachtijkauan oyayaj itech se barca pero opejki chikauak ejekakiaui. Ijkuakon Jesús okinpaleui ma kitakan omonekiaya okachi tlaneltokaskej (xiktlajtolti Mateo 8:23-26). Chikauak oejekakiauiaya uan atl okalakiaya ijtik barca pero Jesús okochtoka. Imachtijkauan sapanoua omomojtijkej, ik non, okijxititoj uan okiluijkej ma kinpaleui. Jesús amo omomojti uan okinmilui: “¿Tleka nonmomojtiah? ¡Wel achitsi nomotlaneltokalis!”. Imachtijkauan omonekiaya kimatiskej Jehová uelis kimaluiskia Jesús uan akinmej iuan okatkaj. ¿Tlen techmachtia? Tla titlaneltokaj, uelis tikxikoskej san tlen techpanos.

8, 9. ¿Tlen okipanok tokni Anel uan tlen okipaleui okachi ma tlaneltoka?

⁸ Ma tikitakan tlen okipanok se tokni tlen iselti uan chanti ompa Puerto Rico. Tokni itoka Anel uan okachi otlaneltokak ijkuak opanok se huracán. Anel okipolo ikalijtik uan iteki ijkuak opanok huracán María itech 2017. Tokni okijto: “Sapanoua onimomojti ijkuak ijkon opanok. Pero onikitak okachi kuali tla nikiluia Jehová ma nechpaleui uan amo san ompa nimotekipachojtos”.

⁹ Tokni Anel okijto noijki okipaleui ma tlaxiko porque otetlakamatki. Ye okijto: “Amo okachi onimotekipacho porque onikchi tlen ialtepe Jehová okijto. Tokniuan onechyolchikajkej uan onechmakakej tlen onechpolouaya uan ijkon onikitak Jehová onechpaleui”. Noijki okijto: “Jehová onechmakak okachi uan amo ken onimokuayejyekouaya, ik non, okachi onitlaneltokak”.

10. ¿Tlen uelis tikchiuas tla itlaj amo kuali mitspanotok?

¹⁰ ¿Mitspanotok itlaj amo kuali? Xamo kanin tichanti otlaxixinki. Xamo chikauak timokokoua, timotekipachoua uan amo tikmati tlen tikchiuas. Pero nochipa xikneltoka tlen kijtoua Jehová maski timotekipachoua. Ika nochi moyolo xikilui nochi tlen tikmachilia. Xikilnamiki ken Jehová yomitspaleui uan ijkon okachi titlaneltokas (Sal. 77:11, 12). Xikilnamikto ye amo keman mitskauas.

11. ¿Tleka moneki tikintlakamatiskej akinmej techyekanaj?

¹¹ ¿Tlen okseki mitspaleuis xitlaxiko? Moneki titetlakamatis ijkon ken okichi  tokni Anel. Xikinneltokili akinmej Jehová uan Jesús yokintlalijkej ma tlayekanakan. Xamo ualeua techiluiskej ma tikchiuakan itlaj tlen tikitaskej amo techpaleuis. Pero xikilnamiki Jehová mitsteochiuas tla titetlakamati. Biblia uan tlen okinpanok sekimej tokniuan kiteititia amitlaj techpanos tla titetlakamatij (Éx. 14:1-4; 2 Crón. 20:17). Ximokuayejyeko tlen okinpanok sekimej uan ijkon nochipa tiktlakamatis tlen kijtos ialtepe Jehová (Heb. 13:17). Tla ijkon tikchiuaskej, amo timomojtiskej ijkuak peuas ueyi tlajyouilistli (Prov. 3:25).

12. Ijkon ken kijtoua Lucas 18:1-8, ¿tleka tla titlaneltokaj uelis tikxikoskej tlen amo kuali techchiuiliaj?

¹² Jesús okimatiaya imachtijkauan kinchiuiliskiaj tlen amo kuali uan ijkon motaskia kox otlaneltokayaj. Ye okinekiaya kinpaleuis ma tlaneltokakan, ik non, okintlapoui tlen okipanok se siuatl tlen oixpoliuik inamik. Tlen okipanok ijkuilitok itech amochtli Lucas. Ye okijto non siuatl miak uelta okilui se juez amo yolkuali ma kipaleui ma kiyektlali tlen okipanotoka. Siuatl okimatiaya tla miak uelta kiluiskia, ye kipaleuiskia uan ijkon opanok. ¿Tlen techmachtia? Jehová yolkuali, ik non, Jesús okijto: “¿Amo kimpalewis Dios akimeh Ye okimpéjpenki, iwa motiotsajtsiliah tlajka iwa n yuak?” (xiktlajtolti Lucas 18:1-8). Satepan noijki okijto: “Ijkuak Ne Non onimochi ni tlakatl niwalmokopas, ¿kechmeh ok kipiaskeh tlaneltokálistli inawak Dios?”. Ijkuak techchiuiliaj itlaj tlen amo kuali, moneki titlaneltokaskej ijkon ken siuatl tlen oixpoliuik inamik, moneki timochiaskej uan amo timosotlauaskej. Tla titlaneltokaj, tikmatiskej Jehová techpaleuis. Noijki moneki tikneltokaskej Jehová technankilis ijkuak tiktlatlaujtiaj. Ualeua ye uelis technankilis ijkuak amo timochixtokej ma technankili.

13. ¿Ken okipaleui se familia ijkuak inmichpoch omotlatlaujti?

¹³ Ma tikitakan tlen okipanok se tokni tlen itoka Vero. Ye chanti ompa República Democrática del Congo iuan ichpoch tlen kipia 15 xiuitl iuan inamik tlen amo momachtia Biblia. Yejuan eyi ocholojkej ijkuak sekimej soldados otemiktitoj ompa inmialtepe. Itech ojtli okinnamikej oksekimej soldados tlen amo okinkauiliayaj ma panokan uan okinmiluijkej kinmiktiskiaj. Tokni Vero ochokak pero ichpoch okiyolseui ijkuak omotlatlaujti uan miak uelta okijto itoka Jehová. Ijkuak otlanki omotlatlaujti, akin okinyekanaya soldados, okitlajtlani: “¿Akin omitsmachti ximotlatlaujti?”. Ye okinankili: “Nonantsin onechmachti ma nimotlatlaujti ijkon ken kiteititia  Mateo 6:9-13”. Tlakatl okilui: “Amo ximotekipacho, xio iuan motatajuan uan Jehová moDios ma namechmalui”.

14. ¿Ken tikteititiskej titlaneltokaj uan tlen uelis techpaleuis?

¹⁴ Tlen kinpanoua sekimej tokniuan techmachtia moneki ma timotlatlaujtikan. Pero ¿tla Jehová amo san niman technankilia noso amo kichiua itlaj tetlajtlachialti para techpaleuis? Ijkon ken siuatl tlen oixpoliuik inamik, nochipa ximotlatlaujti uan xikneltoka toTajtsin Dios amo keman mitskauas. Ye kitas ken mitsnankilis ijkuak monekis. Nochipa xikilui Jehová ma mitsmaka iespíritu santo (Filip. 4:13, TNM). Xikilnamiki ayakmo miak poliui uan Jehová mitsteochiuas uan ayakmo tikilnamikis ken otitlajyoui. Tla tikkauilia Jehová ma mitspaleui xikxiko tlen amo kuali mitspanotok, uelis tikxikos tlen panos satepan (1 Ped. 1:6, 7).

15. Ijkon ken kijtoua Mateo 17:19, 20, ¿tlen amo ueli okichijkej imachtijkauan Jesús?

¹⁵ Jesús okinmilui imachtijkauan tla tlaneltokaskiaj, kixnamikiskiaj tlen amo kuali (xiktlajtolti Mateo 17:19, 20). Maski ualeua okinkixtijkej amo kuali ejekamej, se tonal amo ueli ijkon okichijkej. ¿Tleka? Jesús okinmilui omonekiaya okachi tlaneltokaskej. Okinmilui tla tlaneltokaskiaj, kixnamikiskiaj miak tlamantli oui tlen yetoskia ken tepemej. Axkan tejuan noijki uelis tikixnamikiskej tlen mota amo uelis tikyektlaliskej.

16. ¿Tlen kipaleuia Geydi ma tlaxiko?

¹⁶ Ma tikitakan tlen okipanok se tokni tlen itoka Geydi uan chanti ompa Guatemala. Inamik omotokayotiaya Edi uan okimiktijkej ijkuak omokopatoj omonechikotoj iuan tokniuan. Geydi tlaxikojtok porque tlaneltoka uan okijto: “Ijkuak nimotlatlaujtia, nikiluia Jehová tlen nechtekipachoua uan ye nechyolseuia. Nikmati nechmaluia porque kinyolinia nofamilia uan tokniuan ma nechpaleuikan. Nimochijchikaua niktekichiuilis Jehová, ijkon nimoyolseuia uan amo okachi nimotekipachoua. Tlen yonechpanok onechmachti maski san tlen amo kuali nechpanos, uelis nitlaxikos porque Jehová, ialtepe uan Jesús nechpaleuiskej”.

17. ¿Tlen uelis tikchiuaskej ijkuak sapanoua titlajyouiskej?

¹⁷ ¿Oixpoliuik ikaj akin otiktlasojtlaya? Ximomachti itech Biblia ken sekimej okinyolitijkej uan ijkon okachi tikneltokas kinyolitiskej akinmej oixpolikej. ¿Timoyolkokoua porque se mofamiliar okikixtijkej itech tlanechikol? Ximomachti uan tikitas Jehová techyektlalia porque techtlasojtla. Maski san tlen tikixnamikis, mitspaleuis okachi xitlaneltoka.  Xikilui Jehová nochi tlen tikmachilia. Xiyeto iuan tokniuan uan amo san moselti (Prov. 18:1). Xikchiua seki tlamantli tlen mitsyolchikauas maski ualeua tichokas (Sal. 126:5, 6). Nochipa ximonechiko iuan tokniuan, xitetlapoui uan xiktlajtolti Biblia. Noijki ximokuayejyeko nochi tlen Jehová yokijto kichiuas. Ijkuak tikitas ken mitspaleuia Jehová, okachi titlaneltokas.

18. ¿Tlen uelis tikchiuas tla tikita moneki okachi titlaneltokas?

¹⁸ Amo ximosotlaua tla tikita moneki okachi titlaneltokas ijkuak mitspanoua seki tlamantli amo kuali. Xikita tlen uelis tikchiuas para okachi titlaneltokas. Noijki xiktlajtlani tlen okitlajtlankej imachtijkauan Jesús: “Xikmiakili totlaneltokalis” (Luc. 17:5). Ximokuayejyeko tlen okichijkej tokniuan tlen axkan otimomachtijkej. Xikilnamiki ken yomitspaleui Jehová ijkon ken okichijkej Miguel uan Yurai. Xiktlatlaujti Jehová ijkuak titlajyouia ijkon ken okichijkej ichpoch Vero uan Anel. Ijkon ken Geydi, xikkauili Jehová ma mitspaleui ika mofamilia uan tokniuan. Tla tikkauilis Jehová ma mitspaleui xikixnamiki tlen amo kuali mitspanotok, tikneltokas ye noijki mitspaleuis xikxiko tlen panos satepan.

19. ¿Tlen okimatoka Jesús uan tlen uelis tikneltokas?

¹⁹ Jesús okiteititi imachtijkauan omonekiaya okachi tlaneltokaskej pero okimatoka Jehová kinpaleuiskia ma kixikokan tlen satepan kinpanoskia (Juan 14:1; 16:33). Noijki okimatoka okatkaj miakej tlen momakixtiskiaj itech ueyi tlajyouilistli porque tlaneltokaskiaj (Apoc. 7:9, 14). ¿Inmiuan tipouis? Jehová mitspaleuis inmiuan xipoui tla axkan timochijchikaua okachi titlaneltokas (Heb. 10:39).