1. Hũnda mɛ e nvɛ̃ni e lengbi ti hũndangɔ na tɛrɛ e nɛ?

NGOI mɛndɛ̃, mɔ ndo ma mbɛtɔ na ndo kpale mɛ e na tengbingɔ na ni, na omɛ aba gbɛ̃ngɔ ti asambela ti nvɛ̃nɛ, to ti Gɔgɛ na Magɔgɛ, nga na to ti Armagedona? Ngoi mɛndɛ̃ mɔ ka mɔ hũnda tɛrɛ mɔ nvɛ̃ni ya, ‘Mbi na ngbãngɔ mbilimbili na ngoi mɛ kpengba kpale niko na lingɔ tɛrɛ lo? Se mɔ du na bingangɔ li ti ngaso ko, tɛnɛ tɛ Yezo mɛ kaya vɛrse mɛ agbɔ̃ bɛli tɛnɛ mɛ ndɛ e na mandangɔ na zangɔ mɔ. Yezo tɛnɛndó hɛ̃ ava lo ya: “Ta ĩ kpã bɛ ĩ ngbũ ma. Ĩ ye lo tɛ Nzapa ĩ ye nga lo tɛ mbi.” (Yn. 14:1) Loyengɔ ti kpengbani na zangɔ e ya, ta e kpɛ mbɛtɔ ti kpale mɛ na gangɔ ma.

2. Ngasia la, elengbi ti lingɔ ya, loyengɔ tɛ e ati kpengba ni nɛ, wa ye mɛ e na mandangɔ so ya tɛnɛ mɛ nɛ?

² Elengbi ti lingɔ ya, loyengɔ tɛ e ati kpengbani ti nɛngɔ ya, e nwɔ kpengba kpale mɛ na gangɔ na bangɔ aye mɛ e ndo li na ngoi mɛ e ndo tengbi na apɛnɔ ndɛ. Se e li ngaso ko, e na hĩngangɔ ndo mɛ ta loyengɔ tɛ e kpengbani ma, wa e nga na hĩngangɔ ndenge mɛ elengbi ti lɛkɛngɔ na ni. Ngoi zu ko la, e ndo nwɔ na tara mɛ e ndo tengbi na ni ko, loyengɔ tɛ e ando di ti kpengbani fãni mɛndɛ̃, ni na zangɔ e ya, e gbe bɛ e na ndo kpale mɛ na gangɔ. Na ya tɛnɛ mɛ ndɛ e na mandangɔ, e na bangɔ akpale siɔ mɛndó ava Yezo tengbi na ni, mɛ ndo fandó ya, ala na gwɛ̃ ya, loyengɔ tɛ ala ati gba. E nga na bangɔ ya, e ndo tengbi nga na akpengba kpale ti ngaso ndɛ, nga na se mɛ ni lengbi ti bongisangɔ e na ndo aye mɛ na singɔ na e na bi mɛ na gangɔ.

3. Akpale mɛ Matie 6:30, 33 atɛnɛ tɛnɛ ni mɛ ndo yɔ ya, e du na loyengɔ ti kpengbani na lo ni nɛ?

³ Ni du nzɔ̃ni ya, gbia ti ndasewa ahɛ̃ azi ti ndasewa tɛ lo tɛ ti tɛngɔ, bɔngɔ ti yungɔ, nga na ndo ti la dungɔ na ni. Kanda ta ni du woni lingɔ ni na ya ngoi ti pɛnɔ mɛ e da ma. Kwa tɛ ambɛge awakristo mɛndɛ̃ awɛ, abɛse ge ge ge mɛ ala ndo li ko, ta ala ndo  lua kwa mɛndɛ̃ ma. Ambɛge ni mɛndɛ̃ akɛ̃ akwa mɛ ta ni na mangbi na ndia ti ya Ngbangɔ ma. Na ya akpale ti ngaso ko, ayɔ ya, e du na loyengɔ ti kpengbani, ti yengɔ ya, Yehova na hɛ̃ngɔ e aye ti nɛngɔ ya, e kokisa gwɛ̃ ti ndasewa tɛ e. Ni la adu tɛnɛ mɛ Yezo kambisa ni yangondo hɛ̃ ava lo na ya tɛnɛ tɛ lo mɛndó lo tɛnɛ ka bɛli ngomba (Di Matie 6:30, 33.) Se e hĩnga nvɛ̃ni ya, ta Yehova na ziangɔ e ma ko, e na kpãngɔ kpale ti Lo-lengɔ Gbia na ndo ti uzu na ya dungɔ lɛ ngɛ̃́ tɛ e. Wa ngoi mɛ e na hũngɔ se mɛ Yehova ndo hɛ̃ e aye mɛ e na gwɛ̃ ni ko, e na tingɔ dã na lo, wa loyengɔ tɛ e nga na tingɔ kpengbani.

4-5. Ngasia la Yehova zandó ndasewa kɔi na ngoi mɛndó ala tengbi na kpengba kpale mɛ aba luangɔ aye ti mi ti kokisangɔ na gwɛ̃ tɛ ala nɛ?

⁴ E mu ndakisa ti ndasewa tɛ Castro mɛ ala ndo du ka Vénézuéla, wa e ba nga se mɛndó Yehova za na ala na ngoi mɛndó ala tengbi na kpengba kpale mɛ aba luangɔ aye ti kokisangɔ na gwɛ̃ ti ndasewa tɛ ala. Ndasewa ni kondó na yakere gbá gbá ti batangɔ na asa (ferme) kɔi mɛndó ando za ala ya, ala du na dungɔ lɛ ngɛ̃́ ti nzɔ̃ni. Kanda lá kɔi ndó ko, bãndi kɔi aga na ngombe so ti lo, agbula sese ni ti la na ngunu, wa lo toma nga la ka ndo tɛ la. Miguel mɛ to ti ndasewa tɛnɛ ya: “Ndɛ lo mɛ ko, zo kɔi afa e na yakere sese tɛ lo, ye mɛ e ndo lua ka ndoni ko la ando za e. Bi zu, mbi ndo hũnda bo Yehova kaya sambela ya, lo hɛ̃ e tɛ ti tɛngɔ ti bi kɔi kɔi.” Dungɔ lɛ ngɛ̃́ tɛ azi ti ndasewa tɛ Castro ati na pɛnɔ, kanda ala ndo ye na bɛ la kɔi ya, To e ti ndozu na ngunu ti kokisangɔ gwɛ̃ tɛ la. Ala ndo gwe bombi ngoi zu, ala ndo si nga kwa ti fangɔ tɛnɛ. Ala ndo kpã kpale ti Lo-lengɔ Gbia na ndo ti uzu na ya dungɔ lɛ ngɛ̃́ tɛ la, wa Yehova ndo kokisa nga gwɛ̃ tɛ la.

⁵ Na ya kpengba kpale, Miguel ná ya lo Yurai akpã bondó lɛ la na ndo ndenge mɛndó Yehova ndo za na ala. Yehova salelandó ayata kɔli na ayata wali ti nɛngɔ ya, ala hɛ̃ ala ambɛge ye ti mi mɛ ala na gwɛ̃ ni, bere ala za Miguel ya, lo lua kwa. Na ya ngoi mɛndɛ̃, Yehova hɛ̃ndó ala aye mɛ ala na gwɛ̃ ni na lége ti linɔ tɛ lo. Ta Yehova ziandó ala bɛ fãni kɔi ma. Ndɛ lo mɛ ko, loyengɔ tɛ ala adi ti kpengbani ɔngɔ ti uzu. Na pɛ kambisangɔ kpale kɔi mɛndó Yehova za ala na lo ni ko, Yoselin mɛ kɔzo nyi la ti wali atɛnɛ ya: “Adundó ye ti sangɔ ngunu bɛ hũngɔ se mɛndó Yehova ndo za na e. Bandangɔ so ndoko, mbi ndo hũ lo mabere kwa mbi, wa mbi nga na loyengɔ ya, lo na ngbãngɔ bo lá kwɛ zangɔ mbi.” Lo di tɛnɛ ya: “Kpengba kpale mɛ ndasewa tɛ e atengbi na ni ko, ni bongisa e na lo ti kpengba kpale mɛ na gangɔ.”

6. Ngasia la, mɔ lengbi ti lingɔ ya, loyengɔ tɛ mɔ ati kpengbani na ngoi mɛ mɔ tengbi na kpengba kpale mɛ aba falanga nɛ?

⁶ Mɔ tengbi na kpengba kpale mɛ aba falanga? Se du ngaso ko, ni du ngoi ti pɛnɔ nvɛ̃ni na lo tɛ mɔ. Kanda, mɔ lengbi ti salelangɔ ngoi ti kpengba kpale niko ti nɛngɔ ya, loyengɔ tɛ mɔ ati kpengbani. Li sambela hɛ̃ Yehova, di tɛnɛ mɛ kaya Matie 6:25-34 wa binga nga li mɔ na ndo tɛnɛ mɛ Yezo tɛnɛ kaya ni. Bingangɔ li mɔ na ndo se mɛ Nzapa ndo za na azi mɛ ndo ngbã mbilimbili ndɛ na ya kwa tɛ lo, alengbi nga ti zangɔ mɔ. (1 Kɔr. 15:58) Se mɔ li ngaso ko, mɔ na tingɔ na loyengɔ ti kpengbani ya, To mɔ ti  ndozu na zangɔ mɔ nga ma se mɛndó lo za na azi mɛndɛ̃ mɛndó atengbi na kpengba kpale ti ngaso. Lo hĩnga aye mɛ mɔ na gwɛ̃ ni, wa lo hĩnga nga se mɛ lo na hɛ̃ngɔ mɔ aye niko. Ngoi zu ko la mɔ ndo hũ se mɛ Yehova ndo za mɔ na ya dungɔ lɛ ngɛ̃́ tɛ mɔ ko, loyengɔ tɛ mɔ na tingɔ kpengbani. Wa mɔ nga na dungɔ na likoki ti gbengɔ bɛ mɔ na ndo akpengba kpale mɛ na gangɔ.​—Hab. 3:17, 18.

7. Na bangɔ Matie 8:23-26, ngasia la kpengba kpale mɛ mabere “[kpengba] yá” akpãndó loyengɔ tɛ ava Yezo na ya tara nɛ?

⁷ Ngoi mɛndó Yezo ná ava lo ka lɛ ngu ko, kpengba yá abandandó yangɔ, wa Yezo salelandó ngoi niko ti kambisangɔ hɛ̃ ava lo ya, ayɔ ya, ala du na loyengɔ ti kpengbani. (Di Matie 8:23-26.) Ngoi mɛ yá ndo ya kpengbani wa mɔpo agbɔndó masuwa ko, Yezo so la tɛ lo langɔ. Ngoi mɛ ava lo andũ lo, wa ala hũnda lo ya, lo za ala ko, lo tɛnɛndó hɛ̃ la na ndenge ti nzɔ̃ni ya: “Nda mɛ mbɛtɔ agbɔ̃ ĩ so nɛ, ĩ du azi mɛ ta ĩ ye lo tɛ mbi kpa ma?” Ava Yezo alengbindó ti hĩngangɔ ya, Yehova na ngunu ti batangɔ Yezo ná azi mɛndó so gunda lo. Wangɔ mɛ elengbi ti luangɔ so ya tɛnɛ mɛ nɛ? Loyengɔ ti kpengbani alengbi ti zangɔ e ya, e nwɔ kpengba kpale mɛ mabere “[kpengba] yá,” alengbi ti dungɔ omɛ so yangondo bere ti yika yika.

8-9. Ngasia la, loyengɔ tɛ Anel atindó na ya tara nɛ, wa ye mɛndó aza lo nɛ?

⁸ E ba se mɛ loyengɔ ti kpengbani azandó Anel nyita wali kɔi mɛ mɔdo mɛ lo ndo du ka Porto Rico ya, lo nwɔ kpengba kpale. “[Kpengba] yá” mɛndó lo tengbi na ni adundó bɛta yá mɛ ndo ya. Pɛnɔ tɛ lo ti kpengbani abandandó na 2017 na ngoi mɛndó kpengba yá mɛ ndo ili ni ya Maria akala da tɛ lo. Na lo ti kpengba kpale niko ko, kwa tɛ lo awɛ ngandó. Anel tɛnɛ ya, “Na ya ngoi niko, mbi tindó na songɔ bɛ gba nvɛ̃ni. Kanda, mbi lindó sambela gba hɛ̃ Yehova, mbi mandandó kpãngɔ bɛ mbi gba ka tɛ lo ti nɛngɔ ya, ta lo zia ya, sɔngɔ bɛ aɔ ndo mbi ma.”

⁹ Ye mɛndɛ̃ mɛ azandó Anel ti nɛngɔ ya lo nwɔ pɛnɔ tɛ lo adu tɔndɔngɔ. Lo tɛnɛ ya: “Landangɔ andia ti linɔ tɛ Yehova aza mbi ya, ta mbi kpã lɛ mbi gba na ndo pɛnɔ tɛ mbi ma. Mbi hũ ngandó ndenge mɛ Yehova za na mbi. Lo salelandó ayata kɔli ná ayata wali ti nɛngɔ ya, ala sa ngunu bɛ mbi na ya nyingɔ, ala hɛ̃ nga mbi aye ti mi mɛndó mbi na gwɛ̃ ni.” Lo di tɛnɛ ya: “Yehova hɛ̃ndó mbi aye gba aɔ omɛndó mbi yɔ ka ti lo, ni la ali ya, loyengɔ tɛ mbi adi ti kpengbani nvɛ̃ni.”

10. Ye mɛ mɔ lengbi ti lingɔ se du ya, mɔ tengbi na kpengba kpale mɛ mabere “[kpengba] yá” ndɛ nɛ?

¹⁰ Mɔ tengbi na kpengba kpale mɛ mabere “[kpengba] yá” na ya dungɔ lɛ ngɛ̃́ tɛ mɔ? Ngoi mɛndɛ̃ kpengba kpale mɛ ndo si na bɛ lo mabere yengingɔ ti sese bere kpengba yá ali tɛrɛ lo ka kɔdɔrɔ mɛ mɔ ka da. Bere mɔ tengbi na kpengba yá ti yika yika mɛ mabere kpengba ngã. Ni lengbi ti lingɔ ya, mɔ nzɛ̃ nvɛ̃ni, wa ta mɔ hĩnga nga aye mɛ mɔ lengbi ti lingɔ ma. Kanda ta mɔ zia ya, songɔ bɛ agbanzi mɔ na kpãngɔ bɛ mɔ ka tɛ Yehova ma. Dɔ dã na lo na lége ti sambela mɛ mɔ ndo li hɛ̃ lo na bɛ mɔ kɔi. Wa li ya, loyengɔ tɛ mɔ ati kpengbani na dangɔ bɛ mɔ na ndenge mɛndó Yehova za mɔ na ngoi ti uzu. (Nz. 77:11,  12) Mɔ lengbi ti yengɔ ya, ta lo na ziangɔ mɔ bɛ fãni kɔi ma banda ndɛ, nga bwai bwai.

11. Nda mɛ elengbi ti dungɔ na ekateli ti tɔndɔngɔ azi mɛ ndo tambwisa e nɛ?

¹¹ Ye mɛndɛ̃ mɛ alengbi ti zangɔ mɔ ya, mɔ gbe bɛ mɔ na ya kpengba kpale nɛ? Nga ma se mɛ Anel tɛnɛ na ni, adu tɔndɔngɔ. Ni la, kpã bɛ mɔ na ndo azi mɛ Yehova ná Yezo ndo kpã bɛ ala na ndo la. Na ngoi mɛndɛ̃, azi mɛ ndo tambwisa e alengbi ti hɛ̃ngɔ e andia mɛ ta e sepala na ni ma. Kanda Yehova ndo sulu azi ko la ndo tɔndɔ lo. Wa Tɛnɛ tɛ Nzapa ná se lɛlo tɛ ayata kɔli ná ayata wali mɛndɛ̃ mɛndó atengbi na kpale niko, afa ya, tɛnɛ niko adu biani. (Kob. 14:1-4; 2 Nt. 20:17) Binga li mɔ na ndo ndakisa tɛ la. Lingɔ ngaso na zangɔ mɔ ti nɛngɔ ya, ekateli tɛ mɔ ti tɔndɔngɔ andia mɛ linɔ tɛ Yehova ndo hɛ̃ e ndɛ nga na omɛ ala na hɛ̃ngɔ e na bi mɛ na gangɔ na tingɔ kpengbani. (Aeb. 13:17) Ta mɔ na dungɔ bɛ fãni kɔi na mbɛtɔ ti kpengba kpale mɛ mabere kpengba yá mɛ na lingɔ tɛrɛ lo na bi mɛ na gangɔ ma.​—Mas. 3:25.

12. Na bangɔ Luka 18:1-8, ngasia la loyengɔ alengbi ti zangɔ e ya, e gbe bɛ e na ndo akpale ti zangangɔ mbilimbili mɛ ali tɛrɛ e nɛ?

¹² Yezo hĩngandó ya, na lingɔ ye tɛrɛ ava lo na ndenge ti zangangɔ mbilimbili, wa ni nga na kpãngɔ loyengɔ tɛ la na tara. Ti nɛngɔ ya, lo za la ya, ala gbe bɛ la na ndo kpengba kpale mɛ ala na tengbingɔ na ni ko, lo hɛ̃ndó la ndakisa ti kpale mɛ kaya mbeti tɛ Luka. Yezo kpɔndó pandɛ tɛ wali kɔi mɛ kɔ lo kpi mɛndó lo ndo gwe ngoi zu ka tɛ siɔ gbia ti nɛngɔ ya, lo fa ngbanga tɛ ni na mbilimbili. Lo yendó na bɛ lo kɔi ya, lo na luangɔ mbana gɛrɛ na lo ti ge ge ge tɛ lo. Ngbĩi, wa fangɔ ngbanga amandó demangɔ tɛ lo. Wangɔ mɛ elengbi ti luangɔ nɛ? Ta Yehova zanga mbilimbili ma. Ni la Yezo tɛnɛ ya: “Azi mɛ Nzapa asara la akpã azi tɛ lo, ko bi na lá ala ndodɛrɛ kɔngɔ hɛ̃ lo ko, lo fa gbanda ngbanga tɛ la [na mbilimbili, NWT].” (Di Luka 18:1-8.) Wa Yezo di tɛnɛ ya: “Ngoi ko gbanda mbi Nyi zo mbi ga ko, mbi tã gbanda [loyengɔ ti ngaso, NWT] ge lɛ sese nga?” Ngoi mɛ ando li kpale mɛ azanga mbilimbili tɛrɛ e ko, e du na loyengɔ ti kpengbani nga ma tɛ wali mɛ kɔ lo kpi na dungɔ na yɔngɔrɔ bɛ nga na ge ge ge. E ye na bɛ e kɔi ya, abɛse ngasia, Yehova na zangɔ e. Elengbi nga ti dungɔ na loyengɔ na ndo ngunu mɛ sambela na ni. Yehova lengbi ngoi mɛndɛ̃ ti hɛ̃ngɔ gbinya na lo ti asambela tɛ e na ndenge mɛ ta e da na bɛ e ma.

13. Ngasia la, lingɔ sambela azandó ndasewa kɔi mɛ atengbi na kpale ti zangangɔ mbilimbili nɛ?

¹³ E tɛnɛ tɛnɛ tɛ nyita wali Vero mɛ ndo du ka Congo Kinshasa. Vero ná kɔ lo mɛ ta lo Tɛmwɛ tɛ Yehova ma, ná nyingambi tɛ ala ti wali mɛ na bulu 15 ndo dundó so ya kɔdɔrɔ kɔi, ala kpɛlɛndó na ngoi mɛ asoda agandó ti tiringɔ to so ya yakere kɔdɔrɔ tɛ la. Ka talége ko, ala tengbindó na azi mɛ ndo gbɔ̃nɔ azi ka lége, asoda gbɔ̃nɔndó ala wa ala gia ngandó la ya, ani na kpɔngɔ ala. Ngoi mɛ Véro bandandó tongɔ to ko, nyi lo ti wali tarandó gbanzingɔ lo ya, lo zia tongɔ to na lingɔ sambela na legɔ̃ ti ndozu, lo dindó ili Yehova fãni gba kaya sambela ni. Ngoi mɛndó  lo onzi lingɔ sambela ko, gbia tɛ asoda hũndandó lo ya, “Nyi wali, zo mɛ ha mɔ na lingɔ sambela na?” Lo tɛnɛndó ya, “Adu ta mbi la ha na mbi na landangɔ sambela ti ndakisa mɛ kaya Matie 6:9-13.” Gbia tɛ asoda tɛnɛndó hɛ̃ lo ya, “Nyi wali, gwe na siriri mɔ ná awa dũngɔ mɔ, wa zia ya, Yehova Nzapa tɛ ĩ abata ĩ!”

14. Ye mɛ alengbi ti kpãngɔ loyengɔ tɛ e na ya tara nɛ, wa ye mɛ na zangɔ e ya, e gbe bɛ e nɛ?

¹⁴ Ye mɛndó asi na ndasewa niko, ahɛ̃ e wangɔ ya, ta bɛ e ali na ni ma ya, lingɔ sambela adu ngbondoni. Kanda se ta Yehova hɛ̃ gbinya ti sambela tɛ e mbala kɔi ma bere na ndenge ti kamwangɔ ma, ni lengbi ti kpãngɔ loyengɔ tɛ e na tara? Ma se tɛ wali mɛ kɔ lo kpi mɛ Yezo hɛ̃ na ya ndakisa tɛ lo ko, e ngbã lá kwɛ lingɔ sambela, e kpã bɛ e ya, ta lo na ziangɔ e ma, wa abɛse ngasia, lo na hɛ̃ngɔ e gbinya na ndo sambela tɛ e. E ngbã lá kwɛ yɔngɔ ka ti Yehova ya, lo hɛ̃ e Nyingɔ vurú tɛ lo. (Fil. 4:13) Ta bɛ e ali na ni ma ya, angbã dã Yehova na sulungɔ e na ndenge mɛ ta e na dangɔ bɛ e gbanda bɛ yakere na apɛnɔ mɛ e ndo hũ ma. Se du ya, na mbilimbili zu e ndo gbe bɛ e na ndo pɛnɔ mɛ e ndo hũ ndɛ, wa e ndo kpã nga bɛ e na ndo ndenge mɛ Yehova ndo za na e ko, e na dungɔ na ngunu ti nɛngɔ ya, e nwɔ pɛnɔ mɛ na gangɔ.​—1 Pet. 1:6, 7.

15. Nga ma se mɛ Matie 17:19, 20, atɛnɛ na ni, akpengba kpale mɛndó ava Yezo atengbi na ni nɛ?

¹⁵ Yezo handó na ava lo ya, se ala du na loyengɔ ko, ni na zangɔ ala ya, ala nwɔ atara. (Di Matie 17:19, 20.) Bi kɔi ndó ko, ta ala longandó tomangɔ asiɔ nyingɔ kaya tɛrɛ kɔli kɔi ma, kanda ala ndo tomandó asiɔ nyingɔ na ya angoi mɛndɛ̃. Ye mɛndó ali ya, ta ala longa tomangɔ asiɔ nyingɔ ni ma nɛ? Yezo kambisandó hɛ̃ la ya, ta la ndó na loyengɔ gba ma. Lo pandó hɛ̃ la ya, se loyengɔ tɛ la adu kpengbani ko, ala lengbi ti nwɔngɔ tara ti kotani mɛ mabere ngomba! Ndɛ nga na ngoi tɛ e ko, e ndo tengbi na akpengba kpale mɛ e ndo hũ ya, ta e na nwɔngɔ ni ma.

16. Ngasia la, loyengɔ tɛ Geydi azandó lo ya, lo longa kpengba kpale mɛndó lo tengbi na ni nɛ?

¹⁶ Zia e ba ndakisa tɛ Geydi, nyita wali kɔi mɛ lo ndo du ka Guatemala. A hondó kɔ lo Edi so lɛ lo, na ngoi mɛndó ala lo ka bombi so diringɔ yada. Ngasia la, loyengɔ tɛ Geydi azandó lo ya, lo nwɔ kpengba pɛnɔ ti ngaso nɛ? Lo tɛnɛ ya: “Mbi ziandó kumba tɛ mbi zu hɛ̃ Yehova na ya sambela, wa ni hɛ̃ndó mbi siriri ti bɛ. Mbi hũndó se mɛ Yehova ndo kokisa na gwɛ̃ tɛ mbi na lége tɛ azi ti ndasewa tɛ mbi, nga na ayata kɔli ná ayata wali ti ya bombi. Ngbãngɔ lá kwɛ hɛ̃ngɔ tɛrɛ mbi na ya kwa tɛ Yehova azu na pɛnɔ tɛ mbi, wa ni ndo za mbi ya, ta mbi du na sɔngɔ bɛ na lo ti bi mɛ na gangɔ ma. Kpengba kpale niko, aha na mbi ya, se mbi di tengbi na tara mɛndɛ̃ ko, na lége ti lisalisi tɛ Yehova, tɛ Yezo ná ti linɔ tɛ lo, mbi na gbengɔ bɛ mbi na ndo ni.”

17. Ye mɛ elengbi ti lingɔ na ngoi mɛ e tengbi na kpengba kpale mɛ mabere ngomba nɛ?

¹⁷ Zo ti ndasewa tɛ mɔ bere kwa mɔ kɔi akpi? Mu ngoi ti lingɔ ya, loyengɔ tɛ mɔ na ndo nzɔ̃ dangɔ bɛ ti songɔ na pɛ kwá ati kpengbani na dingɔ avɛrse ti ya Ngbangɔ mɛ ndo tɛnɛ tɛnɛ tɛ  azi mɛndó akpili, wa ala di sondó na pɛ kwá. Mɔ na sɔngɔ bɛ na lo mɛ ya, abi zo kɔi ti ndasewa tɛ mɔ gigi? Manda Ngbangɔ ti nɛngɔ ya, mɔ ye na bɛ mɔ kɔi ya, etumbu tɛ Yehova ndo du ngoi zu ti mbilimbili. Li ya, loyengɔ tɛ mɔ ati kpengba ni ngoi zu ko la mɔ ndo tengbi na kpengba kpale. Tɛnɛ hɛ̃ Yehova se mɛ mɔ ndo ma na tɛrɛ mɔ. Ta mɔ ngbã na bɛ mɔ ma, du dã na ayata kɔli ná ayata wali. (Mas. 18:1) Hɛ̃ tɛrɛ mɔ na ya kwa mɛ na zangɔ mɔ ya, mɔ gbe bɛ mɔ, abɛse mɔ na ya pɛnɔ. (Nz. 126:5, 6) Bata mimɛsɛnɔ tɛ mɔ ti gwengɔ abombi, singɔ kwa ti fangɔ tɛnɛ, nga na dingɔ Ngbangɔ. Wa binga nga li mɔ na ndo anzɔ̃ sulu mɛ Yehova kokapa ti hɛ̃ngɔ mɔ. Ngoi mɛ mɔ na hũngɔ se mɛ Yehova ndo za na mɔ ndɛ ko, loyengɔ tɛ mɔ na mbage tɛ lo na tingɔ kpengbani nvɛ̃ni.

18. Se mɔ hũ ya, ta loyengɔ tɛ mɔ adu kpengbani ma, ye mɛ mɔ lengbi ti lingɔ nɛ?

¹⁸ Se adu ya, pɛnɔ mɛndó mɔ tengbi na ni gã bere omɛ mɔ ndo tengbi na ni ndɛ, afa ya, ta mɔ na loyengɔ mɛ kpengbani ma ko, ta mɔ nzɛ̃ ma. Na olo mɛ la, adu ngoi mɛ ayɔ ya, mɔ li ya, loyengɔ tɛ mɔ ati kpengbani. Li sambela mabere se mɛndó ava Yezo ahũnda na lo ya, “Li ya, e ti na loyengɔ gba, NWT.” (Lk. 17:5) Binga nga li mɔ na ndo se lɛlo tɛ ayata kɔli na ayata wali mɛ e tɛnɛ tɛnɛ tɛ la so ya tɛnɛ mɛ ndɛ e manda. Nga ma se tɛ Miguel ná ya lo Yurai, da bɛ mɔ ngoi zu na ndo se mɛndó Yehova za na mɔ. Mabere nyingambi ti wali tɛ nyita Vero ná Anel ko, li sambela hɛ̃ Yehova na bɛ mɔ kɔi na ngoi mɛ mɔ tengbi na kpale ti pɛnɔ nvɛ̃ni. Wa nga ma se tɛ Geydi, hĩnga ya, Yehova lengbi ti salelangɔ azi ti ndasewa tɛ mɔ, bere azi ti ya bombi ti nɛngɔ ya, lo za mɔ. Se mɔ zia ya, Yehova za mɔ na ndo akpengba kpale mɛ mɔ ndo tengbi na ni ndɛ ko, mɔ na hũngɔ ya, lo ndo li kpale na lo tɛ mɔ, wa mɔ nga na yengɔ na bɛ mɔ kɔi ya, lo na zangɔ mɔ ti nɛngɔ ya, mɔ gbe bɛ mɔ na ndo kpengba kpale mɛ na gangɔ.

19. Ye mɛndó ta Yezo dɛ ki na lo ni ma nɛ, wa ye mɛ elengbi nga ti yengɔ lo ni nɛ?

¹⁹ Yezo tɛnɛndó yangondo hɛ̃ ava ya, ala zanga loyengɔ na ya ambanga kpale mɛndɛ̃. Kanda ta lo dɛndó kitɛ ma ya, na lége ti lisalisi tɛ Yehova, ala na gbengɔ bɛ ala na ya kpengba kpale mɛ ala na tengbingɔ na ni na bi mɛ na gangɔ. (Yn. 14:1; 16:33) Lo hĩngandó ya, butu butu tɛ azi na songɔ na ngoi ti kota pɛnɔ na lo ti loyengɔ ti kpengba ni mɛ ala na ni. (Sum. 7:9, 14) Mɔ na dungɔ ka popo tɛ azi niko? Mɔ na dungɔ ka popo tɛ ala na ndombali bɛ ti vundu tɛ Yehova, se du ya, mɔ salela amabaku zu mɛ ndɛ mɔ na ni ti lingɔ ya, loyengɔ tɛ mɔ ati kpengbani!​—Aeb. 10:39.