1. Ngimuphi umbuzo esingazibuza wona?

KGHANI ngezinye iinkhathi uyatshwenyeka ngezehlelakalo ezizokwenzeka ingasikade, njengokubhujiswa kwekolo yamala, ukuhlaselwa kwakaGogi wakwaMagogi nepi ye-Armagedoni? Kghani ukhe uzibuze ukuthi, ‘Ngizokghona na ukuhlala ngithembekile nakwenzeka izinto ezithusakwezi?’ Nangabe ukhe wazibuza, amazwi kaJesu asekele isihloko sanamhlanjesi, azokusiza. UJesu watjela abalandeli bakhe, wathi: “Ningatshwenyeki eenhliziyweni zenu. Kholwani.” (Jwa. 14:1) Ukukholwa okuqinileko kuzosisiza sibe nesibindi nanyana singaqalana nani esikhathi esizako.

2. Singakuqinisa njani ukukholwa kwethu begodu sizokucoca ngani esihlokwenesi?

² Singaqinisa ukukholwa kwethu ukuze sikwazi ukujamelana neenlingo zesikhathi esizako, ngokuthi sihlolisise kuhle indlela esiqalana ngayo neenlingo kwanje. Nasicabanga ngalokho, sizokubona ukuthi kukuphi la ekufuze sithuthukise khona. Qobe nasikghodlhelelela isilingo, ukukholwa kwethu kuyaqina. Lokhu kuzosisiza sikghodlhelelele iinlingo zesikhathi esizako. Esihlokwenesi, sizokuhlola ubujamo obune obatjengisa ukuthi abafundi bakaJesu bebatlhoga ukuba nokukholwa okungeziweko. Sizokufunda nangokuthi singazikghodlhelelela njani iinlingo ezifana nezabo namhlanjesi nokuthi zingasibandulela njani izehlakalo zesikhathi esizako.

3. Ngokomtlolo kaMatewu 6:30, 33 ngiliphi iphuzu uJesu alikhanyisako ngokukholwa?

³ Kujayelekile ngehloko yomndeni ukutlhogomela umndenayo ngokudla okwaneleko, izembatho nendawo yokufihla ihloko. Akusilula ukukwenza lokhu ngaso soke isikhathi. Ngezinye iinkhathi, abafowethu nabodadwethu balahlekelwa msebenzi begodu naphezu kweemzamo ebudisi, abakghoni  ukufumana omunye. Abanye kutlhogeke ukuthi bale imisebenzi engakafaneli amaKrestu. Kibo boke ubujamobu, kufuze sikholelwe ukuthi uJehova angenza nanyana yini ukuthi asitlhogomele, thina nemindenethu. UJesu wakwenza kwakhanya lokhu ebafundini bakhe eTjumayelweni yeNtabeni. (Funda uMatewu 6:30, 33.) Nasingaqiniseka ngokuthi uJehova angeze asitjhiya, sizokghona ukusebenzisa amandlethu ekuthuthukiseni iintlhogo zomBuso. Nasilemuka ukuthi uJehova usisiza njani ngezinto esizitlhogako, uzokuba mumuntu wamambala kithi begodu nokukholwa kwethu kuzokuqina.

4-5. Khuyini eyasiza omunye umndeni nawutshwenyeke ngezinto ozitlhogako?

⁴ Cabanga ngomndeni we-Venezuela owazibonela ngewawo isizo lakaJehova lokha nawutshwenyekile ngezinto ozitlhogako. Ngaphambilini, umndeni wakwa-Castro bewufumana imali eyaneleko ngokulima iplasi okungelawo. Ngemva kwalokho, isiqhema seenlelesi sathatha umuzabo besabakatelela ukuthi basukele iplasi labo. Ubabakhona, u-Miguel, uthi: “Nje sesithembele khulu ekulimeni indawo encani esibolekwe yona. Ngithoma ilanga ngokubawa uJehova ukuthi asiphe esikutlhogako kwelangelo.” Ukuphila kubudisi emndenini lo kodwana ukukholwa kwabo ukuthi uBabethu onethando uzobapha abatlhogako kwelanga ngalinye, kwenza umndeni lo uhlale ukhona qobe esifundweni nesimini. Ukusebenzela uJehova kuqakatheke khulu ekuphileni kwabo begodu uJehova ubanikela abakutlhogako.

⁵ Naphezu kobudisi abaqalana nabo, u-Miguel nomkakhe u-Yurai, baqalelele kuJehova bona abatlhogomele. Ngezinye iinkhathi, uJehova usebenzise abafowethu nabodadwethu ukuthi babanikele ezinye izinto abazitlhogako namkha basize u-Miguel afumane umsebenzi. Kuthi kobunye ubujamo, uJehova usebenzise i-ofisi legatja ukuthi libasize. UJehova azange abatjhiye. Lokhu kuqinise ukukholwa komndeni lo. Ngemva kokukhuluma ngobujamo obuthileko uJehova abasize ngabo, indodakazabo edala u-Yoselin, ithi: “Kuyakhuthaza ukubona indlela uJehova asitlhogomele ngayo. Ungumnganami begodu ngiyaqiniseka ukuthi uzokuhlala angisiza. Iintjhijilo umndenethu odlule kizo zisilungiselela iintjhijilo zesikhathi esizako ezizokuba budisi ukudlula lezi.”

6. Ungakuqinisa njani ukukholwa kwakho nawuqalene nobudisi kwezomnotho?

⁶ Kghani uqalene nomraro wezomnotho? Nange kunjalo, kusikhathi esibudisi leso. Nanyana kunjalo, ungasebenzisa ithubeli ukuqinisa ukukholwa kwakho. Thandaza, ufunde amezwi kaJesu akuMatewu 6:25-34 bese uzindle ngawo. Cabanga ngeembonelo zesikhathi sethu ezitjengisa ukuthi uJehova uyabatlhogomela labo abanokunengi abakwenzako emsebenzini weKosi. (1 Kor. 15:58) Ukwenza  njalo kuzokuqinisa ukukholwa kwakho ukuthi njengombana uBabakho wezulwini asize abanye ebebanomraro onjengewakho, uzokusiza nawe. Uyakwazi okutlhogako bewuyazi nokuthi uzokunikela khona njani. Njengombana ubona isizo lakaJehova ekuphileni kwakho, ukukholwa kwakho kuzokuqina bona ungakghona ukukghodlhelelela iinlingo zangesikhathi esizako.—Hab. 3:17, 18.

7. Ngokomtlolo kaMatewu 8:23-26, “isiwuruwuru esikhulu” sakulinga njani ukukholwa kwabafundi bakaJesu?

⁷ Lokha uJesu nabafundi bakhe nabaqalene nesiwuruwuru elwandle, uJesu wasebenzisa isehlakalwesi ukubatjengisa ukuthi batlhoga ukukholwa okungeziweko. (Funda uMatewu 8:23-26.) Njengombana isiwuruwurwesi siba namandla begodu namanzi angena ngesikepeni, uJesu bekazilalele kamnandi. Abafundi ebabathukiwe bamvusa bebabawa nokuthi abahlenge kodwana iKosi yababuza ngomusa, yathi: “Kubayini nisaba kangaka, nina bokukholwa okuncani?” Kunokuthi bangenwe mamanzi emadolweni, abafundi abathukiwekwaba bekufuze balemuke ukuthi uJehova unamandla wokubavikela esiwuruwurwini esiyingozi. Sifundani endabeni le? Ukukholwa okuqinileko kungasisiza siqalane ngokuphumelelako nemiraro ‘enjengesiwuruwru esikhulu.’

8-9. Ngisiphi isitjhijilo u-Anel aqalana naso begodu wasizwa yini?

⁸ Cabanga ngendlela u-Anel, udade ongakatjhadi we-Puerto Rico, aqalana ngayo nesitjhijilo esalola ukukholwa kwakhe. “Isiwuruwuru esikhulu” aqalana naso bekungesamambala. Isitjhijilwesi sathoma ngo-2017 lokha isiwuruwuru u-Maria sitjhabalalisa umuzi ka-Anel. Ngebanga laso, walahlekelwa msebenzakhe. U-Anel uthi, “Ngeenkhathi ezibudisezo, bengitshwenyekile, kodwana ngatjela uJehova ngomthandazo begodu bengingavumeli ukutshwenyeka kungikhandele ukwenza izinto engifuna ukuzenza.”

⁹ U-Anel uthi ukulalela nakho kwamsiza bona akghodlhelelele iintjhijilo. Uthi: “Ukulandela isinqophiso esivela ehlanganweni kaJehova kwangisiza ngehlisa ummoya. UJehova wangisiza asebenzisa abafowethu nabodadwethu, abangikhuthaza bebangipha nezinto ebengizitlhoga. UJehova wanginikela okudlula lokhu ebengikubawile begodu nokukholwa kwami kwaqina ngho.”

10. Khuyini ongayenza nawuqalene ‘nesiwuruwuru esikhulu?’

¹⁰ Kghani uqalene ‘nesiwuruwuru esikhulu’ ekuphileni kwakho? Kungenzeka sibandakanya ihlekelele yemvelo namkha ukusahlelwa kugula okumasikizi okuqeda amandla. Kungenzeka utshwenyeke ngezinye iinkhathi kodwana ungavumi ukuthi kukulisise ukuthemba uJehova. Tjhidela kuye  ngomthandazo osuka ehliziyweni. Qinisa ukukholwa kwakho ngokuthi ucabangisise ngeenkhathi la uJehova akusize khona. (Rhu. 77:11, 12) Ungaqiniseka ukuthi uJehova angeze akutjhiya.

11. Kubayini kufuze sizimisele ukulalela labo abadosa phambili?

¹¹ Khuyini enye engakusiza ukghodlhelelele iintjhijilo? Njengokutjho kwaka-Anel, kulalela. Funda ukuthemba labo abathenjwa nguJehova noJesu. Ngezinye iinkhathi, labo abadosa phambili kungenzeka basinikele isinqophiso esingazwisiseki. Nanyana kunjalo, uJehova uzosibusisa nasilalelako. Sinobufakazi obuvela eliZwini lakhe neembonelweni zeenceku zakhe ezithembekileko ukuthi ukulalela kusindisa ukuphila. (Eks. 14:1-4; 2 Kron. 20:17) Cabangisisa ngeembonelwezi. Ukwenza njalo kuzokuqinisa isifiso sakho sokulandela iinqophiso ezivela ehlanganweni kaJehova nje nesikhathini esizako. (Heb. 13:17) Ngalokho, angekhe ube namabanga wokusaba isizi elikhulu elizako.—IzA. 3:25.

12. ULukasi 18:1-8 ukuhlobanisa njani ukukholwa nokukghodlhlelelela ukuphathwa kumbi?

¹² UJesu bekazi ukuthi ukuphathwa kumbi bekuzoba sitjhijilo ebalandelini bakhe. Bona abasize bazwisise indaba le, wabanikela isibonelo esitlolwe encwadini kaLukasi. UJesu wabatjela ngendaba yomhlolokazi obekasolo alilela umgwebi ongakalungi ngokuthi akakaphathwa kuhle. Bekaqiniseka ukuthi ukuphikelela kwakhe kuzokuphumelela. Emaswapheleni, umgwebi wenza ngokwesibawo sakhe. Sifundani kilokhu? UJehova unobulungiswa. Yeke, uJesu wathi: “Alo-ke, uZimu ngeze na abangela bona benzelwe ubulungiswa abakhethiweko bakhe abamlilela imini nobusuku?” (Funda uLukasi 18:1-8.) Wangezelela ngokuthi: “INdodana yomuntu nayifikako, izokufumana na ukukholwa okunje ephasini?” Nasingakaphathwa kuhle, kufuze sibe nokukholwa okuqinileko okufana nokomhlolokazi ngokuthi sibekezele. Nasinokukholwa okunjalo, singaqiniseka ukuthi uJehova uzosisiza. Kufuze sikholelwe nokuthi ukuthandaza kunamandla khulu. Ngezinye iinkhathi, iimthandazwethu ingaphendulwa ngeendlela ebesingakazilindeli.

13. Umthandazo wawusiza njani omunye umndeni obewuphethwe kumbi?

¹³ Cabanga ngesibonelo sakadadwethu u-Vero, ohlala e-Democratic Republic of the Congo. Bekufuze yena, ubabakwakhe ongakholwako nendodakazakhe eneminyaka eli-15 babaleke endaweni ebebahlala kiyo nayihlaselwa masotja. Endleleni, bahlangana namasotja, abajamisa abathusela ngokuthi azobabulala. U-Vero wathoma ukulila, indodakazakhe yalinga ukumehlisa ummoya ngokuthi ithandaze ngokuzwakalako, ibuyelela ibizo lakaJehova kanengi emthandazwenayo. Nayiqeda  ukuthandaza, umdosiphambili wamasotja wambuza wathi, “Mntazana, ngubani okufundise ukuthandaza?” Yaphendula yathi, “Ngifundiswe ngumma, asebenzisa isibonelo esikuMatewu 6:9-13.” Umdosiphambili wamasotja wathi, “Mntazana, khamba ngokuthula nababelethi bakho, kwanga uJehova uZimenu anganivikela!”

14. Khuyini engalinga ukukholwa kwethu begodu khuyini engasenza sikghodlhelele?

¹⁴ Iimbonelo ezinje zisifundisa ukuthi akukafaneli sinyaze amandla womthandazo. Kuthiwani nangabe imithandazwakho ayiphendulwa msinya namkha ngendlela ebewulindele ngayo? Njengomhlolokazi osemfanekiswemi kaJesu, ragela phambili uthandaza unethemba lokuthi uZimu angekhe akutjhiye begodu esikhathini esingaphelisi ihliziyo, uzowuphendula umthandazwakho. Ragela phambili ubawa ummoya ocwengileko. (Flp. 4:13) Khumbula ukuthi ingasikade uJehova uzokubusisa khulu bewulibale ngobuhlungu obuzwileko. Nawukghodlhelelela iintjhijilo ngokuthembeka ngesizo lakaJehova, uzokuqina bewukghone nokuqalana neentjhijilo zesikhathi esizako.—1 Pit. 1:6, 7.

15. Njengombana kutlolwe kuMatewu 17:19, 20, ngisiphi isiqabo abafundi bakaJesu abaqalana naso?

¹⁵ UJesu wafundisa abafundi bakhe ukuthi ukukholwa kuzobasiza beqele ngale kweenqabo. (Funda uMatewu 17:19, 20.) Ngelinye ilanga, akhenge bakghone ukuqotha idimoni, nanyana ngaphambili bakhe bakghona ukukwenza lokho. Bewuyini umraro? UJesu wathi bebatlhoga ukukholwa okungeziweko. Wabatjela ukuthi nabanokukholwa okwaneleko, bangakghona ukuhlula iinqabo ezinjengentaba! Namhlanjesi siqalana neentjhijilo ezingenza kube budisi ukulotjha uJehova.

16. Ukukholwa kumsize njani u-Geydi wakghodlhelela ngemva kokubulawa kwendodakwakhe?

¹⁶ Cabanga ngesibonelo saka-Geydi, udadwethu we-Guatemala. Indodakwakhe u-Edi, yabulawa ngelinye ilanga nababuya esifundweni. Ukukholwa kwakhe kwamsiza njani wakghodlhelelela ubuhlungu ebekabuzwa? Uthi: “Ukuthandaza kungisiza ukuthi ngiphosele umthwalami kuJehova, okungenza ngibe nokuthula. Ngibona indlela uJehova angitlhogomela ngayo ngomndenami nangabangani ebandleni. Ukuhlala ngimatasa ekusebenzeleni uJehova kwehlisa ubuhlungu engibuzwako bekungisize ngingatshwenyeki khulu ngengomuso. Ubujamobu bungisize ngabona ukuthi nanyana ngingaqalana nabuphi ubujamo esikhathini esizako, ngizokuthumba ngesizo lakaJehova, uJesu nehlanganwakhe.”

17. Khuyini esingayenza nasiqalene nemiraro efana nentaba?

¹⁷ Kghani akusikade uhlongakalelwe mumuntu omthandako? Ziphe isikhathi sokuqinisa ukukholwa kwakho ngokuvuswa  kwabafileko ngokuthi ufunde iBhayibheli nayikhuluma ngalabo abavuswa ekufeni. Kghani uzwa ubuhlungu ngebanga lokuthi ilunga lomndeni lisusiwe ebandleni? Qinisa ukukholwa kwakho ngokuthi indlela kaZimu yokukhalima iphuma phambili. Nanyana ngimuphi umraro oqalene nawo, usebenzise ukuqinisa ukukholwa kwakho. Thululela ihliziywakho kuJehova. Ungabi yikomo edla yodwa, kunalokho hlala useduze nabafowenu nabodadwenu. (IzA. 18:1) Hlanganyela ezintweni ezizokwenza ukghodlhelele, nanyana zikukhumbuza ngalokho okukwehlakaleleko. (Rhu. 126:5, 6) Ragela phambili uya esifundweni, utjhumayela bewufunde neBhayibheli. Hlala ukhumbula izinto ezihle uJehova akuthembisa zona ePharadesi. Nawubona indlela uJehova akusiza ngayo nje, ukukholwa kwakho kuzokuqina ngho.

18. Nawulemuka ukuthi ukukholwa kwakho kunentunja, khuyini ekufuze uyenze?

¹⁸ Nangabe iintjhijilo okhe waqala nazo ngaphambili namkha oqalene nazo nje, ziveze intunja ekukholweni kwakho, ungapheli amandla. Kuqale njengethuba lokuqinisa ukukholwa kwakho. Yenza isibawo esenziwa bapostoli bakaJesu, nabathi: “Sipha ukukholwa okungeziweko.” (Luk. 17:5) Cabanga nangeembonelo esicoce ngazo esihlokwenesi. Njengo-Miguel no-Yurai, cabanga ngazo zoke iinkhathi uJehova akusize ngazo. Njengendodakazi ka-Vero no-Anel, ungalisi ukuthandaza kuJehova, khulukhulu nawuqalene neentjhijilo. Njengo-Geydi, tjheja ukuthi uJehova angasinikela isizo esilitlhogako ngokusebenzisa umndeni namkha abangani. Nawuvumela uJehova akusize ukghodlhelelele iintjhijilo oqalene nazo nje, kuzokuba lula ukuthi umthembe bona nesikhathini esizako, uzokusiza ukghodlhelelele iintjhijilo.

19. UJesu bekaqiniseka ngani, wena ungaqiniseka ngani?

¹⁹ UJesu wasiza abafundi bakhe babona ukuthi kukuphi la ukukholwa kwabo kubogaboga khona kodwana akhenge azaze ukuthi ngesizo lakaJehova, bazokuhlula nanyana ngiziphi iintjhijilo esikhathini esizako. (Jwa. 14:1; 16:33) Bekaqiniseka ukuthi isiqubuthu esikhulu sizokuphumelela esizini elikhulu ngebanga lokukholwa kwaso okuqinileko. (IsAm. 7:9, 14) Kghani uzokuba hlangana naso? Ngomusa kaJehova ongakasifaneli, ungaba phakathi kwaso nange nje uqinisa ukukholwa kwakho!—Heb. 10:39.