1. Re ka ipotšiša potšišo e fe?

NA O fela o ikwa o tšhoga ge o nagana ka dilo tšeo di tlago go direga e se kgale go swana le ge go tlo fedišwa bodumedi bja maaka, ge re tlo hlaselwa ka Gogo wa Magogo goba ka ntwa ya Haramagedone? Na o kile wa ipotšiša gore, ‘Na ke tlo kgona go ba le tumelo e tiilego ge dilo tšeo tša go tšhoša di tlo direga?’ Ge e ba o kile wa ipotšiša dipotšišo tše, mantšu a Jesu ao a lego sehlogong se a tlo go thuša kudu. Jesu o ile a botša barutiwa ba gagwe gore: “Le se dumelele dipelo tša lena di huduega. Bontšhang tumelo.” (Joh. 14:1) Go ba le tumelo go tlo re thuša gore re tle re kgotlelele mathata nakong e tlago.

2. Re ka tiiša tumelo ya rena bjang, gona re tlo ithuta’ng sehlogong se?

² Ge e ba re tseba seo re ka se dirago gore re matlafatše tumelo ya rena gona bjale, re tlo kgona go lebeletšana le mathata ao a tlago go re wela nakong e tlago. Ge re ka nagana gore re arabela bjang ge re welwa ke mathata gona bjale, seo se tlo re thuša gore re bone gore ke kae moo go hlokegago gore re bontšhe tumelo. Teko e nngwe le e nngwe yeo e re welago e dira gore tumelo ya rena e tie. Le gona re tlo kgona le go kgotlelela diteko tša nakong e tlago. Sehlogong se, re tlo bona maemo a mane ao a bontšhago gore barutiwa ba Jesu ba be ba swanetše go ba le tumelo e oketšegilego. Le gona, re tlo bona gore re ka lebeletšana le mathata a go swana le a bona bjang lehono le gore re ka itokišeletša bjang mathata ao a tlago go re wela nakong e tlago.

3. Mantšu a Jesu ao a lego go Mateo 6:30, 33 a re thuša go kwešiša’ng?

³ Ke ga tlhago gore hlogo ya lapa e nyake go hlokomela lapa la yona ka dijo, diaparo le madulo. Eupša mehleng ye ya bofelo ga go bonolo go dira seo. Ba bangwe ba bana babo rena le dikgaetšedi  ba ile ba lahlegelwa ke mešomo ya bona. Le ge ba ile ba leka ka thata go nyaka e mengwe, ga se ba ka ba e hwetša. Ba bangwe ba ile ba swanelwa ke go gana mešomo yeo Bakriste ba sa swanelwago ke go e šoma. Maemong a ka moka re hloka tumelo e tiilego ya go re kgonthišetša gore Jehofa o tlo re thuša go hlokomela malapa a rena. Jesu o hlaloseditše barutiwa ba gagwe gabotse ka taba ye Thutong ya gagwe ya Thabeng. (Bala Mateo 6:30, 33.) Ge re tloga re tshepa gore Jehofa a ka se re tlogele, re tlo dula re swaregile ka go mo hlankela. Le gona ge re bona Jehofa a re thuša ka dilo tšeo re di hlokago, re tlo mo rata kudu e bile tumelo ya rena e tlo tia.

4-5. Ke’ng seo se ilego sa thuša lapa le lengwe go kgotlelela ge le be le thatafalelwa ke go hwetša dilo tšeo le bego le di hloka?

⁴ Nagana ka moo Jehofa a ilego a thuša lapa le lengwe kua Venezuela ge le be le sa tsebe gore le tlo hwetša kae dilo tšeo le bego le di hloka. Lapa la ga Castro le be le na le polasa gomme le be le kgona go hwetša tšhelete e ntši moo. Ka morago, ditsotsi di ile tša tla polaseng yeo di swere dithunya gomme tša raka lapa leo. Miguel e lego hlogo ya lapa leo o re: “Ga bjale re iphediša ka go lema lefelo le lenyenyane leo re le adimilego ke motho yo mongwe. Mesong e mengwe le e mengwe ke kgopela Jehofa gore a nthuše go hwetša dilo tšeo ke di hlokago letšatšing leo.” Le ge bophelo bo le boima ka lapeng leo, ba na le tumelo ya gore tatago bona wa legodimong o tlo ba hlokomela ka dilo tšeo ba di hlokago letšatši le letšatši, le gona ba ya dibokeng le tšhemong ka mehla. Jehofa o hlokomela lapa leo ka dilo tšeo le di hlokago e bile ba mo etišitše pele maphelong a bona.

⁵ Le ge Miguel le mosadi wa gagwe Yurai ba be ba na le mathata, ba ile ba lemoga gore Jehofa o be a dutše a ba hlokometše. Ka dinako tše dingwe Jehofa o be a thuša Miguel a diriša Bakristegotee le yena gore ba mo fe dilo tšeo a bego a di hloka le go mo thuša go hwetša mošomo. Le gona Jehofa o be a diriša ofisi ya lekala gore e nee Miguel le lapa la gagwe dilo tšeo ba bego ba di hloka. Jehofa ga se a ka a ba tlogela. Mafelelong ba ile ba bona gore tumelo ya bona e tia kudu. Ka morago ga gore Yoselin, e lego morwedi yo mogolo wa Miguel a bone ka moo Jehofa a ilego a ba thuša ka gona, o itše: “Go a kgothatša go bona gore Jehofa o nthušitše kudu. Ke mogwera wa ka yo ke tshepago gore o tlo dula a nthuša. Le gona mathata ao lapa la gešo le fetilego go ona, a be a re lokišeletša go tlo kgotlelela mathata ao re tlago go lebeletšana le ona nakong e tlago.”

6. O ka tiiša bjang tumelo ya gago ge o na le mathata a tša ditšhelete?

⁶ Na o na le mathata a tša ditšhelete? Ge e ba go le bjalo, go swanetše go ba go le boima. Eupša le ge go le boima, o ka diriša nako yeo go tiiša tumelo ya gago go Modimo. Rapela Jehofa, o be o bale le mantšu a Jesu ao a lego go Mateo 6:25-34 gomme o naganišiše ka ona. Nagana ka mehlala ya lehono yeo e bontšhago gore Jehofa o hlokomela bahlanka ba gagwe bao ba dulago ba swaregile ka go mo hlankela.  (1 Bakor. 15:58) Ge e ba o ka dira bjalo, tumelo ya gago e tla tia gomme wa tshepa gore Jehofa o tla go thuša go swana le ge a ile a thuša bahlanka ba gagwe bao ba bego ba na le mathata a go swana le a gago. Jehofa o a tseba gore o hloka eng le gona o a tseba gore o tlo go nea seo o se hlokago bjang. Ge o bona gore Jehofa o a go thuša, tumelo ya gago e tlo tia le gona o tlo kgona go kgotlelela mathata a magolo nakong e tlago.—Habak. 3:17, 18.

7. Go ya ka Mateo 8:23-26, ledimo le legolo le ile la leka tumelo ya barutiwa ba Jesu bjang?

⁷ Ge Jesu a be a sepela le barutiwa ba gagwe ka sekepe, go ile gwa tla ledimo ba sa letela. Ke moka Jesu a diriša tiragalo yeo go ba thuša gore ba swanetše go ba le tumelo e oketšegilego. (Bala Mateo 8:23-26.) Ledimo leo le be le le matla ke moka meetse a tsena ka sekepeng, eupša ka nako yeo Jesu o be a robetše. Ka ge barutiwa ba be ba tšhogile, ba ile ba mo tsoša gore a ba phološe. Ke moka Jesu a bolela le bona a išitše maswafo fase a re: “Ke ka baka la’ng le boifa ka tsela ye, lena ba tumelo e nyenyane?” Barutiwa bao ba be ba swanetše go lemoga gore Jehofa o be a tlo šireletša Jesu le bao a bego a na le bona. Re ithuta’ng? Go ba le tumelo e tiilego go tlo re thuša gore re kgotlelele “ledimo le legolo” goba bothata le ge e le bofe bjo bo ka bonagalago e ka ke ledimo.

8-9. Tumelo ya Anel e ile ya lekwa bjang, gona o ile a thušwa ke’ng?

⁸ Nagana kamoo kgaetšedi Anel yo a sego lenyalong yoo a dulago kua Puerto Rico, a ilego a bontšha gore o na le tumelo e tiilego ge a be a lebeletšane le mathata a magolo. O ile a hlaselwa ke ledimo la nnete. Ka 2017 tumelo ya gagwe e ile ya lekwa ge ledimo leo le bitšwago Maria le be le senya lapa la gagwe. O ile a ba a felelwa ke mošomo wa gagwe. Anel o re: “Ka nako yeo ke be ke tšhogile kudu, eupša ka ge ke be ke tshepa gore Jehofa o tla nthuša, ke ile ka mo rapela gomme ka se dumelele mathata ao a mphetša matla.”

⁹ Anel o re go kwa go mo thušitše gore a lebeletšane le mathata ao a bego a na le ona. O re: “Se se nthušitšego gore ke dule ke išitše maswafo fase ke go latela seo mokgatlo wa Jehofa o rego ke se dire. Jehofa o ile a nthuša a diriša bana bešo le dikgaetšedi bao ba ilego ba nkgothatša le go nnea dilo tšeo ke bego ke di hloka. Ruri Jehofa o nneile dilo tše dintši go feta tšeo ke bego ke mo kgopetše tšona e bile tumelo ya ka e ile ya tia le go feta.”

10. O ka dira’ng ge e ba o lebeletšane le ledimo le legolo?

¹⁰ Na o lebeletšane le “ledimo le legolo”? Mohlomongwe o ka ba o hlasetšwe ke kotsi ya tlhago. Goba mohlomongwe o ka ba o hlasetšwe ke ledimo la seswantšhetšo, go swana le go babja moo o feleletšago o ikwa o nyama e bile o sa tsebe gore o dire eng. Ka dinako tše dingwe o ka tšhoga eupša o se ke wa dumelela seo se go thibela gore o tshepe Jehofa. Ithekge ka yena gomme o mo rapele go tšwa pelong. Matlafatša tumelo ya gago ka gore o naganišiše ka dilo tše dibotse tšeo Jehofa a go  diretšego tšona. (Ps. 77:11, 12) O ka kgodišega gore a ka se tsoge a go tlogetše.

11. Ke ka baka la’ng re swanetše go ikemišetša go kwa bao ba re eteletšego pele?

¹¹ Ke’ng se sengwe gape seo se ka go thušago gore o kgotlelele diteko? Go swana le ge Anel a boletše, re ka thušwa ke go kwa. Ithute go tshepa bao Jehofa le Jesu ba ba tshepago. Ka dinako tše dingwe bao ba re eteletšego pele ka mo mokgatlong wa Modimo, ba ka re laela gore re dire dilo tšeo re sa kwešišego gore ke ka baka la eng re swanetše go di dira. Eupša Jehofa o tlo re šegofatša ge re ka ba kwa. Re ithutile go tšwa ka Beibeleng le go bahlanka ba Modimo bao ba botegago gore Jehofa o phološa bao ba mo kwago. (Ek. 14:1-4; 2 Dikor. 20:17) Naganišiša ka mehlala yeo. Ge o ka dira bjalo, o tlo kgona go latela tlhahlo yeo re e newago ke mokgatlo gona bjale le nakong e tlago. (Baheb. 13:17) Le gona o ka se tle o tšhošwa ke masetlapelo a magolo go ba ledimo le legolo leo le lego kgauswi le go tla.—Die. 3:25.

12. Luka 18:1-8 e swantšha bjang go ba le tumelo le go kgotlelela le ge re sa swarwe gabotse?

¹² Jesu o be a tseba gore barutiwa ba gagwe ba be ba ka se swarwe gabotse le gore seo se be se tlo leka tumelo ya bona. O ile a ba thuša gore ba kgotlelele ka gore a ba botše papišo yeo e lego ka pukung ya Luka. Jesu o ile a bolela ka papišo ya mohlologadi yo a bego a dula a lopa moahlodi yo a bego a sa ahlole batho ba bangwe gabotse. Mohlologadi yoo o be a kgodišegile gore ge a ka dula a lopa moahlodi yoo, o tla mo kwa. Mafelelong moahlodi yoo o ile a mo kwa. Papišo ye e re ruta gore Jehofa o lokile. Jesu o itše: “Ruri, na Modimo a ka se ke a dira gore toka e direlwe bakgethwa ba gagwe bao ba mo goeletšago mosegare le bošego?” (Bala Luka 18:1-8.) Jesu o ile a oketša ka gore: “Ge Morwa wa motho a fihla, na ruri o tla hwetša tumelo ya mohuta wo mo lefaseng?” Ge e ba re sa swarwe gabotse, re swanetše go bontšha tumelo e tiilego ka go phegelela go swana le mosadi wa mohlologadi. Ge e ba re na le tumelo e tiilego, re ka kgodišege gore Jehofa o tla re thuša. Le gona re swanetše go lebelela thapelo e le bohlokwa kudu. Ka dinako tše dingwe Jehofa a ka araba dithapelo tša rena ka tsela yeo re bego re sa e letela.

13. Thapelo e ile ya thuša bjang lapa leo le ilego la se swarwe gabotse?

¹³ A re boneng mohlala wa kgaetšedi Vero yo a dulago kua Democratic Republic of the Congo. Vero, monna wa gagwe yo e sego Hlatse le morwedi wa bona yo a nago le mengwaga e 15, ba ile ba swanelwa ke go tloga moo ba bego ba dula gona ka ge lefelo leo le be le hlasetšwe ka mašole. Ge ba le tseleng ba ile ba kopana le mašole a mangwe ao a bego a thibile tsela gomme a ba tšhošetša ka gore a tlo ba bolaya. Ge Vero a thoma go lla, morwedi wa gagwe o ile a leka go mo homotša ka go rapelela godimo a bitša leina la Jehofa gantši. Ge a fetša go rapela, moetapele wa mašole o ile a botšiša  ngwanenyana yoo gore: “O rutilwe ka mang go rapela?” Ke moka ngwanenyana yoo a mo araba ka gore: “Ke rutilwe ke mma a diriša mantšu ao a lego go Mateo 6:9-13.” Ke moka molaodi yoo wa mašole a re: “Ngwanenyana, sepela le batswadi ba gago ka khutšo ebile Jehofa Modimo wa lena a le šireletše!”

14. Ke’ng seo se ka lekago tumelo ya rena, gona re ka thušwa ke’ng gore re kgotlelele?

¹⁴ Diphihlelo tša go swana le tše di re thuša go lemoga gore thapelo e bohlokwa kudu. Ge e ba thapelo ya gago e sa arabje kapelapela goba ka tsela yeo o nyakago, seo se ka leka tumelo ya gago. Ge e ba seo se ka go diragalela, o tla thušwa ke’ng gore o kgotlelele? Go swana le mohlologadi wa papišong ya Jesu, o swanetše go dula o rapela o kgodišegile gore Modimo a ka se tsoge a go tlogetše le gore o tlo araba thapelo ya gago ka nako e swanetšego. Dula o kgopela Jehofa gore a go nee moya o mokgethwa. (Bafil. 4:13) Gopola gore go se go ye kae Jehofa o tlo go šegofatša kudu moo o tlago go lebala mathata a gago ka moka. Ge Jehofa a go thuša go kgotlelela diteko tšeo di go welago, o tlo ba le tumelo e tiilego gomme wa kgona go kgotlelela diteko tšeo di tlago go go wela nakong e tlago.—1 Pet. 1:6, 7.

15. Go ya ka Mateo 17:19, 20, barutiwa ba Jesu ba ile ba lebeletšana le bothata bofe?

¹⁵ Jesu o ile a ruta barutiwa ba gagwe gore tumelo e tlo ba thuša go kgotlelela mathata. (Bala Mateo 17:19, 20.) Ka letšatši le lengwe ba ile ba palelwa ke go raka batemona le ge ba be ba fela ba kgona go dira seo. Bothata e be e le eng? Jesu o ba boditše gore ba be ba hloka tumelo e oketšegilego. O ba boditše gore ge ba ka ba le tumelo e oketšegilego ba be ba tlo kgona go fenya mathata ao a bonagalago a lekana le dithaba ka bogolo! Le rena lehono re ka kopana le mathata ao go bonalago eka re ka se kgone go a fenya.

16. Go ba le tumelo go ile gwa thuša Geydi bjang ka morago ga gore monna wa gagwe a bolawe?

¹⁶ Nagana ka mohlala wa kgaetšedi Geydi yo a tšwago Guatemala. Monna wa gagwe Edi o ile a bolawa ge ba be ba boa dibokeng. Tumelo yeo Geydi a nago le yona e ile ya mo thuša bjang go kgotlelela ge a be a nyamile kudu? O re: “Go rapela go nthuša gore ke botše Jehofa kamoo ke ikwago ka gona gomme seo se nthuša gore ke be le khutšo ya monagano. Ke a bona gore Jehofa o ntlhokomela a diriša ba gešo le bana babo rena le dikgaetšedi ka phuthegong. Go dula ke swaregile ka go hlankela Jehofa go nthuša gore ke se sa kwa bohloko kudu le gore ke se sa tshwenyega kudu ka dilo tšeo di tlago go direga gosasa. Ka morago ga bothata bjoo bo ilego bja nkwela ke ile ka lemoga gore bothata le ge e le bofe bjo ke tla bago le bjona nakong e tlago, ke tlo kgona go bo kgotlelela feela ka thušo ya Jehofa, Jesu le mokgatlo wa rena.”

17. Re ka dira’ng ge re lebeletšane le mathata a magolo ao a swanago le dithaba?

¹⁷ Na o hlokofaletšwe? Tiiša tumelo ya gago ya gore nakong e tlago go tlo ba le tsogo ka go  bala ka diphihlelo tša ka Beibeleng tša batho bao ba ilego ba tsošwa bahung. Na o nyamišitšwe ke gore yo mongwe wa ka lapeng la geno o kgaotšwe? Bala e le gore o kgodišege gore tayo e bontšha gore Modimo o a re rata. Go sa šetšwe gore o na le mathata afe, diriša nako yeo go tiiša tumelo ya gago go Modimo. Botša Jehofa ka seo se go tshwenyago. O se ke wa phela o nnoši eupša dula o na le bana beno le dikgaetšedi. (Die. 18:1) Dira mešomo yeo e tlago go go thuša gore o kgotlelele le ge ka dinako tše dingwe o ka lla ge o gopola ka seo se go diragaletšego. (Ps. 126:5, 6) Dula o eya dibokeng le tšhemong e bile o bale Beibele ka mehla. E bile o dule o gopola ka dilo tše dibotse tšeo Modimo a tshepišago go tlo re direla tšona nakong e tlago. Ge o bona gore Jehofa o a go thuša, tumelo ya gago go yena e tlo tia le go feta.

18. O tla dira’ng ge e ba o lemoga gore tumelo ya gago e a fokola?

¹⁸ Ge e ba o lemoga gore mathata ao o kilego wa ba le ona, goba ao o nago le ona gona bjale a dira gore tumelo ya gago e fokole, o se ke wa nyama. Tšea mathata ao e le nako e botse ya gore o matlafatše tumelo ya gago go Jehofa. O ka bolela go swana le baapostola ba Jesu bao ba ilego ba kgopela Modimo gore: “Re nee tumelo e oketšegilego.” (Luka 17:5) Le gona o ka naganišiša ka mehlala ya batho bao re boletšego ka bona sehlogong se. Go swana le Miguel le Yurai, o swanetše go gopola ka dilo tše dibotse tšeo Jehofa a go diretšego tšona nakong e fetilego. Go swana le morwedi wa Vero le Anel, o ka rapela Jehofa go tšwa pelong ge o lebeletšane le mathata a magolo. Go swana le Geydi, gopola gore Jehofa a ka go thuša a diriša ba geno goba bana beno le dikgaetšedi. Ge o ka dumelela Jehofa gore a go thuše ka mathata ao o nago le ona gona bjale, o ka kgodišega gore o tlo go thuša ka mathata ao o tla bago le ona nakong e tlago.

19. Jesu o be a kgodišegile ka’ng, gona wena o ka kgodišega ka’ng?

¹⁹ Jesu o ile a thuša barutiwa ba gagwe go bona gore ke kae moo ba bego ba hloka tumelo e oketšegilego, eupša ga se a ka a belaela gore Jehofa o tlo kgona go ba thuša go kgotlelela mathata ao a be go a tla ba wela nakong e tlago. (Joh. 14:1; 16:33) O be a kgodišegile gore go ba le tumelo e tiilego go be go tlo thuša lešaba le legolo gore le tle le phologe masetlapelo a magolo. (Kut. 7:9, 14) Na o tla ba gare ga lešaba leo le legolo? Ka ge Jehofa a lokile kudu, o tlo go thuša gore o be yo mongwe wa bona ge o ka dira sohle seo o ka se kgonago gore o tiiše tumelo ya gago gona bjale!—Baheb. 10:39.