1. He xini xivutiso lexi hi nga ha tihambaka xone?

LOKO u pimisa hi mintxhumu leyi taka yentxeka a nkameni lowu wu taka—ku helisiwa ka wungadzreli bya madzrimi, nhlaselo wa Gog wa Magog ni yimpi ya Armagedoni, xana wa hlatiyela? Swi nga yentxeka u tivutisa leswi: ‘Xana ni ta swi kota ku dumbeka loko mintxhumu leyo yi yentxeka?’ Loko u same u tivutisa leswo, mazritu ya Yesu lama nga ka tsralwa dzra nhlokomhaka leyi ma ta ku pfuna. Yesu a byele vadondzrisiwa vake a ku: ‘A timbilu tenu ti nga txhuki ti ganaganeka. Pfumelani.’ (Yh 14:1) Loko lipfumelo dzrezru dzri tiyile, a dumbo dzrezru mayelanu ni wumudzruku na dzrone dzra tiya.

2. Xana hi nga tiyisa lipfumelo dzrezru hi ndlela yini, nakone hi ta vona yini ka xidondzro lexi?

² Ntxhumu lowu nga tiyisaka lipfumelo dzrezru akuva hi lwisana ni mindzringo leyi taka yentxeka a nkameni lowu taka, i ku va hi kambisisa ndlela leyi hi lwisanaka ha yone ni swikazratu swoswi. Loko hi yanakanyisisa hi ndlela leyi hi lwisanaka ni swikazratu ha yone namunhla, hi ta vona leswi hi fanelaka ku swi yentxa akuva hi tiyisa lipfumelo dzrezru. Loko hi langusana ni dzringo wa kukazri, lipfumelo dzrezru dzri ya dzri tiya nakone leswo swi ta hi pfuna ku va hi tiyisela mindzringo ya nkama lowu taka. Ka xidondzro lexi, hi ta vona mintxhumu ya mune leyi yentxekeliki vadondzrisiwa va Yesu leyi va pfuniki ku vona leswaku a va fanela ku va ni lipfumelo ledzri yengetelekiki. Ntsrhaku, hi ta vona ndlela leyi hi nga lwisanaka ni swiyimu leswi fanaka namunhla ni ndlela leyi swi nga hi lulamiselaka ha yone ka leswi swa ha taka yentxeka a nkameni lowu taka.

3. Hi lani swi tsraliwiki ha kone ka Matewu 6:30, 33, he yini yinhla leyi Yesu a yi bekiki livaleni mayelanu ni lipfumelo?

³ I swa ntumbuluku kuva nhloko ya ndangu yi kazrateka hi ku nyika nsati ni vana swakuda kun’we ni mbangu wa ku tsrhama ka  wone. Kambe ka minkama ya ku kazrata leyi hi hanyaka ka yone, a swi nabyali ku yentxa leswo. Minkama yimbeni vamakwezru va lahlekeliwa hi mintizro, nakone nambi va tikazrata a va swi koti ku kuma ntizro wumbeni. Vamakwezru vambeni va yale mintizro leyi a yi nga fambisani ni mahanyela ya wukriste. Ka swiyimu hinkwaswu leswo, hi fanela ku va ni lipfumelo dzra leswaku Yehovha a ta hi nyika leswi ndangu wezru wu swi vilelaka akuva hi kota ku hanya. Yesu a swi beke a livaleni leswo ka vadondzrisiwa vake ka Dondzro ya le Nhaveni. (Dondzra Matewu 6:30, 33.) Loko hi tiyiseka hi ku helela leswaku Yehovha a nga ti hi tsrhika, hi ta tikazratela ku yentxa leswi nga swa lisima—ku nga ntizro wa Mfumu. Loko hi ya hi vona Yehovha a hi hlayisa hi tlhelo dzra nyama, hi ya hi mu vona na a li mhunu wa ntshima nakone lipfumelo dzrezru dzri ya dzri tiya.

4-5. I yini lexi pfuniki ndangu wa kukazri akuva wu lwisana ni ku hlatiyela ka ku kuma swa ku tihanyisa?

⁴ Vona ndlela leyi Yehovha a pfuniki ha yone ndangu wa kukazri a Venezuela akuva wu langutana ni ku hlatiyela loko a wu li na kone ka ku kuma swakuda. A ndangu wa ka Castro a wu kota ku tihanyisa hi leswi a wu ni nsimu leyitsrongo leyi a wu dzrima ka yone. Kutani, ntlawa wa kukazri wa swigevengu lowu a wu ni swibalesa wu va dumelile, wu tlhela wu va sindzrisa kuva va suka. Miguel, nhloko ya ndangu lowo, a li: “Namunhla wa siku, akuva hi kota ku tihanyisa hi byala ka xinsin’wana xitsrongo lexi va hi volekiki xone. Mixo wun’wana ni wun’wana hi kombela Yehovha akuva a hi nyika leswi hi swi vilelaka siku ledzro.” A wutomi a byi wu nabyaleli ndangu lowo, kambe hinkwavu va ni lipfumelo dzra leswaku Papayi wezru lweyi a nga ni lizrandzru a nga va hlayisa. Hi ndlela leyo, va swi kota kuva minkama hinkwayu va ya mintlhanganwini ni ku hlengela a nsin’wini. Va zrangisa Mfumu a wuton’wini byavu nakone Yehovha a va nyika hinkwaswu leswi va swi vilelaka.

⁵ Hi nkama lowo wa kukazrata, Miguel ni nsati wake, Yurai, va beke miyanakanyu ka ndlela leyi Yehovha a a va hlayisa ha yone. Minkama yimbeni, Yehovha a tizrisa vamakwezru a bandleni akuva va nyika swizro ndangu lowu mintxhumu leyi va yi vilelaka. Va tlhela va pfuna Miguel akuva a kuma swintizrwana. Minkama yimbeni, Yehovha a pfuna ndangu lowu hi ku tizrisa vamakwezru va le Betele. Yehovha a nga wu tsrhikanga ndangu wa ka Castro. Lexi nyonxisaka, hi leswaku lipfumelo dzra ndangu lowu dzri ya dzri kula. Ntsrhaku ka loko va vulavule hi mpfunu lowu Yehovha a va nyikiki wone, Yoselin ku nga n’wana lwenkulu wa Miguel, a te: ‘Swi nyonxisa swinene ku vona voko dzra Yehovha hi ku kongoma. Ni mu vona swanga munghanu wanga nakone na swi tiva leswaku minkama hinkwayu a ta ni pfuna.’ A tlhela a ku: ‘A mindzringo leyi hi kumaniki na yone, yi hi lulamisele ku va hi lwisana ni mindzringo leyikulu a nkameni lowu taka.’

6. Xana u nga dzri tiyisa hi ndlela yini lipfumelo dzraku loko u langusana ni swikazratu swa timali?

⁶ Xana u ni swikazratu swa timali? Loko swi li tanu, swi nga yentxeka swi nga ku nabyaleli. Kambe, nambi loko xiyimu xaku xi kazrata, londzrovota mukhandlu lowo akuva u tiyisa lipfumelo dzraku. Khongota ka Yehovha nakone dondzra mazritu ya Yesu lawa ma nga ka Matewu 6:25-34 u tlhela u yanakanyisisa ha wone.  Yanakanya hi swikombiso swa masiku yezru, leswi kombisaka leswaku Yehovha awa va hlayisa lava tamaka va tikazrata ka ntizro wake. (1Ko 15:58) Leswo swi ta tiyisa ku dumba kwaku ka leswaku ku fana ni leswi Papayi wezru wa le matilweni a pfuniki vambeni ka swikazratu swavu swa timali, na wene a ta ku pfuna. Loko u ya u vona ndlela leyi Yehovha a ku pfunaka ha yone a wuton’wini byaku. Lipfumelo dzraku dzri ta ya dzri kula nakone leswo swi ta ku lulamisela ka mindzringo leyikulu leyi taka.—Hb 3:17, 18.

7. Hi ku ya hi Matewu 8:23-26, xana “xidzedze lexikulu” xi dzringe lipfumelo dzra va dondzrisiwa va Yesu hi ndlela yini?

⁷ Loko Yesu ni vadondzrisiwa vake va li botini, va kumane ni xidzedze lexikulu. Yesu a tizrise mukhandlu lowo akuva a pfuna vadondzrisiwa vake ku vona leswaku a va fanela ku va ni lipfumelo ledzri yengetelekiki. (Dondzra Matewu 8:23-26.) A xidzedze xiye xi va ni ntamu swinene lakakuva mati ma sungula ku nghena a botini, kambe Yesu a tame a yetlela na a zrulile. A vadondzrisiwa va txhave swinene lakakuva va ye mu pfuxa va kombela leswaku a va huluxa. Yesu a va tsratsriye hi lizrandzru a ku: “Ha yini mi txhava, n’wine va lipfumelo ledzritsrongo?” Vadondzrisiwa a va fanela ku swi tiva leswaku a swi nga ti mu kazratela Yehovha ku pfuna Yesu ni lava a a li na vone a botini. Hi dondzra yini? Lipfumelo ledzri tiyiki dzri nga hi pfuna kuva hi lwisana ni “swidzedze leswikulu”, a nga ha va swa ha kakunene kumbe swa ku fanekisela.

8-9. Xana lipfumelo dzra Anel dzri dzringiwe hi ndlela yini, nakone i yini lexi mu pfuniki?

⁸ Vona leswi yentxekeliki Anel, ku nga makwezru wa xisati wa le Porto Rico, lweyi a kumaniki ni xiyimu xa ku bindzra swinene, lexi tiyisiki lipfumelo dzrake, ku nga xidzedze xa hakakunene. Leswo swi yentxeke hi 2017 loko xidzedze lexi vitaniwaka Maria xi hohlote yindlu ya Anel. Anel a tlhele a luza ni ntizro, yene a li: “Masiku lawayani ya ku kazrata ma ni hlatiyelisile kambe ni dondzre ku dumba Yehovha, hi ku va ni khongota kwake ni kuva ni nga pfumeleli ku hlatiyela ku ni heta ntamu.”

⁹ Anel a dzrimuka ntxhumu wumbeni lowu mu pfuniki ka masiku lawayani ya ku kazrata—ku nga ku yingiseta. A li: “Ku yingiseta minkongomiso ya nhlengeletanu swi ni pfune kuva ni zrula. Ni vone ndlela leyi Yehovha a tizrisiki vamakwezru ha yone akuva a ni pfuna, va ni tiyisile va tlhela va ni nyika hinkwaswu leswi a ni swi vilela.” A tlhela a ku: “Yehovha a ni nyike ku tlula leswi ni kombeliki swone nakone lipfumelo dzranga dzri ye dzri kula.”

10. Xana u nga yentxa yini loko u lwisana ni “xidzedze lexikulu”?

¹⁰ Xana na wene u langusana ni “xidzedze lexikulu” a wuton’wini byaku? Swi nga yentxeka u xaniseka hi leswi ku humeleliki mhangu ya ntumbuluku. Kumbe swi nga yentxeka u hele ntamu nakone u nga swi tivi swa ku swi yentxa hi leswi u nga ni mavabyi lamakulu swinene. Swi nga yentxeka minkama yimbeni u hlatiyela, kambe u nga pfumeleli ku hlatiyela koloko ku ku sivela ku dumba Yehovha. Khongota ka Yehovha hi mbilu hinkwayu. Tiyisa lifpumelo dzraku hi ku yanakanyisisa  hi makhambi hinkwawu lawa Yehovha a ku pfuniki a nkameni lowu khalutiki. (Ps 77:11, 12) Tiyiseka leswaku Yehovha a nge ku tsrhiki—swoswi ni le nkameni lowu taka.

11. Ha yini hi fanela ku tiyimisela ku yingiseta nkongomiso wa lava hi zrangelaka?

¹¹ Xana he wini ntxhumu wun’wana lowu nga hi pfunaka ku tiyiselela swikazratu? Hi lani xikombiso xa Anel xi hi pfuniki ha kone, i ku yingiseta. Dondzra ku dumba vhanu lava Yehovha na Yesu va va dumbaka. Minkama yimbeni, vavanuna lavo, lava nyikiwiki wutiyanguleli va nga hi nyika minkongomiso leyi tikombaka ingiki a yi twali. Kambe, minkama hinkwayu Yehovha ta tovokisa ku yingiseta kwezru. Loko hi dondzra Bibele ni mimfambu ya wutomi bya malandzra ya ku dumbeka ya Yehovha, hi dondzra leswaku ku yingiseta ku nga huluxa wutomi. (Eks 14:1-4; 2Mk 20:17) Yanakanyisisa hi swikombiso leswo. Ku yentxa leswo, swi ta yengesela ku tiyimisela kwaku ka ku yingiseta minkongomiso ya Yehovha swoswi ni le nkameni lowu wu taka. (Hb 13:17) U ta tlhela u va ni xixixi xa ku tiyiselela xidzedze lexikulu lexi tsrhindzrekelaka.—Pr 3:25.

12. Xana xifananiso lexi nga ka Luka 18:1-8 xi hi pfuna hi ndlela yini ku vona ku yelana loko nga kone ka lipfumelo ni ku tiyisela ku kala wululami?

¹² Yesu a a swi tiva leswaku ku kala wululami a ku ta dzringa lipfumelo dzra vadondzrisiwa vake. Akuva a va pfuna ku tiyisela, Yesu a va byeli xifananiso lexi nga ka buku dzra Luka. Yesu a vulavule hi mufelwa wa kukazri lweyi a kombeliki mutsremi wa timhaka akuva a mu kombisa wunene. A a tiyiseka leswaku loko o o phikelela a mutsremi a a ta mu yingela, nakone hi leswi yentxekiki. I ntiyiso leswaku Yehovha a nga pfumali wululami ku fana ni mutsremi wa le ka xifananiso lexi. Hi ndlela leyo, Yesu a hlaye leswi ha Yehovha: ‘Xana Xikwembu Nkulukumba a nha a nga lulamiseli vahlawuliwa vakwe, lava bandlukanaka ku yene wusiku ni nhlikani?’ (Dondzra Luka 18:1-8.) Yesu a yengetele a ku: ‘Xana n’wana wa mhunu, a ku tlhaseni kwakwe, a ta kuma vupfumeli a misaveni xana?’ Hi dondzra yini? Loko hi langusana ni ku kala wululami hi fanela ku va ni lipfumelo ledzri tiyiki ku fana ni mufelwa, hi kombisa leswaku hi ni lipfumelo ledzro, hi ku va hi lehisa mbilu ni ku tiyisela. Lipfumelo ledzro dzri hi yentxa hi tiyiseka leswaku Yehovha a ta hi pfuna hi nkama wa kone. Handle ka leswo hi fanela ku dumba ntamu wa xikhongoto. Minkama yimbeni, swikhongoto swezru swi nga hlamuliwa hi ndlela leyi hlamalisaka.

13. Xana xikhongoto xi wu pfune hi ndlela yini ndangu lowu a wu khomiwa hi ndlela ya ku kala wululami?

¹³ Vona xikombiso xa makwezru wa xisati lwa vitaniwaka Vero, lweyi a tsrhamaka a República Democrática do Congo. Vero, nuna wake lweyi a kalaka a nga tizreli Yehovha, ni n’wanake wa xisati wa 15 wa malembe va sindzriseke ku tsrutsruma loko muganga wavu wu hlaseliwe hi masotxha. A ndleleni, va yimisiwe hi ntlawa wa masotxha lawa ma va txhaviseliki ma hlaya leswaku ma ta va dlaya. Loko Vero a sungule ku dzrila, xin’hwanyatana xake xi mu miyetelile hi ku va xi khongota hi zritu dzra le henhla ni ku va xi phindaphinda vito dzra Yehovha loko xi khongota. Loko xi game ku khongota, muzrangeli  wa masotxha a xi vutise leswi: “Wene wa n’hwanyana, i mani a ku dondzrisiki ku khongota?” Kutani xi hlamula xi ku: “Hi mamana wanga a ni dondzrisiki, a tizrise xikombiso lexi nga ka Matewu 6:9-13.” Muzrangeli wa masotxha a ku: “N’hwanyana, famba hi ku zrula ni vapswele vaku nakone ingiki Yehovha, Xikwembu Nkulukumba waku, a nga mi sizrelela!”

14. Xana i yini leswi nga dzringaka lipfumelo dzrezru nakone i yini lexi ta ka hi pfunaka kuva hi tiyisela?

¹⁴ Swikombiso swa ku fana ni leswi swi hi pfuna ku vona leswaku a hi fanelanga hi dzrela ntamu wa xikhongoto. Kambe loko swikhongoto swaku swi nga hlamuliwi swa kola ni kola kumbe hi ndlela ya ku hlamalisa ke? Ku fana ni mufelwa wa le ka xifananiso xa Yesu, tama u khongota, dumba leswaku Yehovha a nge ku tsrhiki nakone hi ndlela ya kukazri a ta hlamula swikhongoto swaku. Tama u kombela moya wa ku xwenga wa Yehovha. (Flp 4:13) Dzrimuka leswaku ku nga li khale u ta yamukela matovoko manyingi ya Yehovha nakone u ta dzrivala ku xaniseka hinkwaku loku u kumanaka na kone. Loko u tama u tiyisela hi ku dumbeka hi ku pfuniwa hi Yehovha, u ta ya u tiya nakone u ta tilulamisela ka mindzringo leyi ya ha taka.—1Pe 1:6, 7.

15. Hi ku ya hi buku dzra Matewu 17:19, 20, xana hi xini xikazratu lexi vadondzrisiwa va Yesu va lungutaniki na xone?

¹⁵ Yesu a dondzrise vadondzrisiwa vake leswaku lipfumelo a dzri ta va pfuna ku hlula swikazratu. (Dondzra Matewu 17:19, 20.) Minkama yinyingi vadondzrisiwa va swi kotile ku hlula mademona, kambe hi nkama wa kukazri a va swi kotanga ku yentxa leswo. Ha yini? Yesu a tlhamuxele leswaku a va vilela lipfumelo ledzri yengetelekiki. A byele vadondzrisiwa vake leswaku loko va va ni lipfumelo ledzri tiyiki a va ta kota nambi ku susa ni tinhava, leswi tlhamuxelaka leswaku a va ta hlula xikazratu xin’wana ni xin’wana swi nge na mhaka leswaku xi kule ku ya tlhasa kwini. Namunhla hi nga langutana ni swikazratu leswi hi yanakanyaka leswaku a swi koteki ku swi hlula.

16. Xana lipfumelo dzri mu tiyise hi ndlela yini Geydi, ntsrhaku ka loko a feliwe hi nuna?

¹⁶ Vona xikombiso xa Geydi, makwezru wa xisati wa le Guatemala. Nuna wake, Edi, a dlayiwile na va buya hi mintlhanganwini. Xana lipfumelo dzri pfune Geydi kuva a lwisana ni xikazratu lexo hi ndlela yini? A li: “Xikhongoto xi ni pfune kuva ni txukumetela swikazratu swanga ka Yehovha, kutani ni sungule ku zrula. Ni vone ndlela leyi Yehovha a ni pfuniki ha yone hi ku tizrisa ndangu ni vanghanu va le bandleni. Ku tsrhama na ni khomekile a ntizrweni wa Yehovha swi pumbe ku vaviseka loko a ni li na kone nakone swi ni pfuna ku va ni hanya dzra namunhla ntsena na ni nga kazrateki ku tlula mpimu hi swa mundzruku. Ntsrhaku ka hinkwaswu leswi ni kumaniki na swone. Ni dondzre ku vona leswaku swi nge na mhaka leswaku he swini swikazratu leswi ni kumanaka na swone, ni ta tama ni tiyisela hi ku pfuniwa hi Yehovha, Yesu kun’we ni hi nhlengeletanu.”

17. Xana i yini leswi hi nga swi yentxaka loko hi langutana ni swikazratu leswikulu swa ku fana ni tinhava?

¹⁷ Xana u le ku xanisekeni hi leswi u feliwiki hi mhunu lweyi u mu zrandzraka? Loko swi li tanu, tinyike nkama wa ku tiyisa lipfumelo dzraku hi  dumbo dzra ku pfuxiwa ka vafi, hi ku dondzra hi malandzra lama dumbekiki ya Xikwembu Nkulukumba lawa ma tlheliki ma pfuxiwa. Xana wa kazrateka hi leswi xizro xa ndangu waku lexi susiwiki bandleni? Dondzra, akuva u vona leswaku ndlela leyi Yehovha a layaka ha yone minkama hinkwayu i yinene. Swi nge na mhaka leswaku he xini xikazratu lexi u kumanaka na xone, xi tizrisi swanga mukhandlu wa ku va u tiyisa lipfumelo dzraku. Txhululela Yehovha leswi nga mbilwini yaku. U nga titsravuxi ni van’wana. A matsrhan’wini ya leswo, tama u va kusuhi ni vamakwezru. (Pr 18:1) Hlengela ka mintizro leyi taka ku pfuna kuva u tiyisela, nambi loko swi djula u yi yentxa na wu dzrila. (Ps 126:5, 6) Tama u ya mintlhanganwini, a nsin’wini nakone dondzra Bibele. Tama u beka miyanakanyu yaku ka matovoko ya ku nyonxisa lawa Yehovha, a hi dumbisaka ku hi nyika a nkameni lowu taka. Loko u ya u vona ndlela leyi Yehovha a ku pfunaka ha yone, a lipfumelo dzraku dzri ya dzri tiya.

18. Loko u xiya leswaku lipfumelo dzraku a dzri tiyanga, i yini leswi u nga swi yentxaka?

¹⁸ Loko swikazratu leswi u kumaniki na swone khale kumbe leswi u kumanaka na swone swoswi swi kombisa leswaku a wu na lipfumelo dzrinyingi, u nga godoli. Vona leswo swanga mukhandlu wa ku tiyisa lipfumelo dzraku. Kombela leswi vapostola va Yesu va kombeliki swone va te: “Hi yengetelele ku pfumela.” (Lk 17:5) Handle, ka leswo yanakanyisisa hi swikombiso leswi hi buliki ha swone ka xidondzro lexi. Ku fana na Miguel na Yurai, dzrimuka makhambi hinkwawu lawa Yehovha a ku pfuniki. Ku fana ni n’wana wa Vero kun’we na Anel, khongota hi ku hiseka ka Yehovha, ngopfungopfu loko u langutana ni xikazratu xa kukazri. Nakone ku fana na Geydi, tiyiseka leswaku Yehovha a nga ku nyika mpfunu lowu u wu vilelaka hi ku tizrisa maxaka ni vanghanu. Loko u pfumelela Yehovha a ku pfuna kuva u tiyisela swikazratu leswi u kumanaka na swone namunhla wa siku, u tava ni ku dumba ka leswaku a ta ku pfuna loko u kumana ni swikazratu a nkameni lowu taka.

19. Xana he kwini ku dumba loku Yesu a a li na kone? He kwini ku tiyiseka loku hi nga vaka na kone?

¹⁹ I ntiyiso leswaku Yesu a khanele hi swiyenge leswi vadondzrisiwa vake a va fanela ku yengesela lipfumelo dzravu ka swone, kambe a a nga ganaganeki leswaku hi ku pfuniwa hi Yehovha a va ta swi kota ku langusana ni mindzringo leyi a ya ha ta ta. (Yh 14:1; 16:33) Nakone a a dumba leswaku a ku tava ni xitsrhungu lexikulu lexi a xi ta huluka ka nhlomulo lowukulu, hi leswi a xi ta va ni lipfumelo ledzrikulu. (Mpf 7:9, 14) Xana wene u tava kone ka xitsrhungu lexo lexikulu? Hi kola ka timpswalu leti nga hi fanelekiki ta Yehovha, u nga swi kota ku va kone, kambe akuva u kota leswo, londzrovota mukhandlu wun’wana ni wun’wana lowu u wu kumaka akuva u tiyisa lipfumelo dzraku!—Hb 10:39.