1. Ndukonko kinyi luatudi balombene kuiyipusha?

INGI nsaa tui balombene kupampakana p’atunangushena pabitale mianda ayifiki kumpala bu kuluishibua kua lulanguilo lua madimi, ngoshi ya Goge a ku Magoge, na ngoshi ya Armagedone su? Tobueyipuishe obe nabene’shi: ‘Su kiakia kipungo ki na mianda ayitshinyisha kibafiki, nakekala na mushindo wa kushaala na lulamato luande loso su?’ Su we na ino mianda mu binangu, mayi a Yesu aatukiebe kuisambila mu uno muisambo wetu, ngalombene nkukuasha ngofu. Yesu balunguile balongi baaye’shi: ‘Mashimba eenu taapampakananga. Kuminayi mui Efile Mukulu, nkumineyi naami namu.’ (Yo. 14:1) Lukumino lui bukopo, aluketukuasha buatudia kunyingiila sunga kuatuuka muanda kinyi mu mafuku aafiki.

2. Tui kunyingisha lukumino luetu naminyi, na nkinyi kiatukataluula mu uno muisambo?

² Tui balombene kunyingisha lukumino luetu, bua kunyingiila bitompuanga bia mafuku aafiki pa kutala mushindo watunyingiila mianda ikuete kutompa lukumino luetu binobino. Su tubanangushena ku mushindo watukuete kukita p’atufumankana na mianda ayitompo lukumino luetu, tui balombene kutundula mianda kampanda ayitungu’shi tunyingishe lukumino luetu. Nsaa yoso y’atunyingiila kitompuanga, lukumino luetu alunyisha kunyinga. Bino abitukuasha buatudia kunyingiila bitompuanga bia mafuku aafiki. Mu uno muisambo atukataluula mianda inanka, ibaadi ipete balongi ba Yesu ayilesha’shi, babaadi na lukalo lua lukumino luibungi. Atukataluula dingi mushindo watudi balombene kunyingiila mianda i mumune na yaya lelo uno, na mushindo ulombene kuitulumbuula ino mianda bua mafuku aafiki.

3. Muyile Mateo 6:30, 33, mmianda kinyi yabadi bapatuule kalolo kui Yesu pabitale lukumino?

³ Muyile biabadi betupangie, mfumu a kifuko akuminaa kukimbila  ba mu kifuko kiaye bidibua, bilamba mpa na mbalo ya kulaala. Bino ta mbibofule nsaa yoso bua kuibikita mu kino kipungo ki bukopo nya. Bangi bakuetu balume na bakashi mbashimishe midimo yaabo, sunga biabakuete kuikitshisha ngofu, tabapetele ungi mudimo nya. Bangi namu mbapele kukita midimo ishii ilombene bena Kidishitu. Mu ino mianda yoso, tui na lukalo na lukumino lui bukopo’shi Yehowa, aketupasukila mu ungi mushindo buadia kuitupa kiatudi nakio lukalo bua kifuko kietu. Mu muisambo waye wa pa muengie, Yesu baadi mupatuluile balongi baaye uno muanda kalolo. (Badika Mateo 6:30, 33.) Su tuibashinkamishe’shi Yehowa ta mulombene kuitusumbushena, atuikala na mushindo wa kutuula binangu bietu bioso ku mianda ya Bufumu. Nsaa y’atumono Yehowa bi’etukuasha ku bintu bia ku mbidi, atunyinsha kumumona bu muntu a binyibinyi, na lukumino luetu alunyisha kunyinga.

4-5. Nkinyi kibaadi kikuashe kingi kifuko, bua kunyingiila tuinyongoshi pabitale bintu bia ku mbidi bibaabadi nabio lukalo?

⁴ Tutaleyi mushindo ubaadi kingi kifuko kia mu Vénézuéla kimone bi bukuashi bua Yehowa, nsaa ibaabadi abanyingiila tuinyongoshi pabitale bintu bia ku mbidi. Mu angi mafuku, kifuko kia Castro kibaadi na makuta apeela ababadi abapete mu kudima na kumuna. Bangi ba ntomboshi babaadi na ma mputu babaadi bamunyengie bintu biaye bebabinga na kifuko kiaye, abo nkuleka mbalo yaabo ibaabadi abadimi. Miguel, mungi nshe bana akula’shi: “Binobino tukuete kupetela kantu akatukila mu kudima mu mbalo ipeela ya nsenga yatudi batekie bua kudima. Efuku dioso nabangaa kuteka Yehowa buadia kuitupa kiakia kiatudi nakio lukalo diadia efuku.” Nshalelo e bukopo bua kino kifuko, anka kukidila ku lukumino lui bukopo mui Nshetu sha kifulo ena ngobesha ya kupasukila nkalo yaabo y’efuku dioso, kifuko kia Castro akituelaa mu bisangilo bioso, na kuenda mu bulungudi nsaa yoso. Bu biabadi batuule mianda ya Bufumu pa mbalo ya kumpala mu nshalelo aabo, Yehowa namu kuete kuibapa biabia biabadi nabio lukalo.

⁵ Mu kino kipungo ki bukopo, Miguel na mukashi aaye, Yurai, mbatuule binangu biabo nka ku mushindo ukuete Yehowa kuibapasukila. Angi mafuku, Yehowa mmufubishe bakuetu balume na bakashi buabadia kuibapa bingi bintu biabadi nabio lukalo sunga kukuasha Miguel buadia kupeta mudimo. Mu angi mafuku, Yehowa mmuibape bintu biabadi nabio lukalo kukidila kui kasaka akakuashaa bantu bapete masaku ka mu filiale. Yehowa ta mmuibasumbushene nya. Bu kipeta, mbamone lukumino mu kifuko kiabo alutama. Kunyima kua kutentekiesha muanda kampanda ubaadi wibakuashe Yehowa, muana aabo a kumpala mukashi Yoselin, bakuile’shi: “Abikumu kuishimba pa kumona mboko ya Yehowa pa butooka. Mmuikale kuuku ande andi mulombene kukulupila’shi ankuasha efuku dioso.” Akumbasha dingi’shi: “Bitompuanga biatudi bapete mu kifuko kietu, mbitulumbuule buatudia kukambila bitompuanga bia mu mafuku aafiki.”

6. Mushindo kinyi odi mulombene kunyingisha lukumino lobe nsaa y’opete lukalakashi lua kukutua kupeta makuta?

⁶ We mu lukalalashi lua kukutua kupeta makuta su? Su mbiabia, kiakia ngi kiobe kipungo kibukopo. Anka, sunga nshalelo oobe ekala mu lukalakashi lui naminyi, we kufubisha kino  kipungo bua kunyingisha lukumino loobe. Teka Yehowa, obadikie mayi a Yesu e mu Mateo 6:25-34, akupu onangushene ku anka. Nangushena pabitale bileshesho bia ano etu mafuku, abilesha’shi Yehowa apasukilaa baaba boso abepaana bua kumulanguila. (1 Kod. 15:58) Su bokitshi biabia lukumino lobe aluikaala lunyingie’shi Yehowa, akakukuasha nka bu biadi mukuashe namu bangi bapete mianda i mumune na yoobe. Auku kiodi nakio lukalo na auku mushindo wadi mulombene nkupa kianka. Nsaa yomono Yehowa biakukuasha mu nshalelo obe, abinyingisha lukumino lobe ngofu’shi we mulombene kunyingiila bitompuanga bikata bia mu mafuku aafiki.​—Aba. 3:17, 18.

7. Muyile Mateo 8:23-26, mushindo kinyi ubaadi “kipapi kikata” kitompe lukumino lua balongi ba Yesu?

⁷ Pabaadi Yesu na balongi baaye bafumankane na kipapi kikata, mu kalunga ka mema, Yesu bafubiishe uno muanda ukata bua kukuasha balongi baaye bua’shi bamone bia kuikala na lukumino lui bukopo. (Badika Mateo 8:23-26.) Nsaa ibelele kino kipapi kikata, mema ebua mbundambunda awula mu buato, Yesu badi mulaale nka bu kushi muanda. Pabaadi balongi na moo bamubuusha bamuteka’shi ebapaashe, Muanana bebaluluile na kalolo koso’shi: “Buakinyi nui na moo, bantu balukumino lupelayi?” Balongi baasha moo babaadi balombene kushinguula’shi Yehowa baadi na ngobesha ya kukaluila Yesu na boso babaadi nabo mu masaku. Uno muanda ubetulongiesha kinyi? Lukumino lui bukopo ndulombene kuitukuasha bua kunyingiila “kipapi kikata,” sunga ingi mianda ibukopo ayimueneka bu kipapi ki bukopo.

8-9. Lukumino lua Anel lubaadi lutompibue mushindo kinyi, na nkinyi kibaadi kimukuashe?

⁸ Tubandeyi kutala mushindo ubaadi ungi mukuetu mukashi shii muibakilue a mu Porto Rico abetanyina bu Anel, bibaadi mukambile kitompuanga kibukopo na lukumino lunyingie. Kiaye “kipapi kikata,” kibaadi kia binyibinyi. Kitompuanga kibabangile mu 2017 pabaadi kipapi kikata kiabetamina bu Maria kiluishe nshibo ya mukuetu Anel. Pa muanda wa kiakia kipapi mukuetu Anel baadi mushimishe mudimo waaye. Mukuetu Anel akula’shi: “Munda mua ano mafuku oso a nkalakashi nadi nenyongola ngofu, anka nadi muukie bia kukulupila mui Yehowa ku bukuashi bua luteko na ntshi mulekiele tuinyongoshi bua’shi tunkutshishue kukita kiakia kiankumina’shi nkite nya.”

⁹ Anel alesha kingi kintu kibaadi kimukuashe bua kunyingiila kitompuanga kiaye​—nyi nkukookiela. Amba’shi: “Kulondanga buludiki bua ndumbuluilo kubankushishe buandia kulama butaale. Yehowa bankuashishe pa kufubisha bakuetu balume na bakashi, abaadi abanyingisha, nkumpa bintu bia ku mbidi binaadi nabio lukalo buandia kuikala na muwa.” Amba dingi’shi: “Yehowa mmumpe bintu bibungi kukila mpa na binaadi mutekie, na lukumino luande ndunyingie ngofu.”

10. Nkinyi kiodi mulombene kukita nsaa y’ofumankana na “kipapi kikata”?

¹⁰ Obe namu, okuete kufumankana na “kipapi kikata” mu nshalelo obe? Pangi okuete kukienga pa muanda wa masaku aatukila ku bintu bipangibue. Sunga’shi ki kuikala kipapi kia mu kifuanyi bu kuikala na mukumbo wi bukopo ubakutshobolosha ngofu. Ingi nsaa we kuikala muinyongole,  anka tolekanga kenyongoshi kakukutshishue kukulupila mui Yehowa. Efubuile kuadi mu nteko ayitukila muishimba. Nyingisha lukumino lobe pobe kunangushena ku mushindo ubaadi ukukuashe Yehowa mu mafuku a kala. (Mis. 77:11, 12) Ikala mushinkamishe’shi, Yehowa tan’akusumbushene efuku su ndimune.

11. Buakinyi tui balombene kuata kitshibilo kia kukookiela baaba boso abetukunkusha?

¹¹ Nkinyi dingi kilombene nkukuasha bodia kunyingiila bitompuanga? Nka bu biakulanga Anel, nyi nkukookiela. Longa bia kukulupila baaba boso babadi bakulupile kui Yehowa na Yesu. Ingi nsaa, baaba babadi batuule bua kukunkusha, mbalombene kutusha buludiki pangi buatushabapusha kalolo. Biabia, Yehowa elelaa kukookiela miabi. Atuuku akiakula Eyi diaye na mianda yabadi bamone kui bafubi baye basha lulamato’shi kukookiela akupashaa muwa. (Efi. 14:1-4; 2 Mya. 20:17) Nangushena ku bino bileshesho. Kunangushena akunyingisha lukalo lobe lua kulonda buludiki bua ndumbuluilo a Yehowa, kubanga binobino, mpa na mu mafuku aafiki. (Eb. 13:17) T’okekalala na kabingilo ka kutshina mpompo ikata ayikiebe kufika binobino nya.​—Nki. 3:25.

12. Nkuipushena kinyi kui pankatshi pa kuikala na lukumino na kunyingiila kukutua kua kululama kui mu Luuka 18:1-8?

¹² Yesu badi muukie’shi kukutua kua kululama kubaadi kulombene kutompa lukumino lua balongi baaye. Bua kuibakuasha bua’shi banyingiile kukutua kua kululama, badi muibape kileshesho kiatusangana mu mukanda wa Luuka. Yesu batushishe kileshesho kia mukashi kilele, shibakookanga kudidila nsushi baadi mukutue kululama bua’shi amutshibile kiimu na kululama. Baadi mushinkamishe’shi, ku katshintshi kaaye abamukitshina bianka. Ku nfudiilo, uno nsushi baadi mualule ku luteko luaye bua kumusankisha. Ndilongiesha kinyi dibatuimupetela? Yehowa ta mmukutue kululama. Ngi buakinyi Yesu bakuile’shi: “A biabia, Efile Mukulu t’akatshibi mianda ya baaba baadi musangule bakuete kuidila kuadi bufuku na kanya su?” (Badika Luuka 18:1-8.) Yesu bakumbeshe dimo’shi: “Apakafiki Muan’a muntu, asangana luno lukumino pa nsenga su?” Nsaa y’atukienge pa muanda wa kukutua kululama, tui na lukalo lua kulesha kukidila ku luishinko, na kunyingiila kuetu’shi, tui na lukumino lui bukopo bu lua uno mukashi kilele. Kuikala na lukumino lui bino, akuitushinkamiisha’shi, Yehowa etukaluila binobino, sunga mu mafuku aafiki. Abitungu dingi tukumine mu bukome bua nteko. Ingi nsaa nteko yetu ngilombene kuitutuadila bipeta biatush’atutengielanga.

13. Mushindo kinyi ubaadi luteko lukuashe kingi kifuko kibaabadi bakitshine mianda ya kukutua kululama?

¹³ Tutaleyi mianda imone mukuetu mukashi abetamina bu Vero, mushaale mu Répubilque démocratique du Congo. Ena mulume shi muina Kidishitu, na muan’abo nsonguakashi ena bipua 15 pababakatukile mu kibundi kiabo bua kusuuka ngoshi ya bantomboshi. Nsaa ibabadi muishinda, kifuko kibafikile pabaabadi bashikie eshinda kui kisaka kia bantoboshi akio nkuibakuata buashi kibayipee. Nsaa ibabangile Vero kudila, nsonguakashi aaye batompele kumuumiisha pa kukita luteko n’eyi di bukopo ambuulanga eshina  dia Yehowa mu luteko luaye. Nsaa ibaadi mufudiishe luteko mukata a kisaka kia bantomboshi, bamuipuishe’shi: “Nsonguakashi, nnanyi mukulongieshe bia kuteka?” Aye namu baluluile’shi: “Mama ndjo atekaa, p’aye kufubisha luteko lua kileshesho luatupete mu Mateo 6:9-13.” Mukata a kisaka kia bantomboshi bakuile’shi: “Nsonguakashi, nda na baledi boobe mu butaale, na Yehowa Efile Mukulu oobe enukaluile!”

14. Nkinyi kilombene kutompa lukumino luetu, na nkinyi kilombene kuitukuasha bua kunyingiila?

¹⁴ Ino mianda yabadi bamone ayitulongiesha luteko bialudi na muulo. Kadi bi kuikala naminyi su luteko lobe ta mbelualuule bukidi sunga mu kipaso kia kukanya? Nka bu uno mukashi kilele a mu lukindi lua Yesu, tungunuka na kuteka ikala mukulupile’shi Efile Mukulu etu t’akakusumbushena nya; na akakumina mu ingi nsaa sunga mu ungi mushindo, kualuula ku nteko yobe. Tungunuka na kuisendeela Yehowa buadia nkupa kikudi kiaye kiselele. (Fid. 4:13) Tentekiesha’shi, mu kapindi kapeela’mu, Yehowa akakuelela miabi ibungi yokayiluankana mpa na makienga oso obodi mupete mu mafuku a kala. Nsaa y’onyingiila bitompuanga na lulamato loso na bukuashi bua Yehowa, okashaala munyingie na dingi okekala na ngobesha ya kunyingiila bitompuanga bia mu mafuku aafiki.​—1 Mp. 1:6, 7.

15. Nka bu biabebilesha mu Mateo 17:19, 20, ndukalakashi kinyi lubaadi balongi ba Yesu bafumankane nalo?

¹⁵ Yesu balongieshe balongi baaye’shi, lukumino ndulombene kuibakuasha buabadia kukambila nkalakashi. (Badika Mateo 17:19, 20.) Ingi misusa tababaadi balombene kubinga ma demo, bu bibaabadi na ngobesha ya kuibikita mu angi mafuku. Nkinyi kibaadi bu muanda ukata? Yesu bapatuluile’shi babaadi na lukalo na lukumino luibungi. Bebalunguile’shi su nubekala na lukumino lui bukopo, nui balombene kuikala na ngobesha ya kukatusha nkalakashi i bu muengie! Lelo uno n’atue namu tui balombene kufumankana na nkalakashi ayimueneka bu yatushii balombene kukambila.

16. Lukumino lua Geydi ndumukuashe bua kunyingiila kitompuanga kikata na kenyongoshi kakata naminyi?

¹⁶ Tutaleyi kileshesho kia Geydi, mukuetu mukashi a mu Guatemala. Babaadi baase mulume aaye Edi, nsaa ibaabadi abakatuka ku bisangilo abaluka kuabo ku nshibo. Lukumino lua Geydi lubaadi lumukuashe buadia kukambila kano kenyongoshi kakata naminyi? Akula’shi: “Luteko ndunkuashe buandia kusumbuila Yehowa bushito buande na, alunkuasha buandia kupeta butaale. Namonaa abimpasukila Yehowa kukidila ku kifuko kiande na bakuuku bande ba mu kakongie. Kuipaana mu mudimo wa Yehowa nkupeeleshe tuinyongoshi tuande na akunkuasha buandia kutala mianda nka yandi nayo lelo pamutue pa kupangayikila mianda i malooba. Kunyima kua kupeta uno muanda bibandongiesha’shi, sunga nakapeta kitompuanga ki naminyi mu mafuku aafiki, ne mulombene kuikala na ngobesha ya kuikikambila ku bukuashi bua Yehowa, bua Yesu na bua ndumbuluilo Aaye.”

17. Nkinyi kiatudi balombene kukita nsaa y’atufumana na lukalakashi lui bui muengie?

¹⁷ Okuete kudila muntu odi mufule mufue su?  Ata nsaa ya kunyingisha lukumino lobe mu lusangukilo pa kubadika mianda i mu Bible ya baaba boso babasangukile. We muinyongole pa muanda wa muina kifuko nobe abadi batuushe mu kakongie su? Longa bodia kushinkamisha obe nabene’shi dinyoka di’Efile Mukulu adikalaa nka buwa misusa yoso. Sunga wekala na muanda kinyi, eufubishe bua kunyingisha lukumino lobe. Tuula eshimba diobe dioso kui Yehowa. Toshalanga pa bupenka obe nabene, anka efubuile kui bakuenu balume na bakashi. (Nki. 18:1) Kita mianda ilombene nkukuasha bodia kunyingiila, sunga biokuete odidi pa muanda wa biabia abikalanga bikukitshikile. (Mis. 126:5, 6) Tungunuka na kiubishi kiobe kia kutuela mu bisangilo, kuenda mu bulungudi, na kuibadikila Bible nsaa yoso. Ikala dingi onangushena pabitale mianda ibuwa yabadi bakuelele miabi kui Yehowa y’akakupa mu mafuku aafiki. Nsaa y’omono mushindo aukukuasha Yehowa binobino, lukumino lobe muadi alunyisha kutama.

18. Su botundula’shi we mubofule mu lukumino, nkinyi kiodi mulombene kukita?

¹⁸ Su bitompuanga biobe bia kala sunga bia binobino, abilesha’shi lukumino lobe ndubofule, totshobolokanga. Mona bino bu mushindo odia kunyingisha lukumino lobe. Kita luteko nka bu lua balongi ba Yesu babakuile’shi: “Tamisha namu lukumino luetu.” (Luk. 17:5) Na dingi, nangushena ku bileshesho, bibatukatuka mu kuisambila mu uno muisambo. Nka bu Miguel na Yurai, tentekiesha misusa yoso yabadi bakukuashe kui Yehowa. Nka bu nsonguakashi a Vero na Anel, ikala na katshintshi ka kuteka Yehowa, bikishekishe nsaa y’ofumankana na lukalakashi lui bukopo. Nka bu Geydi, tentekiesha’shi Yehowa mmulombene nkupa bukuashi bodi nabo lukalo kukidila kui kifuko sunga kui bakuuku. Nsaa y’otadiila Yehowa bua’shi akukuashe bua kunyingiila bitompuanga biobe bi binobino, okekala na bishinkamiisho bibungi abilesha’shi Yehowa akakukuasha bodia kunyingiila bitompuanga bioso biokafumankana nabio mu mafuku aafiki.

19. Yesu baadi na kishinkamiisho kinyi, na obe namu we kwikala mushinkamishe kinyi?

¹⁹ Yesu bakuashishe balongi baaye buabadia kumona mbalo yabadi babofule mu lukumino, anka tabaadi na mpaka’shi ku bukuashi bua Yehowa mbalombene kobesha kukambila bitompuanga bia mu mafuku aafiki nya. (Yo. 14:1; 16:33) Badi na kishinkamiisho kikata’shi, lukumino ndulombene kukuasha kibumbu kikata buakidia nkapanda ku mpombo ikata. (Kibaf. 7:9, 14) N’obe namu okekala umune a munkatshi muabo su? Su otamisha na kunyingisha lukumino lobe mu mushindo oso wawa kubanga binobino, ku bukuashi bua Yehowa okekala munkatshi muabo!​—Eb. 10:39.