1. San wi kan aksi wisrefi?

YU E broko yu ede son leisi te yu e prakseri den sani di o pasa na ini a ten di e kon, fu eksempre te den falsi kerki o kisi pori, te Gok fu Magok o kon feti nanga wi, èn te a feti fu Armagedon o bigin? Kande yu e aksi yusrefi: ’Mi o man tan dini Yehovah te ala den kefalek sani disi o pasa di kan meki wi frede?’ Efu yu e broko yu ede nanga den sani disi, dan den sani di Yesus ben taki na ini a thema tekst fu na artikel disi o yepi yu furu. Yesus ben taigi den disipel fu en: „No broko un ede. Bribi na ini Gado” (Yoh. 14:1). Efu a bribi fu wi tranga, dan wi o abi a deki-ati di de fanowdu fu pasa a ten dati.

2. Fa wi kan tranga wi bribi, èn san wi o luku na ini na artikel disi?

² Efu wi e poti prakseri na san wi e du now te wi e kisi tesi, dan wi o sabi san wi musu du fu meki a bribi fu wi kon moro tranga so taki wi kan pasa den tesi di o kon ete. Efu wi e denki fu san wi e du te wi e kisi tesi now, dan wi o si pe a bribi fu wi kon swaki. Ibri leisi te wi horidoro te wi kisi tesi, a bribi fu wi e kon moro tranga. Na so wi o man pasa den tesi di musu kon ete. Na ini na artikel disi wi o taki fu fo sani di ben miti den disipel fu Yesus èn di ben sori taki a bribi fu den ben musu kon moro tranga. Baka dati wi o luku fa wi kan pasa den srefi sortu tesi na ini a ten disi, èn fa den kan sreka wi gi a ten di e kon.

3. San Yesus ben taki fu bribi soleki fa Mateyus 6:30, 33 e sori?

³ Ibri osofamiri-edeman wani sorgu taki en frow nanga den pikin fu en abi nofo nyanyan, krosi, èn wan tanpresi. Ma a no ala ten a sani disi makelek ini a tranga ten disi. Son brada nanga sisa lasi den wroko, èn aladi den meki muiti toku den no ben man feni wan tra wroko. Trawan  weigri fu teki wan wroko di wan Kresten no mag du. Na ini den situwasi disi wi musu abi a tranga bribi taki Yehovah o sorgu taki wi osofamiri abi san de fanowdu. Dati na san Yesus ben leri den disipel fu en na ini a Bergitaki. (Leisi Mateyus 6:30, 33.) Te wi de seiker taki Yehovah no o gowe libi wi, dan wi o man poti ala wi prakseri na Kownukondre afersi, fu di dati na den moro prenspari sani. Te wi si fa Yehovah e gi wi san wi abi fanowdu, dan wi o kon moro krosibei na en èn wi bribi o kon moro tranga.

4-5. San yepi wan osofamiri fu no broko den ede tumusi di a ben muilek gi den fu sorgu densrefi?

⁴ Luku fa wan osofamiri na ini Venezuela ben si taki Yehovah yepi den di den no ben sabi fa den ben musu feni den sani di den ben abi fanowdu. Fosi, a ben de so taki famiri Castro ben wroko nofo moni nanga a gron fu den fu man sorgu bun gi densrefi. Ma wan dei wan grupu sma kon nanga gon fu teki a gron fu den èn den dwengi a famiri fu froisi gowe libi a presi pe den ben e tan. A papa, Miguel e taki: „Now wi abi soso wan pikin pisi gron di wi ben yuru fu wan sma èn di wi e wroko fu sorgu gi wisrefi. Na a bigin fu ibri dei mi e aksi Yehovah fu gi wi san wi abi fanowdu gi a dei dati.” A libi ben muilek gi na osofamiri disi, ma fu di den ben abi a tranga bribi taki wi lobi-ati Papa ben o sorgu gi san den abi fanowdu ibri dei, meki na osofamiri disi tan go na den gemeente konmakandra èn den tan du a preikiwroko. A diniwroko fu Yehovah ben de a moro prenspari sani na ini den libi, èn dati meki Yehovah gi den san den ben abi fanowdu.

⁵ A heri pisi ten di a ben hebi srefisrefi gi Miguel nanga en frow Yurai, den ben e hori na prakseri fa Yehovah ben e sorgu gi den. Son leisi Yehovah gebroiki tra brada nanga sisa fu gi den san den ben abi fanowdu, noso fu yepi Miguel feni wan wroko. Boiti dati, Yehovah gebroiki a bijkantoro tu fu gi den san den abi fanowdu. Noiti Yehovah gowe libi den. Now na osofamiri disi kon abi wan moro tranga bribi. Luku san Yoselin, a moro bigi meisje fu den, e taki baka di a fruteri fa Yehovah ben yepi den wan leisi: „Di mi si fa Yehovah yepi wi, dan dati naki mi ati. Yehovah na wan mati di mi kan frutrow ala ten.” A e taki tu: „Den tesi di wi osofamiri kisi, sreka wi gi moro bigi tesi di o miti wi na ini a ten di e kon.”

6. Te yu abi moni problema, dan san yu kan du fu tranga yu bribi?

⁶ Yu abi moni problema tu? Efu dati de so, dan a libi no makelek gi yu. Ma a muilek situwasi fu yu kan gi yu na okasi fu tranga yu bribi. Begi Yehovah èn leisi san Yesus ben taki na Mateyus 6:25-34, dan yu denki dipi fu san yu leisi. Denki fu ondrofenitori di e sori fa Yehovah sorgu sma na ini a ten disi te den e tan dini  en go doro (1 Kor. 15:58). Dati o gi yu a tranga bribi taki Yehovah o yepi yu tu, neleki fa a yepi trawan di ben de na ini den srefi sortu situwâsi. Yehovah sabi san yu abi fanowdu èn a man sorgu taki yu kisi den sani dati. Te yu si fa Yehovah e yepi yu, yu bribi o kon moro tranga èn dati o yepi yu fu pasa den moro bigi tesi di musu kon ete.​—Hab. 3:17, 18.

7. Soleki fa Mateyus 8:23-26 e sori, dan fa a bigi winti di ben wai ben sori taki den disipel no ben abi nofo bribi?

⁷ Wan dei di Yesus nanga den disipel fu en ben de na ini wan boto, wan bigi winti bigin wai. Yesus gebroiki na okasi dati fu yepi den disipel frustan taki den ben musu abi moro bribi. (Leisi Mateyus 8:23-26.) A winti ben wai so tranga taki den skwala fu a se ben e kon na ini a boto, ma Yesus ben e sribi. Den disipel ben frede srefisrefi, dati meki den wiki Yesus èn den aksi en fu yepi den. Na wan switi fasi Yesus aksi den: „Fu san ede unu e frede so? Na bribi unu no abi?” Den disipel no ben mag frede so te taki den frigiti taki Yehovah ben o man kibri Yesus èn den sma di ben de nanga en. San wi kan leri fu a tori disi? Te wi abi wan tranga bribi, wi o man horidoro te bigi winti wai noso te wi kisi bigi problema.

8-9. Na sortu fasi a bribi fu Anel kisi tesi, ma san yepi en fu horidoro?

⁸ Prakseri a tori fu Anel, wan sisa di no trow èn di e tan na Porto Riko. A bribi fu en kon moro tranga di a horidoro di wan bigi tesi ben miti en. A tesi fu en ben de wan trutru bigi winti, orkaan Maria di pori na oso fu Anel na ini 2017. Baka di a bigi winti wai, Anel lasi en wroko tu. Anel e taki: „Mi ben e broko mi ede na a pisi ten dati, ma mi leri fu abi a frutrow taki Yehovah o arki den begi fu mi èn mi leri fu no meki den broko-ede fu mi tapu mi fu du san mi musu du.”

⁹ Anel e taki dati a gi di a e gi yesi na Yehovah yepi en tu fu horidoro di den problema miti en. A e taki: „Mi no ben e bruya, fu di mi ben e wroko nanga den rai di na organisâsi ben gi wi. Yehovah gebroiki den brada nanga sisa fu yepi mi. Den gi mi deki-ati èn den gi mi den sani di mi ben abi fanowdu fu tan na libi.” Anel e taki tu: „Yehovah gi mi moro leki san mi ben man aksi en, èn dati tranga mi bribi srefisrefi.”

10. San yu kan du te „bigi winti e wai” na ini yu libi?

¹⁰ „Bigi winti e wai” na ini yu libi? Kande a problema fu yu na wan trutru rampu di ben pasa na ini a kontren fu yu. Noso a kan taki yu abi wan seryusu siki di de leki wan bigi winti tu èn di e meki yu firi brokosaka fu di yu no sabi san yu musu du moro. Kande yu e broko yu ede son  leisi, ma no meki den broko-ede fu yu tapu yu fu frutrow tapu Yehovah. Begi en fayafaya so taki yu kan kon moro krosibei na en. Denki dipi fu den fasi fa Yehovah yepi yu na ini a ten di pasa, dan yu bribi o kon moro tranga (Ps. 77:11, 12). Yu kan de seiker taki Yehovah no o gowe libi yu noiti!

11. Fu san ede wi musu tan gi yesi na den wan di e teki fesi?

¹¹ Sortu tra sani kan yepi yu fu horidoro te yu e kisi tesi? Anel ben taki dati a gi di yu e gi yesi na Yehovah prenspari. Leri fu frutrow den wan di Yehovah nanga Yesus e frutrow tu. Son leisi wi kan firi leki a rai di wi kisi fu den wan di e teki fesi no o wroko. Ma Yehovah e blesi den wan di e gi yesi na en. Eksempre na ini Bijbel nanga ondrofenitori fu sma di ben tan dini Yehovah e sori taki Yehovah e kibri sma di ben gi yesi na en (Eks. 14:1-4; 2 Kron. 20:17). Denki dipi fu den eksempre dati. Dati o go yu a deki-ati fu tan gi yesi na den rai di Yehovah en organisâsi e gi, now èn na ini a ten di e kon (Heb. 13:17). Dan yu no o abi fu frede a bigi banawtu di de na pasi e kon.​—Odo 3:25.

12. Fa Lukas 18:1-8 e sori taki bribi o yepi wi fu horidori te sma e du ogri nanga wi?

¹² Yesus ben sabi taki a bribi fu den disipel fu en ben o kisi tesi te sma ben o du ogri nanga den. Na ini a Bijbel buku Lukas, Yesus gi den wan eksempre di ben o yepi den fu horidoro. A fruteri den wan tori fu wan uma di masra dede kaba èn di ben tan aksi wan ogri-ati krutuman fu kisi en reti na ini wan krutu-afersi. Na uma ben sabi taki efu a ben o tan aksi, a krutuman ben o yepi en te fu kaba. Èn na dati pasa, a krutuman sorgu taki na uma kisi en reti. San disi e leri wi? Ala ten Yehovah e du san reti. Dati meki Yesus taki: „A no de so dan, taki Gado sa sorgu taki den wan di a kari èn di e bari kari en dei nanga neti, kisi reti?” (Leisi Lukas 18:1-8.) Yesus taki tu: „Te a Manpikin fu libisma doro, a sa feni sma na grontapu di e sori a srefi bribi disi?” Efu wi abi pasensi èn wi e horidoro te sma e du ogri nanga wi, dan wi e sori taki wi abi wan tranga bribi neleki na uma di Yesus ben taki fu en. Efu wi abi so wan tranga bribi, dan wi o de seiker taki Yehovah o yepi wi na a yoisti ten. Wi musu abi a bribi taki begi e yepi tu. Son leisi Yehovah kan piki den begi fu wi na wan fasi di wi no ben fruwakti.

13. Fa begi yepi wan osofamiri di sma ben du ogri nanga den?

¹³ Luku san ben pasa nanga Vero, wan sisa di e tan na Demokrasia Republiek Kongo. Vero, en masra di no de na waarheid, nanga a meisje fu den di abi 15 yari, ben musu lowe komoto na a dorpu fu den, fu di wan grupu srudati ben wani du ogri  nanga den sma fu a dorpu. Di den ben de na pasi, tra srudati stop den na wan presi, dan den taigi den taki den ben o kiri den. Di Vero bigin krei, a meisje fu en ben pruberi fu trowstu en, aladi a ben e begi tranga èn a ben e kari Yehovah nen doronomo na ini a begi. Di a kaba begi, na edeman fu den srudati aksi en: „Meisje, suma leri yu begi?” A meisje piki en: „Na mi mama, a ben gebroiki na eksempre di de na ini Mateyus 6:9-13.” Na edeman taki: „Meisje, go nanga yu papa nanga mama na ini freide, èn meki Yehovah yu Gado kibri yu!”

14. San kan de wan tesi tapu a bribi fu wi, èn san kan yepi wi fu horidoro?

¹⁴ Den sortu ondrofenitori disi e leri wi taki wi no musu frigiti taki begi prenspari srefisrefi. Ma efu Yehovah no piki den begi fu yu wantewante noso na wan aparti fasi, dan san o yepi yu fu horidoro? Neleki na uma na ini na eksempre di Yesus ben gi, yu musu tan begi, èn yu musu abi a frutrow taki Gado no o gowe libi yu èn taki a o piki a begi fu yu na a yoisti ten. Tan aksi Yehovah fu gi yu en santa yeye (Fil. 4:13). Hori na prakseri taki heri esi Yehovah o blesi wi na so wan fasi taki wi o frigiti ala den problema di wi ben abi. Te yu meki Yehovah yepi yu fu horidoro te yu e kisi tesi, dan yu bribi o kon moro tranga èn yu o man horidoro te yu o kisi tesi na ini a ten di e kon.​—1 Petr. 1:6, 7.

15. Soleki fa Mateyus 17:19, 20 e sori, dan sortu problema den disipel fu Yesus ben abi?

¹⁵ Yesus ben leri den disipel fu en taki bribi ben o yepi den te den ben abi problema. (Leisi Mateyus 17:19, 20.) Wan leisi den disipel no ben man yagi wan yeye puru na wan sma tapu, aladi den ben du dati kaba na tra okasi. San ben de a problema? Yesus taki dati den ben musu abi moro bribi. A taigi den taki efu den ben abi nofo bribi den ben o man horidoro awinsi den problema fu den ben bigi leki wan bergi! Na ini a ten disi wi srefi kan abi problema di bigi so te taki a gersi leki wi no man horidoro.

16. Fa bribi yepi Geydi fu horidoro baka di ogriman kiri en masra?

¹⁶ Prakseri san ben miti Geydi, wan sisa di e tan na Gwatemala. Wan dei di den komoto na konmakandra, ogriman kiri en masra. Fa bribi yepi Geydi fu horidoro aladi a ben e sari srefisrefi? A e taki: „Begi e yepi mi fu trowe mi hebi na tapu Yehovah, èn dati e meki mi firi korostu. Mi e si taki Yehovah e gebroiki mi famiri èn den brada nanga sisa na ini a gemeente fu yepi mi. Fu di mi e tan du a diniwroko, meki mi no e sari so furu moro èn a e yepi mi fu poti prakseri na san mi man du now. A sani di miti mi leri mi taki awinsi sortu tesi mi o kisi ete na ini a ten di e  kon, mi o man horidoro nanga yepi fu Yehovah, Yesus, nanga na organisâsi.”

17. San wi kan du te wi abi fu du nanga problema di de leki wan bigi bergi?

¹⁷ Yu e sari fu di wan sma di yu lobi dede? Yu kan tranga a bribi di yu abi na ini na opobaka howpu, te yu e meki ten fu leisi tori fu sma na ini Bijbel di ben kisi wan opobaka. Yu e sari fu di den puru wan sma fu yu famiri fu a gemeente? Studeri Bijbel, dan dati o yepi yu fu de seiker taki Gado sabi san na a moro bun fasi fu piri-ai gi wi. Awinsi sortu problema yu abi, si en leki wan okasi fu meki a bribi fu yu kon moro tranga. Taigi Yehovah krin san de tapu yu ati. No tan yu wawan, ma tan krosibei fu yu brada nanga sisa (Odo 18:1). Du sani di o yepi yu fu horidoro awinsi yu e krei srefi te yu e denki san ben pasa (Ps. 126:5, 6). Tan go na den konmakandra, tan du a preikiwroko èn tan leisi yu Bijbel. Boiti dati, tan poti prakseri na den moi blesi di Yehovah o gi yu na ini a ten di e kon. Te yu si fa Yehovah e yepi yu now, dan yu bribi o kon moro tranga.

18. San yu kan du efu yu si taki yu bribi swaki?

¹⁸ Efu den tesi di miti yu sori yu taki yu bribi swaki, dan yu no musu lasi-ati. Si en leki wan okasi fu meki yu bribi kon moro tranga. Aksi Yehovah a srefi sani di den disipel fu Yesus ben aksi: „Gi wi moro bribi” (Luk. 17:5). Denki sosrefi fu den eksempre di wi luku na ini na artikel disi. Neleki Miguel nanga Yurai, prakseri ala den leisi di Yehovah ben yepi yu. Neleki Anel nanga a meisje fu Vero, begi Yehovah fayafaya, spesrutu te yu abi wan bigi problema. Èn neleki Geydi, si fa Yehovah e gebroiki famiri èn brada nanga sisa fu yepi yu. Te yu e gi Yehovah na okasi fu yepi yu pasa den tesi di e miti yu now, yu o kon de seiker taki a o yepi yu fu pasa iniwan tesi di kan miti yu na ini a ten di e kon.

19. San Yesus ben sabi seiker, èn fu san yu kan de seiker tu?

¹⁹ Yesus yepi den disipel fu en fu si pe a bribi fu den ben swaki, ma a ben sabi taki nanga a yepi fu Yehovah, den ben o man horidoro te tra tesi ben o miti den (Yoh. 14:1; 16:33). A ben de seiker tu taki wan bigi ipi sma ben o man pasa a bigi banawtu libilibi fu di den abi wan tranga bribi (Openb. 7:9, 14). Yu o de wan fu den sma dati? Nanga a yepi fu Yehovah yu kan de drape tu, efu yu du ala san yu man nownow kaba fu tranga a bribi fu yu!​—Heb. 10:39.