1. Ke potso efe eo re ka ’nang ra ipotsa eona?

 NA KA linako tse ling u ee u ikutloe u tšoenyehile ha u nahana ka lintho tse tla etsahala haufinyane, tse kang ho felisoa ha bolumeli ba bohata, tlhaselo ea Gogo oa Magogo le ntoa ea Armagedone? Na u kile oa ipotsa oa re, ‘Na ebe ke tla khona ho lula ke tšepahala ha lintho tsee tse tšosang li etsahala?’ Haeba u kile oa nahana ka lipotso tsena, taba eo Jesu a ileng a bua ka eona e hlahang temaneng ea rona ea sehlooho e tla u thusa. Jesu o ile a re ho barutuoa ba hae: “Le se ke la lumella lipelo tsa lona hore li khathatsehe. Bontšang tumelo.” (Joh. 14:1) Tumelo e matla e tla re thusa hore re be sebete ho sa tsotellehe hore na ke’ng e etsahalang nakong e tlang.

2. Re ka matlafatsa tumelo ea rona joang, hona re tl’o bua ka’ng sehloohong see?

² Ho nahana ka hore na re etsa’ng hona joale ha tumelo ea rona e lekoa, ho tla re thusa ho tseba hore na ke joang re ka matlafatsang tumelo ea rona e le hore re khone ho mamella nakong e tlang. Ha re nahana ka taba eo, re tla khona ho bona hore na ke hokae moo re lokelang ho matlafatsa tumelo ea rona. Lekhetlo le leng le le leng ha re mamella teko, tumelo ea rona e ba matla le ho feta ’me seo se tla re thusa ho mamella liteko nakong e tlang. Sehloohong sena, re tl’o bua ka maemo a mane a ileng a bontša hore barutuoa ba Jesu ba ne ba hloka ho ba le tumelo e matla. Re tl’o boela re bone hore na re ka mamella mathata a tšoanang le ao joang mehleng ena le hore na ke joang ho mamella mathata ao ho ka re lokisetsang hore re mamelle le nakong e tlang.

3. Mantsoe a Jesu a ho Matheu 6:​30, 33, a re thusa hore re utloisise’ng?

³ Ke ntho e tloaelehileng hore hlooho ea lelapa e batle ho  hlokomela mosali le bana ka lijo, liaparo le bolulo empa ha se kamehla ho leng bonolo ho etsa joalo linakong tsena tse thata. Bara le barali ba bo rona ba bang ba lahlehetsoe ke mesebetsi ’me ho sa tsotellehe boiteko boo ba bo etsang, ha ba fumane e meng. Ba bang ba ile ba lokela ho hana mesebetsi e sa lokelang Bakreste. Maemong ana ’ohle, re lokela ho ba le tumelo e matla ea hore Jehova o tla etsa bonnete ba hore rona le ba malapa a rona re ba le lintho tseo re li hlokang. Jesu o ile a hlakisetsa barutuoa ba hae taba ena hantle Thutong ea Thabeng. (Bala Matheu 6:​30, 33.) Ha re kholisehile ka ho feletseng hore Jehova a ke ke a re lahla, re tla tsepamisa likelello tsa rona nthong ea bohlokoa e leng ho sebeletsa Jehova. Joale, ha re bona kamoo Jehova a re thusang kateng ka lintho tseo re li hlokang, re tla atamela haufi le eena ebile tumelo ea rona e tla ba matla.

4, 5. Lelapa le leng le ile la thusoa ke’ng ha le ne le tšoenyehile hobane ho le thata ho fumana lintho tseo le li hlokang?

⁴ Hlokomela kamoo lelapa le leng la Venezuela le ileng la bona ha Jehova a le thusa ha le ne le tšoenyehile ka lintho tseo le li hlokang. Lelapa la ha Castro le ne le phela ka chelete e lekaneng eo le neng le e fumana polasing ea lelapa. Banna ba bang ba nkileng lithunya ba ile ba leleka lelapa la ha Castro ’me ba hapa polasi eo. Ntate oa lelapa leo e leng mora oa bo rona Miguel o re: “Hona joale re se re phela ka ho lema tšimo e nyane eo re e kalimileng. Ke qala letsatsi le leng le le leng ka ho kopa Jehova hore a re thuse ka lintho tseo re tla li hloka letsatsing leo.” Le hoja bophelo bo thatafalletse lelapa la ha Castro, le na le tumelo e matla ea hore Ntate oa rona ea lerato a ka khona ho le hlokomela ka lintho tseo le li hlokang letsatsi le letsatsi ’me le ea tšimong le libokeng kamehla. Ho sebeletsa Jehova ke ntho e tlang pele bophelong ba lelapa lena ’me Jehova o le fa lintho tseo le li hlokang.

⁵ Nakong ena e thata, mora oa bo rona Miguel le mosali oa hae Yurai esale ba hlokomela kamoo Jehova a ba hlokometseng kateng. Ka linako tse ling, Jehova o ile a sebelisa bara le barali ba bo rona ho ba thusa ka lintho tseo ba li hlokang kapa ho thusa mora oa bo rona Miguel ho fumana mosebetsi. Ka linako tse ling, Jehova o ne a sebelisa ofisi ea lekala ho ba phallela ka lintho tseo ba li hlokang. Jehova ha aa ka a ba lahla. Ka lebaka leo, tumelo ea lelapa lena e ile ea matlafala. Ka mor’a hore morali oa bona e moholo e leng Yoselin a bue kamoo Jehova a ileng a ba thusa kateng, o ile a re: “Hoa khothatsa ho bona kamoo Jehova a re thusitseng kateng. Ke mo nka e le motsoalle oa ka ’me ke kholisehile hore o tla lula a nthusa.” O ile a boela a re: “Mathata ao re fetileng ho ’ona re le lelapa a re koetliselitse ho mamella mathata a boima le ho feta ao re tl’o kopana le ’ona nakong e tlang.”

6. U ka matlafatsa tumelo ea hao joang ha u e-na le mathata a lichelete?

⁶ Na u na le mathata a lichelete? Haeba ho joalo, e tlameha ebe bophelo ba hao bo thata haholo. Ho ntse ho le joalo, u ka sebelisa nako ena ho matlafatsa tumelo ea hao. Rapela Jehova ebe u bala mantsoe a Jesu a hlahang ho Matheu 6:​25-34 ’me u nahanisise ka ’ona. Nahana ka mehlala  ea mehleng ena e bontšang hore Jehova o hlokomela batho ba lulang ba phathahane ka ho mo sebeletsa. (1 Bakor. 15:​58) Ha u etsa joalo, u tla kholiseha le ho feta hore Jehova o tla u thusa joalokaha a ile a thusa batho ba bang ba neng ba e-na le mathata a tšoanang le a hao. O tseba lintho tseo u li hlokang ebile oa tseba hore na a ka u fa tsona joang. Ha u bona kamoo Jehova a u thusang kateng bophelong, tumelo ea hao e tla matlafala ’me e tla u thusa ho mamella mathata a boima le ho feta nakong e tlang.​—Hab. 3:​17, 18.

7. Ho ea ka Matheu 8:​23-26, sefefo se matla se ile sa bontša joang hore baapostola ba ne ba lokela ho matlafatsa tumelo ea bona?

⁷ Ha Jesu le barutuoa ba hae ba ne ba tsamaea ka sekepe, ka tšohanyetso ho ile ha e-ba le sefefo. Jesu o ile a sebelisa ketsahalo eo ho ba thusa ho utloisisa hore ba ne ba hloka ho matlafatsa tumelo ea bona. (Bala Matheu 8:​23-26.) Sefefo se ne se le matla hoo maqhubu a leoatle a ileng a tlatsa sekepe ka metsi empa Jesu o ne a khalehile. Ha barutuoa ba mo tsosa ba tšohile ’me ba mo kopa hore a ba pholose, Morena o ile a re ho bona: “Ke hobane’ng ha le le boi, lona ba nang le tumelo e nyenyane?” Barutuoa bana ba tšohileng ba ne ba tlameha hore ebe baa tseba hore Jehova a ka khona ho sireletsa Jesu le batho ba nang le eena. Re ithuta’ng tabeng ee? Tumelo e matla e ka re thusa ho mamella lifefo tse matla kapa bothata leha e le bofe bo tšoanang le sefefo.

8, 9. Tumelo ea morali oa bo rona Anel e ile ea lekoa joang, hona o ile a thusoa ke’ng?

⁸ Nahana kamoo tumelo ea morali oa bo rona Anel oa lesoha oa Puerto Rico e ileng ea matlafala kateng ka mor’a hore a mamelle teko e boima. Teko ea hae e boima e ne e le sefefo sa sebele. Mathata a qalile ka 2017 ha leholuotsoana le bitsoang Maria le senya ntlo ea morali oa bo rona Anel. O ile a ba a felloa ke mosebetsi ka lebaka la sona sefefo seo. Morali oa bo rona Anel o re: “Linakong tseo tse thata, ke ne ke tšoenyehile empa ke ile ka ithuta ho tšepa Jehova ka hore ke mo rapele le hore ke se ke ka tšoenyeha hoo nka sitoang ho etsa lintho tseo ke lokelang ho li etsa.”

⁹ Morali oa bo rona Anel o re ntho e ’ngoe e ileng ea mo thusa hore a mamelle mathata a hae ke ho mamela. O re: “Ho latela tataiso ea mokhatlo oa Jehova ho ile ha nthusa hore ke lule ke sa khathatseha. Jehova o ile a nthusa a sebelisa bara le barali ba bo rona. Ba ile ba nkhothatsa ’me ba mpha lintho tseo ke neng ke li hloka hore ke ’ne ke phele.” O tsoela pele ho re: “Jehova o mphile lintho tse ngata ho feta tseo ke neng nka li kopa ’me tumelo ea ka e matlafetse haholo.”

10. U ka etsa’ng haeba u e-na le mathata a boima?

¹⁰ Na le uena u na le mathata bophelong? E ka ’na eaba mathata ao ke a bakiloeng ke koluoa ea tlhaho. Kapa e ka ’na eaba u kula haholo hoo u ikutloang u nyahame ebile u sa tsebe hore na u etse’ng. Le hoja ka linako tse ling u ka tšoenyeha, ha oa lokela ho lumella ho tšoenyeha hore ho u sitise ho tšepa Jehova. Atamela ho eena ka  ho mo rapela ho tsoa pelong. Matlafatsa tumelo ea hao ka ho nahanisisa kamoo Jehova a u thusitseng kateng nakong e fetileng. (Pes. 77:​11, 12) U ka kholiseha hore a ke ke a u lahla le ka mohla.

11. Ke hobane’ng ha re lokela ho ikemisetsa ho mamela ba etellang pele?

¹¹ Ke’ng hape e ka u thusang ho mamella mathata? Ke ho mamela joalokaha morali oa bo rona Anel a bontšitse. Ithute ho tšepa batho bao Jehova le Jesu ba ba tšepang. Ka linako tse ling, ba etellang pele ba ka ’na ba re fa litaelo tseo re bonang eka ha li utloahale. Empa Jehova o tla re hlohonolofatsa haeba re mamela. Re ithuta Lentsoeng la hae le mehlaleng ea bara le barali ba bo rona hore ho mamela ho pholosa bophelo. (Ex. 14:​1-4; 2 Likron. 20:​17) Nahanisisa ka mehlala e joalo. Ho nahanisisa ka eona ho tla u susumeletsa hore u batle ho latela tataiso ea mokhatlo oa Jehova hona joale le nakong e tlang. (Baheb. 13:​17) Ka lebaka leo, u ke ke oa tšoha matšoenyeho a maholo a tlang.​—Liprov. 3:25.

12. Ho latela Luka 18:​1-8, ho ba le tumelo le ho mamella ho hloka toka ho amana joang?

¹² Jesu o ne a tseba hore ho tšoaroa ka ho hloka toka ho ne ho tla leka tumelo ea barutuoa ba hae. E le ho ba thusa hore ba mamelle, o ile a ba etsetsa papiso e tlalehiloeng lengolong la Luka. Jesu o ile a ba bolella ka mohlolohali ea neng a lula a kopa moahloli ea sa lokang hore a mo sebeletse ka toka. Mohlolohali eo, o ne a kholisehile hore haeba a lula a kopa o tla qetella a fumane thuso. Qetellong moahloli o ile a thusa mohlolohali eo. Re ithuta’ng tabeng ee? Jehova o na le toka. Jesu o ile a re: “Joale, na ka sebele Molimo a ke ke a etsa hore toka e etsetsoe bakhethoa ba hae ba hoeletsang ho eena bosiu le motšehare?” (Bala Luka 18:​1-8.) Jesu o ile a eketsa ka ho re: “Ha Mor’a motho a fihla, na ka sebele o tla fumana tumelo lefatšeng?” Ha re tšoaroa ka ho hloka toka, re ka bontša hore re na le tumelo e matla joaloka ea mohlolohali eo ka hore re mamelle re be re phehelle. Ha re e-na le tumelo e joalo, re ka kholiseha hore Jehova o tla re thusa. Re boetse re lokela ho lumela hore thapelo e na le matla a maholo. Ka linako tse ling lithapelo tsa rona li ka arabeloa ka litsela tseo re neng re sa li lebella.

13. Thapelo e ile ea thusa lelapa le leng joang ha le ne le tšoeroe ka ho hloka toka?

¹³ Nahana ka mohlala oa morali oa bo rona Vero ea lulang Democratic Republic of the Congo. Eena le monna oa hae eo e seng Paki le morali oa bona ea lilemo li 15, ba ile ba tlameha ho baleha motseng oo ba neng ba lula ho oona ha o ne o hlaseloa ke sehlopha sa masole. Ha ba le tseleng ba ile ba kopana le masole a ileng a ba emisa eaba a ba tšosa ka hore a tla ba bolaea. Eitse ha morali oa bo rona Vero a qala ho lla, morali oa hae o ile a leka ho mo kokobetsa ka ho rapella holimo a pheta-pheta lebitso la Jehova thapelong eo. Ha a qeta ho rapela, molaoli oa masole ao o ile a mo botsa a re: “Ngoanana, ke  mang ea u rutileng ho rapela?” O ile a re: “Ke ’mè oa ka a sebelisa mohlala oa thapelo e ho Matheu 6:​9-13.” Molaoli eo o ile a re: “Ngoanana, tsamaea ka khotso le batsoali ba hao ’me e se eka Jehova Molimo oa hao a ka le sireletsa.”

14. Ke’ng e ka ’nang ea leka tumelo ea rona, hona re tla thusoa ke’ng ho mamella?

¹⁴ Mehlala e kang ena, e re ruta hore le ka mohla re se ke ra lebala kamoo thapelo e leng bohlokoa kateng. Empa ho thoe’ng haeba lithapelo tsa hao ha li arajoe kapele kapa ka tsela e hlollang? Joaloka mohlolohali ea papisong ea Jesu, tsoela pele ho rapela u kholisehile hore Molimo oa hao a ke ke a u tlohela ebile ka nako e loketseng o tla araba thapelo ea hao ka tsela e itseng. Tsoela pele ho kopa Jehova hore a u fe moea oa hae o halalelang. (Bafil. 4:​13) Hopola hore haufinyane, Jehova o tla u hlohonolofatsa haholo hoo u tla lebala lintho tse bohloko tse u etsahaletseng nakong e fetileng. Ha u mamella liteko ka thuso ea Jehova, u tla matlafala ’me u tla khona ho mamella liteko nakong e tlang.​—1 Pet. 1:​6, 7.

15. Matheu 17:​19, 20 e re ke bothata bofe boo barutuoa ba Jesu ba neng ba e-na le bona?

¹⁵ Jesu o ile a ruta barutuoa ba hae hore tumelo e tla ba thusa ho hlola mathata. (Bala Matheu 17:​19, 20.) Ka lekhetlo le leng, ba ile ba sitoa ho leleka modemona le hoja ka makhetlo a mang pele ho moo ba ile ba khona ho leleka bademona. Bothata e ne e le bofe? Jesu o ile a re ba ne ba hloka ho ba le tumelo e eketsehileng. O ile a re haeba ba ne ba e-na le tumelo e lekaneng ba ne ba tla khona ho hlola mathata a maholo a kang lithaba. Le rona kajeno re ka ’na ra ba le mathata ao ho bonahalang eka re ke ke ra a hlola.

16. Tumelo e ile ea thusa morali oa bo rona Geydi joang ho mamella ka mor’a hore monna oa hae a bolaoe?

¹⁶ Nahana ka mohlala oa morali oa bo rona Geydi oa Guatemala. Monna oa hae Edi o ile a bolaoa ha ba ne ba le tseleng e eang hae ba tsoa libokeng. Tumelo ea morali oa bo rona Geydi e ile ea mo thusa joang hore a mamelle ho sa tsotellehe bohloko boo a bo utloileng? O re: “Thapelo e nthusa ho lahlela moroalo oa ka ho Jehova ’me ke ba le khotso. Ke bona kamoo Jehova a ntlhokomelang kateng a sebelisa ba lelapa le metsoalle ea ka e ka phuthehong. Ho phathahana ka ho sebeletsa Jehova, ho nkokobetsa bohloko hape ho nthusa hore ke tsoele pele letsatsi le leng le le leng ke sa tšoenyehe haholo ka letsatsi le hlahlamang. Ka mor’a ho hlaheloa ke bothata bona, ke ithutile hore ho sa tsotellehe hore na ke teko ea mofuta ofe e ka ntlhahelang nakong e tlang, ke tla khona ho e mamella ka thuso ea Jehova, Jesu le mokhatlo oa Jehova.”

17. Re ka etsa’ng ha re e-ba le mathata a maholo a kang lithaba?

¹⁷ Na u ntse u utloile bohloko ka lebaka la ho hlokahalloa ke motho eo u mo ratang? Nka nako u matlafatsa tumelo ea hao tšepong ea tsoho ka hore u bale litlaleho tsa Bibele tsa batho ba ileng ba tsosoa bafung. Na u utloisitsoe bohloko ke ho khaoloa ha setho sa lelapa? Ithute e le hore u ikholise hore kamehla tsela eo Molimo a re khalemelang  ka eona e nepahetse. Ho sa tsotellehe hore na u na le bothata bofe, bo nke e le monyetla oa ho matlafatsa tumelo ea hao. Bolella Jehova hore na u ikutloa joang. Lula u le haufi le bara le barali ba bo rona, u se ke oa ikarola ho bona. (Liprov. 18:1) Etsa lintho tse tla u thusa hore u mamelle esita le haeba ka linako tse ling u lla ha u hopola hore na u etsahalletsoe ke’ng. (Pes. 126:​5, 6) Tsoela pele ho ea libokeng, tšimong le ho bala Bibele. Hape tsoela pele u nahana ka lintho tse molemo tseo Jehova a u tšepisitseng ho u etsetsa tsona nakong e tlang. Ha u bona kamoo Jehova a u thusang kateng hona joale, tumelo ea hao ho eena e tla ba matla le ho feta.

18. U ka etsa’ng ha u hlokomela hore tumelo ea hao ea fokola?

¹⁸ Haeba liteko tse u hlahetseng nakong e fetileng kapa tse u hlahelang hona joale li bontša hore tumelo ea hao ea fokola, u se ke oa nyahama. Nka boemo boo e le monyetla oa ho matlafatsa tumelo ea hao. Etsa kopo e tšoanang le eo baapostola ba Jesu ba ileng ba e etsa ha ba ne ba re: “Re fe tumelo e eketsehileng.” (Luka 17:5) Hape nahana ka mehlala eo re buileng ka eona sehloohong sena. Joaloka mora oa bo rona Miguel le mosali oa hae Yurai, hopola linako tsohle tseo Jehova a ileng a u thusa ka tsona. Joaloka morali oa morali oa bo rona Vero le morali oa bo rona Anel, rapela Jehova ka matla, haholo-holo ha u tobane le bothata bo boholo. Joaloka morali oa bo rona Geydi, ela hloko hore Jehova a ka fana ka thuso eo u e hlokang a sebelisa lelapa le metsoalle. Ha u lumella Jehova hore a u thuse ho mamella liteko tseo u kopanang le tsona hona joale, u tla kholiseha le ho feta hore o tla u thusa ho mamella liteko tseo u ka ’nang oa ba le tsona nakong e tlang.

19. Jesu o ne a kholisehile ka’ng ’me le uena u ka kholiseha ka’ng?

¹⁹ Jesu o ile a thusa barutuoa ba hae ho bona hore na ke hokae moo ba hlokang tumelo e eketsehileng empa ha aa ka a belaella taba ea hore ba tla khona ho mamella liteko nakong e tlang ka thuso ea Jehova. (Joh. 14:1; 16:​33) O ne a kholisehile hore ho tla ba le bongata bo boholo bo tla pholoha matšoenyeho a maholo hobane bo e-na le tumelo e matla. (Tšen. 7:​9, 14) Na u tla ba e mong oa bona? Ka thuso ea Jehova u tla ba e mong oa bona haeba u etsa sohle seo u ka se khonang hona joale ho matlafatsa tumelo ea hao.​—Baheb. 10:39.