1. Nguuli mubuzyo ngutukonzya kulibuzya?

NGAWAKATAAZIKANA na chimwi chiindi kuti wayeeya zintu ziyoochitika kunembo zili mbuli kunyonyoonwa kwazikombelo zyakubeja, kulwanwa aaGogo wakuMagogo ankondo yaArmagedoni? Kuli nunga walibuzya kuti na, ‘Ndiyookonzya na kukkala kandisyomeka chiindi zintu eezi ziyoosya niziyoochitika?’ Kuti kakuli boobo, majwi ngakaamba Jesu aali kuzulwida chiiyo eechi alakugwasya. Jesu wakabuzya basikwiiya bakwe kuti: “Myoyo yanu itapengi. Amusyome Leza.” (Joh. 14:1) Kuba aalusyomo lusimide kuyootugwasya kuti tukabe aachibindi chiindi zintu eezi niziyoochitika.

2. Niinzi nzitukonzya kuchita kuti tusimye lusyomo lwesu alubo tulalanga-langaanzi muchiiyo eechi?

² Kulanga-langa zintu nzituchita lino kuti twaswaanana aazintu zisunka lusyomo lwesu kuyootugwasya kuti tukabe aalusyomo lusimide chiindi nitwakuswaanana aamapenzi aali kunembo. Kuti twabona nzituchita lino kuti twaswaanana aazintu zisunka lusyomo lwesu zilatugwasya kubona mputweelede kubambulula. Kulisimya kusunko limwi alimwi ndituswaana kutugwasya kuti tube aalusyomo lusimide. Kuti twaba aalusyomo lusimide tuyookonzya kulisimya kumasunko aali kunembo. Muchiiyo eechi, tulabona zyiimo zili 4 nzibakaswaana basikwiiya baJesu zyakatondeezya kuti bakeelede kuba aalusyomo lusimide. Tulabona nzitukonzya kuchita kuti twaswaanana aabuyumu-buyumu bukozyenie mazubaano akuti zintu nzituchita nga zilatugwasya biyeni kuti tulibambile kuyooswaanana aazintu ziyoochitika kunembo.

3. Kweendelana alugwalo lwa Matayo 6:30, 33, nzyiimo zili zinga zyayanda kuti tusimye lusyomo lwesu?

³ Zili muli mbabo baalumi kuti ngabayanda kubeleka changuzu kuti mpuli zyabo zijane chakulya chikkwene, zyakuzwaata  akujana aakukkala. Pesi kuchita zintu eezi teekuuba pe ikapati muchiindi eechino chiyumu. Bamwi bakwesu abachizi bakamaninwa mulimu alubo nikuba kuti balikubeleka changuzu biyeni kuti bayanduule umwi mulimu pesi tabalikuujana pe. Bamwi bakasiya milimu iitakonzyi kuchitwa aamaKristu. Muzyiimo zyoonse eezi, mpimpawo mputweelede kuba aalusyomo lusimide lwakuti Jehova uyootugwasya kuti tujane zintu nzituyanda ampuli zyesu. Jesu wakakasalazya kaambo aaka chiindi naakali kwaambuula aabasikwiiya bakwe muNkambawuko yakwe yakuChilundu. (Bala Matayo 6:30, 33.) Kuti twaba aalusyomo lwakuti Jehova takatusiyi pe, tuyoozumanana kubikka Bwaami mubusena bwakusaanguna. Chiindi nitubona Jehova mbali kutugwasya aazintu zyakumubili ziyoopa kuti tuswene aafwiifwi anguwe alubo lusyomo lwesu luyoosima.

4-5. Imwi mpuli yakagwasigwa biyeni chiindi niyakali kuyuminwa kujana zintu zyakumubili?

⁴ Atubone umwi mwaalumi ampuli yakwe bakkala kuVenezuela mbubakagwasigwa aaJehova chiindi nibakali kukataazikana kuti ngabalazijana biyeni zintu zyakumubili. Mukwesu Castro ampuli yakwe bakali aamuunda ngubakali kulima wakali kubagwasya kuti bajane mali yakuti bawule zintu zyakumubili. Bamwi baalumi bakali aantobolo bakabanyeya muunda wabo alubo bakabatanda mpubakali kukkala. Mukwesu Castro wakaamba kuti: “Lino tulikulima aamuunda muniini ngutwakanengelwa aawumwi muntu. Buzuba abuzuba ndisaanguna kukomba kandikumbila Jehova kuti atupe nzituyanda zyabuzuba oobo.” Nisimpe kuti buumi bulikumuyumina Mukwesu Castro ampuli yakwe, pesi akaambo kakuti basyoma kuti Jehova ulabapa nzibayanda buzuba abuzuba, balikunjila miswaangano chiindi choonse alubo bali kutola lubazu mumulimu wakukambawuka. Balikubikka Bwaami mubusena bwakusaanguna alubo Jehova ulikubapa nzibayanda.

⁵ Muchiindi eechi chiyumu, Mukwesu Castro amwanakazi wakwe ngabayeeyesesya atala aJehova mbali kubalangania. Chimwi chiindi Jehova wakabelesya bakwesu abachizi kuti bagwasye mpuli eeyi azintu zyakumubili naakuti kugwasya Mukwesu Castro kuti ajane mulimu. Alubo aali chimwi chiindi, Jehova wakabelesya wofesi yamutabi kuti ibagwasye aazintu zyakumubili. Jehova taakwe naakabasiya pe. Eezi zilikupa kuti babe aalusyomo lusimide. Mwanaabo mupati uutegwa Yoselin naakali kwaamba atala Jehova mbaakabagwasya wakati: “Zilawumbulizya kubona Jehova mbalikutugwasya. Jehova mweenzuma alubo ndili aachoonzyo chakuti unoondigwasya chiindi choonse.” Yoselin wakayungizya kuti: “Masunko ngitwaswaananaawo atugwasya kuti tulibambile kuyooswaanana aamasunko mayumu kunembo.”

6. Niinzi nzukonzya kuchita kuti usimye lusyomo lwako kuti kuli kuswaanana aapenzi lyakubula mali?

⁶ Ulikuswaanana aapenzi lyakubula mali na? Kuti kakuli boobo, zilamvwisisika kuti ulikuswaanana aachiimo chiyumu. Pesi ulakonzya kubelesya chiindi eecho kuti usimye lusyomo lwako. Komba kuli Jehova, bala majwi aakaambwa aaJesu aajanika muli Matayo 6:25-34  alubo uyeeyesesye atala angawo. Yeeyesesya atala azikozyano zyabamwi zitondeezya kuti Jehova ulabalangania aabo bachita zyiingi mumulimu wakwe. (1 Kor. 15:58) Kuchita oobo, kuyoopa kuti ube aachoonzyo chakuti Jehova ulakugwasya mbuli mbaakagwasya bamwi bakali muchiimo chikozyenie aachako. Jehova ulizizi zintu nzuyanda alubo ulizi kuti nga ulakugwasya biyeni kuti uzijane. Chiindi nubona Jehova mbalikukugwasya mubuumi bwako, lusyomo lwako lulasima loko zyakuti uyookonzya kulisimya kumasunko mayumu aali kunembo.​—Hab. 3:17, 18.

7. Kweendelana alugwalo lwa Matayo 8:23-26, lusyomo lwabasikwiiya baJesu lwakasunkwa biyeni ‘aguwo pati’?

⁷ Chiindi Jesu abasikwiiya bakwe nibakali mubwaato kwakawunga guwo. Jesu wakabelesya mweenya ooyo kuti agwasye basikwiiya bakwe kubona kuti bakeelede kusimya lusyomo lwabo. (Bala Matayo 8:23-26.) Guwo lyakali pati zyakuti mayuwe aamulwizi akali kunjila mubwaato alubo nizyakali kuchitika zyoonse eezi Jesu wakalilede. Basikwiiya bakwe bakayoowa mpawo bakamubusya alubo bakamubuzya kuti abafutule. Pesi Mwaami wakababuzya kuti: “Nkaambo nzi ncomuyoowede boobu nywebo nobasilusyomo luniini?” Basikwiiya baJesu bakeelede kuziba kuti Jehova wakali kukonzya kukwabilila Jesu abaabo mbaakalaabo. Eezi zituyiisyaanzi? Kuba aalusyomo lusimide kulakonzya kutugwasya kuti tulisimye kuti kwachitika “guwo pati” naakuti twaswaanana aamapenzi aali mbuli guwo pati.

8-9. Lusyomo lwaAnel lwakasunkwa biyeni alubo niinzi zyakamugwasya?

⁸ Atubone umwi muchizi uukkala kuPuerto Rico uutegwa Anel mbaakaba aalusyomo lusimide chiindi naakaswaanana aalimwi penzi. Mu2017 kwakachitika guwo pati lili aamvula lyakadilisya ng’anda yakwe. Alubo akaambo kaguwo eeli, muchizi ooyu wakamaninwa mulimu. Anel wakaamba kuti: “Aachiindi eechi, ndakakataazikana pesi ndakali kukomba kuli Jehova kandimukumbila kuti andigwasye alubo teendakazumizya kukataazikana kuti kundikachizye kuchita zintu nzindakali kuyanda kuchita.”

⁹ Anel wakaamba kuti kuswiilila kwakamugwasya kuti alisimye kumapenzi ngaakali kuswaananaawo. Wakaamba kuti: “Kuswiilila malayilile ngitwakali kupegwa aambunga yaJehova kwakandigwasya kuti ndibatame. Jehova wakandigwasya kabelesya bakombima. Bakali kundisungwaazya alubo bakandigwasya aazintu zyakumubili.” Anel wakayungizya kuti: “Jehova wakandipa zintu zyiingi nzindatakali kuyeeyela pe alubo eezi zyakasimya lusyomo lwangu.”

10. Niinzi nzukonzya kuchita kuti waswaanana aamapenzi aali mbuli “guwo pati”?

¹⁰ Ulikuswaana mapenzi ali mbuli “guwo pati” na mubuumi bwako? Kulakonzeka kuti mapenzi ngulikuswaananaawo akeetwa aamapenzi aalichitikila. Amwi ulikuchiswa bumwi bulwazi bwakusiya kuli wamana manguzu alubo kutachizi zyakuchita. Ulakonzya kukataazikana chimwi chiindi pesi utazumizyi kukataazikana kuti kukukachizye kusyoma Jehova. Komba kuli Jehova  kumubuzya zyoonse zili aansi aamoyo wako. Simya lusyomo lwako kwiinda mukuyeeyesesya atala aJehova mbaakakugwasya chiindi. (Int. 77:11, 12) Ulakonzya kuba aachoonzyo chakuti ziyume zitete Jehova takakusiyi pe.

11. Nkamboonzi nitweelede kukkala katuswiilila bakwesu bazulwida?

¹¹ Niinzi zimwi zikonzya kukugwasya kuti ulisimye kumapenzi? Anel wakaamba kuti nkuswiilila. Syoma bakwesu bazulwida nkaambo Jehova aJesu balabasyoma. Chimwi chiindi, bakwesu bazulwida balakonzya kutupa malayilile ngitubonaanga taabeleki pe. Pesi tweelede kuziba kuti Jehova ulongezya bantu baswiilila. Tulizizi eezi kuzwa kuzikozyano zilembedwe muBbayibbele azyabakombi bakwe basyomeka bamazubaano bakafutula buumi bwabo akaambo kakuswiilila. (Kul. 14:1-4; 2 Mak. 20:17) Yeeyesesya atala azikozyano zyabantu aaba. Kuchita oobo kuyookugwasya kuti uzumanane kuswiilila malayilile ngitupegwa aambunga yaJehova lino amuchiindi chilikunembo. (Heb. 13:17) Alubo tukayoowi pe muchiindi chamapenzi mapati aaba aafwiifwi kusika.​—Tus. 3:25.

12. Kweendelana alugwalo lwa Luka 18:1-8, lusyomo lutugwasya biyeni kuti tulisimye chiindi nitutajatwi kabotu?

¹² Jesu wakalizi kuti lusyomo lwabasikwiiya bakwe lwakali kuyoosunkwa akaambo kakutajatwa kabotu. Kuti abagwasye mbubakali kukonzya kuyoolisimya, wakababuzya chikozyano chilembedwe mubbuku lyaLuka. Jesu wakaambuula atala alwaano lwawumwi mukamufu wakali kuzumanana kwiinka kumubetesi uutaluleme kuti akabetekelwe makani aakwe munzila yabululami. Mwanakazi ooyu wakali aachoonzyo chakuti, kuti wazumanana kukombelezya mubetesi, wakali kuyoomugwasya. Mubetesi ooyo wakazoomugwasya. Twiiyaanzi? Jehova uliluleme. Jesu wakaamba kuti: “Aboobo sena Leza takaboni kuti basale bakwe ibamukwiilila isyikati amasiku bakoswedwa cabululami makani.” (Bala Luka 18:1-8.) Alubo Jesu wakayungizya kuti: “Mwanaamuntu aakuboola, sena masimpe uyoolujana lusyomo oolu anyika?” Kuti teetwajatwa kabotu, tweelede kuba aamoyo mulamfu alubo tuzumanane kukumbila Jehova kuti atugwasye. Kuti twachita oobo, nga tulikutondeezya kuti tuli aalusyomo lusimide mbuli mukamufu wakaambwa aaJesu. Lusyomo oolo luyootugwasya kuti tube aachoonzyo chakuti Jehova uyootugwasya. Alubo tweelede kusyoma kuti nkombyo ilagwasya. Chimwi chiindi nkombyo zyesu zilakonzya kusandulwa munzila njitutayeeyeli pe.

13. Imwi mpuli yakagwasigwa biyeni ankombyo chiindi niyakatajatwa kabotu?

¹³ Atubone zyakachitikila umwi muchizi uutegwa Vero uukkala kuCongo. Muchizi Vero, mulumaakwe uutakombi amwanaabo musimbi uuli aaminyaka iili 15 bakachija muchilawu chabo akaambo kakuti mwakali mwaba lupyopyongano. Kabali munzila, bakasika aakayimvwi musoja mpawo bakabayimikizya akubayoosezya kuti bakali kuyanda kubajaya. Muchizi Vero naakasaanguna kulila, mwanaakwe wakamuumbulizya alubo wakakombela aajulu kali kubelesya  zina lyaJehova kwaziindi zyiingi. Chiindi mwana ooyu naakamaninsya kukomba, mupati wamasoja wakamubuzya kuti, “Ngwani wakakuyiisya kukomba?” Wakasandula kuti, “Baama mbabo bakandiyiisya kababelesya nkombyo iijanika muli Matayo 6:9-13.” Mupati wamasoja wakazoowamba kuti, “Yinka abazyali bako muluumuno alubo Jehova Leza wanu amukwabilile.”

14. Niinzi zikonzya kusunka lusyomo lwesu alubo niinzi zikonzya kutugwasya kuti tulisimye?

¹⁴ Zikozyano nzitwabona zituyiisya kuti tatweelede kuzilangilaansi pe nkombyo. Niinzi nzitukonzya kuchita kuti nkombyo zyesu teezyasandulwa chakufwambaana naakuti teezyasandulwa munzila njitwali kulangilila? Mbuli mukamufu uli muchikozyano chaJesu, tweelede kuzumanana kukomba katuli aachoonzyo chakuti Leza wesu takatusiyi pe akuti uyoozisandula nkombyo zyesu aachiindi cheelede. Zumanana kukumbila Jehova kuti akupe muuya wakwe uusalala. (Flp. 4:13) Weelede kuyeeya kuti, muchiindi chili aafwiifwi Jehova uyookupa zilongezyo zyiingi zyakuti uyoowaluba mapenzi woonse ngulikuswaana lino. Kuti walisimya kumapenzi ngulikuswaananaawo lino kuli kugwasigwa aaJehova, lusyomo lwako luyoosima alubo uyookonzya kulisimya kumapenzi aali kunembo.​—1 Pet. 1:6, 7.

15. Kweendelana alugwalo lwa Matayo 17:19, 20, mbuubuli buyumu-yumu mbubakaswaananaabo basikwiiya baJesu?

¹⁵ Jesu wakayiisya basikwiiya bakwe kuti lusyomo lwakali kuyoobagwasya kuti bazumanane kukomba Jehova nikuba kabaswaanana aabuyumu-yumu. (Bala Matayo 17:19, 20.) Aali chimwi chiindi, basikwiiya baJesu bakakachilwa kutanda dimoni nikuba kuti zimwi ziindi bakali kuzwidilila. Niinzi chakapa kuti bakachilwe kulitanda? Jesu wakaamba kuti bakeelede kusimya lusyomo lwabo. Wakababuzya kuti, kuti kabali aalusyomo lusimide bakali kuyookonzya kuzunda mapenzi aabonekaanga mapati mbuli zilundu. Andiswe mazubaano, tulakonzya kuswaanana aamapenzi aabonekaanga mapati mbuli zilundu.

16. Lusyomo lwakamugwasya biyeni muchizi Geydi naakali muchiindi chiyumu loko?

¹⁶ Atubone chikozyano chamuchizi Geydi uukkala kuGuatemala. Mulumaakwe uutegwa Edi wakajayigwa amasosi chiindi nibakali kuzwa kumiswaangano yambungano. Lusyomo lwamuchizi ooyu lwakamugwasya biyeni kuti alisimye muchiindi eechi chiyumu? Wakaamba kuti: “Nkombyo indigwasya kuti ndibuzye Jehova zintu zyoonse zili kundikataazya alubo kuchita oobo kundigwasya kuti nditakataazikani loko. Nga ndabona Jehova mbali kundigwasya kabelesya bamumpuli yangu abakwesu abachizi bamumbungano. Kukkala kandichita zyiingi mumulimu waJehova kundigwasya kuti nditakataazikani loko atala azintu zyakachitika akuti ndilangane aazintu zyabuzuba bumwi. Kuzwa kuli zyakachitika, ndakabona kuti kufumbwa sunko ndindikonzya kuswaana muchiindi chili kunembo ndilakonzya kulisimya kandigwasigwa aaJehova, Jesu ambunga.”

17. Niinzi nzitukonzya kuchita kuti twaswaanana aamapenzi abonekaanga mayumu?

 ¹⁷ Wakafwidwa aabbululu wako na? Ulakonzya kusimya lusyomo lwako kwiinda mukubala atala azikozyano zili muBbayibbele zyabantu bakabusigwa. Kuli umwi na muntu wamumpuli yanu wakagwisigwa mumbungano? Bala Bbayibbele alubo uyanduulisisye kuchitila kuti ube aachoonzyo chakuti nzila njatululamikaayo Leza iilikabotu chiindi choonse. Kufumbwa penzi ndwaaswaana, belesya mweenya ooyo kuti usimye lusyomo lwako. Buzya Jehova mbuli kulimvwa. Kkala kuli aafwiifwi abakombinyokwe. (Tus. 18:1) Chita zintu zikonzya kukugwasya kuti ulisimye nikuba kazikonzya kupa kuti ulile kuti wayeeya zintu zyakakuchitikila. (Int. 126:5, 6) Kkala kukambawuka, njila miswaangano alubo ubale Bbayibbele chiindi choonse. Alubo kkala kuyeeya atala azilongezyo zibotu Jehova nzyakubambilide. Chiindi nubona Jehova mbali kukugwasya, lusyomo lwako luyoosima loko.

18. Niinzi nzukonzya kuchita kuti wabona kuti lusyomo lwako talusimide loko?

¹⁸ Kuti mapenzi ngwaakaswaana chiindi naakuti ngulikuswaana lino apa kuti ubone kuti lusyomo lwako lwacheya, utamani manguzu pe. Belesya mweenya ooyo kuti usimye lusyomo lwako. Chita mbuli mbubakachita baapostolo baJesu nibakati: “Kotuyungizyila lusyomo.” (Lk. 17:5) Alubo yeeyesesya atala azikozyano nzitwalanga-langa muchiiyo eechi. Mbuli Miguel aYurai, yeeya atala aJehova mbaakakugwasya. Mbuli mwana wamuchizi Vero amuchizi Anel, komba kuli Jehova kumubuzya zili aansi aamoyo wako ikapati chiindi nwaaswaanana aapenzi pati. Alubo mbuli muchizi Geydi, baachoonzyo chakuti Jehova ulakonzya kukugwasya kabelesya bamumpuli yako naakuti bakombinyokwe. Kuti wazumizya Jehova kuti akugwasye kuti ulisimye kumapenzi ngulikuswaana lino, uyooba aachoonzyo chakuti uyookugwasya kuti ukalisimye kufumbwa mapenzi nguyooswaana muchiindi chili kunembo.

19. Jesu wakali aachoonzyo chanzi alubo ulakonzya kuba aachoonzyo chanzi?

¹⁹ Nikuba kuti Jesu wakagwasya basikwiiya bakwe kuti babone mpubakeelede kuba aalusyomo lusimide pesi wakali aachoonzyo chakuti bakali kuyookonzya kulisimya kumapenzi ngibakali kuyooswaana kunembo kabagwasigwa aaJehova. (Joh. 14:1; 16:33) Alubo Jesu wakali aachoonzyo chakuti bankamu mpati bayoofutuka muchiindi chamapenzi mapati akaambo kakuti banooli aalusyomo lusimide. (Ciy. 7:9, 14) Uyooba umwi wabankamu mpati na? Kwiinda mukugwasigwa aaJehova, uyooba umwi wabo kuti wachita zyoonse nzukonzya lino kuti usimye lusyomo lwako.​—Heb. 10:39.