1. Hi swihi swivutiso leswi hi nga ha ti vutisaka swona?

XANA mikarhi yin’wana wa vilela loko u ehleketa hileswi swi nga ta endleka ku nga ri khale swo tanihi ku herisiwa ka vukhongeri bya mavunwa, nhlaselo wa Gogo wa Magogo ni nyimpi ya Armagedoni? Xana wa tivutisa leswaku loko nkarhi wolowo wu fika u ta swi kota ku hlula swiendlakalo sweswo swo chavisa hi ku tshembeka? Loko u tivutisa sweswo, marito ya Yesu lama nga eka nhlokomhaka leyi lawa hi nga ta bula ha wona ma ta ku pfuna. Yesu u byele vadyondzisiwa vakwe a ku: “Mi nga karhateki. Vanani ni ripfumelo eka Xikwembu.” (Yoh. 14:1) Ripfumelo leri tiyeke ri ta endla leswaku hi nga chavi leswi nga ta endleka enkarhini lowu taka.

2. Hi nga ri tiyisa njhani ripfumelo ra hina naswona hi ta bula hi yini eka nhlokomhaka leyi?

² Ku langutana ni miringo sweswi swi ta hi pfuna hi kota ku tiyisa ripfumelo ra hina ni ku tlhela hi tiyisela enkarhini lowu taka. Nakambe loko hi ehleketisisa hi ndlela leyi hi langutana ni miringo sweswi swi ta hi pfuna leswaku hi vona laha hi faneleke hi antswisa kona. Mikarhi hinkwayo loko hi hlula miringo ripfumelo ra hina ra tiya. Naswona sweswo swi ta hi pfuna ku tiyisela enkarhini lowu taka. Eka nhlokomhaka leyi hi ta bula hi swiyimo swa mune leswi kombiseke leswaku vadyondzisiwa va Yesu a va lava ripfumelo leri engetelekeke. Nakambe hi ta bula hi ndlela leyi namuntlha hi nga langutanaka ni swiyimo leswi fanaka ni ku vona ndlela leyi swi nga hi pfunaka hayona leswaku hi tiyisela enkarhini lowu taka.

3. Marito ya Yesu lama nga eka Matewu 6:30, 33, ma hi pfuna leswaku hi twisisa yini?

³ Swi fanerile leswaku nhloko ya ndyangu yi khwajakhwaja leswaku yi wundla ndyangu wa yona hi ku wu nyika swakudya, swiambalo ni ndhawu yo tshama. Kambe emikarhini leyi hi hanyaka eka yona a swi olovi. Vamakwerhu van’wana va lahlekeriwe hi mitirho naswona swa va tikela ku kuma yin’wana. Van’wana va boheke ku tshika mitirho leyi lwisanaka ni mahanyelo ya Vakreste. Eka swiyimo swo tano, hi fanele hi va ni ripfumelo ra leswaku Yehovha u ta hi nyika hinkwaswo leswi hi swi lavaka leswaku hi kota ku khathalela mindyangu ya hina. Yesu u yi basisele vadyondzisiwa vakwe kahle mhaka leyi eka dyondzo yakwe ya le ntshaveni. (Hlaya Matewu 6:30, 33.) Loko hi tshemba hi ku helela leswaku Yehovha a nge hi tshiki, swi ta hi olovela leswaku hi rhangisa Mfumo wakwe ku sungula evuton’wini bya hina. Loko hi vona ndlela leyi Yehovha a swi khathalelaka hayona swilaveko swa hina sweswi, swi ta hi pfuna leswaku hi tshinela eka yena naswona ripfumelo ra hina ri ta tiya.

4-5. I yini leswi pfuneke ndyangu wun’wana leswaku wu kota ku hlula ku vilela hambileswi a wu nga ri na swo tala swo tihanyisa hi swona?

⁴ Xiya ndlela leyi Yehovha a wu pfuneke hayona ndyangu wun’wana wa le Venezuela lowu a wu pfumala mali leyi ringaneke yo tihanyisa. Ndyangu wa ka Castro a wu ti hanyisa hi ku ti rimela ensin’wini ya vona. Kambe siku rin’wana swigevenga leswi a swi hlomile swi fike swi va tekela nhundzu ni nsimu ya vona. Miguel loyi a nga nhloko ya ndyangu u ri: “Sweswi hi tihanyisa hi ku khwaja exisin’wanini lexi hi xi lombeke. Loko ri xa mixo wun’wana ni wun’wana, ndzi kombela Yehovha a hi pfuna leswaku hi kuma swakudya swo tihanyisa swa siku rero.” Ndyangu lowu wu koka exilogweni kambe leswi wu nga ni ripfumelo ra leswaku Yehovha u ta wu nyika leswi wu swi lavaka, a wu tshiki ku va kona etinhlengeletanweni ta vandlha nkarhi ni nkarhi ni ku va kona entirhweni wo chumayela. Va rhangisa Mfumo emahlweni naswona Yehovha wa va khathalela.

⁵ Hambileswi va hanyaka hi rikoka ra xilondza, Miguel ni nsati wakwe Yurai va tshamela ku anakanyisisa hi ndlela leyi Yehovha a va khathalelaka hayona. Mikarhi yin’wana Yehovha u tirhise vamakwerhu leswaku va pfuna Miguel a kuma swo khathalela ndyangu wakwe kumbe ku n’wi pfuna a kuma ntirho. Nakambe mikarhi yin’wana U tirhise hofisi ya rhavi leswaku yi va phalala hileswi a va swi pfumala. Yehovha a nga va lahlelanga mavoko. Sweswo swi endle leswaku ripfumelo ra ndyangu lowu ri tiya swinene. Endzhaku ko hlamusela ntokoto wa ndlela leyi Yehovha a va pfuneke hayona, nhwana wa vona wa mativula loyi a vuriwaka Yoselin, u ri: “Swa khutaza ku vona ndlela leyi Yehovha a hi pfunaka hayona. I munghana wa mina loyi ndzi titshegeke hi yena evuton’wini.” Nakambe u ri: “Miringo leyi hi langutaneke na yona tanihi ndyangu, yi hi lunghiselela miringo yo tika leyi hi nga ta langutana na yona enkarhini lowu taka.”

6. Xana u nga ri tiyisa njhani ripfumelo ra wena loko u langutana ni swiphiqo swa timali?

 ⁶ Xana xiyimo xi le ku ku tikeleni hi tlhelo ra timali? Loko swi ri tano, u koka exilogweni. Kambe hambiloko swiyimo swi ku tikela, u nga tirhisa nkarhi wolowo leswaku u tiyisa ripfumelo ra wena. Khongela ni ku anakanyisisa hi marito ya Yesu lama kumekaka eka Matewu 6:25-34. Dyondza hi swikombiso swa ndlela leyi Yehovha a ma khathalelaka hayona malandza yakwe namuntlha lawa ma tikarhatela ku rhangisa Mfumo wakwe ku sungula. (1 Kor. 15:58) Sweswo swi ta tiyisa ripfumelo ra wena ra leswaku Tata wa wena wa le matilweni u ta ku pfuna hilaha a va pfuneke hakona. Wa swi tiva leswi u swi lavaka ni ndlela leyi a nga ta ku khathalela hayona. Loko u ya u vona ndlela leyi Yehovha a ku pfunaka hayona, ripfumelo ra wena ri ta tiya leswaku u kota ku tiyisela miringo yo tala.—Hab. 3:17, 18.

7. Hi ku ya hi Matewu 8:23-26, xana xidzedze lexikulu xi ri ringe njhani ripfumelo ra vadyondzisiwa?

⁷ Loko Yesu ni vadyondzisiwa vakwe va kumiwa hi xidzedze elwandle, Yesu u tirhise nkarhi wolowo leswaku a va pfuna va va ni ripfumelo leri tiyeke. (Hlaya Matewu 8:23-26.) Loko xidzedze xi ya xi kariha ni mati ma ya ma nghena endzeni ka xikepe, Yesu a a etlele. Loko vadyondzisiwa vakwe lava a va chuhile va n’wi pfuxa leswaku a ta va ponisa, Yesu u va tshinyile a ku: “Hikwalaho ka yini mi chava, n’wina va ripfumelo leritsongo?” Hambileswi vadyondzisiwa vakwe a va chuhile kambe a va fanele va ve ni ripfumelo ra leswaku Yehovha a a ta va sirhelela. Xana hi dyondza yini? Ripfumelo leri tiyeke ri nga hi pfuna ku hlula “xidzedze lexikulu” kumbe swiphiqo leswi hi nga ha langutanaka na swona.

8-9. Ripfumelo ra Anel ri ringiwe njhani naswona u pfuniwe hi yini?

⁸ Xiya ndlela leyi ripfumelo leri tiyeke ri n’wi pfuneke hayona makwerhu wa xisati loyi a vuriwaka Anel loyi a nga tekiwangiki wa le Puerto Rico. U weriwe hi xidzedze xa xiviri. Hi 2017, xidzedze lexi vuriwaka Maria xi onhe kaya rakwe. Nakambe xi endle leswaku a lahlekeriwa hi ntirho. Anel u ri: “A ndzi vilela swinene hi nkarhi wolowo wo tika kambe ndzi dyondze ku tshemba Yehovha hi ku khongela ni ku nga pfumeleli xiyimo xexo xi ndzi tshikilela.”

⁹ Anel u vula leswaku ku yingisa hi swin’wana leswi n’wi pfuneke leswaku a kota ku tiyisela. U ri: “Ku landzelela nkongomiso wa nhlangano swi ndzi pfunile leswaku ndzi nga karhateki. Ndzi vone Yehovha a ndzi pfuna hi ku tirhisa vamakwerhu lava a va ndzi khathalela hileswi a ndzi swi lava ni ku ndzi pfuna ndzi tiyisa vuxaka bya mina na Yehovha.” U engeta a ku: “Yehovha u ndzi nyike swo tala hi ndlela leyi a ndzi nga yi ehleketi naswona ripfumelo ra mina ri ye ri tiya swinene.”

10. Xana u ta endla yini loko u langutana ni swiphiqo leswikulu?

¹⁰ Xana u ni swiphiqo leswikulu? Kumbexana swi nga ha vangiwa hi timhangu ta ntumbuluko. Kumbexana i swiphiqo swa rihanyo leswi ku hetaka matimba naswona swi ku siyaka u nga tivi ta wena. U nga ha karhateka hikwalaho ka swona  kambe u nga swi pfumeleli swi ku endla u nga ha n’wi tshembi Yehovha. Tshinela eka yena hi xikhongelo. Tiyisa ripfumelo ra wena hi ku anakanyisisa hi ndlela leyi Yehovha a ku pfuneke hayona enkarhini lowu nga hundza. (Ps. 77:11, 12) Sweswo swi ta ku endla u tiyiseka leswaku a nge pfuki a ku tshikile.

11. Hikwalahokayini hi fanele hi tikarhatela ku yingisa lava rhangelaka?

¹¹ I yini xin’wana lexi nga ku pfunaka ku tiyisela miringo? Hilaha Anel a vuleke hakona, i ku yingisa. Dyondza ku tshemba lava Yehovha na Yesu va va tshembaka. Mikarhi yin’wana lava rhangelaka va nga ha hi nyika nkongomiso lowu hi vonaka wu nga twali. Kambe Yehovha u katekisa lava yingisaka. Ha swi tiva hikuva hi swi dyondzile eBibeleni ni le ka malandza man’wana yo tshembeka leswaku ku yingisa swi ponisa vutomi. (Eks. 14:1-4; 2 Tikr. 20:17) Anakanyisisa hi swikombiso sweswo. Sweswo swi ta ku pfuna leswaku u landzela nkongomiso lowu humaka eka nhlangano sweswi ni le nkarhini lowu taka. (Hev. 13:17) Loko u endla tano a wu nge xi chavi xidzedze lexikulu lexa ha taka, ku nga nhlomulo lowukulu.—Swiv. 3:25.

12. Xana ripfumelo ri fambisana njhani ni ku tiyisela ku nga khomiwi kahle hilaha swi boxiweke hakona eka Luka 18:1-8?

¹² Yesu a a swi tiva leswaku ku nga khomiwi kahle swi nga ha tsanisa ripfumelo ra vadyondzisiwa vakwe. U va nyike xifaniso lexi kumekaka eka buku ya Luka leswaku a va pfuna va kota ku tiyisela. A ku ri xa noni leyi a yi tshamela ku rila eka muavanyisi loyi a nga yi kombisangaki vululami. A yi tshemba leswaku loko yo phikelela, a yi ta pfuneka. Hi ku famba ka nkarhi, muavanyisi u hlamule xikombelo xa yona. Hi dyondza yini? Yehovha i Xikwembu xa vululami. Hikwalaho, Yesu u te: “Kutani, xana Xikwembu a xi nge endli leswaku lava xi va hlawuleke, ku nga lava va xi khongelaka vusiku ni nhlikanhi va avanyisiwa kahle.” (Hlaya Luka 18:1-8.) Nakambe u te: “Loko N’wana wa munhu a fika, xana u ta ri kuma ripfumelo ro tano emisaveni?” Loko hi nga kombisiwi vululami, hi fanele hi va ni ripfumelo leri fanaka ni ra noni leyi, hi ku tiyisela ni ku lehisa mbilu. Sweswo swi ta hi pfuna hi tiyiseka leswaku ku nga ri khale, Yehovha u ta teka goza. Nakambe hi fanele hi tshemba leswaku xikhongelo xi ni matimba. Mikarhi yin’wana swikhongelo swa hina swi nga hlamuriwa hi tindlela tin’wana leti a hi nga ti langutelanga.

13. Xana xikhongelo xi wu pfune njhani ndyangu wun’wana lowu nga kombisiwangiki vululami?

¹³ Xiya xikombiso xa Vero loyi a nga makwerhu wa xisati loyi a tshamaka eDemocratic Republic of Congo. Leswi a va hlaseriwa hi ntlawa wa masocha, yena ni nuna wakwe loyi a nga riki Mbhoni swin’we ni n’wana wa vona wa malembe ya 15 va boheke ku rhurha laha a va tshama kona. Loko va ri endleleni va hlangane ni masocha lawa a ma pfale ndlela, hiloko va va yimisa ivi va va xungeta ku va dlaya. Loko Vero a sungula ku rila, ntombhi yakwe yi n’wi khongoterile hi ku khongela ni ku phikelela vito ra Yehovha hi rito ra le henhla. Loko a heta ku khongela, ndhuna ya  ntlawa wolowo ya masocha yi te: “Ntombhana, xana u dyondzise hi mani ku khongela?” Hiloko a hlamula a ku: “Ndzi dyondzise hi mhani hi ku tirhisa xikhongelo lexi kumekaka eka Matewu 6:9-13.” Ndhuna yoleyo yi te: “Ntombhana, famba ni vatswari va wena hi ku rhula naswona onge Yehovha Xikwembu xa n’wina a nga mi sirhelela!”

14. I yini leswi nga ha ringaka ripfumelo ra hina naswona hi ta pfuniwa hi yini leswaku hi kota ku tiyisela?

¹⁴ Swikombiso swo fana ni leswi hi buleke ha swona, swa hi dyondzisa leswaku a hi fanelanga hi ma tekela ehansi matimba ya xikhongelo. Kambe u nga endla yini loko swikhongelo swa wena swi nga hlamuriwi hi ku hatlisa kumbe hi ndlela leyi u lavaka hayona? Ku fana ni noni ya le xifanisweni xa Yesu, phikelela eswikhongelweni naswona u tshemba leswaku Xikwembu a xi nge pfuki xi ku tshikile, xi ta hlamula swikhongelo swa wena hi nkarhi lowu faneleke. Yana emahlweni u khongelela moya lowo kwetsima wa Yehovha. (Filp. 4:13) Tsundzuka leswaku ku nga ri khale, Yehovha u ta ku katekisa swinene naswona u ta rivala hi maxangu hinkwawo lama tshameke ma ku humelela. Loko u tiyisela hi ku tshembeka hikwalaho ko pfuniwa hi Yehovha, u ta va ni matimba yo tiyisela miringo enkarhini lowu taka.—1 Pet. 1:6, 7.

15. Hilaha swi boxiweke hakona eka Matewu 17:19, 20, hi yihi mitlhontlho leyi vadyondzisiwa va Yesu va langutaneke na yona?

¹⁵ Yesu dyondzise vadyondzisiwa vakwe leswaku ripfumelo ri ta va pfuna va kota ku tiyisela miringo. (Hlaya Matewu 17:19, 20.) Siku rin’wana va tsandzeke ku hlongola dimona, hambileswi enkarhini lowu hundzeke va swi koteke. Xana xiphiqo a xi ri kwihi? Yesu u vule leswaku a va lava ripfumelo leri engetelekeke. U vule leswaku loko a va ri ni ripfumelo leri engetelekeke, a va ta kota na ku lerisa ntshava leswaku yi suka yi ya yima kun’wana! Namuntlha hi nga ha langutana ni mitlhontlho leyi hi vonaka onge yi endla swi hi tikela ku ya emahlweni ni vutomi.

16. Xana ripfumelo ri n’wi pfune njhani Geydi leswaku a kota ku langutana ni gome?

¹⁶ Xiya xikombiso xa Geydi, makwerhu wa xisati wa le Guatemala. Nuna wakwe Edi u dlayiwile loko va huma etinhlengeletanweni ta vandlha. Xana ripfumelo ri n’wi pfune njhani leswaku a tiyisela? U ri: “Xikhongelo xi ndzi pfune leswaku ndzi lahlela ndzhwalo wa mina eka Yehovha naswona sweswo swi endle ndzi va ni ku rhula. Ndzi vone nkhathalelo wa Yehovha hi ku tirhisa ndyangu wa mina ni vamakwerhu evandlheni. Nakambe ku tshama ndzi khomekile hi ntirho wa Yehovha swi ndzi pfune leswaku ku karhateka ka mina ku ya ku hela naswona ndzi nga ha vileli hi siku ra mundzuku. Endzhaku ko hlula xiyimo lexi, ndzi swi xiyile leswaku ndzi ta swi kota ku hlula ndzingo wun’wana ni wun’wana lowu nga ta ndzi wela enkarhini lowu taka naswona Yehovha, Yesu ni nhlangano wakwe va ta va na mina.”

17. Hi nga endla yini loko hi langutana ni swiphiqo leswi fanaka ni ntshava?

¹⁷ Xana u ni gome ro feriwa hi loyi u n’wi rhandzaka? Tinyike nkarhi wo tiyisa ripfumelo ra  wena ni ntshembo wa ku pfuxiwa ka vafi hi ku hlaya timhaka ta le Bibeleni leti vulavulaka hi vanhu lava pfuxiweke. Xana u ni gome hileswi un’wana ekaya a susiweke evandlheni? Tixavele nkarhi wo dyondza ni ku twisisa leswaku Yehovha u tshinya vanhu hi ndlela leyi va vuyerisaka. Loko u hlangana ni swiphiqo, swi pfumelele swi tiyisa ripfumelo ra wena. Phofulela Yehovha ta le mbilwini ya wena. U nga tihambanisi ni van’wana kambe tshama u ri ekusuhi ni vamakwerhu. (Swiv. 18:1) Hambiloko swiyimo swi tika, yana emahlweni u endla swilo leswi nga ta ku pfuna u kota ku tiyisela. (Ps. 126:5, 6) U nga tshiki ku va kona etinhlengeletanweni ta vandlha, ku va kona ensin’wini ni ku hlaya Bibele. Tshama u ri karhi u anakanyisisa hi mikateko yo tsakisa leyi Yehovha a nga ta ku nyika yona. Loko u vona ndlela leyi Yehovha a ku pfunaka hayona, ripfumelo ra wena ri ta ya ri tiya swinene.

18. U fanele u endla yini loko u vona onge ripfumelo ra wena ri tsanile?

¹⁸ Loko miringo leyi u langutaneke na yona yi kombisa leswaku ripfumelo ra wena ku ni laha ri nga tsana kona, u nga wi mapa. Swi teke tanihi nkarhi lowunene wo tiyisa ripfumelo ra wena. Khongela ku fana ni vaapostola va Yesu lava nga te: “Hi nyike ripfumelo leri engetelekeke.” (Luka 17:5) Nakambe tshama u ri karhi u anakanyisisa hi swikombiso leswi hi buleke ha swona eka nhlokomhaka leyi. Ku fana na Miguel na Yurai, mikarhi hinkwayo tsundzuka ndlela leyi Yehovha a ku pfuneke hayona. Ku fana ni ntombhi ya Vero na Anel, khongela hi mbilu hinkwayo loko u langutane ni maxangu. Nakambe ku fana na Geydi, tsundzuka leswaku Yehovha u ta ku pfuna hi ku tirhisa vandyangu ni vamakwerhu. Loko u pfumelela Yehovha a ku pfuna u tiyisela miringo sweswi, swi ta ku pfuna u n’wi tshemba hi ku helela leswaku enkarhini lowu taka u ta ku pfuna u yi hlula.

19. I yini leswi Yesu a a tiyiseka ha swona naswona swi nga ku pfuna njhani?

¹⁹ Yesu a nga banga mariri kambe u swi boxe hi ku kongoma swiyimo leswi vadyondzisiwa vakwe a va pfumala ripfumelo eka swona naswona a a nga kanakani leswaku Yehovha u ta va pfuna va kota ku tiyisela miringo enkarhini lowu taka. (Yoh. 14:1; 16:33) A a tshemba leswaku ripfumelo leri tiyeke ri ta pfuna ntshungu lowukulu leswaku wu pona nhlomulo lowukulu enkarhini lowu taka. (Nhlav. 7:9, 14) Xana u ta va un’wana wa lava nga ta pona? Hi musa lowu nga faneriwiki wa Yehovha, u ta swi kota loko u pfumelela miringo leyi u langutanaka na yona sweswi yi tiyisa ripfumelo ra wena!—Hev. 10:39.