1. Өзүмиздин қандақ соал сорап көрсәк болиду?

 СИЗ келәчәктә йүз беридиған ишлар, йәни ялған динниң йоқ қилиниши, Гог вә Магогниң һуҗуми вә Армагедон уруши һәққидә ойланғиниңизда ғәм-әндишигә чүшәмсиз? Шу ишлар йүз бәргәндә, өз-өзүңиздин: «Мән садақәтмәнлигимни сақлап қалалаймәнму?»— дәп ойлап баққанму? Әгәр шундақ ой-пикирдә болған болсиңиз, бу мақалиниң асасий айитидики Әйсаниң сөзлири ярдәм бериду. У шагиртлириға: «Көңлүңлар беарам болмисун. Худаға етиқат қилиңлар»,— дегән (Йоһ. 14:1). Күчлүк иман-етиқадимиз болса, кәлгүсидә мәйли қандақ ишлар йүз бәрсун, садақәтмәнлигимизни сақлап қалалаймиз.

2. Иман-етиқадимизни қандақ күчләндүрәләймиз? Бу мақалидә немиләрни муһакимә қилимиз?

² Кәлгүсидә дуч келидиған синақларда садақәтмәнлигимизни сақлап қелиш үчүн һазир иман-етиқадимизни қандақ күчәйтәләймиз? Һазир дуч кәлгән синақларға қандақ инкас қайтуруш һәққидә ойланғинимизда, қайси җәһәттин иман-етиқадимизни күчәйтишимиз керәклигини биләләймиз. Һәрбир синаққа бәрдашлиқ бәргәнсири иман-етиқадимиз барғансири күчийиду. Шундақ қилсақ, келәчәктики синақларға бәрдашлиқ берәләймиз. Бу мақалидә төвәндикиләрни муһакимә қилимиз. Авал, Әйсаниң шагиртлири қайси төрт вәзийәттә иман-етиқадини күчәйтиши керәк болған? Кейин, бүгүнки күндә биз охшап кетидиған қандақ синақларға дуч келимиз вә улар бизни кәлгүсидә йүз беридиған ишларға қандақ тәйярлайду?

3. Мәтта 6:30, 33-айәтләрдики Әйсаниң сөзлири ишәнч һәққидә немини чүшинишимизгә ярдәм бериду?

³ Адәттә аилидә әр киши аяли вә бала-чақилири үчүн йемәк-ичмәк, кийим-кечәк, турған җайни тәминләп бериши керәк. Һазирқи қийин күнләрдә буни қилиш асанға чүшмәйду.  Бәзи вәзийәтләрдә қериндашлар иш орнидин айрилип келип, һәрқанчә тиришсиму, йеңи иш орни тапалмай қалиду. Йәнә бәзиләр үчүн Худаниң өлчәмлиригә мас кәлмәйдиған иш орнини рәт қилишқа тоғра келиши мүмкин. Униңдәк барлиқ вәзийәтләрдә Йәһваниң аилимизниң еһтияҗлирини тәминләп беридиғанлиғиға толуқ ишинишимиз керәк. Әйса тағда тәлим бәргәндә, шагиртлириға буни ениқ ечип бәргән (Мәтта 6:30, 33ни оқуң). Биз Йәһваниң бизни ташлимайдиғанлиғиға пүтүнләй ишәнгәндә, пүтүн диққитимизни Худа Падишалиғини биринчи орунға қоюшқа қариталаймиз. Йәһва маддий еһтияҗлиримизға қандақ ярдәм бериватқанлиғини көргинимиздә, Униңға техиму йеқинлишип, ишәнчимиз техиму күчийиду.

4, 5. Бир аилиниң маддий еһтияҗлири һәққидики ғәм-әндишиләрни йеңишигә немә ярдәм бәргән?

⁴ Аилисиниң маддий еһтияҗлири һәққидә ғәм-әндишә қилған Венесуэладики бир аилигә Йәһваниң қандақ ярдәм бәргәнлигини көрүп бақайли. Илгири улар өз етизлиғида ишләп, еһтияҗлирини қамдиғидәк йетәрлик пул тапатти. Кейин бир топ қураллиқ кишиләр уларниң өйлирини тартивалған. Улар йәрлирини ташлап, көчүп кетишкә мәҗбур болған. Аилә беши Мигель мундақ дәйду: «Биз һазир иҗаригә алған бир кичик йәрни терип, җан бақимиз. Мән һәр күни әтигәндә бу күн үчүн еһтияҗлиримизни тәминләп беришни Йәһвадин өтүнүп дуа қилимән». Бу аилиниң турмуши қийин, бирақ улар өзлириниң маддий еһтияҗлирини асмандики меһир-шәпқәтлик Атисиниң тәминләп беридиғанлиғиға толуқ ишинип, җамаәт жиғилишлириға вә вәз хизмитигә давамлиқ қатнишип келиватиду. Улар һаятида Худа Падишалиғини биринчи орунға қоюватиду вә Худа уларниң еһтияҗлирини тәминләп бериватиду.

⁵ Әшу еғир күнләрдә Мигель вә униң аяли Юрай пүтүн диққитини Йәһваниң уларға қандақ ғәмхорлуқ қилидиғанлиғиға қаратқан. Йәһва етиқатчи қериндашларни ишлитип, уларниң маддий еһтияҗлирини тәминләп бәргән вә Мигельниң бир иш орнини тепишиға ярдәм бәргән. Башқа вақитларда Йәһва өз тәшкилати арқилиқ уларниң зөрүр еһтияҗлирини тәминләп бәргән. Нәтиҗидә, бу аилидики кишиләр өзлириниң ишәнчисиниң күчәйгәнлигини көрүп йәткән. Уларниң чоң қизи Йоселин шундақ дегән: «Йәһваниң бизгә қандақ ярдәм бәргәнлигини көрүш бизгә тәсәлли бериду. У мениң достум, мән Униң һәрдайим маңа ярдәм беридиғанлиғиға толуқ ишинимән. Биз баштин өткүзгән қийинчилиқлар бизни кәлгүсидә болидиған техиму еғир синақларға тәйярлиди».

6. Ихтисадий қийинчилиққа дуч кәлгәндә, ишәнчиңизни қандақ күчәйтәләйсиз?

⁶ Сиз, бәлким, қийинчилиқларға дуч келиватқансиз. Әгәр шундақ болса, ғәм-әндишә қилмай яшаш қийин. Бирақ шундақ қийин вәзийәтләрдә иман-етиқадиңизни күчәйтәләйсиз. Йәһва Худаға дуа қилип, Әйсаниң Мәтта 6:25—34 айәтләрдики сөзлирини оқуң вә уларниң үстидин чоңқур мулаһизә қилиң. Бүгүнки күнләрдә Худаға хизмәт қилиш билән бәнт болуватқан қериндашлар һәққидә ойлап беқиң. Йәһва уларниң еһтияҗлирини қандақ тәминләп бәргәнлиги һәққидики тәҗрибә-савақларни оқуп чиқиң (Кор. 1-х. 15:58). Шундақ қилиш  ишәнчиңизни күчәйтиду. Асмандики Атиңиз сизгә охшаш вәзийәттики кишиләргә қандақ ярдәм бәргән болса, сизгиму шундақ ярдәм бериду. У немигә еһтияҗлиқ екәнлигиңизни билиду. Шуларни қандақ тәминләп беришниму билиду. Һаятиңизда Йәһваниң ярдәм қолини көргәнсири ишәнчиңизму барғансири күчийиду вә келәчәктики техиму еғир синақларда садақәтмәнлигиңизни сақлап қалалайсиз (Һаб. 3:17, 18).

7. Мәтта 8:23—26 айәтләргә асасланғанда, күчлүк боран-чапқун шагиртларниң иманини қандақ синиған?

⁷ Әйса йүз бәргән вақиәдин пайдилинип, шагиртлириниң өз ишәнчисини күчәйтишниң зөрүрлигини көрүп йетишигә ярдәм бәргән (Мәтта 8:23—26ни оқуң). Боран-чапқун күчийип, долқунлири кемини суға тошқузғанда, Әйса тинч-хатирҗәм ухлавататти. Қорқуп кәткән шагиртлар уни ойғитип, униңдин өзлирини қутқузушни сориғанда, Әйса мулайимлиқ билән уларға нәсиһәт бәргән: «Немидин шунчилик қорқуп кәттиңлар, етиқади аҗизлар?» Қорқуп кәткән шагиртлар Йәһваниң Әйса вә униңға әгәшкәнләрни қоғдашқа қадир екәнлигини көрүп йетәлиши керәк еди. Буниңдин немини үгинәләймиз? Күчлүк иман-етиқат қаттиқ боран-чапқунға яки шундақ боран-чапқунға охшаш көрүнгән түрлүк қийинчилиқларға бәрдашлиқ беришимизгә ярдәм берәләйду.

8, 9. Анельниң ишәнчи қандақ синалди вә униңға немә ярдәм бәрди?

⁸ Пуэрто-Рикода яшайдиған техи той қилмиған Анель исимлиқ бир қериндашниң мисалини көрүп бақайли. У еғир синаққа бәрдашлиқ берип, иман-етиқади күчәйгән. У удул мәнадики қаттиқ ямғурлуқ қара боранға дуч кәлгән. 2017-жили Мария дәп аталған әшу қара боран униң өйини вәйран қилип, кейин у иш орнидинму айрилип қалған. Бу униң үчүн еғир бир синақ болған. Анель шундақ дәйду: «Әшу қийин күнләрдә, мән ғәм-әндишә қилишқа башлидим. Бирақ дуа арқилиқ Йәһваға тайинишни үгәндим вә ғәм-әндишиләрниң мени паләч һаләткә чүшүрүп қоюшиға йол бәрмидим».

⁹ Анель йәнә өзиниң бу синаққа бәрдашлиқ беришигә итаәтчанлиқниң ярдәм бәргәнлигини тилға елип шундақ дәйду: «Тәшкилатниң көрсәтмилиригә әгишиш көңүл хатирҗәмлигини сақлашқа ярдәм бәрди. Мән Йәһваниң етиқатчи қериндашларни ишлитип, роһий вә маддий җәһәттин ярдәм қолини сунғанлиғини көрдүм. Йәһва һәтта мән сориғандинму көпирәк маңа ярдәм бәрди. Нәтиҗидә иман-етиқадим техиму күчәйди».

10. Һаятиңизда «қаттиқ боран-чапқунға» дуч кәлгәндә, немә қилалайсиз?

¹⁰ Һаятиңизда «қаттиқ боран-чапқунға» дуч келиватамсиз? Мәсилән бир тәбиий апәт сәвәплик қийинчилиқ ичидә күн кәчүрүватамсиз? Яки еғир кесәл болуп көчмә мәнадики шу боран-чапқунда роһиңиз чүшүп, немә қилишни билмәйватамсиз? Бәзидә, бәлким, ғәм-қайғуға петип қалидиғансиз? Бирақ ғәм-қайғулириңизниң Йәһваға тайинишиңизға тосқунлуқ қилишиға йол бәрмәң. Сәмимий дуа арқилиқ униңға йеқинлишиң. Өтмүштә Йәһваниң сизгә бәргән ярдәмлири һәққидә пат-пат чоңқур ойлиниш  арқилиқ ишәнчиңизни күчәйтиң (Зәб. 77:11, 12). Шуниңға қәтъий ишиниңки, Йәһва сизни һазирму, келәчәктиму һәргиз ташлимайду.

11. Немә үчүн йетәкчиликни өз үстигә алғанларниң көрсәтмилиригә итаәтчанлиқ билән әгишишимиз керәк?

¹¹ Синақларға бәрдашлиқ беришимизгә йәнә немә ярдәм берәләйду? Анель тилға елип өткәндәк, итаәтчанлиқ ярдәм берәләйду. Йәһва Худа вә Әйса Мәсиһ ишәнгәнләргә ишинишни үгиниң. Бәзидә йетәкчиликни өз үстигә алғанларниң бәргән көрсәтмилири бизгә ғәлитә туюлуши мүмкин. Бирақ Йәһва итаәтчанлиқни бәрикәтләйду. Биз Муқәддәс китап вә Худаниң садақәтмән хизмәтчилириниң мисалидин итаәтчанлиқниң һаятни қутқузуп қалалайдиғанлиғини билимиз (Чиқ. 14:1—4; Тар. 2-яз. 20:17). Шундақ мисаллар һәққидә чоңқур ойлиниң. Шундақ қилиш һазир вә келәчәктә Йәһваниң тәшкилати бәргән көрсәтмиләргә әгишиш истигимизни күчәйтиду (Ибр. 13:17). Шундила пат арида худди қаттиқ боран-чапқунға охшаш келидиған чоң балаю-апәттин қорқмайсиз (Пәнд н. 3:25).

12. Адаләтсизликкә дуч кәлгәндә, Луқа 18:1—8 айәтләрдики сөзләр бизгә қандақ ярдәм бериду?

¹² Әйса шагиртлириниң адаләтсизликкә учрап, иман-етиқадиниң синилидиғанлиғини билгән. У шагиртлириға ярдәм бериш үчүн бир тәмсилни ишләткән. У адаләтсиз қазидин адаләтни яқлашни тәләп қилип ялвурған бир тул аялниң һекайисини ейтип бәргән. Тул аял тохтимай ялвуруп сориса, бу қазиниң ахири ярдәм беридиғанлиғиға ишәнгән. Ахирида қази аялниң ялвурушлириға қулақ салған. Әйса Мәсиһ Яратқучи Йәһваниң бу адаләтсиз қазиға охшимайдиғанлиғини көрситип, мону сөзләрни дегән: «Тәңри Өзигә кечә-күндүз ялвуруватқан таллиғанлири үчүн... адиллиқни тиклимәсму?» (Луқа 18:1—8ни оқуң) Кейинирәк йәнә шундақ дегән: «Инсан Оғли кәлгәндә, йәр йүзидә етиқатни тапаламду?» Биз адаләтсизликкә учрап, азап-оқубәт чәккәндә, сәвирчанлиқ көрситип, давамлиқ дуа қилиш арқилиқ әшу тул аялдәк күчлүк ишәнчимизниң барлиғини көрситишимиз керәк. Шундақ иман-етиқадимиз болса, Йәһваниң бизгә өз вақтида ярдәм қолини сунидиғанлиғидин гуманланмаймиз. Униңдин башқа, дуаниң күчигә ишинишимиз керәк. Бәзи чағларда дуалиримизға биз күтмигән йоллар билән җавапқа еришишимиз мүмкин.

13. Бир аилә адаләтсизликкә дуч кәлгәндә, дуа уларға қандақ ярдәм бәргән?

¹³ Конго дөлитидә яшайдиған Веро исимлик қериндашниң мисалини көрүп бақайли. Веро, Йәһва гувачиси әмәс йолдиши вә 15 яшлиқ қизи бир топ әскәрләрниң һуҗумиға учриғанда, өз йезисини ташлап қечип кетишкә мәҗбур болған. Улар қечип кетиватқанда, йол үстидә әскәрләр қурған тосаққа дуч кәлгән. Әскәрләр уларни өлтүрүветимиз дәп қорқутқан. Веро жиғлашқа башлиғанда, униң қизи Йәһваниң исмини тәкрар-тәкрар ишлитип, үнлүк дуа қилип, анисини жиғидин тохтитишқа урунған. Қизниң дуаси ахирлашқанда, әскәрләрниң башлиғи: «Қизчақ, ким саңа дуа қилишни үгәтти?»— дәп сориған. У җавап берип:  «Апам үгәткән. Бу Мәтта 6:9—13 айәтләрдики үлгилик дуаниң бир қисми»,— дәп җавап бәрди. Башлиқ шундақ дегән: «Қизчақ, ата-анаң билән тинч-аман кәт, Худайиңлар Йәһва силәрни қоғдисун».

14. Иман-етиқадимиз қандақ синилиши мүмкин вә бәрдашлиқ беришимизгә немә ярдәм бериду?

¹⁴ Шуниңдәк мисаллар бизгә дуаниң күчини һәргизму төвән чағлимаслиғимиз керәклигини үгитиду. Бирақ дуалириңизға дәрһал яки алаһидә йол билән җавап алалмисиңизчу? Худди Әйсаниң тәмсилидики тул аялдәк, дуа қилишни тохтатмаң. Худайимизниң бизни ташлимайдиғанлиғиға вә өз вақти-саати кәлгәндә, дуалиримизға қулақ салидиғанлиғиға қәтъий ишиниң. Муқәддәс роһини сорап, Йәһваға давамлиқ ялвуруң (Флп. 4:13). Шуни әстә сақлаңки, пат арида Йәһва сизни мол бәрикәтләйду. Илгирики барлиқ азап-оқубәтлириңизни унтуп кетисиз. Йәһваниң ярдими билән синақларға садақәтмәнлик билән бәрдашлиқ бәрсиңиз, иман-етиқадиңиз күчийип, келәчәктики синақларғиму бәрдашлиқ берәләйсиз (Пет. 1-х. 1:6, 7).

15. Мәтта 17:19, 20-айәтләрдә йезилғандәк, Әйсаниң шагиртлири қандақ қийинчилиқларға дуч кәлгән?

¹⁵ Әйса өз шагиртлириға ишәнч уларниң қийинчилиқларға тәқабил турушиға ярдәм беридиғанлиғини үгәткән (Мәтта 17:19, 20ни оқуң). Шагиртлар илгири җинларни қоғлап чиқиралиған еди. Амма бир вәзийәттә улар шундақ қилалмиған. Немә үчүн? Әйса чүшәндүрүп, уларниң күчлүк ишәнчкә егә болуши керәклигини ейтқан. У шагиртлириға йетәрлик ишәнчи болса, һәтта тағдәк қийинчилиқлар болсиму, уларға тәқабил туралайдиғанлиғини ейтқан. Бүгүнки күндә бизму худди тағлардәк чоң көрүнгән қийинчилиқларға дуч келишимиз мүмкин.

16. Йолдиши өлтүрүлгәндин кейин Гейдиниң иман-етиқади униңға қандақ ярдәм бәргән?

¹⁶ Гватемалида яшайдиған Гейди исимлиқ қериндишимизниң мисалини көрүп бақайли. Гейди йолдиши Еди билән җамаәт жиғилишидин өйигә қайтип кетиватқанда, Еди өлтүрүлгән еди. Әшу қайғу-аләмгә бәрдашлиқ беришкә Гейдиниң иман-етиқади қандақ ярдәм бәргән? У шундақ дәйду: «Дуа барлиқ жүкүмни Йәһваға ташлашқа ярдәм бериду. Шунда өзүмни тинч-хатирҗәм һис қилимән. Йәһваниң аиләмдикиләр вә җамаәттики достлирим арқилиқ маңа ғәмхорлуқ қилғанлиғини көрдүм. Йәһваға хизмәт қилиш билән бәнт болуш азап-оқубәтлиримни йениклитип, һәрбир күнүмни тинч-хатирҗәм өткүзүшүмгә ярдәм бериду. Әтиси үчүн артуқ ғәм-тәшвиш қилмаймән. Шунчә көп ишларни баштин өткүзгәндин кейин мән келәчәктә қандақ синаққа дуч келиштин қәтъийнәзәр, Йәһва Худа, Әйса Мәсиһ вә тәшкилатниң ярдими билән шу синаққа бәрдашлиқ берәләйдиғанлиғимни чүшәндим».

17. Тағдәк көрүнгән қийинчилиққа дуч кәлгәндә, немә қилалаймиз?

¹⁷ Йеқин кишиңизниң өлүми сизни қайғу-әләмгә селиватамду? Өлүмдин тирилдүрүлгәнләр һәққидики баянларни оқуш арқилиқ тирилиш үмүтигә болған иман-етиқадиңизни күчәйтиш үчүн вақит чиқириң. Аилиңиздики  бири җамаәттин чиқирилғач, азап-оқубәт чекиватамсиз? Худаниң әдәпләп-түзитиш йоли әң яхши екәнлигигә өзүңизни қайил қилиш үчүн тәтқиқ қилишни давамлаштуруң. Мәйли қандақ қийинчилиққа дуч кәлмәң, уни иман-етиқадиңизни күчәйтишниң бир пурсити дәп билиң. Ич-бағриңизни дуа арқилиқ Йәһваға төкүп бериң. Өзүңизни башқилардин қачурмай, қериндашлириңиз билән йеқин мунасивәтни сақлаң (Пәнд н. 18:1). Сизниң бәрдашлиқ беришиңизгә ярдәм беридиған ишларни қилиң. Һәтта шу ишлар сизгә илгири болған вақиәләрни есиңизгә селип қойсиму, уларни қилишни давамлаштуруң (Зәб. 126:5, 6). Яхши адәтлириңизни ташлимаң, мәсилән, җамаәт жиғилишлириға қатнишиң, вәз қилиң вә Муқәддәс китапни оқуң. Диққитиңизни Йәһваниң келәчәктә сизни ериштүридиған мол бәрикәтлиригә қаритиң. Йәһваниң сизгә қандақ ярдәм беридиғанлиғини көргиниңиздә, Униңға болған иман-етиқадиңиз техиму күчийиду.

18. Әгәр ишәнчиңизниң аҗиз екәнлигини байқисиңиз немә қилалайсиз?

¹⁸ Әгәр илгири яки һазир синақларда иман-етиқадиңизниң аҗиз екәнлигини байқисиңиз, үмүтсизлинип кәтмәң. Буни ишәнчиңизни күчәйтишниң бир пурсити дәп билиң. Әйсаниң әлчилири: «Ишәнчимизни күчәйткәйсиз»,— дегән. Сизму шулардәк илтиҗа қилиң (Луқа 17:5). Мошу мақалидә тилға алған қериндашлиримизниң мисаллири һәққидә чоңқур ойлиниң. Худди Мигель вә Юрайға охшаш Йәһваниң һәрдайим ярдәм беридиғанлиғини әстин чиқармаң. Болупму еғир қийинчилиқларға дуч кәлгәндә, Верониң қизи вә Анельға охшаш Йәһваға дуа қилишни давамлаштуруң. Гейдиға охшаш Йәһваниң аилә әзалири вә достлар арқилиқ керәклик ярдәмни тәминләп беридиғанлиғини унтумаң. Бүгүнки күндә дуч кәлгән синақларға бәрдашлиқ бериштә Йәһваниң ярдимигә таянсиңиз, келәчәктә дуч келидиған һәрқандақ синақларға бәрдашлиқ беришиңизгә Йәһваниң ярдәм қилидиғанлиғиға болған иман-етиқадиңиз техиму күчийиду.

19. Әйса немигә ишәнгән вә сиз немигә қәтъий ишәнч қилалайсиз?

¹⁹ Әйса өз шагиртлириниң иман-етиқадини қайси җәһәттә аҗиз екәнлигини көрсәткән. Бирақ у Йәһваниң ярдими билән шу шагиртлириниң келәчәктики һәрқандақ синақларға бәрдашлиқ берәләйдиғанлиғидин гуман қилмиған (Йоһ. 14:1; 16:33). Әйса зор бир топ халайиқниң күчлүк иман-етиқади сәвәплик йеқинлишип келиватқан дәһшәтлик балаю-апәттин аман-есән өтәләйдиғанлиғиға ишәнгән (Вәһ. 7:9, 14). Сиз әшу зор бир топ халайиқниң арисида боламсиз? Һазирниң өзидә Йәһваниң ярдими билән һәрбир пурсәттин пайдилинип, иман-етиқадиңизни күчәйтсиңиз, уларниң арисида болалайсиз (Ибр. 10:39).