1. Onọ vọ yen avwanre sa nọ oma rẹ avwanre?

WỌ RUẸ ẹnwan ọkievo siẹrẹ wo de roro kpahen obo re cha phia vwẹ obaro na, kerẹ oghwọrọ rẹ ẹga rẹ efian, ẹvwọsua rẹ Gọg ri Magọg, kugbe ofovwin rẹ Amagidọn? Wọ nọ oma wẹn jovwore nẹ, ‘Ọke yena de te, esegbuyota mẹ se sivwin uvwe rhọ vwẹ oke rẹ emu nana cha vwọ phia?’ Ọ da dianẹ onọ yena djẹ ruẹ ẹwẹn wẹn jovwore, eta ri Jesu nana re mu uyono rẹ avwanre nana kpahen na ra cha fuẹrẹn vwẹ uyono nana sa chọn wẹn uko. Jesu da ta kẹ idibo rọyen: “We jẹ udu bru ovwa-an. Ovwan vwo esegbuyota.” (Jọn 14:1) Esegbuyota rọ ganre cha chọn avwanre uko vwo hirharoku obaro na vẹ uduefiogbere.

2. Mavọ yen avwanre sa vwọ bọn esegbuyota rẹ avwanre gan, kẹ die yen a cha fuẹrẹn vwẹ uyono nana?

² Avwanre sa bọn esegbuyota rẹ avwanre gan kpahen obo re cha phia vwẹ obaro na enẹna, womarẹ a vwọ fuẹrẹn obo re ruẹ enẹna e de hirharoku edavwani. A da nabọ roro kpahen obo re ruẹ ọdavwani de te avwanre oma enẹna, ka sa mrẹ ẹdia sansan ro fori nẹ a wian phiyọ vwọ bọn esegbuyota rẹ avwanre gan. Re vwo chirakon rẹ edavwani yen, jẹ esegbuyota rẹ avwanre gan phiyọ. Ọnana cha chọn avwanre uko vwo chirakon rẹ edavwani re cha vwẹ obaro na. Vwẹ uyono nana, a cha fuẹrẹn ẹdia ẹne rẹ idibo ri Jesu hirharoku ro de fo nẹ ayen kpuriẹnphiyọ esegbuyota rayen. A je cha fuẹrẹn obo re se ru nonẹna ọ da dianẹ e hirharoku oka rẹ ẹdia tiọyena, vẹ oborẹ ayen se vwo muegbe rẹ avwanre hẹrhẹ obaro na.

3. Die yen eta rehẹ Matiu 6:30, 33 chọn avwanre uko vwo vwo ẹruọ rọyen?

³ Ọyen ọdavwẹ rẹ ọgbuyovwin rẹ orua rọ vwọ vwẹ oborẹ orua rọyen guọnọre vwọ kẹ ayen, kerẹ emu rẹ ayen cha re,  iwun rẹ ayen che kuphiyọ vẹ asan rẹ ayen cha dia. Ọ dia obo re lọhọre re vwo ru enana eje vwẹ akpọ ọgangan nana-a. Vwẹ ọkievo, iruo rẹ iniọvo rẹ avwanre evo ruẹ vẹ ayen abọ, efa davwẹngba vwọ guọnọ iruo jẹ ayen mrẹ ọvuọvo-o. Efa siẹn iruo evo kidie e dia iruo ri fo vwọ kẹ ọgọghẹnẹ ruyota-a. Vwẹ ẹdia nana eje, avwanre guọnọ esegbuyota rọ ghwotọ nẹ Jihova cha kẹ avwanre vẹ orua rẹ avwanre oborẹ avwanre guọnọre. Jesu dje ọnana fiotọ kẹ idibo rọyen vwẹ enu rẹ ugbenu na. (Se Matiu 6:30, 33.) Ọ da nabọ muẹ avwanre ẹro nẹ Jihova cha kẹ avwanre oborẹ avwanre guọnọre, kẹ avwanre se muomaphiyọ ẹga ri Jihova ọkieje. Avwanre da mrẹ oborẹ Jihova vwẹrote ọdavwẹ rẹ avwanre wan, ọnana cha nẹrhẹ avwanre sikẹrẹ phiyọ, esegbuyota rẹ avwanre kọ je cha gan phiyọ.

4-5. Die yen chọn orua ọvo uko ọke rẹ ayen vwọ ruẹ ẹnwan kidie nẹ ekuakua gan vwọ kẹ ayen?

⁴ Je yono kpahen oborẹ orua ọvo vwẹ Venezuela vwọ mrẹ ukẹcha ri Jihova vwẹ akpeyeren rayen, ọke rẹ ayen vwọ ruẹ ẹnwan kidie nẹ ekuakua gan kẹ ayen. Jovwo orua ri Castro nabọ mrẹ igho ro te ayen ghwọrọ kidie ayen ruẹ ẹghwa vwẹ otọ romobọ rayen. Ẹdẹ ọvo eshare evo vẹ ihwunu da vwọ tua ayen nẹ otọ na. Ọsẹ na re se Miguel da ta: “Enẹna omotọ ọvo rẹ avwanre yare kọyen avwanre de ruẹ ẹghwa. Me tuẹ ẹdẹ mẹ phiyọ kẹdẹkẹdẹ vẹ ẹrhovwo re me nẹ rhe Jihova nẹ ọ kẹ avwanre oborẹ avwanre guọnọre vwẹ ẹḍẹ yena.” Akpọ ghene gan kẹ orua nana, ẹkẹvuọvo kidie nẹ ayen vwo esegbuyota kpahen Jihova nẹ ọ cha vwẹrote ọdavwẹ rayen, orua ri Castro ki kpo uyono ọkieje ji vwobọ vwẹ iruo rẹ aghwoghwo na vọnvọn. Ayen phi Uvie na phiyọ ẹdia rẹsosuọ vwẹ akpeyeren rayen, Jihova da je kẹ ayen oborẹ ayen guọnọre.

⁵ Vwẹ ọke ọgangan nana eje na, Miguel vẹ aye rọyen Yurai vwẹroso Jihova nẹ ọ cha vwẹrote ọdavwẹ rayen. Ọkievo, Jihova womarẹ iniọvo na vwọ kẹ Miguel vẹ orua rọyen ekuakua evo rẹ ayen guọnọre je guọnọ iruo ro shephiyọ ro se ru. Vwẹ ọke efa, Jihova kẹ ayen oborẹ ayen guọnọre womarẹ ukẹcha rẹ oghọn ukoko na. Jihova gbobọnyẹ ayen kakaka-a. Ukuotọ rọyen esegbuyota rẹ orua na da rhoma re ganphiyọ. Ayen vwọ ta ota kpahen ẹdia sansan rẹ Jihova da vwẹrote ayen nu, ọmọtẹ rayen ọkpako Yoselin da ta: “Oborẹ Jihova vwẹrote ọdavwẹ rẹ avwanre wan ghini te avwanre ẹwẹn mamọ. Jihova ugbeyan mẹ, mi vwo imuẹro nẹ ọ cha vwẹrote ọdavwẹ mẹ ọkieje.” Ọ da je ta: “Ọdavwini nana rẹ orua rẹ avwanre hirharoku na muegbe rẹ avwanre hẹrhẹ edavwini efa re cha vwẹ obaro na.”

6. Mavọ wo se vwo ru esegbuyota wẹn ganphiyọ ọke rẹ wo de hirharoku uweren ọgangan?

⁶ Ekuakua gan kẹ wẹ? Ọ da dia ọtiọyen, kọyen ẹdia wẹn na lọhọre-e. Ẹkẹvuọvo o vwo oborẹ ẹdia wẹn na bra te-e, wọ sa reyọ ọke nana vwọ bọn esegbuyota wẹn ganphiyọ. Se eta ri Jesu rehẹ Matiu 6:25-34 wo ji roro kpahen ayen. Roro kpahen udje rẹ ihwo evo vwẹ ọke rẹ avwanre na ri djerephia  nẹ Jihova vwẹrote ihwo ri muomaphiyọ ẹga rọyen. (1 Kọr. 15:58) Wo de ru ọtiọyen ko che mu we ẹro nẹ kirobo rẹ Ọsẹ wẹn rọhẹ obodjuvwu vwẹrote ọdavwẹ rẹ iniọvo yena, ọtiọyen ọ je cha vwẹrote we. Ọ riẹn obo wọ guọnọre, ọ je riẹn idjerhe ro fori ro vwo ruo kẹ wẹ. Kọke kọke wo da mrẹ oborẹ Jihova chọn wẹn uko wan vwẹ akpeyeren re, esegbuyota wẹn kọ cha ganphiyọ rere wo se vwo chirakon rẹ edavwini efa vwẹ obaro na.—Hab. 3:17, 18.

7. Vwo nene obo rehẹ Matiu 8:23-26, mavọ yen “aphopho rode” vwọ davwen esegbuyota rẹ idibi ri Jesu ni?

⁷ Ọke aphopho rode vwo ke Jesu vẹ idibo rọyen phiyọ vwẹ urhie rode ọvo, Jesu da vwẹ uphẹn yena vwọ chọn idibo rọyen uko vwọ mrẹvughe nẹ ofori ayen vwọ kpuriẹnphiyọ esegbuyota rayen. (Se Matiu 8:23-26.) Aphopho na gan te asan rẹ ame kọ muavwan rua okọ rayen hepha na, vwẹ ọke yena Jesu jọ vwerhẹn. Ọke rẹ idibo rọyen rẹ oshọ muẹ vwọ ra rhọvwọn nẹ ọ rhe chọn ayen uko, Jesu da vwẹ ọkpọvi vwọ kẹ ayen: “Die ovwan vwọ djẹ oshọ, ovwan ri vwo esegbuyota tutuno na?” Idibo na rha sa riẹn jovwo nẹ Jihova vwo ẹgba rọ sa vwọ sẹrọ rẹ Jesu vẹ ihwo re vẹ ọyen gba herọ vrabọ rẹ imuoshọ. Die yen yono vwo nẹ ikuegbe nana rhe? Esegbuyota rọ nabọ ghwotọ sa chọn avwanre uko vwo chirakon rẹ ogiribo rode yẹrẹ edavwini ride re họhọ ogiribo rode.

8-9. Ọdavwini vọ yen Anel hirharoku, kẹ die chọrọn uko vwo chirakon?

⁸ Roro kpahen udje rẹ oniọvo aye Anel rọ je rọvwọ-ọn ro nẹ Puerto Rico rhe, esegbuyota rọyen rhe ghwotọphiyọ kidie nẹ o chirakon rẹ ọdavwini ọgangan. Ọdavwini rọyena dia aphopho rẹ udje ghevweghe-e. Ọdavwini na tonphiyọ vwẹ ukpe rẹ 2017 rẹ ogiribo ọgangan ọvo vwọ ghwọrọ ekuakua re yeren rọyen ejobi. Fikirẹ oghwọrọ nana, iruo rọyen da vabọ. Oniọvo Anel da ta: “Vwẹ ọke ọgangan nana eje, ẹwẹn mẹ hra totọ, ẹkẹvuọvo me davwẹngba vwọ vwẹroso Jihova womarẹ ẹrhovwo ẹnẹ, mi vwẹ uphẹn kẹ ẹnwan na nẹ o mu vwe rọ-ọ.”

⁹ Anel ji djunute emu ọfa rọ chọrọn uko vwo chirakon rẹ ebẹnbẹn rọyen na—ẹmienyo. Ọ da ta: “Ẹwẹn mẹ totọ kidie me yan nene odjekẹ rẹ ukoko ri Jihova. Me mrẹ ukẹcha ri Jihova womarẹ uchebro rẹ iniọvo na vwọ kẹ vwẹ vẹ emuọre rẹ iniọvo na ji mu rhe vwe.” Ọ da je ta: “Jihova tobọ kẹ vwẹ vrẹ obo me nọ mie dede, ọna ghene bọn esegbuyota mẹ gan dẹn.”

10. Die wo se ru ọ da dianẹ wo hirharoku ebẹnbẹn re họhọ “aphohpo ọgangan”?

¹⁰ Wo hirharokuẹ “aphopho ọgangan” vwẹ akpeyeren wẹn? Ọ sa dia uweren ọgangan fikirẹ oghwọrọ ri kpregede rọ phiare. Yẹrẹ ọ sa dia ebẹnbẹn rẹ akpeyeren, kerẹ jẹ omakpokpọ e vwo rọ nẹrhẹ wo she ọkuọrọn, wọ rha riẹn obo wo che ru-u. Ọ je sa dianẹ wọ ruẹ ẹnwan ọkievo, ẹkẹvuọvo wo jẹ ẹnwan da wẹ obọ jẹ wo vwo jẹ ẹroẹvwọsuọ Jihova-a. Sikẹrẹ womarẹ  ẹrhovwo ẹnẹ. Bọn esegbuyota wẹn gan womarẹ wo vwo roro kpahen oborẹ Jihova vwọ vwẹ ukẹcha kẹ wẹ wanre. (Une 77:11, 12) Jo muwẹro nẹ Jihova cha sa kpairoro vrẹ wẹn bẹdẹ bẹdẹ-ẹ.

11. Diesorọ o vwo fo nẹ a kerhọ rẹ ihwo ri muẹ usiokọ uwian vwẹ ukoko na?

¹¹ Die ọfa yen sa chọn wẹ uko vwo chirakon rẹ edavwini? Kirobo rẹ Anel tare, ẹmienyo sa chọn wẹ uko. Davwẹngba wọ vwẹrọso iniọvo na rẹ Jihova vẹ Jesu vwẹroso na. Ọkiọvo ihwo re vwo mu nẹ e vwẹrote ukoko na sa vwẹ odjekẹ evo vwọ phia ri se che shephiyọ vwẹ ẹro rẹ avwanre-e. Ẹkẹvuọvo, Jihova brẹba kẹ ihwo ri nyẹme. Avwanre riẹn ọnana kidie oborẹ Baibol na vuẹ avwanre vẹ oborẹ idibo rẹ Ọghẹnẹ ri fuevun rhiẹromrẹ djerephia nẹ ẹmienyo sivwin arhọ. (Ẹyan. 14:1-4; 2  Ikun 20:17) Roro kpahen idje tiọyena. Wo da ru ọtiọyen kọ cha nẹrhẹ wọ vwẹroso odjekẹ rẹ ukoko ri Jihova eje enẹna kugbe ọke rọ cha vwẹ obaro na. (Hib. 13:17) Ọtiọyena oshọ re che mu we vwẹ ọke rẹ ukpokpogho rode na-a.—Isẹ 3:25.

12. Mavọ yen Luk 18:1-8 vwo churhu esegbuyota vwo si e vwo chirakọn rẹ orhiẹn ehuhu?

¹² Jesu riẹnre nẹ ihwo de brorhiẹn ehuhu hwe idibo rọyen, ọnana cha davwen esegbuyota rayen ni. Rere ayen se vwo chirakon rẹ ọnana, Jesu de dje udje ọvo ra niyẹnrẹn rọyen phiyọ ọbe ri Luk. Jesu gbe ikun rẹ ayeuku ọvo rọ rẹ oguẹdjọ ro brorhẹn rẹ ehuhu rere o se vwọ brorhiẹn-abavo vwọ kẹ. Ọ riẹnre nẹ ọyen da rẹ ọkieje o che brorhiẹn rẹ abavo kọyen. Ukuotọ rọyen oguẹdjọ na de ghini ru obo rọ guọnọ na vwọ kẹ. Die yen avwanre yono vwo no rhe? Jihova dia ohwo ro brorhiẹn rẹ ehuhu-u. Jesu da ta: “Kẹ Ọghẹnẹ rha chọ oja rẹ ihwo rọ sanọ reyọ, ri kperẹ se te ason te uvo-o?” (Se Luk 18:1-8.) Jesu da je ta: “Ọmọ rẹ ohwo da rhe, kọ sa mrẹ esegbuyota vwẹ akpọ?” Avwanre de hirharokuẹ orhiẹn rẹ ehuhu, o fori nẹ avwanre djephia womarẹ akoechiro rẹ avwanre nẹ avwanre vwo esegbuyota kerẹ ayeuku yena. Vẹ esegbuyota tiọyena ke che vwo imuẹro nẹ kẹrẹkpẹ Jihova cha chọn avwanre uko. Ofori nẹ e ji vwo imuẹro nẹ ẹrhovwo ẹnẹ je sa chọn avwanre uko. Ọkiọvo Jihova sa kpahen phiyọ ẹrhovwo rẹ avwanre vwẹ idjerhe re rhẹro rọye-en.

13. Mavọ yen ẹrhovwo vwọ chọn orua ọvo re shenyẹ uko?

¹³ Roro kpahen udje rẹ oniọvo aye ọvo re se Vero, rọ dia Democratic Republic of the Congo. Vero vẹ ọshare rọyen rọ dia oseri ri Jihova-a kugbe ọmọtẹ rayen rọhẹ ẹgbukpe 15 da djẹ nẹ ọko rayen ọke rẹ ẹko rẹ isodje evo vwọ rhe re vwọ so ihwo rẹ ọko na. Ayen vwọ yanran vwẹ idjerhe, ayen da mrẹ ẹko rẹ isodje efa ri mudia idjerhe, ẹko rẹ isodje na da djẹ uguegue muẹ ayen nẹ ayen che hwe ayen. Vero vwọ viẹ re, ọmọ rọyen da vwẹ uchebro vwọ kẹ womarẹ ẹrhovwo rọ nẹ phia gorigori jẹ ọ vwanriẹn odẹ ri Jihova vwẹ ẹrhovwo na. O vwo kuẹ  ẹrhovwo na phiyotọ nu onini rẹ isodje na da nọ, “Ọmọtẹ na, ono yen yono uwe obo ra nẹrhovwo?” Ọ da vuẹ nẹ “Oni mẹ yen yono uvwe, kidie ọ ruẹ nene ẹrhovwo rẹ udje rọhẹ Matiu 6:9-13.” Onini rẹ isodje na da ta: “Mọtẹ wẹ vẹ ọsẹ vẹ oni wẹn sa yanran vwọ rẹ ufuoma, e jẹ Ọghẹnẹ wẹn Jihova sẹro wẹn.”

14. Die yen sa davwen esegbuyota rẹ avwanre ni, kidie yen cha chọn avwanre uko vwo chirakon?

¹⁴ Ikuegbe yena yono avwanre nẹ a vwẹ ẹro okueku vwo nẹ ẹgba rẹ ẹrhovwo-o. Ẹkẹvuọvo, ọ da ra dianẹ a fobọ kpahenphiyọ ẹrhovwo na-a vwo, yẹrẹ a kpahenphiyọ vwẹ idjerhe rẹ igbevwunu-u vwo? Kerẹ ayeuku rẹ Jesu ta ota kpahen na, nẹrhovwo ọkieje, jo ji muwẹro nẹ Ọghẹnẹ cha sa kpairoro vrẹ wẹ-ẹn, je riẹn nẹ ọke vwọ yanran na ọ cha kpahenphiyọ ẹrhovwo wẹn na ẹdẹ ọvo vwẹ idjerhe wo rhẹro rọye-en. Nẹrhovwo vwọ yare ẹwẹn ọfuanfon ri Jihova ọkieje. (Fil. 4:13) Karophiyọ nẹ ọmọke yen chekọ Jihova ko che bruba kẹ wẹ rhi te ọke rẹ oja wọ rere obuko vwọ chọrọ owẹ ẹro. Wo vwo chirakon rẹ edavwini nana eje womarẹ ukẹcha ri Jihova yen, ki che muegbe wẹn hẹrhẹ obo re cha vwẹ obaro na.—1 Pita 1:6, 7. 

15. Kirobo rehẹ Matiu 17:19, 20, ebẹnbẹn vọ yen idibo ri Jesu hirharoku?

¹⁵ Jesu yono idibo rọyen nẹ esegbuyota cha chọn ayen uko vwo phi ebẹnbẹn kparobọ. (Se Matiu 17:19, 20.) O vwo ọkiọvo rẹ idibo royen sa djẹ ẹwẹn ogbegbe nẹ oma rẹ ohwo-o dedenẹ ayen ke ru ọtiọyen jovwo re. Die yen sorọ ayen rhe se ruo udje na-a? Jesu da tanẹ, ayen guọnọ esegbuyota rọ ganre. Ọ da je vuẹ ayen nẹ ayen de vwo esegbuyota rọ ganre kẹ ayen se phi ebẹnbẹn re họhọ igbenu ride kparobọ. Nonẹna avwanre ji se hirharoku ebẹnbẹn evo re gan te ẹdia avwanre de roro nẹ e che se yerin ghene aye-en.

16. Mavọ yen esegbuyota vwọ chọn Geydi uko vwo chirakon ọke re vwo hwe ọshare royen?

¹⁶ Roro kpahen udje rẹ oniọvo aye ọvo re se Geydi ro nẹ Guatemala rhe. E hwẹ ọshare rọyen re se Edi ọke rẹ ayen vwo nẹ uyono kpo. Mavọ yen esegbuyota rẹ Geydi vwọ chọn uko vwẹ ọke ọgangan nana? Ọ da ta: “Ẹrhovwo chọn vwẹ uko vwo mu oghwa mẹ kẹ Jihova, ọ da nẹrhẹ ẹwẹn mẹ totọ. Me mrẹ ukẹcha ri Jihova womarẹ igbeyen mẹ vẹ iniọvo rehẹ ukoko na. Kidie nẹ mi muomaphiyọ iruo rẹ ẹga ri Jihova me rha karophiyọ ọmiavwẹ na gan nọ-ọ, ọ rẹ ukpẹdẹ kọyen mi sivwẹn, me rha ruẹ ẹnwan gan nọ kpahen odẹ rọ cha-a. Mi vwo rhiẹromrẹ ebẹnbẹn nana eje nu na, ki mi rhi vwo imuẹro nẹ o vwo obo rọ gan te-e mi de hirharoku ebẹbẹn ọfa vwẹ obaro na, mi se phikparobọ womarẹ ukẹcha ri Jihova, Jesu kugbe iniọvo na.”

17. Die yen avwanre se ru ọ da dianẹ e hirharokuẹ ebẹnbẹn re pha kerẹ igbenu ride?

¹⁷ O vwo ohwo ru wo vwo ẹguọnọ kpahen ro ghwuru ru vwo vwerhe? Ghwọrọ ọke vwo yono kpahen iphiẹrophiyọ rẹ  ẹrhọvwọn nushi na womarẹ wo vwo se kpahen ikuegbe ri ihwo ra rhọvwọn nushi vwẹ Baibol na. Wo muomaphiyọ kidie nẹ a djẹ ohwo orua wẹn ọvo nẹ ukuko? Yono rere wọ vwọ riẹn nẹ ọghwọku ri Jihova yen me yovwin. Mrẹ kebẹnbẹn kebẹnbẹn wo hirharokuẹ kerẹ uphẹn wọ vwọ bọn esegbuyota wẹn gan. Vuẹ Jihova kpahen ẹdia wẹn na vwẹ ẹrhovwo. Wo sioma nẹ iniọvo na-a, ukperẹ ọtiọyen kuomagbe ayen ọkieje. (Isẹ 18:1) Vwobọ vwẹ irueru evo re cha chọn wẹ uko vwo chirakon, ọ da tobọ dianẹ wọ je karọphiyọ obo re phiare na ọkievo. (Une 126:5, 6) Re vwobọ vwẹ irueru nana ọkieje kirobo wo ruẹ jovwo uyono ẹra, iruo aghwoghwo na, vẹ isese ri Baibol romobọ. Je tẹnrovi ebruphiyọ buebun rẹ Jihova cha vwọ kẹ wẹ vwẹ obaro na. Wọ vwọ tẹnroviẹ oborẹ Jihova chọn wẹ uko wan yen je esegbuyota wẹn kpahọn ganphiyọ.

18. Wo de noso nẹ esegbuyota wẹn ra gan kirobo ri jovwo-o, die yen ofori nẹ wo ru?

¹⁸ Ọ da dianẹ esegbuyota wẹ ra ga-an fikirẹ ebẹnbẹn evo wo hirharoku wanre vẹ e ri wo hirharokuẹ enẹna, wo jẹ ofu dje we-e. Mrẹ ọnana kerẹ uphẹn ru wọ vwọ bọn esegbuyota wẹ gan. Yare oka rẹ oyare rẹ iyinkọn ri Jesu yare, rayen vwọ ta: “Ru esegbuyota rẹ avwanre bu.” (Luk 17:5) Vwọba, roro kpahen udje ri ihwo re yono kpahen vwẹ uyono nana. Kerẹ Miguel vẹ Yurai, karophiyọ ọke sansan rẹ Jihova vwọ chọn wẹ uko re. Kerẹ ọmọ ri Vero vẹ Anel, nẹrhovwo rhe Jihova ọkieje, marho kẹ ọke wo de hirharoku ebẹnbẹn. Kerẹ Geydi wọ me riẹn nẹ Jihova cha chọn wẹ uko womarẹ ihwo orua yẹrẹ igbeyan wẹn. Wọ da vwẹ uphẹn kẹ Jihova nẹ ọ chọn wẹ uko vwo phi ebẹnbẹn wo hirharokuẹ enẹna kparobọ, gbe jẹ o mu uwe ẹro nẹ ọ je cha chọn wẹ uko vwo phi ebẹnbẹn efa re cha vwẹ obaro na kparobọ.

19. Imuẹro vọ yen Jesu vwori, kẹ imuẹro vọ wo se vwo?

¹⁹ Jesu vuẹ idibo rọyen asan rẹ ayen de shekpotọ vwẹ esegbuyota rẹ ayen, ẹkẹvuọvo ọ riẹnre nẹ ayen da vwẹroso Jihova ayen che phi edavwini rẹ ayen che hirharoku vwẹ obaro na kparobọ. (Jọn 14:1; 16:33) O ji vwo imuẹro nẹ esegbuyota rọ ganre cha chọn otu gbidigbidi uko vwo sivwin rhọ vwẹ ukpokpogho rode rọ cha na. (Ẹvwọ. 7:9, 14) Wọ cha dia usun rẹ ihwo na? Womarẹ aruesiri ri Jihova, wọ sa dia usun rẹ ayen ọ da dianẹ wọ rẹyọ kuphẹn kuphẹn ro rhiephiyọ vwọ bọn esegbuyota wẹn gan.—Hib. 10:39.