1. Nikoho heeni apaale nikhanlaahu oowiikoha?

VAAVO nyuwo munuupuwelaanyu itthu sineera sikhumelele muhoolo, ntoko: Onyaanyiwa wa ittiini soowootha, otuphela wa Gogi a Magogi ni ekhotto ya Harmagedoni—pooti weera nyuwo munnaxupeya. Muniikoha há: ‘Keereke miyo kinooweera okhala oororomeleya ehuhu ene yeeyo?’ Wakhala weera munuupuwela hiiho, masu Yesu alenlaawe ooxuttera awe, yaawo ari muru wa mwaha wa yoosomaahu ela, animookhaviherani. Yesu alenle ooxutteraawe há: “Murim’anyu ohituthuwe. Mukhaleno nroromelo.” (Yoh. 14:1) Nroromelo nahu nalipa, nnoowera oviriha maxupo muhoolo ni nroromelo.

2. Moota heeni nneerahu nlipihe nroromelo nahu ni eheeni ninkelaahu woona mwa yoosomeene yeela?

² Etthu eneera elipihe nroromelo nahu, weera niweere ovilela maxupo eneera ekhumelele muhoolo, ori moota nnoonelaahu, sooweereriwa olelo va. Vaavo nnuupuwelaahu moota nnoonelaahu naakumanakano sooweereriwa olelo va, ninnawera woonelela weera ninnatthuneya olipiha nroromelo nahu. Ihuhu sintxipale ninkumanaahuno sooweereriwa, nroromelo nahu ninnalipa, eyo enoorowa onikhavihera ovilela sooweereriwa sineera sikhumelele muhoolo. Mwa yoosomeene yeela, nnoorowa othokorora itthu ixexe seiyo atthareli a Yesu yaavirinhaaya ni moota yoonihenraaya weera yannatthuneya waatxeerera nroromelo naya. Naavinyaka nnimoona moota nneeraahu niviriheke itthu soolikana olelo va ni moota iyo sineeraaya sinreherere ni itthu sineera sinikhumelele muhoolo.

3. Ntoko elempwalaaya va Matheyo 6:30, 33, epontu heeni Yesu iiwanyeihalaawe voohima sa nroromelo?

³ Ti vootthuneya weera muhooleli a etthoko awaasereke amwaariye ni anamwane awe yootxa ni nipuro nookhala, mene ehuhu  ela ninkhalaahu khaiyene ti yookhweya. Mwa makhalelo makina, asinna akina aayeleela muteko aya ni anniilipihera weera ephwanye muteko munyowani. Asinna akina aahiya miteko saya seiyo sihinvarihana ni makhalelo a makristu. Itthu soothesene iya nintthuneya okhalano nroromelo noolipa weera Yehova onoorowa onivaha itthu sootthuneya weera nivirelele okhala akumi veemusini vahu. Yesu aahaalaihera eyo atthareli awe va mwaha aapankaawe vamwaako. (Mmusome Matheyo 6:30, 33.) Vaavo ninroromelaahu weera Yehova khanrowa onnyanyala, ninnahela mwiitti itthu sootthuneya—sa muteko wa Omwene. Vaavo nnoonaahu weera Yehova onnanikosoopa mmakhaleloni a weerutthuni, nroromelo nahu ninnavirelela olipa.

4-5. Yaakhaviherinwe nnaani emusi emoha vaavo yaathoiwaaya yootxa?

⁴ Moone moota Yehova akhavihenraawe emusi emoha oVenezuela, yeeyo yaaviriha maxupo oothowa yootxa. Emusi ya Castro yaawera ophwanya yootxa mwaha wa nipuro nikhaanene yaalimaayavo. Yaaphiya anasusuki ni ikaphwitthi saya ewaakha emattaaya ele ni ikuru ewiikara nipuro nne. Apapaya anithaniwa Miguel yenre: “Olelo nimphwanya yootxa mwaha wa ematta ekhaanene noolihinwaahu. Miyo kimpatxera onvekela Yehova weera akivahe yootxa ya nihuku ti nihuku.” Ekumi eri yooxupa wa emusi ene yeela, mene awo annaroromela weera Tiithi ahu ansivelo onimwaakhavihera. Mwaha wa etthu eyo, khantxompela woonela mithukumano ni mmutekoni woolaleera. Awo annahela Omwene wa Muluku nipuro noopatxera mweekumi mwaya ni Yehova onnaavaha itthu soothesene anhawelaaya.

⁵ Mpuwa mwa ehuhu ele yooxupa, Miguel ni amwariye Yurai, annoona moota Yehova onakosoopaawe. Emara ekina, Yehova onnaavarela muteko asinna a mmulokoni weera yaavahe itthu sinaathowa amusi awe Miguel naari annamwaasera miteko mikhanene weera avareke. Ikwaha ikina annakhaviheriwa ni ekomissau enaakhavihera atthu oothoiwa yeeyo empakiwa ni eFiliyaale. Yehova khananyanyale emusi ya Castro etthu enkhumelela ti yooweera, nroromelo na emusi ya Castro, ninnavirelela olipa. Yuulumaka sa moota Yehova akhavihenraawe. Mwana mwamuthiyana a emusi ene yeela, oneeriwa Yoselin ohimme há: “Tivoohakalaliha woona ntata na Yehova. Miyo koosuwela weera owo nthamwene aka ni nkinhovela weera owo oonookikhavihera.” Owo oonnaatxeerera: “Sooweerera ninkumanahuno olelo va, initxentxeriha weera niwere ovilela maxupo nirowahu okumanano muhoolo.”

6. Nyuwo munkela olipiha hayi nroromelo nanyu mwaavirihaka maxupo oothowa musurukhu?

⁶ Neereke nyuwo munviriha maxupo oothowa musurukhu? Moohihovela ehuhu eyo khaiyene ti yookhweya, nnaamweera makhalelo anyu ereene ooxupa muttottele mureerelo ehuhu eyo, weera mulipihe nroromelo nanyu. Munvekeleke Yehova ni musomeke masu a Yesu alempwale va Matheyo 6:25-34 ni muupuweleleke masu ene yaawo. Muupuwele matakihero avaanaano, yaawo anoonihera weera Yehova onaakosoopa yaale aninvarela muteko. (1 Akor. 15:58) Eyo enoolipiha nroromelo nanyu. Ntoko hiihaale  aTithihu a wiirimu yakhavihenraaya atthu yaaviriha maxupo oothowa musurukhu, awo-tho, animookhaviherani. Yehova oosuwela etthu munhawelaanyu ni oosuwela moota woowookosopani. Woona moota Yehova onookhaviheraaweni mweekumini mwanyu, eyo enoolipiha nroromelo nanyu ni enimontxentxerihani ni sooweha munrowaanyu okumanakano muhoolo.—Aheb. 3:17, 18.

7. Moovarihana ni Matheyo 8:23-26, moota heeni epheyo yeerenraaya “nroromelo naatthareli?”

⁷ Vaavo Yesu ni atthareli awe yeettaaya ekwaha, yaawela nikula mootutuxera, yahaaphwanya epheyo etokotoko. Yesu aavarela muteko yooweereya eyo, weera aakhavihere oohuseraawe weera yannatthuneya waatxeerera nroromelo naya. (Mmusome Matheyo 8:23-26.) Epheyo eyo, yaavirelela wuupa ni mutekuteku wannamana nikula ni munikulani yaapatxera osareyamo maahi, mene Yesu aavirelela okona moohixupeya. Atthareli yaaripiwa murima ni yaavinya enanvekela Yesu weera aavuluxe. Yesu aavinya ni aaweerela: “Munatuthuwela-ní nyuwo òwiwelela tontó?” Atthareli ale yanwera osuwela weera Yehova amwavuluxa mookhweya, amunvuluxa Yesu ni ale yaari ni yoowo. Munnawera woona etthu ninxutteraahu? Nroromelo noolipa ninnanikhavihera, oviriha maxupo mweekumini mwahu yaawo ankhala ntoko epheyo etokotoko.

8-9. Yooweerera heeni murokora Anel akumannaaweno ni eheeni yamukhavihenre?

⁸ Moone etthu yeereñye ni Anel, murokora mmoha muttiye okhala oPorto Rico. Yaamweerela etthu yeeyo yalipinhe nroromelo nawe, etthu yeereñye yaari “epheyo etokotoko” itthu soothesene sapatxenre eyaakha ya 2017, vaavo sikoloni oneeriwa Maria anyanyaawe empa ya Anel. Mene-tho mwaha wa epheyo, murokora Anel ayeleela muteko awe. Owo onnathaliha: “Mpuwa mwa ehuhu ele yooxupa, miyo nkaaxupeya mene kaaxuttera omuroromela Yehova kinvekelaka ni kihaakhulelaka weera maxupo ale eripihe murimaka.”

⁹ Murokora Anel onuupuwela etthu yaamukhavihenre ovilela ehuhu ele—yooxupa, waari wiiwelela. Owo onthaliha-tho ha: “Wiiwelela miruku sa Mareherero a Yehova waakikhavihera okhala oomaaleleya. Miyo kaahoona ntata na Yehova moorweela mwa asinna yaawo yaakilipiha ekivahaka itthu soothesene kahawelaaka weera kikhale mukumi.” Owo onnaatxeerera: “Yehova aakivaha itthu opwaha iye keeraka kiveke. Ni etthu eyo, yaalipiha nroromelo naka.”

10. Munaapake eheeni wakhala weera munviriha maxupo a “epheyo etokotoko”?

¹⁰ Neereke nyuwo munviriha maxupo a epheyo etokotoko? Pooti weera nyuwo moohaawa mwaha wa erisa yeephattu naari pooti weera nyuwo mookhulumuwa muhisuwelaka etthu yoopaka mwaha wa eretta yootepa yoophwannyeni! Emaara ekina pooti okhala ooxupeya. Mene muhaakhulele itthu iyo sinanarihaka nroromelo nanyu wa Yehova. Munvekeleke Yehova ni murima wootheene. Mulipihe nroromelo nanyu, muupuweleke itthu soothesene Yehova opankaawe weera ookhavihereni khalayeene. (Nsal. 77:11, 12) Muroromeleke weera khankela woonyanyalani—okhuma vaanano vaava, mpakano muhoolo.

11. Mwaha wa heeni nintthuneyaahu owiiwelela ale annihoolela?

 ¹¹ Etthu heeni enrowa onikhavihera ovilela naakumanakano sooweerera? Moota heeni ntakihero na murokora Anel, nnoonihenraaya weera onnatthuneya wiiwelela? Oxuttera omuroromela Yehova ni ale owo ni Yesu anaaroromelaaya. Ikwaha ikina alopwana awo athanliwe pooti ovaha miruku seiyo hiyo nnoonaahu ohivareleya muteko, mene Yehova onnaareeliha atthu oowiiwelela. Moorweela mBiblyani ni sooweereya sa mweekumini sa arumeyi oororomeleya, ninnaxuttera weera wiiwelela onnavuluxa ikumi. (Ott. 14:1-4; 2 Sow. 20:17) Muupuweleke matakihero ene yaawo. Mwapaka eyo, munoorowa waatxeerera ovirelela wanyu otthara miruku sa mareherero a Yehova sa vaanano ni sa muhoolo. (Aheb. 13:17) Nyuwo-tho, munoolipa murima weera nvirihe maxupo matokweene opwaha maxupo ootheene anaattamela.—Mir. 3:25.

12. Ntoko niphwanaphwaniho nri va Luka 18:1-8, ninnikhavihera hayi woona ovirikana okhanle eriyari ya nroromelo ni ovilela ohixariya?

¹² Yesu aasuwela weera ohixariya wa elapo ela, waamweerera nroromelo naatthareli awe. Weera aakhavihere ovilela, Yesu aahaapakela niphwanaphwaniho ninphwanyaahu nri ebuukhu ya Luka. Vawo Yesu onnathaliha yooweereya ya naamukhweli yoowo aamunyeserera mphuki weera amoonihere exariya. Owo annaroromela weera wakhala weera amunyeserera mphuki ole aakela omwiiwa, ni etthu eyo, yaaheereya. Vanooneya weera Yehova khahiyono mphuki oohixariya ntoko ole ohimmwale muniphwanaphwanihoni. Mpaka Yesu aahima masu ala: “Muluku apale khàthorihela atthu awe òthanliwa anamukhuwelela othana ni ohiyo?” (Mmusome Luka 18:1-8.) Ni Yesu aahaatxeerera-tho: “Nto mwana a mutthu arwaka nlelo anaphwanye wiiwelela mwelaponi mumu?” Ninxuttera eheeni? Vaavo nihawaahu mwaha wa ohixariya, nintthuneya okhalano nroromelo noolipa ntoko na naamukhweli ole. Nroromeleke nipixaka murima ni nivilelaka. Nroromelo nno nnonikhavihera ororomela weera Yehova onoopaka etthu weera anikhavihere, nave nintthuneya ororomela owera wa nivekelo. Emaara ekina mavekelo ahu, pooti waakhuliwa mwa ehuhu nahawehereraahu.

13. Moota heeni nivekelo nakhavihenraaya emusi emoha yeeyo yaathokororiwa moohixariya?

¹³ Moone ntakihero nimoha na murokora yoowo oneeriwa Vero yoowo onkhala oRepública Democrática do Congo. Vero ni aiyawe vamoha ni mwanawe a iyaakha 15, yaatthawa muttetthe yaakhalaaya mwaha wooweera waarootupheliwa naatropa. Yeettaka hiihaale mpironi, awo yaaheemexiwa ni egrupu emoha ya anakhotto yaawo yaawoopopinhe weera yanwiiva. Vero aapatxera winla ni mwanawe aaheerera ommaliha apakaka nivekelo moowiiwanyeya ni avarelaka muteko ikwaha sintxipale nsina na Yehova. Amalihakaru opaka nivekelo nne, komantante aatropa ale, aamukoha eeraka: “Mwaamwali, ooxuttihe ovekela taani?” Owo aahaakhula: “Ameyaka akixuttinhe ovekela evarelaka muteko ele emphwanyeya va ebuukhu ya Matheyo 6:9-13.” Komantante aahima: “Mwaamwali, oroweke ni  murettele ni asititha, Yehova Muluku a, ookosoope weyo!”

14. Eheeni eneera yeerere nroromelo nahu ni eheeni enkela onikhavihera ovilela?

¹⁴ Sooweereya ntoko iya, sinnanixuttiha otthuneya waya opaka nivekelo. Ankha Wakhala weera mavekelo anyu annapisa waakhuliwa naari mwa moota nyuwo mwahawehereraanyu? Ntoko ntakihero na naamwikhweli, nihimmwale ni Yesu, munyeserereke ovekela. Muroromeleke weera Yehova khankela woonyanyalani, owo onimwaakhula nivekelo nanyu. Nvirelele onyeserera ovekela munepa wootteela wa Yehova. (Afil. 4:13) Muupuweleke weera moohipisa, munimwaakhela mareeliho mantxipale a Yehova ni munoottiwala maxupo ootheene nvirihaanyu. Mwaavilelaka muroromelaka nikhavihero na Yehova nyuwo munoolipa. Nave munoowera ovilela itthu sinrowa weerera nroromelo nanyu muhoolo.—1 Ped. 1:6, 7.

15. Moovarihana ni Matheyo 17:19, 20, maxupo heeni atthareli a Yesu anvirinhaaya?

¹⁵ Yesu aahaaxuttiha atthareli awe weera yakhalano nroromelo noolipa yanwera ovilela maxupo. (Mmusome Matheyo 17:19, 20.) Imaara ikina, awo yannawera owoomola mademoniyu. Mene nihuku nimoha, khayaawenre opaka eyo. Mwaha wa heeni? Yesu aahaataphulela weera yannatthuneya waatxeerera nroromelo naya. Owo aahaaleela atthareli awe weera yakhalano nroromelo noolipa, awo yanwera mpakano otthaamiha mwaako naari neere há, ovilela maxupo, nnaamweera maxupo awo yaattiyeene! Olelo va, hiyo-tho, pooti oviriha maxupo yaawo nnoonaahu oxupa ovilela.

16. Moota heeni nroromelo naamukhavihenraaya murokora Geydi ovilela wookotthiwa wa aiyawe?

¹⁶ Moone ntakihero na Geydi, onkhala oGuatemala, aiyawe Edi yaahookotthiwa etthikaka omuthukumanoni. Moota heeni nroromelo namukhavihenraaya murokora Geydi ovilela yooxupa ela? Owo onnathaliha eeraka há: “Nivekelo naakhikhavihera omuleela soovalaveliha saka Yehova, kipakakaru eyo, yaakikhavihera ophwanya murettele mmurimani mwaka. Miyo kaahoona moota Yehova aakikosompaawe aavarelaka muteko amusi aka ni asinthamwene aka a mmulokoni. Ni etthu ekina yaakikhavihenre, waari olaleera, opaka eyo, waakikhavihera ovukula ovoreya koonaaka ni okhala kihixupeyaka ni itthu seera sikikhumelele muhoolo. Ivirakaru itthu iyo, naari keere há, maxupo awo kavirinhaaka: Miyo kaaxuttera weera, kihipwatthaka itthu sineera sikikhumelele muhoolo, miyo kinoowera ovilela kikhaviheriwaka ni Yehova, Yesu ni mareherero awe.”

17. Nipakeke eheeni wakhala weera ninviriha maxupo matokweene yaawo anlikana ni mwaako?

¹⁷ Neereke nyuwo munhaawa mwaha wookhweliwa ole mwamusivelanyu? Mwisukereke ehuhu weera mulipihe nroromelo nanyu na ovinyererihiwa wa alipa ookhwa musomaka mBiblyani sooweereya sa arumeyi oororomeleya yaawo yaavinyererihinwe. Munhaawa mwaha wooweera mmusi anyu orookumihiwa mmulokoni? Musomeke masu a Muluku weera nwere  ororomela mwaneene anyu weera ottaruxa wa Yehova ti wooreera. Muhipwatthaka maxupo munvirihaanyu, nvareleke muteko ehuhu eyo weera mulipihe nroromelo nanyu. Mmuleeleke Yehova itthu soothesene sinooxupani, muhikhaleke meekhiinyu. Opwaha mwa yeeyo, mutthekuleke naasinna ni asirokora. (Mir. 18:1) Nvareke miteko sinkela wookhaviherani ovilela, nnaamweera mwinlaka. (Nsal. 126:5, 6) Nvireleleke woonela mithukumano, olaleera ni omusoma Biblya. Ni muupuweleke mareeliho ooreera Yehova olaihenraawe muhoolo. Mweera hiiho, munimoona moota Yehova onookhaviheraaweni. Ni nroromelo nanyu, nneereke oovirelela olipa.

18. Wakhala weera sooweerera sa khalayi saahoonihera weera nroromelo nanyu khanlinpe, munapake heeni?

¹⁸ Wakhala weera sooweerera sa muttuli ni sa vaanaano sohoonihera weera nroromelo nanyu, khanilinpe, muhikhulumuwe. Muttottele mureerelo itthu iyo weera mulipihe nroromelo nanyu. Nvekeleke etthu emoharu yeele oohusera a Yesu yaavekelaaya, yeeraka: “Munatxerere hiyo wiwelela.” (Lu. 17:5) Opwaha mwa yeeyo muupuwele matakihero a yoosomeene yeela. Ntoko na Miguel ni Yurai, muupuweleke ikwaha sootheene moota Yehova ookhavihenraaweni, ntoko mwanawe murokora Vero ni Anel, munvekeleke Yehova otepaxawene ehuhu mumvirihaanyu maxupo. Ntoko Geydi, musuweleke weera Yehova onoowera wookhaviherani aavarelaka muteko amusi anyu ni asinthamwene anyu. Wakhala weera nyuwo soovalaveliha sanyu, munhiya mmatatani mwa Yehova muroromeleke weera owo onimookhaviherani owera oviriha maxupo olelo va, ni munoovirelela oororomela weera owo onimookhaviherani sooweereya soothesene sineera sikhumelele muhoolo.

19. Yesu aaroromenlinhee heeni ni heeni muneeraanyu muroromeleke weera munooowera?

¹⁹ Ekhaikhai ti yooweera Yesu, ahaaleela atthareli awe weera saaheereke waakhumelela itthu yeeraaya etthuneyeke okhalano nroromelo. Nto owo khaahovela weera awo ekhaviheriwaka ni Yehova, yanwera okhumela nnene ni sooweereriwa sa muhoolo. (Yoh. 14:1; 16:33) Ni owo aaroromela weera muloko mutokotoko waatthu wanvuluwa mwa maxupo matokotoko mwaha wa nroromelo naya. (Apok. 7:9, 14) Neereke nyuwo muri mpuwa wa muloko owo mutokotoko? Mwaha wa ikharari sa Yehova, nyuwo munoowera okhala mpuwa wa muloko ola. Mene weera etthu eyo yeereye, muttottele mureerelo vanaano vaava, weera mwaatxeerere naari neere, mulipihe nroromelo nanyu!—Aheb. 10:39.