1. მუ კითხვაქ შილებე გომრჩქინდან?

მინშა შილებე ბნერვიანენდათ, მუჟამსით ფიფქრენთ თი მოვლენეფშე, ნამუთ წოხოლე მელნა. მაგალთო, ტყურა რელიგიაშ განადგურებაშენ, ღორონთიშ ხალხიშ წინააღმდეგ გოგ მაგოგელიშ გიშულაშენ დო არმაგედონიშ ომიშ გურშენ. თეცალ დროს შილებე ფიფქრენდათ: „მუჟამსით თე დრო ქუმურს, ქეშმალებენო ვა ვოდინუე ართგურობა?“. თე კითხვა თქვა ხოლო ქუგაწუხენან-და, მიგეხვარებნა იესოშ სიტყვეფიშ გარჩიება, ნამუთ თე თემაშ წამყვან მუხლის ენოჭარ. თიქ მოწაფეეფს უწუ: „წუხებას ვენოლათ! ქირწმუნით“ (იოან. 14:1). მომავალს მუდგა სირთულეს ვეშეფხვადათინ, ძალიერ რწმენა მიმეხვარებნა, ვორდათ მშვიდას.

2. მუჭო შემლებნა რწმენაშ გამანგარება დო მუს გუვარჩიენთ თე სტატიას?

² მომავალ გამოცდეფშო რწმენა გუვამანგარათინ, ოკო დეფიფქრათ, მუჭო გინომღუნა ამდღარ განსაცდელეფ. თენა მოხვარნა, ქობძირათ, მუ მხარეთ მოსაჭირნა რწმენაშ გამანგარება. ირ განსაცდელიშ გინოღალა ჩქინ რწმენას უმოსო ამანგარენს დო მიმეხვარებნა, ქუგურზათ მომავალ გამოცდეფს. თე სტატიას გუვარჩიენთ ოთხ სიტუაციას, ნამდგას იესოშ მოწაფეეფქ შეხვადეს დო მუდგაქ ოძირუ, ნამდა ოსაჭირდეს რწმენაშ გამანგარება. თეს გეძინელ, ქობძირუნთ, მუჭო შილებე თეცალ სირთულეეფს ამდღა ხოლო შეფხვადათ დო მუჭო მამზადენა თინეფ მომავალშო.

3. მუჭოთ მათეშ 6:30, 33-იშ ჭარჷ, მუ ენწყჷ რწმენაშ გურშენ იესოქ?

³ ბუნებრივ რე, ოჯახიშ დუდის ოკო, ქიზრუნას ოჯახიშ მატერიალურ საჭიროებეფშე, მარა თეშ კეთება თე რთულ დროს ირო ვა რე ადვილ. ნამთინე ჩქინ თანამორწმუნექ მიოდინუ სამუშა დო ბრელ მონდომაშ უმკუჯინუო, შხვაქ ვაშუ. ნამთინექ ვარია თქუ თიცალ სამუშაშენ, ნამუთ ღორონთიშ  ნორმეფს ოწინააღმდეგუდ. თეცალ დროს მოსაჭირნა თიშ ძალიერ რწმენა, ნამდა იეჰოვა ქიზრუნენს ჩქინ ოჯახიშ საჭიროებეფშე. თენა უწუ იესოქ მოწაფეეფს გვალას ქადაგებაშ დროს (წეკითხით მათეშ 6:30, 33). მუჟამსით ბოლოშა ვორეთ დარწმუნებულ, ნამდა იეჰოვა ვემმოტენა, შემალებენა, მთავარ ყურადღება სამეფოშ ინტერესეფშა გეგნიბღათ. თიშ ძირაფა, მუჭო ზრუნენს იეჰოვა ჩქინ მატერიალურ საჭიროებეფშე, ღორონთის ჩქინო უმოს რეალურო გინაშქვანს დო რწმენა ხოლო გემემანგარებნა.

4, 5. მუქ მეხვარ ართ ოჯახის, გიორჯგინკო ოწუხებელს, მუჟამსით მატერიალურო უჭირდჷ?

⁴ გუვარჩუათ, მუჭო მეხვარ იეჰოვაქ ართ ვენესუელელ ოჯახის, გიორჯგინესკო ოწუხებელს, მუჟამსით თინეფს მატერიალურო უჭირდეს. კასტროეფიშ ოჯახის მუნეფიშ დიხას მოსავალ მოჸუნდჷ დო დასაბაღ ფარა ხოლო უღუდ. მარა შეიარაღებულ ბანდაქ მიდუღ თინეფს ირფელ დო თექიანობა ქუდატებაფუ. მიგელი, ნამუთ თე ოჯახიშ დუდ რე, იჩიებ: „ასე ჩქი ჭიჭე დიხა მიღნა, ნამუთ შხვაქ მოთხის დო თით ოკო ეიბჯუმუათ დუდ. ირ ოჭმარეს იეჰოვას ვოხვეწუქ ქომჩან თინა, მუთ თიმ დღას მოსაჭირნა“. თე ოჯახშო ცხოვრება რთულ რე, მარა თინეფს ბოლოშა ჯერა, ნამდა ჩქინ მოჸოროფე მუმას, შეულებ იზრუნას თინეფიშ ირდღაშიან საჭიროებეფშე. ათეშენ რეგულარულო ოსწრუნა კრებაშ შეხვალამეფს დო მონაწილებას ღებულენა მსახურებას. თე ოჯახის პირველ ადგილშა გეურე სამეფოშ ინტერესეფ დო იეჰოვა ხოლო ზრუნენს თინეფიშ საჭიროებეფშე.

⁵ თე რთულ პერიოდის მიგელქ დო მუშ მეუღლექ ყურადღება თიშა გეგნიღეს, მუჭო ზრუნენდჷ იეჰოვა თინეფშე. მინშა იეჰოვა თანამორწმუნეეფს ირინუანდჷ, ნამდა თე ოჯახშა მატერიალურო ქელურინუდკო დო მიგელს სამუშა ხოლო დუგორუდკო. ხოლო ართ შემთხვევას თიქ იეჰოვაშ მოწმეეფიშ ფილიალ გეგემირინუ მიგელიშ ოჯახიშ მახვარებელო. იეჰოვას დღას ვემუტებ თინეფ, მუდგაშ შედეგო რწმენაქ გემანგარეს. მუჟამსით მიგელიშ უნჩაშ ცირასქუა იშინანს, მუჭო მეხვარ იეჰოვაქ, თეცალ სიტყვეფს იჩიებ: „იეჰოვაშ ხეშ თეცალ არგამათ ძირაფა მანგარ გურიშემაკინალ რე. თინა ჩქიმ მეგობარ რე დო დარწმუნებულ ვორექ, ნამდა ირო ქიმმეხვარებ. განსაცდელეფქ, ნამუთ ჩქინ ოჯახიქ გინიღ, მუმამზადეს თი უმოს რთულ განსაცდელეფშო, ნამდგას შილებე მომავალს შეფხვადათ“.

6. მუჭო შეილებნა რწმენაშ გამანგარება, მუჟამსით ეკონომიკურ პრობლემეფ გიღნა?

⁶ მუშო ოკო რაგად რთულ რე, მუჟამსით ეკონომიკურ პრობლემეფ გიღნა, მარა მუთ უმოს რთულ სიტუაციას რეთ, თით უმოსო შეილებნა თე დრო გეგმირინუათ თქვან რწმენაშ გამანგარებელო. ქილოცით დო წეკითხით იესოშ სიტყვეფ, ნამუთ მათეშ 6:25—34-ის ენოჭარ, თეშ უკულ ტომბაშე ქიფიქრით თინეფშე. დეფიქრით თი თანამედროვე მაგალითეფშე, სოვრეშეთ იძირე, მუჭო ზრუნენს იეჰოვა მუშ მსახურეფშე, მით სულიერ საქმეეფით რე დაკავებულ (1 კორ. 15:58). თენა დუგარწმუნენა,  ნამდა იეჰოვა თქვა ხოლო თეშ ქიმგეხვარებნა, მუჭოთ თინეფს მეხვარ. თის უჩქჷ, მუ გოსაჭირნა დო მუჭო ალაიდირთან. მუჟამსით გეგმოცადუნთ იეჰოვაშ ხეს თქვან ცხოვრებას, რწმენა გეგემანგარებნა დო შეგალებენა, მომავალს უმოს დიდ სირთულეეფს ქუგურზათ (აბაკ. 3:17, 18).

7. მუჭო გიმოცად „დიდ ქარბორიაქ“ მოწაფეეფიშ რწმენა? (მათ. 8:23—26)

⁷ მუჟამსით იესოქ დო თიშ მოწაფეეფქ ზღვას ქარბორიას ქუმოხვადეს, იესოქ თე სიტუაცია თიშო გეგმირინუ, ნამდა თინეფს ქაძირუკო, ნამ მხარეთ ოსაჭირდეს რწმენაშ გამანგარება (წეკითხით მათეშ 8:23—26). ქარბორია მანგარ ძალიერ რდჷ დო ნავ წყარით იფშაფუდ. თე დროს იესოს გემუანო ლურდჷ. მუჟამსით შქურნაფილ მოწაფეეფქ გაკურცხინეს დო თხის, გეგნასქილიდუკო თინეფ, იესოქ მშვიდას უპასუხ: „მუშა გაშქურნეს, ჭიჭე რწმენა გიღნან ფერეფ?!“. შქურნაფილ მოწაფეეფქ ოკო ქოძირესკო, ნამდა იეჰოვას თავისფალო შეულებუდ დერსხკო იესო დო თინეფ, მით თიწკუმა ართო რდეს. ჩქი მუს ბგურაფლენთ თავრეშე? ძალიერ რწმენა მიმეხვარებნა, გეგნიბღათ „დიდ ქარბორიეფ“, იჸინო თენა პირდაპირ დოვარ სიმბოლურ მნიშვნელობათ.

8, 9. მუჭო გიმიცად ანელიშ რწმენაქ დო მუქ მეხვარ თის?

⁸ დეფიქრით ართ პუერტო-რიკოელ დაუქორწინებელ დაშ, ანელიშ, მაგალითშე, ნამდგას რთულ სიტუაციეფიშ გინოღალაქ რწმენა უმოსო გუმანგარ. თის „დიდ ქარბორიაქ“ პირდაპირ გაგებათ გიოტირხჷ. 2017 წანას ქარბორია „მარიაქ“ აკარღვჷ თიშ ჸუდე; თიქ სამუშა ხოლო მიოდინუ. ანელი იჩიებ: „თე რთულ პერიოდის, მანგარ შეწუხებულ ვორდჷ. მარა ქიდიბგურე, ლოცვათ ქიმვენდე იეჰოვას დო ოწუხებელს ვეგნვაჸუნე“.

⁹ ანელს მორჩილებაქ ხოლო მეხვარ, გიორჯგინკო სირთულეეფს. თინა იჩიებ: „იეჰოვაშ ორგანიზაციაშ ხემძღვანელობაშ მეჸუნაქ მიმეხვარ, ვამდინუაფუდკო სიმშვიდე. მა იეჰოვაშ ხე ქობძირ თი სულიერ გურიშელაკინაშე დო მატერიალურ ალარნაშე, ნამუთ საჯიმალოშე მიბღჷ. იეჰოვაქ თიშე ბრელით მეტ ქომუჩ, ვინემ მა ფთხინდჷ. შედეგო ჩქიმ რწმენაქ უმოსო გემანგარ“.

10. მუშ კეთება შეილებნა, მუჟამსით „დიდ ქარბორიას“ შეხვადუთ?

¹⁰ თქვა ხოლო ხომ ვეშეხვალამუთ ცხოვრებას „დიდ ქარბორიას“? თეშა შილებე მიშეშას სირთულეეფ, ნამუთ სტიქიურ უბედრობას მოჸუნს ვარდა სიმბოლურ ქარბორია, მაგალთო, მუნერით რე ჯამრთელობაშ სერიოზულ პრობლემა, მუდგაქ შილებე გურ გოიტახან დო მუთუნნერ საშველს ვარწყედათ. თეცალ დროს შილებე შეწუხებულ რდათ, მარა ოწუხებელს ვემეჩათ საშვალება, იეჰოვაშ ნდობა მეიდინუან. დეახლოვით თის გულწრფელ ლოცვაშ საშვალებათ. გამანგარით თქვან რწმენა თიშე ფიქრით, მუჭო გოხვარდეს ულირს იეჰოვა (ფსალმ. 77:11, 12). თქვა შეილებნა ბოლოშა რდათ დარწმუნებულ, ნამდა იეჰოვა დღას ვემგოტენა.

11. მუშენ ოკო მაფდან გინოჭყვიდილ, დევემორჩილათ თინეფს, მიდგას ხემძღვანელობა ოვალ?

 ¹¹ ხოლო მუქ შილებე მიგეხვარან, ქუგურზათ განსაცდელეფს? მუჭოთ ანელი მიშინუანს, თენა რე მორჩილება. ქიდიგურეთ თინეფიშ ნდობა, მიდგას იეჰოვა დო იესო ონდუნა. მინშა შილებე ხემძღვანელ ჯიმალეფქ თიცალ მითითება ქომჩან, ნამუთ გონივრულო ვა მაძირენა, მარა იეჰოვა აკურთხენს მორჩილებას. თიშ სიტყვაშე დო ართგურ მსახურეფიშ მაგალითეფშე მიჩქნა, ნამდა მორჩილებას შეულებ სიცოცხლეშ რსხება (გამ. 14:1—4; 2 მატ. 20:17). ტომბაშე დეფიქრით თეცალ მაგალითეფშე, მუთ მტკიცაშე გინგოჭყვიდრაფუანა, მიაჸუნათ იეჰოვაშ ხემძღვანელობას ქოთ ამდღა დო ქოთ მომავალს (ებრ. 13:17). შედეგო თქვა ვა გაშქურნენა თი „დიდ ქარბორიაშა“ — დიდ გასაჭირშა — ნამდგაქ მალას ოკო მოხვადას (იგავ. 3:25).

12. მუჭო აკავშირენს ართიანწკუმა ლუკაშ 18:1—8 რწმენას დო უსამართლობაშ გარზებას?

¹² იესოს უჩქუდ, ნამდა მუშ მოწაფეეფიშ რწმენას უსამართლობა გეგმოცადუნდჷ. ათეშენ თიქ მაგალით მოუჸონ თინეფს, ნამუთ ლუკაშ სახარებას ენოჭარ. იესოქ თინეფს ეჩუ ართ ქომონჯღურელ ოსურკოჩიშ გურშენ, ნამუთ უსამართლო მოსამართლეს თხინდჷ სამართალს. თინა დარწმუნებულ რდჷ, ნამდა მოსამართლეს დუდის ვა დანებენდ-და, მიზანს ქიმიოჭირნუანდჷ. საბოლათ, მოსამართლექ ქუპასუხ თიშ ოთხუალს. ჩქი მუს ბგურაფლენთ თავრეშე? იეჰოვა ვა რე უსამართლო. იესოქ თქუ: „ღორონთ ვა გურჩქინანსო სამართალს მუშ გიშაგორილეფს, მით დღაშ დო სერით ოხვეწნა?“ (წეკითხით ლუკაშ 18:1—8). თეშ უკულ იესოქ გეუძინ: „კოჩიშ სქუა ქუმურსუნ, ქოძირუნსო თეცალ რწმენას დედამიწას?“. უსამართლობაშ დროს მიფთვინენთ დო იეჰოვაშა მოხვარაშ თხუალას ვემვოტენთ-და, დუვამტკიცენთ, ნამდა მიღნა ძალიერ რწმენა, მუნერით იესოშ მაგალითის მოშინაფილ ქომონჯღურელ ოსურკოჩის უღუდ. თეცალ რწმენა მოხვარნა, ბჯერდან, ნამდა იეჰოვა აუცილებერო ქომპასუხენა. დარწმუნებულ ოკო ვორდათ, ნამდა ლოცვას დიდ ძალა უღჷ. მინშა შილებე იეჰოვაქ შურო ვეველუთინ თეშ ქომპასუხან.

13. მუჭო მეხვარ ლოცვაქ ართ ოჯახის, ნამდგაქ უსამართლობას შეხვად?

¹³ გუვარჩუათ ართ დაშ, ვეროშ, მაგალით, ნამუთ კონგოშ დემოკრატიულ რესპუბლიკას ცხოვრენს. სამოქალაქო არეულობაშ გურშენ ვეროს მუშ 15 წანერ ძღაბ დო ქომონჯწკუმა ართო, ნამუთ იეჰოვაშ მოწმე ვა რე, სოფელქ აჸუ დატებელქ. ბლოკპოსტის ქადირთესინ, ჯარიშკოჩეფქ გაჩერეს თინეფ დო ჸვილუა მუნდომეს. ვეროს ნგარაქ გეუოლ. მუშ ძღაბიქ ეცად თიშ დამშვიდებას დო ხონარმაღალო ქიდიჭყჷ ლოცვა. თიქ ლოცვაშ დროს ბრელშა მიშინუ იეჰოვაშ სახელ. ლოცვა გათუნ, ჯარიშკოჩეფიშ უნჩაშიქ კითხჷ: „მიქ დუგოგურუ ლოცვა?“. თიქ უპასუხ: „ჩქიმ დიდაქ. თიქ მათეშ 6:9—13-ს მოჩამილ ნიმუშშე დუმოგურუ ლოცვა“. ჯარიშკოჩეფიშ უნჩაშიქ უწუ: „მეუ სქან მშობლეფწკუმა ართო  მშვიდობიანო. სქან ღორონთის, იეჰოვას, დუთხილუდა!“.

14. მუქ შილებე გეგმოცადას თქვან რწმენა დო მუ მიგეხვარებნა თე დროს?

¹⁴ თეცალ შემთხვევეფ მოგურუანა, ნამდა დღას ვაგმოჭყორდან, მუშმადიდა ძალა უღჷ ლოცვას. მარა იეჰოვა თქვან ლოცვეფს თეცალ სარკოთ დო ხეთეშე ვა პასუხენს-და, თექ შილებე თქვან რწმენა გეგმოცადას. იესოშ მაგალითის მოშინაფილ ქომონჯღურელ ოსურკოჩცალო, ვემიოტუათ ლოცვა. დარწმუნებულ რდათ, ნამდა ჩქინ ღორონთ ვემგოტენა დო თინა საჭირო დროს დო საჭირო საშვალებათ ქუპასუხენს თქვან ლოცვას. გაგრძელით თიშა წმინდა შურიშ თხუალა (ფილ. 4:13). რშუდან, ნამდა იეჰოვა მალას თეშ გაკურთხენა, ნამდა ულირს მოხვალამირ არძა ტანჯებას გიჭყოლიდუანთ. მუჟამსით იეჰოვაშ მოხვარათ ართგურო გეგნიღანთ განსაცდელეფს, თენა მუგამზადენა მომავალ სირთულეეფშო (1 პეტ. 1:6, 7).

15. მუჭოთ მათეშ 17:19, 20-შე იძირე, მუ სირთულეს შეხვადეს იესოშ მოწაფეეფქ?

¹⁵ იესო მუშ მოწაფეეფს ოგურუანდჷ, ნამდა რწმენა მეხვარებდეს დაბრკოლებეფიშ გერჯგინას (წეკითხით მათეშ 17:19, 20). თინეფს დემონეფშე ხოლო შეულებდეს ადამიანეფიშ გათავისფალება, მარა ართშა თექ ვაკეთებუეს. მუ რდჷ პრობლემა? იესოქ ენწყჷ, ნამდა თინეფს უმოს რწმენა ოსაჭირდეს. თიქ მუშ მოწაფეეფს უწუ, ნამდა დასაბაღ რწმენა ქაღვენდეს-და, გვალაშმადიდა პრობლემეფს ხოლო გეგნიღანდეს. ამდღა ჩქი ხოლო შილებე შეფხვადათ თიცალ პრობლემეფს, ნამდგაშეთ ფიფქრენთ, ნამდა ვეშმალებენა, გივორჯგინათ.

16. მუჭო მეხვარ გეიდის რწმენაქ, გიორჯგინკო დიდ გურჭუას?

¹⁶ დეფიფქრათ ართ გვატემალელ დაშ, გეიდიშ, მაგალითშე. ართ დღას კრებაშე ირთუდესინ თეშ თიშ ქომონჯ, ედი, დოჸვილეს. მუჭო მეხვარ გეიდის რწმენაქ, გიორჯგინკო თე დიდ გურჭუას? თინა იჩიებ: „ლოცვა მოხვარ, ჩქიმ ოწუხებელ იეჰოვას გეგნოფჩე, შედეგო შინაგან სიმშვიდეს ბგინაფლენქ. ვორწყექ, მუჭო ზრუნენს იეჰოვა ჩქიმდე ოჯახიშ, მეგობრეფიშ დო კრებაშ საშვალებათ. იეჰოვაშ მსახურებათ დაკავებულ ვორექინ თენა, ჭუას ემქექუანს დო მოხვარ, ზედმეტო ვებწუხე ჭუმანერ დღაშე. ჩქიმ გაჭირებაქ ქუდმოგურუ, ნამდა ვა უღჷ მნიშვნელობა, მუნერ გამოცდას შეფხვადუქ მომავალს, მა თის გეგნიბღანქ იეჰოვაშ, იესოშ დო ღორონთიშ ორგანიზაციაშ მოხვარათ“.

17. მუშ კეთება შემლებნა, მუჟამსით გვალაცალ დაბრკოლებაშ წოხოლე გივორეთ?

¹⁷ თქვან ოწუხებელ ხოლო საჸოროფო ადამიანიშ ღურა ხომ ვა რე? თაშ ქორენ-და, გემანგარით რწმენა, ნამდა იჸუაფ ღურელეფიშ გათელება; თეშო საჭირო რე, დრო გეგმურთათ ბიბლიაშე თი მონაკვეთეფიშ კითხირს, სოდეთ ღურელეფიშ გათელებაშ შემთხვევეფ ჭარჷ. ვარდა თიშენ ხომ ვა წუხენთჷ, ნამდა ოჯახიშ წევრიქ კრებაშე გერიცხჷ? თიშა დარწმუნებელო, ნამდა ღორონთიშ აღმზრდელობით ზომეფ  არძაშ უჯგუშ რენ, საჭირო რე გეგმირკვიათ თეშ მტკიცებულებეფ. მუდგანერ პრობლემაშ წოხოლე ვეგერდათინ, გეგმირინეთ თინა რწმენაშ გამანგარებელო. ირფელ ქუწით იეჰოვას, მუდგას გინაფლენთ. ვენიკილათ თქვან დუდის, თეშ მანგიორო, ხოლოშიან ურთიერთობა გიღდან და დო ჯიმალეფწკუმა (იგავ. 18:1). თიცალ საქმეეფიშ კეთებას მიღით მონაწილება, მუთ გურჭუაშ გინოღალას მიგეხვარებნა. თეშ კეთებაშე თიმ დროს ხოლო ვა თქუათ ვარია, მუჟამსით ოწუხებელ დუდის გუგოშინანა დო ჩილამურეფ ელგაჸუნუნა თოლეფს (ფსალმ. 126:5, 6). გაგრძელით კრებეფშა დასწრება, მსახურება დო ბიბლიაშ კითხირ. ყურადღება იეჰოვაშ დუნაპირებ დიდებულ კურთხევეფშა გაფდან გინოღალირ. მუჟამსით ქოძირუნთ, მუჭო გოხვარნა იეჰოვა, თქვან რწმენა ხოლო უმოსო გემანგარებ.

18. მუ შეილებნა აკეთათ, მუჟამსით ფიქრენთ, ნამდა რწმენაშ სინაკლებე გიღნა?

¹⁸ ულირს მოხვალამირ დოვარ ამდღარ განსაცდელეფქ თქვან რწმენაშ სინაკლებე გეგმაარგამ-და, გურქ ვა გოიტირხან. თენა რწმენაშ გამანგარებაშ საშვალებათ მირჩქინით. იესოშ მოციქულეფცალო, თქვა ხოლო ქითხით რწმენაშ გამანგარება (ლუკ. 17:5). თეს გეძინელ, დეფიქრით თი მაგალითეფშე, ნამუთ თე სტატიას გუვარჩით. მიგელი დო თიშ მეუღლეცალო, რშუდან არძა შემთხვევა, მუჟამსით იეჰოვაქ მიგეხვარეს. ვეროშ ცირასქუა დო ანელცალო, ვემიოტუათ ლოცვა, განსაკუთრებულო რთულ სიტუაციეფიშ დროს. გეიდიცალო, ვაგგოჭყორდან, ნამდა იეჰოვაქ შილებე ოჯახიშ დო მეგობრეფიშ საშვალებათ ქელაიდირთან. მუჟამსით იეჰოვას ამდღარშე ქიმეჩანთ საშვალებას, ქიმგეხვარან სირთულეეფშა გერჯგინას, თენა უმოსო დუგარწმუნენა, ნამდა მომავალს მუდგა სირთულეს ვეშეხვადათინ, იეჰოვა ქიმგეხვარებნა.

19. მუშა რდჷ იესო დარწმუნებულ დო თქვა მუ შეილებნა რჯერდან?

¹⁹ იესოქ ქაძირუ მუშ მოწაფეეფს, მუ მხარეთ ოსაჭირდეს რწმენაშ გამანგარება. მარა ეჭვ დღას ვემშუღალ თიშა, ნამდა იეჰოვაშ მოხვარათ მომავალ გამოცდეფს ქუგურზუდეს (იოან. 14:1; 16:33). თინა დარწმუნებულ რდჷ, ძალიერ რწმენა ქიმეხვარებუდ ანაყუ ხალხის, ნამდა გინასქიდესკო დიდ გასაჭირს (გამოცხ. 7:9, 14). ქიჸუაფუთო თქვა თინეფ შქას? რწმენაშ გამანგარებელო ირნერ საშვალებას გეგმირინუანთ-და, იეჰოვაშ დაუმსახურებელ სიკეთეშ ჭყოლოფათ, თქვა ხოლო შეგალებენა, გინასქიდათ დიდ გასაჭირს! (ებრ. 10:39).