1. Ino fan̈ontanian̈a mety handalo amy jerintsika?

MARO raha mbala handalaovantsika tsy ho ela: Fivavahan̈a diso hiravan̈iny, Goga baka Magoga hanafiky vahoakany Jehovah, avio ho avy ady Aramagedona. Mety hampavozo mieritreritry raha aby zen̈y ndraikindraiky. Asa anao efa mba nan̈ontany ten̈a karaha ty: ‘Raha mba ho vitako edy tsy hivadiky izikoa fa avy raha aby zen̈y?’ Izikoa fa nandalo tamy jerinao fan̈ontanian̈a io, mety han̈ampy anao raha nivolan̈iny Jesosy aminy andininteny fôtotrony fianaran̈antsika ty. Karaha ty ho izy tamy pianatranany: “Aza ambela hialamboetry fônaro. Minoa Zan̈ahary.” (Jaona 14:1) Efa fanan̈ana finoan̈a matanjaka edy ny raha han̈ampy atsika tsy havozovozo hiatriky raha mbala ho avy aby zen̈y.

2. Akory mety hanan̈antsika finoan̈a matanjaka, avio ino aby raha hidinihintsika ato?

² Ho vitantsika hankafatatra finoan̈antsika ndreky hiatriky fitsapan̈a mbala ho avy, izikoa rango iziô atsika efa mandiniky raha nataontsika hiatrefan̈a raha mahazo atsika. Miankiny amy raha ataontsika lera atsika an̈atiny sarotro, hahitantsika ino aby lafiny mbala mila ankatsaraintsika, beky atsika hanan̈a finoan̈a matanjaka. Isaka atsika mahavita miatriky raha sarotro, hahaiho fatatra fo finoan̈antsika. Ary zen̈y koa han̈ampy atsika hiatriky raha sarotro mbala ho avy. Niatriky fitsapan̈a iro pianatrany Jesosy aby io ke nila nampitombosindro finoan̈andro. Handiniky raha efatra nitsapa finoan̈andro atsika ato. Ho hitantsika ato koa raha mety hataontsika lera atsika miatriky raha sarotro mitovy amy nindro, ndreky raha han̈ampy atsika ho von̈ono hiatriky raha mbala ho avy.

3. Izikoa Matio 6:30, 33 zahan̈a, lera karakory atsika mila manan̈a finoan̈a matanjaka?

³ Normaly izikoa lelahy araiky man̈iry han̈amia raha ilainy vady amanjanakanany, an̈isanizen̈y hanin̈y, lamba sikinin̈y, avio tran̈o. Tsy voatery ho mora mahita raha aby zen̈y aminandra sarotro izioty. Misy piaramanompo amintsika sasany iziô nafaka asa. Mamango iro mitady raha amilaomanten̈a, fa tsy mahita! Sasany ndraiky nahita asa, fa asa tsy mety amy panompony Jehovah, ke tsy nataondro. Izikoa fa tôjy raha karaha zen̈y atsika, ilaintsika matoky tsarabe fa Jehovah han̈amia raha ilainy fianakavian̈antsika. Zen̈y tsarabe raha nikoran̈iny Jesosy tamy pianatranany, taminizy nan̈ano Toriteny Tan̈abony Bongo. (Vakia Matio 6:30, 33.) Izikoa atsika resy lahatra fa Jehovah tsy hiala atsika, hanjary ho moramora amintsika hifantoko amy fanompoan̈a. Ho hitantsika koa fomba ikarakarany Jehovah atsika, ke hanjary hahaiharikitry izy fo atsika avio ho fatatra finoan̈antsika.

4-5. Akory nan̈ampiany Jehovah fianakavian̈a araiky tan̈atiny fahasahiran̈ana?

⁴ Diniha baka ty: Mipetraka a Venezoelà fianakavian̈any Rahalahy Castro. Sahiran̈a iro vo nahita raha nilaindro tamy fiain̈ana, kanefa tsapandro fa nikarakara iro fo Jehovah. Mambôly ndreky mitarimy raha velonten̈andro taloha. Tandraraiky, nisy lelahy maromaro nitana basy navy nandrava tanindro, ke iro tsy maintsy niala. Karaha ty nambarany Miguel, babandro: “Zahay iziô voatery tsy maintsy nindran̈a tany hely taminolo, hitsaboan̈a. Isaka maraindrain̈y, zaho mangataka amy Jehovah beky izy han̈amia zahay raha ilainay aminandra io.” Sarotro ankitin̈y raha iain̈any fianakavian̈a io, kanefa matoky angovo jiaby iro fa Jehovah han̈amia iro raha ilaindro isanandra. Iro miezaka mivory tsy tapaka, baka io mazoto mitory. Mifen̈y iro han̈ano voalohantoeran̈a fanompoan̈andro, ke amezany Jehovah iro fo raha ilaindro.

⁵ Tan̈atiny fotoan̈a sarotro io, Miguel ndreky vadiny, Yurai, niezaka fo nifantoko tamy fomba nan̈ampiany Jehovah iro. Jehovah nampiasa piaramanompo. Iro nan̈ampy iry Miguel hahazo raha nilaindro andavandra. Nampiandro koa Miguel hahita asa. Nisy fotoan̈a koa, Jehovah nampiasa birôny sampan̈a nandefa fan̈ampian̈a ke iro an̈isany nahazo. Jehovah tsiary nahafoe iro. Ke nahaifatatra fo finoan̈any Miguel ndreky fianakavian̈anany. Yoselin, zanakandro man̈angy koa fa baka nikoran̈a fomba nan̈ampiany Jehovah fianakavian̈andro, karaha ty ho izy: “Ten̈a mampahery zaho mahita raha nataony Jehovah taminay. Rango tamy zen̈y, nataoko namako Jehovah ke matoky zaho fa izy tsy maintsy han̈ampy zahay.” Karaha ty koa ho izy: “Raha sarotro nandalovanay in̈y man̈oman̈a zahay hiatriky raha sarotro mbala ho avy.”

6. Akory mety hankafataranao finoan̈anao lera anao sahiran̈a arabola?

⁶ Sahiran̈a arabola ma anaro iziô? Sarotro ankitin̈y zen̈y. Fa ndray mafy be karakory raha  iain̈anaro, araraota fo fotoan̈a sarotro io hankafataran̈a finoan̈anaro. Amy fomba akory? Mivavaha amy Jehovah, baka io vakia ndreky diniha raha nivolan̈iny Jesosy amy Matio 6:25-34 ao. Izikoa anao mandiniky raha iain̈any piaramanompo maro amy zioty, ho hitanao fa tahiany Jehovah fo lan̈iany olo man̈ano voalohantoeran̈a Fanjakan̈anany. (1 Kor. 15:58) Izikoa niny Jehovah fo ataonao voanalohany, ho hitanao fa Jehovah iô fo han̈ampy anao, karaha nataony nan̈ampy iro. Hainy raha ilainao, baka io hainy akory fomba ten̈a tsara an̈amezan̈a zen̈y anao. Isaka anao mahita fomba an̈ampiany Jehovah anao, hahaihitombo fo finoan̈anao ke ho vitanao hiatriky fitsapan̈a bebenizen̈y aminy amaray an̈y.—Hab. 3:17, 18.

7. Nan̈ino ‘andra ratsy’ koran̈iny Matio 8:23-26 io nitsapa finoan̈any pianatrany Jesosy?

⁷ Nisy fotoan̈a Jesosy ndreky pianatranany aby io tatrany andra ratsy tan̈ivondranomasin̈y. Nan̈araraotro raha nandalo io Jesosy nan̈ampian̈a pianatranany hahita fa nila nampitombosindro finoan̈andro. (Vakia Matio 8:23-26.) Ny raha nisy baka, tafandry mare Jesosy kanefa sambondro efa kalikaly ho dobo. Navozo mare pianatranany ke nifohazindro izy. Niangaviandro izy han̈avotro iro. Nan̈itsy iro moramora Jesosy, ke ho izy tamindro: ‘Ino ma raha mampavozo anaro, olo tsy ampy finoan̈a aby ty?’ Nan̈ino ma Jesosy nivolan̈a zen̈y? Fotony, tokony efa hainy pianatranany fa vitany Jehovah tsarabe miaro Jesosy ndreky olo niaraka taminany. Ino raha ianarantsika baka amy zen̈y? Finoan̈antsika koa fatatra tsarabe, izio han̈ampy atsika hiatriky problemo maventy, na siklaony arabakiteny zen̈y na tsy arabakiteny.

8-9. Ino raha nitsapa finoan̈any Anel, baka io ino raha nan̈ampy izy?

⁸ Niatriky raha sarotro mare ranabavy araiky tsy manambady mipetraka a Porto Rico an̈y. Anel an̈arany. Nandalo tamy tany nisy iro siklaony Maria tamy 2017, ke robaka tran̈onany. Sôsoko zen̈y, mbala nafaka asa koa izy. Ino raha nan̈ampy izy hanan̈a finoan̈a matanjaka? Karaha ty ho izy: “Nivavaka matetiky tamy Jehovah zaho, ke nahainatoky izy fo zaho. Nanjary vitako koa nan̈ano raha tokony hataoko, ndray tiô asalohanaka.”

⁹ Ino koa raha nan̈ampy i Anel hiatriky fitsapan̈a? Karaha ty ho izy: “Nan̈ampy zaho ho kalma fo fan̈arehako toromariky baka tamy fandaminan̈a. Hitako fa Jehovah ten̈a mikarakara zaho. Nampiasa piaramanompo izy nampahery zaho baka tamy Soratra Masin̈y ndreky nan̈amia raha nilaiko andavanandra.” Ho izy koa: “Mandilatrany raha nangatahiko raha namezany Jehovah zaho, ke zen̈y ten̈a nampatanjaka finoan̈anaka.”

10. Ino raha mety ataonao izikoa anao iziô an̈atiny problemo maventy?

¹⁰ Mandalo problemo maventy miran̈a ‘andra ratsy’ koa ma anao? Mety nandalaovany siklaony donko tany misy anaro? Sa marary mare anao ke kivy, fotony ndray raha sambôrinao mety tsy ho hainao. Marin̈y fa mety hiasaloha mare anao, kanefa asalohanao aby zen̈y  aza ambela hampihen̈y fatokisanao Jehovah. Man̈ataon̈a izy amy vavaka. Ankafatara finoan̈anao, ke aleva onon̈o akory nan̈ampiany Jehovah anao taloha. (Sal. 77:11, 12) Matokisa fa tsisy andra han̈ariany Jehovah anao, na iniany na mandrakizay.

11. Nan̈ino atsika tapakevitry han̈araka toromariky amezandro mitariky atsika aby io?

¹¹ Hitantsika baka tamy raha nivolan̈iny Anel in̈y, fa ho vitanao hiatriky fitsapan̈a izikoa anao man̈araka volan̈any Jehovah. Ataova raha hahavy anao hatoky olo atokisany Jehovah ndreky Jesosy. Mety ho hafahafa ndraikindraiky toromariky amezany piandraikitry an̈ivony fiangonan̈a. Kanefa hitahiany Jehovah anao izikoa man̈araka volan̈andro. Ary izikoa dinihin̈y raha ampianariny Baiboly ndreky tantarany piaramanompo tsy mivadiky, man̈avotro fahin̈ana fan̈arehan̈a volan̈a. (Eks. 14:1-4; 2 Tan. 20:17) Saintsain̈a modelindro. Anao koa man̈ano zen̈y, anao ho von̈ono han̈araka taridalan̈a amezany fandaminan̈a, rango iziô ndreky aminy hoavy. (Heb. 13:17) Ke tsy havozo foeky anao, ndray tsy maintsy handalo ‘andra ratsy’ atsika tsy ho ela.—Ohab. 3:25.

12. Izikoa zahan̈a Lioka 18:1-8, nan̈ino mila manan̈a finoan̈a atsika izikoa tihahavita hiaritry raha tsy rariny?

¹² Efa hainy Jesosy fa hiatriky raha tsy rariny iro pianatranany aby io, ke mety hitsapa finoan̈andro raha zen̈y. Akory nataony nan̈oman̈a jerindro hiatriky zen̈y? Nikoran̈a fanoharan̈a araiky izy amy bokiny Lioka ao. Izio tantarany man̈angy maty vady araiky tsy vôly nangataka ny rariny tamy lelahy pitsara araiky ratsy fan̈ahy. Natoky man̈angy io fa izikoa izy tsy vôly mangataka, han̈ampy izy fo pitsara io. Zen̈y ankitin̈y raha nataony lelahy io. Ino raha ianarantsika baka amy zen̈y? Jehovah tsy man̈ano ny tsy rariny foeky. Zen̈y nahavy Jesosy nivolan̈a fa ‘Jehovah tsy maintsy han̈ano ny rariny aminolo voafidiny tsy vôly mitretre aminany, matsan̈a alin̈y.’ (Vakia Lioka 18:1-8.) Karaha ty koa nambarany: ‘Zanakolo koa avy, raha mba hahita finoan̈a karaha zen̈y edy izy ambony tany eto?’ Atsika koa fa miaritry raha tsy rariny, irarian̈a atsika hanan̈a finoan̈a matanjaka karaha niny man̈angy maty vady io, ke hiezaka hiaritry fo ndreky haharidraha. Mila matoky atsika fa, tsy iniany tsy amaray, Jehovah tsy maintsy han̈ampy atsika fo. Mila mino koa atsika fa vavaka io mahery. Ndraikindraiky, tsy arakarakany raha mety hantin̈aintsika fomba hamaliany Jehovah vavakantsika.

13. Nan̈ino vavaka ten̈a nan̈ampy fianakavian̈a araiky niaritry raha tsy rariny?

¹³ Diniha baka raha niain̈any Ranabavy Vero, mipetraka a Congo-Kinshasa. Ramosenany tsy temoain, avio iro mananjanaka man̈angy kadiriny 15 taon̈o. Nisy maramila milanja basy nanafiky tanànandro, ke tsy maintsy nilefa iro telo mianaka. Iro mbala tandalan̈a fo, iro tôjy barazy. Nisy lelahy mitana basy nisakana iro ndreky nimenasy hamono iro. Nitomoan̈y mare i Vero, fa zanany man̈angy io ndraiky niezaka nampangin̈y mamany sady  nivavaka mare. Niton̈oniny tsaiky io matetiky an̈aran̈a “Jehovah.” Izikoa fa vita vavakanany, kômandan nan̈ontany: “E tsaiky ty, azovy nampianatra anao nivavaka?” Ho izy: “Mamako. Matetiky izy nampiasa vavaka modely amy Matio 6:9-13 ao.” Kômandan io baka tio nivolan̈a: “Aon! Mindao anaro mandeha, anao ndreky ry olobenao. Anò Jehovah Zan̈aharinaro hiaro anaro.”

14. Ino raha mety hitsapa finoan̈antsika, baka io ino raha han̈ampy atsika hiaritry?

¹⁴ Tantara karaha zen̈y mampianatra atsika fa ten̈a mahery ankitin̈y vavaka. Akory ndraiky izikoa tsy amy fomba miavaka na tsy iô ny iô Jehovah mamaly vavakantsika ke? Mety hitsapa finoan̈antsika raha zen̈y. Karaha nataony man̈angy tamy fan̈oharan̈any Jesosy in̈y, aza vôly mivavaka. Matokisa fa Zan̈ahary tsy mety han̈ary anao. Hamaly vavakanao izy amy fotoan̈a hitany fa mety. Ke iangavia fo izy han̈amia anao fan̈ahy masin̈inany. (Fil. 4:13) Tsaraova fa amezany hatsaran̈a marobe atsika tsy ho ela, ke tsy ho azontsika onon̈o eky raha jiaby mampiôry atsika amy zioty. Ke izikoa anao miaritry fo sady tsy mivadiky, avio man̈eky ampiany Jehovah, hahazo angovo anao ke ho vitanao fo hiatriky problemo jiaby mbala ho avy.—1 Pet. 1:6, 7.

15. Ino raha nanahiran̈a pianatrany Jesosy, koran̈iny Matio 17:19, 20?

¹⁵ Nampianariny Jesosy iro pianatranany aby io fa finoan̈a ny raha han̈ampy iro hiatriky raha manahiran̈a. (Vakia Matio 17:19, 20.) Tandraraiky, tsy nahavita nan̈adoso demony taminolo araiky iro, kanefa iro talohanio nahavita. Ino problemo? Nazavainy Jesosy tamindro fa iro tsy ampy finoan̈a. Ke izikoa ampy tsarabe finoan̈andro ho izy, ho vitandro fo hiatriky raha manahiran̈a iro, ndray izio maventibe karaha bongo! Ino koa problemo maventy mety ho tôjy atsika, ke mety hampavery hevitry atsika?

16. Ino raha nan̈ampy Geydi hiaritry, tafarany nifatesany vadiny? Amy karakory?

¹⁶ Ty raha nahazo i Geydi, ranabavy araiky mipetraka a Goatemalà. Nivonenolo tamasonany vadiny, taminiro nody baka nivory. Edi an̈arany vadiny io. Ino raha nan̈ampy i Geydi tsy ho resiny alahelo dila loatra? Finoan̈a. Karaha ty ho izy: “Nivavaka zaho, avio napetrako tamy Jehovah raha jiaby navesatra taminaka. Ke nanjary nilamin̈y fônaka ndreky jerinaka. Tsapako fa Jehovah ten̈a mikarakara zaho. Nampiasa iry havako ndreky piaramanompo izy. Niezaka koa zaho nanompo tsy tapaka. Raha aby zen̈y ten̈a nampakirikiry alahelonaka ndreky nan̈ampy zaho tsy ho rivan̈a na hiasaloha be amy raha hiboaka amaray. Raha niain̈ako aby io nampianatra zaho fa, na ino na ino fitsapan̈a mety ho avy, ho vitako fo hiatriky zen̈y fotony Jehovah ndreky Jesosy avio fandaminan̈a man̈ampy atsika.”

17. Ino aby raha mila ataontsika izikoa fa miatriky problemo maventy mira bongo?

¹⁷ Malahelo ma anao fotony nisy havanao na kamaradinao naty? Manokàn̈a fotoan̈a hisaintsain̈ana momba fitsanganan̈a amy maty.  Vakia tantaranolo natsangana tamy maty koran̈iny Baiboly ao, fotony zen̈y raha hankafatra finoan̈anao. Malahelo mare ma anao fotony nisy havanao voaroaka? Izikoa zen̈y, mianara Baiboly baka anao hatoky fa man̈ano ny rariny fo Jehovah izikoa fa man̈itsy panomponany. Na ino na ino problemonao, araraota raha sarotro andalaovanao zen̈y ankafataran̈a finoan̈anao. Koràn̈a amy Jehovah raha tsapanao. Aza mitokatokan̈a, fa mifandraisa amy piaramanompo. (Ohab. 18:1) Mety hahatsiaro raha nandalo taminao anao, ke mety ho latsaka foeky ranomaso. Fa aza rivan̈a, ataova zay raha mety han̈ampy anao hiaritry. (Sal. 126:5, 6) Mazotoa fo mivory, avio aza vôly mitory ndreky mianatra Baiboly. Aza adoso amy jerinao foeky raha tsara ampan̈antinainy Jehovah aminy amaray. Izikoa hitanao fa man̈ampy anao ankitin̈y Jehovah, hahaiho fatatra fo finoan̈anao.

18. Izikoa hitanao fa mbala tsy ten̈a fatatra finoan̈anao, ino raha mila ataonao?

¹⁸ Izikoa tsapanao baka tamy raha niaretanao taloha na amy zioty, fa mbala tsy ten̈a fatatra finoan̈anao, aza kivy. Iziô fotoan̈a mbala mety ankafataranao finoan̈anao. Man̈anaova karaha iro apostoliny Jesosy aby io. Iro nangataka tamy Jesosy karaha ty: “Ampitombosa finoan̈anay.” (Lioka 17:5) Diniha koa tantarany piaramanompo nikoran̈intsika tamy lahatsoratra ty, karaha ataony Miguel ndreky Yurai. Mbala azondro onon̈o fo fotoan̈a jiaby nan̈ampiany Jehovah iro. Karaha zen̈y koa zanakany Vero man̈angy in̈y, avio Anel. Iro nivavaka mare tamy Jehovah, intsaka eky tamy problemo be navoa iro in̈y. Hitany Geydi koa fa nampiasa havan̈a ndreky naman̈a i Jehovah nan̈ampian̈a izy. Izikoa Jehovah ambelanao han̈ampy anao, ho vitanao fo hiatriky fitsapan̈a mahazo anao amy zioty, avio hahaihatoky fo anao fa na ino na ino raha sarotro mbala hidiavinao, izy tsy maintsy han̈ampy anao fo.

19. Ino raha natokisany Jesosy, baka io ino raha mety atokisanao?

¹⁹ Tsy nisalasala foeky Jesosy nan̈ampy pianatranany hahita fa mbala nila nampitombosindro finoan̈andro. Fa ndray zen̈y, natoky izy fa han̈ampy iro Jehovah ke ho vitandro fo hiatriky fitsapan̈a mbala ho avy. (Jaona 14:1; 16:33) Natoky koa izy fa ho hisy vahoaka be ho tafiboaka velon̈o amy fahorian̈a be, fotony iro io manan̈a finoan̈a matanjaka. (Apok. 7:9, 14) Mety ho an̈isany vahoaka be io anao, izikoa rango izioty, anao efa mifen̈y mankafatatra finoan̈anao. Salakady Jehovah lastio von̈ono han̈ampy anao.—Heb. 10:39.