1. ¿Xi zándaca guinabadiidxanu?

¿ÑEE ridxibihuiiniluʼ ora guiníʼ íqueluʼ xi zazaacaʼ ora guinitilú religión ni cadi dxandíʼ, ora gucaalú Gog de Magog xquidxi Dios ne ora gueeda Armagedón la? ¿Ñee huaníʼ íqueluʼ pa zácaluʼ fiel ora guizaaca ca cosa riʼ la? Pa zácani, guizáʼ zacané ca diidxaʼ ni guníʼ Jesús ni zeeda lu textu stiʼ artículo riʼ lii. Sicaríʼ gudxi Jesús ca discípulo stiʼ: «Cadi guiuubaʼ ladxidoʼto. Lagapa fe Dios» (Juan 14:1). Pa naguidxi fe stinu zanda gudxíʼlunu ca cosa ni zazaaca despué.

2. ¿Xi zanda gúninu para guquídxinu fe stinu ne xi zadúʼyanu lu artículo riʼ?

² Ti cosa ni zanda gúninu para iguidxi fe stinu ne ganda gudxíʼlunu ca prueba ni gueeda despué nga guidúʼyanu ximodo rudxíʼlunu ca guendanagana ni nápanu yanna. Zacá zánnanu xi caquiiñeʼ gúninu para iguidxi fe stinu. Cada biaje tídinu ti guendanagana riguidxi fe stinu ne racané ni laanu guni huantarnu ca guendanagana ni gueeda despué. Lu artículo riʼ, zadúʼyanu tapa cosa ni bisihuinni caquiiñeruʼ gapa ca discípulo stiʼ Jesús fe. Laaca zadúʼyanu xi zanda gacané laanu para guni huantarnu ca guendanagana casi ni gupa ca discípulo ne ximodo zacané ca ni laanu lu ca dxi ni zeeda.

3. Casi riete lu Mateo 6:30, 33, ¿xi guníʼ Jesús de fe?

³ Nánnanu ruyubi ca hombre ni naca xaíque ndaaniʼ familia ni gó ni gacuʼ ne ti lugar ra cueza xheelaʼ ne ca xiiñiʼ. Nánnanu nuu biaje rácani nagana para laacabe jmaruʼ si tiempu riʼ. Nuu hermanu maʼ biniti dxiiñaʼ stiʼ ne neca cuyúbicaʼ sti dxiiñaʼ qué ridxélacaʼ ni ne nuu xcaadxi hermanu qué rinacaʼ  guicaacaʼ ti dxiiñaʼ purtiʼ cadi jneza guni ca xpinni Cristu ni. Ora guizaacanu ca ni bizéʼtenu riʼ caquiiñeʼ gápanu fe zudii Jehová laanu ni caquiiñenu, ne nga peʼ nga ni gudxi Jesús ca discípulo stiʼ lu Sermón del Monte (biindaʼ Mateo 6:30, 33). Pa qué guiaandaʼ laanu qué ziuu dxi gusaana Jehová laanu, zaguixhe íquenu gúninu ni ná Reinu stibe primé lu xquendanabáninu ne ora guidúʼyanu ximodo racané Jehová laanu gápanu ni iquiiñenu, jma zuni sentirnu nuunu gaxha de laabe ne jma naguidxi zaca fe stinu.

4, 5. ¿Xi huayacané ti familia gápacaʼ ni guibaninecaʼ ne cadi chuʼcaʼ xizaa?

⁴ Guidúʼyanu ni bizaaca familia Castro, de Venezuela. Maʼ biiyacabe ximodo huayacané Jehová laacabe gápacabe ni guibaninécabe ne cadi chúʼpecabe xizaa. Biʼniʼ familia riʼ dxiiñaʼ lu ti layú ni nápacaʼ para gápacaʼ ni guibaninecaʼ. Peru ti dxi, guyé caadxi hombre ni naaze guiibaʼ gúxhacaʼ layú stícabe ne guládxicaʼ laacabe. Sicaríʼ guníʼ Miguel, xaíque stiʼ familia que: «Yanna maʼ rúnidu dxiiñaʼ lu ti ndaa layú ni bitiiñecabe laadu, guirá dxi primé ni runeʼ nga rinabaʼ Jehová gudii laadu ni caquiiñedu para dxi ca». Nagana modo nabani familia Castro, peru nápacabe fe zudii Bixhózenu, Jehová, ni tiidinécabe dxi. Nga runi, qué riaadxacabe reunión ne runi predicárcabe, rúnicabe ni ná Reinu stiʼ Dios primé lu xquendanabánicabe ne rapa Jehová laacabe.

⁵ Tiempu ca, qué rusiaandaʼ Miguel ne xheelaʼ ni láʼ Yurai, ximodo huayapa Jehová laacaʼ. Nuu biaje huaquiiñeʼ Jehová ca hermanu para gudiicaʼ laacabe ca cosa ni caquiiñecabe o para gacanecaʼ Miguel guidxela ti dxiiñaʼ. Ne nuu biaje huaquiiñeʼ Jehová ca labor de socorro ni rudii sucursal para gápacabe ni iquiiñecabe. Qué huasaana Jehová laacabe ne pur nga jma naguidxi nuu fe stiʼ familia riʼ. Despué de guníʼ xiiñicabe huaniisi ni lá Yoselin ximodo gucané Jehová laacabe lu ti cosa, laaca bizeetebe: «Riecheʼ ora guuyaʼ ximodo huayacané Jehová laadu, ruuyaʼ laabe casi xhamiguaʼ ni siempre racané naa lu xquendanabaneʼ». Laaca guniʼbe: «Guiráʼ ca guendanagana ni huayapa familia stinneʼ racané ca ni laadu para gudxíʼludu ca prueba jma nagana ni gueeda despué».

6. ¿Xi zacané lii uquídxiluʼ fe stiluʼ pa huaxiéʼ bueltu nápaluʼ?

⁶ Nánnanu nagana nga ora huaxiéʼ napa binni bueltu para tidiné dxi. Neca nagana ni, zanda iquiiñeluʼ tiempu stiluʼ para uquídxiluʼ fe stiluʼ. Biʼniʼ orar Jehová, biindaʼ ca diidxaʼ ni guníʼ Jesús ni zeeda lu Mateo 6:25-34 ne guníʼ ique ni bíʼndaluʼ ca. Laaca zanda guiníʼ íqueluʼ ximodo rapa Jehová ca xpinni de tiempu riʼ ni runi ni nabe primé lu xquendanabánicaʼ (1 Cor. 15:58). Ne zacané ni lii uquídxiluʼ confianza ni nápaluʼ Bixhózenu ni nuu guibáʼ purtiʼ cásica huayacanebe xcaadxi, laaca zacanebe lii. Nánnabe xi  caquiiñeluʼ ne nánnabe ximodo gudiibe ni lii. Ora ruuyaluʼ ximodo racané Jehová lii lu xquendanabániluʼ, riguidxi fe stiluʼ ne zanda guni huantarluʼ ca guendanagana ni guidxaagaluluʼ despué (Hab. 3:17, 18).

7. Casi ná relatu ni zeeda lu Mateo 8:23-26, ¿ximodo bisihuinni ti tormenta nadipaʼ pabiáʼ fe napa ca discípulo?

⁷ Ti biaje zeʼ Jesús né ca discípulo stiʼ ndaaniʼ ti canuá, málasi biasa ti tormenta lu nisadóʼ biquiiñeʼ Jesús ni bizaacaʼ riʼ para gacané laacabe gánnacabe caquiiñeʼ gápacabe jma fe (biindaʼ Mateo 8:23-26). Nadipaʼ tormenta que dede ruchii ca ola que canuá que, peru nisiaasiʼ Jesús. Guizáʼ cadxibi ca discípulo que ne guyecaʼ yegucuaanicaʼ Jesús para gulá laacaʼ. Para bicabi Señor laacabe né diidxaʼ nadóʼ: «¡Aque huaxiéʼ fe nápatu xa, hombre caʼ! ¿Xiñee nabé cadxíbitu pue?». Biaandaʼ ca discípulo que zanda gulá Jehová ne Jesús laacaʼ. ¿Xi rusiidiʼ ndiʼ laanu? Naquiiñeʼ gápanu ti fe naguidxi purtiʼ laani zacaneni laanu gudxíʼlunu ca guendanagana ni guidxaagalunu ni zeeda gaca casi ti tormenta.

8, 9. ¿Xi bizaaca Anel ni bisihuinni pa naguidxi nuu fe stiʼ ne xi gucané laa?

⁸ Guidúʼyanu ximodo biguidxi fe stiʼ ti hermana soltera de Puerto Rico ni láʼ Anel ora gudiʼdiʼ ti guendanagana. Bininá huracán María Puerto Rico lu iza 2017 ne biniti Anel lidxi ne dxiiñaʼ stiʼ. Laa guníʼ: «Guizáʼ bidxibeʼ ca dxi que, peru biziideʼ guyubeʼ gacané Jehová naa ra guneʼ orar ne cadi chuaa piaʼ xizaa ti cadi guninani naa».

⁹ Bizeeteʼ Anel guyuu sti cosa ni gucané laa gudxiilú guendanagana que ne laani nga guzuubabe diidxaʼ. Laabe guniʼbe: «Ra yenandaʼ ca instrucción ni bidii xquidxi Dios gucaneni naa cadi guidxibeʼ. Gucané Jehová naa ra bidii ca hermanu ne ca hermana para cuʼcaʼ gana naa ne gudiicaʼ naa ca cosa ni caquiiñeʼ». Ne laaca guníʼ: «Bidii Jehová naa jma de biaʼ guníʼ iqueʼ ne guizáʼ biquídxini fe stinneʼ».

10. ¿Xi zanda gúniluʼ pa cadxaagaluluʼ ti guendanagana ni zeeda gaca casi ti tormenta nadipaʼ?

¹⁰ ¿Ñee cadxaagaluluʼ ti guendanagana ni zeeda gaca casi ti tormenta la? Zándaca cayacanaluʼ pur ti desastre natural. O zándaca nápaluʼ ti guendahuará nabé malu ni maʼ bisidxaga lii ne maʼ qué guidxélaluʼ xi gúniluʼ. Nuu biaje, ziuuluʼ xizaa peru cadi gudiiuʼ lugar guirá confianza ni nápaluʼ Jehová. Bixheleʼ ladxidoʼloʼ nezalube ne gudxi laabe guiráʼ ni cayuni sentirluʼ. Zaguidxi fe stiluʼ pa guiníʼ íqueluʼ guiráʼ biaje huayacané Jehová lii (Sal. 77:11, 12). Zanda chuʼluʼ seguru qué ziuu dxi gusaana Jehová lii.

11. ¿Xiñee naquiiñeʼ guzúʼbanu stiidxaʼ ca hermanu ni zániru ndaaniʼ xquidxi Dios?

¹¹ ¿Xiruʼ zacané lii para guni huantarluʼ ca guendanagana stiluʼ? Casi guníʼ Anel,  naquiiñeʼ guzúʼbanu diidxaʼ. Biziidiʼ gápaluʼ confianza ca binni ni napa Jehová ne Jesús confianza. Nuu biaje, zándaca gudii ca hermanu ni zániru ndaaniʼ xquidxi Dios laanu instrucción ni ruluíʼ cadi biaʼsi para laanu. Peru cadi guiaandaʼ laanu, riguu Jehová ndaayaʼ ca binni ni ruzuubaʼ diidxaʼ. Racané Biblia ne experiencia stiʼ ca xpinni Jehová laanu, purtiʼ rusiidicaʼ ni laanu pa guzúʼbanu diidxaʼ zanda gulani xpídanu (Éx. 14:1-4; 2 Crón. 20:17). Guníʼ ique ca ejemplu ca ne nga zacané lii chinándaluʼ ca instrucción ni rudii xquidxi Dios yanna ne despué (Heb. 13:17). Pa gúninu ni, qué zadxíbinu ca guendanagana ni maʼ cadi candaa zadxaagalunu (Prov. 3:25).

12. Casi ná Lucas 18:1-8, ¿ximodo zacané fe ca laanu guni huantarnu ca cosa ni cadi jneza gúnicabe laanu?

¹² Nanna Jesús zahuinni pa naguidxi nuu fe stiʼ ca discípulo stiʼ ora guni binni laacaʼ cosa ni cadi jneza. Para gacanebe laacaʼ guni huantarcaʼ, guniʼbe ti historia ni zanda guidxélanu lu libru stiʼ Lucas. Bizeetebe de ti viuda ni nabé guyé ra nuu ti juez ni qué runi ni jneza para guinabaʼ laabe gúnibe justicia. Nanna viuda riʼ, pa qué gusaana de guinabaʼ gacané juez que laa, zuni ni. Ne zaqué gúcani. ¿Xi rusiidiʼ ndiʼ laanu yaʼ? Nánnanu jneza runi Jehová ne cadi nácabe casi juez ni bizeeteʼ Jesús que. Nga runi, guníʼ Jesús: «¿Ñee qué zuuyaʼ Dios gaca justicia pur ca binni ni maʼ gulí, ca ni rucaa ridxi laabe ridxíʼ ne huaxhinni [...] la?» (biindaʼ Lucas 18:1-8). Despué guníʼ Jesús: «Ora gueeda Xiiñiʼ Hombre, ¿ñee zadxélabe fe riʼ lu guidxilayú la?». Ora guni binni laanu cosa ni cadi jneza, naquiiñeʼ gusihuínninu naguidxi fe stinu cásica viuda que ra gápanu paciencia ne cadi guireʼnu gana. Fe ca zacané laanu gánnanu zacané Jehová laanu. Laaca naquiiñeʼ guni crenu zacané oración laanu. Nuu biaje, zándaca guicabi Jehová ca oración stinu modo cadi cabézanu ni.

13. ¿Ximodo gucané oración ti familia ni gudiʼdiʼ ti guendanagana neca qué gápacaʼ donda?

¹³ Guidúʼyanu ni bizaaca ti hermana láʼ Vero, laa nabeza República Democrática del Congo, laa ne xheelaʼ, ni cadi naca Testigu, ne xiiñicaʼ ni napa 15 iza. Gupa xidé bireecabe lugar ra nabézacabe purtiʼ bicaalú caadxi soldadu raqué. Neza zécabe que, bicueeza caadxi soldadu laacabe ne gúdxicaʼ laacabe zuuticaʼ laacabe. Bizulú Vero cayuunaʼ, peru xiiñibe bizulú cayuni orar para quixhedxí ladxidoʼbe ne caníʼ stale biaje lá Jehová. Despué de biʼniʼ orarbe, gunabadiidxaʼ ti soldadu laabe: «Dxaapahuiiniʼ, ¿tu bisiidiʼ lii guni orarluʼ?». Laabe bicábibe: «Jñaaʼ bisiidiʼ naa,  ne yenándabe ni ná Mateo 6:9-13». Soldadu que gudxi laabe: «Cadi guidxíbitu, zanda tíditu ne Jehová, Dios stitu gapa laatu».

14. ¿Xi cosa zusihuinni pa naguidxi nuu fe stinu, ne xi zacané laanu para guni huantarnu?

¹⁴ Ca experiencia riʼ, rusiidiʼ ca ni laanu qué chuʼ dxi guiníʼ íquenu qué zacané oración laanu. Peru ¿pa cadúʼyanu cadi cacabi Jehová oración stinu nagueenda ne modo racaláʼdxinu yaʼ? Cásica viuda ni bizeeteʼ Jesús que, laaca cadi naquiiñeʼ gusaana de guni orarnu ne gápanu confianza qué zusaana Dios stinu laanu ne laabe maʼ nánnabe pora guicábibe ca oración stinu. Cadi gusaana de guinábaluʼ Jehová espíritu santu stiʼ (Filip. 4:13). Bietenalaʼdxiʼ maʼ cadi candaa zaguu Jehová ndaayaʼ lii dede zusiaandaluʼ guiráʼ guendanagana ni gúpaluʼ dxiqué. Ra cayacané Jehová lii guni huantarluʼ ca guendanagana stiluʼ, zudiini lii jma stipa para gudxiiluluʼ ca guendanagana ni guidxaagaluluʼ despué (1 Ped. 1:6, 7).

15. Casi ná Mateo 17:19, 20, ¿xi guendanagana gupa ca discípulo stiʼ Jesús?

¹⁵ Bisiidiʼ Jesús ca discípulo stiʼ zacané fe laacaʼ para tídicaʼ ca guendanagana ni gápacaʼ (biindaʼ Mateo 17:19, 20). Neca stale biaje gunda guleecabe demonio lu xcuerpu binni, ti biaje qué ñanda ñúnicabe ni. ¿Xiñee yaʼ? Bisiene Jesús laacabe caquiiñeʼ gápacabe jma fe. Gúdxibe laacaʼ pa ñápacaʼ stale fe ñanda nudxiilucaʼ intiica guendanagana neca gácani naroʼbaʼ biaʼ ti dani. Laanu laaca zanda gudxíʼlunu ca guendanagana gápanu neca ruluíʼ qué zanda tídinu cani.

16. ¿Ximodo huayacané fe stiʼ Geydi laa gudxiilú ti guendanagana ni gupa?

¹⁶ Guidúʼyanu ni bizaaca ti hermana de Guatemala lá Geydi. Biiticabe xheelabe ni láʼ Edi, ora biguétacabe de ti reunión. Bizeeteʼ hermana riʼ ximodo huayacané fe stiʼ laa para gudxiilú yuubaʼ stiʼ. Sicaríʼ guniʼbe: «Runeʼ orar, rabeʼ Jehová guiráʼ ni naguu xizaa naa ne riguixhedxí nga ladxiduáʼ. Ruuyaʼ ximodo rápabe naa ora riquiiñebe familia stinneʼ ne ca hermanu de congregación. Runeʼ xhiiñaʼ Jehová para cadi chuaaʼ piaʼ triste ne cadi chuaaʼ xizaa pur ni guizaaca despué. Ni bizaacaʼ riʼ gucaneni naa gannaʼ zanda gudxieeluáʼ intiica guendanagana ni gapaʼ purtiʼ cayacané Jehová, Jesús ne xquidxi naa».

17. ¿Xi zanda gúninu ora guidxaagalunu ti guendanagana naroʼbaʼ biaʼ ti dani?

¹⁷ ¿Ñee guti ti binni ni nadxiiluʼ la? Pa zacá ni, gulee tiempu para gúʼndaluʼ ca relatu stiʼ ca binni ni riete lu Biblia ni biasa de lade gueʼtuʼ ti gaca fe stiluʼ jma naguidxi. ¿Ñee nuuluʼ triste pur guca expulsar ti familia stiluʼ la? Biʼniʼ estudiar para chuʼluʼ seguru jneza nga disciplina stiʼ Dios. Intiica guendanagana ni gápaluʼ, biquiiñeʼ ni para guquídxiluʼ fe stiluʼ. Gudxi Jehová  guiráʼ ni nuu ndaaniʼ ladxidoʼloʼ ne lugar de guixéleluʼ de ca hermanu guyuu gaxha de laacaʼ (Prov. 18:1). Biʼniʼ xhiiñaʼ Jehová purtiʼ zacaneni lii guni huantarluʼ neca gúʼnaluʼ ora guietenaláʼdxiluʼ guiráʼ ni bizaacaluʼ (Sal. 126:5, 6). Cadi gusaana de cheluʼ reunión, biʼniʼ predicar, biindaʼ Biblia ne cadi gusaana de guiníʼ íqueluʼ ca ndaayaʼ ni maʼ biʼniʼ prometer Jehová lii. Jmaruʼ si naguidxi zaca fe stiluʼ ora gúʼyaluʼ modo cayacané Jehová lii.

18. ¿Xi caquiiñeʼ gúniluʼ pa gudiiluʼ cuenta caquiiñeruʼ gápaluʼ jma fe?

¹⁸ Cadi guireeluʼ gana pa bihuinni huaxiéʼ fe nápaluʼ ora gudíʼdiluʼ ti prueba ni gúpaluʼ dxiqué o ni nápaluʼ yanna. Biquiiñeʼ ni para guquídxiluʼ fe stiluʼ jma ne laaca zanda guinábaluʼ ni gunabaʼ ca apóstol stiʼ Jesús: «Dané laadu jma fe» (Luc. 17:5). Guníʼ ique ni bizaaca ca binni ni biete lu artículo riʼ. Bietenalaʼdxiʼ ca biaje huayacané Jehová lii casi biʼniʼ Miguel ne Yurai. Biʼniʼ orar Jehová de guidubi ladxidoʼloʼ dede né ora cadíʼdiluʼ ra jma nagana cásica biʼniʼ Anel ne xiiñiʼ Vero. Ne cásica biʼniʼ Geydi bidii lugar gacané Jehová lii ra iquiiñeʼ ca familia stiluʼ o ca hermanu. Pa gudiiluʼ lugar gacané Jehová lii lu ca guendanagana ni nápaluʼ yanna, jmaruʼ si zápaluʼ confianza zacanebe lii gudxiiluluʼ ca guendanagana ni gápaluʼ despué.

19. ¿Xi gunna dxichi Jesús, ne xi zanda ganna dxíchiluʼ?

¹⁹ Biluíʼ Jesús paraa naquiiñeʼ gusihuinni ca discípulo stiʼ caquiiñeʼ gápacaʼ jma fe. Peru nánnabe zacané Jehová laacaʼ gudxiilucaʼ ca guendanagana ni gápacaʼ despué (Juan 14:1; 16:33). Laaca nánnabe zalá stale binni lu gran tribulación purtiʼ naguidxi fe sticaʼ (Apoc. 7:9, 14). ¿Ñee ziuuluʼ lade ca binni ni guilá ca la? Pa dede ca yanna guquídxiluʼ fe stiluʼ, zaca Jehová nachaʼhuiʼ né lii ne zanda guilaluʼ (Heb. 10:39).